হাঁহচৰা :  জনস্বাস্থ্য কাৰিকৰী বিভাগৰ পানীৰ পাইপেৰে গৃহ নিৰ্মাণ কৰি মৰিয়নিত এজন কংগ্ৰেছী নেতা আৰক্ষীৰ হাতত গ্ৰেপ্তাৰ হ’বলগীয়া হোৱা কাৰ্যই তীব্ৰ প্ৰতিক্ৰিয়া সৃষ্টি কৰিছে। ঘটনাৰ বিবৰণি মতে মৰিয়নীৰ বিধায়ক ৰূপজ্যোতি কুৰ্মীৰ ঘনিষ্ঠ কংগ্ৰেছী নেতা নকছাৰী দেৱেৰাপাৰ গাঁৱৰ বাসিন্দা ইমতাজ আলি নামৰ লোকজনৰ বিৰুদ্ধে নিজৰ গৃহ নিৰ্মাণত জনস্বাস্থ্য কাৰিকৰী বিভাগৰ পাইপ চুৰি কৰি ব্যৱহাৰ কৰা বুলি স্থানীয় পাপু জামাল হাজৰিকা নামৰ লোকজনে আৰক্ষীক এজাহাৰ প্ৰদানৰ পিছত মৰিয়নী ৰাজহ চক্ৰ বিষয়া বিশ্বজিৎ বৰাৰ উপস্থিতিত দেবেৰাপাৰ আৰক্ষীৰ ভাৰপ্ৰাপ্ত আৰক্ষী বিষয়াৰ ৰষেশ্বৰ দত্তৰ নেতৃত্বত আৰক্ষীৰ এটা দলে ইমতাজ আলি নামৰ লোকজনৰ গৃহত অভিযান চলাই ঘৰৰ পিছফালে লুকুৱাই থোৱা অৱস্থাত ১২ ডাল পাইপ উদ্ধাৰ কৰিবলৈ সক্ষম হয়। আনহাতে বহু সংখ্যক পাইপ লোকজনে নিৰ্মিয়মান গৃহটোত ব্যৱহাৰ কৰা লগতে চিমেন্টে প্লাচটাৰ কৰি ঢাকি দিয়ে বুলি জানিব পৰা গৈছে।  লোকজনে নৱ নিৰ্মিত গৃহটোৰ খুটা সমূহ নিৰ্মাণত পানীৰ পাইপসমুহ ব্যৱহাৰ কৰিছিল। আনহাতে জনস্বাস্থ্য কাৰিকৰী বিভাগে গ্ৰেটাৰ চেলেংহাট পানী যোগান আঁচনিত ব্যৱহাৰ কৰিবলৈ মজুত ৰখা বৃহৎ সংখক পানীৰ পাইপ দীৰ্ঘদিনৰ পৰা অন্তৰ্ধান হৈ থকা পাছতো বিভাগৰ ফালৰ পৰা আৰক্ষীক অৱগত নকৰাত বিভাগটোৰ বিষয়া কৰ্মচাৰী এই চুৰি কাৰ্যত জড়িত থকাৰ সন্দেহ প্ৰকাশ  কৰি বীৰ লাচিত সেনাৰ নকছাৰী আঞ্চলিক সমিতিয়ে এই ঘটনাৰ উচিত তদন্ত দাবী কৰিছে। ইতিমধ্যে সংগঠনটোৱে জনস্বাস্থ্য কাৰিকৰী বিভাগৰ বিষয়া অভিযন্ত্ৰা আৰু ঠিকাদাৰৰ বিৰুদ্ধে দেবেৰাপাৰ থানাত এখন এজাহাৰ দাখিল কৰি তদন্তৰ দাবী কৰিছে।

ওৰাং : নিশা মাজবাট ৰাজহ চক্ৰৰ অন্তৰ্গত নাহৰবাৰীত সংঘটিত হয় বিধ্বংশী  অগ্নিকাণ্ড। অগ্নিকাণ্ডৰ ফলত দুখনকৈ ব্যৱসায়িক প্ৰতিষ্ঠান সম্পূৰ্ণৰূপে ভস্মীভূত হয়। স্থানীয় লোকৰ সন্দেহ শ্বৰ্টচাৰ্কিটৰ ফলত অগ্নিকাণ্ড সংঘটিত হোৱাৰ। মাজবাট আৰক্ষী আৰু অগ্নি নিৰ্বাপক বাহিনীৰ তৎপৰতাত নিৰ্বাপিত হয় জুই। অগ্নিকাণ্ডৰ ফলত কোনো লোক হতাহত হোৱা নাই। অগ্নিকাণ্ডৰ ফলত ব্যৱসায়িক প্ৰতিষ্ঠান কেইখনৰ  কেইবালাখ টকাৰ সা-সম্পত্তি জুইত জাহ গৈছে।

