বঙাইগাঁও জিলাৰ যােগীঘােপা থানাৰ অন্তৰ্গত কাবাইটাৰীত কালি আৰক্ষীয়ে অভিযান চলাই বৃহৎ পৰিমাণৰ নিচাজাতীয় দ্ৰব্যসহ পিতা – পুত্ৰক আটক কৰে । আটকাধীন দুয়াে ক্রমে কাবাইটাৰী প্রথম খণ্ড গাঁৱৰ ৰেজাউল ইছলাম আৰু তেওঁৰ পুত্র ইনামুল ইছলাম বুলি আৰক্ষীয়ে জানিবলৈ দিছে । উত্তৰ শালমাৰা মহকুমা আৰক্ষী বিষয়া হেমেন দাসৰ নেতৃত্বত যােগীঘােপা আৰক্ষীৰ এটা দলে গােপন খবৰৰ পম খেদি কালি কাবাইটাৰী প্রথম খণ্ড গাঁৱৰ ৰেজাউল ইছলামৰ নিজা বাসগৃহ আৰু গেলামালৰ দোকানত অভিযান চলায় । যোগীঘোপা আৰক্ষীৰ দলটোৱে চলোৱা জোৰদাৰ অভিযানত বাসগৃহ আৰু দোকান খনত তন্ন তন্নকৈ তালাচী চলাই নিষিদ্ধ ঘােষিত ৭৪ বটল কাহৰ ঔষধ জব্দ কৰাৰ লগতে ড্ৰাগছ ব্যৱসায়ত জড়িত থকা ৰেজাউল ইছলাম আৰু পুত্র ইনামুল ইছলামক আটক কৰে । আৰক্ষীয়ে এই সন্দৰ্ভত ১৯৮/২০২১ নম্বৰত এটা গােচৰ পঞ্জীয়ন কৰি তদন্ত অব্যাহত ৰাখিছে । ইপিনে  যোগীঘোপা আৰক্ষীৰ নিচাযুক্ত দ্ৰব্যৰ বিৰুদ্ধে লোৱা এই অভিযানক অঞ্চলটোৰ সচেতন ৰাইজে ভূয়সী প্ৰশংসা কৰে লগতে অঞ্চলটিক এই বৰবিহৰ পৰা মুক্ত কৰিবলৈ কঠোৰ পদক্ষেপ লোৱাৰ আহ্বান জনায় ।

ক’ভিডসৃষ্ট পৰিৱেশৰ বাবে দুৰৱস্থা কাছাৰৰ যৌনকর্মীসকলকৰ। এনে সময়ত ৰেচন যোগান ধৰিবলৈ জিলাখনৰ উপায়ুক্তক নির্দেশ দিছে গুৱাহাটী উচ্চ ন্যায়ালয়ে। এটা প্রকল্প ৰূপায়ণৰ বাবে কাছাৰত চিনাক্ত কৰা যৌনকর্মীসকলৰ পৰিয়ালক এই ৰেচন যোগান ধৰিবলৈ ন্যায়ালয়ে নির্দেশনা দিছে৷শুকুৰবাৰে শুনানি গ্রহণ কৰি উচ্চ ন্যায়ালয়ে অসমৰ যৌনকর্মীসকলক চিনাক্ত কৰি কিদৰে মহামাৰীৰ সময়ছোৱাত সাহায্য প্রদান কৰিব পৰা যায়, সেই সন্দর্ভত অৱগত কৰিবলৈ চৰকাৰী পক্ষক নির্দেশনা দিয়ে৷ এই গোচৰটোৰ পৰৱর্তী শুনানি অহা ১ জুনত গ্রহণ কৰিব গুৱাহাটী উচ্চ ন্যায়ালয়ে৷

‘বৰ্তমান সময়ত কোনেও ভয়ত বিতত ন’হব। এই সময়ত এজনে আনজনৰ সহায়ক হওক’। এই আহ্বান চাবুৱা বিধান সভা সমষ্টিৰ বিধায়ক পোণাকন বৰুৱাৰ। বিধায়ক পোণাকন বৰুৱাৰ আহ্বানমৰ্মে ডিকমত কন্টেইনমেন্ট জ’ন থকা সমূহ পৰিয়ালক খাদ্য-সামগ্ৰী প্ৰদান কৰে অগপ কৰ্মী সকলে। ৰাজ্যিক মহিলা পৰিষদৰ নেত্ৰী অঞ্জলী গগৈ, ৰাজিক সাধাৰণ পৰিষদৰ সদস্য প্ৰভাত চাহু, যুৱ পৰিষদৰ দেব্ৰবত দাসে চাউল, দাইল, মিঠাতেল, আলু, পিয়াজসহ সাহাৰ্য টোপোলাসমূহ কন্টেইনমেন্ট জ’নত থকা পৰিয়ালকেইটাক প্ৰদান কৰে। কৰোনা মহামাৰীৰ সময়ত কোনো পৰিয়ালেই ঘৰত আবদ্ধ হৈ থাকি যাতে অসুবিধাৰ সন্মুখীন হ’বলগীয়া নহয় তাৰে বাবে চাবুৱাৰ সমষ্টিৰ বিধায়ক পুনাকণ বৰুৱাই সদায় নজৰ দি থাকিব বুলিও সংবাদ মাধ্যমৰ আগত মন্তব্য কৰে অগপ ৰাজ্যিক নেত্ৰী অঞ্জলী গগৈয়ে।

