দৈনন্দিন বাৰ্তা, নলবাৰীঃ নলবাৰী জিলা সাহিত্য সভাৰ সভাপতি, বিশিষ্ট সাংবাদিক ৰোহিনী মেধি স্মৃতি সাংবাদিক সন্মিলন আৰু আলোচনা সত্ৰ আজি অনুষ্ঠিত কৰা হয়। নলবাৰী জিলা সাহিত্য সভাৰ কাৰ্যালয়ত “ভাষাৰ শুদ্ধ প্ৰয়োগত সংবাদ মাধ্যমৰ ভুমিকা” শীৰ্ষক আলোচনা সত্ৰ উদ্বোধন কৰে নলবাৰী মহাবিদ্যালয়ৰ অধ্যাপক দীপক কলিতাই। নলবাৰী জিলাৰ বিভিন্ন প্ৰান্তৰ সাংবাদিকে অংশ লোৱা আলোচনা সত্ৰৰ সঞ্চালনা কৰে নলবাৰী জিলা সাহিত্য সভাৰ সভাপতি ধ্ৰুৱজ্যোতি শৰ্মাই।

বাতৰি যোগুতালেঃ জ্যোতিস্মান শৰ্মা

গেলেকী : নাজিৰা মহকুমা অন্তৰ্গত গেলেকী সেউজ চাপৰিৰ ২নং অ’ এন জি চি তৈল খাদত ভয়ংকৰ বিস্ফুৰণ। ৩ অক্টোবৰৰ আবেলি সংঘটিত হৈছে গেছ পাইপ বিস্ফোৰণ তথা প্ৰচণ্ড জোকাৰণি। জিচিপি ও চিপিপি নামৰ নিগমৰ তৈল খাদটোৰ নিম্নগামী অথবা দুৰ্বল পাইপ লাইনৰ মেৰামতি অভাৱৰ বাবেই উক্ত বিস্ফোৰণ হৈ গেছ পৰিবাহী পাইপ ফাটি যোৱাৰ ফলত কম সময়ৰ ব্যৱধানত পাইপৰ পৰা নিৰ্গত হোৱা গেছে চাৰিও দিশে চানি ধৰে। এইবাৰ তিনিচুকীয়াৰ বাঘজান কাণ্ডৰ পুনৰাবৃত্তিৰ পৰা কথমপি ৰক্ষা পৰিল নাজিৰাৰ অসম-নাগালেণ্ড সীমান্তৱৰ্তী গেলেকীৰ বৃহত্তৰ অঞ্চল৷ সোমবাৰে ভয়ংকৰভাৱে গেছ নিৰ্গত হোৱাত এক হাহাকাৰময় পৰিস্থিতিৰ উদ্ভৱ হয় সেউজপুৰ অঞ্চলৰ স্থানীয় লোকৰ মাজত৷ আতংকিত ৰাইজে কিছু সময়ৰ বাবে নিজৰ বাসগৃহসমূহ এৰি ঢাপলি মেলে নিৰাপদ স্থানলৈ৷ পৰৱৰ্তী সময়ত অ’এনজিচি কৰ্তৃপক্ষৰ তৎপৰতাত পৰিস্থিতি নিয়ন্ত্ৰণ কৰা হয় যদিও বৰ্তমানেও শংকিত হৈ আছে স্থানীয় ৰাইজ৷

তিনিচুকীয়া : এ.আই.চি.চি.টি.ইউৰ অসম ৰাজ্যিক তথা অন্যতম সৰ্বভাৰতীয় সম্পাদক সুভাষ সেনে প্ৰেছ বিবৃতি যোগে বৃহত্তৰ বিজয়ৰ বাবে বৃহত্তৰ সংগ্ৰাম আৰু বৃহত্তৰ সংগ্ৰামৰ বাবে বৃহত্তৰ ঐক্য গঢ়ি তোলাৰ লক্ষ্যত মোদীৰ দেশ বিক্ৰীৰ অভিযানৰ নীতিৰ বিৰুদ্ধে শ্ৰমিকৰ দেশ বচাওঁক তথা “ভাৰতবৰ্ষক ৰক্ষা কৰা”ৰ নীতিৰ বহুল প্ৰচাৰৰ জৰিয়তে ট্ৰেড ইউনিয়ন যৌথ মঞ্চৰ আহ্বানত “ভাৰত ত্যাগ দিৱস”ত দেশ জোৰা ৯ আগষ্টৰ পৰিবৰ্তে অসমত (উক্ত দিনা দেওবাৰত লক ডাউন জাৰি থকাৰ বাবে) ১০ আগষ্টত জেল ভৰো বিক্ষোভ প্ৰদৰ্শন আদি কাৰ্যসূচী সফল কৰিবলৈ সংগঠিত, অসংগঠিত খণ্ডৰ শ্ৰমিক সহ ক্ষেত মজদুৰ, গ্ৰামীণ দৰিদ্ৰ, আঁচনিভুক্ত