নগাঁও, ৭ অক্টোবৰ : নগাঁও সদৰ সমষ্টিৰ অন্তৰ্গত কাছমাৰী অঞ্চলত আজি তিনিটাকৈ উন্নয়ন মূলক আচঁনিৰ কামৰ শুভ উদ্ধোধন কৰে সমষ্টিটোৰ বিধায়ক ৰূপক শৰ্মাই । বিধায়ক শৰ্মাই আজি পলাশতল কাছমাৰী উচ্চ মাধ্যমিক বিদ্যালয়ৰ নৱ নিৰ্মিত অতিৰিক্ত কোঠা আৰু সমূহীয়া ভৱনৰ লগতে কাছমাৰী মজলীয়া বিদ্যালয়ৰ চাৰিসীমা বেৰৰ উদ্ধোধন কৰে। ইয়াৰ উপৰি বিধায়ক গৰাকীয়ে কাছমাৰী ক্ষুদ্র স্বাস্থ্য কেন্দ্ৰৰ নাৰ্চৰ বাবে নতুনকৈ নিৰ্মাণ কৰি উলিওৱা তিনিটা আৱাসগৃহও মুকলি কৰি দিয়ে । আজি মুকলি কৰা এই আৱাসগৃহ তিনিটাই ক্ষুদ্ৰ স্বাস্থ্য কেন্দ্ৰটোত কৰ্মৰত নাৰ্চসকলৰ দীৰ্ঘদিনীয়া এক অভাৱ পূৰণ কৰে বুলি বিধায়ক গৰাকীয়ে মত প্ৰকাশ কৰে । আনহাতে আজি উদ্ধোধন কৰা উন্নয়নমূলক আচঁনি সমূহৰ জৰিয়তে অঞ্চলটোৰ ৰাইজ উপকৃত হব বুলি বিধায়ক শৰ্মাই আশা প্ৰকাশ কৰে । উদ্ধোধনী অনুষ্ঠানত কাছমাৰী জিলা পৰিষদৰ সদস্য কাঞ্চন বৰদলৈৰ লগতে ভালে কেইগৰাকী পঞ্চায়তৰ প্ৰতিনিধি উপস্থিত থাকে ।

ডিকমঃ  নিখিল ভাৰত বিদ্যুৎ কৰ্মচাৰী মহাসংঘৰ আাহ্বানত, ৰাজহুৱা খণ্ডৰ শক্তি বিতৰণ কোম্পানী সমূহ ব্যক্তিগত কৰণ কৰাৰ  প্ৰতিবাদ জনাই অধ্য়ক্ষ লৈ এক স্মাৰক পত্ৰ প্ৰেৰন কৰাৰ লগতে আৰু কৰ্মচাৰীৰ সকলৰ সমস্যা সমাধানৰ দাবীত এক ধৰ্না কাৰ্যসূচী ৰূপায়ন কৰা দেখা যায় ।  ডিব্ৰুগড় বৈদ্যুতিক সংমণ্ডলত পূৱা ১০বজাৰ পৰা ১২ বজালৈ হোৱা ধৰ্ণা কাৰ্যসূচীত  উপস্থিত থাকে  এ.উ.পি.ই ইঞ্জিনিয়াৰ এছচিএচনৰ কাৰ্যকাৰী সভাপতি ৰঞ্জন দত্ত , এ.এচ.পি.উ.ইউ কেন্দীয় কাৰ্যকাৰী সভাপতি শ্ৰী লীলা চাংমাই, শাখা সভাপতি শ্ৰী থানুৰাম ফুঁকন, সম্পাদক শ্ৰী বিপ্লৱ গোহাঁই, চাপ্লাই ইউনিতৰ সম্পাদক শ্ৰীবিপুল কোঁৱৰ লগতে কেইবা গৰাকিও গন্য-মান্য ব্যক্তি উপস্থিত থাকে।

