গোলাঘাটত পুনৰ  দুজনৰ ক’ভিডত আক্ৰান্ত হৈ মৃত্যু। আজিলৈকে  মৃতকৰ সংখ্যা ৭ জনলৈ বৃদ্ধি ।গোলাঘাট জিলা ক’ভিড চিকিৎসালয়ত ক’ভিডত আক্ৰান্ত হৈ  নিশা এজনৰ মৃত্যু হোৱা বিপৰীতে আজি পুৱা আন এজন ৰোগীৰ মৃত্যু হয়। উল্লেখ্য যে গোলাঘাট জিলা কাজিৰঙা দ গাঁৱৰ তোলন গগৈ নামৰ ৩৫ বছৰীয় লোকজন  নিশা ১১.৫০ বজাত ক’ভিডত আক্ৰান্ত হোৱাত কভিড চিকিৎসালয় ভৰ্তি কৰায় যদিও ১:৪৫ বজাত লোকজনৰ মৃত্যু হয়। আনহাতে আজি পুৱা গোলাঘাট লাইফ লাইন চিকিৎসালয় সমীপৰ নিবাসী ভৱেন্দ্ৰ শৰ্মা নামৰ  লোকজন পুৱা কভিড চিকিৎসালয়ত মৃত্য হয়। বৰ্তমান গোলাঘাটত কভিডত আক্ৰান্ত হৈ মৃত্যু লোকৰ সংখ্যা ৭ জনলৈ বৃদ্ধি পোৱাৰ লগতে কালিলৈকে আক্ৰান্তৰ সংখ্যা বৃদ্ধি হৈ ১২৩৫ জন হৈছে।

এগৰাকী প্ৰাপ্ত বয়স্ক যুৱতীয়ে নিজৰ ইচ্ছাৰে এজন যুৱকৰ সৈতে পলাই যোৱাৰ পিছত পৰৱৰ্তী আৰক্ষীয়ে যুৱক-যুৱতীক উদ্ধাৰ কৰি যুৱকৰ বিৰুদ্ধে অপহৰণৰ গোচৰ ৰজু কৰি জেলত প্ৰেৰণ কৰাক লৈ ডবকাত ব্যাপক প্ৰতিক্ৰিয়াৰ সৃষ্টি হৈছে ৷ প্ৰাপ্ত বাতৰি অনুসৰি ডবকা থানাৰ অন্তৰ্গত ভেলৌগুৰি পথাৰৰ জনৈক জাকিৰৰ কন্যা আৰু চাংমাজী মিকিৰ পথাৰ গাঁৱৰ ৰাজীব আহমদ নামৰ এহাল যুৱক-যুৱতী যোৱা ১ মে’ৰ পৰাই ঘৰৰ পৰা অন্তৰ্ধান হয় ৷ পৰৱৰ্তী যুৱক-যুৱতীহালে গুৱাহাটীৰ এখন হোটেলত আশ্ৰয় লয় ৷ ঘটনা সম্পৰ্কত যুৱতী গৰাকীৰ পিতৃয়ে তেওঁৰ ‘নাবালিকা’ কন্যাক অপহৰণ কৰি লৈ যোৱা বুলি ডবকা আৰক্ষী থানাত এখন এজাহাৰ দাখিল কৰে ৷ আৰক্ষীয়ে যুৱকজনৰ বিৰুদ্ধে অপহৰণসহ কেবাটাও ধাৰাত ২০১/২১ নম্বৰত গোচৰ ৰুজু কৰি তদন্ত আৰম্ভ কৰে ৷ তদন্তৰ মাজতে যোৱা নিশা গুৱাহাটী আৰক্ষীৰ সহযোগত অন্তৰ্ধান হোৱা যুৱক-যুৱতীক উদ্ধাৰ কৰি ডবকা আৰক্ষীয়ে নিজৰ জিম্মাত লয় ৷ আজি যুৱকজনক ডবকা আৰক্ষীয়ে জেল হাজোতলৈ প্ৰেৰণ কৰাৰ লগতে যুৱতী গৰাকীক জবানবন্দী লিপিৱদ্ধ কৰিবলৈ ন্যায়িক প্ৰক্ৰিয়া আৰম্ভ কৰে ৷ ইপিনে, যুৱকজনক আৰক্ষীয়ে জেল হাজোতলৈ প্ৰেৰণ কৰাত ডবকাত ব্যাপক প্ৰতিক্ৰিয়াৰ সৃষ্টি হৈছে ৷ যুৱকজনৰ পৰিয়ালৰ লোকে কৰা অভিযোগ মতে, যুৱক-যুৱতীৰ মাজত দীৰ্ঘদিনৰ পৰা প্ৰেমৰ সম্পৰ্ক চলি আছে ৷ আনকি কিছু বছৰ পূৰ্বে সেই একে গৰাকী যুৱতী ঘৰৰ পৰা পলাই আহি যুৱকজনৰ ঘৰত উপস্থিত হৈছিল ৷ তেতিয়াই সমাজৰ লোকে যুৱতীগৰাকী প্ৰাপ্তবয়স্ক নোহোৱাত পিতৃৰ ওচৰত চমজাই দিয়া হৈছিল ৷ ইতিমধ্যে ওঠৰ বছৰ সম্পূৰ্ণ কৰা যুৱতীগৰাকীৰ পৰিয়ালে যুৱকজনৰ লগত বিয়া নিদিয়াৰ কথা কোৱাত যোৱা ১ মে’ৰ দিনা দুয়ো ঘৰৰ পৰা অন্তৰ্ধান হয় ৷ এইহাল যুৱক-যুৱতীৰ মাজত দীৰ্ঘদিনৰ পৰা প্ৰেমৰ সম্পৰ্ক চলি থকাৰ প্ৰমাণ হিচাপে যুৱকজনৰ পৰিয়ালৰ লোকে দুয়োৰ কিছু অন্তৰঙ্গ মুহূৰ্তৰ ফটোও সংবাদ মাধ্যমৰ লোকক প্ৰদৰ্শন কৰে ৷ লগতে যুৱতী গৰাকী যে সাবালক, তাৰ প্ৰমাণ হিচাপে জন্মৰ প্ৰমাণ থকা আধাৰ কাৰ্ডো যুৱকৰ পৰিয়ালে প্ৰদৰ্শন কৰে ৷ দুয়ো নিজৰ সন্মতিতে ঘৰৰ পৰা পলাইছিল, দুয়োৰে মোবাইল নম্বৰ পৰীক্ষা কৰিলে বহু কথা জলজল-পটপট হৈ ওলাই পৰিব ৷ এহাল প্ৰাপ্ত বয়স্ক যুৱক-যুৱতীয়ে নিজৰ পছন্দ অনুযায়ী বিবাহপাশত আৱদ্ধ হব পাৰে, এই সম্পৰ্কে দেশৰ উচ্চতম ন্যায়ালয়ে বহুকেইটা নিৰ্দেশ দি থৈছে ৷ তাৰ মাজতে ডবকা আৰক্ষীয়ে এগৰাকী প্ৰেমিক যুৱকৰ বিৰুদ্ধে মাৰাত্মক ধাৰাত গোচৰ ৰুজু কৰি জেললৈ প্ৰেৰণ কৰা সহজভাৱে লোৱা নাই ৷

সমগ্ৰ দেশ তথা ৰাজ্যতে মহামাৰী ক’ৰোনা ভাইৰাছে সংহাৰী ৰূপ ধাৰণ কৰাত ৰাজ্য চৰকাৰে নীতি নিৰ্দেশনা বান্ধি দিছে যদিও একাংশ অসচেতন ব্যক্তিয়ে জলাঞ্জলি দিয়াৰ দেখিবলৈ পোৱা গৈছে।উল্লেখ যে টীয়ক সমষ্টিৰ মিত্ৰজোঁটৰ প্ৰাৰ্থী গৰাকীৰ বিজয়ত কালি নিশা বিজেপিৰ একাংশই ভোজ ভাতৰ আয়োজন কৰিছিল টীয়কৰ পূব দুলীয়াৰ বিজেপি এগৰাকী ৱাৰ্ড সদস্যৰ চৌহদত। নিশা ৬ বজাৰ পৰা নৈশ সান্ধ্য আইন বলবৎ কৰাৰ পাছতো এই ভোজভাত আয়োজনৰ কথা আৰক্ষীয়ে খৱৰ পাই ঘটনাস্থলীত উপস্থিত হোৱাত সকলো পলাই পটং দিয়ে । কেৱল ভোজভাত আয়োজন কৰা পৰিয়ালৰ সদস্য সকলহে উপস্থিত থাকে । ইয়াৰ পাছতে ঘটনাস্থলীৰ পৰা আৰক্ষী গুছি অহাৰ পাছত একাংশ লোক পুনৰ সমবেত হয় সেই স্থানত ।