শতিকা বিস্তৃত বৌদ্ধিক তথা বিদ্যায়নিক উৎকৰ্ষ সাধনৰ মহান মন্ত্ৰেৰে অজস্ৰ মানৱ সম্পদ গঢ়িতোলা বিদ্যাৰ পীঠস্থান স্বৰূপ বৰপেটা চৰকাৰী উচ্চতৰ মাধ্যমিক বিদ্যালয়খনে সময়ৰ লেখেৰে ডেৰশ বছৰ সম্পূৰ্ণ কৰিলে।স্বৰাজ লাভৰ পূৰ্বেই নামনি অসমৰ বৃহৎ অংশৰ শৈক্ষিক উত্তৰণ আৰু মাৰ্গ দৰ্শনৰ প্ৰতিষ্ঠান স্বৰূপে ১৮৬৫ চনতে এখন বেচৰকাৰী মধ্য ইংৰাজী বিদ্যালয় হিচাপে আৰম্ভ হোৱা এই শিক্ষানুষ্ঠান ১৯৭১ চনত হাইস্কুললৈ উন্নীত হয়।ড০ বাণীকান্ত কাকতি ,কৰ্ণেল গুৰুপ্ৰসাদ দাস বা প্ৰসন্নলাল চৌধুৰীৰ দৰে চনামধন্য ব্যক্তিসকলৰ লগতেই দেশৰ- দহৰ-সমাজ জীৱনৰ বিভিন্ন দিশত অৰিহণা যোগোৱা অলেখ মানৱসম্পদ গঢ় দিয়াত এই শিক্ষানুষ্ঠানে প্ৰভূত অৰিহণা যোগাই আহিছে। ২০২০-২০২১ বৰ্ষত বিদ্যালয়খনৰ ডেৰশ বছৰীয়া জয়ন্তী উদযাপনৰ বাবে বছৰজোৰা বিস্তৃত কাৰ্যসূচী হাতত লোৱা হয় যদিও কোভিডকালীন জটিল পৰিস্থিতিযে এই প্ৰস্তুতি পথত বিৰুপ প্ৰভাৱ পেলায় । ইয়াৰ মাজতে উলাহ- উদ্দীপনাৰে ২০২১ চনৰ ৩১ জানুৱাৰী তাৰিখে ডেৰশ বছৰীয়া জয়ন্তীৰ আৰম্ভণি অনুষ্ঠানটি এদিনীয়াকৈ পালন কৰা হয়।কাৰ্যাসূচীৰ ধাৰাবাহিকতা ৰক্ষা কৰি ২০২১ বর্ষৰ ডিচেম্বৰ মাহৰ প্ৰথম মাৰ্ধত ‘ৰাষ্ট্ৰীয় নতুন শিক্ষানীতি’ বিষয়ত এখন আলোচনা চক্ৰ পতাৰ সিদ্ধান্ত গ্ৰহণ কৰা হয় আৰু আলোচনা চক্ৰত উপস্থিত থাকিবলৈ শিক্ষামন্ত্ৰী ডাঃ ৰনোজ পেগু আমন্ত্ৰণ জনোৱা হব।পৰৱৰ্তী পৰ্যায়ত ২০২২ বৰ্ষত ফেব্ৰুৱাৰী মাহৰ ১২ আৰু ১৩ তাৰিখে দুদিনীয়া বিস্তৃত কাৰ্যসূচীৰে ডেৰশ বছৰীয়া জয়ন্তীৰ সামৰণি অনুষ্ঠান অনুষ্ঠিত কৰা হব।উল্লেখযোগ্য যে আৰম্ভণিৰ পৰা কাৰ্যসূচী সমূহ সূচাৰুৰুপে পৰিচালনা কৰিবলৈ ব্ৰজেন্দ্ৰ কুমাৰ দাসক সভাপতি, নাছিৰুদ্দিন আহমেদক কাৰ্যকৰী সভাপতি, দিলীপ কুমাৰ দাস আৰু হৰেকৃষ্ণ দাসক সম্পাদক হিচাপে লৈ১৭ খন বিভিন্ন উপসমিতিৰে এখন বিশাল উদযাপন সমিতি গঠন কৰা হৈছে।ইয়াৰ লগতেই বিদ্যালয়খনৰ ঐতিহ্য আৰু গৰিমা তথা বৃহত্তৰ বৰপেটা অঞ্চলৰ আৰ্থ -সামাজিক-সংস্কৃতিক প্ৰেক্ষাপটৰ প্ৰতিনিধিত্ব মূলক উপস্থাপনৰ উদ্দেশ্যেৰে এখন বৃহৎ কলেবৰৰ স্মৃতিগ্ৰন্থ প্ৰকাশৰ দিহা কৰা হৈছে। বিদ্যালয়খনৰ ডেৰশ বছৰীয়া জয়ন্তীৰ সামৰণি অনুষ্ঠানৰ দুয়োটাদিনতে ন-পুৰণি ছাত্ৰ-ছাত্ৰী সন্মিলন তথা অন্তৰংগ আলাপ, মুকলি সভা, বাৰে বৰণীয়া সাংস্কৃতিক অনুষ্ঠান, সাংস্কৃতিক- ঐতিহ্য,বাৰ্তাবাহক বিশাল শোভাযাত্ৰা, প্ৰদৰ্শনী তথা মাৰাথান দৌৰৰ লগতেই খেল- ধেমালি আদি ভিন ভিন কাৰ্যসূচী ৰূপায়ণ কৰা হব। উল্লেখযোগ্য যে কাৰ্যসূচীসমূহত অংশগ্ৰহণৰ বাবে ৰাইজখনৰ বিভিন্ন দিশৰ কেইবাজনো প্ৰতিযথা ব্যক্তিক নিমন্ত্ৰণ কৰাৰ লগতে মুকলি সভাখনত বিশিষ্ট অতিথি স্বৰূপে অসমৰ মুখ্যমন্ত্ৰী ড০ হিমন্ত বিশ্ব শৰ্মাক নিমন্ত্ৰণ জনোৱা হব। দুয়োটি নিশাৰ কাৰ্যসূচীত বিদ্যালয়খনৰ ন-পুৰণি ছাত্র-ছাত্ৰী- শিক্ষাগুৰুৰ তথা স্থানীয় শিল্পীৰ অংশগ্ৰহণৰ লগতেই ৰাজ্যখনৰ বচা বচা শিল্পীৰ সমাহাৰ ঘটিব।এই সমস্ত কাৰ্যসূচীতে ন-পুৰণি ছাত্র শিক্ষকৰ লগতে সমূহ বৰপেটা বাসী ৰাইজৰ উপস্থিতি সহায় সহযোগিতা উদযাপন সমিতিয়ে আন্তৰিকতাৰে কামনা কৰিছে।
