অসমীয়া সাহিত্য সন্মিলনীৰ ২০২১-২৩ বৰ্ষৰ সভাপতি হিচাপে নিৰ্বাচিত হৈছে খাগৰিজান মহাবিদ্যালয় অৱসৰী অধ্যক্ষ তথা বিশিষ্ট সাহিত্যিক নগাঁৱৰ ড০ সাগৰ বৰুৱা। সন্মিলনীৰ সভাপতি লোকনাথ গোস্বামী, কাৰ্যকৰী সভাপতি অধ্যাপক ড০ মুকুল চক্ৰৱৰ্তী আৰু প্ৰধান সম্পাদক মিংকু কলিতাই কাকতলৈ দিয়া এক প্ৰেছ বিবৃতিত এই কথা সদৰি কৰে। উল্লেখ্য যে  Non-cooperation Movement in Assam  শীৰ্ষক গৱেষণা গ্ৰন্থৰ বাবে  ডিব্ৰুগড় বিশ্ববিদ্যালয়ৰ পৰা ডক্টৰেট ডিগ্ৰী লাভ কৰা বৰুৱাৰ ৫০ খনতকৈয়ো অধিক গৱেষণা পত্ৰ প্ৰকাশ পোৱাৰ লগতে প্ৰকাশিত গ্ৰন্থ সমূহ ক্ৰমে -ভাৰতৰ স্বাধীনতা আন্দোলনত অসম – ১ম, ২য় খণ্ড, ইতিহাস চৰ্চা, ইতিহাস আৰু ঐতিহাসিক, ইতিহাস অনুসন্ধান, কুৰি শতিকাৰ অসম আৰু লক -ডাউন, History of No- Coopeation Movement, Migration from East Bengal to Assam, Responses and Reaction, কাব্য সংকলন – তোমাৰ বাতৰি পাওঁ, নদীখনৰ পাৰলৈ যাওঁ, মন পথাৰৰ আকুলতা আদি। তদুপৰি তেখেতে Study of History in the  Twenty – First Century আৰু  Historical Studies in the Context of Globalization নামৰ গ্ৰন্থ দুখনো সম্পাদনা কৰিছে। আনহাতে একেটা বিবৃতিতে উল্লেখ কৰা অনুযায়ী সন্মিলনীৰ ২০১৯ -২০২০ বৰ্ষৰ সন্মিলনীৰ মহেশ্বৰ নাথ সোঁৱৰণী যুৱ সাহিত্য বঁটাৰ বাবে নিৰ্বাচন কৰা হৈছে সাম্প্রতিক অসমৰ বহু চৰ্চিত নাম হিমাংশু প্ৰসাদ দাসক। ১৯৮২ চনৰ ১ জানুৱাৰীত জন্মগ্রহণ কৰা হিমাংশু একেধাৰে কবি, নাট্যকাৰ, চলচ্চিত্রৰ কাহিনী, পৰিচালনা, নিৰ্মাতা হিচাপে বিশেষ ভাৱে পৰিচিত। NSD ৰ স্নাতক ডিগ্ৰীধাৰী হিমাংশু বৰ্তমানলৈকে প্ৰকাশিত কাব্যগ্রন্থ সমূহ ক্ৰমে প্ৰেম আৰু বিদ্ৰোহৰ দিনলিপি, জীৱন জিন্দাবাদ, আকৌ লগ পাম, এই ছোৱালী এবাৰ ভালপাই চাবানেকি, নাটক – মিচ ৰুক্মিণী হৰণ, মিৰাবাই, হেংদাং ফৰ চেল আদি, চাকিৰা আহিব বকুল তলৰ বিহুলৈ, গৰু আদিৰ চলচিত্রৰ কাহনীকাৰ হিমাংশু প্ৰসাদ দাসে ২০০৩ চনতে ‘কটন কলেজ’ শীৰ্ষক দূৰদৰ্শন ধাৰাবাহিকৰ চিত্র নাট্য, সংলাপ আৰু সহ: পৰিচালক হিচাপে খোজ পেলাই পৰৱৰ্তী সময়ত বকুলতলৰ আদালত (ধাৰাবাহিক), চাকিৰা আহিব বকুল তলৰ বিহুলৈ, গৰু  (চলচিত্ৰ) পৰিচালনা কৰাৰ লগতে কুৰিখনৰো অধিক চিনেমা, ধাৰাবাহিকত অভিনয়, সহ: পৰিচালক, কাহিনী আদিৰ মাজেৰে নতুন প্ৰজন্মৰ হৃদয় স্পর্শ কৰিবলৈ সক্ষম হৈছে। কালি ৩ জানুৱাৰীত গুৱাহাটী পাণবজাৰস্থিত বুৰঞ্জী আৰু পুৰাতত্ব বিভাগৰ সভাগৃহত অনুষ্ঠিত সন্মিলনীৰ বিশেষ কাৰ্য্যনিৰ্বাহ সভাত ড০ সাগৰ বৰুৱাক সন্মিলনীৰ পৰৱৰ্তী সভাপতি আৰু হিমাংশু প্ৰসাদ দাসক যুৱ সাহিত্য বঁটাৰ বাবে নিৰ্বাচন সমিতিৰ পৰামৰ্শ ভিত্তত  মনোনিত কৰা হয় বুলি প্ৰধান সম্পাদক মিংকু কলিতাই জানিবলৈ দিয়া। অহা ৫, ৬, ৭ ফেব্রুৱাৰীত গোলাঘাটৰ দৈয়াংত অনুষ্ঠিতব্য অসমীয়া সাহিত্য সন্মিলনীৰ দ্বি-বাৰ্ষিক অধিবেশনত হিমাংশু প্ৰসাদ দাসক উক্ত বঁটা প্ৰদান কৰা হ’ব বুলি বিবৃতিটোত উল্লেখ কৰিছে।

হোজাইত ব্যৱসায়ীসকলৰ সমস্যা সমাধানৰ বাবে অসম চেম্বাৰ অব কমাৰ্চ হোজাই জিলা শাখা আৰু বিধায়ক শিলাদিত্য দেৱৰ সৈতে দেওবাৰে এক আলোচনা হৈ যায়। হোজাই চহৰৰ নিৰ্মিয়মান ৰে’লৱে উৰণীয়া সেতুৰ মেইন ৰোডৰ শেষৰ ফালে ৱাল গাৰ্ড দিয়াৰ পৰিবৰ্ত্তে পিলাৰ দিয়াৰ দাবিৰে এক আলোচনাৰ আয়োজ কৰা হয়।

হোজাইৰ ব্যৱসায়ী সকলে আশংসা ব্যক্ত কৰে যে চহৰৰ নিৰ্মিয়মান উৰণীয়া সেতুৰ শেষৰ ফালে ৱাল গাৰ্ড দিলে চহৰৰ অতি ব্যস্ত বজাৰৰ দুয়োফালে থকা ব্যৱসায়ী সকল বেয়াকৈ প্ৰভাবিত হ’ব। উলেখ্য যে হোজাই সদা ব্যস্ত পুৰণা বজাৰ মেইন ৰোডত  নিৰ্মিয়মান হৈ থকা উৰণীয়া সেতুৰ শেষৰ ফালে নেতাজী মাৰ্কেটতকে আদি কৰি বহু দুকান, হোটেল আদি থকাৰ ওপৰিও বিপৰীত দিশে চহৰৰ মাছ বজাৰ অৱস্থিত। গতিকে ৱাল গাৰ্ড দিলে দুয়োফালৰ ব্যৱসায়ী তথা জনসাধাৰনৰ বাবে বিভিন্ন সমষ্যা সৃষ্টি কৰিব। এনে আশংকা ব্যক্ত কৰি অসম চেম্বাৰ অব কমাৰ্চ সন্থাৰ হোজাই জিলা শাখাৰ উদ্যোগত এক আলোচনাৰ জৰিয়তে বিধায়ক শিলাদিত্যক এখনি স্মাৰক প্ৰদান কৰা হয়। সভাত শিলাদিত্যই হোজাই বাসীৰ স্বাৰ্থত সকলো পদক্ষেপ লোৱা হ’ব বুলি আস্বাস প্ৰদান কৰে। আলোচনাত সন্থাৰ হোজাই শাখাৰ সভাপতি সম্পাদক তথা অনান্য ব্যৱসায়ী সকল অংশ গ্ৰহণ কৰে।

