দৈনন্দিন বাৰ্তা ডেস্ক : স্বয়ং মহাৰাষ্ট্ৰৰ মুখ্যমন্ত্ৰীৰ লেণ্ড লাইনত ফোন কৰি ‘মাতশ্ৰী’ বাসভৱন উৰুৱাই দিয়াৰ ভাবুকি দিছে গেংষ্টাৰ ডাউদ ইব্ৰাহিমে ৷ মহাৰাষ্ট্ৰৰ মুখ্যমন্ত্ৰী উদ্ধব ঠাকৰেয়ে গেংষ্টাৰ ডাউদ ইব্ৰাহিমৰ নামত চাৰিটা এনে ফোন কল পায় ৷ প্ৰাপ্ত সূত্ৰৰ খবৰ মতে ডাউদ ইব্ৰাহিমৰ নাম কৈ বান্দ্ৰাৰ মুখ্যমন্ত্ৰীৰ বাসভৱনৰ লেণ্ড লাইনলৈ ফোন আহে ৷ তাত ভাবুকি দিয়া হয় যে ‘মাতশ্রী’ উৰুৱাই দিয়া হ’ব ৷ উদ্ধৱ ঠাকৰেৰ ওচৰলৈ এনে ধৰণৰ ফোন অহাৰ কথা অস্বাভাৱিক নহয় বুলি প্ৰাপ্ত সূত্ৰই প্ৰকাশ কৰে ৷ মুখ্যমন্ত্ৰী উদ্ধৱ ঠাকৰে ক্ষমতালৈ অহাৰ পাচত ডাউদৰ বিৰুদ্ধে মুম্বাই আৰক্ষী যিদৰে তৎপৰ হৈছে, বাণিজ্য নগৰীত চলি থকা ডনৰ আণ্ডাৰগ্ৰাউণ্ড ব্যৱসায়ত বিপুল ক্ষতি হৈছে ৷ ইপিনে, এই ঘটনাৰ পাচতে মুখ্যমন্ত্ৰীৰ বাসভৱনত নিৰাপত্তা বঢ়াই দিয়া হৈছে ৷ উল্লেখ্য যে ডাউদ এই মুহূৰ্তত পাকিস্তানত আছে বুলি প্ৰকাশ ৷ স্মৰ্তৱ্য যে কেইটামান দিনৰ আগতে কংগনা ৰানাউটে বিস্ফোৰক মন্তব্যৰে ব্যংগ কৰি লিখিছিল, মুম্বাই কিয় পাক অধিকৃত কাশ্মীৰৰ দৰে হৈছে? সুশান্ত সিং ৰাজপুতৰ মৃত্যু সন্দৰ্ভত কংগনা ৰানাউটে মুম্বাইক পাক-অধিকৃত কাশ্মীৰৰ লগত তুলনা কৰি মত প্ৰকাশ কেইটামান দিনৰ পাচতে মহাৰাষ্ট্ৰৰ মুখ্যমন্ত্ৰীলৈ গেংষ্টাৰ ডাউদ ইব্ৰাহিমৰ নামত ফোন কল অহাত গুৰুত্বপূৰ্ণ হৈ পৰিছে ৷

দৈনন্দিন বাৰ্তা ডেস্ক : ভাৰতত নিতৌ বৃদ্ধি পাইছে ক’ৰোনাৰ সংক্ৰমণ ৷ এই মহামাৰীৰ পৰা ৰক্ষা পাবৰ বাবে ভাৰতক সহায়ৰ হাত আগবঢ়াইছে বন্ধু দেশ জাৰ্মানীয়ে ৷ বৃহৎ পৰিমাণৰ টেষ্টিং কিট, পিপিই পঠাইছে জাৰ্মানীয়ে৷ তাৰ লগতে আর্থিক সাহায্য আগবঢ়াইছে এংগেলা মাৰকেল চৰকাৰে ৷ উল্লেখ্য যে জাৰ্মানীয়ে ভাৰতলৈ ৩ লাখ ৩৩ হাজাৰ টেষ্টিং কিট পঠিয়াইছে ৷ তাৰ লগতে ছয় লাখ পিপিই পঠাব ৷ ইয়াৰ আৰ্থিক মূল্য এক কোটি ৫০ লাখ ইউৰো বুলি প্ৰকাশ ৷ ভাৰতীয় মুদ্ৰাত প্ৰায় ১৩০ কোটিৰো অধিক ৷ এই সাহায্যৰ কথা দেওবাৰে ঘোষণা কৰে জাৰ্মানীৰ মন্ত্ৰী