হোজাই জিলাৰ মোৰাঝাৰ থানাৰ অন্তৰ্গত শিংগিৰপাৰ গাঁৱত যোৱা ২৫ জুন তাৰিখে সংঘটিত হৈছিল এক চাঞ্চল্যকৰ ঘটনা৷ ডবকাৰ শিংগিৰপাৰৰ  এগৰাকী বিবাহিতা মহিলা পিতৃগৃহৰ পৰা পুৱা নীলবাগানৰ ভেকচিন কেন্দ্ৰলৈ যোৱাৰ বাটৰ পৰা সন্ধানহীন হয়৷ ঘটনা সংক্ৰান্তত মোৰাঝাৰ থানাত মহিলাগৰাকীৰ পিতৃয়ে গোচৰ তৰাৰ পিছতে হোজাই আৰক্ষী অধীক্ষক বৰুণ পুৰকায়স্থ, অতিৰিক্ত আৰক্ষী অধীক্ষক পনজিৎ দুৱৰা, উপ আৰক্ষী অধীক্ষক ৰৌজি তালুকদাৰে ঘটনাৰ তদন্ত আৰম্ভ কৰি লাভ কৰে কিছু তথ্য৷

জম্মু–কাশ্মীৰৰ জম্মুত বাস কৰা এজন যুৱকে মহিলাগৰাকীগৰাকীক ফুচলাই জম্মুলৈ নিয়াৰ তথ্য আৰক্ষীয়ে লাভ কৰাৰ পিছতে মহিলাগৰাকীগৰাকী নাৰীদেহ চক্ৰৰ জালত পৰা বুলি আৰক্ষী নিশ্চিত হয়৷ তাৰ পিছতে হোজাই আৰক্ষীয়ে জম্মু আৰক্ষীৰ লগত যোগাযোগ কৰাত জম্মু আৰক্ষীয়ে জম্মুৰ পৰা উদ্ধাৰ কৰে মহিলাগৰাকী৷ মোৰাঝাৰ আৰক্ষীৰ তিনিজনীয়া এটা দল জম্মুত উপস্থিত হৈ চমজি লয় মহিলাগৰাকী৷ শুকুৰবাৰে আৰক্ষীয়ে যুৱতীগৰাকীক লৈ উপস্থিত হয় হোজাইত৷

আৰক্ষীয়ে লাভ কৰা তথ্য মতে, জম্মুৰ এজন যুৱকে ফোনযোগে প্ৰলোভন দি মহিলাগৰাকীক লৈ যায় জম্মুলৈ৷ হোজাই আৰক্ষীৰ তৎপৰতাত জম্মু আৰক্ষীয়ে উদ্ধাৰ কৰে যুৱতীগৰাকীক৷  ইফালে জম্মুত অভিযান চলোৱাৰ সময়তে যুৱকজনে পলায়ন কৰে৷ ঘটনা সংক্ৰান্তত আৰক্ষীয়ে জোৰদাৰ তদন্ত অব্যাহত ৰাখিছে৷ইফালে আদালতত উপস্থিত হৈ মহিলাগৰাকীয়ে প্ৰদান কৰে চাঞ্চল্যকৰ ভাষ্য৷ বিদেশত কৰ্মৰত মহিলাগৰাকীৰ স্বামীয়ে ফোনযোগে দ্বিতীয় বিবাহ কৰাৰ ভাবুকি দিয়াৰ বাবেই মহিলাগৰাকীয়ে জম্মুলৈ নিজ ইচ্ছামতে পলায়ন কৰা বুলি স্বীকাৰোক্তি দিয়ে। মহিলাগৰাকীৰ ভাষ্যই এতিয়া সমগ্ৰ ঘটনা ৰহস্যৰ আৱৰ্তত ৰাখিছে।

মৰিগাঁও জিলাৰ লাহৰীঘাট খন্ড প্ৰাথমিক স্বাস্থ্য কেন্দ্ৰৰ অধীনস্থ  বোৱালগুৰি হাইস্কুল ভেকচিন কেন্দ্ৰত  যোৱা কালি স্বাস্হ্য কৰ্মী ছাইফুল ইছলামক কৰ্তব্যৰত অৱস্হাত ৬-৭ জনীয়া যুককৰ দল এটাই আমন্ত্ৰণ কৰি আহত কৰে । আক্ৰমণকাৰী আটাইকেইজন বিজেপি কৰ্মী । ইয়াৰ এজন লাহৰীঘাট কলেজৰ শিক্ষক মুকছিদুল ইছলাম । অৱশ্যে খবৰ পাই লাহৰীঘাট থানাৰ আৰক্ষী ঘটনাস্হলীত উপস্থিত হৈ তদন্ত কৰি আছে বুলি জনা গৈছে। 