সদৌ মৰিগাওঁ জিলা ছাত্ৰ সন্থাৰ ঊনবিংশতিতম্ অধিৱেশন খনি অহা ৮ জানুৱাৰীত মৰিগাঁও টাউন উচ্চতৰ মাধ্যমিক বিদ্যালয়ত এদিনীয়াকৈ অনুষ্ঠিত হ’ব। মৰিগাওঁ সদৰ ছাত্ৰ সন্থাৰ উদ্যেগত আৰু স্থানীয় ৰাইজৰ সহযোগত অনুষ্ঠিত হবলগীয়া অধিৱেশন খনি সূচাৰুৰূপে চলাই নিবলৈ এখন শক্তিশালী অভ্যৰ্থনা সমিতি গঠন কৰা হয়।জিলা আছুৰ কাৰ্যালয়ত আজি দিনৰ ভাগত অনুষ্ঠিত হোৱা সভাত দেৱেশ্বৰ গোস্বামীক সভাপতি,অতনু শৰ্মাক কাৰ্যকৰী সভাপতি , ৰূপজ্যেতি মেধী আৰু লোকেন্দ্ৰ চেত্ৰীক যুটীয়া সাধাৰণ সম্পাদক, সহ: সাধাৰণ সম্পাদক তিনিজন ক্ৰমে– কমল মহন্ত, পুঞ্জজ্যোতি মেধী, প্ৰণৱজ্যোতি বৰ্মণৰ লগতে নৱ ৰাজন আৰু কুঞ্জ বৰাকস্মৃতি গ্ৰন্থৰ দুই সম্পাদক হিচাপে লৈ এখন শক্তিশালী অভ্যৰ্থনা সমিতি আজি গঠন কৰা হয়। ইফালে, মৰিগাওঁ সদৰ ছাত্ৰ সন্থাৰ আতিথ্যত ৮জানুৱাৰীত অনুষ্ঠিত হ’বলগীয়া সদৌ মৰিগাওঁ জিলা ছাত্ৰ সন্থাৰ ঊনবিংশতিতম্ অধিৱেশনখনিত উত্তৰ পূৰ্ৱাঞ্চলৰ ছাত্ৰ সন্থাৰ উপদেষ্টা ড০ সমুজ্জ্বল কুমাৰ ভট্টাচাৰ্য্যৰ লগতে সদৌ অসম ছাত্ৰ সন্থাৰ সভাপতি দিপাংক কুমাৰ নাথ, সাধাৰণ সম্পাদক শংকৰজ্যেতি বৰুৱাই অংশ গ্ৰহণ কৰিব বুলি জিলা আছুৰ সাধাৰণ সম্পাদক দিপুল কুমাৰ নাথে সংবাদ মাধ্যমৰ আগত এক বিবৃতি যোগে জানিবলৈ দিয়ে।

হেল্থ এণ্ড এথলেটিক্ছ ক্লাব, দিখৌমুখৰ চাৰিগৰাকী ভাৰোত্তোলকে হাফলঙত সদ্যসমাপ্ত ৪৮ সংখ্যক  আন্তঃজিলা ভাৰোত্তোলনত ৫ টাকৈ সোণ আৰু এটা ব্ৰঞ্জৰ পদক লাভেৰে জিলাখনলৈ গৌৰৱ কঢ়িয়াই আনিবলৈ সক্ষম হৈছে৷ ক্লাবৰ তাৰকা উত্তোলক তথা আন্তৰাষ্ট্ৰীয় পদকজয়ী ভাৰোত্তোলক বৰ্ণালী বৰাই ছোৱালীৰ ছিনিয়ৰ আৰু জুনিয়ৰ দুয়োটা পৰ্যায়ত ৫৫ কিঃ গ্ৰাঃ ওজন শাখাত দুটাকৈ সোণৰ পদক জয় কৰাৰ লগতে ছিনিয় আৰু জুনিয়ৰ ছোৱালীৰ শ্ৰেষ্ঠ উত্তোলকৰ খিতাপ অৰ্জন কৰিছে ৷ সংগীতা সাধনীদাৰে যুৱ আৰু জুনিয়ৰত ৬৪ কিঃ গ্ৰাঃ ওজন শাখাত দুটাকৈ সোণৰ পদক জয় কৰিবলৈ সক্ষদ হয়৷ গৌৰাঙ্গ বৰাই লৰাৰ  ছিনিয়ৰৰ ৯৬ কিঃ গ্ৰাঃ ওজন শাখাত সোণ আৰু মাৰ্টিনা মিলিয়ে যুৱৰ ৫৫ কিঃ গ্ৰাঃ শাখাত ব্ৰঞ্জ জয় কৰিবলৈ সক্ষম হয়৷ ছাৰিও গৰাকী উত্তোলকে শিৱসাগৰ জিলা দলক প্ৰতিনিধিত্ব