দৈনন্দিন বাৰ্তা ডেস্ক : যোৱা কিছুদিন দেশত ক’ৰোনাত আক্ৰান্তৰ সংখ্যা দিনে ৭০ হাজাৰৰ ওচৰত আছিল ৷ দেওবাৰে সেই সংখ্যা কমিল ৷ তথাপি সেই সংখ্যাটো স্বস্তিৰ নহয় ৷ যোৱা ২৪ ঘণ্টাত দেশত ক’ৰোনাত আক্ৰান্ত হৈছে প্ৰায় ৬১ হাজাৰ মানুহ ৷ ফলত সমগ্ৰ দেশত ক’ৰোনাত আক্ৰান্তৰ সংখ্যা ৩১ লাখ পালেগৈ ৷ ইয়াৰ বিপ ক’ৰোনাক জয় কৰা লোকৰ সংখ্যাও বৃদ্ধি পাইছে ৷ ইতিমধ্যে দেশত ২৩ লাখৰো অধিক লোক ক’ৰোনাৰ কবলৰ পৰা সুস্থ হৈ ঘৰলৈ গৈছে ৷ সোমবাৰে স্বাস্থ্য আৰু পৰিয়াল কল্যাণ মন্ত্ৰালয়ে দিয়া পৰিসংখ্যা মতে যোৱা ২৪ ঘণ্টাত দেশত ৬১,৪০৮ জন লোক ক’ৰোনাত আক্ৰান্ত হয় ৷ যিটো যোৱা কেইটামান দিনতকৈ ৮ হাজাৰ কম ৷ ইয়াৰ মাজত ২৩,৩৮,০৩৬ জন লোক সুস্থ হৈ ঘৰলৈ গৈছে ৷ যোৱা ২৪ ঘণ্টাত সুস্থ হৈছে ৫৭,৪৬৮ জন লোক ৷ দেশত এতিয়াও প্ৰায় ৭ লাখ ১১ হাজাৰ জন ক’ৰোনা ৰোগী চিকিৎসাধীন ৷ সংক্ৰমণৰ তালিকাত তৃতীয় স্থানত থাকিলেও প্ৰথম আৰু দ্বিতীয় স্থানত থকা আমেৰিকা আৰু ব্ৰাজিলতকৈ ভাৰতৰ দৈনিক সংক্ৰমণ বৃদ্ধিৰ গতি বহু বেছি ৷ ইপিনে মৃত্যুৰ হাৰ আন দেশৰ তুলনাত ভাৰতত কম ৷ স্বাস্থ্য আৰু পৰিয়াল কল্যাণ মন্ত্ৰালয়ৰ মতে যোৱা ২৪ ঘণ্টাত দেশত মৃত্যু হৈছে ৮৩৬ জন লোক ৷ ফলত দেশত মৃত্যুৰ মুঠ সংখ্যা হ’ল ৫৭,৫৪২ জন ৷ এই মুহূৰ্তত দেশত সুস্থতাৰ হাৰ প্ৰায় ৭৫ শতাংশ ৷

অনলাইন বাৰ্তা : দলৰ সভাপতি পদত পুনৰ দায়িত্ব ল’বলৈ অনীহা ৰাহুল গান্ধীৰ ৷ গান্ধী পৰিয়ালৰ বাহিৰৰ কাৰোবাক দলৰ দায়িত্ব দিবলৈ কৈছে প্ৰিয়ংকা গান্ধীয়ে ৷ এনে পৰিস্থিতিত ড° মনমোহন সিং বা এ কে এণ্টনীৰ দৰে অভিজ্ঞ নেতাৰ হাতত দলৰ দায়িত্ব দিব পৰা যাব নে তাকে লৈ সোমবাৰে আলোচনা হ’ব কংগ্ৰেছত ৷ সুনেতৃত্বৰ অভাৱ আৰু দলৰ সাংগঠনিক সমস্যাবোৰ তুলি ধৰি ইতিমধ্যে ছোনীয়া গান্ধীলৈ চিঠি দিছে ২৩ জন শীৰ্ষস্থানীয় প্ৰৱীণ আৰু নৱীন কংগ্ৰেছ নেতাই ৷ এই চিঠিত বৈঠকত