নলবাৰী : নিখিল ভাৰত কৃষক সভাৰ অন্তৰ্ভুক্ত নলবাৰী আঞ্চলিক কৃষক সভাই আজি এক প্ৰতিবাদী কাৰ্যসূচী ৰূপায়ণ কৰে। নলবাৰী জিলাৰ যজ্ঞভূমিত কৃষক সভাই সামাজিক দূৰত্ব বজাই ৰাখি এক প্ৰতিবাদী সমদল উলিয়াই। আয়কৰৰ আওতাত নপৰা প্ৰতিটো পৰিয়ালক প্ৰতি মাহে ৬ মাহৰ বাবে ৭৫০০ টকাকৈ প্ৰদানৰ ব্যৱস্থা কৰক, অসমৰ বান গৰাখহনীয়া সমস্যাৰ স্থায়ী সমাধান কৰক, স্বাস্থ্য সেৱা বিনামূলীয়া আৰু সাৰ্বজনীন কৰক আদি শ্ল’গান দি চৰকাৰক দাবী জনাই কৃষক সভাৰ কৰ্মীসকলে প্ৰতিবাদ সাব্যস্ত কৰে। এই কাৰ্যসূচীত অংশগ্ৰহণ কৰি বিশিষ্ট বাওপন্থী নেতা ৰবীন মিশ্ৰই ওপৰোক্ত দাবী সমূহৰ ভিত্তিত ঐক্যবদ্ধভাৱে সংগ্ৰাম গঢ়ি তুলিবলৈ ৰাইজক আহ্বান জনায়।

নলবাৰী : অসম দৰ্শন আঁচনিৰ অধীনত আজি নলবাৰী জিলাৰ ৬ নং পশ্চিম বতাহগিলা গাঁও পঞ্চায়তৰ অন্তৰ্গত সৰিয়হতলীৰ বাৰগোপাল দেৱালয়ৰ সংযোগী পথৰ শুভ উদ্বোধন কৰা হয়। প্ৰায় ১ কোটি ৩৯ হাজাৰ ৭৩ হাজাৰ টকাৰে  নিৰ্মাণ হ’বলগীয়া এই সংযোগী পথটো আনুষ্ঠানিকভাৱে উদ্বোধন কৰে নলবাৰী সমষ্টিৰ বিধায়ক অশোক শৰ্মাই। উদ্বোধনীৰ পিছত বাৰগোপাল দেৱালয়ৰ প্ৰাংগণত এখন সভাও অনুষ্ঠিত কৰা হয় আৰু এই সভাৰ উদ্দেশ্য ব্যাখ্যা কৰে মন্দিৰ পৰিচালনা সমিতিৰ প্ৰাক্তন সম্পাদক জিতেন তালুকদাৰে। আজিৰ এই উদ্বোধনী কাৰ্যসূচীত গড়কাপ্তানি বিভাগৰ কাৰ্যবাহী অভিযন্তা মৃদুল দাস, ৬ নং পশ্চিম বতাহগিলা গাঁও পঞ্চায়তৰ সভাপতি বীৰেণ দাস, কাউন্সিলাৰ ৰীতু ডেকা সহ প্ৰমুখ্যে বহু কেইজন বিশিষ্ট ব্যক্তি উপস্থিত থাকেৰ। সভাত উপস্থিত বিশিষ্ট ব্যক্তি সকলক সম্বৰ্দ্ধনা জনাই দেৱালয় সমিতিয়ে।