আজি বঙাইগাওঁ জিলাৰ অভয়াপুৰী দক্ষিন বিধান সভা সমষ্টিৰ অন্তৰ্গত ডুবাচুৰী, মধুফল, পাচনীয়া-মোহনপুৰ আদি নৈ-পৰীয়া অঞ্চল সমূহ পৰিদৰ্শন কৰি খহনীয়া অঞ্চলসমূহৰ পৰিস্থিতিৰ বুজ লয় স্থানীয় বিধায়ক প্ৰদীপ সৰকাৰে । লগতে সমস্যাৰ ওপৰত স্থানীয় ৰাইজৰ সৈতে এক আলোচনাত মিলিত হয় বিধায়ক গৰাকীয়ে । খহনীয়া স্থলী সমুহ পৰিদৰ্শনৰ সময়ত সৃজনগ্ৰাম চক্ৰ বিষয়া শ্ৰীযুত সুভ্ৰম আদিত্য বৰা, টাপাট্টাৰী খণ্ড উন্নয়ণ বিষয়া আৰু জল সম্পদ বিভাগৰ বিষয়ববীয়া সকল উপস্থিত থাকে । উল্লেখ্য যে, অঞ্চল সমূহত আই নদী, মানাহ, বেঁকী আৰু ব্ৰহ্মপুত্ৰ নদীৰ প্ৰৱল সোঁতে ভয়াৱহ খহনীয়াৰ সৃষ্টি কৰিছে। অঞ্চলটোৰ নৈপৰীয়া শতাধিক পৰিয়ালৰ বাসগৃহ নৈৰ বুকুত জাহ যোৱাৰ উপক্ৰম হোৱাত নিদ্ৰাহৰণ হৈছে পৰিয়াল কেইটাৰ । খহনীয়া অঞ্চল সমুহ পৰিদৰ্শন কৰি বিধায়ক প্ৰদীপ সৰকাৰে খহনীয়া ৰোধ কৰাৰ বাবে বিভাগীয় কতৃপক্ষক ক্ষিপ্ৰতাৰে কাম কৰিবলৈ নিৰ্দেশ দিয়ে । খহনীয়া প্ৰতিৰোধ কৰাৰ ক্ষেত্ৰত অসম চৰকাৰে সৰ্ব্বোতো প্ৰকাৰে সহায় কৰিব বুলি আশা প্ৰকাশ কৰিছে বিধায়ক গৰাকীয়ে । ইপিনে যোগীঘোপাৰ চটপাৰাতো ব্ৰহ্মপুত্ৰ নদীয়ে প্ৰত্যেক বছৰৰ দৰে এইবেলিও খহনীয়াৰ সৃষ্টি কৰিছে । খহনীয়াই গাওঁখনৰ প্ৰতি এক ভাবুকিৰ সৃষ্টি কৰিছে । এই সময়ত চৰকাৰে ব্যৱস্থা গ্ৰহণ নকৰিলে গাওঁ খন নৈত বিলীন হোৱাৰ সম্ভাৱনাই দেখা দিছে ।

ক’ভিড কেন্দ্ৰীক ভয়াবহতা স্বত্তেও গুৱাহাটী মহানগৰীত একাংশ লোকে কৌশলৰে চলাই আছে দেশী – বিদেশী অবৈধ সুৰাৰ বেহা । অৱশেষত গোপন সূত্ৰৰ পম খেদি  আবকাৰী বিভাগৰ  কামৰূপ মহানগৰ জিলাৰ আবকাৰী অধীক্ষক মানৱী দাস আৰু উপ আবকাৰী অধীক্ষক মৌচুমী কোঁৱৰৰ নিৰ্দেশত  গুৱাহাটী সদৰৰ আবকাৰী দলে কালি বিয়লিৰ  পৰা সন্ধিয়ালৈ মহানগৰীৰ বিভিন্ন অঞ্চলত অবৈধ সুৰাৰ বিৰুদ্ধে এক অভিযান চলায় । আৱকাৰী বিভাগৰ সূত্ৰই সদৰি কৰা অনুসৰি গুৱাহাটী সদৰৰ আৱকাৰী  পৰিদৰ্শকদ্বয় গোবৰ্ধন ডেকা আৰু দিব্যপ্ৰতীম বৰাৰ নেতৃত্বত আৱকাৰী দলে উলুবাৰী কছাৰীবস্তি , বেলতলা , চচল , জটিয়া , আঠগাঁও আৰু পল্টন বজাৰত চলোৱা  অভিযানত ১৬৫ লিটাৰ দেশীয় সুৰা আৰু ৩৫ বটল বিদেশী সুৰা জব্দ কৰিবলৈ সক্ষম হয় । জানিব পৰা মতে অভিযানকাৰী দলটোৱে ক’ভিড কেন্দ্ৰীক ভয়াৱহ পৰিস্থিতিৰ প্ৰতি লক্ষ্য ৰাখি স্বাস্থ্যজনিত কাৰণত অবৈধ সুৰাৰ লগত জড়িত লোক সকলক আটক নকৰিলে বুলি জানিব পৰা গৈছে ।