অসমৰ সংস্কৃতিৰ বিষয়ে জ্ঞান নাই অদ্ভুত মন্তব্য আগবঢ়োৱা বিধায়কৰ, ছাগলে নাখায় কি পাগলে নকয় কি ?

দৈনন্দিন বাৰ্তা সেৱা, প্ৰতিনিধি, ৩১ অক্টোবৰঃ শেহতীয়াকৈ কংগ্ৰেছ বিধায়ক শ্বৰমান আলীয়ে শংকৰদেৱে কলাক্ষেত্ৰত মিঞা মিউজিয়াম স্হাপন কৰাৰ প্ৰস্তাৱ বিতৰ্কৰ মাৰ নৌযাওঁতেই পুনৰ কংগ্ৰেছী বিধায়ক কমলক্ষ দে পুৰকায়স্থই বেংগলী মিউজিয়াম সন্দৰ্ভত মন্তব্য আগবঢ়োৱাৰ পিছত আজি প্ৰথমবাৰৰ বাবে প্ৰতিক্ৰিয়া প্ৰকাশ কৰিছে বিজেপি জেষ্ঠ নেত্ৰী তথা সাংসদ কুইন ওজাই৷

চৰ্দাৰ বল্লভ ভাই পেটেলৰ জন্মজয়ন্তী অনুষ্ঠানত অংশগ্ৰহন কৰি সংবাদ মাধ্যমৰ আগত নিজৰ প্ৰতিক্ৰিয়া প্ৰকাশ কৰি কয় যে ছাগলে নাখায় কি পাগলে নকয় কি? বিধায়ক শ্বেৰমান আলী আৰু কমলক্ষ দে পুৰকায়স্থৰ অসমৰ সংস্কৃতিৰ সাম্যক জ্ঞান নাই বুলি সাংসদ গৰাকীয়ে কয়৷

সাংসদ গৰাকীয়ে লগতে অসমত বসবাস কৰি অসমৰ বায়ু পানী সেৱন কৰি অসমক আকোৱা্লি ল’ব নোৱৰা ব্যক্তি অসমত থকাৰ নৈতিক অধিকাৰ নাই আৰু অসমৰ ৰাইজে এই সকল ব্যক্তিক ক্ষমা নকৰে বুলিও দোহাৰে। সাংবাদিকৰ প্ৰশ্নৰ উত্তৰত এজন ব্যক্তিয়ে কলে সেয়া দাবী নহয় বুলি কৈ বঙালী সকলে মিউজিয়াম বিচৰা নাই বুলিও জনায়।

কোনো কাৰনত অসমৰ সংস্কৃতি বিঘিণি হ’বলৈ দিয়া নহব বুলি ভাৰতীয় জনতা পাৰ্টীৰ সাংসদ গৰাকীয়ে পুনৰ ২১ৰ ৰাজ্যৰ বিধানসভা নিৰ্বাচনত বিজেপিয়ে চৰকাৰ গঠন কৰিব বুলি দাবী কৰে।

দৈনন্দিন বাৰ্তা সেৱা, গুৱাহাটী, ৩১ অক্টোবৰঃ ভাৰতীয় জনতা পাৰ্টীৰ গুৱাহাটী মহানগৰ জিলাই আজি লৌহ মানৱ চৰ্দাৰ বল্লভ ভাই পেটলৰ জন্ম দিৱস উদযাপন কৰে৷ চৰ্দাৰ বল্লভ ভাই পেটলৰ প্ৰতি শ্ৰদ্ধা জনাই আজি পুৱা ৭ বজাত মহানগৰীৰ গুৱাহাটী ক্লাবত এক অনুষ্ঠান আয়োজন কৰে৷ কাৰ্য্যসুচী অনুযায়ী চৰ্দাৰ বল্লভ ভাই পেটলৰ প্ৰতিচ্ছবিত বন্তি প্ৰজ্বালন কৰে সাংসদ কুইন ওজাই৷

ইয়াৰ পিছত বিধায়ক অতুল বৰা, অসম বিত্তীয় নিগমৰ অধ্যক্ষ বিজয় গুপ্তা, মহানগৰ জিলা সভাপতি মৃগেন শৰনীয়া, ৰাজ্যিক সম্পাদক বেনুধৰ নাথ, জি এম ডিএৰ উপাধক্ষ্য মুকুতা ডেকা উপস্থিত থাকি লৌহ মানৱ চৰ্দাৰ বল্লভ ভাই পেটলক  শ্ৰদ্ধাঞ্জলি জনাই৷