এই ঘটনাৰ বিষয়ে প্ৰচাৰ হোৱাৰ পাছত ঘটনাস্থলীত উপস্থিত হোৱা প্ৰকাশ লাইভৰ কাকজানৰ সংবাদদাতা দেৱজিৎ বৰাক  বিজয়ত আত্মহাৰা দলটোৱে শাৰিৰীক ভাৱে আক্ৰমণ কৰাৰ উপৰি তেওঁৰ পৰিচয় পত্ৰ,চেনেলৰ ল’গ , মবাইল ফোন আদি কাঢ়ি লৈ এখন ওকা কাগজত চহী কৰাই লয় । অৱশ্যে ঘটনাস্থলীত উপস্থিত হোৱা কোনোবা এজনৰ সুমতি ওপজাত কাঢ়ি থোৱা সামগ্ৰী খিনি পথত আহি সংবাদদাতাজনক দি থৈ যায় । ইপিনে নিশাই সংবাদদাতাজনে আৰক্ষীক ঘটনা সন্দৰ্ভত লিখিত এজাহাৰ দাখিল কৰে । অৱশ্যে ঘটনা স্থলীত উপস্থিত থকা বিজেপিৰ এজন বিয়াগোম নেতাই টীয়ক আৰক্ষীক এজাহাৰ দি একো লাভ নহয় ,আৰক্ষী আমাৰ হাতৰ মুঠিত বুলি দম্ভালি মৰাৰ পাছত সংবাদ দাতাজনৰ অভিযোগ আৰক্ষীয়ে কেনেদৰে বিবেচনা কৰে সেয়াহে   লক্ষণীয় বিষয় হ’ব । ইফালে সংবাদকৰ্মী আক্ৰমনক দুষীয়ে যাতে উচিত শাস্তি পাই টীয়ক আঞ্চলিক ছাত্ৰ সন্থাই এক স্মাৰক পত্ৰ টীয়ক আৰক্ষী ভাৰপ্ৰাপ্ত বিষয়া লৈ প্ৰেৰণ কৰে । 

সদৌ অসম উন্নয়ন পৰিষদ নগাঁও জিলাৰ উদ্যোগত আজি দিনৰ ১১ বজাত চহৰৰ মুকুট শৰ্মা চাৰিআলিত চেনিটাইজাৰ আৰু মাস্ক বিতৰণৰ লগতে এটি ক’ৰোনা সজাগতা শিৱিৰ অনুষ্ঠিত হয় ৷ উক্ত চেনিটাজাৰ বিতৰণ আৰু মাস্ক বিতৰণ অনুষ্ঠানটিত স্বেচ্ছাসেৱী অনুষ্ঠানটোৰ তৰফৰ পৰা চহৰৰ ৰাজপথত চলাচল কৰা পথচাৰী সকলক মাস্ক আৰু চেনিটাইজাৰ বিতৰণ কৰা হয় ৷ স্বেচ্ছাসেৱী অনুষ্ঠানটোৰ তৰফৰ পৰা কেন্দ্ৰীয় সাংগঠনিক উপদ্দেষ্টা অসম নাথ,সাধাৰণ সম্পদাক মুনজ্যোতি নাথ,সম্পাদক মানবেন্দ্ৰ নাথ,হৰেন দাস,নিতুল বৰুৱা,প্ৰহ্লাদ শইকীয়া,নিতুল নাথ,এঞ্জেল বৰুৱা আদি উপস্থিত থাকে ৷ স্বেচ্ছাসেৱী অনুষ্ঠানটোবে আজি নগাঁও চহৰৰ লাওঁখোবা চাৰিআলি,নতুন পথাৰ, ঢাকাপট্টি,বৰবজাৰ, খুটিকটীয়া,শেনচোৱা, বেবেজীয়া,ফুলগুৰি,ৰহা আদি অঞ্চলত মাস্ক বিতৰণ আৰু চেনিটাইজাৰ বিতৰণৰে ৰাইজৰ মাজত সজাগতা সৃষ্টি কৰি আহিছে ৷ ক’ৰোনা দ্বিতীয় লহৰৰ সন্ত্ৰাসত দেশজুৰি সৃষ্টি হোবা ভয়াবহতাৰ বাবে ৰাইজ বহু শংকিত হৈ পৰা সময়েই ৰাইজৰ মাজত সদৌ অসম উন্নয়ন পৰিষদৰ এনে কাৰ্য্যক সচেতন মহলে শলাগ লৈছে ৷