ঢকুৱাখনা : কৃষক নেতা অখিল গগৈ  কৰোনা আক্ৰান্ত হৈ থকাৰ পিছতো চৰকাৰে জেলত আবদ্ধ কৰি ৰখাৰ প্ৰতিবাদত আৰু অখিল গগৈক বিনা চৰ্তে মুক্তিৰ দাবীত আজি সমগ্ৰ ৰাজ্যজুৰি কৃষক মুক্তি সংগ্ৰাম সমিতিয়ে পালন কৰা প্ৰতিবাদী কাৰ্যসূচী ঢকুৱাখনাতো ৰূপায়ণ কৰে কৃষক মুক্তি সংগ্ৰাম সমিতিৰ কৰ্মীয়ে। মুখ্যমন্ত্ৰীৰ প্ৰতিকৃতি জ্বলাই বিজেপি চৰকাৰ গ’ বেক, অখিল গগৈক বিনা চৰ্তে মুক্তি দিয়ক, আমি ন্যায় বিচাৰোঁ, চৰকাৰী দমন নীতি বন্ধ কৰক ইত্যাদি শ্লোগানেৰে পৰিৱেশ উত্তাল কৰি প্ৰতিবাদী কাৰ্যসূচী ৰূপায়ণ কৰে। আজিৰ প্ৰতিবাদী কাৰ্যসূচীত অংশগ্ৰহণ কৰে কৃষক মুক্তি সংগ্ৰাম সমিতিৰ ঢকুৱাখনা মহকুমা সমিতিৰ নেতা হৰেন গগৈ, প্ৰহ্লাদ গগৈকে আদি কৰি কেইবাগৰাকীও কৰ্মীয়ে।

নগাঁও : ” ক’ৰ’না ভাইৰাছৰ বিৰুদ্ধে যুঁজ অব্যাহত ৰখাৰ সমান্তৰালভাৱে আমাৰ কৃষকসকল কৃষি কাৰ্যত সক্ৰিয়ভাৱে নিয়োজিত হ’ব লাগিব। কৃষি কাৰ্যৰ জৰিয়তেহে অসমত এক সেউজ বিপ্লৱ গঢ়ি তুলিব পৰা যাব।” এই মন্তব্য নগাওঁ সদৰ সমষ্টিৰ বিধায়ক ৰূপক শৰ্মাৰ। আজি নগাওঁ সদৰ সমষ্টিৰ অন্তৰ্গত ননৈ দেউৰী গাঁৱত কঠীয়া ৰোপণ কাৰ্যসূচী সমাৰোহৰ শুভাৰম্ভ কৰি বিধায়ক গৰাকীয়ে কয়, ‘কৃষিৰ জৰিয়তেহে অসমৰ অৰ্থনীতিৰ বুনিয়াদ শক্তিশালী কৰিব পৰা যাব। ইয়াৰ বাবে আমাৰ কৃষকসকলে কঠোৰ পৰিশ্ৰম কৰাৰ লগতে নিজকে স্বাৱলম্বী হিচাপে গঢ়ি তুলিব লাগিব। তেতিয়াহে আমি প্ৰকৃত সেউজ বিপ্লব গঢ়ি তুলিব পাৰিম।’ ভাষণ প্ৰসংগত বিধায়ক গৰাকীয়ে মুখ্যমন্ত্ৰী সৰ্বানন্দ সোণোৱাল নেতৃত্বাধীন চৰকাৰখনে অসমৰ কৃষি ক্ষেত্ৰৰ উন্নয়নৰ বাবে গ্ৰহণ কৰা আঁচনিৰ বিষয়ে উল্লেখ কৰি কৃষক ৰাইজক এই আঁচনিৰ সুবিধা গ্ৰহণ কৰিবলৈ আহ্বান জনায়। নগাওঁ জিলা কৃষি বিভাগৰ উদ্যোগত ‘এপাৰ্ট’ আঁচনিৰ অধীনত ননৈ দেউৰী গাঁৱত উন্নতমানৰ কঠীয়া ৰোপণ কাৰ্যসূচীৰ শুভাৰম্ভ কৰা হয়। এই কাৰ্যসূচীত জিলা কৃষি বিষয়া অশোক কুমাৰ বৰঠাকুৰ, ‘এপাৰ্ট’ৰ ভাৰপ্ৰাপ্ত বিষয়া অভিজিৎ দত্ত চৌধুৰী, ছিলঙনী কৃষি বিজ্ঞান কেন্দ্ৰৰ প্ৰধান বিজ্ঞানী ডঃ নিৰঞ্জন ডেকা, অন্তঃৰাষ্ট্ৰীয় ধান গৱেষণা