দৈনন্দিন বাৰ্তা সেৱা, গেলেকীঃ আজি মহাষ্টমী৷ ক’ৰনা আতংকৰ মাজতে নাজিৰাবাসীয়ে পালন কৰিছে দুৰ্গা পূজা৷ ৰাজ্যৰ স্বাস্থ্য বিভাগে নিৰ্ধাৰণ কৰা সকলো নিয়ম মানি পূজা সমিতিসমূহেও আয়োজন কৰিছে পূজা৷ শংখ-ধ্বনি, মন্ত্ৰোচ্চাৰণেৰে নাজিৰাৰ ইমূৰৰ পৰা সিমূৰ এতিয়া মুখৰিত হৈ পৰিছে ভক্তিৰসেৰে৷

মহাষ্টমীৰ দিনা অনুষ্ঠিত হোৱা আন এক আকৰ্ষণীয় পূজা হ’ল ‘কুমাৰী পূজা’। এই পূজাত কুমাৰী কন্যাসকলক পূজা কৰাৰ এক বিশেষ বিধান তথা নিয়ম সমাজত প্ৰচলিত হৈ আহিছে৷

দৈনন্দিন বাৰ্তা সেৱা, গেলেকীঃ ইণ্ডিয়ান বুক অৱ ৰেকৰ্ডছত শিৱসাগৰৰ জ্যোতিমালা বাইলুং। নয়নতৰা ফুলৰ পাহিত মানুহৰ ভ্ৰূণ অংকন কৰি ইণ্ডিয়ান বুক অৱ ৰেকৰ্ডছত নিজৰ নাম অন্তৰ্ভুক্ত কৰিবলৈ সক্ষম হৈছে শিৱসাগৰৰ এই গৰাকী ছাত্ৰীয়ে। শিৱসাগৰ নগৰৰ সমীপৰ অৰ্জুনগুৰিত ঘৰ জ্যোতিমালা বাইলুঙৰ। প্ৰয়াত অনিল বাইলুং আৰু মিনতি বাইলুঙৰ কন্যা জ্যোতিমালাই নয়নতৰা ফুলৰ এটা পাহিত অংকন কৰিলে মানুহৰ ভ্ৰূণ।

সেই ছবি ইণ্ডিয়ান বুক অৱ ৰেকৰ্ডছ কৰ্তৃপক্ষলৈ প্ৰেৰণ কৰাৰ পিছতে আহিল সুখবৰ। শিৱসাগৰ ছোৱালী কলেজৰ পঞ্চম ষান্মাসিকৰ ছাত্ৰী জ্যোতিমালা সক্ষম হয় এই ৰাষ্ট্ৰীয় পৰ্যায়ৰ ৰেকৰ্ড কৰিবলৈ। জ্যোতিমালা বাইলুঙৰ এই সাফল্যত এতিয়া আনন্দিত ছাত্ৰী গৰাকীৰ অভিভাৱক, শিক্ষাগুৰু আৰু বন্ধু-বান্ধবী।

দৈনন্দিন বাৰ্তা সেৱা, নগাঁওঃ দীৰ্ঘদিনীয়া প্ৰতীক্ষা আৰু বহু জল্পনা-কল্পনাৰ অন্তত অবশেষত নগাঁও চহৰৰ পুলিচ ৰিজাৰ্ভ আৰু ভূঞাপট্টি  সংযোগী কলং নৈৰ ওপৰৰ পকী দলংখন ৰাইজৰ বাবে মুকলি কৰা হয়। উল্লেখ্য  তদানীন্তন অগপ চৰকাৰৰ শাসন কালত ১৯৮৮ চনত উক্ত দলঙৰ আধাৰশিলা স্হাপন কৰা হৈছিল। বিগত অগপ আৰু কংগ্ৰেছ চৰকাৰৰ দীৰ্ঘদিনীয়া কাৰ্যকালত দলঙখনৰ দুই মূৰৰ পথ সংযোগ বিছিন্ন হৈ থকাৰ লগতে নিৰ্মাণ সম্পূৰ্ণ নোহোৱা এই দলংখনে ওলমা দলং হিচাপে পৰিচয় লাভ কৰিছিল।

