দৈনন্দিন বাৰ্তা ডেস্ক : সৰযূ নদীৰ তীৰত স্বৰ্ণযুগৰ সূচনা হ’ল৷ অযোধ্যাত ৰাম মন্দিৰৰ শিলান্যাসৰ দিনটোত এনেদৰে ব্যাখ্যা কৰিলে প্ৰধানমন্ত্ৰী নৰেন্দ্ৰ মোডীয়ে৷ প্ৰধানমন্ত্ৰীয়ে কয়, বহু দিনৰ প্ৰতীক্ষা শেষ৷ অ’ত দিনে তম্বুৰ তলতে আছিল ৰামলালা৷ এইবাৰ তেওঁৰ বাবে সুবিশাল মন্দিৰ নিৰ্মাণ হ’ব৷ বহু শতক ধৰি যি ভঙা-পতাৰ খেল চলি আছিল, আজি ৰাম জন্মভূমিত সেয়া মুক্ত হ’ল৷ সৰযূ নদীৰ তীৰত সূচনা হ’ল স্বৰ্ণযুগৰ৷ ২৯ বছৰৰ পাচত এই দিনটোত অযোধ্যাত ভৰি দিছিল নৰেন্দ্ৰ মোডীয়ে৷ ৰাম মন্দিৰৰ শিলান্যাসৰ দিনটোক স্বাধীনতা দিৱসৰ লগত তুলনা কৰি তেওঁ কয়, সমগ্ৰ দেশে স্বাধীনতা সংগ্ৰামত যোগ দিছিল৷ মন্দিৰৰ বাবেও বহুৱে বলিদান দিছে৷ অ’ত দিনৰ অপেক্ষা শেষ হ’ল৷ আজিৰ দিনটো ত্যাগ, সংকল্প আৰু সংঘৰ্ষৰ প্ৰতীক বুলি মোডীয়ে কয়৷ কেৱল ভাৰতেই লহয়, সমগ্ৰ পৃথিৱীতে আজি ৰামৰ জয়ধ্বনি শুনিবলৈ পোৱা গৈছে বুলি মোডীয়ে দাবী কৰে৷ তেওঁ কয়, আজি দেশ ৰামময়, ৰোমাঞ্চিত৷ পৃথিৱীৰ সৰ্বত্ৰে ৰামৰ ধ্বনি শুনিবলৈ পোৱা গৈছে৷ এই ৰাম মন্দিৰ আমাৰ সংস্কৃতিৰ আধুনিক প্ৰতীক৷ আমাৰ ৰাষ্ট্ৰীয় চিন্তাৰ প্ৰতীক৷ সমগ্ৰ পৃথিৱীৰ মানুহ আহিব৷ এই মন্দিৰৰ মাধ্যমত বৰ্তমানৰ সৈতে অতীতৰ যোগসূত্ৰ স্থাপিত হ’ব৷ ইয়াৰ লগতে প্ৰধানমন্ত্ৰীয়ে কয়, ৰামে আমাৰ মনত স্থায়ী ঠাই লৈছে৷ সকলো কামত ৰামেই আমাৰ প্ৰেৰণা৷ আজি সমগ্ৰ দেশৰ মানুহ ৰাম মন্দিৰ নিৰ্মাণত একত্ৰিত হৈছে৷ ৰামৰ চৰিত্ৰৰ কেন্দ্ৰবিন্দু হ’ল সত্যপালন৷ জীৱনৰ এনে কোনো ক্ষেত্ৰ নাই য’ত ৰাম আমাৰ কাষত প্ৰেৰণা নহয়৷ বৈচিত্ৰ্যৰ মাজত ঐক্যই ভাৰতৰ বৈশিষ্ট৷ ভাৰতৰ বিভিন্ন প্ৰদেশত ৰামায়ণৰ বিভিন্ন মালিতা আছে৷ ভাৰতৰ বাহিৰেও বিভিন্ন দেশত ৰামায়ণ আছে৷ সকলোতে ৰাম একেদৰে পূজনীয়৷ দেশৰ সংস্কৃতিৰ সৈতে ৰাম এনেভাৱে জড়িত যে কোনো ভাৱে তেওঁক আঁতৰ কৰা সম্ভৱ নহয় বুলি কয় প্ৰধানমন্ত্ৰী মোডীয়ে৷ তেওঁ কয়, ৰাম আমাৰ মনৰ মাজত আছে৷ আমাৰ সৈতে একান্ত হৈ গৈছে৷ প্ৰভুৰ কি অদ্ভুত শক্তি৷ তেওঁ আমাৰ সংস্কৃতিৰ আধাৰ৷ দেশবাসীৰ সমৰ্থন আছিল বাবেই ৰাম মন্দিৰ নিৰ্মাণৰ পথ প্ৰশস্ত হ’ল বুলি কয় প্ৰধানমন্ত্ৰীয়ে৷ তেওঁ কয়, স্বাধীনতা সংগ্ৰামত মহাত্মা গান্ধীয়ে যিদৰে দলিত আৰু জনজাতি মানুহৰ সমৰ্থন পাইছিল সেইদৰে দেশৰ সকলো মানুহৰ সমৰ্থন আছিল বাবেই ৰাম মন্দিৰ নিৰ্মাণৰ কাম আৰম্ভ কৰা হৈছে৷ প্ৰত্যেকেই ৰাম৷ প্ৰত্যেকৰ মাজতে ৰাম আছে৷ ক’ৰোনা পৰিস্থিতিত ৰাম মন্দিৰ নিৰ্মাণক লৈ সমালোচনাৰ সন্মুখীন হৈছিল কেন্দ্ৰ৷ আজি অনুষ্ঠানত সামাজিক দূৰত্ব মানি অতিথিসকলক বহাৰ ব্যৱস্থা কৰা হয়৷ মাস্ক পিন্ধি ভূমি পূজাত অংশ লয় প্ৰধানমন্ত্ৰীয়ে৷

দৈনন্দিন বাৰ্তা ডেস্ক : সোমবাৰে বিজেপিৰ নেত্ৰী তথা প্ৰাক্তন কেন্দ্ৰীয় মন্ত্ৰী উমা ভাৰতীয়ে জনাইছিল যে তেওঁ অযোধ্যাৰ ভূমি পূজাত উপস্থিত নাথাকে ৷ ক’ৰোনা সংক্ৰমণৰ বাবেই তেওঁ এই সিদ্ধান্ত লৈছিল ৷ কিন্তু বুধবাৰে যথা সময়ত ৰাম মন্দিৰৰ অনুষ্ঠানত উপস্থিত হ’ল বিজেপিৰ নেত্ৰী উমা ভাৰতী ৷ ৰাম জন্মভূমিত উপস্থিত হোৱাৰ কিছু সময়ৰ আগতে তেওঁ টুইট কৰি হিন্দীতে লিখে, মৰ্যাদা পুৰুষোত্তম ৰামৰ মৰ্যাদা ৰক্ষা কৰিবলৈ মই বাধ্য ৷ ৰাম জন্মভূমিৰ এজন প্ৰবীন বিষয়াই অনুৰোধ কৰিছিল ভূমি পূজাত থাকিবলৈ৷ সেয়ে মই এই অনুষ্ঠানলৈ আহিলো ৷ আনহাতে ৬১ বছৰীয়া এই প্ৰাক্তন কেন্দ্ৰীয় মন্ত্ৰীগৰাকীক আদৰণি জনায় উত্তৰ প্ৰদেশৰ মুখ্যমন্ত্ৰী যোগী আদিত্যনাথে ৷ 

অনলাইন বাৰ্তা, ৫ আগষ্ট : য’ত ঘৃণা, নৃশংসতা আছে, তাত ৰাম নাই৷ ভূমি পূজাৰ পাচত মুখ খুলিলে কংগ্ৰেছৰ প্ৰাক্তন সভাপতি ৰাহুল গান্ধীয়ে৷ লগতে অভিনন্দন জনাই ৰাহুল গান্ধীয়ে টুইটাৰত লিখে, ৰাম মানে প্ৰেম৷ ঘৃণাৰ মাজত তেওঁক কেতিয়াও প্ৰকাশ কৰা নাযায়৷ ৰাম মানে সহানুভূতি৷ নৃশংসতাৰ মাজত তেওঁৰ বিকাশ নহয়৷ ৰাম মানে ন্যায়৷ অন্যায়ৰ মাজত তেওঁ প্ৰতিফলন নহয়৷ আনহাতে ৰাম মন্দিৰৰ ভূমি