জাৰ্ড মুলাৰে ৷ মন্ত্ৰীজনে লগতে কয়, ভাৰতত ক’ৰোনা ৰোধৰ বাবে এই সাহায্য আগবঢ়োৱা হৈছে ৷ জাৰ্মানীৰ উন্নয়ন মন্ত্ৰালয়ে ভাৰতক হ্ৰস্ব ম্যাদী ঋণ দিছে ৷ ৪৬ কোটি ইউৰো ঋণ দিয়া হৈছে ভাৰতক ৷ মুলাৰে জনায় যে ভাৰতৰ ৮০ কোটি মানুহক খাবৰ বাবেই এই ঋণ দিয়া হৈছে ৷ উল্লেখ্য যে ৩২ কোটি মানুহে ক’ৰোনাৰ বাবে কাম হেৰুৱাইছিল ৷ তেওঁলোককো সহায় কৰা হ’ব ৷ বিশ্বত ক’ৰোনা মোকাবিলা কৰাৰ উদ্দেশ্যে এই যুঁজ বুলি প্ৰকাশ ৷ মন কৰিব লগা যে ভাৰতত যোৱা ২৪ ঘণ্টাত ৯০ হাজৰা ৬৩২ জন লোক ক’ৰোনাত আক্ৰান্ত হৈছে ৷ ইমান সংখ্যক মানুহ একেদিনাই পৃথিৱীত কোনো দেশতে আক্ৰান্ত হোৱা নাই ৷

অনলাইন বাৰ্তা : দেশত সৰ্বাধিক ৯০ হাজাৰৰ অধিক লোক এদিনতে ক’ৰোনাত আক্ৰান্ত হৈছে ৷ ইয়াকে লৈ দেশত মুঠ ক’ৰোনাত আক্ৰান্তৰ সংখ্যা ৪১ লাখ অতিক্ৰম কৰিলে ৷ কেন্দ্ৰীয় স্বাস্থ্য মন্ত্ৰালয়ৰ তথ্যত এই কথা প্ৰকাশ ৷ কেন্দ্ৰীয় স্বাস্থ্য মন্ত্ৰালয়ৰ তথ্য মতে ক’ভিড-১৯ত মুঠ আক্ৰান্তৰ সংখ্যা হ’ল ৪১,১৩,৮১২ জন ৷ ইয়াৰে ৮,৬২,৩২০ জন লোকৰ দেহত সক্ৰিয় অৱস্থাত আছে ৷ আনহাতে ৩১,৮০,৮৬৬ জন লোক আৰোগ্য হৈছে ৷ যোৱা ২৪ ঘণ্টাত ৯০,৬৩৩ জন লোক নতুনকৈ ক’ৰোনাত আক্ৰান্ত হৈছে ৷ আনহাতে ক’ৰোনাত মুঠ মৃত্যু হৈছে ৭০,৬২৬ জন ৷ যোৱা ২৪ ঘণ্টাত ১০৬৫ জন লোক ক’ৰোনাত মৃত্যু হয় ৷ দেশৰ ভিতৰত ক’ৰোনাত সৰ্বাধিক আক্ৰান্ত হোৱা ৰাজ্যখন হ’ল মহাৰাষ্ট্ৰ ৷ এইখন ৰাজ্যত ২,২১,০১২ জন লোক ক’ৰোনাত আক্ৰান্ত হৈছে ৷ ইয়াৰ পাচতে অন্ধ্ৰপ্ৰদেশত ১,০০,৮৮০ জন লোক ক’ৰোনাত আক্ৰান্ত হৈছে ৷ ভাৰতীয় চিকিৎসা গৱেষণা পৰিষদৰ মতে ৫ ছেপ্টেম্বৰলৈকে ১০,৯২,৬৫৪ জন লোকৰ নমুনা পৰীক্ষা কৰা হৈছে ৷ ইয়াকে লৈ বৰ্তমানলৈকে ৪.৮৮ কোটি লোকৰ নমুনা পৰীক্ষা কৰা হৈছে ৷ উল্লেখ্য যে অসমত ক’ৰোনাত মুঠ ১ লাখ ২৩ হাজাৰ ৯২২ জন লোক আক্ৰান্ত হৈছে ৷ আনহাতে ৰাজ্যখনত ৯৫ হাজাৰ ৬৩ জন সুস্থ হৈছে ৷ অসমত ক’ৰোনাত ৩৫২ জন লোকৰ মৃত্যু হৈছে ৷