নগাঁও, ২৬ জুলাইঃ নগাঁও জিলাত যোৱা চৌৱিশ ঘন্টাত নতুনকৈ ১৪ গৰাকী লোক কৰ’নাত আক্ৰান্ত হোৱা বুলি নিশ্চিত কৰা হৈছে। নতুনকৈ আক্ৰান্ত হোৱা বুলি নিশ্চিত কৰা ১৪ গৰাকী লোককলৈ আজি বিয়লি তিনি বজা পৰ্যন্ত জিলা খনত কৰ’নাত আক্ৰান্ত হোৱা লোকৰ সংখ্যা ১৪৩৭ জনলৈ বৃদ্ধি পায়। ইপিনে,জিলা খনৰ বিভিন্ন কোৱাৰেন্টাইন চেন্টাৰত কোৱাৰেন্টাইন হৈ থকা ৭৪গৰাকী লোকৰ সাদিনীয়া কোৱাৰেন্টাইন অন্ত পৰাত তেওঁ লোকক আজি ঘৰলৈ যাবলৈ দিয়া হয়।আজি কৰ’নাত আক্ৰান্ত হোৱা বুলি নিশ্চিত কৰা সকলৰ ভিতৰত আছে নগাঁৱৰ যুটীয়া স্বাস্থ্য সেৱা সঞ্চালকৰ কাৰ্যালয়ৰ কৰ’নাৰ ডাটা মেনেজাৰ হিচাপে কৰ্মৰত মঞ্জিল শৰ্মা আৰু নগাঁও কেন্দ্ৰীয় কাৰাগাৰৰ তিনি জন হাজোতী। স্মৰ্তব্য যে, ইতিমধ্যেই কৰ’নাৰ অভিকেন্দ্ৰত পৰিণত হোৱা নগাঁৱৰ স্বাস্থ্য বিভাগৰ যুটীয়া স্বাস্থ্য সেৱা সঞ্চালকৰ কাৰ্যালয়ৰ দুই কৰ্মচাৰী আৰু দুজন চালক কৰ’নাত আক্ৰান্ত হৈছে।আজি আক্ৰান্ত হোৱা কৰ্মচাৰী জনক লৈ যুটীয়া স্বাস্থ্য সেৱা সঞ্চালকৰ কাৰ্যালয়ত কৰ’নাত আক্ৰান্ত হোৱা কৰ্মচাৰীৰ সংখ্যা পাঁচ জনলৈ বৃদ্ধি পায়।ঠিক একেদৰে,কৰ’নাৰ অভিকেন্দ্ৰত পৰিণত হোৱা নগাঁও কেন্দ্ৰীয় কাৰাগাৰত কৰ’নাত আক্ৰান্ত হাজোতী আৰু কয়দীৰ সংখ্যা ৬৫জনলৈ বৃদ্ধি পাইছে। ইপিনে,আজি কৰ’নাত আক্ৰান্ত হোৱা বুলি নিশ্চিত কৰা সকলৰ ভিতৰৰ সাত জনক ৰেপিড এন্টিজেন টেষ্টৰ জৰিয়তে চিনাক্ত কৰা হৈছে।এওঁলোক হ’ল চিলঙনিৰ প্ৰাক্তন স্বাস্থ্য কৰ্মী আব্দুল কৰিম আৰু তেওঁৰ পৰিয়ালৰ আন চাৰি জন সদস্য, নগাঁও চহৰৰ পানীগাঁৱৰ প্ৰদীপ হাজৰিকা আৰু মনালিছা কলিতা। জিলা স্বাস্থ্য বিভাগৰ সূত্ৰই জনোৱা মতে,আজি বিয়লি পৰ্যন্ত নগাঁও ভোগেশ্বৰী ফুকননী অসামৰিক চিকিৎসালয়ৰ ক’ভিড-১৯হাস্পতালত ৯০জন, কন্দলী আদৰ্শ চিকিৎসালয়ত ২৮জন,মোৱামাৰী আদৰ্শ চিকিৎসালয়ত ১২জন আৰু চিমনাবস্তি আদৰ্শ চিকিৎসালয়ত ২৫জন সহ মুঠ ১৫৫জন ক’ভিড আক্ৰান্ত লোক চিকিৎসাধীন হৈ আছে।