অনুষ্ঠানত সাংসদ কুইন ওজাই ভাষন প্ৰদান কৰি কয় যে চৰ্দাৰ বল্লভ ভাই পেটলৰ জীৱন দৰ্শন নৱ প্ৰজন্মই অধ্যয়ন কৰা অতি আৱশ্যক৷ অখণ্ড ভাৰত নিৰ্মাণত পেটলৰ যথেষ্ট অৰিহনা আছে৷ স্বাধীনতাত জড়িত এই সকল ব্যক্তিৰ ত্যাগৰ বাবেই আজি আমি স্বাধীন ভাৰতত উসাহ লব পাৰিছো বুলি সাংসদ কুইন ওজাই উল্লেখ কৰে।

পৰবৰ্তী কাৰ্যসূচী অনুসৰি গুৱাহাটী ক্লাৱৰ পৰা চানমাৰি অসম অভিযান্ত্ৰিক খেল পথাৰলৈ একতাৰ দৌৰ কাৰ্যসূচী ৰুপায়ন কৰে৷ মহানগৰ জিলা উপসভাপতি দিলিপ মেধিয়ে অনুষ্ঠানত আঁতধৰা কাৰ্য্যসুচীত সাংসদ, বিধায়ক, ৰাজ্যিক বিষয়ববীয়া, মহানগৰ জিলা বিষয়ববীয়া, নিগম-নিকাৰ অধ্যক্ষ-উপাধক্ষ্যসহ প্ৰায় চয় শতাধিক সদস্যই অনুষ্ঠানত অংশগ্ৰহণ কৰে৷

দৈনন্দিন বাৰ্তা সেৱা, নগাওঁঃ আজি দুপৰীয়া প্ৰায় ১২ বজাত গোপন সূত্ৰৰ পম খেদি নগাঁৱৰ হয়বৰগাওঁ আৰক্ষীয়ে নিয়মীয়া তালাচীৰ সময়ত দুজন গভাইট চোৰক গ্ৰেপ্তাৰ কৰিবলৈ সক্ষম হয়। আৰক্ষীয়ে তেওঁলোকৰ পৰা ৩ লাখ ৫৮ হাজাৰ টকা উদ্ধাৰ কৰাৰ লগতে এটা লেপটপ জব্দ কৰে।

নগাঁৱৰ আৰক্ষীৰ জেৰাত তেওঁলোকে স্বীকাৰ কৰে যে তেওঁলোকে কামৰূপ জিলাৰ তেঁতেলীয়া ক্ষেত্ৰীৰ এজন লোকৰ ঘৰৰ পৰা সোণৰ গহনা আৰু ধন লুট কৰিছিল। নগাওঁ আৰক্ষীৰ তথ্যৰ ভিত্তিত সোনাপুৰ আৰক্ষীয়ে অভিযান চলাই সোনৰ গহনা উদ্ধাৰ কৰিবলৈ সক্ষম হয়।

এই সন্দৰ্ভত নগাওঁ আৰক্ষীয়ে অভিজিৎ দাস তাপস বৰ্মন নামৰ দুজন লোকক আটক কৰি সোনাপুৰ আৰক্ষীক চমজাই দিয়ে। সোনাপুৰ আৰক্ষী থানাত ৪৩৬/২০২০ নম্বৰৰ গোচৰ ৰুজু হৈছে।

দৈনন্দিন বাৰ্তা সেৱা, গেলেকীঃ ৰাজ্যত পোহৰলৈ আহিছে এটাৰ পিছত আনটো দুৰ্নীতি। অসমত নিযুক্তি কেলেংকাৰী অব্যাহত। শিৱসাগৰ জিলা আবকাৰী বিভাগৰ কনিষ্টবল পদত যোগদান কৰিবলৈ অহা বহিঃৰাজ্যৰ এগৰাকী লোক গ্ৰেপ্তাৰ হোৱা ঘটনাই অঞ্চলজুৰি তীব্ৰ চাঞ্চল্যৰ সৃষ্টি কৰিছে। ভুৱা নিযুক্তি পত্ৰ হাতত লৈ চাকৰিত যোগদান কৰিবলৈ আহি পশ্চিমবংগৰ কোচ বিহাৰৰ যুৱকজন শিৱসাগৰ সদৰ আৰক্ষীৰ জালত পৰে।

