যোৰহাট মালৌআলিৰ বৰদা ফুকন পথত থকা শংকৰ মাধৱ কৃষ্টি বিকাশ কেন্দ্ৰ নামৰ শিশু গৃহটোৰ পৰা সন্ধানহীন হয় চাৰিটাকৈ কিশোৰ| য়ংগাৰ চাংটাম(১৩), চু্ল্লি চাংটাম (১০), ৰাজা সাহানী (১৩) আৰু পোহৰ গোৱালা(১২) নামৰ কিশোৰ কেইজন যোৱা দেওবাৰে পুৱাৰ পৰা সন্ধানহীন হৈ আছে| জানিব পৰা মতে দেওবাৰে পুৱা শিশু গৃহটোৰ পিছফালৰ গ্ৰীলৰ তলা ভাঙি পলাই যায় কিশোৰ কেইজন|দেওবাৰে পুৱা যোগৰ অনুশীলন কৰিবৰ বাবে শিশু সকলক শিশু গৃগটোৰ তত্বাৱধায়কে আহিবলৈ কোৱাৰ পিছতে পুৱা প্ৰায় ৬-৪৫ বজাত পলাই যায় কিশোৰ কেইজন| ঘটনা সন্দৰ্ভত শিশুগৃহ কতৃপক্ষই যোৰহাট সদৰ থানাত এজাহাৰ দাখিল কৰিছে আৰু যোৰহাট আৰক্ষীয়ে  কিশোৰ কেইজনৰ সন্ধানত জোৰদাৰ অভিযান  আৰম্ভ কৰিছে যদিও এই পৰ্য্যন্ত কোনো শুংসুত্ৰ উলিয়াব পৰা নাই| উল্লেখযোগ্য যে শংকৰ মাধৱ কৃষ্টি বিকাশ কেন্দ্ৰ নামৰ শিশু গৃহটো ৰাজ্য চৰকাৰৰ  সমাজ কল্যান বিভাগৰ অধীনৰ এটা শিশু গৃহ| শিশু গৃহটোত নিৰাপত্তাৰক্ষী আছিল যদিও উক্ত দিনা পুৱা ৬ বজাত কৰ্তব্য শেষ কৰি উভটি গৈছিল| নিৰুদ্দেশ হৈ থকা কিশোৰ কেইজনৰ ২ জন নাগালেণ্ডৰ মোককচাংৰ বুলি জানিব পৰা গৈছে|আনহাতে কিশোৰ কেইজনৰ সম্ভেদ পালে যোৰহাট আৰক্ষীৰ লগত যোগাযোগ কৰিবলৈ আহ্বান জনাইছে শিশুগৃহ কতৃপক্ষই| বাতৰি যুগুত কৰা পৰলৈকে  শিশু কেইটাৰ সন্ধান ওলোৱা নাই বুলি জানিব পৰা গৈছে ।

“অসমত এতিয়াও পৰ্যাপ্ত নহয় কডিড ডেকচিন”গৌৰৱ গগৈ

 নগাঁও ভোগেশ্বৰী ফুকননী অসামৰিক চিকিৎসালয়ত ” ফাৰ্ম টু ফুড ফাউণ্ডেচন” আৰু “গুঞ্জৰ” নামৰ অগ্ৰণী স্বেচ্ছাসেৱী অনুষ্ঠানৰ উদ্যোগত আৰু কলিয়াবৰৰ সাংসদ গৌৰৱ গগৈৰ প্ৰচেষ্টাত আজি কভিড চিকিৎসাৰ বাবে প্ৰয়োজনীয় কেতবোৰ অত্যাৱশ্যকীয় সামগ্ৰী বিতৰণ কৰা হয়। আজি এই অত্যাৱশ্যকীয় সামগ্ৰীসমুহ আনুষ্ঠানিক ভাবে নগাঁও ভোগেশ্বৰী ফুকননী অসামৰিক চিকিৎসালয় কৰ্তৃপক্ষক প্ৰদান কৰে সাংসদ গগৈয়ে। সাংসদ গৰাকীয়ে বিতৰণ কৰা সামগ্ৰী সমুহ হ’ল- অক্সিমিটাৰ, থাৰ্মস্কেনাৰ, থাৰ্মোমিটাৰ, পি পি ই কিট, অক্সিজেন কনচানটেটৰ, উন্নতমানৰ মাস্ক আদি। তেওঁ এই সামগ্ৰী বিতৰণ কৰাৰ পূৰ্বে নিজৰ মন্তব্য প্ৰকাশ কৰি কয়, কভিড-১৯ সমগ্ৰ দেশৰ লগতে অসমতো ভয়াবহ পৰিস্থিতিৰ সৃষ্টি কৰিছে। চৰকাৰে এতিয়া সৰ্বসাধাৰণ ৰাইজক ভেকচিন দিব পৰা নাই। আনকি, অসমত এতিয়াও পৰ্যাপ্ত পৰিমাণে ভেকচিন নাই। এই ক্ষেত্ৰত চৰকাৰক গুৰুত্ব দিবলৈ তেওঁ আহ্বান জনাই কয়, যিহেতু কডিড কেয়াৰৰ ক্ষেত্ৰত ৰোগীৰ বাবে প্ৰয়োজনীয় অত্যাৱশ্যকীয় সামগ্ৰী পৰ্যন্ত নহয়, সেয়ে তেওঁ কেইটামান স্বেচ্ছাসেৱী অনুষ্ঠানৰ সহযোগত ৰোগী আৰু চিকিৎসা কৰ্মীৰ বাবে কেতবোৰ সহায়ক সামগ্ৰী বিতৰণৰ ব্যৱস্থা কৰিছে। সাংসদ গৰাকীয়ে তেওঁৰ সাংসদ উন্নয়ন পুজিৰ পৰা নগাঁও ভোগেশ্বৰী ফুকননী অসামৰিক চিকিৎসালয়ৰ বাবে এখন এম্বূলেঞ্চ প্ৰদান কৰিব বুলিও নিজৰ মন্তব্যত ঘোষণা কৰে। আজিৰ অনুষ্ঠানত বটদ্ৰৱাৰ বিধায়িকা শিবামনি বৰা, স্বাস্থ্য বিভাগৰ যুটীয়া স্বাস্থ্য সঞ্চালক ডাঃ অতুল চন্দ্ৰ পাটৰ, নগাঁও অসামৰিক চিকিৎসাৰ অধীক্ষক ডাঃ এল চি নাথ, সমাজকৰ্মী সুৰেশ বৰা, মৃণাল শ‌ইকীয়াকে ধৰি বহু কেইগৰাকী বিশিষ্ট লোক উপস্থিত থাকে। উল্লেখ্য যে সাংসদ গৰাকীয়ে আজিৰ দিনটোত ৰূপহীহাট আৰু ধিং সমষ্টিৰ কেবাটাও চিকিৎসালয়ত অনুৰূপ সামগ্ৰী বিতৰণ কৰিব।

ৰাজ্যৰ জলসম্পদ মন্ত্ৰী পিযুষ হাজৰিকাই আজি বৰপেটা জিলাৰ বহৰিত উপস্থিত হৈ ব্ৰহ্মপুত্ৰ নৈয়ে সৃষ্টি কৰা ব্যাপক খহনীয়া জনিত পৰিস্থিতিৰ  পৰিদৰ্শন কৰি অৱস্থাৰ বুজ লয়। নৈৰ গৰাখহনীয়াই অঞ্চলটোৰ লগতে ইয়াৰ মহাপুৰুষ হৰিদেৱৰ দ্বাৰা স্থাপিত ঐতিহাসিক সত্ৰখনৰ প্ৰতি সৃষ্টি কৰা প্ৰবল ভাবুকি স্বচক্ষে প্ৰত্যক্ষ কৰি উদ্বিগ্নতা প্ৰকাশ কৰে আৰু ঐতিহ্যমণ্ডিত সত্ৰখন যিকোনো উপায়ে ৰক্ষা কৰাৰ প্ৰতিশ্ৰুতি দিয়ে। তেওঁ সত্ৰখনৰ লগতে বহৰি বজাৰ অঞ্চলটোৰ সুৰক্ষাৰ বাবে এখন জিও বেগৰ আঁচনি চলিত বিত্তীয় বৰ্ষতে গ্ৰহণ কৰা হ’ব বুলি ঘোষণা কৰে । সমগ্ৰ খহনীয়া পীড়িত অঞ্চলটো পৰিদৰ্শনৰ অন্তত তেওঁ কয় যে বহৰিৰ সুৰক্ষাৰ বাবে  দুতৰপীয়া ব্যৱস্থা গ্ৰহণ কৰা হ’ব। প্ৰথম পৰ্যায়ত সত্ৰৰ কাষৰ এক-ডেৰ কিলোমিটাৰ অঞ্চলত জিও বেগেৰে সুৰক্ষাৰ ব্যৱস্থা লোৱা হ’ব। তাৰ লগে লগে উজনিৰ দিশে পাৰ্কুপাইন দি নৈখনৰ গতি সলনিৰো প্ৰয়াস চলোৱা হ’ব। এই কাৰ্যত সফল হলে বাকী অংশ্ও সুৰক্ষিত হোৱাৰ আশা আছে। অন্যথা বাকী অংশৰ বাবে পৰ্যায়ক্ৰমে অন্য প্ৰতিৰোধৰ ব্যৱস্থা গ্ৰহণ কৰা হ’ব বুলি মন্ত্ৰী গৰাকীয়ে উপস্থিত সাংবাদিকৰ আগত সদৰি কৰে। তদুপৰি সাময়িক সকাহৰ বাবে জলসম্পদ বিভাগৰ  নিয়মীয়া মেৰামতি আৰু প্ৰতিপালন শিতানৰ পুজিৰে যৎপৰোনাস্তি প্ৰচেষ্টা চলাই যাবলৈ বিভাগীয় বিষয়া সকলক নিৰ্দেশ দিয়াৰ কথা উল্লেখ কৰি তেওঁ কয় যে, ইতিমধ্যে এই অস্থায়ী ব্যৱস্থায়ো কিছু কাম দিছে। ম‌ই ইয়ালৈ আহিবলৈ সময় পোৱা নাছিলো যদিও গুৱাহাটীৰ পৰাই ফোনযোগে সকলো কাম-কাজৰ তদাৰক কৰি আছোঁ।  মন্ত্ৰী গৰাকীয়ে নাওত উঠি কিছুদূৰলৈ গৈ খহনীয়াৰ ভয়াবহতা প্ৰত্যক্ষ কৰে। এই পৰিদৰ্শন কালত চেঙা সমষ্টিৰ বিধায়ক‌ আশ্ৰাফুল হুছেইন, বৰপেটাৰ বিধায়ক আব্দুৰ ৰহিম আহমেদ, বাঘবৰৰ বিধায়ক শ্বেৰমান আলী আহমেদ, জিলা উপায়ুক্ত তেজ প্ৰসাদ ভূচাল, অসম উদ্যোগিক উন্নয়ন নিগমৰ উপাধ্যক্ষ জিতু তালুকদাৰ, জিলা তথ্য আৰু জনসংযোগ বিষয়া বিকাশ শৰ্মা, চেঙাৰ চক্ৰ বিষয়া নিতুল খাটনিয়াৰ আৰু জলসম্পদ বিভাগৰ  জেষ্ঠ বিষয়া সকল উপস্থিত থাকে।  