কাকডোঙা নদীৰ বিহখোৱা ঘাটৰ সমীপত প্ৰকৃতিৰ নৈসৰ্গিক পৰিবেশত “উত্তৰ-পূৱ গোলাঘাট কবি সন্মিলনে “আঘোণৰ ৰ’দালিত কবিতাৰ গুণগুণ”শীৰ্ষক কবি মেল আৰু গ্ৰন্থ উন্মোচনী অনুষ্ঠান ২৪ নৱেম্বৰত সম্পন্ন কৰে। শিশু শিল্পী অন্তৰা ৰাগিনী দত্তই পৰিবেশণ কৰা টোটয় পাঠেৰে কাৰ্যসূচীৰ শুভাৰম্ভ কৰা হয়।দিনৰ এঘাৰ বজাৰ পৰা আৰম্ভ হোৱা কবিতাৰ মেল সঞ্চালনা কৰে বিশিষ্ট গল্পকাৰ,কবি ফুলেন কুমাৰ বৰাই।কবি সাদৰী বৰা,গিৰিশ দত্ত,ইন্দু হাতী বৰুৱা,গনেশ কছাৰী, ৰবীন্দ্ৰ দেৱ,অংকুৰ বুঢ়াগোহাঁই, নবীন হাজৰিকা, তফজ্জুল হক বৰবৰা,লক্ষ্মীচৰণ কুৰ্মী,মামণি বৰা,আদিত্য বৰবৰা, বিপুল বৰুৱা, ৰূপালী মহন্ত,চম্পা নেওগ,দীপশিখা বৰুৱা,লক্ষেশ্বৰ গগৈ,দুলুমনি বৰা,জ্যোতিকা ৰাজখোৱা,দিগন্ত বৰা,বিপুল বৰুৱা, অভিজিত শইকীয়া,সংগীতা দত্ত,স্বপ্না শইকীয়া আদি প্ৰায় দুকুৰিৰো অধিক কবিয়ে স্বৰচিত কবিতা পাঠ কৰে।বিউটি কলিতাই সম্পাদনা কৰা কবি সন্মিলনৰ মুখপত্ৰ “শব্দ প্ৰৱাহ” উন্মোচন কৰে অৱসৰপ্ৰাপ্ত শিক্ষক,লেখক ইন্দ্ৰ বৰাই।এই অনুষ্ঠানতে কৃতী শিক্ষয়িত্ৰী বন্দনা দত্ত আৰু দুলুমনি বৰা দত্তক বিশেষ সম্বৰ্ধনা জনোৱা হয়।  উত্তৰ পূব গোলাঘাট কবি সন্মিলনৰ সম্পাদিকা বন্দনা দত্তই আঁত ধৰা অনুষ্ঠানটো কাব্যমন্ত্ৰ পাঠেৰে কাৰ্যসূচীৰ সামৰণি মৰা হয়।

অসম চৰকাৰৰ কেবিনেট মন্ত্ৰী অতুল বৰাই ৰঙিয়া বিধানসভা সমষ্টিৰ অন্তৰ্গত ৰঙিয়া আদৰ্শ চিকিৎসালয়ৰ চৌহদত নৱ নিৰ্মীয়মান ৪৮ খন বিছনা যুক্ত আই চি ও(ICU)চিকিৎসালয়খন পৰিদৰ্শন কৰাৰ লগতে স্বাস্থ্যকৰ্মীসকল আৰু চিকিৎসসকলৰ লগত মত-বিনিময় কৰে। লগতে বড়িগোগ গাঁও পঞ্চায়তৰ অন্তৰ্গত কনিহাৰ উত্তৰণ কৃষি উৎপাদক কোম্পানী লিমিটেড নামৰ প্ৰতিষ্ঠানটোৰ মুখ্য কাৰ্যালয়ত কেবিনেট মন্ত্ৰী অতুল বৰাৰ সৈতে ৰাজ্যিক বিজেপিৰ সভাপতি তথা ৰঙিয়াৰ স্থানীয় বিধায়ক ভবেশ কলিতাই উপস্থিত হৈ প্ৰতিষ্ঠানটোৰ জৰিয়তে চলি থকা এফ পি চি(FPC) প্ৰকল্প টোৰ কাম-কাজৰ বুজ লয় আৰু প্ৰতিষ্ঠানটোৰ কামত ব্যৱহাৰ হোৱা যন্ত্ৰ পাতি সমূহ পৰিদৰ্শন কৰাৰ লগতে প্ৰতিষ্ঠানটোৰ বিষয়ববীয়া তথা কৰ্মচাৰী সকলৰ লগত মত বিনিময় কৰি কৃষিজাত সামগ্ৰীসমূহৰ  বুজ লয়। এই সময়চোৱাত মন্ত্ৰী গৰাকীক সংগ দিয়ে মহকুমাধিপতি স্বপ্নীল পাল(আইএএছ) আৰু প্ৰশাসনৰ বিষয়ববীয়া সকলে।

