মূখ্যমন্ত্ৰী সমগ্র গ্ৰাম্য উন্নয়ন যোঁজনাৰ অধিনৰ অসম যুৱ উন্নয়ন অভিযান  আঁচনিৰ অধিনত নিৰ্মিত  হাতীধুৰা মহাবিদ্যালয়ৰ খেল পথাৰ খন আজি আনুষ্ঠানিক ভাবে শুভ উদ্বোধন কৰে ২৮ নং গোসাইগাঁও বিধান সভা সমষ্টিৰ বিধায়ক মাজেন্দ্ৰ নাৰ্জাৰীয়ে ।

উল্লেখ্য যে ধুবুৰী জিলাৰ তামাৰহাট থানাৰ অন্তৰ্গত হাতীধুৰা মহাবিদ্যালয়ৰ খেল পথাৰ খনৰ উন্নয়নৰ বাবে বিভাগীয় কতৃপক্ষই ২০১৮–১৯ বিত্তীয় বছৰত  মূখ্যমন্ত্ৰী সমগ্র গ্ৰাম্য উন্নয়ন যোঁজনাৰ অধিনৰ অসম যুৱ উন্নয়ন অভিযান  আঁচনিৰ অধিনত ২০,০০০০০ (কুৰি লাখ )টকা মঞ্জুৰী দিয়ে । উক্ত মঞ্জুৰীকৃত ধনেৰে হাতীধুৰা মহাবিদ্যালয় কতৃপক্ষই উক্ত খেল পথাৰ খনৰ উন্নয়নৰ কাম ইতিমধ্যে সমাপ্ত কৰিছে আৰু আজি ৰঙা  ফিতা কাটি খেল পথাৰ খন আনুষ্ঠানিক ভাবে শুভ উদ্বোধন কৰা হয় ।

খেল পথাৰ খনৰ উদ্বোধনৰ পিছত হাতীধুৰা মহাবিদ্যালয়ৰ অধ্যক্ষ ড’ ফৰিদ উদ্দিন আহমেদৰ সভাপতিত্বত এখনি উদ্বোধনী সভাও অনুষ্ঠিত হয় । উক্ত সভাত ২৮নং গোসাইগাঁও  বিধান সভা সমষ্টিৰ বিধায়ক মাজেন্দ্ৰ নাৰ্জাৰী আৰু ধুবুৰী জিলাৰ অতিৰিক্ত উপায়ুক্ত ধ্ৰুৱজ্যোতি দাসে ভাষণ প্ৰসংগত কয় যে ছাত্ৰ -ছাত্ৰী সকলৰ বৌদ্ধিক বিকাশৰ বাবে যেনেকৈ পুথি গত বিদ্যাৰ প্ৰয়োজন ঠিক তেনেদৰে ছাত্ৰ-ছত্ৰী সকলৰ শাৰীৰিক বিকাশৰ বাবেও খেল -ধেমালীৰ অতি প্ৰয়োজন ।

ইয়াৰ উপৰি উদ্বোধনী সভা খনত   হাতীধুৰা মহাবিদ্যালয়ৰ পৰিচালনা সমিতিৰ সভাপতি আৰ, ডি,  সিং, গোসাইগাঁও মহাবিদ্যালয়ৰ উপ – অধ্যক্ষ,  মহাবিদ্যালয় খনৰ সহকাৰী অধ্যাপক-অধ্যাপিকা সকল , তামাৰহাট  থানাৰ ভাৰপ্ৰাপ্ত আৰক্ষী বিষয়া আৰু স্থানীয় বিশিষ্ঠ ব্যাক্তি সকল উপস্থিত থাকে । মন কৰিবলগীয়া যে উক্ত উদ্বোধনী অনুষ্ঠানৰ লগত সংগতি ৰাখি মহাবিদ্যালয় খনৰ ছাত্ৰ সকলৰ দ্বাৰা এখন আকৰ্ষণীয় প্ৰীতি মূলক ফুট বল খেল প্ৰতিযোগিতা অনুষ্ঠিত কৰা হয় ।

সমাগত বিধান সভা নিৰ্বাচন । তৎপৰতা বৃদ্ধি পাইছে বিভিন্ন ৰাজনীতি দল সংগঠন সমুহৰ ‌। নিজৰ নিজৰ ৰাজনৈতিক ভেটি সৱল কৰিবলৈ ইখনৰ পাছত সিখন সভা সমিতি আয়োজন কৰিছে ৰাজনীতি দল সমুহে। সমান্তৰালকৈ বিশ্বনাথ জিলাতো ভাৰতীয় জনতা পাৰ্টিয়ে ব্যাপক ভাৱে প্ৰচাৰ চলোৱা দেখা গৈছে।

