দৈনন্দিন বাৰ্তা ডিজিটেল ডেস্কঃ প্ৰতিৰক্ষা মন্ত্ৰী ৰাজনাথ সিঙে দেওবাৰে আত্মনিৰ্ভৰশীল ভাৰত গঢ়িবৰ বাবে এক বৃহৎ পদক্ষেপ হাতত লয়। ভাৰতৰ প্ৰতিৰক্ষা মন্ত্ৰীগৰাকীয়ে কয় যে, বিদেশত নিৰ্মাণ হোৱা ১০১ বিধ অস্ত্ৰ-শস্ত্ৰৰ ওপৰত অচিৰেই প্ৰতিবন্ধকতা লগোৱা হ’ব৷ এতিয়াৰে পৰা এইসমূহ অস্ত্ৰ শস্ত্ৰ ভাৰততে নিৰ্মাণ কৰা হ’ব। ভাৰতৰ প্ৰধানমন্ত্ৰী নৰেন্দ্ৰ মোডীয়ে আত্মনিৰ্ভৰশীল ভাৰতৰ কাৰণে পাঁচটা স্তম্ভৰ কথা সদৰী কৰিছিল। ইয়াৰ ভিতৰত আছিল ইক’ন’মি, ইনফ্ৰাচষ্ট্ৰাকছাৰ, চিষ্টেম, ডেম’গ্ৰাফী, ডিমাণ্ড আৰু ছ’চিয়েল পেকেজ। প্ৰধানমন্ত্ৰী মোডীৰ আত্মনিৰ্ভৰশীল ভাৰত নিৰ্মাণ কৰাত সহায় কৰিব এই সিদ্ধান্তই। ইয়াৰ জৰিয়তে আমাৰ সাংগঠনিক কামসমূহো উন্নত হ’ব৷ আনহাতে ভাৰত আৰু চীনৰ মাজত শনিবাৰে এখন উচ্চ স্তৰীয় বৈঠক অনুষ্ঠিত হয়। প্ৰায় ৪.৩০ ঘন্টা হোৱা বৈঠকখনত ভাৰত চীন সীমান্তৰ এল এ চিত সেনা পিছুৱাক লৈ অনুষ্ঠিত হোৱা বুলি অনুমান কৰা হৈছে।
বাতৰি যোগুতালেঃ জ্যোতিস্মান শৰ্মা
১০১ বিধ সামগ্ৰীৰ আমদানি নিষেধ ভাৰতৰ, আত্মনিৰ্ভৰশীল ভাৰতৰ সন্দৰ্ভত প্ৰতিৰক্ষা মন্ত্ৰী ৰাজনাথ সিঙৰ এক বিশেষ পদক্ষেপ
বিধায়ক শিলাদিত্যক সকীয়নি গৰীয়া মৰিয়া দেশী জাতীয় পৰিষদৰ
নাজিৰা : গৰীয়া মৰিয়া দেশী জাতীয় পৰিষদৰ দ্বাৰা প্ৰেৰিত এক প্ৰেছ বিজ্ঞপ্তিত সংগঠনটোৰ বিষয়ববীয়াসকলে শোণিতপুৰৰ ঠেলামৰা কাণ্ডক সাঙুৰি অসম সাহিত্য সভাৰ প্ৰাক্তন সভপতি, পদ্মশ্ৰী, পদ্মভুষন বৰেণ্য সাহিত্যিক চৈয়দ আব্দুল মালিকক বৌদ্ধিক জেহাদী বুলি কোৱা বিদেশীমূলৰ বিধায়ক শিলাদিত্যক সকীয়নি দি কয় যে ইতিহাসৰ জ্ঞান নথকা বাংলাদেশৰ পৰা প্ৰব্ৰজিত শীলাদিত্যই প্ৰথমে অসম আৰু অসমীয়া সাহিত্যৰ ওপৰত অধ্যয়ন কৰক। শোণিতপুৰৰ ঠেলামৰা কাণ্ডত বহিৰাগত-বিদেশীমূলৰ দুই ফৈদৰ মাজত হোৱা সংঘাতক সদৌ অসম গৰিয়া মৰিয়া দেশী জাতীয় পৰিষদৰ তৰফৰ পৰা গৰিহনা