প্ৰসেনজিৎ বৰ্মন নামৰ যুৱকজনে ভুৱা নিযুক্তি পত্ৰখন লৈ শিৱসাগৰলৈ আহিছিল আবকাৰী বিভাগত যোগদান কৰিবলৈ। আবকাৰী আয়ুক্তৰ স্বাক্ষৰ সম্বলিত নিযুক্তি পত্ৰৰে কৰ্মত যোগদানৰ কৰিবলৈ আহিছিল প্ৰসেনজিৎ বৰ্মনে। ইফালে শিৱসাগৰ জিলা আবকাৰী অধীক্ষকৰ নিযুক্তি পত্ৰত সন্দেহ ওপজাত খবৰ দিয়ে সদৰ আৰক্ষীক। তাৰ পিছতে ঘটনাস্থলীত আৰক্ষী উপস্থিত হৈ গ্ৰেপ্তাৰ কৰে প্ৰসেনজিৎ বৰ্মনক। সম্প্ৰতি আৰক্ষীৰ তদন্তত সন্মুখলৈ আহিছে ভয়ানক তথ্য।

দুধনৈৰ পৱন বৰা নামৰ এটা দালালে গুৱাহাটীৰ এখন হোটেলত কৰ্মৰত বৰ্মনক ধনৰ বিনিময়ত প্ৰদান কৰিছিল উক্ত নিযুক্তি পত্ৰখন। ৪৮ হাজাৰ টকাৰ বিনিময়ত প্ৰসেনজিৎ বৰ্মনে লাভ কৰিছিল আবকাৰী বিভাগৰ নিযুক্তি পত্ৰখন। বৰ্তমান শিৱসাগৰ সদৰ আৰক্ষী থানাৰ লক আপত আছে যুৱকজন। আবকাৰী বিভাগৰ এজাহাৰৰ ভিত্তিত শিৱসাগৰ সদৰ আৰক্ষীয়ে গোচৰ ৰুজু কৰি ঘটনা সন্দৰ্ভত তদন্ত আৰম্ভ কৰিছে।

দৈনন্দিন বাৰ্তা সেৱা, জামুগুৰিহাটঃ আদৰ্শ অবিহনে এটা জাতি জীয়াই থাকিব নোৱাৰে। অসমীয়া জাতিক সেই আদৰ্শ মহাপুৰুষ শ্ৰীমন্ত শংকৰদেৱ-শ্ৰী শ্ৰী মাধৱদেৱে দি থৈ গৈছে। আমি মাথোন সেই আদৰ্শৰে আগবাঢ়ি গ’লেই জাতিৰ সংকট বহুখিনি দূৰ হ’ব। – এই মন্তব্য অসমীয়া সাহিত্য সন্মিলনীৰ প্ৰধান সম্পাদক মিংকু কলিতাৰ।

যোৱা ২৯ অক্টোবত, জামুগুৰিহাটৰ বাপুজী ভৱনত জামুগুৰিহাটৰ অন্যতম কাব্য চৰ্চাৰ অনুষ্ঠান জামুগুৰি কবি মঞ্চৰ উদ্যোগত অনুষ্ঠিত বিশিষ্ট সমাজকৰ্মী, নাট্যকাৰ-ঔপন্যাসিক নাৰায়ণপুৰ পাণবাৰীৰ নন্দেশ্বৰ শইকীয়া স্মাৰক বক্তৃতানুষ্ঠানৰ মুখ্য বক্তা হিচাপে ভাষন প্ৰদান কৰি এইদৰে মন্তব্য আগবঢ়ায়। উল্লেখ্য যে জামুগুৰি কবি মঞ্চৰ সম্পাদক কৃষ্ণকান্ত তালুকদাৰে আঁতধৰা আৰু জ্যোতি কলিতাৰ এটি ঘোষাৰে আৰম্ভ হোৱা  উক্ত বক্তৃতানুষ্ঠানত সভাপতিৰ আসন গ্ৰহণ কৰে বিশিষ্ট প্ৰবীণ কবি তথা জামুগুৰি কবি মঞ্চৰ সভাপতি তৰুণ বৰুৱাই।