পূজাৰ ঐতিহাসিক মুহূৰ্তৰ আগতে টুইট কৰি অভিনন্দন জনায় কংগ্ৰেছ নেত্ৰী প্ৰিয়ংকা গান্ধীয়ে৷ উত্তৰ প্ৰদেশত কংগ্ৰেছৰ দায়িত্বত থকা প্ৰিয়ংকাই কয়, অযোধ্যাত ৰামলালা মন্দিৰৰ ভূমি পূজা ৰাষ্ট্ৰীয় একতা, সংহতি আৰু সংস্কৃতিৰ প্ৰতীক হৈ উঠক৷ ৰাম সকলোৰে লগত আছে৷ ৰাম সৰ্বত্ৰ বিৰাজমান৷

দৈনন্দিন বাৰ্তা ডেস্ক : বুধবাৰে অযোধ্যাত ৰাম মন্দিৰৰ ভূমি পূজাৰ পাচত দিয়া ভাষণত বিশ্বজুৰি ৰামায়ণৰ প্ৰাসংগিকতা তুলি ধৰে প্ৰধানমন্ত্ৰী নৰেন্দ্ৰ মোডীয়ে৷ দেশ তথা বিশ্বৰ বিভিন্ন প্ৰান্তত, আনকি মুছলিম দেশতো ৰামায়ণৰ অস্তিত্বৰ কথা তুলি ধৰে মোডীয়ে৷ প্ৰধানমন্ত্ৰী মোডীয়ে জনায়, ৰাম ঐক্যৰ প্ৰতীক৷ ইয়াৰ লগতে মোডীয়ে কয়, যিদৰে ভগৱান ৰামৰ জয় সকলোৱে একেলগে প্ৰচেষ্টা কৰিছিল, সেইদৰে স্বাধীনতা সংগ্ৰামত মহাত্মা গান্ধীৰ লগত আছিল৷ ঠিক একেদৰেই আজি দেশবাসীৰ প্ৰচেষ্টাত ৰাম মন্দিৰ নিৰ্মাণৰ কাম সম্পন্ন হ’ল৷ আনহাতে ৰামৰ সর্বজনীনতা তুলি ধৰে প্ৰধানমন্ত্ৰীয়ে৷ ইয়াৰ ব্যাখ্যা কৰি প্ৰধানমন্ত্ৰীয়ে কয়, সেই ৰিম তুলসীৰ ৰাম, সেই ৰাম গুৰু নানকৰ ৰাম, সেই ৰাম কবীৰৰ ৰাম, সেই ৰামেই জড়িত ভগৱান বুদ্ধৰ সৈতে, সেই ৰামই স্বাধীনতা সংগ্ৰামত মহাত্মা গান্ধীৰ ভজনত ৰাম হিচাপে মনোবল পাইছিল৷ ৰাম প্ৰকৃততে বিভিন্নতাৰ মাজত ঐক্যৰ প্ৰতীক৷ আনহাতে দেশৰ বিভিন্ন ভাষাত লিখা ৰামায়ণৰ কথা তুলি ধৰে প্ৰধানমন্ত্ৰীয়ে৷ কেৱল তাকেই নহয়, দেশৰ বাহিৰতো নানান ভাষাত ৰামায়ণ লিখা হৈছে৷ সেই কথা উল্লেখ কৰে প্ৰধানমন্ত্ৰীয়ে৷ মোডীয়ে কয়, বিশ্বৰ সৰ্বাধিক ইছলাম অধ্যুষিত দেশ ইন্দোনেছিয়া৷ এইখন দেশত যোগেশ্বৰ ৰামায়ণ, সোমেশ্বৰ ৰামায়ণৰ দৰে ৰচনা ৰচিত হৈছে৷ কেৱল সেয়াই নহয়, ইৰান আৰু চীনতো ৰামকথাৰ বিবৰণ আছে বুলি জনায় প্ৰধানমন্ত্ৰীয়ে৷ এই বাবেই ৰামায়ণ আৰু ৰাম কেৱল এই দেশৰ নহয়, সমগ্ৰ বিশ্বৰ ওচৰত ঐক্যৰ নাম৷