নগাঁও : মুখ্যমন্ত্ৰী সৰ্বানন্দ সোণোৱাল নেতৃত্বাধীন মিত্ৰজোঁটৰ চৰকাৰে নিৰ্বাচনৰ সময়ত দিয়া প্ৰতিশ্ৰুতি অনুসৰি কাম কৰি আহিছে। ৰাজ্যখনৰ সকলো জাতি-জনগোষ্ঠীৰ সমউন্নয়ন আৰু সম বিকাশৰ বাবে কাম কৰি আহিছে। যাৰ বাবে ৰাজ্যখনত এতিয়া সকলো ক্ষেত্ৰতে দ্ৰুত উন্নয়ন হৈছে।আজি নগাঁৱৰ খগেন মহন্ত প্ৰেক্ষাগৃহত ভূমিহীন খিলঞ্জীয়া লোকক ভূমি পট্টা প্ৰদান কৰাৰ বাবে নগাঁও জিলা প্ৰশাসনে আয়োজন কৰা এক অনুষ্ঠানত অংশ লৈ এই মন্তব্য কৰে ৰাজ্যৰ জল সম্পদ বিভাগৰ মন্ত্ৰী কেশৱ মহন্তই । নগাঁও জিলা উপায়ুক্ত কবিথা পদ্মনাভনৰ সভাপতিত্বত অনুষ্ঠিত সভাত মুখ্য অতিথি হিচাপে অংশগ্ৰহণ কৰি মহন্তই কয়- আজি অসম চৰকাৰে লক্ষাধিক লোকক ভূমি পট্টা প্ৰদান কৰিছে। ইয়াৰ জৰিয়তে চৰকাৰে ভূমিহীন খিলঞ্জীয়া লোক সকলৰ সুৰক্ষাৰ ব্যৱস্থা কৰিছে। আহি থকা দিনত আমাৰ চৰকাৰে নতুনকৈ লক্ষাধিক ভূমিহীন খিলঞ্জীয়াক ভূমি পট্টা দিয়াৰ ব্যৱস্থা কৰিব। অসমৰ ভূমিহীন ভুমিপুত্ৰ সকলক অগ্ৰাধিকাৰ ভিত্তিত ভূমি পট্টা দিয়া হ’ব। জাতি মাটি ভেটিৰ সুৰক্ষা প্ৰদান কৰাৰ প্ৰতিশ্ৰুতি আমি ৰক্ষা কৰিবলৈ চেষ্টা অব্যাহত ৰাখিছো। কথাৰে নহয় কামেৰে আমি এই প্ৰতিশ্ৰুতি ৰক্ষা কৰিম। ভাষন প্ৰসংগত তেওঁ ৰাজ্য চৰকাৰৰ চাৰে চাৰি বছৰীয়া উন্নয়নমূলক কামৰ এক খতিয়ন দাঙি ধৰে। সভাত অংশগ্ৰহণ কৰি নগাঁও সদৰ সমষ্টি বিধায়ক ৰূপক শৰ্মাই কয় বৰ্তমানৰ চৰকাৰখনৰ দিনত ৰাজ্যখনত দ্ৰুত উন্নয়ন হৈছে। তেওঁ চৰকাৰৰ উন্নয়নমূলক কাম-কাজত ৰাইজৰ সহযোগীতা কামনা কৰে। সভাত ৰহা সমষ্টি বিধায়ক ডিম্বেছৰ দাস, অতিৰিক্ত উপায়ুক্ত জয়ন্ত কুমাৰ বৰা , লাচিত দাস আৰু জিলাখনৰ ৭টা ৰাজহ চক্ৰৰ চক্ৰ বিষয়া উপস্থিত থাকে। জিলাখনৰ ১১৬৭ গৰাকী ভূমিহীন খিলঞ্জীয়া লোকক আজি ভূমি পট্টা প্ৰদান কৰা হয়। আজি আনুষ্ঠানিক ভাৱে ৫০ জন লোকক এই পট্টা প্ৰদান কৰা হয়। ইপিনে সভাৰ অন্তত সাংবাদিকে কলং সম্পৰ্কে সোধা এক প্ৰশ্নৰ উত্তৰত মন্ত্ৰী মহন্তই কয় কলঙে নগঞা সভ্যতাক সমৃদ্ধ কৰি আহিছে। এই সভ্যতা হৈছে কলংপৰীয়া সভ্যতা । কিন্তু কলং এতিয়া স্তব্ধ । এই কলং নৈক নিয়ন্ত্ৰিত ৰূপত বোৱাই ৰখাৰ বাবে পদক্ষেপ গ্ৰহণ কৰা হৈছে। অহা বৰ্ষত নগাঁৱৰ ৰাইজে কলং নৈক