গেলেকী : অসমৰ শিৱসাগৰ আৰু ৰঙাপাৰাত অনুষ্ঠিত নহয় উপ-নিৰ্বাচন। অসমৰ মুখ্য সচিব আৰু ৰাজ্যিক নিৰ্বাচনী আয়োগৰ এক প্ৰতিবেদনৰ ভিত্তিত ৰাষ্ট্ৰীয় নিৰ্বাচনী আয়োগে নিৰ্বাচন অনুষ্ঠিত নকৰাৰ সিদ্ধান্ত লৈছে। জানিব পৰা মতে ৰাষ্ট্ৰীয় নিৰ্বাচনী আয়োগে দেশৰ ৪ খন ৰাজ্যৰ ৭ টা সমষ্টিত অনুষ্ঠিত নকৰাৰ সিদ্ধান্ত লৈছে। ইতিমধ্যে ৰাষ্ট্ৰীয় নিৰ্বাচনী আয়োগে টুইটাৰত প্ৰকাশ কৰা অনুসৰি পশ্চিম বংগ, কেৰেলা, তামিলনাডু আৰু ৭৪ ৰঙাপাৰা, ১০৮ শিৱসাগৰ, ১০৬ কুট্টানাদ, ১১৭ চাভাৰা, ১০ তিৰুভূতিয়াৰ, ৪৬ গুডিয়ত্তম, ১৩ ফালাকাটা সমষ্টিত উপ-নিৰ্বাচন অনুষ্ঠিত নহয়।

নগাঁও, ২৯ ছেপ্টেম্বৰ:: নগাঁও আৰক্ষীয়ে আজি দুপৰীয়া প্ৰায় ১২ মান বজাত অভিযান চলাই এটা কুখ্যাত এ টি এম হেকাৰক গ্ৰেপ্তাৰ কৰিবলৈ সক্ষম হয়। নগাঁও চহৰৰ বিকানেৰ জেমচ এণ্ড জুৱেলাৰী নামৰ গহনা প্ৰতিষ্ঠানখনত সোণৰ গহণা ক্ৰয় কৰি থকা অৱস্থাতে নগাঁও সদৰ থানাৰ এটা অভিযানকাৰী আৰক্ষীৰ দলে এটিএম হেকাৰটোক গ্ৰেপ্তাৰ কৰে। ধৃত এটিএম হেকাৰটো চহৰ খনৰ সমীপৰ কাতিমাৰী অঞ্চলৰ আব্দুল হান্নান(৩৫) বুলি জানিব পৰা গৈছে । আৰক্ষীয়ে অভিযানৰ কালত হেকাৰ আব্দুল হান্নানৰ পৰা বিভিন্ন বেংকৰ ৪খনকৈ চুৰি এ টি এম কাৰ্ড আৰু স্মাৰ্টফোন জব্দ কৰে। উল্লেখ্য যে, নগাঁও চহৰৰ বিভিন্ন এ টি এমত ধন উলিয়াবলৈ অহা একাংশ বয়োজ্যেষ্ঠ লোকক সহায় কৰাৰ ছলেৰে পিন ক’ড সংগ্ৰহ কৰাৰ লগতে হেকাৰটোৱে এটিএম কাৰ্ড সমূহ চুৰ কৰিছিল। পিছত একাংশ ভুক্তভোগী জ্যেষ্ঠ নাগৰিকৰ অভিযোগৰ ভিত্তিত নগাঁও আৰক্ষীয়ে আব্দুল হান্নানক বিচাৰি অভিযান অব্যাহত ৰাখিছিল। সেই অভিযানৰ ভিত্তিতেই আজি নগাঁও আৰক্ষীয়ে জুৱেলাৰীখনৰ পৰা গহনা ক্ৰয় কৰি থকা অৱস্থাত কুখ্যাত হেকাৰটোক গ্ৰেপ্তাৰ কৰিবলৈ সক্ষম হয় । সম্প্ৰতি নগাঁও আৰক্ষীয়ে এক গোচৰ ৰুজু কৰি অধিক তথ্য উদঘাটনৰ বাবে আব্দুল হান্নানক জেৰা অব্যাহত ৰাখিছে।।