আশা, অঙ্গনৱাদী, মধ্যাহ্ন ভোজন কৰ্মীসহ সমূহ ৰাইজকো আহ্বান জনাইছে। বিবৃতিটোত উল্লেখ কৰা হৈছে যে উদ্যোগ ৰক্ষা কৰা, অসম ৰক্ষা কৰা আদিৰ পূৰ্ব চৰ্ত হৈছে মোদী শাসনৰ অৱসান ঘটোৱা, মোদীশাহীৰ ফান্দৰ পৰা ভাৰতবৰ্ষক মুক্ত কৰা। আৰু কোৱা হয় যে মোদীৰ “আত্মনিৰ্ভৰ ভাৰত” এক মস্ত আভুৱা, ভাৰতবৰ্ষক বিক্ৰী কৰাৰ এক ধ্বংসাত্মক শ্ল’গানহে। ১০ আগষ্টৰ জেল ভৰো আন্দোলনৰ দাবীসমূহ ক্ৰমে মজদুৰ, গ্ৰামীণ শ্ৰমিক আৰু অসমলৈ (নিজ ৰাজ্যলৈ) ঘূৰি অহা পৰিযায়ী শ্ৰমিক আদি অসংগঠিত খণ্ডৰ শ্ৰমিকক অহা ছমাহলৈকে প্ৰতি মাহত ১০,০০০ টকাকৈ লকডাউন ভাট্টা প্ৰদান কৰক। শ্ৰমিক ছাটাই, মজুৰি সংকোচন বা কৰ্তন, ডি.এ. বন্ধ কৰা আৰু সামাজিক নিৰাপত্তা দুৰ্বল বা হ্ৰাস কৰা বন্ধ কৰক। জাতীয় সম্পদ বিক্ৰী কৰা বন্ধ কৰক। ব্যক্তিগতকৰণ, নিগমীকৰণ আৰু নিৰ্বিনিয়োজন বন্ধ কৰক। কৃষক বিৰোধী, কৰ্পৰেটমুখী, বজাৰমুখী নীতি আৰু নতুন শিক্ষানীতি, পৰিবেশিক প্ৰভাৱ নিৰূপণ কৰা অধ্যাদেশসমূহ বাতিল কৰক! বিজেপি শাসিত ৰাজ্য আৰু আন আন ৰাজ্যত শ্ৰম আইন প্ৰত্যাহাৰৰ সিদ্ধান্ত বাতিল কৰক, শ্ৰমিকক ক্ৰীতদাসলৈ পৰিণত কৰাৰ লক্ষ্যত যুগুত কৰা শ্ৰমসংহিতা (Codification of Labour Laws) বাতিল কৰক। ১২ ঘণ্টীয়া কৰ্মদিৱসৰ নিয়ম বন্ধ কৰক। শ্ৰমিক তথা ৰাইজৰ অধিকাৰ কাঢ়ি নিয়া বন্ধ কৰক, চৰকাৰী নীতিক সমালোচনাকাৰীক জেলত বন্দী কৰি ৰখা বন্ধ কৰক। নিবনুৱা সমস্যাৰ সমাধান কৰক, এনৰেগা শ্ৰমিকৰ বছৰত ২০০ দিনৰ কাম আৰু দৈনিক ৫০০.০০ টকাকৈ মজুৰি প্ৰদান কৰক, মূল্যবৃদ্ধি ৰোধ কৰক, মজুতকাৰীসকলক শাস্তি বিহক, খাদ্য সুৰক্ষা আইন আৰু অত্যাৱশ্যকীয় সামগ্ৰী আইন ৰদ কৰাৰ চক্ৰান্ত বন্ধ কৰক। স্বাস্থ্যসেৱা সম্পূৰ্ণৰূপে বিনামূলীয়া আৰু সাৰ্বজনীন কৰক, আঁচনিভুক্ত শ্ৰমিক-কৰ্মচাৰীক চৰকাৰী কৰ্মচাৰীৰ স্বীকৃতি আৰু মাননীৰ পৰিবৰ্তে প্ৰতিমাহত ২১ হেজাৰ টকাকৈ দৰমহা দিয়ক। ক’ৰোণা পৰিস্থিতিত কৰ্মহীন হৈ পৰা অসংগঠিত খণ্ডৰ শ্ৰমিকক মাহিলী ৭,৫০০.০০ টকাকৈ সাহায্য প্ৰদান কৰক, চাহ শ্ৰমিকক দৈনিক ৩৫১.০০ টকাকৈ মজুৰি দিয়ক, কৃষিভূমি অধিগ্ৰহণ আইন বাতিল কৰক, অসমৰ বান-খহনীয়াক ৰাষ্ট্ৰীয় সমস্যাৰ স্বীকৃতি দিয়ক, স্থায়ী সমাধানৰ ব্যৱস্থা কৰক, বান-খহনীয়া আক্ৰান্ত ৰাইজক পৰিয়াল সাহায্য প্ৰদান কৰক।

