হোজাই : শিক্ষক দিৱসৰ দিনাই ২০১৫ চনত প্ৰি চিনিয়ৰ সাধাৰণ শাখাৰ মাদ্ৰাছা টেট উত্তীৰ্ণ সকলো প্ৰাৰ্থীক নিযুক্তি দিয়াৰ দাবী উত্থাপন কৰিছে মাদ্ৰাছা টেট উত্তীৰ্ণ সন্থাই। শিক্ষামন্ত্ৰী হিমন্ত বিশ্ব শৰ্মাই মাদ্ৰাছা বন্ধ কৰাৰ ঘোষণা কৰাৰ পিছতেই এইবাৰ প্ৰতিক্ৰিয়া প্ৰকাশ কৰিছে অসম মাদ্ৰাছা টেট উৰ্ত্তীণ সন্থাই। কেবামাহ পূৰ্বে মাদ্ৰাছা বন্ধ কৰাৰ প্ৰসংগ উত্থাপন কৰাৰ পিছত ৰাজ্যজুৰি মাদ্ৰাছা ছাত্ৰ সন্থাকে ধৰি সংখ্যালঘু দল সংগঠনে শিক্ষামন্ত্ৰীৰ বিৰুদ্ধে প্ৰতিবাদ সাব্যস্ত কৰিছিল। ঠায়ে ঠায়ে পুত্তলিকা দাহ কৰিছিল৷ কিন্তু এইবাৰ প্ৰতিবাদ নহয়, ২০১৫ চনত মাদ্ৰাছা টেট উত্তীৰ্ণ সকলো প্ৰাৰ্থীক নিযুক্তি দিবলৈ শিক্ষামন্ত্ৰীক অনুৰোধ কৰিছে মাদ্ৰাছা টেট উত্তীৰ্ণ সন্থাই৷ উল্লেখ্য যে ২০১৫ চনত মাদ্ৰাছা টেট উত্তীৰ্ণ বহু প্ৰাৰ্থীক এম ই স্কুলৰ আৰৱী আৰু হিন্দী শিক্ষক হিচাপে নিযুক্তি দিয়া হৈছে৷ কিন্তু এতিয়াও প্ৰায় ৮ হাজাৰ টেট উত্তীৰ্ণ প্ৰাৰ্থীৰ নিযুক্তি হোৱা নাই৷ মাদ্ৰাছা টেট উত্তীৰ্ণ বহু হিন্দু প্ৰাৰ্থীও আছে। বহু টেট উত্তীৰ্ণ বাকীসকল জেনেৰেল প্ৰাৰ্থীক কেইদিনমান পাছত চৰকাৰে দিবলগীয়া ৫০ হাজাৰ শিক্ষক নিযুক্তি প্ৰক্ৰিয়াত অন্তৰ্ভুক্ত কৰিবলৈ হোজাই জিলা সমিতিয়ে আজি সংবাদমেলৰ জৰিয়তে দাবী উত্থাপন কৰিছে। উল্লেখযোগ্য যে ৰাজ্যত ৩৯৯ খন চৰকাৰী, প্ৰি ছিনিয়ৰ, ছিনিয়ৰ, টাইটেল মাদ্ৰাছা আৰু এৰাবিক কলেজ আছে। কেবা লক্ষ্য ছাত্ৰ-ছাত্ৰীৰ ভবিষ্যত কি হ’ব! কংগ্ৰেছ চৰকাৰৰ বিগত কাৰ্যকালত হিমন্ত বিশ্ব শৰ্মা শিক্ষা মন্ত্ৰী থকাৰ সময়ত ৩২৫ খন মাদ্ৰাছা চৰকাৰীকৰণ কৰিছিল। বৰ্তমান শিক্ষা মন্ত্ৰী পুনৰ বন্ধৰ ঘোষণা কৰিছে, এতিয়া প্ৰশ্ন হয় নিৰ্বাচনৰ প্ৰাকক্ষণত মাদ্ৰাছা প্ৰসংগ নিৰ্বাচনী ধামাকা নে আন কিবা সেয়া সচেতন লোকৰ মাজত ব্যাপক চৰ্চা চলিছে।