কৰিছিল৷ উল্লেখ্য, ক্লাবৰ মুখ্য প্ৰশিক্ষক , শাৰিৰীক নিৰ্দেশক তথা আন্তৰাষ্ট্ৰীয় যোগ গুৰু শৰৎ মোহন নেওগৰ তত্ত্বাৱধানত ইতিমধ্যে ক্লাবৰ কেইবাগৰাকী উত্তোলকে ৰাজ্যিক আৰু ৰাষ্ট্ৰীয় পৰ্যায়ত সফলতা অৰ্জন কৰিছে ৷ ক্লাবৰ হৈ সভাপতি সত্যজিৎ শইকীয়া আৰু সাধাৰণ সম্পাদক মনোজ শইকীয়াই এই সাফল্যৰ বাবে আটাইকেইগৰাকী খেলুৱৈক অভিনন্দন জনাইছে৷ হেল্থ এণ্ড এথলেটিক্ছ ক্লাবৰ মুখ্য পৃষ্ঠপোষক, প্ৰাক্তন খেলুৱৈ তথা অসম চৰকাৰৰ ক্ৰীড়া আৰু যুৱকল্যাণ বিভাগৰ সঞ্চালক ধৰ্মকান্ত মিলিৰ লগতে ক্লাবৰ পৃষ্ঠপোষক, প্ৰাক্তন খেলুৱৈ তথা ক্ৰীড়া আৰু যুৱকল্যাণ বিভাগৰ সহকাৰী সঞ্চালক সত্যব্ৰত গগৈয়ে খেলুৱৈকেইগৰাকীক অভিনন্দন জ্ঞাপন কৰিছে৷ স্মৰ্ত্তব্য, ক্লাবটোৱে বিগত দুই দশকৰো অধিক কাল বৃহত্তৰ গ্ৰামাঞ্চলটোত লৌহ ক্ৰীড়াৰ প্ৰসাৰৰ লক্ষ্যৰে কাম কৰি আহিছে৷

দক্ষিণ কামৰূপ জিলাৰ বকো বিধানসভা সমষ্টিৰ অন্তৰ্গত সোণতলীত যোৱা ১ জানুৱাৰীৰ পৰা অনুষ্ঠিত হোৱা দিবা নৈশ প্ৰাইজমানি ভলীবল প্ৰতিযোগীৰ চূড়ান্ত খেল যোৱা নিশা অনুষ্ঠিত হৈ যায় ৷ সোণতলীৰ পুৰাণগাঁও এথলেটিকছ ক্লাৱৰ উদ্যোগত আৰু আৰাফা ৰয়েল একাডেমীৰ সহযোগত একাডেমীৰ খেল পথাৰত অনুষ্ঠিত হোৱা প্ৰতিযোগীতাৰ চূড়ান্ত খেল আৰাফা ৰয়েল একাডেমী আৰু আৰিয়ানছ গ্ৰুপৰ মাজত অনুষ্ঠিত হয় ৷ প্ৰতিযোগীতাত আৰাফা ৰয়েল একাডেমীয়ে বিজয়ী হোৱাৰ বিপৰীতে প্ৰতিযোগীতাত ৰাণাৰ্চ আপ হয় আৰিয়ানছ গ্ৰুপ ৷ ভাৰতীয় ভলীবল দলৰ অধিনায়ক বিনোদ চৌধুৰীয়ে আৰাফা ৰয়েল একাডেমীৰ হৈ খেলি প্ৰতিযোগীতাৰ শ্ৰেষ্ঠ খেলুৱৈৰ সন্মান লাভ কৰে ৷ প্ৰতিযোগীতাৰ চূড়ান্ত খেলৰ অন্তত আৰাফা ৰয়েল একাডেমীৰ খেল পথাৰতে মুকলি ও বঁটা বিতৰণী সভা অনুষ্ঠিত হয় ৷ পুৰাণগাঁও এথলেটিকছ ক্লাৱৰ সভাপতি নুৰ আলম খানৰ পৌৰহিত্যত অনুষ্ঠিত হোৱা মুকলি ও বঁটা বিতৰণী সভাৰ উদ্দেশ্য ব্যাখ্যা কৰে ক্লাৱৰ সম্পাদক ৰহমত উল্লাহ ৷ উক্ত সভাতেই প্ৰতিযোগীতাৰ বিজয়ী আৰু ৰাণাৰ্চ আপ দলক নগদ ধন আৰু ট্ৰফী প্ৰদান কৰা হয় ৷ সভাত প্ৰাক্তন ডি এফ অ ভৱেশ দাসৰ লগতে স্থানীয় সহস্ৰাধিক ক্ৰীড়াপ্ৰেমী ৰাইজ উপস্থিত থাকে ৷