অনলাইন বাৰ্তা : এফালে ভাৰতৰ ভূমি দখলৰ চেষ্টাত ভাৰতীয় জোৱানৰ ওপৰত আঘাত কৰিছে চীনে ৷ আনহাতে সেইখন দেশৰ দুৰ্গত নাগৰিকক উদ্ধাৰ কৰিছে ভাৰতীয় সেনাই ৷ এই ঘটনা ঘটিছে ছিকিমত ৷ উত্তৰ ছিকিমৰ ১৭,৫০০ ফুট উচ্চতাৰ মালভূমিত হিমাংকৰ তলৰ তাপমাত্ৰাত বন্দী হৈ পৰি পথ হেৰুৱাইছিল তিনিজন চীনা নাগৰিকে ৷ বৃহস্পতিবাৰে তেওঁলোকক উদ্ধাৰ কৰে ভাৰতীয় সেনা বাহিনীয়ে ৷ উদ্ধাৰ হোৱা চীনা নাগৰিকক অক্সিজেন, গৰম কাপোৰ, খাদ্য, পানী দি তেওঁলোকৰ বাবে প্ৰয়োজনীয় চিকিৎসাৰ ব্যৱস্থা কৰে সেনাই ৷ সেনাৰ তৰফৰ পৰা বিবৃতিত এই কথা কোৱা হৈছে ৷ ইপিনে সেনাই এই চীনা নাগৰিকক সঠিক পথৰ নিৰ্দেশনা দিয়ে ৷ তাৰ পাচত সেই পথ অনুসৰণ কৰি তেওঁলোক চীনলৈ ৰাওনা হয় ৷ এই বিপদৰ সময়ত উদ্ধাৰ কৰাত তেওঁলোকে ভাৰতীয় সেনা বাহিনীৰ ওচৰত কৃতজ্ঞতা প্ৰকাশ কৰে ৷

দৈনন্দিন বাৰ্তা ডেস্ক : প্ৰতিৰক্ষা মন্ত্ৰীৰ আলোচনাৰ মাজতেই পুনৰ বিশ্বাসঘাতকতা চীনৰ ৷ অৰুণাচলৰ চীন সীমান্তৰ কাষৰ পৰা ৫জন যুৱকক লালফৌজে অপহৰণ কৰিছে বুলি অভিযোগ উত্থাপন হৈছে ৷ অৰুণাচলৰ উজনি সোৱনশিৰি জিলাৰ চীন-ভাৰত সীমান্তৰ পৰা চীনা সেনাই এই পাঁচজন যুৱকক অপহৰণ কৰে বুলি সেনাৰ জ্যেষ্ঠ বিষয়াই কয় ৷ জানিব পৰা মতে এই এলেকাৰ পৰা তনু বকৰ, প্ৰশাত ৰিংলিং, নগাৰু দেৰি, দংতু এবিয়া, টচ ছিংকাম নামৰ পাঁচজন যুৱকৰ সন্ধান পোৱা নাই ৷ প্ৰশাত ৰিংলিঙৰ ককায়েক প্রকাশ ৰিংলিঙে এই কথা ফেচবুকত প’ষ্ট দি জনাইছে ৷ তাৰ পাচতে বিষয়টো পোহৰলৈ আহে ৷ ছচিয়েল মিডিয়াত তেওঁ অভিযোগ কৰে যে তেওঁৰ ভায়েকসহ মুঠ ৫জনক চীনা সেনাই অপহৰণ কৰিছে ৷ তেওঁ স্থানীয় প্ৰশাসন আৰু ভাৰত চৰকাৰক এই বিষয়ত দ্ৰুত ব্যৱস্থা ল’বলৈ অনুৰোধ কৰিছে ৷ উল্লেখ্য যে শুকুৰবাৰে এই অপহৰণ কাণ্ড জিলাখনৰ নাচো অঞ্চলত সংঘটিত হয় বুলি পৰিয়ালৰ সূত্ৰত প্ৰকাশ ৷ ইতিমধ্যে আৰক্ষী অধীক্ষকে নাচো আৰক্ষী থানাৰ ভাৰপ্ৰাপ্ত বিষয়াক ঘটনাৰ পৰ্যৱেক্ষণ কৰিবলৈ পঠাইছে আৰু সেই সন্দৰ্ভত তৎকালে প্ৰতিবেদন দাখিল কৰিবলৈ কৈছে ৷ অৱশ্যে সেই প্ৰতিবেদন দেওবাৰে পুৱা পাব বুলি