বিহগী কবিক স্মৰণ বিৰিণা গোষ্ঠী অসমৰ।ভাস্কৰ বৰ্মনলৈ ৰঘুনাথ চৌধাৰী সোঁৱৰণী বঁটা।
নলবাৰী জিলাৰ বৰক্ষেত্ৰীৰ বৰতলাৰ লক্ষ্মীমন্দিৰৰ সভাগৃহত কালি বিৰিণা গোষ্ঠী অসমে গোষ্ঠীটোৰ প্ৰতিমহীয়া সাহিত্য আলাপ “বিৰিণা বৈভৱ”, আৰু “বিহগী কবি ৰঘুনাথ চৌধাৰীৰ স্মৃতি দিৱস’ পালন কৰে । ইয়াৰ লগত সংগতি ৰাখি গ্ৰন্থ উন্মোচন আৰু বঁটা প্ৰদান অনুষ্ঠানো অনুষ্ঠিত হৈ যায়। অনুষ্ঠানটোৰ কাৰ্যসূচী অনুসৰি পুৱা ১০ বজাত বিৰিণা গোষ্ঠীৰ পতাকা উত্তোলন কৰে গোষ্ঠীটোৰ কেন্দ্ৰীয় সভাপতি লীলাধৰ পাঠকে। দিনৰ ২ বজাত অনুষ্ঠিত হয় বিহগী কবি ৰঘুনাথ চৌধাৰীৰ স্মৃতিচাৰণ সভা আৰু নৱেম্বৰ মাহৰ সাহিত্য আলাপ ‘বিৰিণা বৈভৱ’ শীৰ্ষক অনুষ্ঠান । অনুষ্ঠানটোত সভাপতিত্ব কৰে বিৰিণা গোষ্ঠী,অসমৰ সভাপতি লীলাধৰ পাঠকে । গোষ্ঠীটোৰ সম্পাদক তফিকুৰ ৰহমানে উদ্দেশ্য ব্যাখ্যা কৰা স্মৃতিচাৰণ সভাখনত আদৰণি ভাষণ প্ৰদান কৰে অনুষ্ঠানটোৰ আহ্বায়ক সংগীতা মেধিয়ে। অনুষ্ঠানটোত বন্তি প্ৰজ্বালন কৰি বৰতলাস্থিত মানেৰী সত্ৰৰ বৰ্ষিয়ান সত্ৰাধিকাৰ ধৰ্মনাৰায়ণ গোস্বামীয়ে ৰঘুনাথ চৌধাৰীৰ জীৱন-দৰ্শন আৰু কৰ্মৰাজিৰ বিষয়ে বক্তব্য দাঙি ধৰে । ৰঘুনাথ চৌধাৰীৰ প্ৰতিচ্ছবিত মাল্যাৰ্পণ কৰি দৌলাশাল জিলা পৰিষদৰ সদস্য তথা বিশিষ্ট অভিনেতা বিৰাজ মেধিয়ে বিৰিণা গোষ্ঠীৰ কাম-কাজত সন্তুষ্টি প্ৰকাশ কৰি গোষ্ঠীটোক সহযোগিতা আগবঢ়াই যাব বুলি কয় । বৰক্ষেত্ৰী আঞ্চলিক পঞ্চায়তৰ সভাপতি প্ৰীতম গোস্বামীয়ে সমূহীয়া শ্ৰদ্ধাঞ্জলি মুকলি কৰি বিৰিণা গোষ্ঠীৰ সৈতে সংপৃক্ত হ’বলৈ পাই ধন্য হোৱা বুলি দোহাৰে। মামনি পাটোৱাৰী বৰ্মনৰ ভক্তিমূলক গীতেৰে আৰম্ভ কৰা অনুষ্ঠানটো উদ্বোধন কৰি সদৌ অসম সাংবাদিক সন্থাৰ সাধাৰণ সম্পাদক নকুল তালুকদাৰে প্ৰথম অসমীয়া মুখ্য ন্যায়াধীশ হলিৰাম ডেকাই বিহগী কবি উপাধি প্ৰদান কৰা ৰঘুনাথ চৌধাৰীৰ উচিত মূল্যায়ন হোৱা নাই বুলি আক্ষেপ কৰাৰ লগতে তেওঁৰ কৰ্মৰাজি সম্পৰ্কত বিশদ বিৱৰণ দাঙি ধৰে । সন্মানীয় অতিথি হিচাপে উপস্থিত থাকি কৃষ্ণগুৰু আধ্যাত্মিক বিশ্ববিদ্যালয়ৰ অসমীয়া বিভাগৰ মুৰব্বী অধ্যাপক ড° মাধুৰ্য্যমণ্ডিত বৰুৱাই অসম বুৰঞ্জীৰ তথ্য দাঙি ধৰি ৰঘুনাথ চৌধাৰীৰ জন্ম গাঁও লাউপাৰাৰ আৰু এই ভুখণ্ডৰ এটি পৰিচয় দিয়াৰ লগতে ৰঘুনাথ চৌধাৰীৰ কবিতা তত্ত্ব, ভাৱাদৰ্শ, জীৱন-দৰ্শন আৰু সৃষ্টিৰাজি সন্দৰ্ভত বিস্তৃত আলোচনা আগবঢ়াই ৰঘুনাথ চৌধাৰী এগৰাকী পূৰ্ণ মানৱ আছিল বুলি কয় । ভাষণ প্ৰসংগত তেখেতে কয় যে বিৰিণা গোষ্ঠীয়ে সাগৰ তলিত মানিক বিচাৰি ঘূৰি ফুৰে আৰু সমাজ-জীৱনৰ অনাদৃত হৈ থকা প্ৰতিভা তুলি আনি উচিত ঠাইত সংস্থাপিত কৰাৰ যত্ন কৰি আহিছে । গোষ্ঠীটোৱে সমাজ জীৱনৰ লগতে বৌদ্ধিক সমাজলৈ যথেষ্ট বৰঙণি আগবঢ়াই আহিছে’। প্ৰকৃতিৰ কবি ৰঘুনাথ চৌধাৰী সন্দৰ্ভত তেখেতে পুনৰ কয় যে ‘মাধৱ কন্দলীৰ পিছতে ৰমন্যাসবাদ কবি হিচাপে শ্ৰেষ্ঠ কবি ৰঘুনাথ চৌধাৰী । তেওঁ প্ৰকৃতিক সঠিক ভাবে তুলি আনি অসমীয়া সাহিত্যত সংৰোপণ কৰিলে । ৰঘুনাথ চৌধাৰী প্ৰাশ্চাত্য দৰ্শনৰ দ্বাৰা প্ৰভাৱিত হোৱা বুলি কোনো কোনোৱে ক’ব খোজে যদিও তেওঁ প্ৰকৃততে প্ৰাচ্য দৰ্শনহে নিখুঁত ভাৱে অধ্যয়ন কৰিছিল ।’ উল্লেখ্য যে উক্ত অনুষ্ঠানতে প্ৰতিবছৰৰ দৰে ৰঘুনাথ চৌধাৰী সোঁৱৰণী বিশেষ বঁটা এইবেলি প্ৰদান কৰা হয় অসমৰ জনপ্ৰিয় কৌতুক অভিনেতা, বিশিষ্ট নাট্যকাৰ বৰক্ষেত্ৰীৰ সুসন্তান ২নং জয়সাগৰ গাঁৱৰ ভাস্কৰ বৰ্মনক । বঁটাত আছে বিৰিণাৰ নামাংকিত গামোচা, চেলেং চাদৰ, জাপি, এটি স্মাৰক, কিতাপৰ টোপোলা, প্ৰশস্তি পত্ৰ আৰু নগদ ধন । বঁটা গ্ৰহণ কৰি ভাস্কৰ বৰ্মন আবেগিক হৈ পৰে আৰু বিৰিণা গৰীৱৰ কলিজা বুলি দোহাৰি তেওঁৰ স্বভাৱসিদ্ধ ভংগীমাৰে কেইবাটাও নাটকীয় সংলাপ আওৰাই উপস্থিত ৰাইজক আপ্লুত কৰে । গোষ্ঠীটোৰ হৈ বিশিষ্ট সাহিত্যিক-গৱেষক ডঃ মাধুৰ্য্যমণ্ডিত বৰুৱাই প্ৰদান কৰে এই বঁটা। জয়ন্ত ডেকা, সংগীতা মেধি আৰু পংকজ বৰ্মনৰ আহ্বান ক্ৰমে বৰতলাত অনুষ্ঠিত হোৱা উক্ত অনুষ্ঠানতে তফিকুৰ ৰহমান সম্পাদিত গোষ্ঠীটোৰ তিনিমহীয়া ক্ষুদ্ৰ কাব্য আলোচনী ‘বীথিকা’ৰ শৰৎ সংখ্যা উন্মোচন কৰা হয় । বৰতলা লক্ষ্মী মন্দিৰ সভাগৃহত অনুষ্ঠিত অনুষ্ঠানটোত ডেইজী অনুৰঞ্জনা , জিয়াউৰ ৰহমান, পিনু বৰ্মন, ৰমণী নাথ, প্ৰণিতা হালৈ, আঞ্জুম আৰা হক, মৰমী ডেকা, হিমানী বৰ্মন, আতিকুৰ ৰহমান, সুৰভি বৰ্মন, মলয়া বৈশ্য কাকতি, সীমান্ত চৌধুৰী আদি প্ৰায় কুৰিগৰাকী নবীন-প্ৰবীন কবিয়ে কবিতা পাঠ কৰাৰ লগতে প্ৰণিতা ৰাজবংশী আৰু প্ৰণিতা হালৈ (প’পী)য়ে গীত পৰিৱেশন কৰে । শিশু শিল্পী নিয়ৰকণা শৰ্মাৰ বৰগীতে অনুষ্ঠানটো অনন্য কৰি তোলে। স্মৃতিচাৰণ সভাত বিশিষ্ট সমাজসেৱক তথা জ্যেষ্ঠ অভিযন্তা শশীভূষণ ডেকা, বিৰিণাৰ উপদেষ্টা ৰোহিণী কুমাৰ দাসে সন্মানীয় অতিথি হিচাপে উপস্থিত থাকি বক্তব্য প্ৰদান কৰে । সভাপতিৰ ভাষণত লীলাধৰ পাঠকে ৰঘুনাথ চৌধাৰীৰ কবিতাৰ পংক্তি আওৰাই এইগৰাকী কবিৰ জীৱন-দৰ্শনৰ বিজ্ঞান সন্মত আৰু পক্ষপাতহীন বিশ্লেষণ হোৱা প্ৰয়োজন বুলি মন্তব্য কৰে । ৰূপাঞ্জলী চৌধুৰী আৰু নিপু শইকীয়াই সহযোগিতা আগবঢ়োৱা অনুষ্ঠানটোত বৰক্ষেত্ৰী কনিষ্ঠ মহাবিদ্যালয়ৰ প্ৰবক্তা তথা বিশিষ্ট লেখক পৰীক্ষিত বৈশ্য , বৰতলাৰ গাঁৱৰ অৱসৰপ্ৰাপ্ত প্ৰধান শিক্ষক অতুল চন্দ্ৰ গোস্বামী, দীনেশ চন্দ্ৰ বৰ্মন, দৌলাশাল হাইস্কুলৰ অৱসৰপ্ৰাপ্ত প্ৰধান শিক্ষক ভৱেন কুমাৰ কলিতা, বৰতলা হাইস্কুলৰ প্ৰধান শিক্ষক ভূৱনেশ্বৰ নাথ, বৰতলা গাঁও উন্নয়ন সমিতিৰ সম্পাদক জগদীশ বৰ্মন, বৰক্ষেত্ৰী প্ৰেছ ক্লাবৰ সম্পাদক সুভাষ কাকতি, অৱসৰপ্ৰাপ্ত বেংক বিষয়া বসন্ত মেধি, শিৱসাগৰ জিলাৰ নুৰুল ইছলাম চৌধুৰীক সম্বৰ্ধনা জনায় বিৰিণা গোষ্ঠীয়ে । বৰপেটা জিলাৰ বিৰিণাৰ সমন্বয়ক হৰমোহন বৰ্মন, বিজ্ঞাপন সচিব চেলিম মালিক, সদস্য জেহেৰুল ইছলাম, খঞ্জনজ্যোতি পাঠক, কুলদীপ পাঠককে আদি কৰি নলবাৰী আৰু বৰপেটা জিলাৰ কেইবাগৰাকী বিৰিণাৰ সদস্যৰ লগতে বৰক্ষেত্ৰীৰ অৰ্ধশতাধিক সাহিত্য অনুৰাগী উপস্থিত থকা অনুষ্ঠানটোত কৃষ্টি এৱাৰ্ডচ-২১ বঁটা প্ৰাপক গোষ্ঠীটোৰ সভাপতি লীলাধৰ পাঠক আৰু বিশেষ প্ৰতিনিধি জিয়াউৰ ৰহমানক সম্বৰ্ধনা জনায় বিৰিণা গোষ্ঠীয়ে । আহ্বায়ক জয়ন্ত ডেকাই শলাগৰ শৰাই আগবঢ়োৱাৰ পিছত অসম সংগীত পৰিবেশনেৰে অনুষ্ঠানৰ সামৰণি পৰে ৷