নগাঁও : এটিএমৰ পৰা আনৰ ধন প্ৰৱঞ্চনাৰে হৰলুকী কৰি প্ৰেয়সীলৈ সোণৰ চেইন কিনিবলৈ অহা এটা এটিএম চোৰক জুৱেলাৰী দোকানতে আটক কৰিলে নগাঁও আৰক্ষীয়ে। নগাঁৱৰ বিকানেৰ জেমছ এণ্ড জুৱেলাৰী নামৰ এখন গহণাৰ দোকানত আজি দিনৰ প্ৰায় ১১ বজাত আব্দুল হান্নান নামৰ এ টি এম হেকাৰটোৱে সোণৰ গহণা ক্ৰয় কৰিবলৈ গৈছিল। আব্দুলে নিজৰ প্ৰেয়সীৰ বাবে প্ৰায় ৭৫ হাজাৰ টকাৰ সোণৰ চেইন ক্ৰয় কৰাৰ বাবে দাম–দৰ কৰি থাকোতেই নগাঁও আৰক্ষীৰ এটা দলে আটক কৰি সদৰ থানালৈ লৈ যায়।ধৃত আব্দুলৰ পৰা আৰক্ষীয়ে ৪ খনকৈ চুৰি এটিএম কাৰ্ড জব্দ কৰিছে। নগাঁও চহৰৰ বিভিন্ন এটিএমত ধন উলিয়াবলৈ যোৱা বয়োজ্যেষ্ঠ লোকৰ পৰা চলনাৰে এটিএম সলনি কৰি বহু লোকক সৰ্বস্বান্ত কৰি আহিছিল আব্দুল হান্নানে। ধৃত আব্দুল হান্নানৰ লগতে নগাঁৱৰ জুৰীয়া, ৰূপহী আৰু চামগুৰি অঞ্চলৰ কেইবাটাও প্ৰৱঞ্চক লগ হৈ বহু লোকৰ একাউণ্টৰ ধন হৰলুকী কৰি আহিছিল। বৰ্তমান আৰক্ষীয়ে আব্দুল হান্নানৰ সহযোগীৰ সন্ধানত অভিযান অব্যাহত ৰাখিছে। আটকাধীন আব্দুল হান্নানৰ ঘৰ নগাঁৱৰ কাৱৈমাৰীত।

ধেমাজি : অসমকে ধৰি দেশৰ বিভিন্ন প্ৰান্তৰ মুঠ ১৬ গৰাকী ব্যক্তিলৈ কৰ্ম ক্ষেত্ৰত দেখুৱা পাৰদৰ্শিতা স্বীকৃতিস্বৰূপে দ্যা ক্ৰিয়েটিভ হবি জ’নে ইণ্ডিয়া ক্ৰিয়েটিভ এৱাৰ্ড-২০২০ এই বৰ্ষত আগবঢ়াইছে। সেই একেদৰে, অসম কন্যা চিত্ৰ শিল্পী, সমাজসেৱিকা হাঁহচৰা লংকাক গোহাঁই গাঁৱৰ মুনমী বুঢ়াগোহাঁইলৈ এই বৰ্ষত ইৰ্মাজিন য়ুৰ্থ আৰ্টিচ অব দ্যা ইয়েৰ ২০২০ৰ বিশেষ বঁটা আগবঢ়ায়। উল্লেখযোগ্য যে, ২০১৯ বৰ্ষত মুনমী বুঢ়াগোহাঁয়ে পেলনীয়া বস্তুৰে ছবি নিৰ্মাণ কৰাৰ বাবে ইণ্ডিয়া বুক অৱ ৰেকৰ্ডৰ লগতে ভাজৰা ৱল্ড ৰেকৰ্ডতো নিজৰ নাম অন্তৰ্ভুক্ত কৰি গাওঁখনৰ লগতে সমগ্ৰ অসমলৈ গৌৰৱ কঢ়িয়াই আনিবলৈ সক্ষম হৈছে। একেদৰে চিত্ৰ শিল্পী হিচাপে ভূয়সী প্ৰসংশা লাভ কৰিবলৈ সক্ষম হোৱা মুনমীয়ে গাঁৱতে কণ-কণ শিশুসকলক বিনামূলীয়াকৈ সাহিত্য-সংস্কৃতিৰ লগত জড়িত ৰাখি দিহানাম, কবিতা আবৃত্তি, আকস্মিক বক্তৃতা, কুইজ, নৃত্য, নাটক, ভাস্কৰ্য শিল্প, অভিনয় আদিৰ প্ৰশিক্ষণ দি অহাৰ লগতে কণমানিসকলৰ মনৰ কথাৰে মন এটি আশা নামৰ এখনি তিনিমহীয়া আলোচনী প্ৰকাশ কৰি কণমানিহতঁক সাহিত্য-সংস্কৃতিৰ প্ৰতি এখোজ আগুৱাই নিয়াত সহায় কৰি আহিছে।