প্ৰকাশ৷ মন কৰিব লগা যে নাচো এলেকাটো জিলা সদৰৰ পৰা ১২০ কিলোমিটাৰ নিলগত ৷ অপহৰণ কৰা লোকসকলৰ পৰিয়ালে অপহৃতক তৎকালে মুকলি কৰি আনিবলৈ আহ্বান জনাইছে ৷ এই বিষয়ত সেনাই বৰ্তমানে কোনো মত প্ৰকাশ কৰা নাই ৷ পাছিঘাট পশ্চিমৰ বিধায়ক নিনোংগ এৰিঙে কয় যে চীনৰ পিএলএয়ে এই ঘটনা সংঘটিত কৰিছে ৷

দৈনন্দিন বাৰ্তা ডেস্ক : নিৰ্বাচনৰ আগতেই নহয়, নিৰ্বাচনত সাফল্য লাভ কৰাৰ পাচতো প্ৰধানমন্ত্ৰী নৰেন্দ্ৰ মোডীয়ে বুলেট ট্ৰেইনৰ বাবে বহু শব্দ খৰচ কৰিছিল ৷ প্ৰধানমন্ত্ৰীৰ নিৰ্দেশত জাপান পৰ্যন্ত ঘূৰি আহিছিল বিশেষজ্ঞৰ দল ৷ ভাৰতলৈ আহি বুজাবুজি চুক্তিত চহী কৰিছিল চীন, স্পেইনৰ দৰে দেশৰ প্ৰতিনিধিয়ে ৷ মোডীৰ সেই স্বপ্নৰ প্ৰকল্পই এইবাৰ পৰিল এক আঘাত ৷ ২০২৩ চনত প্ৰকল্পৰ প্ৰথম পৰ্যায়ৰ কাম শেষ হোৱাৰ কথা আছিল যদিও সেয়া পাঁচ বছৰ পিছুৱাই গৈছে ৷ লক্ষ্যমাত্ৰা নিৰ্দ্ধাৰণ কৰা হৈছে ২০২৮ চন ৷ মূলত বুলেট ট্ৰেইনৰ ক্ষেত্ৰত নিবিদাত জাপানী কোম্পানীৰ অংশগ্ৰহণ উল্লেখনীয়ভাৱে হাৰ কম ৷ তেওঁলোকে আগ্ৰহও দেখুওৱা নাই ৷ মাটি অধিগ্ৰহণৰ সমস্যাৰ বাবেই এই দুৰাৱস্থা ৷ ৰে’ল বিভাগৰ এজন বিষয়াই জনোৱা মতে থাকি যোৱা সমস্যাবোৰ দ্ৰুত সমাধান কৰা হ’লে নিৰ্দ্ধাৰিত সময়ৰ কিছু আগতেই সম্ভৱ হ’লহেতেন ৷ কিন্তু এই জাতীয় জটিল প্ৰযুক্তি নিৰ্ভৰ প্ৰকল্পত নিৰ্দ্ধাৰিত সময় বহু পিছুৱাই দিয়া নহয় ৷ মুম্বাইৰ পৰা আহমেদাবাদলৈ ৫০৮ কিলোমিটাৰ বুলেট ট্ৰেইনৰ ট্ৰেক নিৰ্মাণৰ ৮০ শতাংশ খৰচই জাপানৰ পৰা মাত্ৰ ০.১ শতাংশ হাৰত ঋণত গঢ়ি উঠাৰ কথা ৷ ঋণৰ সুত দিয়াত ভাৰতে ১৫ বছৰ সময় পাব ৷ মূলত জাপানী প্ৰযুক্তিত ভাৰতত বুলেট ট্ৰেইন গঢ়ি উঠিব ৷ স্বাধীনতাৰ ৭৫ বছৰ পূৰ্তি উপলক্ষে বুলেট ট্ৰেইন মুম্বাইৰ পৰা আহমেদাবাদ পৰ্যন্ত চলোৱাৰ কথা আছিল ৷ জানিব পৰা মতে নিবিদাৰ কাম ক’ৰোনাৰ বাবে থমকি গৈছে ৷ এই প্ৰকল্প বাস্তৱায়িত কৰাৰ ক্ষেত্ৰত অন্যতম জটিল হ’ল ঠাই ৷ মুম্বাইৰ পৰা আহমেদাবাদ পৰ্যন্ত বুলেট ট্ৰেইন কৰিডৰত ২১ কিলোমিটাৰ পথ ভূগৰ্ভস্থ, ৭ কিলোমিটাৰ পথ সমুদ্ৰৰ তলেৰে যাব৷ এই পথৰ নিৰ্মাণ চলিত বছৰৰ আৰম্ভণিৰে পৰা কোনো জাপানী কোম্পানীয়ে আগ্ৰহ প্ৰকাশ কৰা নাই ৷ তদুপৰি জাপানী য়েনৰ তুলনাত টকাৰ দাম বহু বাঢ়িছে ৷ ফলত প্ৰকল্প বাস্তৱায়িত কৰাত অনুমানিক খৰচৰ পৰিমাণ বহু বাঢ়িব৷ বৰ্দ্ধিত ব্যয় বহন কৰাত ভাৰত সন্মত নহয় বুলি জানিব পৰা গৈছে ৷ দেশীয় কোম্পানীবোৰক সুৰংগৰে ৰে’ল পথ নিৰ্মাণৰ দায়িত্ব দিবৰ বাবে নিবিদা জমা কৰাৰ ঘোষণা কৰিব পাৰে ভাৰত চৰকাৰে ৷ বুলেট ট্ৰেইনৰ নিৰ্মাতা কাৱাছাকি আৰু হিতাচিয়ে যৌথভাৱে ট্ৰেইন সৰবৰাহৰ নিবিদা দিছে ৷ ফলত দৰদামৰ কোনো বিকল্প নাই ৷ আগন্তুক দিনত ভাৰত-জাপানৰ যৌথ সমিতিৰ সভাত এই বিষয়টোক লৈ আলোচনা হ’ব বুলি প্ৰাপ্ত সূত্ৰই প্ৰকাশ কৰে ৷ আনহাতে জাপানৰ প্ৰধানমন্ত্ৰী পদৰ পৰা ছিনজো আবেৰে পদত্যাগ কৰাত সমস্যা সমাধানত অন্তৰায় হ’ব পাৰে বুলি ভবা হৈছে ৷ উল্লেখ্য যে মুম্বাইৰ পৰা আহমেদাবাদ পৰ্যন্ত ৫০৮ কিলোমিটাৰ বুলেট ট্ৰেইনৰ ট্ৰেক নিৰ্মাণত মাটিৰ ৭৭ শতাংশ গুজৰাট আৰু ২২ শতাংশ মহাৰাষ্ট্ৰই দিব ৷ জানিব পৰা মতে মহাৰাষ্ট্ৰৰ পালঘৰ আৰু গুজৰাটৰ নৱচাৰিৰৰ মাটি অধিগ্ৰহণত সমস্যাই দেখা দিছে ৷ নেচনেল হাই স্পীড ৰে’ল ক’ৰ্প’ৰেচনৰ এজন বিষয়াই জনোৱা মতে ৫০৮ কিলোমিটাৰ বুলেট ট্ৰেইন ট্ৰেক নিৰ্মাণৰ বাবে ৬৩ শতাংশ মাটি অধিগ্ৰহণৰ কাম সম্পন্ন হৈছে ৷ ইয়াত ছটা ষ্টেচন হ’ব৷ ৩৪৫ কিলোমিটাৰ পথ নিৰ্মাণৰ নিবিদা আহ্বানৰ কামো শেষ ৷

দৈনন্দিন বাৰ্তা ডেস্ক : মস্কোত ভাৰত আৰু চীনৰ প্ৰতিৰক্ষা মন্ত্ৰীৰ মাজত প্ৰায় আঢ়ৈ ঘণ্টা ধৰি আলোচনা হয় ৷ সংঘাতৰ মাজত হোৱা উচ্চ পৰ্যায়ৰ বৈঠকত সীমান্তত শান্তি পুনৰ ঘূৰাই অনাৰ ইংগিত দিয়ে ৷ এই বৈঠকত লাডাখত প্ৰকৃত নিয়ন্ত্ৰণ ৰেখাত স্থিতৱস্থা বাহাল ৰখাত সহমত দিয়ে ৷ কিন্তু কিদৰে সমস্যাটো সমাধান হ’ব তাকলৈ কোনো সূত্ৰ নোলাল ৷ উল্লেখ্য যে দুয়ো দেশৰ সংঘাতৰ মাজতে এয়ে প্ৰথম উচ্চ পৰ্যায়ৰ বৈঠক অনুষ্ঠিত হ’ল ৷ বুধবাৰে মস্কোলৈ যাত্ৰা কৰিছিল