আনহাতে  বিজেপি চৰকাৰ ক্ষমতালৈ অহাৰ পিছতেই নগাঁও সদৰ সমষ্টিৰ বিধায়ক ৰূপক শৰ্মাৰ তৎপৰতা আৰু অসম চৰকাৰৰ লোকনিৰ্মাণ,বিত্ত,স্বাস্থ্য ,শিক্ষা আদি বিভাগৰ মন্ত্ৰী ড: হিমন্ত বিশ্ব শৰ্মাৰ সদিচ্ছাৰ বাবেই দলংখনৰ দুয়োমূৰৰ সংযোগী পথকে ধৰি দলংখনৰ নিৰ্মান কাৰ্য সম্পূৰ্ণ হৈ উঠে। ৩২ বছৰ পূৰ্বে আধাৰশিলা স্হাপন কৰা পুলিচ ৰিজাৰ্ভ-ভূঞাপট্টি সংযোগী পকী দলংখন  আজি শুভ উদ্বোধন কৰে মন্ত্ৰী ড০ হিমন্ত বিশ্ব শৰ্মাই।

দলং খন উদ্ধোধন কৰি মন্ত্ৰী ড:শৰ্মাই কয় যে আজিৰ দিনটো নগাঁও বাসীৰ বাবে এক আনন্দ আৰু প্ৰাপ্তিৰ দিন। সুৰ্দীঘ দিন ধৰি অৰ্ধনমিত হৈ থকা এই দলংখন বিগত কোনো এখন চৰকাৰৰ দিনত নিৰ্মাণ সম্পূৰ্ণ কৰিব পৰা নাছিল। দলং খনৰ আধাৰশিলা স্হাপন কালৰ ডেকাসকল এতিয়া বুঢ়া হ’ল আৰু ন বোৱাৰী সকল শাহু হল।আজি দলং খন ৰাইজৰ বাবে মুকলি কৰি দিব পৰাটো আমাৰ চৰকাৰৰ কাৰ্যকালৰ এক অন্যতম  সফলতা হিচাপে বিবেচিত হব।

আনহাতে দলংখন ৰাইজৰ বাবে মুকলি কৰাৰ ক্ষেত্ৰত বিধায়ক ৰূপক শৰ্মাৰ অৱদানক প্ৰশংসা কৰি মন্ত্ৰী ড: শৰ্মাই কয় যে বিধায়ক ৰূপক শৰ্মাৰ কৰ্মদক্ষতাৰ বাবেই এই দলংখন মুকলি কৰাটো সম্ভৱ হৈছে।ইয়াৰ সিংহভাগ কৃতিত্ব বিধায়ক ৰূপক শৰ্মাৰ। তেওঁৰ প্ৰচেষ্টাতে নগাঁৱত মেডিকেল কলেজকে ধৰি বিভিন্ন উন্নয়ন মূলক কাম কাজ সম্ভৱ হৈ উঠিছে।

ৰূপক শৰ্মাৰ দৰে বিধায়ক লাভ কৰাটো গৌৰৱৰ কথা।নগাঁৱৰ অসমৰ প্ৰাণকেন্দ্ৰ ৰূপে গঢ় দিয়াৰ বাবে  আগন্তুক সময়ত ৰূপক শৰ্মাক সহায় সহযোগ আগবঢ়াবলৈ ৰাইজক মন্ত্ৰী ড: শৰ্মাই আহ্বান জনায়। আনহাতে কোভিড -১৯ৰ বিৰুদ্ধে অসমৰ ৰাইজে শক্তিশালী ভাবে যুঁজ দিয়া বুলি উল্লেখ কৰি মন্ত্ৰী ড: শৰ্মাই কয় যে দুৰ্যোগৰ সময়ত ৰাইজে চৰকাৰৰ লগত সহযোগিতা আগবঢ়োৱাটোৱে জাতীয় জীৱনৰ সুন্দৰ দিশক সূচাইছে।

শৰ্মাই লগতে কয় যে যোৱা এমাহ ধৰি অসমত ক’ভিদ নিম্নগামী হৈছে। শাৰদীয় দূৰ্গোৎসৱৰ পিছৰ পৰা ক’ভিদ আৰু নিম্নগামী হ’ব।  ইয়াৰ বাবে ৰাইজে ভালদৰে নিয়ম  নীতি মানিব লাগিব অসমীয়া মানুহৰ মানৱীয় চৰিত্ৰৰ উত্থান বিগত ছটা মাহত আমি প্ৰত্যক্ষ কৰিছো। যোৱা ছমাহৰ পৰিক্ৰমা‌ই মোক বিশ্বাস জন্মাইছে যে অসম এতিয়া নতুন দিগন্তত প্ৰবেশ কৰাৰ বাবে সাজু হৈ আছে।

