তিনিচুকীয়া : পেট্ৰল-ডিজেল আৰু অত্যাৱশ্যকীয় সামগ্ৰীৰ আকাশলংঘী মূল্যবৃদ্ধিৰ প্ৰতিবাদকল্পে আজি তিনিচুকীয়া জিলা ছাত্ৰ সন্থাই কেন্দ্ৰ আৰু ৰাজ্য চৰকাৰৰ বিৰুদ্ধে বিক্ষোভ কাৰ্যসূচীৰে প্ৰতিবাদ সাব্যস্ত কৰে। তিনিচুকীয়াৰ বৰগুৰিৰ কৰ্ট তিনিআলিত ছাত্ৰ সংগঠনটোৰ নেতা কৰ্মীয়ে হাতে হাতে প্ৰতিবাদী বেনাৰ পোষ্টাৰ লৈ “বিজেপি চৰকাৰ গ’বেক”, পেট্ৰলিয়াম মন্ত্ৰী ধৰ্মেন্দ্ৰ প্ৰধান মুৰ্দাবাদ”, যোগান মন্ত্ৰী মুৰ্দাবাদ আদি চৰকাৰ বিৰোধী শ্ল’গানেৰে উত্তাল কৰি তোলে। লকডাউনে আৰ্থিকভাৱে জুৰুলা কৰা সৰ্বসাধাৰণ জনতাৰ ওপৰত পুনৰ মূল্যবৃদ্ধি কৰি চৰকাৰে গ্ৰহণ কৰা জনবিৰোধী কাৰ্য কোনো কাৰণতে মানি লোৱা নহয় বুলি সংগঠনটোৰ নেতৃত্বই জনায়। লগতে এনে সামগ্ৰীৰ মূল্য শীৰ্ঘেই হ্ৰাস কৰাৰ দাবী জনায়। অন্যথা চৰকাৰৰ এনে জনবিৰোধী কাৰ্যৰ বিৰুদ্ধে আগন্তুক সময়ত প্ৰৱল প্ৰতিবাদী কাৰ্যসূচী গ্ৰহণ কৰাৰ হুংকাৰ দিয়ে। উক্ত কাৰ্যসূচীত উপস্থিত থাকে সদৌ অসম ছাত্ৰ সন্থা কেন্দ্ৰীয় কাৰ্যনিৰ্বাহক সদস্য বিনয় ডুবে, জিলা ছাত্ৰ সন্থাৰ ভাৰপ্ৰাপ্ত সভাপতি ৰাজা বলিমাৰ আৰু সাধাৰণ সম্পাদক সমৰজ্যোতি গোঁহাই।
পেট্ৰল-ডিজেল আৰু অত্যাৱশ্যকীয় সামগ্ৰীৰ মূল্যবৃদ্ধিৰ প্ৰতিবাদত তিনিচুকীয়া আছুৰ বিক্ষোভ কাৰ্যসূচী ।
কোৰোণাৰ আক্ৰান্তৰ সাক্ষ্যগ্ৰহণ কৰিছিল নগাঁৱৰ ন্যায়িক দণ্ডাধীশে । নগাঁৱৰ ন্যায়িক দণ্ডাধীশৰ কাৰ্যালয়ৰ দুগৰাকী দণ্ডাধীশসহ ৫ জনৰ দেহত কোৰোণাৰ অৱস্থিতি ।
নগাঁও : নগাঁও জিলাৰ ন্যায়িক দণ্ডাধীশৰ কাৰ্যালয়ৰ দুগৰাকী বিষয়া আৰু তিনিগৰাকী কৰ্মচাৰীসহ মুঠ ৫ জনকৈ লোকৰ দেহত ধৰা পৰিছে কোৰোণা ভাইৰাছৰ উপস্থিতি। বৃহস্পতিবাৰৰ দিনটোত ক’ভি়ড-১৯ পজিটিভ পোৱা ব্যক্তিকেইগৰাকী ক্ৰমে- ইকবাল আলম ফানাৰ্জী, ছালেহ আহাম্মদ, নিলাভ নয়ন ডেকা, দিলদাৰ হুছেইন খান আৰু মৃন্ময় জ্যোতি নাথ। ইয়াৰে ইকবাল আলম ফানাৰ্জী প্ৰথম শ্ৰেণীৰ ন্যায়িক দণ্ডাধীশ ও মুন্সিফ-১ আৰু ছালেহ আহাম্মদ অতিৰিক্ত মুখ্য ন্যায়িক দণ্ডাধীশ হিচাপে নগাঁৱৰ আদালতত কৰ্মৰত থকাৰ বিপৰীতে আন তিনিগৰাকী মুখ্য ন্যায়িক দণ্ডাধীশ কাৰ্যালয়ৰ কৰ্মচাৰী বুলি জানিব পৰা গৈছে। আনহাতে নগাঁও জিলা ন্যায়িক দণ্ডাধীশৰ কাৰ্যালয়ৰ ৫ জনকৈ বিষয়া-কৰ্মচাৰী কোৰোণাত আক্ৰান্ত হোৱাৰ খবৰ বিয়পি পৰাৰ লগে লগে একেটা চৌহদতে থকা নগাঁও জিলা উপায়ুক্তৰ কাৰ্যালয়তো সম্প্ৰতি ব্যাপক আতংকৰ সৃষ্টি হয়। কাৰণ একেটা চৌহদতে জিলাখনৰ দুয়োটাকৈ গুৰুত্বপূৰ্ণ কাৰ্যালয় থকাৰ বাবে জিলা উপায়ুক্তৰ কাৰ্যালয় আৰু ন্যায়িক দণ্ডাধীশৰ কাৰ্যালয়ৰ কৰ্মচাৰীসকল প্ৰায়ে ইজন সিজনৰ সংস্পৰ্শলৈ আহে। উল্লেখযোগ্য যে, কোৰোণাত আক্ৰান্ত ৫ জন ব্যক্তিৰেই বৰ্তমান সময়লৈকে নাই কোনো ভ্ৰমণ বৃত্তান্ত। কিন্তু যোৱা ১৬ জুনত কোৰোণাত আক্ৰান্ত এগৰাকী নাবালিকাক হাজিৰ কৰিছিল জিলা ন্যায়িক দণ্ডাধীশৰ কাৰ্যালয়ত আৰু সেই কিশোৰীগৰাকীৰ সংস্পৰ্শলৈ অহা ১২ গৰাকী আৰক্ষীকো জিলা স্বাস্থ্য বিভাগে হোম কোৱাৰেণ্টেইন কৰিছিল। সেইগৰাকী কিশোৰীৰ সাক্ষ্য গ্ৰহণৰ বাবেই অতিৰিক্ত মুখ্য ন্যায়িক দণ্ডাধীশ ছালেহ আহাম্মদসহ ৫ জন কৰ্মচাৰী কোৰোণাত আক্ৰান্ত হোৱাৰ সন্দেহ প্ৰকাশ কৰিছে স্বাস্থ্য বিভাগৰ এক সূত্ৰই।
শিৱসাগৰত ৰাজহ মন্ত্ৰী যোগেন মহনৰ প্রতিৰোধী বন্ধু সকলৰ সৈতে মত-বিনিময় । প্ৰতিৰোধী বন্ধুসকলৰ মাজত মাস্ক আৰু চেনিটাইজাৰ বিতৰণ ।
শিৱসাগৰ : অসম চৰকাৰৰ ৰাজহ আৰু দুৰ্যোগ ব্যৱস্থাপনা বিভাগৰ মন্ত্ৰী যোগেন মহনে কালি শিৱসাগৰ জিলাত উপস্থিত হৈ উপায়ুক্ত কাৰ্য্যালয়ৰ চুকাফা সভাকক্ষত জিলাখনৰ ভালেসংখ্যক প্ৰতিৰোধী বন্ধুৰ লগত এখন সভাত মিলিত হয়। সভাৰ আৰম্ভণিতে জিলা উপায়ুক্ত লক্ষীনন্দন গগৈয়ে ৰাজহ মন্ত্ৰীগৰাকীক উষ্ম আদৰণি জনোৱাৰ লগতে জিলাখনৰ প্ৰতিৰোধী বন্ধুসকলে ক’ভিড-১৯ ৰোগৰ সংক্ৰমণ ৰোধৰ ক্ষেত্ৰত তথা বানপানীৰ সময়ত প্রত্যক্ষৰূপে জড়িত হৈ প্ৰশাসনক আগবঢ়োৱা সহযোগিতাৰ বিষয়ে উল্লেখ কৰে।