আলোচনাৰ মূল বিষয়বস্তু বুলি জানিব পৰা গৈছে ৷ উল্লেখ্য যে যোৱা বছৰ লোকসভা নিৰ্বাচনত পৰাজয়ৰ দায়িত্ব কান্ধ পাতি লৈ কংগ্ৰেছৰ সভাপতি পদ ত্যাগ কৰিছিল ৰাহুল গান্ধীয়ে ৷ তাৰ পাচত দলৰ অন্তবৰ্তিকালীন সভাপতিৰ দায়িত্ব গ্ৰহণ কৰে ছোনীয়া গান্ধীয়ে ৷ তেতিয়া সিদ্ধান্ত লোৱা হৈছিল যে নতুন সভাপতি নিৰ্বাচিত নোহোৱা পৰ্যন্ত দলৰ দায়িত্ব চম্ভালিব ছোনীয়া গান্ধীয়ে ৷ কিন্তু অন্তর্বর্তিকালীন সভাপতি হিচাপে ছোনীয়া গান্ধীৰ ম্যাদ শেষ হৈ গ’লেও এই পৰ্যন্ত সভাপতি নিৰ্বাচন কৰিব পৰা নাই কংগ্ৰেছে ৷ তাকে লৈ যোৱা কেইবাটাও মাহ দলৰ মাজত অসন্তুষ্টি বৃদ্ধি পাইছিল ৷ অৱশ্যে ইয়াক লৈ একাধিক নেতাই মত প্ৰকাশ কৰা নাছিল ৷ তাৰ মাজতে কপিল ছিব্বাল, শশী তাৰুৰ, গুলাম নবী আজাদ, পৃথ্বীৰাজ চৌহান, বিবেক তনখা, আনন্দ শৰ্মা, মণীশ তিৱাৰী, ৰাজ বব্বৰ, অৰবিন্দ্ৰ সিং, লাভলী সন্দীপ দীক্ষিতসহ দলৰ শীৰ্ষ ২৩ জন কংগ্ৰেছ নেতাই ছোনীয়া গান্ধীলৈ চিঠি প্ৰেৰণ কৰে ৷ তাত কোৱা হয় যে সকলোৰে সৈতে কান্ধত কান্ধ মিলাই কাম কৰিব, বিপদে আপদে সকলোৰে কাষত থাকিব আৰু ২৪ ঘণ্টা দলৰ প্ৰধান হিচাপে যাকে দিয়া যাব তেওঁক পূৰ্ণ পৰ্যায়ৰ সভাপতি নিৰ্বাচিত কৰা হওক ৷ কেৱল সেয়াই নহয়, ব্লক পৰ্যায়ত দলৰ হৈ সিদ্ধান্ত গ্ৰহণত যাৰ গুৰুত্বপূৰ্ণ ভূমিকা, কংগ্ৰেছ ৱৰ্কিং কমিটিকে নিৰ্বাচনৰ জৰিয়তে দায়িত্ব দিবলৈ প্ৰস্তাৱ দিছে এই কংগ্ৰেছৰ নেতাসকলে ৷ ইয়াৰ লগতে কোৱা হৈছে, দলৰ ওপৰত থকা বিশ্বাস হেৰাইছে যুৱ সম্প্ৰদায়ৰ৷ সুনেতৃত্বৰ অভাৱত তেওঁলোকে দলত সঠিক দিশ দেখা পোৱা নাই ৷ বিজেপি আৰু নৰেন্দ্ৰ মোডীৰ উত্থানত কংগ্ৰেছক লৈ মানুহৰ মনত বিৰূপ ধাৰণা সৃষ্টি হৈছে ৷ সততাৰে এই বিষয়বোৰ পৰ্যালোচনা কৰা উচিত৷ ইপিনে সভাপতি পদ ল’বলৈ ইচ্ছা নাই ৰাহুল গান্ধীৰ ৷ তেওঁক ঘুৰাই অনা উচিত নে কি তাকে লৈ দলত দ্বিমত সৃষ্টি হৈছে ৷ দলৰ একাংশই