ৰাজ্যৰ তথ্য আৰু জনসংযোগ তথা সংসদীয় পৰিক্ৰমা বিভাগৰো দায়িত্বত থকা মন্ত্ৰী গৰাকীয়ে ইয়াৰ আগতে প্ৰথমেই বহৰি সত্ৰত সেৱা জনাই সত্ৰ চৌহদতে এটা গছপুলি ৰূপণ কৰে। সত্ৰ সমিতিৰ তৰফৰ পৰা মন্ত্ৰী গৰাকীক গায়ন বায়নেৰে আদৰণি জনোৱাৰ লগতে চেলেং চাদৰ, গ্ৰন্থৰ টোপোলা আদিৰে সম্বৰ্ধনা জনায়। জিলা জনসংযোগ বিষয়া আৰু জলসম্পদ বিভাগৰ তৰফৰ পৰাও  মন্ত্ৰী গৰাকীক ফুলাম গামোছা, শৰাই আদিৰে আদৰণি জনোৱা হয়। বহৰিৰ খহনীয়া পৰিদৰ্শনৰ পিছতে মন্ত্ৰী হাজৰিকাই সৰভোগলৈ গৈ কালি মৃত্যু বৰণ কৰা বিজেপিৰ জিলা সভাপতি তথা অসম শক্তি উৎপাদন প্ৰতিষ্ঠানৰ অন্যতম সঞ্চালক শংকৰ চন্দ্ৰ দাসৰ বাসগৃহলৈ গৈ পৰিয়াল বৰ্গক সাক্ষাৎ কৰাৰ লগতে মৃতকৰ প্ৰতি শ্ৰদ্ধা নিবেদন কৰে। তাৰ পিছতে তেওঁ পাঠশালালৈ গৈ অলপতে মৃত্যু মুখত পৰা বিশিষ্ট শিক্ষাবিদ তথা সমাজ কৰ্মী সম্পূৰ্ণানন্দ তালুকদাৰৰ ঘৰলৈ গৈ মৃতকৰ প্ৰতি শ্ৰদ্ধা নিবেদন কৰে।

 নগাঁও জিলা  বন বিভাগৰ এটা অভিযানকাৰী দলে আজি জিলাখনৰ জুৰীয়াৰ দক্ষিণ খাটোৱাল অঞ্চলত অভিযান চলাই এটা অবৈধ কাঠ ফলা মিল জব্দ কৰিবলৈ সক্ষম হয় ৷ জানিব পৰা মতে, দীৰ্ঘদিন  ধৰি জুৰীয়াৰ দক্ষিণ খাটোৱাল অঞ্চলত মো:মতিউৰ ৰহমান নামৰ এজন  লোকে  অবৈধ ভাবে কাঠ ফলা মিল চলাই আহিছিল। এই মিলত একাংশ অসাধু কাঠ ব্যৱসায়ীয়ে অতি মূল্যবান চোৰাং কাঠ ফালি জিলা খনৰ বিভিন্ন স্থানলৈ সৰবৰাহ কৰি আহিছিল।  এই খবৰ গোপন সূত্ৰে লাভ কৰি আজি নগাঁও বনাঞ্চলিক বিষয়া জয়ন্ত গোস্বামীৰ নেতৃত্বত যোৱা দলটোৱে  অবৈধ কাঠফলা মিলটো উৎখাত কৰে। এই অভিযানত  বনাঞ্চলিক বিষয়া জয়ন্ত গোস্বামীক সংগ দিয়ে বনপালক প্ৰভাত বৰা,প্ৰভাত বৰুৱা  লগতে কেইবাগৰাকীও বনকৰ্মীয়ে। অৱশ্যে আজিৰ অভিযানত  অবৈধ কাঠমিলৰ লগত জড়িত কোনো লোকক গ্ৰেপ্তাৰ কৰিবলৈ সক্ষম হোৱা নাই।

নামনি মাজুলীৰ বিৰিণাবাৰীৰ অনাথ শিশু কেইটাৰ খবৰ ল’বলৈ সদৌ মাজুলী জিলা ছাত্ৰ সন্থাৰ এটি প্ৰতিনিধি দল তেওঁলোকৰ বাসগৃহত উপস্থিত হয়৷ সৰু অৱস্থাৰে পৰা দেউতাক অবিহনে মাকেই দিন হাজিৰা কৰি  কষ্টৰে কৰি পোহ পাল দি আছিল পৰিয়ালটিক৷ আজি পৰা প্ৰায় একবছৰ মান আগৰ পৰা তেওঁলোকৰ মাতৃৰো