দৈনন্দিন বাৰ্তাৰ সেৱা, ডিৰাক সীমান্ত : তিনিচুকীয়া জিলাৰ অসম অৰুণাচল সীমান্তৱৰ্তী মাৰ্ঘেৰিটা সমষ্টিৰ অন্তৰ্গত ১৫ নং ৰাষ্ট্ৰীয় ঘাইপথ, সোনজান মাধৱপুৰৰ পৰা বৰডুমছা সংযোগী সীমান্তৱৰ্তী গড়কপ্তানী পথৰ জৰাজীৰ্ণ অৱস্থাই ৰাইজক জ্বলাকলা খুৱাই অতিষ্ঠ কৰি তুলিছে । উক্ত পথটোৱেই হৈছে সোনজান, কৈলাশপুৰ, ৱাথৈ, লিটং, বেটনি, তিনিআলি নগাঁও, হাটীগড়, ৰত্নপুৰ, দীঘলীপথাৰ, আদিকে ধৰি বহুকেইখন গাঁৱৰ মুখ্য পথ । পথটোৰ বিভিন্ন স্থানত অতিকৈ বিধ্বস্ত হৈ এক পুখুৰী সদৃশ গাঁতৰ সৃষ্টি হৈছে। এই পথটোত থকা পুখুৰী সদৃশ গাঁত সমূহত পথচাৰী, বাইক, স্কুটী, সৰুবৰ গাড়ীসমূহ দুৰ্ঘটনাত পতিত হৈ একাধিক জীৱশ্ৰেষ্ঠৰ মৃত্যুমুখত যে নপৰিব তাক নুই কৰিব নোৱাৰি । পথৰ পুখুৰী সদৃশ গাঁতৰ পানীৰ তলত মৃত্যুৰ কাৰক হিচাপে আত্মগোপন কৰি থকা এই প্ৰকাণ্ড প্ৰকাণ্ড গাত সমূহ মেৰামতি কৰি এটা সুন্দৰ পথ নিৰ্মাণ কৰি  ৰাইজক উপহাৰ দিয়াত চুড়ান্তভাবে ব্যৰ্থ হৈছে উন্নয়নৰ জয়ঢোল বজোৱা বিজেপি নেতৃত্বাধীন সোনোৱাল চৰকাৰ । উক্ত পথটো মেৰামতিৰ বাবে স্থানীয় বিধায়ক ভাস্কৰ শৰ্মায়ো বিশেষ প্ৰদক্ষেপ গ্ৰহণ নকৰাৰ অভিযোগ উত্থাপিত হৈছে ।  অতিশ্ৰীঘে উক্ত পথটো মেৰামতি কৰি যাতায়তৰ সুচল কৰি তুলিবলৈ ভুক্তভোগী ৰাইজে  বিভাগীয় কৰ্তৃপক্ষ তথা চৰকাৰক আহ্বান জনাইছে । অনাগত দিনত চৰকাৰ কিম্বা বিভাগীয় কৰ্তৃপক্ষই পথটো মেৰামতি কৰাত কেনেধৰণৰ ব্যৱস্থা গ্ৰহণ কৰিব সেয়া লক্ষ্যণীয় হ’ব ।

দৈনন্দিন বাৰ্তাৰ সেৱা, নলবাৰী :  ক’ৰোনা ভাইৰাছৰ সংক্ৰমণে বিশ্বজুৰি ত্ৰাসৰ সৃষ্টি কৰাৰ পৰিপ্ৰেক্ষিতত নলবাৰীত জিলা প্ৰশাসন তথা স্বাস্থ্য বিভাগে আজি জিলাখনত ইতিমধ্যে শ্বহীদ মুকুন্দ কাকতি কোভিড হাস্পতালত স্থাপন কৰা নমুনা( ছোৱাব ) পৰীক্ষা কেন্দ্ৰৰ উপৰি ধৰ্মপুৰ সমষ্টিৰ  বানেকুছিৰ অন্তৰ্গত মিলন উচ্চতৰ মাধ্যমিক বিদ্যালয় আৰু নলবাৰী সমষ্টিৰ অধীনত গৰ্ডন উচ্চতৰ মাধ্যমিক বিদ্যালয়ত একোটিকৈ নমুনা ( ছোৱাব ) সংগ্ৰহ তথা ৰেপিড কোভিড টেষ্ট কেন্দ্ৰ মুকলি কৰা হয় । গৰ্ডন চৰকাৰী উচ্চতৰ মাধ্যমিক বিদ্যালয়ত নমুনা সংগ্ৰহ তথা ৰেপিড কোভিড টেষ্ট কেন্দ্ৰ মুকলি কৰে নলবাৰী সমষ্টিৰ বিধায়ক অশোক শৰ্মাই । ভাষণ প্ৰসংগত বিধায়ক শৰ্মাই কয় যে নলবাৰীৰ ৰাইজৰ বাবে মুকলি কৰা এই কোভিড টেষ্ট কেন্দ্ৰত নমুনা পৰীক্ষা কৰি আধা ঘন্টাৰ ভিতৰতে ৰিজাল্ট পাব পৰা যাব । ২৪ জুলাই তাৰিখে ৰাজ্যিক স্বাস্থ্য মন্ত্ৰী পিযুষ হাজৰিকাই শ্বহীদ মুকুন্দ কাকতি কোভিড হাস্পতালৰ পৰিৱেশ পৰিদৰ্শন কৰাৰ লগতে জিলা প্ৰশাসন তথা স্বাস্থ্য বিভাগৰ সৈতে হোৱা আলোচনামৰ্মে এই ৰেপিড কোভিড টেষ্ট কেন্দ্ৰ মুকলি কৰা হৈছে । এই ৰেপিড কোভিড টেষ্ট কেন্দ্ৰত দিনৰ ১০-০০ বজাৰ পৰা আবেলি ৩-০০ বজালৈ কোভিড টেষ্ট কৰা হ’ব । চৰ্দি , কাঁহ , জ্বৰ আদি লক্ষণে দেখা দিলে ততালিকে এই কোভিড টেষ্ট কেন্দ্ৰত নমুনা পৰীক্ষা কৰি আধা ঘন্টাতে ৰিজাল্ট পাব । নমুনা পৰীক্ষাৰ ৰিজাল্ট পোৱালৈ কোনেও আগৰ দৰে কেবাদিনো আছুতীয়াকৈ থাকিব নালাগিব । আৰু চৰকাৰে কোৱাৰেন্টাইনৰ সময় ১৪ দিনৰ পৰা ৭ দিনলৈ কমাই দিছে । যি নহওক এই ৰেপিড কোভিড টেষ্টৰ সুবিধাই ৰাইজক উপকৃত কৰিব বুলি বিধায়ক অশোক শৰ্মাই আশা প্ৰকাশ কৰে। আনহাতে ধৰ্মপুৰ সমষ্টিৰ অন্তৰ্গত মিলন উচ্চতৰ মাধ্যমিক বিদ্যালয়ত স্থাপন কৰা ৰেপিড কোভিড টেষ্ট কেন্দ্ৰটি উপায়ুক্ত পূৰৱী কোৱঁৰৰ উপস্থিতিত নলবাৰী জিলা পৰিষদৰ অধ্যক্ষ নিতুল ডেকা আৰু সমাজকৰ্মী পুলক শৰ্মাই   মুকলি কৰে । নিতুল ডেকাই ভাষণ প্ৰসংগত কয় যে বানেকুছিৰ এই ৰেপিড কোভিড পৰীক্ষা কেন্দ্ৰটি পঞ্চায়ত প্ৰতিনিধিসকলে যাতে অলপ লক্ষ্য ৰাখে আৰু ৰাইজক কোভিড পৰীক্ষা কৰিবলৈ উৎসাহিত কৰে । কিবা সমস্যা হ’লে জিলা প্ৰশাসন তথা স্বাস্থ্য বিভাগক যাতে অৱগত কৰে । আজিৰ এই দুয়োটা কাৰ্যসূচীতে অতিৰিক্ত উপায়ুক্ত ( স্বাস্থ্য ) অভিজিত সিনহা , যুটীয়া স্বাস্থ্য সেৱা সঞ্চালক ডা: উমেশ ফাংচু, মহকুমা স্বাস্থ্য তথা চিকিৎসা বিষয়া ডা: কৈলাস ডেকা , ডা: মধুৰাম বৈশ্য আৰু স্বাস্থ্য কৰ্মী তথা স্থানীয় পঞ্চায়ত প্ৰতিনিধিসকল উপস্থিত থাকে ।