প্ৰতিৰোধী বন্ধুসকলক মানসিকভাৱে আৰু বেছি উদ্বুদ্ধ কৰাৰ লগতে অনুপ্ৰেৰণা যোগোৱাৰ অৰ্থে কালি তেওঁলোকৰ সৈতে এই সভাখন আহ্বান কৰা হৈছে বুলিও তেওঁ জানিবলৈ দিয়ে। উপায়ুক্ত গৰাকীয়ে প্ৰতিৰোধী বন্ধু সকলে জিলা প্ৰশাসনক নিষ্ঠা আৰু আন্তৰিকতাৰে আগবঢ়োৱা সেৱাৰ বাবে ধন্যবাদ জ্ঞাপন কৰে। সভাত ৰাজহ মন্ত্ৰী গৰাকীয়ে জিলাখনৰ প্ৰতিৰোধী বন্ধুসকলে ক’ভিড-১৯ ৰোগৰ বিৰুদ্ধে যুঁজত জিলা প্ৰশাসনক আগবঢ়োৱা সহযোগিতাৰ লগতে প্ৰাকৃতিক দুৰ্যোগৰ মোকাবিলা কৰাৰ ক্ষেত্ৰত আগবঢ়োৱা একনিষ্ঠ সেৱাৰ বাবে আন্তৰিকতাৰে শলাগ লোৱাৰ উপৰিও ধন্যবাদ জনায়। অসম চৰকাৰৰ দুৰ্যোগ ব্যৱস্থাপনা বিভাগৰ এই বিশেষ স্বেচ্ছাসেৱামূলক পদক্ষেপ “প্ৰতিৰোধী বন্ধু”ই ইতিমধ্যেই সমগ্র দেশতে জনপ্ৰিয়তা লাভ কৰিবলৈ সক্ষম হৈছে বুলি উল্লেখ কৰি ৰাজ্যখনৰ ৩৩ খন জিলাত ইতিমধ্যে প্ৰায় ২০,০০০ গৰাকী যুৱকে প্ৰতিৰোধী বন্ধু হিচাপে যোগদান কৰিছে বুলি মন্ত্ৰী গৰাকীয়ে সদৰি কৰে। তেওঁ কয় যে শিৱসাগৰ জিলাৰ ৫৪৬ গৰাকী প্ৰতিৰোধী বন্ধুৰ কৰ্মদক্ষতা আৰু সেৱাৰ মনোভাৱে যিকোনো ধৰণৰ দুৰ্যোগৰ সময়ত জনসাধাৰণৰ মনত নিশ্চয়কৈ সাহস আৰু মনোবল যোগাবলৈ সক্ষম হ’ব। তেওঁ এই ক্ষেত্ৰত মহিলা সকলকো আগবাঢ়ি আহিবলৈ আহ্বান জনায়। যিকোনো ধৰণৰ দুৰ্যোগৰ সময়ত উদ্ধাৰ আৰু সাহায্য প্ৰদানৰ সময়ত চৰকাৰ আৰু প্ৰশাসনৰ লগত জনসাধাৰণৰ সহযোগিতা নিতান্তই প্ৰয়োজনীয়। প্ৰতিৰোধী বন্ধু হিচাপে আৰু অধিক যুৱ শক্তিয়ে যোগদান কৰাৰ প্ৰয়োজনীয়তা আছে আৰু এই ক্ষেত্ৰত জিলা উপায়ুক্তক বিশেষ উদ্যোগ গ্রহণ কৰিবলৈ আহ্বান জনায়। ৰাজহ মন্ত্ৰী গৰাকীয়ে কয় যে, পৰৱৰ্তী বিভিন্ন চৰকাৰী প্ৰকল্পত প্ৰতিৰোধী বন্ধু সকলক সংযোজিত কৰাৰ ওপৰত ইতিমধ্যে চিন্তা-চৰ্চা কৰি থকা হৈছে আৰু এই ক্ষেত্ৰত প্ৰয়োজনীয় দক্ষতা বৃদ্ধিৰ বাবে তেওঁলোকক প্ৰশিক্ষণ প্ৰদান কৰাৰো পৰিকল্পনা কৰা হৈছে। প্ৰতিৰোধী বন্ধু সকলক পূর্বতকৈ অধিক শক্তিশালী কৰাৰ অৰ্থে তেওঁলোকক পৰিচয় পত্ৰ, ইউনিফৰ্ম আৰু