প্ৰায় ডেৰ বছৰ ধৰি কাৰাবন্দী হৈ থকাৰ পাছত অৱশেষত কাৰাবান্দী জীৱনৰ অৱসান ঘটাই  বৃহস্পতি বাৰে মুকলি আকাশৰ তললৈ আহিল শিৱসাগৰ সমষ্টিৰ বিধায়ক তথা ৰাইজৰ দলৰ সভাপতি অখিল গগৈ। বিধায়ক অখিল গগৈয়ে শুকুৰবাৰে নিজ সমষ্টিলৈ যোৱাৰ পথত নগাঁৱৰ কৃষ্ণাইখাট আৰু ৰহাত অখিল গগৈৰ সমৰ্থকে উষ্ম আদৰণি জনায়।

বিধায়ক অখিল গগৈয়ে  বিজেপি চৰকাৰক হুংকাৰ প্ৰদান কৰি কয়, “বিধায়ক হৈছোঁ বুলি সংগ্ৰাম এৰি দিয়া নাই। অসমৰ ৰাইজক কেতিয়াও বিশ্বাসঘাটকতা নকৰোঁ। টোল গেট আৰু নদীবান্ধৰ বিৰুদ্ধেও ব্যৱস্থা গ্ৰহণ হ’ব। উপ-নিৰ্বাচনত ৰাইজৰ দলে তিনিওটা সমষ্টিতে প্ৰতিদ্বন্দ্বিতা কৰিব।”

“অসমত পুনৰ ‘কা’ (CAA) আন্দোলন হ’ব। ‘কা’ আন্দোলনৰ নামত একাংশ জাতীয় সংগঠনে অসমৰ ৰাইজক প্ৰতাৰণা কৰিলে” বুলিও কয় অখিল গগৈয়ে।পুৱাৰে পৰা ৰহা আৰু কৃষ্ণাইখাটত  ৰাইজৰ দল আৰু কৃষক মুক্তি সংগ্ৰাম সমিতিৰ সদস্য লগতে  শ শ লোকে হাতে হাতে গামোচা লৈ অখিল গগৈলৈ অপেক্ষা কৰি আছিল আৰু বিধায়কজন আহি পোৱাৰ লগে লগে তেওঁক আদৰণি জনায়।  “মিকিৰ বামুণীৰ থলুৱাৰ ভূমি কেতিয়াও উচ্ছেদ কৰিব দিয়া নহ’ব।  থলুৱাৰ সুৰক্ষাৰ স্বাৰ্থত কোনো আপোচ কৰা নহ’ব আৰু বিধান সভাত সজোৰে প্ৰশ্ন তুলিব” বুলি উল্লেখ কৰে।

ৰাজপথত সুৰাপান কৰি উদ্ভণ্ডালি কৰা দৰঙৰ জিলা পৰিবহণ বিষয়া (ডি টি অ’) তথা আঞ্চলিক পৰিবহণ কর্তৃপক্ষৰ সচিব কুমাৰ সঞ্জীৱ কৃষ্ণক তাৎক্ষণিকভাৱে বলৱৎ হোৱাকৈ নিলম্বন কৰা হৈছে৷ পৰিবহণ মন্ত্রী চন্দ্রমোহন পাটোৱাৰীৰ নির্দেশমর্মে কুমাৰ সঞ্জীৱ কৃষ্ণক ‘আছাম ছার্ভিচেছ (ডিচিপ্লিন এণ্ড আপীল) ৰুলছ, ১৯৬৪ৰ ৬ (১) (এ) নং বিধিৰ অধীনত নিলম্বন কৰা হয়৷

উল্লেখ্য যে অতি শেহতীয়াকৈ দুই মিনিট ৫০ ছেকেণ্ড দৈর্ঘ্যৰ এটা ভিডিঅ’ ভাইৰেল হৈ পৰিছিল৷ য’ত ৰাজপথতে সুৰাপান কৰি কুমাৰ সঞ্জীৱ কৃষ্ণই কেইজনমান সহকর্মীৰ উপস্থিতিতে অশ্লীল মন্তব্য তথা অভব্য আচৰণ কৰা পৰিলক্ষিত হৈছিল৷ সুৰামত্ত পৰিবহণ বিষয়াজনৰ এনে কাণ্ডক লৈ দৰং জিলাৰ লগতে সমগ্র ৰাজ্যতে বিৰূপ প্রতিক্রিয়া সৃষ্টি হয়৷ ইয়াৰ মাজতে পৰিবহণ মন্ত্রী চন্দ্রমোহন পাটোৱাৰীয়ে কুমাৰ সঞ্জীৱ কৃষ্ণক নিলম্বনৰ নির্দেশ দিয়ে৷ লগতে বিষয়টোৰ তদন্ত কৰাৰ দায়িত্ব দিয়া হৈছে পৰিবহণ আয়ুক্ত আদিল খানক৷ অহা ১৫ দিনৰ ভিতৰত পৰিবহণ আয়ুক্ত আদিল খানে তদন্ত প্রতিবেদন দাখিল কৰিব লাগিব৷