সোণতলী : সমাগত ২০২১ চনৰ বিধানসভা নিৰ্বাচন৷ বিধানসভা নিৰ্বাচনৰ দিন চমু চাপি অহাৰ লগে লগে প্ৰত্যেকটো ৰাজনৈতিক দলৰ নেতাসকলে অৱলম্বন কৰিছে বিভিন্ন ধৰণৰ ৰণকৌশল ৷ নিৰ্বাচনৰ পূৰ্বে নেতা সকলে ৰাইজক কেৱল মিছা প্ৰতিশ্ৰুতি দি ভোট আদায় কৰায় ৰাজনীতি কৰাত হে ব্যস্ত হৈ পৰে ৷ কিন্তু বকো সমষ্টিৰ বিধায়িকা নন্দিতা দাসে সমষ্টি উন্নয়নত যে সম্পূৰ্ণৰূপে ব্যৰ্থ হৈছে তাৰে জলন্ত উদাহৰণ দাঙি ধৰিছে বৰদিয়া-নয়াপাৰাৰ ৰাইজে ৷ উল্লেখ্য যে, এম জি এন ৰেগা আঁচনিৰ অধীনত বৰদিয়া নয়াপাৰাৰ পৰা আৰিকাটি সংযোগী পথৰ আধাৰশিলা স্থাপন কৰিছিল স্থানীয় পঞ্চায়ত প্ৰতিনিধিয়ে ৷ কিন্তু আধাৰশিলা স্থাপনৰ এবছৰ পাৰ হোৱাৰ পিছতো আজিলৈকে এপাচি মাটি নপৰিল বৰদিয়ানয়াপাৰাৰ মূল পথটোত ৷ দুৰ্ভাগ্যজনক কথা হ’ল যে বিধায়িকা নন্দিতা দাস আৰু মাহতলী গাঁও পঞ্চায়তৰ প্ৰতিনিধিসকলে স্থাপন কৰা আধাৰশিলা ভাঙি চুৰমাৰ হৈছে যদিও আৰাম্ভ হোৱা নাই বৰদিয়া নয়াপাৰা আৰিকাটি সংযোগী পথৰ কাম ৷ স্থানীয় ৰাইজৰ অভিযোগ বিধায়িকা নন্দিতা দাসৰ লগত কমিচনৰ অংক নিমিলাৰ কাৰণেই আজিলৈকে আৰম্ভ নহ’ল পথটোৰ কামৰ শুভাৰম্ভ৷ প্ৰত্যেকটো কামতে বিধায়িকা নন্দিতা দাসক লাগে কমিচন ৷ কমিচন নিদিলেই অংক হৈ পৰে জংকপংক ৷ যাৰ পৰিপ্ৰেক্ষিতত আজিলৈক বন্ধ হৈ আছে ৰাস্তা নিৰ্মাণৰ কাম ৷ বিধায়িকা নন্দিতা দাসে চিন্তা নকৰে ৰাইজৰ দুখ দুৰ্গতিৰ কৰা কথা৷ বৰদিয়া নয়াপাৰা অঞ্চলৰ ৰাইজে অতি দুখ কষ্টৰ মাজেৰে বিপদসংকুল যাতায়ত অব্যাহত ৰাখিছে ৷ ৰাস্তা নিৰ্মাণ নকৰাত অঞ্চলটোৰ ৰাইজে টুলুঙা নাৱৰে যাতায়ত কৰিবলগীয়া হৈছে৷ বঞ্চিত হৈ আহিছে এম্বুলেঞ্চ সেৱাৰ পৰাও৷ ৰোগীসকলক চিকিৎসালয়ত লৈ যাবলৈ হ’লে সাঙি বান্ধি লৈ যাব লগা হয় ৷ আনকি স্কুল-কলেজীয়া ছাত্ৰ-ছাত্ৰীসকলে যাতায়তৰ ক্ষেত্ৰত যমৰ-যাতনা ভুগিবলগীয়া হৈছে ৷ আধুনিক যুগতো সকলো সা-সুবিদাৰ পৰা বঞ্চিত বৰদিয়া নয়াপাৰা, আৰিকাটি, পল্লীমংগল আদি অঞ্চলৰ ৰাইজে৷ যাৰ পৰিপ্ৰেক্ষিতত আজি বৰদিয়া নয়াপাৰা অঞ্চলৰ ৰাইজে বকোৰ বিধায়িকা নন্দিতা দাসৰ প্ৰতিমুৰ্তি দাহ কৰি পথ নিৰ্মাণৰ দাবীত প্ৰতিবাদ সাব্যস্ত কৰে৷ নিৰ্বাচনৰ পূৰ্বে যদি উক্ত পথটোৰ কাম সম্পূৰ্ণ নকৰে তেন্তে অহা বিধানসভা নিৰ্বাচনত ভোট বৰ্জনৰ হুংকাৰ প্ৰদান কৰাৰ লগতে উক্ত অঞ্চলত নেতা পালিনেতাৰ প্ৰৱেশ নিষিদ্ধ কৰিব বুলি ভাবুকি প্ৰদান কৰে ৰাইজে ৷