পুনৰ ছোনীয়া গান্ধীকে দায়িত্বত ৰখাত পক্ষপাতি৷ কিন্তু অহা দুবছৰত পশ্চিম বংগসহ একাধিক ৰাজ্যত বিধান সভা নিৰ্বাচন হ’ব ৷ ছোনীয়া গান্ধীয়ে সেই দায়িত্ব ল’ব পাৰিব নে নাই তাক লৈ বহু সন্দিহান৷ সেয়ে গান্ধী পৰিয়ালৰ বাহিৰৰ নেতাক চিন্তা কৰা প্ৰয়োজন বুলি তেওঁলোকে মত প্ৰকাশ কৰে ৷ দুসপ্তাহৰ আগতে কংগ্ৰেছ নেতিসকলে ছোনীয়া গান্ধীক এই চিঠি দিছিল বুলি জানিব পৰা যায় ৷ সেই সময়ত বিষয়টো আনিছিল বহিষ্কৃত কংগ্ৰেছ নেতা সঞ্জয় ঝাই৷ প্ৰায় ১০০ নেতাই মিলি ছোনীয়া গান্ধীক চিঠি দি দাবী কৰিছিল ৷ ৰাজস্থানত শচীন পাইলটে বিদ্ৰোহ ঘোষণা কৰাৰ পাচত দলৰ ভিতৰ চৰাক লৈ সৰৱ হৈছিল সঞ্জয় ঝা ৷

অনলাইন বাৰ্তা : বিহাৰৰ নিৰ্বাচনত দলৰ প্ৰচাৰৰ সন্দৰ্ভত বিজেপিৰ সৰ্বভাৰতীয় সভাপতি জে পি নাড্ডাই জনালে যে মুখ্যমন্ত্ৰী তথা জোঁটৰ সংগী জেডিইউৰ নেতা নীতিশ কুমাৰৰ নেতৃত্বত এনডিএ শিবিৰে ক্ষমতা ঘুৰাই আনিবলৈ যুঁজ কৰিব ৷ ইয়াৰ লগতে এনডিএৰ সহযোগী দলৰ মাজত অশান্তি লৈ বিহাৰৰ ৰাজনীতিত চিন্তা আৰম্ভ হৈছে ৷ তাতো পানী ঢলাৰ চেষ্টা কৰিলে বিজেপিৰ সৰ্বভাৰতীয় সভাপতিয়ে৷ সভাপতিজনে ঘোষণা কৰে যে আসন্ন নিৰ্বাচনত এনডিএৰ তিনি মিত্ৰ বিজেপি, সংযুক্ত জনতা দল (জেডিইউ) আৰু লোকজন শক্তি পাৰ্টি (এলজেপি) একজোঁট হৈ নিৰ্বাচনত যুঁজ কৰিব ৷ ৰাজনৈতিক বিশেষজ্ঞসকলৰ মতে বিহাৰত এইবাৰ নিৰ্বাচনৰ বাবে কাগজে কলমে বিৰোধীতকৈ কিছু আগুৱাই আহি এনডিএ শিবিৰে যুঁজ আৰম্ভ কৰিছে ৷ লালুপ্ৰসাদ যাদৱ কাৰাগাৰত থকাত বহু দুৰ্বল বিৰোধী শিবিৰ ৷ সিয়ে এনডিএৰ সমস্যা বিৰোধী নহয় ৷ বৰং মিত্ৰসকলৰ মাজৰ কন্দলে চিন্তাত ৰাখিছে নীতিশ কুমাৰক ৷ বিজেপিৰ সংগী লোক জনশক্তি পাৰ্টিয়ে নিয়মিত আক্ৰমণ কৰিছে নীতিশ কুমাৰক ৷ নিৰ্বাচনৰ দিন যিমানে আগুৱাই আহিছে আক্ৰমণ সিমানে বাঢ়ি গৈছে ৷ কেন্দ্ৰীয় মন্ত্ৰী ৰামবিলাস পাচোৱানৰ পুত্ৰ চিৰাগ পাচোৱান এতিয়া জনশক্তি পাৰ্টিৰ সভাপতি ৷ তেওঁ ইতিমধ্যে কেইবাবাৰো নীতিশ কুমাৰৰ সংগ এৰি দিয়াৰ হুংকাৰ দিছে ৷ ইয়াকে লৈ বিজেপিৰ দুই মিত্ৰৰ মাজত টনাআঁজোৰা হৈছে ৷ জেডিইউ-এলজেপিৰ মাজত বিচ্ছেদৰ কথা চলিছে ৷ এই বিষয়টোত সম্পূৰ্ণ গুৰুত্বহীন কৰিছে নাড্ডাই ৷ দেওবাৰে বিজেপিৰ বিহাৰৰ কৰ্ম নিদ্ধাৰণ সমিতিৰ ভাৰ্চুৱেল সভাত দলৰ সৰ্বভাৰতীয় সভাপতিয়ে কয়, বিহাৰৰ জনগণ বিজেপি আৰু এনডিএৰ লগত নিজৰ ভাগ্যৰ বলত আছে ৷ বিহাৰৰ সকলো শ্ৰেণীৰ, সকলো বয়সৰ মানুহৰ কাষলৈ আমি যাম ৷ কেন্দ্ৰ আৰু ৰাজ্য চৰকাৰৰ সকলো কামৰ খতিয়ান মানুহৰ কাষত তুলি ধৰিম ৷

অনলাইন বাৰ্তা : দিল্লীত শুকুৰবাৰে গ্ৰেপ্তাৰ কৰা সন্দেহজনক আইএছআইএছ সন্ত্ৰাসবাদীৰ পত্নীয়ে কয় যে তেওঁৰ স্বামীয়ে গানপাউদাৰ আৰু আন বিস্ফোৰক সামগ্ৰী তেওঁলোকৰ উত্তৰ প্ৰদেশৰ বলৰামপুৰৰ ঘৰত জমা কৰিছিল ৷ তেওঁ কয়, তেওঁ মহম্মদ মুস্তাকিম খান ওৰফে আবু ইউছুফক ইয়াৰ বিৰুদ্ধে সতৰ্ক কৰি দিছিল ৷ কিন্তু তেওঁৰ স্বামীয়ে বন্ধ নকৰে বুলি কৈছিল, এনেদৰে তেওঁ সাংবাদিকক কয় ৷ মহিলাগৰাকীয়ে কয় যে তেওঁ স্বামীক কামনা কৰিছিল, যি আৰক্ষীৰ মতে আফগানিস্থানৰ হেণ্ডেলাৰৰ নিৰ্দেশত দিল্লীৰ জনাকীৰ্ণ অঞ্চলত সন্ত্ৰাসবাদী আক্ৰমণ কৰাৰ পৰিকল্পনা কৰিছিল, তেওঁক যেন ক্ষমা কৰি দিয়ে৷ মোৰ চাৰিটা সন্তান আছে ৷ মই ক’ত যাম, এনেদৰে তেওঁ কয় ৷ ৩৬ বছৰীয়া খানৰ পিতৃ কাফিল আহমেদে কয় যে তেওঁৰ পুত্ৰ অতি ভাল মানুহ আছিল, যি কেতিয়াও কাৰো সৈতে যুঁজ নকৰে আৰু কেতিয়াও কল্পনা নকৰে যে তেওঁ সন্ত্ৰাসবাদত নামিব ৷ তেওঁৰ পুত্ৰ সন্ত্ৰাসৰ চক্ৰান্ত সম্পৰ্কে জানেনে কিবা বুলি প্ৰশ্ন কৰাত আহমেদে কয়, মই বিস্ফোৰক উপাদান সম্পৰ্কে একো শুনা না ই৷ তেওঁ যদি বিস্ফোৰক পদাৰ্থ সংগ্ৰহ কৰিছে সেই সম্পৰ্কত মোৰ কোনো ধাৰণা থাকিলে মই আবু ইউছুফক মোৰ ঘৰত থাকিবলৈ নিদিও ৷ তেওঁ কয়, সন্ধিয়া আৰক্ষী আহি এই সামগ্ৰী পোৱাত মই বুজিব পাৰিলো এইটো কি ৷

