অসম চৰকাৰৰ স্বাস্থ্য মন্ত্ৰী কেশৱ মহন্তই আজি শিৱসাগৰ জিলাৰ ৰজাবাৰীস্থিত স্বৰ্গদেউ চুকাফা মাল্টি স্পেচিয়েলিটি হস্পিটেল প্ৰাংগণত নৱনিৰ্মিত অত্যাধুনিক ইন্ফ্লেটেবল ক’ভিড চিকিৎসালয় এখন আনুষ্ঠানিক ভাৱে উদ্বোধন কৰে। উদ্বোধনকালত স্বাস্থ্য মন্ত্ৰীগৰাকীৰ সৈতে জিলাখনৰ অভিভাৱক মন্ত্ৰী তথা শিক্ষা মন্ত্ৰী ডাঃ ৰণোজ পেগুও উপস্থিত থাকে। স্বাস্থ্য মন্ত্ৰীগৰাকীয়ে ক’ভিড চিকিৎসালয়খনৰ ভিতৰত থকা আন্তঃগাঁথনি তথা আনুষংগিক সা-সুবিধাসমূহৰ বিষয়ে বুজ লয়। তেওঁ চিকিৎসালয় কৰ্তৃপক্ষৰ সৈতেও মত-বিনিময় কৰে। মন্ত্ৰীগৰাকীয়ে নৱনিৰ্মিত ইন্ফ্লেটেবল ক’ভিড চিকিৎসালয়খনে বৃহত্তৰ শিৱসাগৰবাসী ৰাইজক উপকৃত কৰিব বুলি মতপ্ৰকাশ কৰে।

উল্লেখযোগ্য যে, ৪০খন বিচনাযুক্ত নৱ-নিৰ্মিত ইন্ফ্লেটেবল ক’ভিড হস্পিটেল খনত ২০ খন অত্যাধুনিক আই. চি. ইউ. বিচনা সংলগ্ন হৈ আছে।

এই অনুষ্ঠানত থাওৰা সমষ্টিৰ বিধায়ক সুশান্ত বুঢ়াগোঁহাই, থাওৰা সমষ্টিৰ প্ৰাক্তন বিধায়ক কুশল দুৱৰী, শিৱসাগৰ জিলাৰ উপায়ুক্ত বিষ্ণু কমল বৰা, স্বাস্থ্য সেৱাৰ সঞ্চালক ডাঃ ৰথীন্দ্ৰ নাথ ভূঞা, স্বাস্থ্য বিভাগৰ উপ-সচিব কমলজিত তালুকদাৰ, অতিৰিক্ত উপায়ুক্ত বিতোপন নেওগ, জিলা স্বাস্থ্য সেৱাৰ যুটীয়া সঞ্চালক ডাঃ স্যমন্ত মাধৱ শৰ্মা, অতিৰিক্ত মুখ্য চিকিৎসা বিষয়া (পৰিয়াল কল্যাণ) মুকুল দাস, স্বৰ্গদেউ চুকাফা মাল্টি স্পেচিয়েলিটি হস্পিটেলৰ মুখ্য কাৰ্যবাহী বিষয়া ডাঃ প্ৰকাশ কলনুৰকাৰো উপস্থিত থাকে।

অসম চৰকাৰৰ জলসম্পদ, তথ্য আৰু জনসংযোগ আদি বিভাগৰ মন্ত্ৰী তথা নগাঁও জিলাৰ অভিভাৱক মন্ত্ৰী পীযুষ হাজৰীকাই আজি নগাঁও জিলাৰ বিভিন্ন স্থানত স্থাপন কৰা ক’ভিড প্ৰতিষেধক প্ৰদান কেন্দ্ৰসমূহ পৰিদৰ্শন কৰে।

নগাঁও জিলা ভ্ৰমণ কালত মন্ত্ৰী গৰাকীয়ে নগাঁও সদৰ ৰাজহ চক্ৰ, চামগুৰি ৰাজহ চক্ৰ আৰু ৰহা ৰাজহ চক্ৰৰ বিভিন্ন ক’ভিড প্ৰতিষেধক প্ৰদান শিবিৰ পৰিদৰ্শন কৰে । তদুপৰি মন্ত্ৰী গৰাকীয়ে প্ৰতিষেধক প্ৰদান কাৰ্যৰ লগত জড়িত স্বাস্থ্য কৰ্মী আৰু প্ৰতিষেধক গ্ৰহণ কৰিবলৈ অহা লোকসকলৰ সৈতে মত- বিনিময় কৰাৰ লগতে কেন্দ্ৰ সমূহৰ আন্তঃগাঁথনি তথা অন্যান্য সা-সুবিধা সমূহৰ বিষয়ে বিশদভাৱে বুজ লয়।