ইপিনে বৰ্তমানৰ চৰকাৰ খনৰ কাৰ্যকালত সংঘটিত বিভিন্ন উন্নয়ন মূলক কামকাজৰ বিষয়ে উল্লেখ কৰি মন্ত্ৰী ড: শৰ্মাই কয় যে অসম অতি শীঘ্ৰে ভাৰতৰ এখন শক্তিশালী ৰাজ্যত উপনীত হব। দলং উদ্ধোধনী অনুষ্ঠানত বিধায়ক ৰূপক শৰ্মাই কয় যে আজিৰ দিনটো নগাঁও বাসীৰ বাবে এক ঐতিহাসিক আৰু গুৰুত্বপূৰ্ণ দিন। বিগত ৩২ বছৰে কোনো এখন চৰকাৰে সম্পাদন কৰিব নোৱাৰা ভূঞাপট্টি দলং খন আজি ৰাইজৰ বাবে মুকলি কৰি দিব পৰাটো মোৰ বাবে সৌভাগ্যৰ বিষয়।আজি এই দলং খনৰ কলংকিত অধ্যায়ৰ অৱসান ঘটিল।

দলং খন মুকলি হোৱাৰ লগে লগে নগাঁও চহৰৰ যান-যঁট দূৰ হোৱাৰ উপৰিও যাতায়তৰ ক্ষেত্ৰত ৰাইজ উপকৃত হব।অসমৰ মুখ্যমন্ত্ৰী সৰ্বানন্দ সোনোৱাল আৰু বিত্তমন্ত্ৰী ড০ হিমন্ত বিশ্ব শৰ্মাৰ সদিচ্ছাৰ বাবেই নগাঁও চহৰৰ বাট, পথ, নলা-নৰ্দমা, দলং, বিজুলী বাতিকে ধৰি বিভিন্ন উন্নয়ন মূলক কাম কাজ সম্ভৱ হৈ উঠিছে। আনহাতে বহু প্ৰত্যাহ্বান নেওচি ভূঞাপট্টি দলংখন আজি মুকলি কৰাত সফল হোৱাৰ বাবে বিধায়ক গৰাকীয়ে নগাঁওবাসী ৰাইজৰ সহযোগীতাৰ শলাগ লয়। আজি দলংখনৰ উদ্ধোধনী অনুষ্ঠানত অসম চৰকাৰৰ নগৰ উন্নয়ন মন্ত্ৰী পীয়ুষ হাজৰিকা, বিধায়ক ডিম্বেশ্বৰ দাস, লোকনিৰ্মাণ বিভাগৰ আয়ুক্ত আৰু বিশেষ সচিৱ ৰাজেশ কেম্পাই, লোকনিৰ্মাণ বিভাগৰ সচিৱ বিভূতি শ‌ইকীয়া, লোকনিৰ্মাণ বিভাগৰ পল্লবজ্যোতি শৰ্মা, হিতেন কলিতা প্ৰমুখ্যে বিভিন্ন বিষয়া কৰ্মচাৰী উপস্থিত থাকে।

পূৱা নগাঁও চহৰৰ আমোলাপট্টি স্হিত নগাঁও নাট্য মন্দিৰৰ ১২৫ বছৰীয়া জয়ন্তী উৎসৱৰ উদ্ধোধনী অনুষ্ঠানত  মুখ্য অতিথি হিচাবে অংশগ্ৰহণ কৰি মন্ত্ৰী ড০ হিমন্ত বিশ্ব শৰ্মাই নগাঁও নাট্য মন্দিৰৰ ইতিহাস আৰু ঐতিহ্যক দোহাৰি কয় যে ১২৫ টা বছৰৰ গৌৰৱোজ্জ্বল নগাঁও নাট্য মন্দিৰৰ সাংস্কৃতিক  যাত্ৰাই প্ৰমাণ কৰে যে নাটক আৰু নাট্য আন্দোলন অসমৰ সভ্যতা সংস্কৃতিৰ এক এৰাব নোৱাৰা অংগ।আনহাতে অসমৰ সভ্যতা সংস্কৃতি বৰ্তমান সময়ত প্ৰত্যাহ্বানৰ সন্মুখীন হোৱা বুলি উল্লেখ কৰি মন্ত্ৰী ড: শৰ্মাই কয় যে নামনি অথবা মধ্য অসমৰ বুকুত থিয় হৈ আমি প্ৰতিটো দিনে অনুভৱ কৰো যে আমাৰ সভ্যতা, সংস্কৃতি ভবিষ্যত কিমান অনিশ্চয়তাৰ মাজত আছে।