নগাঁওঃ,২৮ ছেপ্তেম্বৰঃ পুষ্টিহীনতাত ভুগি থকা আৰু স্বাস্থ্য অনুসৰণ কৰা, বৃক্ষৰোপণ আৰু সজাগতাৰ উদ্দেশ্য চলি থকা পোষণ মাহ উপলক্ষে নগাঁও জিলাৰ সমাজ কল্যাণ বিভাগৰ পাখীমৰিয়া সংহত শিশু উন্নয়ন প্ৰকল্পৰ উদ্যোগত আজি ২৮ ছেপ্তেম্বৰত হাঁহিলা পৰ্যটন স্থলিত এক মনোৰম প্ৰাকৃতিক পৰিৱেশত বৃক্ষ ৰোপণ কাৰ্যসূচী অনুষ্ঠিত হয় ৷ পাখীমৰিয়া সংহত শিশু উন্নয়ন প্ৰকল্পৰ মূখ্য সেৱিকা উপমা বৰুৱাই আতঁধৰা বৃক্ষ ৰোপণ কাৰ্যসূচীত জিলা সমাজ কল্যাণ বিষয়া দিনেশ দাস,পাখীমৰিয়া সংহত শিশু উন্নয়ন বিষয়া ৰানু বৰাই বৃক্ষ ৰোপণ কাৰ্যসূচীৰ শোভাৰাম্ভ কৰি কয় যে- গছ থাকিলেহে মানুহ থাকিব ৷ গছে আমাক অক্সিজেন দিয়ে ৷ গতিকে বৃক্ষৰোপণৰ জৰিয়তে আমি আমাৰ পাৰিপাৰ্শ্বিকতা গঢ়ি তুলিব লাগিব ৷ হাঁহিলা পৰ্যতন স্থলিৰ প্ৰকৃতিক পৰিৱেশত হোবা অনুষ্ঠানটিত সাংবাদিক দেৱজিৎ হাজৰিকা,প্ৰসেনজিত মণ্ডল,যুৱ সমাজকৰ্মী দুল জ্যোতি নাথ,জুন বৰা,পোষণৰ জিলা সংযোগী বিষয়া ভৱেন বৰা,মূখ্য সেৱিকা সকল ক্ৰমে ৰুনজুন বৰা,জোনালী বৰা,কাঞ্চন শইকীয়া,মৌচুমী গায়ন আৰু অংগনবাড়ি কৰ্মী সকল উপস্থিত থাকে ৷

গেলেকী, ২৮ছেপ্তেম্বৰঃ নাজিৰাস্থিত অ’ এন জি চি (অসম সম্পদ)ত ভুৱা নিযুক্তিৰ বেহা । নিৱনুৱাক প্ৰৱঞ্চনাৰে ধন আত্মসাৎ কৰি অৱশেষত প্ৰৱঞ্চিত যুৱকক অপহৰণৰ গোচৰত আটক বকতাৰ তিনি যুৱক ক্ৰমে দীপজ্যোতি দিহিঙীয়া, দীনেশ চেতিয়া আৰু বিজয় চেতিয়া । অপহৰণৰ গোচৰ জাপি দি ৰঙাঘৰৰ আলহী কৰা আশ্ৰাফুৰ হক নামৰ যুৱকজনৰ বিপক্ষেও ভুক্তভোগীৰ পৰিয়ালে এজাহাৰ দাখিল কৰাত উক্ত যুৱকজনো গ্ৰেপ্তাৰ হয় । জানিব পৰা মতে ধুবুৰী চহৰৰ নিবাসী ব্যৱসায়ী জহিদুল হকৰ পুত্ৰ আশ্ৰাফুৰে পূৰ্বে অ’ এন জি চিৰ মৰাণ অইল শাখাত ঠিকাভিত্তিক কাম কৰাৰ সূত্ৰে অ’ এন জি চিত এনে নিযুক্তি সম্পৰ্কীয় দালালিত জড়িত হৈ পৰে । বকতাৰ উক্ত তিনিজন যুৱককো আশ্ৰাফুৰে যোগসূত্ৰকাৰীৰ জৰিয়তে প্ৰথম কিস্তিত ৬০ হাজাৰ টকাকৈ লৈ একোখনকৈ ভুৱা নিযুক্তিপত্ৰ প্ৰদান কৰিছিল । অ’ এন জি চিৰ প্ৰৱন্ধক এম মুৰুলিধৰনৰ ভুৱা স্বাক্ষ্যৰ থকা এই নিযুক্তিপত্ৰ লৈ যুৱকত্ৰয়ে নাজিৰাস্থিত কাৰ্যালয়ত যোগদান কৰিবলৈ যোৱাতহে আচল কথাটো ধৰা পৰে । বকতা নেমুগুৰি থানাত আশ্ৰাফুৰ উপস্থিত হোৱাৰ পিছতে প্ৰৱঞ্চনা আৰু আৰক্ষীক প্ৰৰোচিত কৰা অভিযোগত কেছ নং ৬৪/২০২০ ধাৰা ৪২০, ৪০৬, ৩৬৮মৰ্মে অভিযুক্তক আৰক্ষীয়ে গ্ৰেপ্তাৰ কৰে । আৰক্ষীৰ জেৰাত আশ্ৰাফুৰে ধন লোৱাৰ স্বীকাৰোক্তি দিয়া বুলি আৰক্ষী সূত্ৰই সদৰী কৰিছে । আনহাতে গাঁৱৰ দৰিদ্ৰ পৰিয়ালৰ সাধাৰণ নিৱনুৱা যুৱক তিনিজনক চাকৰি দিয়াৰ বিপৰীতে অপহৰণৰ গোচৰত জে’ললৈ পঠোৱা আদি শাস্তিৰ দাবী জনাই ২৫ছেপ্তেম্বৰৰ বিয়লি থানাখনৰ সন্মুখত বহুলোক সমবেত হয় । আৰক্ষীয়ে পিছত অভিযুক্তক আদালতত হাজিৰ কৰাই অধিক তদন্তৰ বাবে নিজৰ জিন্মাত লোৱাৰ কথা জানিব পৰা গৈছেে ৷