নিয়ন্ত্ৰিত ৰূপত বৈ থকা দেখা পাৱ। সাংবাদিকে সোধা আন এক প্ৰশ্নৰ উত্তৰত মহন্তই কয়- মহাপুৰুষ শ্ৰীমন্ত শংকৰদেৱৰ পবিত্ৰ জন্মভূমি বটদ্ৰবাৰ বেদখলিকৃত ভূমি বে-দখল মুক্ত কৰা হৈছে। বটদ্ৰৱাক লৈ চৰকাৰে এক আঁচনি গ্ৰহণ কৰিছে। ইয়াৰ জৰিয়তে বটদ্ৰৱাৰ সংৰক্ষণ আৰু উন্নয়নৰ পদক্ষেপ গ্ৰহণ কৰা হৈছে। শ্ৰীমন্ত শংকৰদেৱ সংঘই গুৰুজনাৰ নামত স্থাপন কৰা বিশ্ববিদ্যালয়ৰ বাবে পূৰ্বৰ মাটি খিনি উপৰিও নতুনকৈ ৩০০ বিঘা মাটি আমাৰ চৰকাৰে আবন্তন দিছে । বিশ্ববিদ্যালয়খনৰ উন্নয়নৰ বাবে চৰকাৰে সকলো সুবিধা প্ৰদান কৰিব।

গুৱাহাটী : পূৱ গুৱাহাটী সমষ্টিৰ অন্তৰ্গত ইছলামপুৰত দেওবাৰে অনুষ্ঠিত হোৱা বিজেপিৰ এক সাংগঠনিক সভাত বিভিন্ন স্তৰৰ প্ৰায় শতাধিক ব্যক্তিয়ে বিজেপিত যোগদান কৰে ৷ পূৱ গুৱাহাটী মণ্ডল বিজেপিয়ে আয়োজন কৰা সভাখনত স্হানীয় বিধায়ক তথা গুৱাহাটী উন্নয়ন মন্ত্ৰী সিদ্ধাৰ্থ ভট্টাচাৰ্য উপস্থিত থাকে ৷ মন্ত্ৰীগৰাকীৰ উপস্থিতিত বৃহত্তৰ ইছলামপুৰৰ প্ৰায় শতাধিক ব্যক্তিয়ে আনুষ্ঠানিকভাবে বিজেপি দলত যোগদান কৰে ৷ বিজেপি নেতৃত্বাধীন ৰাজ্য চৰকাৰৰ উন্নয়ন মুলক কাম-কাজক লৈ যথেষ্ট সন্তুষ্টি লাভ কৰাৰ লগতে স্হানীয় বিধায়ক সিদ্ধাৰ্থ ভট্টাচাৰ্যই বিগত সময়চোৱাত ইছলামপুৰ অঞ্চলত যথেষ্ট উন্নয়নমূলক কাম কৰাৰ বাবেই বিজেপিক প্ৰতি তেওঁলোকে আকৃষ্ট হৈ যোগদান কৰাৰ কথা উল্লেখ কৰে ৷ এই ক্ষেত্ৰত মন্ত্ৰী সিদ্ধাৰ্থ ভট্টাচাৰ্যই নিজ সমষ্টিৰ ইছলামপুৰত এনেদৰে বিজেপি দলত যোগদান কৰাৰ বাবেই প্ৰতিগৰাকী ব্যক্তিলৈ আন্তৰিক শুভেচ্ছা জ্ঞাপন কৰে ৷ লগতে তেওঁ যোগদান কৰা প্ৰতিগৰাকী বিজেপি সদস্যক আগন্তুক দিনত নিষ্ঠা সহকাৰে দলৰ হৈ কাম কৰি যাবলৈ আহ্বান জনায় ৷ ইছলামপুৰ অঞ্চলৰ সমস্যাসমূহ সমাধানৰ ক্ষেত্ৰত তেওঁ প্ৰচেষ্টা অব্যাহত ৰাখিব বুলি উল্লেখ কৰে৷ উল্লেখ্য যে পূৱ গুৱাহাটী মণ্ডল বিজেপি আয়োজন কৰা সভাখনত মণ্ডল সমিতিৰ বিষয়ববীয়াৰ লগতে বুথ সভাপতিসহ ভালেসংখ্যক সদস্য উপস্থিত থাকে।