সোমবাৰে ২০২১ ৰ নির্বাচনৰ প্রতি লক্ষ্য ৰাখি ভাৰতীয় জনতা পার্টি, বিশ্বনাথ জিলাৰ ৭৭ নং বিহালী বিধান সভা সমষ্টিৰ বাঘমৰা আৰু বিহালী মণ্ডলৰ পৃষ্ঠা প্রমুখ সন্মিলন আয়োজন কৰে । য’ত উপস্থিত থাকে অসম চৰকাৰৰ কেৱিনেট মন্ত্ৰী ৰঞ্জিত দত্ত । মন্ত্ৰী ৰঞ্জিত দত্তই সভাত অংশগ্রহণ কৰি পৃষ্ঠা প্ৰমুখ সকলৰ সৈতে মত বিনিময় কৰি আগন্তুক বিধান সভা নিৰ্বাচনত কি দৰে বিহালী সমষ্টি বিজেপিৰ দখলত ৰাখিব পাৰি তাৰ ওপৰত ৰণ কৌশল প্ৰস্তুত কৰাৰ লগতে দলীয় কৰ্মী সকলে ৰাইজৰ মাজত গৈ বিজেপিয়ে যোৱা ৪ বছৰ কৰা উন্নয়ন মূলক কাম সমুহ দাঙি ধৰিবলৈ আহ্বান জনাই মন্ত্ৰী ৰঞ্জিত দত্তই ।

ইফালে সন্মিলনত উপস্থিত থাকে বিশ্বনাথৰ বিধায়ক প্ৰমোদ বৰঠাকুৰ, বিশ্বনাথ জিলাৰ সভাপতি দিগন্ত ঘাটোৱাৰকে ধৰি বহু কেইজন বিজেপি কৰ্মী।

দুলীয়াজানত অইল ইণ্ডিয়া লিমিটেডৰ পনীয়া সোণৰ চোৰাং ব্যৱসায় অব্যাহত আছে । এই ক্ষেত্ৰত চোৰক নাকি লগোৱাত ব্যৰ্থ অইল নিৰাপত্তা বিভাগ । নিশা নাওশলীয়া আৰক্ষীয়ে অৰ্তকিতে অভিযান চলাই চোৰাং খাৰুৱাতেল সৰবৰাহ কৰা এখন টেংকাৰ জব্দ কৰিবলৈ সক্ষম হয় । নাওশলীয়া আৰক্ষী চকীৰ এটা আৰক্ষী দলে মধুবন অঞ্চলত অৰ্তকিতে অভিযান চলাই এ এছ ০১ টি ৪৭৯৯ নম্বৰৰ খাৰুৱাতেল পৰিবাহী এখন টেংকাৰ জব্দ কৰিবলৈ সক্ষম হয় । ঘটনাস্থলীত আৰক্ষীৰ অভিযানকাৰী দলটোৰ উপস্থিতিৰ উমান পাই ঘটনাস্থলীৰ পৰা টেংকাৰৰ চালক আৰু সহযোগী পলায়ণ কৰিবলৈ সক্ষম হয় । অৱশ্যে অভিযানকাৰী দলটোৱে তিনিচুকীয়াৰ অশোক মাহাতু (৩২) নামৰ লোকজনক হাতে-লোটে আটক কৰিবলৈ সক্ষম হয় । পিছত আৰক্ষীয়ে তদন্ত কৰি অশোক মাহাতুক ডিব্ৰুগড় কাৰাগাৰলৈ নিক্ষেপ কৰে । শেহতীয়াকৈ আৰক্ষীৰ তদন্তত কেতবোৰ  তথ্য পোহৰলৈ আহিছে ‌। জব্দ কৰা সময়ত  টেংকাৰখনত এ এছ ০১ টি ৪৭৯৯ নম্বৰৰ প্লেট লাগি আছিল যদিও  টেংকাৰখনত এন এল ০৫ জি ০৫৮১ নম্বৰৰ বুলি আৰক্ষীয়ে নিশ্চিত কৰিছে । ইফালে আৰক্ষীয়ে জব্দ কৰা টেংকাৰখনৰ ১২ হাজাৰ লিটাৰ খাৰুৱাতেল অইল কৰ্তৃপক্ষক চমজাই দিয়াৰ লগতে খাৰুৱাতেলৰ নমুনা সংগ্ৰহ কৰি নমুনা পৰীক্ষাৰ বাবে ফৰেনচিকলৈ প্ৰেৰণ কৰে ।
ইফালে জব্দ হোৱা টেংকাৰখনত অইল ইণ্ডিয়া লিমিটেডৰ ১২ হাজাৰ লিটাৰ খাৰুৱা তেল মজুত আছিল । আৰক্ষীয়ে ঘটনা সৰ্ন্দভত দুলীয়াজান আৰক্ষী থানাত ৬৮/২০২১ নম্বৰৰ এক গোচৰ ৰুজু কৰি তদন্ত অব্যাহত ৰাখিছে ।