প্ৰতিৰক্ষা মন্ত্ৰী ৰাজনাথ সিং ৷ শুকুৰবাৰে তিতে ছাংহাই ক’ৰ্প’ৰেচন অৰ্গেনাইজেচনৰ সভাত অংশ লয় ৷ এই সভাত উপস্থিত আছিল চীনৰ প্ৰতিৰক্ষা মন্ত্ৰী জেনেৰেল উই ফেংগঘি ৷ ইয়াৰ মাজতে ভাৰতৰ সৈতে সৃষ্টি হোৱা ঘাঁত মলম লগাবলৈ ৰাজনাথ সিঙৰ সৈতে দেখা কৰে চীনৰ বিদেশ মন্ত্ৰী ওৱাং ইয়ে ৷ দুয়ো পক্ষৰ মাজত বৈঠক হয় ৷ ভাৰতীয় সময় নিশা ৯.৩০ বজাত এই হাই ভল্টেজ বৈঠক আৰম্ভ হয় ৷ ৰাজনাথ সিঙৰ লগত আছিল ৰাছিয়াত ভাৰতৰ ৰাষ্ট্ৰদূত ডি বি ভেংকটেশ ভাৰ্মা আৰু প্ৰতিৰক্ষা সচিব অজয় কুমাৰ ৷ বৈঠকত ভাৰতৰ তৰফৰ পৰা পূৱ লাডাখৰ পেনগং হ্ৰদৰ দক্ষিণ অংশত পুনৰ নতুনকৈ চীনৰ অনুপ্ৰৱেশত তীব্ৰ প্ৰতিবাদ কৰে ৷ আলোচনাৰ মাজতে এই সমস্যা সমাধান কৰাৰ দাবী কৰে ভাৰতে ৷ ভাৰতৰ পূৰ্বৰ স্থিতাৱস্থা ৰক্ষাৰ চাপত কাৰ্যত চীনা প্ৰতিৰক্ষা মন্ত্ৰীয়ে নতি স্বীকাৰ কৰে বুলি প্ৰাপ্ত সূত্ৰৰ খবৰত প্ৰকাশ ৷ আন এক সূত্ৰই দাবী কৰা মতে লাডাখত অশান্তিৰ বাবে ভাৰত দায়ী৷ তথাপি সীমান্তত স্থিতাৱস্থা ঘুৰাই আনিবলৈ দাবী জনায় প্ৰতিৰক্ষা মন্ত্ৰী ৰাজনাথ সিঙে ৷ বৈঠকত কি আলোচনা হ’ল তাক লৈ চৰকাৰীভাৱে একো জনোৱা নাই ৷ এক সৰ্বভাৰতীয় সংবাদ মাধ্যমত প্ৰকাশিত বাতৰি মতে, বৈঠকৰ শেষত চীনৰ প্ৰতিৰক্ষা মন্ত্ৰীয়ে জনায় যে সীমান্তত স্থিতাৱস্থা ঘুৰাই অনাত দুয়োখন দেশে উদ্যোগ ল’ব লাগিব ৷ আলোচনাৰ মাজেৰে সমস্যা সমাধান কৰাৰ চেষ্টা কৰা হ’ব ৷ দ্ৰুত সীমান্ত পৰিস্থিতি আৰু সেনা বাহিনীক পূৰ্বৰ অৱস্থানলৈ ঘুৰাই পঠোৱাৰ প্ৰয়োজন ৷ সচেতন মহলৰ দাবী ইয়াৰ আগতেও আলোচনাৰ মাজেৰে সমস্যা সমাধানৰ বাবে সন্মত হৈছিল দুয়োটা পক্ষ ৷ সীমান্ত সমস্যা সমাধানত কোনো চুক্তি নহ’ল বুলি প্ৰকাশ ৷ ৰাজনাথ সিঙে কয়, বিশ্বাস, আগ্ৰাসী মনোভাৱ ত্যাগ আৰু আন্তৰ্জাতিক ৰীতি মানি মতবিৰোধ দূৰ কৰাৰ ওপৰত সমগ্ৰ এলেকাটোত শান্তি আৰু নিৰাপত্তা নিৰ্ভৰ কৰিছে ৷ যোৱা মে’ মাহত লাডাখৰ গালৱানত ভাৰত আৰু চীনৰ মাজত হোৱা সংঘৰ্ষৰ পাচত এয়ে প্ৰথম দুয়ো দেশৰ বৈঠক অনুষ্ঠিত হ’ল ৷