দৈনন্দিন বাৰ্তা ডেস্ক : কৃষি বিধেয়কৰ লৈ ৰাজ্যসভাত দেওবাৰে তোলপাৰ কৰে বিৰোধী সাংসদে ৷ এইসকল সাংসদৰ বিৰুদ্ধে কঠোৰ ব্যৱস্থা ল’ব পাৰে ৰাজ্যসভাৰ অধ্যক্ষ বেংকয়া নাইডুৱে ৷ সংবাদ প্ৰতিষ্ঠানৰ খবৰ মতে, এই হুলস্থূলৰ বাবে অতি বিৰক্ত অধ্যক্ষ ৷ দেওবাৰে ৰাজ্যসভাৰ বিৰোধী সাংসদৰ এই আচৰণক লৈ বাসভৱনত এক বৈঠক আহ্বান কৰে বেংকয়া নাইডুৱে ৷ তাত উপস্থিত আছিল ৰাজ্যসভাৰ উপাধ্যক্ষ হৰিবংশ নাৰায়ণ, ৰে’ল মন্ত্ৰী পীযুষ গোৱেল আৰু সংসদ বিষয়ক মন্ত্ৰী প্রহ্লাদ যোশী। উল্লেখ্য যে দেওবাৰে ৰাজ্যসভাত ধ্বনি ভোটত গৃহীত হয় কৃষি বিধেয়ক ৷ এই দুই বিধেয়ক কৃষক স্বাৰ্থৰ বিৰোধী বুলি ৰাজ্যসভাত কোৱাৰ পাচতে হুলস্থূলীয়া পৰিৱেশ কৰে বিৰোধীয়ে৷ এই বিধেয়কৰ বিৰোধিতা কৰি উপাধ্যক্ষ হৰিবংশ নাৰায়ণৰ চকীৰ দিশে যায় তৃণমূলৰ সাংসদ ডেৰেক ওব্ৰায়ান, কংগ্ৰেছ সাংসদ ৰিপুন বৰা, আপ সাংসদ সঞ্জয় সিং, ডিএমকেৰ ত্ৰিচুৰি শিবা ৷ উল্লেখ্য যে অধ্যক্ষৰ কামত বাধা দিলে কঠোৰ সিদ্ধান্ত ল’ব পাৰে অধ্যক্ষই ৷ আনকি কোনো সাংসদক নিলম্বন কৰিব পাৰে এই অধিৱেশনৰ কাৰণে ৷

দৈনন্দিন বাৰ্তা ডেস্ক : ৰাজ্যসভাত তুমুল বিতণ্ডা, হুলস্থূল, বিক্ষোভৰ মাজত ধ্বনি ভোটত গৃহীত হ’ল কৃষি সংক্রান্তৰ দুখন বিধেয়ক ৷ এই বিধেয়ক গৃহীত হোৱাৰ পাচত প্ৰধানমন্ত্ৰীয়ে টুইটাৰত দাবী কৰে, কৃষকসকলৰ দুগুণ আয়ৰ পথ সুগম হ’ল ৷ মধ্যস্থতাকাৰীৰ হাতৰ পৰা ৰক্ষা পালে কৃষকে ৷ ইয়াৰ লগতে ন্যূনতম সহায়ক মূল্যত ফচল কিনাৰ ব্যৱস্থা আৰম্ভ হ’ব বুলি আশ্বাস দিয়ে প্ৰধানমন্ত্ৰী নৰেন্দ্ৰ মোডীয়ে ৷ ৰাজ্যসভাত কৃষি ক্ষেত্ৰত সংস্কাৰ সংক্ৰান্তীয় বিধেয়ক গৃহীত হোৱাৰ পাচত টুইটাৰত প্ৰতিক্ৰিয়া প্ৰকাশ কৰি প্ৰধানমন্ত্ৰী নৰেন্দ্ৰ মোডীয়ে কয়, আজি