কেন্দ্ৰসমূহ পৰিদৰ্শন কৰি মন্ত্ৰী গৰাকীয়ে ২১ জুন ২০২১ তাৰিখৰ পৰা আৰম্ভ হোৱা বৃহৎ টিকাকৰণ অভিযান সাফল্যমণ্ডিত কৰাৰ ক্ষেত্ৰত জিলা প্ৰশাসনে গ্ৰহণ কৰা ব্যৱস্থাৱলীৰ ওপৰত সন্তুষ্টি প্ৰকাশ কৰে। তেওঁ কয় যে, জিলা প্ৰশাসনে প্ৰতিষেধক প্ৰদানৰ নিৰ্ধাৰিত লক্ষ্যতকৈ অধিক প্ৰতিষেধক প্ৰদান কৰিবলৈ সক্ষম হোৱা বিষয়টো নিশ্চিত ভাৱে প্ৰশংসনীয়। তেওঁ বৃহৎ টিকাকৰণ অভিযানৰ প্ৰতি জনসাধাৰণে আগবঢ়োৱা ইতিবাচক সঁহাৰিৰ বাবেও ধন্যবাদ জ্ঞাপন কৰে। লগতে মন্ত্ৰী গৰাকীয়ে উল্লেখ কৰে যে, এই ক’ভিড সংক্ৰমণ ৰোধ কৰাত জনসাধাৰণৰ এক গভীৰ দায়িত্ব আছে।

মন্ত্ৰী গৰাকীৰ পৰিদৰ্শন কালত নগাঁও জিলাৰ অভিভাৱক সচিব ৰাজেশ প্ৰসাদ, নগাঁও সদৰ সমষ্টিৰ বিধায়ক ৰূপক শৰ্মা, বঢ়মপূৰ বিধানসভা সমষ্টিৰ বিধায়ক জিতু গোস্বামী, নগাঁও জিলাৰ উপায়ুক্ত কবিতা পদ্মনাভন, নগাঁও জিলাৰ আৰক্ষী অধীক্ষক আনন্দ মিশ্রকে প্ৰমুখ্য কৰি জিলা প্ৰশাসনৰ আৰু জিলা স্বাস্থ্য বিভাগৰ শীৰ্ষ বিষয়া সকল উপস্থিত থাকে।

টিকাকৰণৰ ফলত বন্ধ্যাত্ব দাবী কৰা শেহতীয়া প্ৰতিবেদন সমূহৰ মাজতেই, কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰালয়ে সোমবাৰে ২১জুন, ২০২১ত এক স্পষ্টীকৰণ জাৰি কৰে। স্পষ্টিকৰণটো অনুসৰি কৰোনাভাইৰাছ ভেকছিনবোৰৰ কোনোটোৱে উৰ্বৰতা প্ৰভাৱিত নকৰে কিয়নো সকলো ভেকছিন আৰু সেইবোৰৰ উপাদানবোৰ প্ৰথমে জন্তুৰ ওপৰত আৰু পিছত মানুহৰ ওপৰত পৰীক্ষা কৰা হয় যাতে তেওঁলোকৰ এনে কোনো পাৰ্শ্বক্ৰিয়া মূল্যাঙ্কন কৰিব পাৰি। তেনে স্থলত কিছুমান সংবাদ মাধ্যমৰ প্ৰতিবেদনে স্বাস্থ্যকৰ্মীসকলৰ এটা অংশত বিভিন্ন অন্ধবিশ্বাস আৰু পৌৰাণিক কাহিনীৰ প্ৰচলনৰ ওপৰত আলোকপাত কৰা দেখা পোৱা গৈছে। ভেকছিনবোৰৰ সুৰক্ষা আৰু কাৰ্যকাৰীতা নিশ্চিত হোৱাৰ পিছতহে ব্যৱহাৰৰ বাবে কৰ্তৃত্ব দিয়া হয়,” মন্ত্ৰালয়ে এক প্ৰেছ বিবৃতিত কয়। কেন্দ্ৰই কয় যে Covid-19 টিকাকৰণৰ পৰামৰ্শ দিয়া ‘কোনো বৈজ্ঞানিক প্ৰমাণ’ নাই যাৰ ফলত পুৰুষ আৰু মহিলাৰ বন্ধ্যাত্ব হ’ব পাৰে। স্বাস্থ্য মন্ত্ৰালয়ে লগতে কয়, “আগতেও টিকাকৰণ অভিযানৰ সময়ত সমাজত এনে ধৰণৰ ভুল তথ্য আৰু উৰা বাতৰি বিয়পি থকা দেখা গৈছিল, যেনে পলিঅ’ আৰু সৰু আই-ৰুবেলা।“