জৰুৰী সা-সামগ্ৰী প্ৰদান কৰাৰ বিষয়েও চৰকাৰে বিশেষ গুৰুত্ব সহকাৰে বিবেচনা কৰি আছে বুলিও মন্ত্ৰী গৰাকীয়ে সদৰি কৰে। তেওঁ প্ৰতিৰোধী বন্ধু সকলক দুৰ্যোগ ব্যৱস্থাপনা আইন আৰু বিভাগীয় নীতি-নিৰ্দেশনা সমূহ ভালদৰে অধ্যয়ন কৰি ৰাইজৰ মাজত এই সম্পৰ্কে সচেতনতা বৃদ্ধিৰ বাবে উদ্যোগ গ্ৰহণ কৰিবলৈ আহ্বান জনায়। মন্ত্ৰী গৰাকীয়ে জিলাখনৰ প্ৰতিৰোধী বন্ধুসকলে অনাগত দিনত অধিক উদ্যম আৰু নিষ্ঠাৰে কৰ্ম সম্পাদন কৰি যাব বুলি দৃঢ় মতপোষণ কৰে। ৰাজহ মন্ত্ৰী গৰাকীয়ে প্ৰতিৰোধী বন্ধু সকলৰ লগত মত-বিনিময় কালত তেওঁলোকৰ অভাৱ আৰু সমস্যা সমূহৰ বিষয়ে বুজ লোৱাৰ লগতে এইসমূহ সমাধানকল্পে যথাযথ ব্যৱস্থা গ্ৰহণৰো আশ্বাস দিয়ে। কালিৰ সভাত উপস্থিত প্ৰতিগৰাকী প্ৰতিৰোধী বন্ধুক ১০ খনকৈ মাস্ক আৰু হেণ্ড চেনিটাইজাৰ প্ৰদান কৰে।
সীমান্তৰ গেলেকীত নগা পাহাৰৰ ভূমিস্খলন। বাৰিষা দৈখনা নদীৰ বাঢ়নি পানীয়ে ধ্বংস কৰিছে দুশ বিঘাৰ অধিক ভূমিৰ চাহ গছ, এহেজাৰ বিঘা ভূমিৰ খেতি নষ্ট । নদী খনন আৰু মাথাউৰি নিৰ্মাণৰ দাবী “আছা”ৰ ।
নাজিৰা : চৰকাৰৰ ভূমি সংৰক্ষণ বিভাগৰ চুড়ান্ত দায়িত্বহীনতাৰ বাবেই নাজিৰা মহকুমাৰ অসম-নাগালেণ্ড সীমান্তবৰ্তী গেলেকীত নগাপাহাৰৰ ব্যাপক ভূমিস্খলনৰ বাবে নগা পাহাৰৰ পৰা বৈ অহা দৈখনা নদীৰ বাবে সীমান্ত অঞ্চলটোৰ ক্ষুদ্ৰ চাহ খেতিয়ক সকলৰ প্ৰায় ২শ বিঘাৰ অধিক ভূমিৰ চাহ গছ ধ্বংস হোৱাৰ লগতে প্ৰায় ১ হাজাৰ বিঘা ভূমিৰ ধান খেতি নষ্ট হৈছে। নগা পাহাৰৰ পৰা বৈ অহা দৈখনা নদীৰ বাঢ়নি পানীয়ে প্ৰতিবছৰে কৃষি প্ৰধান অঞ্চলটোৰ ৰাইজৰ এনেদৰে ব্যাপক ক্ষতিসাধন কৰাত খেতিয়ক সকলে এমুঠি অন্নৰ বাবে এতিয়া হাহাকাৰ কৰিব লগা হৈছে। সেয়েহে “সদৌ অসম আদিবাসী ছাত্ৰ সন্থা”ৰ নাজিৰা আঞ্চলিক সমিতিয়ে নদীখনৰ পাৰত এটা উন্নত মানদণ্ডৰ মাথাউৰি নিৰ্মাণৰ লগতে নদীখন খননৰ দাবী জনাইছে। উল্লেখ্য যে নাজিৰা মহকুমাৰ সীমান্তবৰ্তী গেলেকীৰ লাহন গাওঁ আৰু মৰাণ গাঁৱত অৱস্হিত