দেশৰ কৃষি ইতিহাসত যুগান্তৰকাৰী দিন ৷ সংসদত গুৰুত্বপূৰ্ণ বিধেয়ক গৃহীত হোৱাৰ পাচত পৰিশ্ৰমী অন্নদাতাসকলক ধন্যবাদ জনায় ৷ কেৱল কৃষিক্ষেত্রত আমূল পৰিৱৰ্তন অনাই নহয়, বৰং কোটি কোটি কৃষকৰ স্বাৰ্থ সুৰক্ষিত কৰিব ৷ প্ৰধানমন্ত্ৰীয়ে টুইটাৰত লিখিছে, কেইবা দশক ধৰি নানা ধৰণৰ বাধাৰ সন্মুখত পৰি আছিল ভাৰতীয় কৃষকসকল ৷ মধ্যস্থতাকাৰীৰ আক্ৰমণৰ চিকাৰ হৈছিল ৷ সেই অসুবিধা দূৰ কৰি দিলে সংসদত গৃহীত হোৱা বিধেয়কে ৷ আনহাতে কৃষকৰ দুগুণ আয়ৰ পথ সুগম হ’ল ৷ দেশৰ কৃষি ক্ষেত্ৰৰ যি সংস্কাৰৰ প্ৰয়ৎ আছিল তাক মন কৰি আছিল প্ৰধানমন্ত্ৰী মোডীয়ে ৷ তেওঁ টুইট কৰি কয়, আমাৰ কৃষিক্ষেত্রত আধুনিক প্রযুক্তিৰ প্ৰয়োজন৷ এতিয়া পৰিশ্ৰমী কৃষকে সহযোগিতা পাব৷ ভৱিষ্যৎ প্রযুক্তিৰ পথ খুল খালে ৷ বাঢ়িব উৎপাদন, ভাল ফল পাব৷ এয়া স্বাগত জনোৱাৰ দৰে পদক্ষেপ ৷ ন্যূনতম সহায়ক মূল্যত ফচল কিনাৰ ব্যৱস্থাও আৰম্ভ হ’ব বুলি আশ্বস্ত কৰে প্ৰধানমন্ত্ৰীয়ে ৷ তেওঁ কয়, ন্যূনতম সহায়ক মূল্যত ফচল কিনিব চৰকাৰে ৷ আমি কৃষকসকলক সেৱা কৰিবলৈ আহিছো ৷ সকলো ধৰণৰ পদক্ষেপ ল’ব ৷ তেওঁলোকৰ আহিব লগা প্ৰজন্মই যাতে সুন্দৰ জীৱন পায় তাক নিশ্চিত কৰাটো আমাৰ ৷

দৈনন্দিন বাৰ্তা ডেস্ক : আশংকা কৰা মতেই সৃষ্টি হ’ল অশান্তি ৷ দেওবাৰে ৰাজ্যসভাৰ অধিৱেশনত সেয়া দেখিবলৈ পোৱা গ’ল ৷ বিৰোধীৰ তীব্ৰ প্ৰতিবাদ আৰু বিক্ষোভৰ মাজতে নৰেন্দ্ৰ মোডী চৰকাৰে সংসদৰ উচ্চ সদনত ধ্বনি ভোটৰ যোগেদি গৃহীত কৰে কৃষি ক্ষেত্ৰত সংস্কাৰৰ দুখন বিতৰ্কিত বিধেয়ক ৷ কৰ’নাৰ সংক্ৰমণৰ মাজতে দেওবাৰে সামাজিক দূৰত্ব বিধি কাৰ্যত আঁতৰ কৰি অধ্যক্ষৰ আসনৰ ওচৰত বিৰোধী সাংসদে বিক্ষোভ কৰে ৷ ইয়াৰ প্ৰত্যুত্তৰত চৰকাৰী পক্ষৰ সাংসদে শ্ল’গান দিয়ে ৷ সেই