  মন্ত্ৰী ড০ শৰ্মাই আৰু  কয় যে পংকিল সমাজ ব্যৱস্থাৰ মাজতো আমি আমাৰ মূল শিপাডালৰ পৰা আতৰি আহিব নেলাগে। যিকোনো মূল্যৰ বিনিময়ত আমি আমাৰ সভ্যতা আৰু সংস্কৃতি জীয়াই ৰাখিব লাগিব। আমাৰ জাতিটোৰ সন্মুখত প্ৰত্যাহ্বান আছে। আমাৰ সভ্যতা- সংস্কৃতিলৈ বহু দিশৰ পৰা প্ৰত্যাহ্বান আহিছে। আমাৰ সভ্যতা- সংস্কৃতিক নতুন প্ৰজন্মৰ বাবে জীয়াই ৰখাৰ আমি সংকল্প লব লাগিব।  আমাৰ জাতীয় জীৱনৰ একতা, সভ্যতা, সংস্কৃতি জীয়াই ৰখাৰ প্ৰতি  যদি প্ৰতিজ্ঞাবদ্ধ নহওঁ তেন্তে আমি আমাৰ মানবীয় প্ৰমূল্য সমূহক জীয়াই ৰাখিব নোৱাৰিম।

সেয়ে আমাৰ জাতিটোৰ মাজত একতাৰ প্ৰয়োজন। নগাঁও নাট্য মন্দিৰৰ ১২৫ বছৰীয়া জয়ন্তী উৎসৱ অনুষ্ঠানত মন্ত্ৰী পীয়ুষ হাজৰিকা, বিধায়ক ৰূপক শৰ্মা, বিধায়ক ডিম্বেশ্বৰ দাস, প্ৰাক্তন কেন্দ্ৰীয় মন্ত্ৰী ৰাজেন গোহাঁই, নগাঁও নাট্য মন্দিৰৰ সভাপতি যুক্তিনাথ খাউন্ড, শিল্পী কানু বেজবৰুৱা উপস্থিত থাকে। আনহাতে মন্ত্ৰী ড০ হিমন্ত বিশ্ব শৰ্মাই আজি নগাঁও চহৰৰ ধিং পথত  কৃত্ৰিম বানপানী প্ৰতিৰোধৰ বাবে  নগাওঁ-বৰদোৱা পথৰ ধিং গেটৰ  উৰণীয়া সেতুৰ পৰা সোণাই নদীলৈ চি আই দি এফ আঁচনিৰ অধীনত নলা নিৰ্মাণৰ কামৰ  শুভাৰম্ভ কৰে।

আনহাতে নগাঁও চহৰৰ আধুনিকীকৰণ আৰু পোহৰাই তোলাৰ লক্ষ্যৰে  চহৰ খনত  বিভিন্ন স্থানত স্থাপন কৰা  ৩১ হাই-মাষ্ট লাইট  আজি শুভ উদ্বোধন কৰে মন্ত্ৰী ড০ হিমন্ত বিশ্ব শৰ্মাই।

দৈনন্দিন বাৰ্তাৰ সেৱা, হোজাইঃ নাৰী ধৰ্ষণকাৰী একমাত্ৰ শাস্তি ফাঁচী দিয়াৰ দাবীৰে তেজস্বিনী জনজাগৰণ অসম মহিলা সমিতিয়ে হোজাই জিলাৰ শংকৰদেৱ নগৰস্হিত উপায়ুক্তৰ কাৰ্য্যালয়ৰ সন্মুখত চলিত মাহৰ যোৱা ১৭ তাৰিখৰ পৰা ১৯  লৈকে ধৰ্মঘট কাৰ্য্যসুচী ৰূপায়ণ কৰি আহিছে৷ যোৱা তিনিটা দিনেও ধৰ্মঘটকাৰী সকলক চৰকাৰ ফালৰ পৰা কোনো খবৰ নোলোৱাত ২০ তাৰিখৰ পৰা তেজস্বিনীৰ অসম প্ৰদেশ অধক্ষ্যা নমিতা চাহুয়ে আমৰণ ঘোষণা কৰে। যেতিয়ালৈকে চৰকাৰে উচিত সিদ্ধান্ত নলয় এই অনশন অব্যাহত থাকিব বুলি তেজস্বিনীৰ অধক্ষ্যাই জনায়।