দৈখনা নৈখন কেইবা বছৰ ধৰি নাগালেণ্ডৰ নগা পাহাৰৰ ভূমি স্খলন আৰু কয়লা, ঝুম আদি খেতিৰ বাবে কৰা খননৰ ফলত নদীখনত ব্যাপক ভূমি স্খলন হবলৈ ধৰে। এই ভূমিস্খলনৰ ফলত নগা পাহাৰৰ পৰা ওলোৱা দৈখনা নদীখনৰ বুকু একেবাৰে বাম হৈ পৰে। যাৰ ফলস্বৰূপে বাৰিষা আৰম্ভ হোৱাৰ লগে লগে নদীখনৰ বাঢ়নী পানীয়ে সীমান্ত অঞ্চলটোত ক্ষুদ্ৰ চাহ খেতি আৰু ধান খেতিৰে জীৱন নিবাহ কৰা ক্ষুদ্ৰ চাহ খেতিয়ক সকলৰ প্ৰায় ২শ বিঘা অধিক ভূমিৰ চাহ গছ ধ্বংস কৰাৰ লগতে ধান খেতিয়ক সকলৰ প্ৰায় ১ হাজাৰ বিঘা ধান খেতি নষ্ট কৰি আহিছে। ইয়াৰ উপৰি নগা পাহাৰত অবৈধ কয়লা খননৰ ফলত নিৰ্গত বিষাক্ত গেছ মিশ্ৰিত পানীয়ে পথাৰৰ উৎপাদন ক্ষমতা হ্ৰাস কৰাৰ লগতে বিভিন্ন ধৰণৰ ছালৰ বেমাৰ আৰু সেই পানী সেৱনৰ ফলত পশুধনকে আদি কৰি জীৱ-জন্তু ,চৰাই চিৰিকতি মৃত্যু মূখত পৰি সমগ্ৰ প্ৰাকূতিক পৰিবেশটো বিনষ্ট কৰি আহিছে। নৈখনৰ এনে তাণ্ডৰ বাবে সীমান্ত অঞ্চলটোৰ প্ৰায় শতাধিক খেতিয়কে এতিয়া সংকটৰ সময়ত এমুঠি অন্নৰ বাবে হাহাকাৰ কৰি মূৰে-কপালে হাত দিব লগা হৈছে। সীমান্ত অঞ্চলটোৰ খেতিয়ক সকলে ৰাজ্য চৰকাৰৰ ভূমি সংৰক্ষণ বিভাগক এই ক্ষেত্ৰত ব্যৱস্হা গ্ৰহনৰ বাবে বাৰম্বাৰ অনুৰোধ জনোৱাৰ পাছতো বিভাগটোৱে কোনো গুৰুত্ব প্ৰদান কৰা নাই। অৱশেষত উপায়ন্তৰ হৈ “সদৌ অসম আদিবাসী ছাত্ৰ সন্থা”ৰ নাজিৰা আঞ্চলিক সমিতিয়ে দৈখনা নৈখনৰ নামদাং নদীত পৰা সংযোগস্হলীৰ পৰা নগা পাহাৰৰ দিশত ওপৰলৈ চাৰি কিলোমিটাৰ আৰু বলমা বিলৰ সংযোগস্হলীলৈ প্ৰায় ১ কিলোমিটাৰ মুঠ পাঁচ কিলোমিটাৰ অতিশীঘ্ৰে খনন কৰাৰ লগতে নদীখনৰ কাষেদি এটা উন্নত মানদণ্ডৰ মাথাউৰি নিৰ্মাণৰ ব্যৱস্থা কৰি নদীখনৰ বাঢ়নী পানী নিয়ন্ত্ৰণৰ ব্যৱস্থা কৰাৰ লগতে কৃষকসকলৰ দীৰ্ঘদিনীয়া সমস্যা সমাধানৰ দাবী জনাই কালি নাজিৰা মহকুমাধিপতিক এখন স্মাৰকপত্ৰ প্ৰদান কৰিছে। আঞ্চলিক সমিতিখনৰ সভাপতি ৰাজীৱ মিৰ্ধা আৰু সম্পাদক বিতুল কুৰ্মী য়ে স্বাক্ষৰ কৰা স্মাৰকপত্ৰখনত নদীখনৰ খনন আৰু মাথাউৰি নিৰ্মাণৰ যোগে উক্ত অঞ্চলৰ জন-ধন সুৰক্ষিত কৰাৰো দাবী জনাইছে সংগঠনটোৱে স্মাৰক পত্ৰৰ প্ৰতিলিপি ৰাজ্যৰ জল সম্পদ মন্ত্ৰী আৰু শিৱসাগৰ জিলা উপায়ুক্তকো প্ৰদান কৰে।