টংলা : আজি ওদালগুৰি জিলাৰ পানেৰীত ওদালগুৰি জিলা আক্ৰাছু পশ্চিমে বিধানসভাৰ মজিয়াত বৃহস্পতিবাৰে গৃহীত হোৱা কমতাপুৰ অটোনমাস কাউঞ্চিল কে এ চিৰ বিৰোধিতাৰে অসমৰ বিজেপি চৰকাৰে স্বায়ত্বশাসিত পৰিষদ গঠনৰ নামত কোচ জনগোষ্ঠীক বিভাজন কৰাৰ প্ৰতিবাদত আৰু ঐতিহাসিক পৃথক কমতাপুৰ ৰাজ্য পুনৰ গঠন আৰু জনজাতিকৰণৰ নামত বিশ্বাসঘাতকতাৰ বাবে তীব্র প্ৰতিবাদ সাব্যস্ত কৰে ওদালগুৰি জিলা আক্ৰাছু পশ্চিমে। ওদালগুৰি জিলা আক্ৰাছুৰ সভাপতি হেমন্ত বড়া কোচ আৰু ভাৰপ্ৰাপ্ত সম্পাদক মুকুন্দ ডেকাৰ উপস্থিতিত হোৱা প্ৰতিবাদী কাৰ্য্যসূচীত আক্ৰাছুৰ সদস্য সকলৰ লগতে প্ৰতিবাদত অংশগ্রহণকাৰী সকলে অসম চৰকাৰ হায় হায়, বিজেপি গ বেক, সৰ্বানন্দ সোণোৱাল মুৰ্দাবাদ, হিমন্ত বিশ্ব গ বেক, ন কমতাপুৰ ন ৰেষ্ট, আমাক এছ টি লাগিবই, আদি স্লোগানেৰে কপাই তোলে পানেৰীৰ আকাশ বতাহ। প্ৰতিবাদী কাৰ্য্যসূচীত সংবাদমাধ্যমৰ আগত ওদালগুৰি জিলা আক্ৰাছু পশ্চিমৰ সভাপতি হেমন্ত বড়া কোচে কয় যে, অসম চৰকাৰৰ বিধানসভাৰ মজিয়াত যোৱা বৃহস্পতিবাৰে যি কে এ চি বিধেয়ক গৃহীত হৈছে সেইটো আমি তীব্র বিৰোধিতা কৰিছোঁ, কাৰণ তিনিখন জিলা লৈ তেওলোকে কোচ ৰাজবংশীকলৈ বিভাজন আৰু বিশ্বাসঘাটক কৰিছে সেইটো আমি কেতিয়াও মানি নলওঁ। সমগ্র অসমৰ শদিয়াৰ পৰা ধুবুৰীলৈকে যি কোচ ৰাজবংশীৰাজবংশী জনগোষ্ঠীৰ জনজাতিকৰণ, লগতে কমতাপুৰ ৰাজ্য পুনৰ গঠনৰ কাৰণে আমি আন্দোলন কৰিছিলো। আমি দিল্লীত ত্ৰিপাক্ষিক বৈঠক কৰিছোঁ। যোৱা সপ্তাহত অসম চৰকাৰৰ লগত আমাৰ বৈঠক হৈছিল কিন্তু তেওঁলোকে ৰাতিটোৰ ভিতৰতে আমাকে বিভাজন কৰি বিশ্বাসঘাতকতা কৰি কোচ ৰাজবংশী জনগোষ্ঠীক থান বান কৰিবৰ কাৰনে কে এ চি গঠন কৰিছে। আমি ইয়াক মানি নলওঁ এয়া আমাৰ স্পষ্ট কথা।