অন্ধ্ৰৰ আকস্মিক বানত নিহত তিনিজন, সন্ধানহীন ৩০ জন
অন্ধ্ৰ প্ৰদেশত বান্ধ ভাঙি চেয়েৰু নদী উপচি পৰাৰ পিছত কেইবাখনো গাওঁ প্লাবিত হৈছে।শুকুৰবাৰে অন্ধ্ৰ প্ৰদেশৰ কাডাপা জিলাত আকস্মিক বানপানীৰ ফলত কমেও তিনিজন লোকৰ মৃত্যু হৈছে আৰু ৩০ জন বৰ্তমানেও সন্ধানহীন হৈ আছে। নন্দলুৰৰ স্বামী আনন্দ মন্দিৰটোও ডুব গৈছে। শুকুৰবাৰে পুৱতি নিশা বংগোপসাগৰৰ ওপৰত হোৱা চাপৰ ফলত তামিলনাডু আৰু অন্ধ্ৰ প্ৰদেশৰ মাজৰ উপকূল অতিক্ৰম কৰাৰ লগে লগে অন্ধ্ৰ প্ৰদেশত ধাৰাসাৰ বৰষুণ হৈছিল।আই.এম.ডিয়ে দক্ষিণ উপকূলীয় অন্ধ্ৰ প্ৰদেশ আৰু ৰয়ালসীমাৰ বিভিন্ন স্থানত ধাৰাসাৰৰ পৰা অতি ধাৰাসাৰ বৰষুণৰ সৈতে বেছিভাগ ঠাইত পাতলৰ পৰা মধ্যমীয়া বৰষুণৰ আগজাননী দিছে। ভগৱান ভেঙ্কটেশ্বৰৰ বাসস্থান তিৰুমালাত হোৱা প্ৰচণ্ড বানপানীৰ ফলত শ শ তীৰ্থযাত্ৰী আৱদ্ধ হৈ পৰে। তিৰুমালা পাহাৰৰ মূল মন্দিৰৰ কাষত থকা চাৰিটা পথ বানপানীৰেে উপচি পৰিছে।
এন.ডি.আৰ.এফ আৰু এছ.ডি.আৰ.এফ দলে সাহায্য আৰু উদ্ধাৰ অভিযান চলাবলৈ পদক্ষেপ লৈছে। মুখ্যমন্ত্ৰী ৱাই.এছ জগন মোহন ৰেড্ডীয়ে বৰষুণত ক্ষতিগ্ৰস্ত জিলাসমূহৰ সংগ্ৰাহকসকলৰ সৈতে এটা ভিডিঅ’ কনফাৰেন্স অনুষ্ঠিত কৰে আৰু তেওঁলোকক উদ্ধাৰ আৰু সাহায্য ব্যৱস্থা বৃদ্ধি কৰিবলৈ নিৰ্দেশ দিয়ে।
অসম দৰ্শন আঁচনীৰ পৰা বঞ্চিত মালমূৰা বুঢ়াগোসাই দেৱালয়
“ওদালগুৰি জিলা ভেৰগাঁও মহকুমা অন্তৰ্গত অতিৰ্য্যমণ্ডিত তিৰ্থস্থান মালমূৰা বুঢ়াগোঁসাই দেৱালয় অসম চৰকাৰৰ অভিলাষি আঁচনী ‘অসম দৰ্পনৰ পৰা বঞ্চিত।উল্লেখ্য যে ওদালগুৰি জিলা মালমূৰাত প্ৰায় ৫১১ বছৰে বুঢ়াপূজা উদযাপন কৰি অহাঁ বহুপুৰণি তিৰ্থস্থান মালমূৰা বুঢ়াগোসাই দেৱালয় অসম চৰকাৰৰ দৰ্পন আঁচনীৰ তালিকাত প্ৰায় ২০১৮-১৯ বৰ্ষতে ২২ নং হিতাধিকাৰীত অন্তৰ্ভুক্ত হৈছিল, আৰু এতিমধ্যে তালিকাত অন্তৰ্ভুক্ত প্ৰায় (২১) নং হিতাধিকাৰীলৈ অসম চৰকাৰৰ অভিলাষি আঁচনী ২০২০ চনৰ ভিতৰত অসম দৰ্পন আঁচনী সম্পূৰ্ণভাবে ৰূপায়ণ হ’ল। কিন্তু বৰ্তমান পৰ্যায়লৈ ওদালগুৰি জিলাৰ মালমূৰা বুঢ়াগোসাঁই দেৱালয়ত অসম চৰকাৰৰ (২২) নং হিতাধিকাৰীৰ তালিকাত থকাৰ পিছতো অসম দৰ্পন আঁচনী ৰূপায়ণ নহোৱাত দেৱালয় সমিতিয়ে আক্ষেপ প্ৰাকাশ কৰে। আৰুকি কাৰণত এনদৰে বঞ্চিত হৈ ৰ’ল সেই সন্দৰ্ভত অৱগত হ’বলৈ দেৱালয় সমিতিয়ে স্থানীয় জনপ্ৰতিনিধিৰ সৈতে মত বিনিময় কৰিছিল যদিও সঠিক উত্তৰ বিছাৰি নপোৱাত দেৱালয় সমিতিয়ে সংবাদমেল যোগে আজি জিলা উপায়ুক্তৰ লগতে অসম চৰকাৰলৈ কি কাৰণত তালিকাত অন্তৰ্ভুক্ত থকাৰ পিছত মালমূৰা বুঢ়াগোসাঁইত অসম দৰ্পন আঁচনী ৰূপায়ণ নহ’ল সেই সন্দৰ্ভত উচিত ব্যৱস্থা লবলৈ সংবাদমেল যোগে জিলা উপায়ুক্তলৈ আহ্বান জনাই।
ডিমৌত জলসিঞ্চন আঁচনি ৰূপায়নৰ নামত বৃহৎ অনিয়ম হোৱাৰ অভিযোগ