আঘোণৰ পথাৰত এতিয়া ব্যস্ততা বাঢ়িছে কৃষকৰ। শাওনৰ পথাৰত প্ৰখৰ ৰ’দত কপালৰ ঘাম মাটিত পেলাই আশাৰ সপোন দেখা কৃষকে ভুঁই ৰোৱা সেউজীয়া ধাননীডৰা এতিয়া সোণোৱালী হ’ল। সোণোৱালী ধান চপোৱাৰ সময় এয়া। সেয়েহে এতিয়া ব্যস্ততা বাঢ়িছে কৃষকৰ। হাতত কাঁচি লৈ জীয়ৰী-বোৱাৰী দাৱনী জাক এতিয়া ব্যস্ত সোণগুটি চপোৱাত। তেনে সময়তে আজি সোণাৰিৰ ভজোৰ ধাননি পথাৰত দাৱনীৰ ৰূপত দেখা গ’ল সোণাৰিৰ বিধায়ক ধৰ্মেশ্বৰ কোঁৱৰক। হাতত কাঁচি লৈ ধান চপালে বিধায়কগৰাকীয়ে। উল্লেখ্য যে, সোণাৰিত কৃষি বিভাগৰ উদ্যোগত পৰীক্ষামূলক ভাৱে ৰোপন কৰা দহবিধ বিভিন্ন জাতৰ ধান চপোৱাৰ উদ্দেশ্যে আজি এক অনুষ্ঠান আয়োজন কৰা হয়। অনুষ্ঠানত সোণাৰি সমষ্টিৰ বিধায়ক ধৰ্মেশ্বৰ কোঁৱৰ উপস্থিত থাকি ধান চপোৱা কাৰ্যৰ শুভাৰম্ভ কৰে। আত্মাৰ উদ্যোগত অনুষ্ঠিত এই অনুষ্ঠানত উপস্থিত থকা এপাৰ্টৰ বিষয়াই জানিবলৈ দিয়া অনুসৰি সোণাৰিৰ ভজোত বিশ্ব বেংকৰ অৰ্থ সাহাৰ্যত এপাৰ্ট আঁচনিৰ অধীনত চৰাইদেউ কৃষি বিভাগৰ উদ্যোগত দুই বিঘা মাটিত পৰীক্ষা মূলকভাৱে ৰোপন কৰা হৈছিল  দহটা উন্নত জাতৰ কঠিয়া। এই  আঁচনিৰ জৰিয়তে উৎপাদিত ধানৰ গৱেষণা কৰা হব আন্তঃৰাষ্ট্ৰীয় ধান গৱেষণা কেন্দ্ৰত। আগষ্ট মাহত ৰোপন কৰা কঠিয়াৰ উৎপাদিত ধান চপোৱাৰ লগতে মূল্যায়নৰ উদ্দেশ্যে আজি ভজোৰ পথাৰত অনুষ্ঠিত হোৱা কাৰ্যসূচীত সোণাৰি সমষ্টিৰ বিধায়কগৰাকীৰ লগতে চৰাইদেউ জিলা কৃষি বিভাগৰ উপৰিও এপাৰ্টৰ বিষয়ববীয়া, আন্তঃৰাষ্ট্ৰীয় ধান গৱেষণা কেন্দ্ৰৰ বিষয়া, তথা স্থানীয় কৃষকসকল উপস্থিত থাকে।

কোকৰাঝাৰ জিলাৰ গোসাঁইগাঁৱত খাদ্যত বিষক্ৰিয়া হৈ ১০ গৰাকী ছাত্ৰ-ছাত্ৰী চিকিৎসাধীন হৈছে ৷ গোসাইগাঁও সদৰ চহৰ স্থিত ব্লুমিং বাড’ছ স্কুলৰ পঞ্চম শ্ৰেনীৰ এগৰাকী ছাত্ৰই তেৱৰ  জন্মদিন উপলক্ষে সহপাটি সকলক চকলেট বিতৰন কৰিছিল আৰু ছাত্ৰ-ছাত্ৰী সকলোৱে চকলেট খাইছিল ৷ শ্ৰেনীৰ প্ৰায় সকলো ছাত্ৰ-ছাত্ৰীয়ে চকলেট খাইছিল আৰু ইয়াৰে ১০ গৰাকী ছাত্ৰ-ছাত্ৰী পেটৰ আৰু গলৰ বিষ অনুভব কৰাৰ লগতে বমি অনুভব কৰে ৷ ক্ৰমেন্বয়ে ছাত্ৰ-ছাত্ৰীৰ শাৰিৰিক অবস্থা বেয়াৰ ফালে গতি কৰাত স্কুল কতৃপক্ষই ততাতৈয়াকৈ গোসাইগাঁও আৰ এন বি চিকিৎসালয়ত ভৰ্তি কৰে ৷ চিকিৎসক সকলে তাৎক্ষনিক ভাবে চিকিৎসা প্ৰদান কৰে আৰু সম্প্ৰতি সকলো ছাত্ৰ-ছাত্ৰী সংকটমুক্ত বুলি চিকিৎসালয়ৰ অধ্যক্ষ সুজিত কুমাৰ দাসে জানিব দিয়ে ৷ অসুস্থ ছাত্ৰ-ছাত্ৰী সকল ক্ৰমে ভিডি গোলছা,চন্দ্ৰমিকা ব্ৰহ্ম,ছাকিব মেহবুব,মিদুশ্ৰী বসুমতাৰী ,ছিয়া নাৰ্জাৰী,হিমা ৰানি মুছাহাৰী,ৰিমি নাৰ্জাৰী,মালেকা বেগম,উদ্দীপ্ত কুমাৰ দে আৰু গেৰেমছা বসুমতাৰী।