সময়ত সভা পৰিচালনা কৰিছিল উপাধ্যক্ষ হৰিবংশ নাৰায়ৎ সিঙে ৷ তৃণমূলৰ ডেকেক অ’ ব্রায়েনসহ কেইবাজনো বিৰোধী সাংসদে তেওঁৰ আসনৰ ওচৰলৈ গৈ কাগজপত্ৰ আৰু মাইক টনাটনি কৰে ৷ উল্লেখ্য যে বৰ্ষাকালীন অধিৱেশন আৰম্ভ হোৱাৰ আগতে সাংসদসকলক বিক্ষোভ কৰাৰ বিধিনিষেধ জাৰি কৰা হৈছিল ৷ কেৱল সংসদৰ ভিতৰ মহলতে নহয়, ৰাজধানী দিল্লীসহ উত্তৰ ভাৰতৰ বিভিন্ন ৰাজ্যত আজি কৃষি ক্ষেত্ৰৰ সংস্কাৰ সংক্ৰান্তীয় তিনিখন বিধেয়কৰ বিৰুদ্ধে বিক্ষোভ কৰে বিৰোধী দল আৰু বিভিন্ন কৃষক সংগঠনে ৷ আন্দোলনকাৰীৰ অভিযোগ, এই সংক্ৰান্তত তিনিখন বিধেয়কৰে কৃষকসকলৰ স্বার্থ উপেক্ষা কৰি বৃহৎ ব্যৱসায়ী আৰু ক’প’ৰেট কোম্পানীবোৰক সম্পূৰ্ণৰূপে ফচলৰ দাম নিৰ্দ্ধাৰণ আৰু মজুতকাৰীক অধিকাৰ দিয়া হৈছে ৷ দিনটোৰ আগবেলাতে বিৰোধীৰ তুমুল প্ৰতিবাদৰ মাজতে ৰাজ্যসভাত গৃহিত কৰি কেন্দ্ৰীয় কৃষি উন্নয়ন, কৃষক কল্যাণ আৰু খাদ্য প্রক্রিয়াকৰণ মন্ত্রী নৰেন্দ্ৰ সিং তোমৰে কয়, কৃষকৰ ফচলৰ ন্যায্য পোৱাৰ পথত এই বিধেয়কে কোনো প্রতিবন্ধকতাৰ সৃষ্টি নকৰে ৷ বিধেয়ক গৃহিত হোৱাৰ পাচত বিজেপিৰ সভাপতি জে পি নাড্ডাই কয়, ‘নৰেন্দ্ৰ মোডীজীৰ নেতৃত্বত ভাৰতীয় কৃষকে ৭০ বছৰৰ বঞ্চনাৰ পৰা মুক্তি পালে ৷’ আনহাতে কংগ্ৰেছৰ অভিযোগ, এই বিধেয়ক আহিলে ‘কৃষকসকলৰ মৃত্যু পৰোৱানা’। বিতৰ্কত অংশ লৈ ৰাজ্যসভাৰ ডি এম কে সাংসদ টি কে এছ ইলানগোভানৰ মন্তব্য, এই কৃষি বিধেয়কে পুনৰ কৃষকসকলক ক্ৰীতদাসত পৰিণত কৰিব ৷ আনকি বিজেপিৰ পুৰণা সহযোগী শিৰোমণি আকালি দলৰ সাংসদ নৰেশ গুজকালে কেন্দ্ৰক সতৰ্ক কৰি কয়, পাঞ্জাৱৰ কৃষকক দুৰ্বল বুলি ভুল নকৰিব ৷ তেওঁলোকে এই কৃষক বিৰোধী বিধেয়ক মানি নলয়৷ ‘অত্যাৱশ্যক পণ্য আইন’ সংশোধন, ‘কৃষি পণ্য লেনদেন আৰু বাণিজ্য