মুদৈজান : অসমৰ অন্যান্য ঠাইৰ লগতে যোৰহাট জিলাৰ টীয়কতো এতিয়া সহজলভ্য হৈ পৰিছে নিষিদ্ধ ড্ৰাগছ। ইমানেই উঠি অহা যুৱ প্ৰজন্ম ড্ৰাগছৰ প্ৰতি আসক্তি বাঢ়ি গ’ল যে দেওবাৰে অত্যাধিক ড্ৰাগছ সেৱণ কৰাৰ ফলত মৃত্যুক সাৱটি ল’বলগীয়া হ’ল টীয়ক বামুণপুখুৰীৰ উৎপল বৰুৱা নামৰ এজন যুৱক। টীয়কত গঢ় লৈ উঠা নিষিদ্ধ ড্ৰাগছৰ ঘাটি আৰু এই অবৈধ ব্যৱসায়ৰ লগত জড়িত ব্যক্তিসকলক তৎকালীনভাৱে গ্ৰেপ্তাৰ কৰাৰ দাবীৰে কালি টীয়ক ৰাজহ চক্ৰ বিষয়াক আছু, যুৱ ছাত্ৰ পৰিষদ আৰু চুতীয়া ছাত্ৰ সন্থাৰ এটি দলে সাক্ষাৎ কৰি যোৰহাট জিলা উপায়ুক্ত আৰু আৰক্ষী অধীক্ষকলৈ স্মাৰকপত্ৰ প্ৰেৰণ কৰিছে। টীয়ক আঞ্চলিক ছাত্ৰ সন্থাৰ সভাপতি ৰন্টু ভূঞা, সাধাৰণ সম্পাদক প্ৰীতমজ্যোতি শইকীয়া, শিমলুগুৰি মৌজা আঞ্চলিক ছাত্ৰ সন্থাৰ সভাপতি দেৱব্ৰত শইকীয়া, ভা: সাধাৰণ সম্পাদক পবিত্ৰ বৰা, অসম জাতীয়তাবাদী যুৱ ছাত্ৰ পৰিষদৰ টীয়ক আঞ্চলিক সমিতিৰ সভাপতি হিমাংশু বৰুৱা, সাধাৰণ সম্পাদক প্ৰশান্ত দত্ত আৰু টীয়ক আঞ্চলিক চুতীয়া ছাত্ৰ সন্থাৰ সভাপতি পাৰ্থ প্ৰতিম চুতীয়া, সম্পাদক বিশ্বজিৎ বৰা স্বাক্ষৰিত পৃথক স্মাৰকপত্ৰ টীয়ক ৰাজহ চক্ৰ বিষয়াৰ জৰিয়তে প্ৰেৰণ কৰিছে। স্মাৰকপত্ৰখনিত উল্লেখ থকা অনুসৰি যোৱা ২১ জুলাইত টীয়ক আৰক্ষীয়ে আটক কৰি অনা ৫ জন ড্ৰাগছ আসক্ত যুৱকক কি কাৰণত উক্ত দিনাই ৰহস্যজনকভাৱে মুকলি কৰি দিলে সেয়াও ৰহস্যৰ আৱৰ্তত, তাৰ লগতে দেওবাৰে অত্যধিক ড্ৰাগছ আসক্তিৰ ফলত মৃত্যু হোৱা উৎপল বৰুৱাৰ লগত থকা আনকেইজন যুৱকক তৎকালীনভাৱে গ্ৰেপ্তাৰ কৰিবলৈ দাবী জনাইছে সংগঠনকেইটাই। আনহাতে এক বিবৃত্তিত সদৌ যোৰহাট জিলা ছাত্ৰ সন্থাৰ সাধাৰণ সম্পাদক জিতু নেওগে অতি ক্ষোভেৰে কয়, অত্যাধিক ড্ৰাগছ আসক্তিৰ ফলত দেওবাৰে মৃত্যু হোৱা উৎপল বৰুৱাৰ দৰে যাতে উঠি অহা নৱপ্ৰজন্ম ধ্বংসৰ গৰাহলৈ নাযায় এইক্ষেত্ৰত প্ৰশাসনে কঠোৰ ব্যৱস্থা গ্ৰহণ কৰাৰ প্ৰয়োজনীয়তা আছে। তাৰ লগতে টীয়ক আৰক্ষী থানাৰ ভাৰপ্ৰাপ্ত আৰক্ষী বিষয়াজনৰ নেতৃত্বত অবৈধ ব্যৱসায় চলি থকাৰ কথা ছাত্ৰ সন্থাই বাৰম্বাৰ জনাই অহাৰ পাছত এইটোৱেই আকৌ প্ৰমাণিত কৰিলে কিদৰে কমিচনৰ অংকত চলি থাকিব পাৰে ড্ৰাগছৰ দৰে অবৈধ ব্যৱসায়।