শিৱসাগৰ জিলা শিক্ষা বিষয়া আব্দুল জেলিলক অভিনন্দন নাজিৰা চিত্ৰ কলা কেন্দ্ৰৰ অধ্যক্ষ আলী হাইদৰৰ ।
নাজিৰা : সদ্য ঘোষিত হাইস্কুল শিক্ষান্ত পৰীক্ষাৰ ফলাফলত অসমৰ ভিতৰত শিৱসাগৰ জিলাই শীৰ্ষ স্থান আৰু উচ্চতৰ মাধ্যমিক চূড়ান্ত পৰীক্ষাতো জিলাখনৰ সন্তোষজনক ফলাফলৰ বাবে শিৱসাগৰ জিলা সংমণ্ডলৰ বিদ্যালয় সমূহৰ পৰিদৰ্শক তথা জিলা শিক্ষা বিষয়া আব্দুল জেলিলক অভিনন্দন জ্ঞাপন কৰে নাজিৰাৰ বিশিষ্ট যুৱ চিত্ৰশিল্পী তথা নাজিৰা চিত্ৰকলা কেন্দ্ৰৰ অধ্যক্ষ মহম্মদ আলী হাইদৰে। উল্লেখযোগ্য যে, হাইস্কুল শিক্ষান্ত পৰীক্ষা আৰু উচ্চতৰ মাধ্যমিক চূড়ান্ত পৰীক্ষাত সন্তোষজনক ফলাফলৰ উপৰি বিগত সময়ছোৱাত গুণোৎসৱত উন্নত ফলাফল দেখুওৱাৰ বাবে শিৱসাগৰ জিলা বিদ্যালয় সমূহৰ পৰিদৰ্শক তথা জিলা প্ৰাথমিক শিক্ষা বিষয়া আব্দুল জেলিলক চিত্ৰশিল্পী আলী হাইদৰে নিজে অংকন কৰা পৰিদৰ্শক গৰাকীৰ এখন প্ৰতিচ্ছবি আৰু ফুলাম গামোচাৰে নিজ কাৰ্যালয়ত আজি অভিনন্দন জ্ঞাপন কৰে। এই সময়ত ডায়েটৰ বিষয়া দীপাংকৰ চক্ৰৱৰ্তী, নাজিৰা খণ্ড প্ৰাথমিক শিক্ষা বিষয়া কাৰ্যালয়ৰ কৰ্মচাৰী চৈয়দ মহম্মদ মহচিন হুছেইন আৰু মুস্তাক আহমেদ উপস্থিত থাকে।
ৰাছিয়াৰ পৰা মিগ-২৯ ক্ৰয়ত অনুমোদন।
দৈনন্দিন বাৰ্তা ডেস্ক :
প্ৰতিৰক্ষা অধিগ্রহণ কাউন্সিল (ডিএচি)য়ে বৃহস্পতিবাৰে ৰাছিয়াৰ পৰা ২১ খন মিগ-২৯ৰ লগতে ৫৯ খন মিগ-২৯ যুদ্ধ বিমান আৰু ১২খন ছুখই-৩০ এমকেআই ক্ৰয়ৰ বাবে প্ৰস্তাৱত অনুমোদন দিছে ৷ ৰাছিয়াৰ পৰা মিগ-২৯ ক্ৰয় আৰু উন্নিতকৰণত ৭৪১৮ কোটি টকা আৰু ছুখই-৩০ এমকেআইৰ খৰচ ১০৭৩০ কোটি টকা বুলি প্ৰতিৰক্ষা মন্ত্ৰালয়ৰ বিবৃতিত প্ৰকাশ ৷ বৰ্তমান অৱস্থাত বায়ুসেনাৰ শক্তি বৃদ্ধি কৰাটো গুৰুত্বপূৰ্ণ ৷ এই প্ৰস্তাৱৰ প্ৰতি প্ৰায় ৩৮৯০০ কোটি টকা অনুমোদন কৰা হৈছে ৷