সমগ্ৰ দেশজুৰি  ক’ভিড১৯ ভাইৰাছৰ দ্বিতীয় লহৰত সংক্ৰমণৰ আতংকময় পৰিৱেশৰ মাজতে নগাঁও জিলাৰ বিভিন্ন ঠাইৰ চাৰিআলি, তিনিআলি,বজাৰ,ব্যৱসায়ীক প্ৰতিষ্ঠান,ঔষধৰ বিপনী আদিত বিৰাজ কৰিছে এক ভয়ংকৰ পৰিৱেশৰ। জিলাখনৰ গ্ৰাম্যাঞ্চলৰ চাৰিআলি, তিনিআলি,বজাৰ সমূহৰ কথাটো বাদেই আন নালাগে নগাঁও চহৰৰ বিভিন্ন প্ৰান্তৰ সৰ্ব্বসাধাৰণ মানুহৰ মুখৰ পৰা অদৃশ্য হৈ পৰিছে মাস্ক। ঠিক একেদৰে গুৰুত্বহীন হৈ পৰিছে সামাজিক দূৰত্বৰ চৰকাৰী নিৰ্দেশনাও ৷ বজাৰ সমূহত একাংশ লোকে গাত গা লগাই বজাৰ সমাৰ কৰা দৃশ্য সূলভ হৈ পৰিছে। 
জিলাখনৰ নগৰ-চহৰ, গ্ৰাম্যাঞ্চলত বজাৰে সমাৰে অথবা আন কোনো কামত ঘৰৰ পৰা ওলাই যোৱা প্ৰায় পঞ্চাশ শতাংশ লোকেই মুখত মাস্ক নিপিন্ধে। খোজকাঢ়ি,চাইকেল চলাই যোৱা বহুতৰে মুখত আজিৰ তাৰিখত নাই কোনো মাস্কৰ ব্যৱহাৰ ৷ মাস্ক পিন্ধা একাংশ লোকে আকৌ নাক ওলিয়াই, একাংশই আকৌ থুতৰিত মাস্ক পৰিধান কৰাটোহে সম্প্ৰতি আমোদজনক বিষয় হৈ পৰিছে। সেইদৰে,হোটেল-মিঠাই বিপনী,চাটহাউছ,ৰেষ্টুৰেণ্ট আদিত মুখত মাস্ক আৰু হাতত হেণ্ডগ্ল’ভ অবিহনে গ্ৰাহকক চেলছ মেন সমূহে বিলাইছে খাদ্য সামগ্ৰী ৷ ইপিনে,জিলা খনৰ বিভিন্ন প্ৰান্তত প্ৰশাসনৰ সামাজিক দূৰত্বৰ নিৰ্দেশনা ধোঁৱাচাঙত উঠিছে। বজাৰ সমূহ, বিভিন্ন ব্যৱসায়িক প্ৰতিষ্ঠান,ঔষধৰ বিপনী সমূহত মাস্ক পৰিধান নকৰা লোকে ইজনে সিজনৰ গাত লগাই আজিও সামগ্ৰী ক্ৰয় কৰি থকা পৰিলক্ষিত হৈছে। উল্লেখ্য যে, জিলাখনৰ মিশ্যন মাৰ্টেক,ষ্টেডিয়াম মাৰ্কেট,সদৰ থানা ৰোড,হয়বৰগাঁও বজাৰ,ধিং গেট বজাৰ স্থিত ঔষধৰ বিপনী সমূহত এক ভয়ংকৰ দৃশ্য দেখিবলৈ পোবা গৈছে আজি কেইবাদিনো ধৰি ৷ এইসমূহ অঞ্চলত যি কেইখন ঔষধৰ বিপনী আছে তাত শ-শ লোকে ভিৰৰ মাজৰ পৰাই ঔষধ ক্ৰয় কৰি থকা পৰিলক্ষিত হৈছে ৷ ঔষধ বিপনীৰ কতৃপক্ষই এইক্ষেত্ৰত কোনো নিয়ম মানি চলা দেখিবলৈ পোবা নাই সাধাৰণ ৰাইজে ৷ তাৰোপৰি, নগাঁও চহৰকে প্ৰমুখ্য কৰি জিলা খনৰ বিভিন্ন প্ৰান্তৰ বিভিন্ন বেংক,বেংকৰ গ্ৰাহক সেৱা কেন্দ্ৰত গুৰুত্বহীন হৈ পৰিছে সামাজিক দূৰত্বৰ নিৰ্দেশনা। বেংকৰ ভিতৰতো এনে কেতবোৰ গ্ৰাহকৰ ভিৰ পৰিলক্ষিত হয় যাৰ মুখত নাই মাস্ক অথবা যাৰ মুখৰ বিপৰীতে থুতৰীতহে মাস্ক থাকে। নগাঁও জিলা প্ৰশাসনৰ শিথিলতাৰ সুযোগ গ্ৰহণ কৰি এই লোক সকলে মাস্ক আৰু সামাজিক দূৰত্বৰ নিৰ্দেশনাক গুৰুত্বহীন কৰি অন্য সহস্ৰাধিক লোকৰ জীৱনলৈ নমাই আনিছে ভয়ংকৰ বিপদ।