সদস্যা সকলে কৰা ধৰ্ষণকাৰীৰ শাস্তি ফাঁচী আইন বলৱৎ হোৱাতো কাৰ্য্যকৰী কৰাৰ বাবে উচিত পদক্ষেপ হাতত লোবাৰ বাবে সমূহ ৰাইজ, দল সংগঠনক অনুৰোধ কৰি তেজস্বিনী গ্ৰোপে এই নৱৰাত্ৰি পৰ্বত নাৰীশক্তি সুৰক্ষাৰ বাবে লোৱা পদক্ষেপত সকলোৱে সহযোগ আৰু নাৰীশক্তিক যদি সন্মান কৰা সকলোকে আগুৱাই আহিবলৈ  আহ্বান জনাইছে। উল্লেখ্য যে এক সামাজিক ব্যাধিৰ বিৰুদ্ধে তেজস্বিনী জনজাগৰণ অসম মহিলা সমিতিয়ে ৰাজ্য ব্যাপি হস্তাক্ষৰ অভিযান আৰম্ভ কৰি আহিছে, সমিতিয়ে অভিযানৰ যোগেদি কেন্দ্ৰ তথা ৰাজ্য চৰকাৰক আহ্বান কৰিব ওলাইছে যে ওঠৰ বছৰৰ কম বয়সৰ নাবালিকাক ধৰ্ষণ কৰা ধৰ্ষণকাৰীক চিধা ফাঁচী দিয়াৰ আইন হ’ব লাগে আৰু আদালতেও কম সময়তে ধৰ্ষণকাৰীক ফাঁচীৰ আদেশ দিব লাগে।

এই উদ্দেশ্যৰে সমিতিৰ উদ্যোগত প্ৰদেশ স্তৰত “ধৰ্ষণকাৰীক ফাঁচী দিয়ক” শীৰ্ষক অভিযান চলি আছে। তেজস্বিনী জন জাগৰণ অসম মহিলা সমিতিৰ প্ৰদেশ অধ্যক্ষা নমিতা চাহুয়ে জনায় অভিযান চলিত বৰ্ষৰ চেপ্তেম্বৰ মাহৰ ২৭ তাৰিখৰ পৰা আৰম্ভ হৈছে আৰু হোজাই, নগাওঁ, মৰিগাওঁ আৰু শিলচৰৰ বিভিন্ন ঠাইত অব্যাহত আছে অভিযান। এই অভিযান সমিতিৰ স্বেচ্ছাসেবীকা দলে স্বাক্ষৰতা অভিযান অব্যাহত ৰাখিছে। কাৰ্য্যকৰ্ত্তা সকলে চহৰত অহা-যোৱা কৰা লোক সকলক সমিতিৰ মূল উদ্দেশ্য সমূহ দাঙি ধৰাৰ লগতে হস্তাক্ষৰ কৰি অভিযান সফল ৰূপায়ন কৰা লক্ষ্যত সহযোগ কৰাৰ আহ্বান জনোৱা পৰিলক্ষিত হয়।

প্ৰদেশ অধ্যক্ষা নমিতা চাহুৰ তত্বাৱধানত চলা অভিযান হস্তাক্ষৰ অভিযান ভাৰতবৰ্ষত চৰ্চাৰ বিষয় ৰূপে অভিযানৰ আকাৰ হ’ব বুলি আশাবাদী। হস্তাক্ষৰ কমেও ৯ কি. মি. দীঘল কাপোৰত হস্তাক্ষৰ কৰোৱাবলৈ সক্ষম হ’ব আৰু সেই কাপোৰ প্ৰধান মন্ত্ৰীলৈ পঠোৱাৰ ব্যৱস্থা কৰা হ’ব বুলি জনায়। অভিযানত সকলোৰে সহায়-সহযোগীতা কামনা কৰি ৰাজ্যত ধৰ্ষণকাৰীক দোষৰ বাবে উচিত শাস্তি পায় তাৰ বাবে পদক্ষেপ লবলৈ আহ্বান জনায়।