আৰু ধিক্কাৰ দি কয় যে মহামান্য উচ্চতম ন্যায়লয়ৰ ৰায়ক সন্মান প্ৰদৰ্শন কৰা সকলো ভাৰতীয় নাগৰিকৰ দায়িত্ব আৰু কৰ্তব্য। কিন্তু উচ্চতম ন্যায়ালয়ৰ ৰায়ক ভেঙুচালি কৰি এটা পক্ষই ৰাষ্ট্ৰদ্ৰোহী মন্তব্য কৰাৰ উপৰিও চৰকাৰী অনুমতি অবিহনে কৰ’ণা মহামাৰীৰ গণ সংক্ৰমণৰ দিনত সামজিক দূৰত্ব মানি চলাৰ আদেশক ভেঙুচালি কৰি সাম্প্ৰদায়িক সংঘৰ্ষত লিপ্ত হোৱা বহিৰাগত দুই ফৈদৰ অপৰাধী সকলক অতি সোনকালে গ্ৰেপ্তাৰ কৰিবলৈ চৰকাৰক সংগঠনটোৱে দাবী জনায়। দুৰ্ভাগ্যজনক ভাবে এই যে বহিৰাগত দুই ফৈদৰ হোৱা সাম্প্ৰদায়িক সংঘৰ্ষৰ আলমলৈ বিদেশীমূলৰ বিধায়ক শিলাদিত্য দেৱে অসম সাহিত্য সভাৰ প্ৰাক্তন সভপতি, পদ্মশ্ৰী, পদ্মভুষন, সাহিত্যচাৰ্য, বৰেণ্য সাহিত্যিক চৈয়দ আব্দুল মলিক মহাশয়ক বৌদ্ধিক জেহাদী বুলি খিলঞ্জীয়া অসমীয়া সমাজখনক, অসম সাহিত্য সভাক অপমান কৰা কাৰ্যক সংগঠনটোৱে তীব্ৰ নিন্দা কৰে। অসমৰ খিলঞ্জীয়া ইছলাম ধৰ্মীসকলৰ অন্যতম পুৰোধা ব্যক্তি, কবি, সাহিত্যিক গৰাকীৰ বিষয়ে বাংলাদেশৰ পৰা প্ৰবজন কৰা শিলাদিত্যৰ দৰে এজন সন্দেহজনক মানুহে এনেধৰণে মন্তব্য কৰাৰ অধিকাৰ তেওঁক কোনে দিলে? তেওঁৰ এনে ধৰণৰ কথা বতৰাৰ দ্বাৰা ঠেলামৰা কাণ্ডৰ দৰে ঘটনাত শিলাদিত্যৰ দৰে সাম্প্ৰদায়িক মনোভাৱৰ কুখ্যাত নেতাক ঘটনাৰ আঁৰৰ মূল ব্যক্তি হিচাবে আমি ভাৱিবলৈ বাধ্য হৈছো বুলি কৈ অসম চৰকাৰক এই বিতৰ্কিত সাম্প্ৰদায়িক মানুহজনক লেকাম লগাবলৈ দাবী জনায়, অন্যথা তেওঁ এনে ধৰণৰ কথা বতৰাৰ প্ৰমাণ হয় যে ঠেলামৰা কাণ্ড এক পৰিকল্পিত ঘটনা আৰু শিলাদিত্য দেৱৰ দৰে সাম্প্ৰদায়িক মনোভাৱৰ ৰাজনৈতিক নেতা এই ঘটনাৰ আঁৰৰ মুল ব্যক্তি বুলি ৰাইজে ভাৱিবলৈ বাধ্য হব। এই বিতৰ্কিত সাম্প্ৰদায়িক ব্যক্তিজনক এতিয়াই লেকাম নলগালে নিৰ্বাচনৰ বৈতৰণী পাৰ হ’বলৈ অসমত সাম্প্ৰদায়িক কথাৰে উত্তৰ ভাৰতৰ দৰে এক কুলষিত আৰু বিশৃংখল পৰিৱেশ সৃষ্টি