অনলাইন বাৰ্তা, ৫ আগষ্ট : নতুন ভাৰতত সূচনা হ’ল নৱযুগৰ৷ এইদৰে কয় ১৯৯০ চনত অযোধ্যাত দেশজুৰি ৰাম মন্দিৰ আন্দোলনৰ অন্যতম উদ্যোক্তা, আৰএছএছৰ প্ৰধান মোহন ভগৱতে৷ ৩০ বছৰৰ পাচত বুধবাৰৰ দিনটোতে নৰেন্দ্ৰ মোডীৰ হাতেৰেই অযোধ্যাত সূচনা হ’ল ৰাম মন্দিৰ নিৰ্মাণৰ৷ উল্লেখ্য যে মহা আড়ম্বৰে অযোধ্যাত ৪০ কিলোগ্ৰাম ওজনৰ ৰূপৰ ইটা গাঁথি ভূমি পূজাৰ যোগে ৰাম মন্দিৰ নিৰ্মাণৰ সূচনা কৰিলে প্ৰধানমন্ত্ৰীয়ে৷ আনহাতে উত্তৰ প্ৰদেশৰ মুখ্যমন্ত্ৰী যোগী আদিত্যনাথে কয়, প্ৰধানমন্ত্ৰী মোডীয়ে পাৰে অসম্ভৱৰ শান্তিপূৰ্ণ সমাধান কৰাত৷ প্ৰধানমন্ত্ৰীৰ মুখত কেৱল ৰাম চৰিত৷ ঐক্য-সংহতিৰ বাৰ্তা৷ ১৯৯০ চনত লালকৃষ্ণ আদৱানিৰয়ে সোমনাথৰ পৰা অযোধ্যা পৰ্যন্ত ৰথযাত্ৰা আৰম্ভ কৰিছিল৷ পুৰণা সেই সময়ৰ ছবিত লৌহপুৰুষ আদৱানিৰ কাষত আছিল তেতিয়াৰ বিজেপিৰ কৰ্মকৰ্তা নৰেন্দ্ৰ দামোদৰ দাস মোডী৷ আজি সেই ৰাম মন্দিৰৰ সূচনা কৰাৰ দিনা তেওঁৱে প্ৰধান মুখ৷ সেই দিনৰ নেতৃত্বত থকা লালকৃষ্ণ আদৱানি আজি ভিডিঅ’ কনফাৰেন্স যোগে অংশীদাৰ হ’ল৷ তেওঁৰ উপস্থিতিক এৰি সমগ্ৰ ভূমি পূজা অনুষ্ঠান আবৰ্তিত হয় নৰেন্দ্ৰ মোডীৰ লৈ৷ দিনৰ ১১ বজাত অযোধ্যাৰ আকাশত মোডীৰ হেলিকপ্টাৰ দেখি উল্লাসিত হৈ পৰে সকলো৷ মোডী হেলিকপ্টাৰৰ পৰা নমাৰ পাচত স্বাগত জনায় উত্তৰ প্ৰদেশৰ মুখ্যমন্ত্ৰী যোগী আদিত্যনাথে৷ তাৰ পাচতে প্ৰধানমন্ত্ৰী যায় ৰামগঢ়ীৰ হনুমান মন্দিৰত পূজা দিবলৈ৷ মন্দিৰত তেওঁক বস্ত্ৰ আৰু ৰূপৰ মুকুট উপহাৰ দিয়ে৷ তাৰ পাচত ৰামলালা দৰ্শন কৰে প্ৰধানমন্ত্ৰীয়ে৷ তাৰ পাচত ঘড়ীৰ কাটা মিলাই শুভক্ষণ অনুযায়ী সকলো ধৰ্মীয় প্ৰথা-অনুষ্ঠান শেষ কৰি মূল মঞ্চত আসন গ্ৰহণ কৰে প্ৰধানমন্ত্ৰীয়ে৷ মূল অনুষ্ঠানৰ পৰা আৰম্ভ কৰি সমগ্ৰ ভূমি পূজাৰ প্ৰস্তুতিসহ সকলো কাৰ্যক্ৰম সম্পন্ন হয় যোগী আদিত্যনাথৰ নেতৃত্বত৷ ৫০০ বছৰ অপেক্ষাৰ পাচত এই দিনটো আহিছে বুলি উল্লেখ কৰি আদিত্যনাথে কয়, বহু প্ৰজন্মই এই মুহূৰ্তৰ বাবে অপেক্ষা কৰিছিল ৷