দৈনন্দিন বাৰ্তা ডেস্ক : ড্ৰাগছৰ লগত জড়িত থকাৰ অভিযোগত কানাড়া অভিনেত্ৰী ৰাগিনী দ্বিবেদীক আটক কৰা হৈছে৷ শুকুৰবাৰে পুৱা ৬ বজাত কৰ্ণাটকৰ বেংগালুৰুৰ এক ফ্লেটত তালাচী চলায় কেন্দ্ৰীয় অপৰাধ দমন শাখা বা চিচিবিয়ে ৷ চিচিবিৰ এজন বিষয়াই জনোৱা মতে, আদালতৰ পৰা পৰোৱানা আনি তালাচী অভিযান চলোৱা হৈছে ৷ তাৰ পাচত জেৰাৰ বাবে অভিনেত্রী গৰাকীক চিচিবিৰ কাৰ্যালয়লৈ নিয়া হয় ৷ চিচিবিৰ সূত্ৰে জানিব পৰা মতে যোৱা বুধবাৰে ৰাগিনীক জাননী দি বৃহস্পতিবাৰৰ ভিতৰত চিচিবিৰ কাৰ্যালয়ত হাজিৰা দিবলৈ কোৱা হৈছিল জেকাৰ বাবে ৷ কিন্তু অভিনেত্রীগৰাকীয়ে নিজৰ অধিবক্তাৰ দল পঠিয়াই সোমবাৰ পৰ্যন্ত সময় লয় ৷ তাৰ পাচত শুকুৰবাৰে তেওঁৰ ঘৰত তালাচী চলায় চিচিবিয়ে ৷ উল্লেখ্য যে হাৰিয়ানাৰ ৰেৱাৰিৰ বাসিন্দা ৰাগিনীৰ জন্ম বেংগালুৰুত ৷ ২০০৯ চনত প্ৰথম অভিনয় কৰিছিল ‘বীৰা মাড়াকৰি’ নামৰ কানাড়া ছবিত ৷

দৈনন্দিন বাৰ্তা ডেস্ক : হায়দৰাবাদৰ পুলিচ অকাডেমীত দীঘলীয়া প্ৰশিক্ষণ শেষ কৰিছে আইপিএছ কেডাৰৰ নতুন বেটচে ৷ কেইটামান দিনৰ পাচতে দেশৰ আইন শৃংখলা ৰক্ষাৰ গুৰু দায়িত্ব ল’ব নৱ নিযুক্ত বিষয়াসকলে ৷ তাৰ আগতে শুকুৰবাৰে ভিডিঅ’ বাৰ্তাত তৰুণ বিষয়াসকলৰ সৈতে আলোচনা কৰে প্ৰধানমন্ত্ৰী নৰেন্দ্ৰ মোডীয়ে ৷ হায়দৰাবাদৰ চৰ্দাৰ বল্লভভাই পেটেল পুলিচ অকাডেমীত দীক্ষান্ত পেৰেড শেষত আইপিএছ বিষয়াসকলৰ সৈতে প্ৰধানমন্ত্ৰীয়ে আলোচনা কৰে ৷ উল্লেখ্য যে আৰক্ষী বিষয়াৰ সৈতে ইয়াৰ পূৰ্বে প্ৰধানমন্ত্ৰী নৰেন্দ্ৰ মোডীয়ে আলোচনা কৰিছিল ৷ অৱশ্যে ক’ৰোনা সংক্ৰমণৰ বাবে বহু দিন সেই আলোচনা চক্ৰ বন্ধ আছিল ৷ সদ্য উত্তীৰ্ণ আৰক্ষী বিষয়াসকলক উদ্দেশ্যি প্ৰধানমন্ত্ৰীয়ে কয়, মই নিশ্চিত কৰ্মক্ষেত্ৰত কোনো এদিন আপোনালোকৰ সৈতে মোৰ দেখা হ’ব ৷ কোনো দিনাই খাকী পোচাকক কেতিয়াও শ্ৰদ্ধা নেহেৰুৱাব ৷ ক’ৰোনা সংক্ৰমণত আৰক্ষীৰ ভাল কামত খাকী ইউনিফৰ্মে মানৱীয় মন প্ৰকাশ কৰিছে ৷ সদ্য উত্তীৰ্ণ আইপিএছ কেডাৰক আগন্তুক দিনৰ শুভেচ্ছা জনাই চাপত নিজকে কিদৰে সাজু কৰি ৰাখিব পাৰি সেই পন্থাও দিয়ে প্ৰধানমন্ত্ৰীয়ে ৷ তেওঁ কয়, আপোনলোক যি পেশালৈ আহিছে তাত হঠাতে বহু ঘটি যোৱাৰ সম্ভাৱনা থাকে ৷ প্ৰতি মুহূৰ্তত আপোনালোক সতৰ্ক থাকিব লাগিব ৷ এই কামত চাপ বহু বেছি ৷ নিজৰ মন সুস্থ ৰাখিবলৈ পৰিয়াল বা বন্ধুসকলৰ সৈতে কথা পাতক ৷ ছুটীৰ দিনত পৰিয়ালৰ সৈতে কটাব ৷ যোগ বা প্ৰাণায়ম এই ক্ষেত্ৰত অতি ভাল কাম দিয়ে ৷

দৈনন্দিন বাৰ্তা ডেস্ক : ভাৰতে দৃঢ়ভাৱে জনাইছে যে দেশে বিদেশী প্ৰত্যক্ষ বিনিয়োগ (এফডিআই) সৰ্বাধিক উন্মুক্ত ব্যৱস্থা কৰিছে, যাৰ যোগেদি ইণ্টাৰনেট কোম্পানীবোৰ আৰু ডিজিটেল প্ৰযুক্তি কোম্পানী অন্তর্ভুক্ত হয় ৷ যোৱা ২ ছেপ্টেম্বৰত কেন্দ্ৰই ১১৮টা চীনা ম’বাইল এপ নিষিদ্ধ কৰাৰ সন্দৰ্ভত বিদেশ মন্ত্ৰালয়ৰ মুখপাত্ৰ অনুৰাগ শ্ৰীবাস্তৱে এই কোম্পানীবোৰৰ দায়িত্বৰ বিষয় উল্লেখ কৰে ৷ বিদেশ মন্ত্ৰালয়ৰ মুখপাত্ৰজনে কয় যে তেওঁলোকে কেন্দ্ৰই জাৰি কৰা নীতি-নিয়ম মানি চলিব লাগিব ৷ তেওঁ লগতে কয় যে এই এপবোৰৰ কাৰ্যকলাপ ভাৰতৰ সুৰক্ষাৰ বাবে পূৰ্ববিচাৰমূলক আছিল ৷ শ্ৰীবাস্তৱে জনায় যে ভাৰতে এতিয়াও সকলো কোম্পানীক স্বাগতম জনাই কিন্তু তেওঁলোকৰে ৰাষ্ট্ৰৰ বিধিবিধানৰ সৈতে থাকিব লাগিব ৷ ভাৰতে বিদেশী প্ৰত্যক্ষ বিনিয়োগৰ বাবে বিশ্বৰ সকলোতকৈ উন্মুক্ত ব্যৱস্থা ৰাখিছে ৷ ইয়াৰ মাজত আছে ইণ্টাৰনেট কোম্পানী আৰু ডিজিটেল প্ৰযুক্তিৰ কোম্পানীবোৰ ৷ যিয়ে নহওক এই কোম্পানীবোৰে দায়িত্বসহকাৰে ভাৰত চৰকাৰে নিৰ্দ্ধাৰণ কৰা নিয়মবোৰ মানি চলিব লাগিব ৷ লিভিক, পাবজি ম’বাইল লাইট, য়ুইচাট ৱৰ্ক আৰু য়ুইযাট ম’বাইলহএপ নিষিদ্ধ কৰিছে ৷ তথ্য আৰু প্ৰযুক্তি মন্ত্ৰালয়ে এই সিদ্ধান্ত জনাইছে৷ উল্লেখ্য যে সমগ্ৰ বিশ্বত পাবজি গেমটো বৰ্তমানে ৬০০ মিলিয়ন ডাউনলড হৈছে আৰু ৫০ মিলিয়ন সক্ৰিয় খেলুৱৈ আছে ৷ চাইনিজ মূল ভূখণ্ডক অন্তর্ভুক্ত নকৰি গেমটোত পুনৰ ব্ৰেণ্ড কৰা সংস্কৰণক গেম ফৰ পিচ বোলা হয় ৷ ভাৰতত পাবজিৰ মিলিয়ন ব্যৱহাৰকাৰী আছে, তাৰ মাজত বিশেষকৈ যুৱকসকল আছে ৷ এই সকলো এপ ভাৰতৰ সার্বভৌমত্ব আৰু অখণ্ডতা, প্ৰতিৰক্ষা, নিৰাপত্তা আৰু জনস্বাৰ্থৰ পৰিপন্থী ৷ কোটি কোটি ভাৰতীয় ম’বাইল আৰু ইণ্টাৰনেট ব্যৱহাৰকাৰীৰ নিৰাপত্তাৰ স্বাৰ্থত এই সিদ্ধান্ত লোৱা হয় বুলি জনাইছে তথ্য প্ৰযুক্তি মন্ত্ৰালয়ে ৷