কৰি ভাতৃঘাতী সংঘৰ্ষৰে অসম ৰক্তাক্ত কৰাৰ আশঙ্কা আছে৷ মুখ্যমন্ত্ৰী সৰ্বানন্দ সোণোৱালে তেওঁৰ দলৰেই বিদেশীমূলৰ বিধায়ক এজনকেই যদি লেকাম লগাব নোৱাৰে তেনেহ’লে খিলঞ্জীয়াৰ জাতি, মাটি আৰু ভেটি কেনেকৈ ৰক্ষা কৰিব এয়া এক ডাঙৰ প্ৰশ্ন বুলি কয় সংগঠনটোৱে।
ব্ৰাজিলত ক’ৰোনাত মৃতকক শ্ৰদ্ধা জনাই উৰুৱালে ১০০০ ৰঙা বেলুন : আমেৰিকাত ১,৬২,৮৩৬ লোক ক’ভিড-১৯ত মৃত্যু
দৈনন্দিন বাৰ্তা ডেস্ক : ব্ৰাজিলৰ ৰিয় ডি জেনেৰিয়ৰ ক’পাকাবানা উপকূলত শনিবাৰে ক’ভিড-১৯ত আক্ৰান্ত হোৱাসকলক সন্মান জনোৱাৰ অৰ্থে ৰঙা বেলুন এৰি দিয়ে৷ ব্ৰাজিলত শনিবাৰৰ নিশা পৰ্যন্ত এক লাখ লোক ক’ভিড-১৯ত আক্ৰান্ত হৈ মৃত্যু হৈছে৷ এয়া প্ৰথম ৰিপৰ্ট যে পাঁচ মাহৰ পাচতো এই ৰোগ নিৰ্মূল হোৱাৰ লক্ষণ দেখা নাই৷ উল্লেখ্য যে দেশখনত ২১০ মিলিয়ন লোক ক’ৰোনাত আক্ৰান্ত হৈছে আৰু যোৱা মে’ মাহৰ পৰা গড়ে প্ৰতিদিনে ১০০০ লোকৰ মৃত্যু হৈছে৷ আনহাতে যোৱা ২৪ ঘণ্টাত ৯০৫ জন লোকৰ মৃত্যু হয়৷ দেশখনৰ স্বাস্থ্য মন্ত্ৰালয়ে কয় যে নতুনকৈ ক’ৰোনা ভাইৰাছত ৩০১২৪১২ জন লোক আক্ৰান্ত হৈছে৷ দেশখনত মৃত্যু আৰু আক্ৰান্ত হোৱাৰ ক্ষেত্ৰত আমেৰিকাৰ পাচতে দ্বিতীয় স্থানত আছে৷ ইপিনে বিশেষজ্ঞসকলৰ মতে বহু দেশত মৃত আৰু আক্ৰান্তৰ সংখ্যা পৰ্যাপ্ত পৰীক্ষা নোহোৱাত জানিব পৰা নাই৷ ইপিনে ৰিয় ডি জেনেৰিয়ৰ ক’পাকাবানা উপকূলত বিক্ষোভৰ সময়ত এজন লোকে তেওঁৰ ২৫ বছৰীয়া পুত্ৰ ক’ৰোনাত আক্ৰান্ত হৈ মৃত্যু হোৱাৰ এখন ফটো প্ৰদৰ্শন কৰি এজন লোকৰ লগত তৰ্কত লিপ্ত হয়৷ যি মিছা বাতৰি বুলি কয়৷ ইপিনে সেই বিক্ষোভত মৃতসকলৰ প্ৰতি শ্ৰদ্ধা জনায় এহাজাৰ বেলুন এৰি দিয়া হয়৷ আনহাতে আমেৰিকাত এই পৰ্যন্ত ১,৬২,৮৩৬ লোক ক’ৰোনাত আক্ৰান্ত হৈ মৃত্যু হৈছে৷ ইনষ্টিটিউট ফৰ হেলথ মেট্ৰিক্স এণ্ড ইভালুৱেচনৰ মতে ডিচেম্বৰৰ ভিতৰত আমেৰিকাত ২,৯৫,০১১ লোক মৃত্যু হোৱাৰ আশংকা আছে৷ এই প্ৰতিষ্ঠানটোৱে