শাৰীৰিক অসুস্থতা বাঢ়ি যোৱাৰ ফলত যোৱা  সোমবাৰে কণমানি কেইটাই মাককো হেৰুৱাবলগীয়া হয়৷ সদৌ অসম ছাত্ৰ সন্থাৰ ৰাজ্যিক কাৰ্যনিৰ্বাহক সদস্য পবিত্ৰ গোস্বামী সদৌ মাজুলী জিলা ছাত্ৰ সন্থাৰ সাধাৰণ সম্পাদক বিতোপন শৰ্মা উপসভাপতি দীপক নেওগ উপস্থিত হৈ আহিবলগীয়া দিন সমূহত শিশু কেইটি যাতে শৈক্ষিক যাত্ৰাত থমকি ৰ’ব লগীয়া নহয় তাৰ বাবে ছাত্ৰ সন্থাই বলিষ্ঠ পদক্ষেপ গ্ৰহণ কৰিব বুলি জানিবলৈ দিছে৷ লগতে ছাত্ৰ সন্থাই মাজুলী জিলা প্ৰশাসন আৰু অসম চৰকাৰক তাৎক্ষণিক ব্যৱস্থা গ্ৰহণ কৰি শিশু কেইটিৰ জীৱন সম্পত্তি নিৰাপত্তাৰ যাৱতীয় ব্যৱস্থা গ্ৰহণ কৰিবলৈ দাবী জনাইছে৷ লগতে তেওঁলোকক এটি বাসগৃহ প্ৰথমে নিৰ্মান কৰি দিয়াৰ লগতে খোৱা পানীৰ যাৱতীয় ব্যৱস্থা শীঘ্ৰে কৰি দিবলৈ অসম চৰকাৰক আহ্বান জনাইছে৷

 কৰোনা আতংকৰ মাজতেই ডিব্ৰুগড় জিলাৰ টেঙাখাত আৰক্ষী থানাৰ অধীনস্থ  কাছগাঁৱত যোৱা নিশা প্ৰায় ৮ মান বজাত সুৰামত্ত হৈ দুজন লোকে আন এজন লোকক কুঠাৰেৰে মৰিয়াই হত্যা কৰা ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে। উল্লেখযোগ্য যে টেঙাখাত আৰক্ষী থানাৰ অধীনস্থ কাছ গাঁৱৰ বাবাটো (অন্নন) ঘাটোৱাৰ (২৪) আৰু কমলেশ্বৰ ঘাটোৱাৰ (২২) নামৰ লোক দুজনে অজয় গোৱালা (২৩) নামৰ লোকজনক পাৰিবাৰিক কাৰণত সুৰামত্ত হৈ কুঠাৰেৰে মৰিয়াই হত্যা কৰে। লোকজনক টেঙাখাত মহাত্মা গান্ধী আদৰ্শ চিকিৎসালয়লৈ নিয়া হৈছিল যদিও চিকিৎসকে লোকজনক মৃত বুলি ঘোষণা কৰে। ইতিমধ্যে আৰক্ষীয়ে ঘটনাস্থলীত উপস্থিত হৈ মৃতদেহ উদ্ধাৰ কৰাৰ লগতে লোকজনক মৰণোত্তৰ পৰীক্ষাৰ বাবে অসম চিকিৎসা মহাবিদ্যালয়লৈ প্ৰেৰণ কৰিছে। ঘটনাৰ সন্দৰ্ভত আৰক্ষীয়ে তদন্ত অব্যাহত ৰখাৰ লগতে হত্যাকাৰী বাবাটো ঘাটোৱাৰ আৰু কমলেশ্বৰ ঘাটোৱাৰক আটক কৰি এক গোচৰ ৰুজু কৰি জেল হাজোতলৈ প্ৰেৰণ কৰে।