দৈনন্দিন বাৰ্তা ডেস্ক : বাণিজ্যিক খননৰ বাবে কয়লা খনিবোৰ কেন্দ্ৰীয় চৰকাৰে আগেয়েই নিলামৰ ঘোষণা কৰিছিল ৷ যোৱা ১৮ জুনত কয়লা খনি বাণিজ্যিক খনন প্ৰক্ৰিয়া আৰম্ভ হৈছিল ৷ বৃহস্পতিবাৰে কয়লা মন্ত্ৰালয়ে তালিকা প্ৰকাশ কৰি জনাই দিলে ৩৮টা খনিৰ বাবে নিলাম আহ্বান কৰা হ’ব ৷ মন্ত্ৰালয়ে কয়, খনি আৰু খনিজ পদাৰ্থ উন্নয়ন আৰু নিয়ন্ত্ৰণ বা এমএমডিআৰ আইন, ১৯৫৭ৰ আওতাত প্ৰথম পৰ্যায়ৰ নিলাম ডোলেছৰা, জাৰেকেলা আৰু ঝৰপালাম-তংগাৰঘাট কয়লা খনি লোৱা হৈছে ৷ তদুপৰি মন্ত্ৰালয়ৰ তৰফৰ পৰা বিবৃতিত কোৱা হয় যে এমএমডিআৰ ১৯৫৭ আইনৰ আওতাত প্ৰথম পৰ্যায়ত মোৰগা দক্ষিণ কয়লা খনিৰ নাম প্ৰত্যাহাৰ কৰা হৈছে ৷ ফতেহপুৰ পূৱ, উত্তৰ মদনপুৰ, মোৰগা-২ আৰু ছায়ং কয়লা খনিৰ নাম চিএমএপি ২০১৫ আইনৰ আওতাৰ একাদশ দফাৰ মতে প্ৰত্যাহাৰ কৰা হৈছে ৷ এই দুই আইনৰ আওতাত এইবাৰ ৩৮টা কয়লা খনি বাণিজ্যিক খননৰ বাবে নিলাম কৰা হ’ব বুলি কয়লা মন্ত্ৰালয়ে জনাইছে ৷

দৈনন্দিন বাৰ্তা ডেস্ক : সুশান্ত সিং ৰাজপুতৰ মৃত্যুৰ পাচৰ পৰা এটাৰ পাচত এটাকৈ বিস্ফোৰক মন্তব্য কৰিছে কংগনা ৰানাউটে ৷ কিছুদিনৰ আগতে টুইট কৰি কংগনাই মন্তব্য কৰিছিল, মুম্বাই আৰক্ষীৰ পৰা তেওঁ নিৰাপত্তা নিবিচাৰে ৷ এইবাৰ টুইট কৰি আকৌ ব্যংগ কৰি লিখে, মুম্বাই কিয় পাক অধিকৃত কাশ্মীৰৰ দৰে হৈছে ? ৩০ আগষ্টত টুইটাৰত বিজেপি নেতা ৰাম কদমৰ টুইট শ্বেয়াৰ কৰি কংগনাই লিখিছিল, বলীউডত ‘মুভি মাফিয়া’ সকলতকৈ তেওঁ বেছি ভয় কৰে মুম্বাই আৰক্ষীক ৷ তেওঁ হিমাচল প্ৰদেশ বা কেন্দ্ৰীয় চৰকাৰৰ ওচৰত নিৰাপত্তা বিচাৰে ৷ শিৱ সেনাৰ মুখপত্ৰ ‘ছামনা’ত ‘বলীউড কুইন’ক এহাতত তুলি লয় সঞ্জয় ৰাউতে ৷ তেওঁ লিখে, আমাৰ বিনম্ৰ অনুৰোধ কংগনা যেন মুম্বাইলৈ পুনৰ ঘুৰি নাহে ৷ মুম্বাই আৰক্ষীক ভীষণভাৱে অপমান কৰা হৈছে ৷ গৃহ মন্ত্ৰালয়ে এই বিষয়ত ব্যৱস্থা লোৱা উচিত ৷ এই খবৰ শ্বেয়াৰ কৰি কংগনাই টুইট কৰি লিখে, শিৱসেনাৰ নেতা সঞ্জয় ৰাউতে মোক