জনোৱা মতে এই তথ্য যে সত্য প্ৰমাণ হ’ব তেনে নহয়৷ আমেৰিকাৰ ৯৫ শতাংশ লোকে যদি মাস্ক পৰিধান কৰে তেতিয়া মৃতৰ সংখ্যা কমি ২,২৮,২৭১ হ’বগৈ৷ অৰ্থাৎ ৬৬ হাজাৰ মানুহ ৰক্ষা পাব৷ আনহাতে দুই লাখ মানুহ মৃত্যু হোৱাৰ পাচত ইউৰোপত পৰিস্থিতি নিয়ন্ত্ৰণলৈ আহিছে৷ ইপিনে স্পেইনৰ দৰে সতৰ্কতা জাৰি কৰিছে অষ্ট্ৰিয়াই৷ অৱশ্যে স্পেইনৰ অৱস্থা ভাল নহয়৷ বেলজিয়ামক ৰেড জ’ন হিচাপে লৈছে ফিনলেণ্ড আৰু ব্ৰিটেইনে৷ বিশ্ব স্বাস্থ্য সংস্থাৰ মতে কম বয়সীয়া লোক একেবাৰেই বিপদমুক্ত নহয়৷ সকলোতকৈ বেছি আক্ৰান্ত হৈছে ২৫ বছৰৰ পৰা ৬৪ বছৰৰ ভিতৰৰ লোক৷ কিশোৰ-তৰুণৰ মাজত সংক্ৰমণৰ প্ৰৱনতা ছগুণ বেছি৷ শিশু আক্ৰান্ত হোৱাৰ ঘটনা সাতগুন বেছি ৷
অন্ধ্ৰপ্ৰদেশত ক’ভিড ৰোগীৰ চিকিৎসাত ব্যৱহৃত হোটেলত অগ্নিকাণ্ড : নিহত ১০
দৈনন্দিন বাৰ্তা ডেস্ক : ক’ভিড ৰোগীৰ চিকিৎসাৰ বাবে ব্যৱহৃত এখন হোটেলত বিধ্বংসী অগ্নিকাণ্ডৰ সৃষ্টি হয়৷ দেওবাৰে পুৱা প্ৰায় ৫ বজাত অন্ধ্ৰপ্ৰদেশৰ কৃষ্ণা জিলাৰ বিজয়ৱাড়াত এই ঘটনাটো সংঘটিত হয়৷ অগ্নিকাণ্ডত প্ৰথমে সাতজন লোকৰ মৃত্যু হয় বুলি খবৰ পোৱা গৈছিল৷ কিন্তু মৃতৰ সংখ্যা ১০ জনলৈ বৃদ্ধি পায়৷ দেওবাৰে দুপৰীয়া এই কথা জনালে বিজয়ৱাড়া-২ৰ ডিচিপি বিক্ৰান্ত পাটিলে৷ উল্লেখ্য যে এই কোৱাৰেণ্টাইন কেন্দ্ৰত ৫০ জন ৰোগী আছিল আৰু তেওঁলোকক চোৱাচিতা কৰিবলৈ ১০ জন পেৰা মেডিকেল কৰ্মী আছিল৷ বিজয়ৱাড়াৰ আৰক্ষী আয়ুক্ত শ্ৰীনিবাছালুৱে জনায় যে হোটেলৰ এটা তলাত প্ৰথমে জুই লাগে৷ এই জুই দ্ৰুতগতিত বিয়পি পৰে৷ ঘটনাৰ খবৰ পায় অগ্নিনিৰ্বাপক বাহিনীৰ গাড়ী আৰু কুইক ৰেছপন্স টিম উপস্থিত হয় আৰু ৩০ মিনিটৰ ভিতৰত জুই নিয়ন্ত্ৰণ কৰে৷ হোটেলখনত ফায়াৰ এক্সিট নথকাত দুজন ৰোগীয়ে ওপৰৰ পৰা জাপ মাৰে৷ তাৰে এজন গুৰুতৰভাৱে আহত হয়৷ বাকীসকলক সুৰক্ষাৰে বাহিৰলৈ অনা হয়৷ আৰক্ষী আয়ুক্তজনে কয় যে মুঠ ৩০ জন