পেট্ৰ’ল-ডিজেল আৰু অত্যাৱশ্যকীয় সামগ্ৰীৰ মূল্যবৃদ্ধি ৷ নদুৱাৰ ব্লক কংগ্ৰেছৰ প্ৰতিবাদ ৷
জামুগুৰিহাট : পেট্ৰল,ডিজেল আৰু অত্যাৱশ্যকীয় সামগ্ৰীৰ অস্বাভাৱিক মুল্য বৃদ্ধিৰ প্ৰতিবাদত আজি নদুৱাৰ ব্লক কংগ্ৰেছ কমিটিৰ উদ্যোগত জামুগুৰিহাটৰ চৈবাৰীৰ কেন্দ্ৰস্থলত অৱস্থান ধৰ্মঘট আৰু ধৰ্ণা কাৰ্যসূচী পালন কৰে৷সম্প্ৰতি চলি থকা কৰনাৰ আতংকৰ বাবে নদুৱাৰ ব্লক কংগ্ৰেছৰ বিষয়ববীয়াই সামাজিক দুৰত্ব পালন কৰি ৰূপায়ন কৰা প্ৰতিবাদী ধৰ্ণা কাৰ্যসূচীত বিজেপি চৰকাৰৰ বৰ্তমান কাৰ্যকালত চলি থকা পেট্ৰ’ল ডিজেলকে ধৰি অত্যাৱশ্যকীয় সামগ্ৰীৰ অত্যাধিক মূল্যবৃদ্ধিৰ প্ৰতিবাদত ‘হাতে হাতে প্লে কাৰ্ড লৈ” বিজেপি গ’ বেক’, ‘বিজেপি চৰকাৰৰ হায় হায়’ ধ্বনিৰে প্ৰতিবাদস্থলি মুখৰিত কৰি তোলে ৷ আজিৰ এই কাৰ্যসূচীত কংগ্ৰেছ দলৰ জিলা পৰ্য্যায়ৰ বহু কেইবাগৰাকী বিষয়ববীয়াৰ উপৰি মহিলা কংগ্ৰেছ,যুৱ কংগ্ৰেছ এন এছ ইউ আইৰ বিষয়ববীয়া উপস্থিত আছিল ৷ প্ৰতিবাদৰ অন্তত চতিয়া ব্লক কংগ্ৰেছ কমিটিৰ তৰফৰ পৰা নদুৱাৰ খণ্ড উন্নয়ন বিষয়াৰ জৰিয়তে ৰাষ্ট্ৰপতিলৈ এখন স্মাৰক পত্ৰ প্ৰেৰণ কৰে ৷
৭১ তম্ বন মহোৎসৱত উপলক্ষে “ৰুডছেটি” নগাঁৱৰ সৌজন্যত বৃক্ষৰোপণ কাৰ্যসূচী সম্পন্ন ৷
ননৈ : ৭১ তম বন মহোৎসৱ উপলক্ষে “ৰুডছেটি” নগাঁৱৰ সৌজন্যত আৰু নগাঁও বন সংমণ্ডলৰ সহযোগত শেনছোৱাত অৱস্থিত ৰুডছেটি নগাঁৱৰ নামত আৱণ্টিত স্থানত বৃক্ষৰোপণ কাৰ্যসূচীটি আজি চৰকাৰী নীতি নিৰ্দেশনা অনুযায়ী সফলতাৰে পালন কৰা হয় । বিশ্বজুৰি নভেল কৰোণা ভাইৰাছৰ সংক্ৰমণৰ পৰিপ্ৰেক্ষিতত অনুষ্টুপীয়াকৈ আয়োজিত এই অনুষ্ঠানত সম্পূৰ্ণ সামাজিক দূৰত্ব মানি এটিকৈ গছপুলি ৰূপন অনুষ্ঠানৰ শুভাৰম্ভ কৰে নগাঁও বন সংমণ্ডল বিষয়া ৰাজেন চৌধুৰী আৰু নগাঁও সদৰ আঞ্চলিক বন বিষয়া জয়ন্ত কুমাৰ গোস্বামীয়ে । উক্ত অনুষ্ঠানত “ৰুডছেটি” নগাঁৱৰ সঞ্চালক প্ৰণৱ কুমাৰ শৰ্মা প্ৰশিক্ষক দেৱজিৎ শৰ্মাকে প্ৰমুখ্যে কৰি অন্যান্য বিষয়া সকল উপস্থিত থাকে ।