প্ৰকাশ্যে ভাবুকি দি পুনৰ মুম্বাই ঘুৰি যোৱাত বাৰণ কৰিছে ৷ মুম্বাইৰ পথত মুকলিকৈ দেৱাল লিখনৰ পাচত এইবাৰ প্ৰকাশ্যে এনে ভাবুকি! হঠাতে মুম্বাইক পাক অধিকৃত কাশ্মীৰৰ দৰে লাগিছে কিয় ? সুশান্ত সিং ৰাজপুতৰ গোচৰ মিডিয়াই মুম্বাই আৰক্ষীৰ ভাৱমূৰ্ত্তি নষ্ট কৰাৰ অভিযোগত বম্বে উচ্চ ন্যায়ালয়ে পিআইএল দাখিল কৰিছে আঠজন অৱসৰপ্ৰাপ্ত আইপিএছ বিষয়াই ৷ মুম্বাই আৰক্ষীৰ বিভিন্ন পদত তেওঁলোকে কাম কৰিছিল ৷ অৱসৰপ্ৰাপ্ত বিষয়াসকলৰ এই পদক্ষেপক সমৰ্থন কৰিছে মহাৰাষ্ট্রৰ গৃহ মন্ত্ৰী অনিল দেশমুখে ৷

অনলাইন বাৰ্তা : ভাৰতৰ বিৰুদ্ধে চক্ৰান্ত কৰিবলৈ গৈ পুনৰ ব্যৰ্থ হ’ল পাকিস্তান ৷ ৰাষ্ট্ৰসংঘৰ নিৰাপত্তা পৰিষদৰ ১২৬৭ কমিটীৰ সহায়ত দুই ভাৰতীয় নাগৰিকক আন্তৰ্জাতিক সন্ত্ৰাসবাদী সজোৱাৰ চেষ্টা কৰিছিল ইমৰান খান চৰকাৰে ৷ ১২৬৭ কমিটীৰ কামৰ পদ্ধতিত ধৰ্মীয় ৰং লগাই ৰাজনীতি কৰিবলৈ বিচাৰিছিল ৷ কিন্তু প্ৰতিৱেশী চিৰবৈৰী দেশখনৰ সেই উদ্দেশ্য পুৰণ নহ’ল ৷ আন্তৰ্জাতিক মহলৰ সহায়ত নতুন দিল্লীক বিপদত পেলাবলৈ গৈ নিজেই বিপদৰ সন্মুখীন হ’ল পাকিস্তান ৷ ৰাষ্ট্ৰসংঘৰ নিৰাপত্তা পৰিষদ (ইউএনএছচি)ৰ ১২৬৭ কমিটীৰ প্ৰস্তাৱনা অনুসৰী অংগাৰা আপ্পাজি আৰু গোবিন্দ পাটনায়ক নামৰ দুজন ভাৰতীয় নাগৰিকক আন্তৰ্জাতিক সন্ত্ৰাসবাদী সজোৱাৰ চেষ্টা কৰিছিল পাকিস্তানে ৷ ইয়াৰ বাবে নিৰাপত্তা পৰিষদত প্ৰস্তাৱ দাখিল কৰা হৈছিল ৷ কিন্তু ইয়াত কোনো প্ৰমাণ জমা দিব পৰা নাছিল ৷ তদুপৰি ইছলামাবাদৰ এই প্ৰস্তাৱৰ পত্ৰপাঠ বাতিল কৰি দিয়ে আমেৰিকা, ফ্ৰান্স, জাৰ্মানী, বেলজিয়াম আৰু ব্ৰিটেইনে ৷ বুধবাৰে এই বিষয়টোৰ কথা উল্লেখ কৰি পাকিস্তানৰ অপচেষ্টা ৰখাৰ বাবে নিৰাপত্তা পৰিষদৰ সদস্যসকলক ধন্যবাদ জনায় ৰাষ্ট্ৰসংঘত ভাৰতৰ স্থায়ী প্ৰতিনিধি টি এছ তিৰুমূৰ্তিয়ে ৷ তেওঁ টুইট কৰি কয়, ৰাষ্ট্ৰসংঘৰ নিৰাপত্তা পৰিষদৰ ১২৬৭ কমিটীৰ কাৰ্য পদ্ধতিত ধৰ্মীয় ৰং সানিবলৈ চেষ্টা কৰিছিল পাকিস্তানে ৷ কিন্তু তেওঁলোকৰ এই উদ্দেশ্য ব্যৰ্থ কৰে নিৰাপত্তা পৰিষদে ৷ পাকিস্তানৰ এই অপচেষ্টা ৰোধ কৰাত পৰিষদৰ সকলো সদস্যক ধন্যবাদ জনায় ৷