ৰোগীক উদ্ধাৰ কৰা হৈছে৷ আৰক্ষী আৰু অগ্নিনিৰ্বাপক বাহিনীৰ অনুমান যে ক’লা ধুৱাৰ বাবে শ্বাসকষ্টত ভূগে ক’ৰোনাত আক্ৰান্ত ৰোগী৷ ফলত অধিক আক্ৰান্ত হৈ পৰে৷ এই অগ্নিকাণ্ডৰ কাৰণ তদন্তৰ পাচত জানিব পৰা হ’ব৷ এই ঘটনাৰ খবৰ পায় অন্ধ্ৰপ্ৰদেশৰ মুখ্যমন্ত্ৰী ৱাই এছ জগনমোহন ৰেড্ডীয়ে গভীৰ শোক প্ৰকাশ কৰিছে৷
‘কা’ বাতিলৰ দাবীত টিংখাঙত যুৱ ছাত্ৰ পৰিষদৰ মানৱ শৃংখল কাৰ্যসূচী ৰূপায়ণ
টিংখাং : ডিব্ৰুগড় জিলাৰ টিংখাঙত ‘কা’ বাতিলৰ দাবীত অসম যুৱ ছাত্ৰ পৰিষদে স্থানীয় শতাধিক নেতা কৰ্মীয়ে কালি এক মানৱ শৃংখল কাৰ্যসূচী ৰূপায়ণ কৰে। পৰিষদৰ জিলা সমিতিৰ আহ্বানত ৰূপায়ণ কৰা কাৰ্যসূচীত টিংখাঙৰ লগতে ৰাজগড় আঞ্চলিক সমিতিৰ বিষয়ববীয়া তথা কৰ্মকৰ্তাই অংশগ্ৰহণ কৰে। কাৰ্যসূচীত অংশগ্ৰহণ কৰি প্ৰতিবাদকাৰীসকলে ‘কা’ বাতিল দাবী কৰাৰ লগতে কেন্দ্ৰীয় আৰু ৰাজ্য চৰকাৰখনৰ বিৰোধী শ্ল’গান দিয়া দেখা যায়। তদুপৰি প্ৰতিবাদকাৰীসকলে ‘কা’ আমি নামানো, বিধায়ক বিমল বড়া হুচিয়াৰ আদি শ্ল’গানেৰে টিংখাঙৰ তিনিআলি উত্তাল কৰে। কাৰ্যসূচীৰ অন্তত সংবাদ মাধ্যমৰ আগত যুৱ ছাত্ৰ পৰিষদৰ প্ৰতিবাদকাৰীসকলে ‘কা’ শীঘ্ৰে বাতিল কৰিবলৈ চৰকাৰক দাবী কৰিছে। অন্যথা সমগ্ৰ ৰাজ্যৰ লগতে টিংখাঙতো ‘কা’ বাতিলৰ দাবীত ব্যাপক আন্দোলনৰ হুংকাৰ প্ৰদান কৰিছে। কালিৰ কাৰ্যসূচীত যুৱ ছাত্ৰ পৰিষদৰ লগতে স্থানীয় বহুকেইটা জাতীয় সংগঠনৰ বিষয়ববীয়াই অংশগ্ৰহণ কৰে।
গেটছ ফাউণ্ডেচনৰ সাহায্যত ভাৰতসহ তৃতীয় বিশ্বৰ দেশবোৰৰ বাবে ১০ কোটি ক’ৰোনা টীকা
দৈনন্দিন বাৰ্তা ডেস্ক : ভাৰতসহ তৃতীয় বিশ্বৰ দেশবোৰৰ বাবে ১০ কোটি ক’ৰোনা টীকা প্ৰস্তুত কৰিব ছিৰাম ইনষ্টিটিউটে ৷ তাৰ বাবে ১৫ কোটি ডলাৰ সাহায্য দিব বিল আৰু মেলিণ্ডা গেটছ ফাউণ্ডেচনে ৷ শুকুৰবাৰে এই কথা ঘোষণা কৰিলে ছিৰাম ইনষ্টিটিউটে ৷ অক্সফৰ্ড আৰু এষ্ট্ৰাজেনেকাই প্ৰস্তুত কৰা ক’ৰোনা টীকা উৎপাদনৰ দায়িত্ব পাইছে এই ভাৰতীয় ঔষধ প্ৰস্তুত কৰা কোম্পানীটোৱে ৷ এই টীকা ভাৰতসহ ৯২খন দৰিদ্ৰ দেশৰ হাতত তুলি দিব ছিৰাম ইনষ্টিটিউটে৷ উল্লেখ্য যে এটা ড’জৰ দাম তিনি মাৰ্কিন ডলাৰ৷ ভাৰতীয় মুদ্ৰাত ২২৫ টকা ৷ টীকা প্ৰস্তুতৰ বাবে গেটছ ফাউণ্ডেচনে টকা তুলি দিব জিএভিআই সংগঠনৰ হাতত ৷ তেওঁলোকে দিব ছিৰাম ইনষ্টিটিউটক ৷ উল্লেখ্য যে জিএভিআই হ’ল এটা আন্তৰ্জাতিক সংগঠন ৷
গুৱাহাটী চিকিৎসা মহাবিদ্যালয়ত বিজেপি সদস্যৰ প্লাজমা দান
দৈনন্দিন বাৰ্তা ডেস্ক : কৰোনা আক্ৰান্ত ব্যক্তি সুষ্ঠ হোৱাৰ পিছত নিজৰ ৰক্তদান অৰ্থাৎ প্লাজমা দানেৰে আন দুগৰাকী ব্যক্তিৰ জীৱন ৰক্ষা কৰিব পাৰি৷ ইয়াৰ বাবেই ৰাজ্যৰ স্বাস্থ্য মন্ত্ৰী ড° হিমন্ত বিশ্ব শৰ্মাই প্ৰতিজন কভিড আক্ৰান্ত ব্যক্তি সুষ্ঠ হোৱাৰ পিছত প্লাজমা দান কৰিবলৈ অনুৰোধ জনাই আহিছে৷ স্বাস্থ্য মন্ত্ৰীগৰাকীৰ প্ৰতি সহাৰি জনাই বিজেপি ৰাজ্যিক সমিতিয়ে সমগ্ৰ অসমৰ জিলা সমিতি সমূহক প্লাজমা দানৰ পদক্ষেপ ল’বলৈ আহ্বান জনায়৷ ইয়াৰে অংশ হিচাপে শুকুৰবাৰে বিজেপি গুৱাহাটী মহানগৰ জিলাৰ উদ্যোগত আৰু ৰাজধানী মণ্ডলৰ সহযোগত কভিড আক্ৰান্তৰ পৰা সুষ্ঠ হোৱা প্ৰায় ২২ গৰাকী বিজেপিৰ সদস্যই গুৱাহাটী চিকিৎসা মহাবিদ্যালয়ত প্লাজমা দান কৰে৷ প্লাজমা দান অনুষ্ঠানত চিকিৎসালয়খনৰ চিকিৎসক ডা: প্ৰাঞ্জল ভৰালী, ডা: হৃদয় দাস, ডা: ভাগ্যৱতী দেৱীয়ে বিশেষ সহযোগিতা আগবঢ়ায়৷ ইপিনে অনুষ্ঠানত প্ৰাক্তন মেয়ৰ তথা বিজেপি গুৱাহাটী মহানগৰ জিলাৰ সভাপতি মৃগেন শৰণীয়া উপস্থিত থাকি কয় যে কভিড আক্ৰান্ত সুষ্ঠ হোৱা ব্যক্তিসকলে প্লাজমা দানে অন্য দুজন ব্যক্তিৰ জীৱন ৰক্ষা কৰিব৷ সেইবাবেই সকলো কভিড সুষ্ঠ ব্যক্তি প্লাজমা দিয়া আৱস্যক৷ সেয়া ৰাজ্যিক সমিতিৰ আহ্বান মৰ্মে বিজেপি ২২গৰাকী সদস্যই প্লাজমা দান কৰে৷ অহা ১০ আগষ্টত গুৱাহাটী মহানগৰ জিলাৰ উদ্যোগত মণ্ডলসমূহৰ সহযোগত পুনৰ প্লাজমা দান কৰা হ’ব বুলি শৰণীয়াই উল্লেখ কৰে৷ তেওঁ লগতে যি সকল সদস্যই প্লাজমা দান কৰিলে তেওঁলোকক ধন্যবাদ জ্ঞাপন কৰাৰ লগতে ফুলাম গামোছাৰে শুভেচ্ছা জনায়৷
