দৈনন্দিন বাৰ্তা সেৱাঃ গুজৰাটৰ প্ৰাক্তন মুখ্যমন্ত্ৰী কেছুভাই পেটেলৰ দেহাৱসান। বৰ্ষীয়ান ৰাজনীতিবিদ গৰাকীয়ে শ্বাস-প্ৰশ্বাসত কষ্ট পোৱাৰ পাছতে তেখেতক স্টার্লিং হস্পাতালত ভৰ্তি কৰা হৈছিল যদিও বৃহস্পতিবাৰে পুৱা তেখেতৰ মৃত্যু হয়।

৬ বাৰকৈ গুজৰাট বিধানসভালৈ নিৰ্বাচিত হোৱা প্ৰবীণ ৰাজনীতিবিদ গৰাকীয়ে ১৯৯৫ ৰ পৰা ২০০১লৈকে দুবাৰকৈ গুজৰাটৰ মুখ্যমন্ত্ৰীৰ আসন সুৱনি কৰিছিল। ২০১২ চনত ভাৰতীয় জনতা পাৰ্টী ত্যাগ কৰি গুজৰাট পৰিৱৰ্তন পাৰ্টি নামৰ এটি নতুন ৰাজনৈত্ক দলৰ জন্ম দিছিল। মৃত্যুৰ সময়ত তেখেতৰ বয়স আছিল ৯২ বছৰ।

দৈনন্দিন বাৰ্তা সেৱাঃ কেন্দ্ৰীয় চৰকাৰৰ মন্ত্ৰী স্মৃতি ইৰাণী আক্ৰান্ত হৈছে কোৰোনা ভাইৰাছত। বুধবাৰে স্বাস্থ্য পৰীক্ষাৰ অন্তত কেন্দ্ৰীয় মন্ত্ৰী গৰাকীৰ দেহত ধৰা পৰে কোৰোনাৰ উপস্থিতি।

বুধবাৰে কোৰোনা ভাইৰাছত আক্ৰান্তৰ কথা খোদ কেন্দ্ৰীয় মন্ত্ৰীগৰাকীয়ে নিজৰ টুইটাৰযোগে প্ৰকাশ কৰে। কেন্দ্ৰীয় মন্ত্ৰীগৰাকীয়ে তেওঁৰ সংস্পৰ্শলৈ অহা লোক সকলক কোভিড টেষ্ট কৰিবলৈ আহ্বান জনায়।

দৈনন্দিন বাৰ্তা সেৱাঃ কোৰোনাৰ ভয়াবহতাৰ প্ৰতি লক্ষ্য ৰাখি সম্পূৰ্ণ কোভিড প্ৰট’কল মানি অহা ৬ নৱেম্বৰত দেশী-বিদেশী পৰ্যটকৰ বাবে মুকলি হ’ব ওৰাং ৰাষ্ট্ৰীয় উদ্যান। পূৰ্বতে ঘোষণা কৰা তাৰিখৰ সালসলনি কৰি ১ নৱেম্বৰৰ পৰিৱৰ্তে ৬ নৱেম্বৰত মুকলি কৰা হ’ব ৰাজীৱ গান্ধী ওৰাং ৰাষ্ট্ৰীয় উদ্যান আৰু বাঘ্ৰ স‌ংৰক্ষিত বনাঞ্চল।

বুধবাৰে বন বিভাগে জিলা তথ্য আৰু জনসংযোগ বিষয়াৰ কাৰ্যালয়লৈ এক বিজ্ঞপ্তি প্ৰেৰণ কৰি এই কথা জানিবলৈ দিয়ে। বিজ্ঞপ্তিটোত বিগত কিছুদিন ধৰি হোৱা নেৰানেপেৰা বৰষুণৰ বাবে ওৰাং ৰাষ্ট্ৰীয় উদ্যানখনৰ ৰাষ্টা-পদূলি ক্ষতিগ্ৰস্ত হোৱাৰ প্ৰতি লক্ষ্য ৰাখি ৰাষ্ট্ৰীয় উদ্যানখনৰ সকলো পৰ্যটন পথ পৰ্যটকসকলৰ বাবে মুকলি কৰি দিব পৰা নাযাব বুলিও উল্লেখ কৰে।

কোৰোনা মহামাৰীৰ বাবেই যোৱা কেইটামান মাহৰ পৰা বন্ধ হৈ আছিল ৰাষ্ট্ৰীয় উদ্যানখন৷ ওৰাং ৰাষ্ট্ৰীয় উদ্যানত প্ৰৱেশ কৰাৰ আগতে সকলো পৰ্যটকৰ শাৰীৰিক উত্তাপ পৰীক্ষা কৰাৰ হব লগতে পৰ্যটক সকলক স্বাস্থ্য বিভাগে জাৰি কৰা কোৰোনাৰ নীতি-নিয়ম সমূহ মানি পৰ্যটক সকলক ৰাষ্ট্ৰীয় উদ্যান খনৰ ভিতৰত প্ৰৱেশ কৰিবলৈ দিয়া হব।

দৈনন্দিন বাৰ্তা সেৱাঃ কিছুদিনৰ পূৰ্বে বোম্বে উচ্চ ন্যায়ালয়ে জাৰি কৰা এক নিৰ্দেশ জাৰি কৰিছিল যি নাগৰিকৰ জীৱনৰ প্ৰতি আশংকা আছে আৰু যিসকেল নিজৰ নিৰাপত্তা ব্যয় বহন কৰিব পাৰে, একমাত্ৰ তেওঁলোককে জেড প্লাছ চৰকাৰী নিৰাপত্তা প্ৰদান কৰা উচিত। বোম্বে উচ্চ ন্যায়ালয়ৰ নিৰ্দেশনাক প্ৰত্যাহ্বান জনাই হিমাংশু অগ্ৰৱাল নামৰ লোক এজনে উচ্চতম ন্যায়ালয়ত তৰা এটা ৰাজহুৱা স্বাৰ্থ জড়িত আবেদন খাৰিজ কৰিলে উচ্চতম ন্যায়ালয়ে।

হিমাংশু অগ্ৰৱালে অভিযোগ অনুসৰি আম্বানী ভ্ৰাতৃদ্বয়ৰ নিৰাপত্তাৰ বাবে দেশৰ জনসাধাৰণৰ ধন ব্যৱহাৰ হৈ আহিছে। তেওঁলোক যথেষ্ট ধনী আৰু নিজৰ নিৰাপত্তাৰ খৰচ নিজে বহন কৰাত সক্ষম। গতিকে আম্বানী ভ্ৰাতৃদ্বয়ক দিয়া চৰকাৰী জেড প্লাছ নিৰাপত্তা প্ৰত্যাহাৰ কৰা হওক। মুকেশ আম্বানী আৰু অনিল আম্বানীৰ জেড প্লাছ নিৰাপত্তা প্ৰত্যাহাৰৰ বাবে জনোৱা আবেদন বোম্বে উচ্চ ন্যায়ালয়ৰ ৰায়ক সমৰ্থন জনালে দেশৰ সৰ্বোচ্চ ন্যায়ালয়ে।

উচ্চতম ন্যায়ালয়ে লগতে স্পষ্ট কৰি দিয়ে যে জীৱনৰ সংশয় থাকিলে আৰু সংশ্লিষ্ট চৰকাৰী নিৰাপত্তাৰ ব্যয় বহন কৰিব পাৰিলে ব্যক্তিবিশেষক জেড প্লাছ নিৰাপত্তা প্ৰদান কৰা হ’ব।