ইপিনে,ৰাজপথত বাইক আৰোহী,চাইকেল আৰোহীয়ে থু-খেকাৰ পেলোৱাটো যেন নিয়মত পৰিনত হৈছে ৷ আন ঠাইৰ কথাটো বাদেই নগাঁৱৰ ৰাজপথৰ বিভিন্ন অংশত তামোল,গুটখাৰ পিকৰে ৰাঙলী হৈ পৰা পৰিলক্ষিত হৈছে। সেইবোৰ ভৰিৰে গচকি মুহাৰী ৰাইজ ঘৰমুৱা হব লগীয়াত পৰিচে ৷ আনহাতে,নগাঁৱৰ চহৰাঞ্চলৰ ব্যৱসায়ীক প্ৰতিষ্ঠান সমূহ বিয়লি ২বজাৰ ঠিক লগেলগে বন্ধ হৈ যায় যদিও চহৰৰ দাতিকাষৰীয়া শেনচোৱা তিনিআলি,বৰভেটি চাৰিআলি,কাছমাৰী চাৰিআলি,চলচলি- সোনাইপাৰ আদি অঞ্চল সমূহত সন্ধিয়া পৰ্যন্ত ব্যৱসায়ীক প্ৰতিষ্ঠান সমূহ মুকলি কৰি থৈ ৰাইজৰ বৃহৎ সমাগম হৈ থকা দেখিবলৈ পোবা গৈছে ৷ এইক্ষেত্ৰত ব্যৱসায়ীক প্ৰতিষ্ঠান-ঔষধৰ বিপনী সমূহত হোবা বৃহৎ সমাগম বোৰে সৰ্ব্বসাধাৰণ ৰাইজলৈ বিপদ মাতি অনাৰ আশংকাই দেখা দিছে ৷ এইক্ষেত্ৰত জিলা প্ৰশাসন আৰু আৰক্ষী প্ৰশাসনক বিহিত ব্যৱস্থা গ্ৰহণৰ বাবে আহ্বান জনাইছে নগাঁৱৰ সচেতন মহলে ৷ 

চুবুৰীয়া ৰাজ্য পশ্চিমবংগত নিৰ্বাচনী হিংসাৰ বলি হোৱা বিজেপি কৰ্মীৰ ওপৰত নিৰ্যাতন বন্ধ কৰাৰ দাবীত আজি নগৰবেৰা ৰাজহ চক্ৰ বিষয়াৰ কাৰ্যালয়ৰ সন্মুখত  বিজেপিৰ কৰ্মী সকলে অৱস্থান ধৰ্মঘট পালন কৰাৰ লগতে প্ৰতিবাদ সাব্যস্ত কৰে। নগৰবেৰা মণ্ডল বিজেপিৰ কাৰ্যকৰ্তা সকলে পশ্চিমবংগত বিজেপি কৰ্মীৰ ওপৰত চলা নিৰ্যাতন বন্ধ কৰক, বিজেপি জিন্দাবাদ আদি ধ্বনি দি প্ৰতিবাদ সাব্যস্ত কৰে। কভিড প্ৰটকলৰ বাবে মাত্ৰ ২০ গৰাকী বিজেপি কাৰ্যকৰ্তাই নগৰবেৰা ৰাজহ চক্ৰ বিষয়াৰ কাৰ্যালয় চৌহদত প্ৰতিবাদ সাব্যস্ত কৰাৰ লগতে চক্ৰ বিষয়া বনশ্ৰী মালাকৰৰ জৰিয়তে ভাৰতৰ ৰাষ্ট্ৰপতি লৈ এখন স্মাৰক পত্ৰও প্ৰেৰণ কৰে। উল্লেখ্য যে এই অৱস্থান ধৰ্মঘট-প্ৰতিবাদী কাৰ্যসূচীত নগৰবেৰা মণ্ডল বিজেপিৰ সভাপতি-পবিত্ৰ কুমাৰ মেধি, সম্পাদকদ্বয়-মানিক কলিতাছাৰুকৃষ্ণ কলিতা,বিজেপি জিলা আই,টি চেলৰমাধৱ দাস,জিলা অ, বি, চি মৰ্চাৰ সম্পাদক, বিপুল পালৰ লগতে নগৰবেৰা মণ্ডল বিজেপিৰ একাংশ কৰ্মকৰ্তা উপস্থিত থাকে।