চৰায়ে মাৰিলে খুন্দা : ৰাঁচীত বিপদৰ পৰা ৰক্ষা এয়াৰ এছিয়া ইণ্ডিয়াৰ বিমান
দৈনন্দিন বাৰ্তা ডেস্ক : কেৰালাৰ কোজিকোড বিমানবন্দৰত এয়াৰ ইণ্ডিয়া এক্সপ্ৰেছ বিমান বিধ্বস্ত হোৱাৰ পাছ দিনা অৰ্থাৎ আন এক দুৰ্ঘটনাৰ পৰা ৰক্ষা পৰিল এয়াৰ এছিয়া ইণ্ডিয়াৰ বিমান ৷ এইখন বিমানত চৰায়ে আঘাত কৰাত শনিবাৰে পুৱাই যাত্ৰা বাতিল কৰে ৷ এয়াৰ লাইনটোৰ মুখপাত্ৰই কয়, মুম্বাই অভিমুখী বিমানখনে ৰাঁচীৰ বীৰচা মুন্দা বিমানবন্দৰৰ পৰা যাত্ৰা কৰিবলৈ লৈছিল ৷ এয়াৰ এছিয়া ইণ্ডিয়া বিমান ভিটি-এইচজিজি ৰাঁচীৰ পৰা মুম্বাইলৈ নিৰ্দ্ধাৰিত সময় ১১.৫০ বজাত যাত্ৰা কৰিছিল ৷ তেতিয়াই বিমানখনত চৰায়ে খুন্দা মাৰে বুলি এয়াৰ লাইনটোৰ মুখপাত্ৰই কয় ৷ তেতিয়া পাইলটে জৰুৰীকালীন ব্ৰেক মাৰে ৷ ফলত এক ভয়ানক বিপদৰ পৰা ৰক্ষা পৰে যাত্ৰীসকল ৷ বিমানখনত থকা ১৭৬ জন যাত্ৰী বিপদৰ পৰা ৰক্ষা পৰে ৷
কেৰালাৰ কোজিকোডৰ বিমান দুৰ্ঘটনা : ১০ হাজাৰ ঘণ্টা বিমান উৰুৱাৰ অভিজ্ঞতাৰে পুষ্ট নিহত পাইলট
দৈনন্দিন বাৰ্তা ডেস্ক : কেৰালাৰ কোজিকোডত শুকুৰবাৰে নিশা হোৱা বিমান দুৰ্ঘটনাত পাইলটসহ ১৮জন যাত্ৰীৰ মৃত্যু হয় ৷ এই দুৰ্ঘটনাত পাইলটৰ কোনো ভুল আছিল নেকি তাক লৈ প্ৰশ্ন উত্থাপন হৈছে ৷ ইপিনে শনিবাৰে কোজিকোড বিমানবন্দৰৰ দুৰ্ঘটনাস্থলী পৰিদৰ্শন কৰে কেন্দ্ৰীয় অসামৰিক বিমান পৰিবহণ মন্ত্ৰী হৰদীপ পুৰীয়ে ৷ মন্ত্ৰীজনে কয়, এই এয়াৰ ইণ্ডিয়া এক্সপ্ৰেছ বিমানৰ পাইলট আছিল কেপ্টেইন দীপক সাঠে ৷ তেওঁ অতি অভিজ্ঞ পাইলট আছিল ৷ ইয়াৰ আগেয়ে কমেও ২৭ বাৰ কোজিকোড বিমানবন্দৰৰ ৰানৱেত তেওঁ নামিছিল ৷ মন্ত্ৰীজনে লগতে কয় যে পাইলট কমাণ্ডাৰ কেপ্টেইন দীপক বসন্ত সাঠেৰ ১০ হাজাৰ ঘণ্টা