দৈনন্দিন বাৰ্তাৰ সেৱা, হোজাইঃ বিগত বছৰ সমূহৰ দৰে হোজাইত এইবাৰ নাই পূজা উচাহ, নাই কোনো জাক জমকতা। সপ্তমিৰ পূৱাৰ পৰাই নেৰানেপেৰা বৰষুণ., পূজা স্থলি,বজাৰ সমূহতো জনসাধাৰনৰ সমাগম তেনেই সেৰেঙা। এইবাৰ হোজাই থানা এলেকাৰ ৭১ খন পূজা সমিতিয়ে পুজাৰ আয়োজন কৰিছে, ইয়াৰে ৩৪ খন হোজাই পৌৰ এলেকাৰ। হোজাইৰ এই ৭১ খন পূজাৰ ভিতৰত হোজাইৰ আদৰ্শৰ পূজা সমিতিয়ে দেৱী ভাগৱত অনুযায়ী ওঠৰ হাতৰ পাছফুটীয়া মূৰ্ত্তিৰে পূৰ্বৰ স্থানৰ সলনি যুগল কিশোৰ কেডিয়া ভৱনত এইবাৰ আয়োজন কৰা হৈছে। উল্লেখযোগ্য যে, এনে মূৰ্তিৰে অসমৰ দুই ঠাইতে পূজা কৰা হয়। হোজাইৰ উপৰিও ডিব্ৰুগড়ত এনে মূৰ্তি নিৰ্মান কৰি পূজা কৰা হয়। হোজাই নতুন বজাৰৰ মণিপুৰী সম্প্ৰদায়ৰ বাঘ বাহন সহ “ইমা পানথৈবী” মন্দিৰৰ দুই হতিয়া দেৱী মূৰ্তি প্ৰতিষ্ঠা কৰিছে। ইফালে হোজাইৰ অধিকাংশ পূজা সমিটিয়ে কভিড পৰীক্ষাৰ বাবে চৰকাৰে বান্ধি দিয়া অধিনিয়ম অমান্য কৰি কভিড পৰীক্ষা কৰাৰ পৰা কৌশলেৰে বিৰত আছে। চৰকাৰী তথ্য অনুযায়ী কালি আৰু আজি হোজাই থানা এলেকাৰ ৭১ খন পূজা সমিতিৰ মাত্ৰ ২৮২ জন বিষয়ববীয়া আৰু পূজাৰীৰ কভিড পৰীক্ষা কৰা হয়। হোজাইৰ এজন আৰু যোগীজানৰ দুজনক কভিড আক্রান্ত বুলি চিনাক্ত কৰা হয়। বছেৰেকীয়া পূজাৰ আনন্দ উৎসৱত হেঙাৰ হোৱাৰ ভয়ত অধিকাংশ পূজা সমিতিয়ে কভিড পৰীক্ষাৰ পৰা কৌশলেৰে বিৰত আছে বুলি প্ৰকাশ। অন্যহাতে গাওঁসমূহতো একেই পৰিবেশ, আধ্যাত্মিকতাক প্ৰাধান্য দি পূজা একাংশ কমিটিসমুহে পূজাৰ বেদিত স্থাপন কৰিছে দেৱী দূৰ্গাৰ মূৰ্তি যদিও ইয়াৰে কোমোৰাকটা সাৰ্ব্বজনীন পূজা সমিতিবোৰকে আদি কৰি একাংশ কিছু পূজাত ঘট প্ৰতিস্থা কৰিছে। হোজাই পৌৰ এলেকাৰ শিৱবাৰীৰ সত্য নাৰায়ণ মন্দিৰ পূজা সমিতিয়ে ঘট প্ৰতিষ্ঠা কৰাৰ বিপৰীতে বাকী ৩৩ খন পূজা সমিতিয়ে প্ৰতিমা প্ৰতিষ্ঠা কৰে। হোজাই পৌৰ এলেকাৰ পূজাৰ মূৰ্তি সমূহ দশমীত বিসৰ্জনৰ বাবে শিৱবাৰী দুৰ্গা বাড়িৰ ৰাজহুৱা পুখুৰী, নতুন বজাৰৰ ৰাজহুৱা পুখুৰী, কালিবাড়ি ৰাজহুৱা পুখুৰী আৰু দুখনৰ বাবে ডিমৰু নৈত পৌৰসভাই ঘাট নিৰ্মান কৰিছে।৯ খন পূজা সমিতিয়ে নিজস্ব পুখুৰীত দেৱী বিসৰ্জন দিব বুলি পৌৰসভাৰ তথ্যত প্ৰকাশ।