শিৱসাগৰ জিলা জলসিঞ্চন বিভাগৰ দ্বাৰা ডিমৌ উন্নয়ন খণ্ডৰ অধীনৰ প্ৰতিখন পঞ্চায়তত জলসিঞ্চন আঁচনি ৰূপায়নৰ নামত ব্যাপক দুৰ্নীতি, অনিয়ম সংঘটিত হোৱাৰ গুৰুত্বৰ অভিযোগ উত্থাপন হৈছে। ইতিমধ্যে ডিমৌৰ বিভিন্ন প্ৰান্তৰ কৃষক ৰাইজৰ মুখত সৰৱ চৰ্চা লাভ কৰা বৃহৎ দুৰ্নীতি তথা কেলেংকাৰীটো সংঘটিত হৈছে প্ৰধানমন্ত্ৰী কৃষি জলসিঞ্চন যোজনাৰ নামত।কিছুদিন পূর্বে ডিমৌ উন্নয়ন খণ্ডৰ অন্তৰ্গত ২৪,১৭৭ হেক্টৰ কৃষি ভূমিত পানী যোগানেৰে কৃষক ৰাইজক উপকৃত আচিলাৰে জলসিঞ্চন বিভাগৰ একাংশ বিষয়া অভিযন্তাই ঠিকাদাৰ প্ৰতিষ্ঠানৰ যোগেদি প্ৰায় ৩০ কোটি টকা দুনীর্তি কৰাৰ গুৰুত্বৰ অভিযোগ উত্থাপন হৈছে ।দেশৰ প্ৰধানমন্ত্ৰীৰ ‘হৰ খেত কো পানী’ শ্ল’গানেৰে প্ৰধান মন্ত্ৰী কৃষি জলসিঞ্চন যোজনাৰে ডিমৌ উন্নয়ন খণ্ডৰ অন্তৰ্গত বিশ খন গাওঁ পঞ্চায়ত এলেকাত কৃষি বিভাগৰ সহযোগত কৃষি ভূমিৰ জৰীপ কৰি শিৱসাগৰ জিলা জলসিঞ্চন বিভাগৰ তত্বাৱধানত গুৱাহাটীৰ “এনভাইৰনমেন্ট টেকন” নামৰ ঠিকাদাৰী প্ৰতিষ্ঠানটোৰ যোগেদি খেতি পথাৰত বিদ্যুত আৰু সৌৰশক্তি চালিত পাম্প স্হাপনৰ নামত কোটিৰ ঘৰত টকা অপব্যৱহাৰৰ কৰাৰ গুৰুত্বৰ অভিযোগ উত্থাপন কৰিছে কৃষক ৰাইজৰ লগতে পঞ্চায়ত প্ৰতিনিধি সকলে ।’হৰ খেত কো পানী’ শ্লগান এক অভিলাষী আঁচনি প্ৰধানমন্ত্ৰী কৃষি জলসিঞ্চন যোজনাৰে কৃষকৰ পথাৰত পানী দি বছৰত দুবাৰকৈ খেতি কৰিবলৈ সক্ষম হব বুলি জলসিঞ্চন বিভাগৰ দ্বাৰা এই আচঁনি ৰূপান কৰা হৈছিল ।কিন্তু জলসিঞ্চন বিভাগৰ একাংশ অভিযন্তা বিষয়া আৰু ঠিকাদাৰৰ মিতিৰালী বাবে উক্ত আঁচনি পৰা কৃষক ৰাইজ বঞ্চিত হোৱাত কৃষকৰ লগতে ডিমৌৰ ৰাইজৰ আৰু পঞ্চায়ত প্ৰতিনিধি সকলে ৰাজ্যৰ মুখ্যমন্ত্ৰী আৰু শিৱসাগৰ জিলা উপায়ুক্তক বিষয়টোৰ হস্তক্ষেপ কৰৰ লগতে এক নিখুঁত তদন্তৰ দাবী কৰিছে । ইফালে ডিমৌ অঞ্চলৰ নিচেই কাষৰে ডিমৌ নৈত থকা ইকৰানি পথাৰৰ জলসিঞ্চন আঁচনি যোৱা কেইবাটাও বছৰ ধৰি কাৰ্যক্ষম নোহোৱাৰ ফলত কৃষক সকলক সমস্যাৰ সম্মুখীন হৈছে বুলি উল্লেখ কৰিছে ইকৰানী পথাৰত খেতি কৰি জীৱন নিৰ্বাহ কৰা কৃষক সকলে।
ৰঙিয়াত সদৌ অসম ঠিকাভিত্তিক মাদ্ৰাছা শিক্ষক সন্থাৰ সংবাদমেল
অসম চৰকাৰৰ বিৰুদ্ধে তীব্ৰ ক্ষোভ উজাৰি সদৌ অসম মাদ্ৰছা ঠিকাভিত্তিক শিক্ষক সন্থাই ৰঙিয়া প্ৰেছ ক্লাৱত বুধবাৰে এখন সংবাদ মেলৰ আয়োজন কৰে। মুখ্যমন্ত্ৰী হিমন্ত বিশ্ব শৰ্মাক কেবাবাৰো বিষয়টো সন্দৰ্ভত অনুনয়-বিনয় কৰিও সুফল পোৱা নাই বুলি আক্ষেপ প্ৰকাশ কৰে সন্থাৰ সভাপতি চাহজাহান চিদ্দিকিয়ে।এইক্ষেত্ৰত মুখ্যমন্ত্ৰীয়ে কেৱল আশ্বাস দিয়ে দ্বায়িত্ব সামৰাৰো অভিযোগ উত্থাপন কৰে। উল্লেখযোগ্য যে বিগত ৯ মাহে দৰমহাৰ পৰা বঞ্চিত হৈ আছে এই সকল মাদ্ৰাছা শিক্ষকে। ২০১০ চনত চৰকাৰে সম্পূৰ্ণ নীতি নিয়ম অনুসৰি নিযুক্তি দিয়া এইসকল ঠিকা ভিত্তিক শিক্ষকৰ মাজৰ কেবল মাত্ৰ ১৪১ গৰাকী মাদ্ৰছা শিক্ষকক এইপৰ্যন্ত দিয়া নাই কোনো সা-সুবিধা। কি কাৰণত ৰাজ্য চৰকাৰে এই সন্দৰ্ভত আজিলৈকে কোনো ব্যৱস্থা গ্ৰহণ কৰা নাই এই বুলিও প্ৰশ্ন উত্থাপন কৰে বঞ্চিত শিক্ষক তথা সন্থাৰ উপ-সভাপতি ডঃ মণি চৌধুৰীয়ে। শেহতীয়াভাৱেদৰমহা নাপাই চিকিৎসাৰ অভাৱত মৃত্যুবৰণ কৰিছে দুগৰাকীকৈ শিক্ষকে। বৰ্তমান পৰিয়াল চলাবলৈও অক্ষম এইসকল শিক্ষকৰ অনতিপলমে তেওঁলোকক পূৰ্বৰদৰেই দৰমহা তথা সা-সুবিধা দিবলৈ চৰকাৰৰ ওচৰত দাবী জনাই,অন্যথা তেওঁলোকে আমৰণ অনশনত বহিব বুলিও হুংকাৰ দিয়ে।