ধুবুৰী জিলাৰ বিভিন্ন প্ৰান্তত মাৰাত্মক ড্ৰাগছৰ বিৰুদ্ধে অভিযান অব্যাহত ৰাখিছে ধুবুৰী আৰক্ষীয়ে।  ধুবুৰী জিলাৰ অন্তৰ্গত আদাবাৰী গাঁও পঞ্চায়তৰ ৰোৱা দ্বিতীয় খণ্ড গাঁওত আজি দিনৰ ১১,৩০ বজাত ধুবুৰীৰ আৰক্ষীৰ দল আৰু ৪৮ চি আৰ পি এফ দলৰ যৌথ অভিযানত ৰোৱা দ্বিতীয় খণ্ড গাঁওৰ ৩৩ বছৰীয়া   সাহাদ আলীৰ ঘৰত হঠাৎ অভিযান চলাই সহাদ আলীৰ ঘৰৰ পৰা   ২২ পিচ ব্ৰাৰাউন ছুগাৰৰ ডিব্বা উদ্ধাৰ কৰে। জানিব পৰা মতে আৰক্ষীয়ে এক গোপন সূত্ৰৰ পমখেদি  এই অভিযান চলায়। অভিযান কালত ৪৮ বেটেলিয়ানৰ চি আৰ পি এফ দল আৰু আৰক্ষীয়ে ব্ৰাৰাউন ছুগাৰৰ বিক্ৰী কৰোতা সাহাদ আলীক গ্ৰেপ্তাৰ কৰিব পৰা নাই। আৰক্ষীৰ অহাৰ উমান পাই ঘৰৰ পৰা পলায়ন কৰে। উল্লেখ্য যে, সৰ্বনাসী ড্ৰাগছৰ বেহাত নামি পৰিছে ধুবুৰীৰ একাংশ নৱ প্ৰজন্মই। একাংশ যুৱকে  উপাৰ্জনৰ পথ হিচাপে বাছি লৈছে এতিয়া ড্ৰাগছৰ বেহা। সাহাদ আলীক বিচাৰি আৰক্ষীয়ে অব্যাহত ৰাখিছে বুলি ধুবুৰী সদৰ থানাৰ ভাৰ প্ৰাপ্ত বিষয়া মুকুল হাজৰিকাই জানিবলৈ দিয়ে।

চৰকাৰী আঁচনি যেন পঞ্চায়ত প্ৰতিনিধি সকলৰ বাবে এতিয়া খিৰতী গাই হৈ পৰিছে। বৰপেটা জিলাৰ বাঘবৰ সমষ্টিৰ অন্তৰ্গত ৭২ নং বাঘমাৰা চৰ গাওঁ পঞ্চায়তৰ ৩ নং ৱাৰ্ডৰ ভূয়াপাৰাত পঞ্চায়ত সভানেত্ৰী আকলিমা খাতুনৰ বিৰুদ্ধে দুৰ্নীতি-অনিয়মৰ অভিযোগ উত্থাপন কৰি ৰাইজে তীব্ৰ প্ৰতিবাদ সাৱস্ত্য কৰে। ৰাইজৰ অভিযোগ মতে পঞ্চায়ত খনত চতুৰ্দশ বিত্তীয় আঁচনিৰ ২৫ লাখ টকাৰ মাত্ৰ ২০-২৫ শতাংশ টকাৰ  কাম কৰি হাতদীঘল সভানেত্ৰী আকলিমা খাতুনে বাকী সমূদায় ধন আত্মসাৎ কৰিছে। উল্লেখ্য যে বিধায়ক পুজিৰ এক লাখ টকা অঞ্চলটোৰ এখন মছজিদৰ নামত আৱন্টন দিছিল যদিও তাৰে পৰা সভানেত্ৰী গৰাকীয়ে ৫০ হাজাৰ টকাৰ আত্মসাৎ কৰা বুলি ৰাইজে অভিযোগ উত্থাপন কৰিছে। উপায়বিহীন হৈ ৰাইজে ৰাজপথত ওলাই প্ৰতিবাদ কৰিবলৈ লোৱাত পঞ্চায়ত সভানেত্ৰীৰ একাংশ ভেৰোনীয়া গুণ্ডাই প্ৰতিবাদকাৰীক বাধা