উন্নয়ন’ আৰু ‘কৃষিপণ্যৰ দাম নিশ্চিত কৰাত কৃষকসকলৰ সুৰক্ষা আৰু ক্ষমতায়ন চুক্তি’ সংক্ৰান্তৰ বিধেয়ক তিনিখন লোকসভাত গৃহীত কৰিছে ৷ দেওবাৰে ‘কৃষি পণ্য লেনদেন আৰু বাণিজ্য উন্নয়ন’ আৰু কৃষিপণ্যৰ দাম নিশ্চিত কৰাত কৃষকসকলৰ সুৰক্ষা আৰু ক্ষমতায়ন চুক্তি’ সংক্ৰান্তীয় বিধেয়ক গৃহীত হয় ৰাজ্যসভাত ৷

দৈনন্দিন বাৰ্তা ডেস্ক : দেশত বৃদ্ধি পাই আছে কৰ’না আক্ৰান্তৰ সংখ্যা ৷ এনে অৱস্থাত ৰাজ্যবোৰৰ পৰিস্থিতি লৈ পর্যালোচনা কৰিব মুখ্যমন্ত্ৰীসকলৰ সৈতে প্ৰধানমন্ত্ৰী নৰেন্দ্ৰ মোডীয়ে ৷ প্ৰাপ্ত খবৰ মতে অহা ২৩ ছেপ্টেম্বৰত এই বৈঠক হোৱা সম্ভাৱনা আছে ৷ অৱশ্যে চৰকাৰীভাৱে এই বিষয়ে একো জনোৱা হোৱা নাই ৷ সৰ্বভাৰতীয় সংবাদ মাধ্যমৰ মতে দেশজুৰি কৰ’না সংক্ৰমণৰ সংখ্যা নিতৌ বৃদ্ধি পাই আছে ৷ এই দিশত প্ৰতি মুহূৰ্তত খবৰ ৰাখি আছে প্ৰধানমন্ত্ৰী নৰেন্দ্ৰ মোডীয়ে ৷ ইয়াকে লৈ সংশ্লিষ্ট মন্ত্ৰালয়ৰ বিষয়াসকলৰ সৈতে প্ৰধানমন্ত্ৰীয়ে ধাৰাবাহিকভাৱে আলোচনাও কৰিছে ৷ যিবোৰ ৰাজ্য আৰু কেন্দ্ৰীয় শাসিত অঞ্চলত কৰ’নাৰ প্ৰকোপ বাঢ়িছে তাত প্ৰয়োজনীয় ব্যৱস্থা ল’বলৈ নিৰ্দেশ দিছে ৷ বৰ্তমানে দেশৰ ভিতৰত মহাৰাষ্ট্ৰ, দিল্লী আৰু উত্তৰ প্ৰদেশসহ কেইবাখনো ৰাজ্যৰ পৰিস্থিতি আশংকাজনক ৷ সেয়ে অহা ২৩ ছেপ্টেম্বৰত প্ৰধানমন্ত্ৰীয়ে সাতখন ৰাজ্যৰ মুখ্যমন্ত্ৰীসকলৰ লগত কৰ’না পৰিস্থিতিক লৈ পৰ্যালোচনা কৰিব বুলি জানিব পৰা গৈছে ৷ ইয়াৰ আগেয়ে যোৱা ১১ আগষ্টত অন্ধ্রপ্রদেশ, কর্ণাটক, তামিলনাডু, পশ্চিম বংগ, পাঞ্জাৱ, বিহাৰ, গুজৰাট, তেলেংগানা আৰু উত্তৰ প্ৰদেশৰ মুখ্যমন্ত্ৰীসকলৰ লগত ভাৰ্চুৱেল বৈঠক কৰিছিল প্ৰধানমন্ত্ৰীয়ে৷ কৰ’নাৰ সংক্ৰমণ বৃদ্ধিৰ লগতে এই মহামাৰীৰ লগত মোকাবিলা কৰাৰ বিষয়ে কথা