লাহদৈগড় আৰক্ষী চকীৰ ভাৰপ্ৰাপ্ত আৰক্ষী বিষয়া সঞ্জয় ৰয়ৰ নেতৃত্বত সুৰা আৰু অসামাজিক কাৰ্য্য কলাপৰ বিৰুদ্ধে অভিযান চলাই থকাৰ সময়তে পুনৰ ঢেকীয়াখোৱা দগাচুকৰ ডিম্বেশ্বৰ শইকীয়া ,বৰখেলিয়া তিনি আলিৰ গোপাল দাস আৰু ৰামপুৰৰ চুনিল কুমাৰৰ বাসগৃহত অভিযান চলাই অবৈধ ভাৱে ৰখা ৯ কাৰ্টুন দেশী,বিদেশী সুৰা জব্দ কৰি অৱকাৰী বিভাগক চমজাই দিয়ে। আৰক্ষী যোৱাৰ উমান পাই অভিযুক্ত কেইজন পলাই যাৱলৈ সক্ষম হয়।অসাধু ব্যৱসায়ী সকলৰ মুৰৰ কামোৰণী হৈ পৰিছে আৰক্ষী বিষয়া সঞ্জয় ৰয়।অাৰক্ষীয়ে জানিৱলৈ দিয়া মতে জব্দ কৰা সুৰা সমুহৰ মূল্য প্ৰায় ৪০ হাজাৰ টকা।এনে পদক্ষেপক স্থানীয় ৰাইজে আদৰণি জনাইছে।

নগৰবেৰাৰ টুপামাৰী আৰক্ষী চকীৰ অন্তৰ্গত বদলা পথাৰ টিয়াপাৰাত ক্ৰমে দিলবৰ হুছেইন আৰু ফকৰ উদ্দিন নামৰ দুই পক্ষৰ মাজত বৃহস্পতিবাৰে সন্ধিয়া প্ৰচণ্ড মাৰপিটৰ ঘটনা সংঘটিত হয়। কেইজনমানী হাঁহক ল’ই দুই পক্ষৰ মাজত প্ৰচণ্ড মাৰপিট হোৱাৰ ফলত দুয়ো পক্ষৰ কেইবাজনো লোক গুৰুতৰভাৱে আহত হয়। জানিব পৰা মতে ফকৰ উদ্দিনৰ মুঠ ১৯ টা হাঁহ ঘৰৰ পৰা নোহোৱা হোৱাত গাওঁখনৰে দিলবৰ হুছেইনৰ হাঁহৰ ফাৰ্মত হাঁহৰ লগত তেওঁৰ হাঁহ মিলি যোৱাৰ অভিযোগ তোলে যদিওঁ দিলবৰ হুছেইনে এই অভিযোগ মানি নলয়। তাৰ পিছত হাঁহক ল’ই উভয় পক্ষৰ মাজত প্ৰথমে কথা কটাকটি হয় তাৰ পিছত দুয়ো পক্ষই হাতত লাঠি, টাঙোন, চোকা অস্ত্ৰ লয় আৰু পৰিণতিত পৰস্পৰৰ মাজত প্ৰচণ্ড মাৰপিট হৈ দুয়ো পক্ষৰে গুৰুতৰভাৱে প্ৰায় পোন্ধৰ জনমান লোক আহত হয়। নিশাৰ ভাগতেই আৰক্ষীয়ে দুয়ো পক্ষকে নগৰবেৰা চিকিৎসালয়ত ভৰ্তি কৰায় যদিও দিলবৰ হুছেইন, মনোৱাৰ হুছেইন, মুন্না আলী আৰু ফকৰ উদ্দিনৰ পক্ষৰ কেবাজনৰো অৱস্থা সংকটজনক হোৱাত চিকিৎসকে প্ৰাথমিক চিকিৎসাৰ অন্তত উন্নত চিকিৎসাৰ বাবে গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰে। সাধাৰণ কেইজনী মান হাঁহক কেন্দ্ৰ কৰি হোৱা এনে মাৰপিটৰ কাণ্ডই বহুতৰে চকু কপালত তুলিছে।