তীৰ্থনগৰী হাজোৰ সুযোগ্য সন্তান, নৃত্য বিশাৰদ, বিভিন্ন সন্মানেৰে বিভুষিত, ডিমৰীয়া মহাবিদ্যালয়ৰ অসমীয়া বিভাগৰ সহকাৰী অধ্যাপক ড° পংকজ নম:শূদ্ৰই অসম ষ্টাৰ এৱাৰ্ড – ২০২১ সন্মানে প্ৰাপ্তিৰে বৃহত্তৰ অঞ্চলটোলৈ কঢ়িয়াই আনিছে গৌৰৱৰ ধ্বজ্জা। সামাজিক- সাংস্কৃতিক সংগঠন অসম ষ্টাৰৰ উদ্যোগত গুৱাহাটী – পাঞ্জাবাৰীস্থিত শংকৰদেৱ ক’লাক্ষেত্ৰৰ আন্তৰ্জাতিক মাধৱদেৱ প্ৰেক্ষাগৃহত অনুস্থিত ” অসম ষ্টাৰ এৱাৰ্ড – ২০২১”শীৰ্ষক নৃত্যশ্ৰী সন্মানেৰে নিজ হাজোৰ পানীপাৰা নিৱাসী পংকজ নম:শূদ্ৰক সন্মানিত কৰে। বোলছৱি জগতৰ সুদক্ষ অভিনেতা নিপন গোস্বামী, মোহময়ী অভিনেত্ৰী বৰষা ৰাণী বিষয়া, অভিনেতা ৰবি শৰ্মাকে ধৰি কেইবা গৰাকীও বিশিষ্ট ব্যক্তিৰ উপস্থিতিত এই সন্মানেৰে বিভুষিত কৰে পংকজ নম:শূদ্ৰক। অসম প্ৰকাশন পৰিষদৰ সভাপতি প্ৰমোদ কলিতাই প্ৰদান কৰা এই সন্মানত আছিল এখনি চেলেংচাদৰ, মানপত্ৰ, এখন গ্ৰন্থ আৰু ষ্টাৰ বটা এটা। উল্লেখ্য যে, অসমীয়া ভাষা আৰু সাহিত্য উভয় বিষয়ত স্নাতকোত্তৰ ডিগ্ৰীধাৰী পংকজ নম:শূদ্ৰ লোকসংস্কৃতি বিষয়ৰো এগৰাকী স্নাতক। ইউ জি চি নেট্ আৰু শ্লেট পৰীক্ষাত সফলতাৰে উত্তীৰ্ণ নম:শূদ্ৰই  ২০০৯-১০ বৰ্ষত গুৱাহাটী বিশ্ববিদ্যালয়ৰ অসমীয়া বিভাগৰ পৰা এম. ফিল আৰু ২০১৮ চনত পি এইচ ডি  উপাধি গ্ৰহণ কৰে । ২০০৪ বৰ্ষত তেওঁ হাজোৰ সুৰেন দাস মহাবিদ্যালয়ত আৰু পৰৱৰ্তী সময়ত ২০১৬ বৰ্ষত কামৰূপৰ ক্ষেত্ৰীৰ ডিমৰীয়া মহাবিদ্যালয়ত অসমীয়া বিভাগৰ সহকাৰী অধ্যাপকৰ পদত যোগদান কৰে। ২০১২ চনত অসম সংগীত সত্ৰৰ পৰা নৃত্য বিষয়ত ‘গুণীন’ (নৃত্য বিশাৰদ) উপাধি প্ৰাপ্ত পংকজ নম:শূদ্ৰই ভাৰতৰ বিভিন্ন ঠাইত নৃত্য আৰু ভাওনা পৰিৱেশনেৰে বুটলিবলৈ সক্ষম হোৱা সন্মানসমূহ হৈছে, নৃত্য শিৰোমণি (২০১৮, কটক, ওড়়িশা), নৃত্য জয়া সন্মান (২০১৮, কলকাতা), কামাখ্যী আচাৰ্য সন্মান (২০১৮, গুৱাহাটী), নৃত্য কলা চূড়়ামণি (২০১৯, কটক, ওড়়িশা), নৃত্যমণি সন্মান (২০১৯, ৰাওৰকেলা, ওড়়িশা), নৃত্য বৈভৱ সন্মান (২০১৯, বেনাৰস হিন্দু বিশ্ববিদ্যালয়), নৃত্য শাস্ত্ৰীয় সন্মান (২০১৯, গুৱাহাটী), নৃত্য ভূষণ সন্মান, (২০২০, কটক, ওড়়িশা)। এই সমূহৰ উপৰি তেওঁ ২০১৪ চনত অসমীয়া কথাছবি ‘মমতাজ’ত কৰা নৃত্যাভিনয়ৰ লগতে গুৱাহাটী দূৰদৰ্শনৰ কেইবাখনো ধাৰাবাহিক আৰু নৃত্য নাটিকাত অভিনয় প্ৰদৰ্শনেৰে সমাদৰ লাভ কৰিবলৈ সমৰ্থ হৈছে।