চেঙাৰ কাৰাইখাইতিত দলীয় সম্বৰ্ধনা সভাত বিধায়ক আশ্ৰাফুল হুছেইন
দক্ষিণ বৰপেটা জিলাৰ চেঙা সমষ্টিৰ অন্তৰ্গত কাৰাইখাইতিত এ ইউ ডি এফ দলৰ খোলাবান্ধা আঞ্চলিক সমিতিৰ উদ্যোগত এখন দলীয় সম্ভধৰ্না সভাৰ আয়োজন কৰে। সমষ্টিটোৰ দক্ষিণ পাৰৰ চৰাঞ্চলৰ বিভিন্ন দল সংগঠন, অনুষ্ঠান-প্ৰতিষ্ঠানৰ লগতে বিভিন্নজনে চেঙাৰ নৱ নিৰ্বাচিত বিধায়ক আশ্ৰাফুল হুছাইনক সম্বৰ্ধনা জনায়। উক্ত দলীয় সম্বৰ্ধনা সভাত উপস্থিত হৈ বিধায়কজনে কেইবাটাও তাৎপৰ্যপূৰ্ণ মন্তব্য কৰি মূখ্যমন্ত্ৰী হিমন্ত বিশ্ব শৰ্মাৰ বিৰুদ্ধে সৰৱ হৈ পৰে। ৰাজ্যৰ বিজেপি চৰকাৰে চৰাঞ্চলৰ মানুহৰ উন্নয়ন নিবিচাৰে, চৰকাৰৰ গাফিলতিৰ কাৰণেই চৰাঞ্চলৰ মানুহে মাটিৰ পট্টা পোৱা নাই। চৰাঞ্চলত গৰাখহনীয়াৰ কবলত পৰি ভূমিহীন হোৱা লোক সকলক সন্দেহৰ চকুৰে চাই, গৰাখহনীয়াৰ কবলত পৰি সৰ্বহাৰা হোৱা লোকসকলক ধৰ্মীয় মেৰুকৰণৰ ৰাজনীতি কৰি আছে বিজেপি চৰকাৰে। কিছু দিন পূৰ্বে চেঙা আৰু বাঘবৰৰ চৰাঞ্চলৰ ভূমিক লৈ মূখ্যমন্ত্ৰী হিমন্ত বিশ্ব শৰ্মাই মিঞা জনগোষ্ঠীক তুচ্ছ-তাচ্ছিল্য আৰু উচ্ছেদৰ ভাবুকি দিছিল তাৰ প্ৰত্যুত্তৰত চেঙাৰ যুৱ বিধায়ক গৰাকীয়ে মূখ্যমন্ত্ৰী হিমন্ত বিশ্ব শৰ্মাক কটাক্ষ কৰি কয় যে মূখ্যমন্ত্ৰীয়ে কৈই দিয়ক মিঞা জনগোষ্ঠীৰ লোক সকল দেশৰ নাগৰিক নহয় বুলি, দেশৰ গণতন্ত্ৰই নাগৰিক সকলক যি অধিকাৰ দিছে সেই অধিকাৰৰ পৰা বঞ্চিত কৰিবলৈ মূখ্যমন্ত্ৰীৰ কোনো অধিকাৰ নাই গতিকে চৰাঞ্চলৰ মানুহক উচ্ছেদ কৰাৰ প্ৰসংগ আহিবই নোৱাৰে। কাৰণ চৰকাৰৰ গাফিলতিৰ কাৰণেই চৰাঞ্চলৰ মানুহে মাটিৰ পট্টা পোৱা নাই। মাটিৰ পট্টাৰ ব্যৱস্থা কৰি মূখ্যমন্ত্ৰী নিজৰ সহিত্য প্ৰকাশ কৰক আৰু জনগণৰ প্ৰতি থকা দায়বদ্ধতা প্ৰকাশ কৰক, অসমৰ জনগণে তেখেতৰ কাৰণে আশীৰ্বাদ কৰিব বুলি বিধায়ক গৰাকীয়ে মন্তব্য কৰে। ইয়াৰ উপৰিওঁ বিধায়ক গৰাকীয়ে মূখ্যমন্ত্ৰীলৈ আহ্বান জনায় কয় যে সমগ্ৰ অসমত জৰিপ কৰি চৰাঞ্চলৰ মানুহক মাটিৰ পট্টা দিয়াৰ ব্যৱস্থা কৰক। দক্ষিণ বৰপেটা জিলাৰ চৰাঞ্চলৰ বিভিন্ন সমস্যাৰ লগতে মূল সমস্যা হৈছে শিক্ষা আৰু গৰাখহনীয়া। মূখ্যমন্ত্ৰীয়ে চৰাঞ্চলৰ উন্নয়নৰ কথা পাহৰি কেৱল ধৰ্মীয় মেৰুকৰণৰ ৰাজনীতি কৰি আছে বুলি কটাক্ষ কৰে চেঙাৰ বিধায়ক আশ্ৰাফুল হুছেইনে।
ডবা,শংখ ধ্বনিৰে মুখৰিত মাজুলী
মাজুলীৰ চৌদিশে উখল মাখল পৰিবেশ।ডবা,শংখ,উৰুলিৰ ধ্বনিৰে মুখৰিত মাজুলী।মাজুলীত আজি ৰাস মহোৎসৱত অংশ গ্ৰহণ কৰে মুখ্যমন্ত্ৰীয়ে।ৰাস উপভোগ কৰি মুগ্ধ মুখ্যমন্ত্ৰী শৰ্মা।দুদিনীয়া কাৰ্যসূচীৰে মাজুলীলৈ অহা শৰ্মাই বৃহস্পতিবাৰে একেদিনাই বহু উন্নয়নমূলক আঁচনি পৰ্যবেক্ষণ কৰাৰ লগতে কামৰ খতিয়ান লয়।সন্ধ্যা মাজুলীৰ কেবাখনো সত্ৰত সেৱা লোৱাৰ লগে ৰাস উপভোগ কৰে।