দৈনন্দিন বাৰ্তাৰ সেৱা, টংলাঃ সু প্ৰশাসনে বিদ্যালয়ৰ মানদণ্ড উন্নত কৰে। বিদ্যালয়ৰ প্ৰশাসনে অনুষ্ঠানখনৰ পৰিচালনাতসদায় গুৰুত্বপূৰ্ণ ভূমিকা গ্ৰহণ কৰে। শিক্ষানুষ্ঠান খনৰ ভাল ফলাফলৰ অন্তৰালত ভাল প্ৰশাসনে নিৰ্ণায়ক ভূমিকা পালন কৰে। এই গুৰুত্বপূৰ্ণ মন্তব্য অৱসৰ প্ৰাপ্ত জিলা পশু চিকিৎসা বিষয়া ডা নৰম চন্দ্ৰ কছাৰীৰ।

ৰাজ্যখনৰ ভিতৰতে অগ্ৰণী শিক্ষানুষ্ঠান তথা ওদালগুৰি জিলাৰ শিক্ষাৰ প্ৰাণকেন্দ্ৰ টংলাস্থিত অৰুনোদয় একাডেমী, টংলা ৰ ১৬ তম প্ৰতিষ্ঠা দিৱস উদযাপন অনুষ্ঠানত মূখ্য অতিথি ৰূপে অংশগ্ৰহণ কৰি ভাষণ প্ৰসংগত এইদৰে কয়। তেওঁ ভাষণ প্ৰসংগত শিক্ষাৰ্থী সকলৰ শীৰ্ষ স্থান দখল কৰাই শেষ প্ৰাপ্তি নহয়। ভাল ফলাফল প্ৰাপ্তিৰ বাবে শিক্ষাৰ্থীৰ মন সদায় সুদৃঢ় আৰু কঠোৰ পৰিশ্ৰমী হব লাগিব।

সৎ সংগ শিক্ষাৰ্থী সকলৰ বাবে গুৰুত্বপূৰ্ণ বিষয় বুলি ভাষণ প্ৰসংগত উল্লেখ কৰে ডা নৰম চন্দ্ৰ কছাৰীয়ে। উল্লেখযোগ্য যে, ২০০৬ চনত বৃহত্তৰ টংলা অঞ্চলৰ বহু কেইগৰাকী শিক্ষিত যুৱকে শিক্ষাৰ ক্ষেত্ৰত নতুন চিন্তাৰে প্ৰতিষ্ঠা কৰা অৰুনোদয় একাডেমী, টংলা ৰ সৃষ্টি বহু প্ৰতিভাৱান শিক্ষাৰ্থীয়ে ইতিমধ্যে নিজকে প্ৰতিষ্ঠা লাভ কৰিবলৈ সক্ষম হৈছে। উক্ত প্ৰতিষ্ঠা দিৱসৰ লগতে সংগতি ৰাখি শিক্ষানুষ্ঠানখনে চানশ্ৰী নাৰ্জাৰী(এনইইটি), সুৰজ দাস(এনইইটি), ৰতন বড়ো(এনআইটি) আৰু ভাৰ্গব কছাৰী(আইআইটি)ক ফুলাম গামোচা আৰু উপহাৰৰ টোপোলাৰে উষ্ম সম্বৰ্ধনা জ্ঞাপন কৰে।