দৈনন্দিন বাৰ্তা ডেস্ক : অসমৰ ভ্ৰাম্যমাণ থিয়েটাৰ জগতৰ অন্যতম জনপ্ৰিয় অভিনেতা জীৱেশ্বৰ ডেকা আৰু নাই । দেওবাৰে নিশা ১১ বাজি ৪০ মিনিটত ইহলীলা সম্বৰণ কৰিলে একালৰ দুৰন্ত তাৰকা জীৱেশ্বৰ ডেকাই। শনিবাৰে নিশা নলবাৰী জিলাৰ বেলশৰৰ ডেকাপাৰাত থকা নিজ বাসগৃহত শিল্পীগৰাকী হৃদৰোগত আক্ৰান্ত হৈ অসুস্থ হৈ পৰাত ততাতৈয়াকৈ তেওঁক নলবাৰীৰ ‘সাৰথি হাস্পতাল’ত ভৰ্ত্তি কৰোৱা হয়। স্বাস্থ্যৰ অধিক অৱনতি ঘটাত চিকিৎসকে তেওঁক গুৱাহাটী চিকিৎসা মহাবিদ্যালয় হাস্পতাললৈ উন্নত চিকিৎসাৰ বাবে লৈ অহাৰ পৰামৰ্শ দিয়ে। নিশাৰ ভাগত শিল্পীগৰাকীক পৰিয়ালবৰ্গই গুৱাহাটী চিকিৎসা মহাবিদ্যালয় হাস্পতাললৈ লৈ আনি আইচিইউত  ভৰ্তি কৰোৱায়। কিন্তু আইচিইউতে অভিনেতাজনে শেষ নিশ্বাস ত্যাগ কৰে। দেহাৱসানৰ সময়ত তেখেতৰৰ বয়স হৈছিল ৭৫ বছৰ । অসমৰ ভালেসংখ্যক ভ্ৰাম্যমাণ নাট্যদলত অভিনয় কৰিছিল ডেকাই। থিয়েটাৰ ভাগ্যদেৱী, মকুন্দ থিয়েটাৰ, ৰূপৰাজ থিয়েটাৰ, আৱাহন থিয়েটাৰ, মনালিছা থিয়েটাৰ, জ্যোতিৰূপা থিয়েটাৰ, শ্ৰীগুৰু থিয়েটাৰ আদিত অভিনয় কৰি এক সুকীয়া স্থান দখল কৰিছিল জীৱেশ্বৰ ডেকাই। জীৱেশ্বৰ ডেকাৰ দ্বাৰা অভিনীত বহু উল্লেখযোগ্য নাটকৰ ভিতৰত এখন যথেষ্ট জনপ্ৰিয় নাটক আছিল থিয়েটাৰ ভাগ্যদেৱীৰ উগ্ৰ মেনা ৰচিত ‘মিলন মালা’ নাটকখন। এই নাটখনৰ জৰিয়তে অপাৰ জনপ্ৰিয়তা লাভ কৰিছিল শিল্পীগৰাকীয়ে । কেৱল ইমানেই নহয়, মহেন্দ্ৰ বৰঠাকুৰ ৰচিত দধিচী নাটখনেৰে দৰ্শকৰ হৃদয়ত সুকীয়া স্থান দখল কৰি ডেকাই লাভ কৰে ‘নটসূৰ্য ফনী শৰ্মা বঁটা’। মুনলাইট মিডিয়া বঁটা, এনাজৰী এৱাৰ্ড আদিৰে বিভূষিত জীৱেশ্বৰ ডেকাই ভবেন্দ্ৰনাথ শইকীয়া ৰচিত নাটক দীনবন্ধুৰ নাম ভুমিকাত কালজয়ী অভিনয় কৰি থৈ গৈছে। তেখেতৰ বিয়োগ ভ্ৰাম্যমাণ নাট্যজগতৰ বাবে এক অপূৰণীয় ক্ষতি ।