মাজুলীৰ ৰাসৰ এক আধ্যাত্মিক আৰু সাংস্কৃতিক গুৰুত্ব আছে। যোৱা দুটা বছৰে কভিডৰ বাবে নিজক সীমাবদ্ধ কৰি মাজুলীবাসীয়ে ৰাস উৎসৱ পালন কৰি আহিছে। কিন্তু অহা চাৰি বছৰে বা তাৰ পাছত মাজুলীৰ ৰাসক কেন্দ্ৰ কৰি ভাৰতবৰ্ষতো যাতে এটা জোকাৰনি আহে বা মানুহৰ মনত যাতে মাজুলীৰ ৰাস চাবলৈ যাম বুলি এক উৎকন্থা আহে লগতে ৰাসক কেন্দ্ৰ কৰি পৰ্যটনৰ সংখ্যা যাতে বঢ়াব পাৰে তাৰ বাবে অসম চৰকাৰে ব্যৱস্থা গ্ৰহণ কৰিব-আজি তিনিদিনীয়াকৈ মাজুলীত আৰম্ভ হোৱা শাৰদীয় ৰাসোৎসৱত অংশগ্ৰহণ কৰি মুখ্যমন্ত্ৰী ড° হিমন্ত বিশ্ব শৰ্মা ই এনেদৰে কয়। মাজুলীৰ বিভিন্ন সত্ৰত ৰাসোৎসৱৰ কাৰ্যসূচীত অংশগ্ৰহণৰ মাজতে মুখ্যমন্ত্ৰীয়ে আৰু কয় যে-মই এইবাৰ প্ৰথমবাৰৰ বাবে মাজুলীৰ ৰাস উপভোগ কৰিছোঁ। মাজুলীৰ ৰাসৰ আধ্যাত্মিক মহানতাক উপলব্ধি কৰাই নহয় আজি মই বিমল আনন্দ অনুভৱ কৰিছোঁ। দিনটো মাৰাথন কাৰ্যসূচীত অংশগ্ৰহণ কৰি মুখ্যমন্ত্ৰীয়ে সন্ধিয়াৰে পৰা মাজুলীৰ বিভিন্ন সত্ৰৰ ৰাসোৎসৱত অংশগ্ৰহণ কৰে। প্ৰথমে মুখ্যমন্ত্ৰীয়ে গড়মূৰ সত্ৰত উপস্থিত হৈ সেৱা লৈ সত্ৰ খনিৰ সত্ৰাধিকাৰ পৰমানন্দ দেৱ গোস্বামীৰে সত্ৰখনৰ উন্নয়নৰ বিভিন্ন বিষয় সম্পৰ্কে আলোচনা কৰে। লগতে শৰ্মাইশ্ৰীমন্ত শংকৰদেৱ কৃষ্টি সংঘ, গড়মূৰ সৰুসত্ৰ দৰ্শন কৰাৰ লগতে ইয়াৰ আধ্যাত্মিক পৰিৱেশত কিছু সময় কটাই ৷ এই দৰ্শন কালতে পৰম পূজ্য সত্ৰাধিকাৰ প্ৰভু শ্ৰীশ্ৰীহৰিদেৱ গোস্বামীদেৱৰ আশীৰ্বাদ লোৱাৰ উপৰি তেখেতৰ সৈতে বাৰ্তালাপ কৰি সত্ৰখনৰ বিভিন্ন দিশ সম্পৰ্কে আলোচনা কৰে ৷ ইয়াৰ উপৰিওএই ভ্ৰমণ কালতে শ্ৰীশ্ৰীআউনীআটী সত্ৰও দৰ্শন কৰি ৰাজ্যখনৰ জনসাধাৰণৰ কুশল-মংগল কামনাৰে সেৱা আগবঢ়ায়৷ এই আপাহতে সত্ৰখনৰ পৰম পূজ্য সত্ৰাধিকাৰ প্ৰভু শ্ৰীশ্ৰীপীতাম্বৰ দেৱ গোস্বামীদেৱৰ সৈতে সত্ৰখনৰ লগতে মাজুলীৰ উন্নয়নৰ বিভিন্ন দিশ সন্দৰ্ভতো আলোচনা কৰে। দক্ষিণপাট সত্ৰৰ ৰাসোৎসৱত বন্তি প্ৰজ্বলিত কৰি উত্তৰ কমলাবাৰী সত্ৰৰ ৰাসৰ উদ্বোধনী অনুষ্ঠানত উপস্থিত থাকে। মুখ্যমন্ত্ৰীয়ে উত্তৰ কমলাবাৰী সত্ৰতে নিশাৰ আহাৰ গ্ৰহণ কৰে। ইয়াৰ পিছতে মুখ্যমন্ত্ৰীয়ে পোনেই মাজুলীৰ নৈপৰীয়া বালি জকাইবোৱা মিছিং গাঁৱত উপস্থিত হয়। নিশাটো মুখ্যমন্ত্ৰীয়ে নৈপৰীয়া গাওঁ খনৰ কিৰন পায়েঙৰ ঘৰতে কটাব। এই সন্দৰ্ভত মুখ্যমন্ত্ৰীৰ পৰা জানিব বিচৰাত মুখ্যমন্ত্ৰীয়ে কয় যে- কাইলৈ ৰাতিপুৱা বালি জকাইবোৱাৰ এই অঞ্চলতে জলসম্পদ বিভাগৰ বহুকেইটা কামৰ শুভাৰম্ভ ঘটিব। সেয়ে মই নিশাটো এই অঞ্চলতে থকাৰ সিদ্ধান্ত গ্ৰহণ কৰিলোঁ। পূৰ্বেও মই জোনাইৰ এখন মিছিং গাৱত আছিলোঁ। তেখেত সকলৰ কলা-কৃষ্টি, সংস্কৃতি, জীৱন শৈলী চাই ভাল লাগে। মাজুলীৰো মিছিং ৰাইজৰ দৈনন্দিন জীৱন শৈলী এনিশা কটাই বুজাত মোৰ সহায় হব বুলি মুখ্যমন্ত্ৰী গৰাকীয়ে উল্লেখ কৰে। আপ্ৰায়নৰ বাবে কিৰনৰ পৰিয়ালে সাজু কৰা মিছিং পৰম্পৰাগত খাদ্যৰ সম্ভাৰৰো জুতি লয় মুখ্যমন্ত্ৰীয়ে।
যোৰহাট মাজুলীৰ দলংৰ নিৰ্মাণ স্থলী পৰিদৰ্শন মুখ্যমন্ত্ৰীৰ : আজি সন্ধিয়া মাজুলীৰ বিভিন্ন সত্ৰৰ ৰাসোৎসৱৰ কাৰ্যসূচীত অংশগ্ৰহণৰ মাজতে মুখ্যমন্ত্ৰী ড ° হিমন্ত বিশ্ব শৰ্মাই যোৰহাট মাজুলী সংযোগী দলংৰ নিৰ্মাণ স্থলীত উপস্থিত হৈ কেম্পৰ সকলো দিশ পৰ্যবেক্ষণ কৰে। পৰিদৰ্শন কৰি মুখ্যমন্ত্ৰীয়ে কয় যে- মই ৭-১০ দিনৰ ভিতৰত পুনৰ মাজুলীলৈ আহিম আৰু দলংৰ প্ৰথমটো পাইলিংৰ কাম আৰম্ভ কৰিম বুলি সাংবাদিকৰ আগত মুখ্যমন্ত্ৰীয়ে অৱগত কৰে। কাইলৈ পুৱাৰ ভাগতে জলসম্পদ বিভাগৰ বিভিন্ন কামৰ শুভাৰম্ভ ঘটাই মুখ্যমন্ত্ৰীয়ে মাজুলীৰ পৰা হেলিকপ্টাৰ যোগে গুৱাহাটীলৈ ৰাওনা হ’ব।