বিমান উৰুৱাৰ অভিজ্ঞতা আছে ৷ তাৰ পাচতো এই দুর্ভাগ্যজনক দুর্ঘটনাটো সংঘটিত হয় ৷ শনিবাৰৰ এই দুৰ্ঘটনা স্থান পৰিদৰ্শন কৰে কেৰালাৰ মুখ্যমন্ত্ৰী পিনাৰাই বিজয়নে ৷ উল্লেখ্য যে এই দুৰ্ঘটনাত এটি ৪ বছৰীয়া শিশুসহ ১৮জন লোকৰ মৃত্যু হৈছে ৷ আনহাতে ১৪৯ জন যাত্ৰী আহত হৈছে ৷ আহতসকলক চিকিৎসালয়ত ভৰ্ত্তি কৰা হয় ৷
‘কা’ বাতিলৰ দাবীত ডিকমত মটক ছাত্ৰ সন্থাৰ প্ৰতিবাদ
দৈনন্দিন বাৰ্তা ডেস্ক : নাগৰিকত্ব সংশোধনী আইন বাতিল কৰা, পৰিৱেশ প্ৰভাৱ নিৰূপণ অধিসূচনা-২০২০ বাতিল কৰা, অখিল গগৈক মুক্তি দিয়াৰ দাবীত শুকুৰবাৰে কেন্দ্ৰীয় চৰকাৰৰ বিৰুদ্ধে ডিব্ৰুগড়ৰ ডিকমত প্ৰতিবাদ সাব্যস্ত কৰে উজনি অসমৰ মটক জনগোষ্ঠী অন্যতম জাতীয় সংগঠন সদৌ অসম মটক ছাত্ৰ সন্থাই৷ সদৌ অসম মটক ছাত্ৰ সন্থাৰ ডিব্ৰুগড় জিলা সমিতি আৰু ডিকম আঞ্চলিক সমিতিয়ে ডিব্ৰুগড়ৰ ডিকমৰ ৩৭নং ৰাষ্ট্ৰীয় ঘাইপথত প্ৰতিবাদ সাব্যস্ত কৰি নাগৰিকত্ব সংশোধনী আইন বাতিল কৰা, পৰিৱেশ প্ৰভাৱ নিৰূপণ অধিসূচনা-২০২০ বাতিল কৰাৰ লগতে কৃষক নেতা অখিল গগৈক বিনাচৰ্তে মুক্তিৰ দাবী জনায়৷ কেইবা শতাধিক নেতা-কৰ্মীয়ে হাতে হাতে প্লে কাৰ্ড লৈ মানৱ শৃংখল কাৰ্যসূচী ৰূপায়ন কৰি বৰতাল বজাই প্ৰতিবাদ জনায়৷ অসমৰ জৈৱ বৈচিত্ৰ ৰক্ষা কৰক, অখিল গগৈক বিনাচৰ্তে মুক্তি দিয়ক, কা-বাতিল কৰক, কা-আমি নামানো, EIA-২০২০ অধিসূচনা প্ৰত্যাহাৰ কৰক, ডিকম আঞ্চলিক মটক ছাত্ৰ সন্থা জিন্দাবাদ, বিজেপি চৰকাৰ হায়ঃ হায়ঃ, সৰ্বানন্দ সোণোৱাল মুৰ্দাবাদ, নৰেন্দ্ৰ মোদী মুৰ্দাবাদ আদি শ্ল’গান দি ডিকমৰ আকাশ বতাহ কঁপাই তোলে। কাৰ্যসূচীত সংগঠনটোৰ কেন্দ্ৰীয় মুখ্য উপদেষ্টা যুগল বৰুৱা, তিনিচুকীয়া জিলা সমিতিৰ সভাপতি সঞ্জয় হাজৰিকাৰ লগতে ডিব্ৰুগড় জিলা সমিতিৰ বিষয়-ববীয়া উপস্থিত থাকি বিজেপি নেতৃত্বাধীন কেন্দ্ৰীয় আৰু ৰাজ্যৰ চৰকাৰখনক তীব্ৰ সমালোচনা কৰা পৰিলক্ষিত হয়।