দিয়ে। সাংবাদিকৰ সন্মুখতেই প্ৰতিবাদকাৰীক প্ৰতিবাদ নকৰিবলৈ বাধা দিয়াৰ উপৰিও আক্ৰমণ কৰিবলৈ চোঁচা লয়। প্ৰতিবাদ স্থলীত হুলস্থুলীয়া পৰিবেশৰ সৃষ্টি হয়। পিছত পঞ্চায়ত সভানেত্ৰীৰ ভেৰোনীয়া গুণ্ডাৰ বাধা নেওচি বিধায়ক শ্বেৰমান আলী হায় হায়, সভানেত্ৰী আকলিমা খাতুন হায় হায়, পঞ্চায়ত সভানেত্ৰীৰ দুৰ্নীতিৰ বন্ধ কৰক, সভানেত্ৰীৰ গুণ্ডা গিৰি নচলিব, পঞ্চায়তৰ কামত সংঘটিত হোৱা দুৰ্ণীতিৰ তদন্ত কৰিব লাগে আদি শ্ল-গানেৰে ৰাইজে উত্তাল প্ৰতিবাদ সাব্যস্ত কৰে। চৰকাৰ তথা বিভাগীয় কৰ্তৃপক্ষক সভানেত্ৰী আকলিমা খাতুনে সংঘটিত কৰা দুৰ্নীতিৰ তদন্ত সাপেক্ষে বিহীত ব্যৱস্থা গ্ৰহণৰ দাবী জনায় প্ৰতিবাদকাৰীয়ে।

ৰাজ্যত চলি থকা মাৰাত্মক ড্ৰাগছ সৰবৰাহৰ বিৰুদ্ধে ৰাজ্য চৰকাৰ তথা অসম আৰক্ষীৰ কঠোৰ স্থিতিৰ বাবে যোৱাকালি বিয়লি ৰহাত চলিল আৰক্ষীৰ বৃহত সফল অভিযান। এই অভিযানত বৃহত পৰিমাণৰ হেৰ’ইন সহ দুজন সৰবৰাহকাৰীক ৰহা আৰক্ষীয়ে আটক কৰিবলৈ সক্ষম হয়। আটকাধীন  ব্যক্তি দুজনৰ নাম আনোৱাৰ হুছেইন(৩১) আৰু আছিকুৰ ৰহমান(২৮)। দুয়োৰে ঘৰ কামপুৰ আৰক্ষী থানাৰ অন্তৰ্গত বাজবাটমাৰী আৰু শালমৰাত। আৰক্ষীয়ে তেঁওলোকৰ পৰা ৩০টা হিৰ’ইন ভৰ্তি কন্টেইনাৰ জব্দ কৰিবলৈ সক্ষম হয়। জানিব পৰামতে ৰহা আৰক্ষীয়ে বিশেষ সূত্ৰৰ পম খেদি বহু সময় ধৰি অভিযান চলাই থাকি ৰহা মহাবিদ্যালয়ৰ গেটৰ ৰাষ্ট্ৰীয় ঘাই পথত বিশেষ কৌশলেৰে আটক কৰে দুয়োজনক। লগতে জব্দ কৰে  এ এচ -০২ এ ,বি -১৯০৩ নম্বৰৰ এখন এল্ট বাহন। উল্লেখ্য যে,মৰিগাঁও জিলাৰ পৰা শালমৰালৈ অহা হিৰ’ইন কিনিবলৈ আৰক্ষীয়ে দৰদাম কৰি কিনিবলৈ চেষ্টা কৰি গাড়ীখন আগুচি ধৰাত সৰবৰাহকাৰী এজনে আৰক্ষীৰ হাতত কামুৰি পলায়নৰ চেষ্টা চলাইছিল যদিও ৰহা আৰক্ষীৰ তৎপৰতাত  খেদি খেদি পলাবলৈ বিচৰা যুৱক দুজনক আটক কৰিবলৈ সক্ষম হয় যদিও চালক জনে গাড়ীৰ পৰা দৌৰি পলাই যায় ।