বিশিষ্ট লেখক যতীন্দ্ৰনাথ গোস্বামীৰ স্বাস্থ্যৰ বুজ ললে মুখ্যমন্ত্ৰী প্ৰেছ উপদেষ্টা হৃষীকেশ গোস্বামীয়ে ।
বিগত কেইবামাহ ধৰি অসম মুক্তি যুঁজাৰু সন্মিলনীৰ ভুতপৰ্ব সভাপতি তথা অসম সাহিত্য সভাৰ প্ৰাক্তন উপসভাপতি, বিশিষ্ট লেখক যতীন্দ্ৰনাথ গোস্বামী’ বাৰ্ধক্য জনিত ৰোগত আক্ৰান্ত হৈ শৰ্যাগত অৱস্থাত আছে ৷ বিশিষ্ট সাহিত্যিক গৰাকীৰ স্বাস্থ্যৰ বুজ ল’বলৈ আজি মুখ্যমন্ত্ৰী প্ৰেছ উপদেষ্টা হৃষীকেশ গোস্বামীয়ে তেওঁৰ গুৱাহাটীস্থিত বাসগৃহত উপস্থিত হয় ৷ বাৰ্ধক্য জনিত ৰোগত আক্ৰান্ত ৯৬ বছৰীয়া সাহিত্যিক গৰাকীয়ে বিগত কেইবামাহ ধৰি শয্যাগত অৱস্থাত আছে ৷ মুখ্যমন্ত্ৰীৰ প্ৰেছ উপাদেষ্টা গৰাকীয়ে সাহিত্যিক গৰাকীৰ স্বাস্থ্য সম্পৰ্কে পৰিয়ালৰ লগত আলোচনা কৰে৷ লগতে তেওঁ যতীন্দ্ৰনাথ গোস্বামীৰ স্বাস্থ্যৰ আশু আৰোগ্যৰ বাবে ইশ্বৰৰ ওচৰত প্ৰাৰ্থনা জনায় ৷ উল্লেখ্য যে ইয়াৰ পুৰ্বে ফ্ৰেব্ৰুৱাৰীৰ মাহত হৃষীকেশ গোস্বামীয়ে বিশিষ্ট সাহিত্যিক তথা অসম মুক্তিযুজাৰু সন্মিলনীৰ ভুতপৰ্ব সভাপতি যতীন্দ্ৰনাথ গোস্বামীৰ স্বাস্থ্যৰ বুজ লৈছিল ৷
টীয়কত অসম চৰকাৰৰ কেবিনেটে গ্ৰহণ কৰা খিলঞ্জীয়া বিৰোধী সিদ্ধান্তৰ প্ৰতিলিপি দাহ কৰিলে আছুৱে ।
টীয়ক : অসম চৰকাৰৰ কেবিনেটে খিলঞ্জীয়া বিৰোধী সিদ্ধান্ত বিৰুদ্ধে জাঙুৰ খাই উঠিছে সদৌ অসম ছাত্ৰ সন্থা। আছুৰ আহ্বানত আজি টীয়কৰ মিধাখাট তিনিআলিত টীয়ক আঞ্চলিক ছাত্ৰ সন্থাই চুতীয়া জাতি ছাত্ৰ সন্থা টীয়ক আঞ্চলিকৰ সহযোগত লক ডাউনৰ নীতি-নিয়মৰ মাজেৰে সামাজিক দূৰত্ব ৰাখি অসম চৰকাৰৰ খিলঞ্জীয়া বিৰোধী ভূমি নীতিৰ বিৰোধিতাৰে এই ভূমিনীতিৰ প্ৰতিলিপি দাহ কৰে। লগতে কেবিনেটে অনুমোদন জনোৱা এই ভূমিনীতিক বাতিল কৰি খিলঞ্জীয়াৰ পক্ষত থিয় দিবলৈ সৰ্বানন্দ সোণোৱাল নেতৃত্বাধীন চৰকাৰক দাবী জনাই সদৌ ছাত্ৰ সন্থাই নহ’লে তীব্ৰ আন্দোলন গঢ়ি তুলিব বুলি হুংকাৰ প্ৰদান কৰে।