সভাখনত নন্দেশ্বৰ শইকীয়াৰ প্ৰতিচ্ছবিত বন্তি প্ৰজ্বলন কৰে তেখেতৰ বোৱাৰী হেমন্তী শইকীয়াই আৰু আদৰণি ভাষণ প্ৰদান কৰে শোণিতপুৰ জিলা কবি সন্মিলনৰ সভাপতি তথা নন্দেশ্বৰ শইকীয়াৰ দ্বিতীয় পুত্ৰ ডাঃ হৰেন শইকীয়াই। ১৯১৮ চনত নাৰায়ণপুৰৰ পাণবাৰীত জন্মলাভ কৰা এইগৰাকী নন্দেশ্বৰ শইকীয়া ৩ বছৰ বয়সতে মাজুলীৰ আউনিআটি সত্ৰলৈ গৈ তাতে শিক্ষা জীৱনৰ পাতনি মেলি পৰৱৰ্তী গুৱাহাটী সোণাৰাম হাইস্কুল আৰু যোৰহাটৰ নৰ্মাল স্কুলত শিক্ষা গ্ৰহণ কৰাৰ উপৰিও হিন্দীত বিষাৰদ ডিগ্ৰী লাভ কৰে।

ইয়াৰ পাছতো তেখেতে চাকৰিমুখী নহৈ ব্যৱসায়ৰ মাজেৰে জীৱন অতিক্ৰম কৰে। ১৯৪২ ৰ স্বাধীনতা সংগ্রামৰ এগৰাকী সৈনিক শইকীয়াই অসমীয়া সাহিত্যৰ ভঁৰাললৈও যথেষ্ট অৱদান আগবঢ়াই থৈ যায়। তেখেতৰ প্ৰকাশিত  গ্ৰন্থ সমূহ ক্ৰমে গনতন্ত্র (উপন্যাস), কৰ্ণ পৰ্ব, প্ৰহ্লাদ চৰিত্ৰ, ভীষ্ম পৰ্ব (আধুনিক নাট), জৱাহৰলাল নেহৰু, ৰাম মনোহৰ লোহিয়া (জীৱনী গ্ৰন্থ) আদি।

ইয়াৰোপৰি তেখেতে তেখেতৰ ‘শইকীয়া ব্ৰাদাৰ্চ বুকষ্টল’ৰ পৰা বহুসংখ্যক মূল্যবান গ্ৰন্থও প্ৰকাশ কৰিছিল। আজিৰ সভাখনত মুখ্য বক্তা মিংকু কলিতাৰ উপৰিও বাপুজী ভৱন নাট্য সমাজৰ সভাপতি জনাৰ্দন ভূঞা, ৰাষ্ট্ৰীয় পুৰস্কাৰ প্ৰাপ্ত কৃতী শিক্ষক তথা বিশিষ্ট সাহিত্যিক মহেশ্বৰ বৰা আৰু জটাধাৰী উপন্যাসৰ বাবে সাহিত্য অকাডেমিৰ যুৱ সাহিত্যিক বঁটা প্ৰাপক তথা নন্দেশ্বৰ শইকীয়াৰ নাতিনী প্ৰাৰ্থনা শইকীয়াই স্মৃতিচাৰণ কৰে।

ভাষণ প্ৰসংগত প্ৰাৰ্থনা শইকীয়াই কয় যে ইতিহাস চেতনাৰ অভাবে নতুন প্ৰজন্মক সমাজৰ পৰা আঁতৰাই আনিছে। আনহাতে সভাখনত শিল্পী বাণীকান্ত দাসৰ গীত আৰু বৰ্ষীয়ান কবি নগেন কলিতাৰ স্বৰচিত কবিতা পাঠে সভাখন সতেজ কৰি তোলে।

জামুগুৰিহাটৰ বাপুজী ভৱনত অনুষ্ঠিত উক্ত সভাখনত অঞ্চলটো বিশিষ্ট ব্যক্তিসকল ক্ৰমে প্ৰেম নাৰায়ণ গোস্বামী, ফুল হাজৰিকা, নাৰায়ণ শইকীয়া, ৰেবতী মোহন হাজৰিকা, নিৰ্মালী দেৱী, কবিতা শৰ্মা, চক্ৰপাণী শৰ্মা, গুৰু প্ৰসাদ উপাধ্যায়, গিৰীন কুমাৰ নাথ, নগেন বৰা, হেম বৰুৱা, ইন্দ্ৰ প্ৰসাদ নাথ, জ্যোতি ভট্টাচার্য, নীলকমল হাজৰিকা, কৰ্পূৰমঞ্জুৰী তালুকদাৰ, উৎপল শৰ্মা প্ৰমুখ্যে অৰ্দ্ধশতাধিক সাহিত্যানুৰাগী উপস্থিত থাকে।