সদৌ অসম কেওঁট জাতীয় পৰিষদৰ নগাঁও জিলাৰ অন্তৰ্গত আঞ্চলিক সমূহৰ এখনি পৰ্য্যালোচনা সভা যোৱা ৩ নৱেম্বৰত নগাঁওস্থিত জ্যেষ্ঠ নাগৰিকৰ কাৰ্যালয়ত অনুষ্ঠিত হৈ যায় ৷ উক্ত পৰ্যালোচনা সভাত কেন্দ্ৰীয় পৰ্যব্যেক্ষক হিছাপে সদৌ অসম কেওঁট জাতীয় পৰিষদৰ উপ-সভাপতি লক্ষণ শইকীয়া,সদৌ অসম কেওঁট জাতীয় পৰিষদৰ মুখপাত্ৰ জয়ন্ত শইকীয়া,কেন্দ্ৰীয় প্ৰচাৰ সম্পাদক দীপক কুমাৰ শইকীয়া,সাহিত্য আৰু সাংস্কৃতিক সম্পাদক প্ৰবিন কুমাৰ হাজৰিকাৰ উপস্থিতিত নগাঁৱত হব লগীয়া আগন্তুক কেন্দ্ৰীয় কাৰ্য্যনিৰ্বাহকৰ সম্পৰ্কে বিষদভাৱে আলোচনা কৰা হয় ৷ উক্ত পৰ্য্যালোচনা সভাত নগাঁও জিলাৰ বিভিন্ন আঞ্চলিক সমূহৰ উপস্থিতিত এখনি অভ্যৰ্থনা সমিতি গঠন কৰি কেন্দ্ৰীয় কাৰ্য্যনিৰ্বাহক খনি অনুষ্ঠিত কৰিবৰ বাবে নৱেম্বৰ মাহৰ ২৮ তাৰিখটো সিদ্ধান্ত গ্ৰহণ কৰি কেন্দ্ৰীয় সমিতিলৈ প্ৰেৰণ কৰা হৈছে বুলি কেন্দ্ৰীয় সমিতিৰ প্ৰচাৰ সম্পাদক দীপক কুমাৰ শইকীয়াই এক বিবৃত্তি যোগে জানিবলৈ দিছে ৷ 

দৰং জিলাৰ ছিপাঝাৰ বিধানসভা সমষ্টিৰ অন্তৰ্গত মুছলিমঘোপা গাঁৱৰ ধৰ্মপ্ৰাণ ব্যক্তি অৱসৰী শিক্ষক মতলিব আলী (৮০)ৰ কালি দুপৰীয়া ১২-১৫ বজাত মৃত্যু হয়৷ তেখেত যোৱা কেইবাবছৰ ধৰি অসুস্থ অৱস্থাত আছিল৷ মৃত্যুৰ সময়ত তেখেতে পত্নী সহিতে ৩ জন পুত্ৰ, ৪ জনী বিবাহিত জীয়ৰী, নাতি-নাতিনী আৰু অসংখ্য গুণমুগ্ধক ইহ সংসাৰত এৰি থৈ যায়৷ তেখেত ছিপাঝাৰ শিক্ষাখণ্ডৰ অধীনস্থ ৰামৰাইপাৰা প্ৰাথমিক বিদ্যালয়ৰ পৰা ১৯৯৯ চনত প্ৰধানশিক্ষক হিচাপে অৱসৰ গ্ৰহণ কৰে৷ তেখেত কলাঠাচুবা জামে মছজিদ পৰিচালনা সমিতিৰ সুদীৰ্ঘ ২০ বছৰ সম্পাদক হিচাপে সেৱা আগবঢ়াইছিল৷ তেখেত এজন সহজ সৰল অন্তৰৰ সকলোৰে প্ৰতি মৰম থকা ব্যক্তি আছিল৷ কণ কণ ল’ৰা-ছোৱালীক ফল-মূল, চকলেট বিতৰণ কৰি আনন্দ পাইছিল৷ তেখেতৰ জানাজা নামাজ কালি নিশা ৮-৩০ বজাত সম্পন্ন কৰা হয়৷ জানাজা নামাজত ইমামতি কৰে মৌলানা আলহাজ ইক্ৰামূল মজিদে৷ দফনৰ পিছত দোৱা সম্পন্ন কৰে মুছলিমঘোপা কলাঠাচুবা জামে মছজিদৰ পেচ ইমাম মৌঃ আব্দুল কাদিৰে৷ জানাজাত বিশিষ্ট লেখক, কবি, সামাজিক বিশ্লেষক মুহাম্মাদ ফাৰুক আব্দুল্লাহ নূৰী, অধিবক্তা নজৰুল হুছেইন (মুকুট)ৰ লগতে বিশিষ্ট ব্যক্তিসকল উপস্থিত থাকে৷ তেখেতৰ মৃত্যুত ৰাজা ফাউণ্ডেশ্যন, অসম, মুছলিমঘোপা কলাঠাচুবা জামে মছজিদ পৰিচালনা সমিতিয়ে গভীৰ শোক প্ৰকাশ কৰি পৰিয়াললৈ সমবেদনা জ্ঞাপন কৰিছে৷ ধৰ্মপ্ৰাণ ব্যক্তিগৰাকীৰ মৃত্যুত অঞ্চলটোত গভীৰ শোকৰ ছাঁ পৰিছে৷