লাহিং গ্ৰাণ্ট উচ্চমাধ্যমিক বিদ্যালয়ৰ ৫০তম্ বৰ্ষ উপলক্ষে শুভাৰম্ভ অনুষ্ঠানৰ আয়োজন
কাকজানত ১৯ নৱেম্বৰ=পূব যোৰহাট শিক্ষা খণ্ডৰ অধীনৰ লাহিং গ্ৰাণ্ট উচ্চ মাধ্যমিক বিদ্যালয়ৰ প্ৰতিষ্ঠাৰ ৫০ তম বৰ্ষ উপলক্ষে বিদ্যালয়খনিত ২০২২ বৰ্ষত সোণালী জয়ন্তী বৰ্ষ উদ্যাপনৰ বৰ্ষজোৰা কাৰ্যসূচী পালনৰ ৰাজহুৱা সভাই সিদ্ধান্ত গ্ৰহণ কৰিছে। বিদ্যালয়খনিত ১৭ নবেম্বৰ তাৰিখে সোণালী জয়ন্তীৰ উদ্যাপন সমিতিৰ বৈঠকখনি কাৰ্যকৰী সভাপতি নিত্যানন্দ শৰ্মাৰ সভাপতিত্বত অনুষ্ঠিত হোৱা সভাই ২০২২ বৰ্ষৰ পহিলা জানুৱাৰীত সোণালী জয়ন্তী বৰ্ষ উদ্যাপনৰ শুভাৰম্ভ অনুষ্ঠান আয়োজনৰ সিদ্ধান্ত গ্ৰহণ কৰে।সভাত উদ্যাপন সমিতিৰ সভাপতি তৰুণ চন্দ্ৰ বৰা প্ৰাক্তন প্ৰতিষ্ঠাপক প্ৰধান শিক্ষক টুপীৰাম চুতীয়া প্ৰাক্তন শিক্ষক তুলাৰাম বৰা বোধেশ্বৰ বাঢ়ৈ ,গোলাপ শইকীয়াইও ৰাইজৰ সৈতে অংশ লয়।সম্পাদক তথা বিদ্যালয় প্ৰধান শিক্ষক অৰূপ বুঢ়াগোঁহাইয়ে সোণালী বৰ্ষ উদ্যাপনৰ শুভাৰম্ভ কাৰ্যসূচীৰ এক আভাস দাঙি ধৰি বিদ্যালয়খনিৰ প্ৰতিষ্ঠা কালত অৱদান আগবঢ়োৱা বিশিষ্ট ব্যক্তিৰ নাম তালিকা পাঠ কৰি বিশেষ সম্মান প্ৰদানৰ বাবে সভাৰ অনুমোদন গ্ৰহণ কৰে।সভাপতি তৰুণ চন্দ্ৰ বৰাই বৰ্ষ জোৰা কাৰ্যসূচীৰ পৰিকল্পনা পাঠ কৰে। সভাত প্ৰতিষ্ঠা কালৰ প্ৰাক্তন তিনিগৰাকী শিক্ষাগুৰু টুপীৰাম চুতীয়া তুলাৰাম বৰা, গোলাপ শইকীয়াৰ লগতে বোধেশ্বৰ বাঢ়ৈও শুভাৰম্ভ অনুষ্ঠানৰ আপ্যায়নৰ বাবে বিশেষ অৰিহণা ঘোষনা কৰি ১৯৭২ চনৰ প্ৰতিষ্ঠা কালৰ আৱেগিক সময়ক বিশেষ সম্মান প্ৰদৰ্শন কৰে। সভাত বিদ্যালয় পৰিচালনা সমিতিৰ সভাপতি প্ৰদীপ ফুকন প্ৰমূখ্য কৰি বহু বিশিষ্ট ব্যক্তিও অংশ লয়। বিদ্যালয়খনিৰ সোণালী জয়ন্তী বৰ্ষ উদ্যাপন সমিতিয়ে স্থানীয় সকলো ৰাইজৰ লগতে প্ৰাক্তন ছাত্ৰ-ছাত্ৰী -শুভাকাংক্ষী ৰাইজৰ আন্তৰিক সহযোগিতা তথা উপস্থিতি কামনা কৰিছে।
নাজিৰা মহাবিদ্যালয়ক NAACৰ বি প্লাছ গ্ৰেড
যোৱা ১২ আৰু ১৩ নবেম্বৰত নাকৰ এটা তিনিজনীয়া দলে নাজিৰা মহাবিদ্যালয় পৰিদৰ্শন কৰে ৷পৰিদৰ্শন কালত প্ৰতিনিধি দলটিয়ে মহাবিদ্যালয়ৰ শৈক্ষিক ,প্ৰশাসনিক দিশ আদি চাই সন্তুষ্টি প্ৰকাশ কৰে ৷এই ক্ষেত্ৰত তেওঁলোকে শিক্ষকসকলৰ সামাজিক দায়বদ্ধতাৰ শলাগ লয় ৷ দলটিত সঞ্চালক হিচাপে বীৰ নৰ্মড চাউথ গুজৰাট বিশ্ববিদ্যালয়ৰ উপাচাৰ্য ড° ৰমেশচন্দ্ৰ জি কোঠাৰী ,সমন্বয়ক ড° বিশ্বম্ভৰ প্ৰসাদ চাটী ( ভূগোল বিজ্ঞান বিভাগ ,মিজোৰাম বিশ্ববিদ্যালয় ) সন্মানীয় সদস্য হিচাপে শ্ৰী সিদ্বি বিনায়ক মহিলা মহাবিদ্যালয়ৰ অধ্যক্ষ ড° পুষ্পা ৰানাডে উপস্থিত থাকে ৷ এই পৰিদৰ্শনৰ পাছতে যোৱা ১৬ নবেম্বৰত নাকে নাজিৰা মহাবিদ্যালয়ক বি প্লাছ (B + ) (CGPA :2.71)গ্ৰেড প্ৰদান কৰে ৷এই সাফল্যত মহাবিদ্যালয়ৰ অধ্যক্ষ ড° ৰাজু ফুকনৰ লগতে মহাবিদ্যালয়ৰ লগত জড়িত সকলোৱে উল্লসিত হোৱাৰ লগতে কৃতজ্ঞতা প্ৰকাশ কৰিছে ৷