শিক্ষানুষ্ঠানৰ জ্যেষ্ঠ শিক্ষক তপন মহন্ত আৰু তীৰ্থাংকৰ ভট্টাচাৰ্য্যই আঁত ধৰা অনুষ্ঠানত আৰম্ভণিতে অৰুনোদয় একাডেমীৰ জন্মলগ্নৰ পৰা ১৫ বছৰীয়া ইতিহাস দাঙিধৰে শিক্ষানুষ্ঠানখনৰ অন্যতম প্ৰতিস্থাপক লক্ষ্মী কান্ত ৰামচিয়াৰীয়ে। কেক কাটি গীত পৰিৱেশন কৰি অনুষ্ঠিত কৰা গাম্ভীৰ্যপূৰ্ণ অনুষ্ঠানত অৰুনোদয় কনিষ্ঠ মহাবিদ্যালয়ৰ অধ্যক্ষ প্ৰণৱ জ্যোতি দাস, অৰুনোদয় একাডেমী টংলাৰ অধ্যক্ষ নেপোলিয়ন দৈমাৰী আৰু সম্বৰ্ধনা লাভ কৰা শিক্ষাৰ্থীসকলে নিজৰ নিজৰ অভিজ্ঞতা ব্যক্ত কৰি সভাত ভাষণ প্ৰদান কৰে।

দৈনন্দিন বাৰ্তা সেৱাঃ কোৰোনাৰ ভয়াবহতাৰ মাজতে শুক্ৰবাৰে কালৰাত্ৰি ৰূপত পূজিত হ’ল দেৱী দূৰ্গা। সপ্তমী উপলক্ষে ৰাজ্যৰ লগতে দেশৰ শক্তিপীঠ, দেৱীপীঠ, দেৱালয় সহমূত ভিন্ন প্ৰকাৰৰ বলি-বিধান সম্পন্ন কৰা হল যদিও মহামাৰীৰ বাবে দেখা নগল ৰাজহুৱা বলি বিধান। বৈদিক ৰীতি নীতিৰে দেৱী দুৰ্গাৰ নৱপ্ত্ৰিকা প্ৰৱেশ, স্থাপন আৰু সপ্তমাদি কল্পাৰম্ভ আৰম্ভ কৰ হয়।

পঞ্জিকাৰ নিয়ম অনুসৰি শুক্ৰবাৰে পুৱা ৮বাজি ১৭ মিনিট ৪৩ ছেকেণ্ডৰ ভিতৰত দেৱীৰ নৱপত্ৰিকা প্ৰৱেশ, স্থাপন আৰু সপ্তমী বিহিত পুজা আৰম্ভ হয়। আনহাতে নিশা ১০ বাজি ৪৫ মিনিট ৩৮ ছেকেণ্ড যোৱাৰ পৰা ১১ বাজি ৩৩ মিনিট ৩৮ ছেকেণ্ডৰ বিতৰত দেৱীৰ অৰ্ধৰাত্ৰ বিহিত পূজা সমাপন কৰা হয়। এইবাৰ পূজা উপলক্ষে ৰাইজৰ মাজত নাই বিগত বৰ্ষসমূহৰ দৰে উচাহ-উদ্দীপনা।

আনহাতে কোৰোণাৰ বাবে ম্লাণ পৰা পূজা, সপ্তমীৰ দিনা ঠাই বিশেষে হোৱা বৰষুণেও আকৌ সেমেকাই পেলাইছে। শুক্ৰবাৰে অসমৰ প্ৰান্তে প্ৰান্তে বৰষুণ। ক’ৰবাত পাতলীয়া, ক’ৰবাত ধাৰাসাৰ। গুৱাহাটী মহানগৰীতো সেই একেই পৰিৱেশ। সপ্তমীৰ দৰে অষ্টমীটো শক্তিপীঠ সমূহত ৰাজহুৱা বলি বিধানৰ পৰিবৰ্তে আয়োজক সমিতি সমূহে পালন কৰিব বলি-বিধানৰ নিয়ম।

শাৰদীয় দুৰ্গা পূজা উদযাপনৰ আয়োজক কমিটি সমূহে স্বাস্হ্য বিভাগ আৰু চৰকাৰে নিৰ্ধাৰণ কৰি দিয়া নীতি নয়ম মানি চাবোনেৰে হাত ধুই, হাতত চেনিটাইজাৰ ব্যৱহাৰ কৰি পূজাত অহা মাৰ ভক্ত সকলক পূজাস্হলীত সামাজিক দূৰত্ব বজাই ৰাখিবলৈ আৰু মাক্স পৰিধান কৰিবলৈ আহ্বান জনাইছে৷