কেন্দ্ৰৰ বিষয়া ভিপিন বি কুমাৰ, স্থানীয় কৃষি সম্প্ৰসাৰণ বিষয়া দিব্যজ্যোতি ডেকা, সম্প্ৰসাৰণ কৰ্মী কল্যাণ বৰা,  গৱেষণা সহায়ক অজিত বৰা, খণ্ড প্ৰযুক্তি প্ৰবন্ধক চিত্ৰজিৎ বৰাকে ধৰি কৃষি বিভাগ, ‘এপাৰ্ট’ৰ কৰ্মচাৰীৰ লগতে কৃষকসকল উপস্থিত থাকে। কঠীয়া ৰোপন থলিতে ধান ৰোপন সম্পৰ্কীয় এক প্ৰশিক্ষণো অনুষ্ঠিত হয়। ইপিনে আজি বিধায়ক গৰাকীয়ে পাখিমৰিয়া উন্নয়ন খণ্ডৰ ১০০ গৰাকী শিপিনীক য়াৰ্ণ পাছবুক আৰু ৪০০ লোকক জব কাৰ্ড প্ৰদান কৰে। এই উপলক্ষে অনুষ্ঠিত অনুষ্ঠানত ভাষণ প্ৰদান কৰি বিধায়ক গৰাকীয়ে এই ব্যৱস্থাৰ জৰিয়তে শিপিনী আৰু জব কাৰ্ড প্ৰাপ্ত লোকসকল উপকৃত হ’ব বুলি মন্তব্য কৰে। অনুষ্ঠানত পাখিমৰিয়া খণ্ড উন্নয়ন বিষয়া শেৱালি চক্ৰৱৰ্তী আদিয়ে অংশগ্ৰহণ কৰে।

নগাঁও  : কৃষক নেতা অখিল গগৈৰ মুক্তিৰ দাবীত আজি নগাঁৱৰ কৃষ্ণাইখাটত কৃষক মুক্তি সংগ্ৰাম সমিতিৰ নগাঁও জিলা সমিতিয়ে মানৱ শৃংখল কাৰ্যসূচী ৰূপায়ন কৰে। কৃষক নেতা গৰাকীক বিনাচৰ্তে মুক্তিৰ দাবীত নগাঁও বাইপাচৰ কৃষ্ণাইখাটৰ অংশত এই প্ৰতিবাদী কাৰ্যসূচী ৰূপায়ন কৰা হয়। কৃষক মুক্তি সংগ্ৰাম সমিতিৰ নগাঁও জিলা সমিতিৰ উদ্যোগত ৰূপায়িত মানৱ শৃংখল কাৰ্যসূচীত হাতে হাতে বেনাৰ ফেষ্টুন লৈ সামাজিক দtৰত্ব বৰ্তাই কৃষক মুক্তিৰ সদস্য সকলে অখিল গগৈৰ মুক্তিৰ দাবীৰে এই প্ৰতিবাদী কাৰ্যসূচী ৰূপায়ণ কৰে। অখিল গগৈক মুক্তি দিয়ক, বিজেপি চৰকাৰ হায় হায় আদি বিভিন্ন শ্ল’গানেৰে ৰূপায়ণ কৰা মানৱ শৃংখল কাৰ্যসূচীত কৃষক মুক্তি সংগ্ৰাম সমিতিৰ নগাঁও জিলা সমিতিৰ সম্পাদক জিতেন বৰা প্ৰমুখ্যে জিলাখনৰ বিভিন্ন প্ৰান্তৰ সদস্যই অংশগ্ৰহণ কৰে। চৰকাৰৰ দুৰ্নীতি আৰু অনিয়মৰ মুখা খোল খোৱাৰ ভয়তেই অখিল গগৈক কাৰাৰুদ্ধ কৰি ৰাখিছে বুলিও কৃষক মুক্তি সংগ্ৰাম সমিতিৰ নগাঁও জিলা সম্পাদক গৰাকীয়ে মন্তব্য কৰে।