আনহাতে মঞ্চৰ পত্ৰিকা সম্পাদক গীতা শইকীয়াই অহা ১৫ নবেম্বৰত কাব্যালোচনী ‘ঢৌ’ উন্মোচন হ’ব বুলি সভাক অৱগত কৰে। সভাখনৰ সফল ৰূপায়নৰ বাবে সকলোলৈকে উদ্যোক্তাসকলে ধন্যবাদ জ্ঞাপন কৰে।

দৈনন্দিন বাৰ্তৰ সেৱা, শুৱালকুছিঃ সদৌ অসম কৰ্মচাৰী পৰিষদৰ উদ্যোগত আৰু গুৱাহাটী জিলা কৰ্মচাৰী পৰিষদৰ সহযোগত অহা এক নবেম্বৰত গুৱাহাটীত কেন্দ্ৰীয় ভাবে কৰ্মচাৰী শ্বহীদ দিৱস উদযাপন কৰা হব। দৈনন্দিন বাৰ্তাক গুৱাহাটী জিলা পৰিষদৰ সম্পাদক হেমন্ত লহকৰে জানিব দিয়া অনুসৰি গুৱাহাটীস্থ শ্ৰীমন্ত শংকৰদেৱ আন্তৰ্জাতিক প্ৰেখ্যাগৃহত এক নবেম্বৰত  পুৱা ৯ বজাত পৰিষদৰ পতাকা  উত্তোলন। ৯-১৫ বজাত  ছহীদ বেদীত বন্তি প্ৰজ্বলন ও পুস্পাঞ্জ্যলী। ৯-৩০ বজাত  সৰ্বধৰ্ম প্ৰাৰ্থনা। ১০ বজাত স্মৃতি চাৰণ সভা। দিনৰ ১২ বজাত গুৱাহাটী জিলাৰ প্ৰাক্তন বিষয় ববীয়াৰ সম্বৰ্ধনা অনুষ্ঠান আৰু ১ বজাত গ্ৰন্থ উম্নোচন কৰা হব।

সভাত বিশিষ্ট অতিথি হিচাপে উপস্থিত থাকিব অসমৰ মুখ্যমন্ত্ৰী সৰ্বানন্দ সোণোৱাল, বিও মন্ত্ৰী হিমন্ত বিশ্ব শৰ্মা, মুখ্যমন্ত্ৰীৰ মেডিয়া উপদেষ্টা হৃষীকেশ গোস্বামী,  মুখ্য সচিব কুমাৰ সঞ্জয় কৃষ্ণ,  কৃষি মন্ত্ৰী অতুল বৰা,  অৱসৰপ্ৰাপ্ত ভাৰতীয় প্ৰশাসনীয় বিষয়া হিমাংশু শেষৰ দাস,  সদৌ অসম কৰ্মচাৰী পৰিষদৰ প্ৰাক্তন সভাপতি প্ৰদীপ কুমাৰ বৰা আৰু শ্ৰীমন্ত শঙ্কৰদেৱ সংঘৰ প্ৰধান সম্পাদক বাবুল বৰা উপস্থিত থাকিব।

উক্ত সভাতে সুদীৰ্ঘ দিন ধৰি সদৌ অসম কৰ্মচাৰী পৰিষদৰ নেতৃত্ব বহন  কৰা পৰিষদৰ  কান্দাৰী বাসৱ চন্দ্ৰ কলিতাৰ বৰ্ণিল কৰ্মজীৱনৰ আধাৰত সম্পাদনা কৰা অভিনন্দন গ্ৰন্থ অভ্ৰভেদী শুভ  উম্মোচন কৰা হব। মনোজ লহকৰৰ সম্পাদনাত উম্নোচন হবলগীয়া সভাত সদৌ অসম কৰ্মচাৰী পৰিষদৰ সভাপতি প্ৰদীপ দত্ত সম্পাদক প্ৰধান মৃণাল দাসে সদৌতিলৈ উপস্থিতি কামনা কৰিছে।