কৈছিল ৷ তাৰ পাচত কেতবোৰ ৰাজ্যৰ পৰিস্থিতি নিয়ন্ত্ৰণলৈ আহে ৷ এই অৱস্থাক লৈ অহা সপ্তাহত পুনৰ সাতখন ৰাজ্যৰ মুখ্যমন্ত্ৰীৰ সৈতে বৈঠকত বহিব নৰেন্দ্ৰ মোডী ৷ উল্লেখ্য যে দেওবাৰে পুৱা পৰ্যন্ত যোৱা ২৪ ঘণ্টাত দেশত নতুনকৈ আক্ৰান্ত হৈছে ৯২ হাজাৰ ৬০৫ জন লোক ৷ মৃত্যু হৈছে ১১৩৩ জন লোক ৷ ইয়াৰ ফলত দেশত মুঠ আক্ৰান্তৰ সংখ্যা ৫৪ লাখ ৬২০ জনলৈ বৃদ্ধি পালে ৷ ইয়াৰ মাজতে এই পৰ্যন্ত ১০ লাখ ১০ হাজাৰ ৮২৪ জন লোক চিকিৎসাধীন হৈ আছে ৷ সুস্থ হৈছে ৪৩ লাখ ৩ হাজাৰ ৪৪ জন আৰু মৃত্যু হৈছে ৮৬ হাজাৰ ৭৫২ জন ৷

দৈনন্দিন বাৰ্তা ডেস্ক : দেশৰ পাঁচখন ৰাজ্যত দ্ৰুত হাৰত বৃদ্ধি পাইছে কৰ’নাৰ সংক্ৰমণ ৷ ইয়াৰ মাজতে দেশৰ অধিকাংশ ৰাজ্যত ২১ ছেপ্টেম্বৰৰ পৰা নৱমৰ পৰা দ্বাদশ শ্ৰেণীৰ পাঠদান আৰম্ভ হ’ব ৷ কৰ’না পৰিস্থিতিৰ নিয়ন্ত্ৰণ হ’লেই সকলো শ্ৰেণীৰ পাঠদান একেলগে আৰম্ভ কৰাৰ কথা ঘোষণা কৰিছে তামিলনাডু চৰকাৰে ৷ উল্লেখ্য যে এইখন ৰাজ্যত কৰ’নাত আক্ৰান্ত ৫,৩৬,৭৭৮ জন আৰু মৃত্যু হৈছে ৮,৭৫১ জনৰ ৷ পৰ্যায়ক্ৰমে বিদ্যালয় খোলাৰ কথাত গুৰুত্ব দিয়া নাই তামিলনাডুৰ শিক্ষা মন্ত্ৰী কে এ ছেনগোটিয়ানে ৷ তেওঁ কয়, চৰকাৰে কেইটামান সপ্তাহত ৰাজ্যত কৰ’না পৰিস্থিতি চাব ৷ তাৰ পাচত সকলো বিদ্যালয় খোলি দিয়া হ’ব ৷ ছিফ্ট ক্লাছ নহয় ৷ সামাজিক দূৰত্ব বিধি মানি বিদ্যালয়ৰ চলাই নিয়াৰ পৰিকাঠামো ৰাজ্যখনত কৰা হ’ব ৷ উল্লেখ্য যে কৰ’না সংক্ৰমণৰ বাবে দেশত যোৱা ২৫ মাৰ্চৰ পৰা বিদ্যালয়বোৰ বন্ধ কৰাৰ কথা ঘোষণা কৰিছিল প্ৰধানমন্ত্ৰী নৰেন্দ্ৰ মোডীয়ে ৷ আনহাতে ছেপ্টেম্বৰত আৰম্ভ হৈছে আনলক ৪.০। এই সময়তে ২১ ছেপ্টেম্বৰৰ পৰা নৱম শ্ৰেণীৰ পৰা দ্বাদশ শ্ৰেণী পৰ্যন্ত পাঠদান আৰম্ভ কৰাৰ কথা ভাবিছে বিভিন্ন ৰাজ্যই ৷