দৰং :

দৰং-ওদালগুৰিৰ সীমান্তৰ কুঁহিয়াৰকুছিত এটি মৃতদেহক কেন্দ্ৰ কৰি এক  উত্তেজনাময় পৰিস্থিতিৰ সৃষ্টি হয়। খৈৰাবাৰী আৰক্ষী থানা এলেকাৰ এই গাঁওখনত  প্ৰশাসনে আৰক্ষী  মোটায়েম কৰি পৰিস্থিতি নিয়ন্ত্ৰণ কৰে। ঘটনা বিবৰণী মতে, লক ডাউনৰ বাবে ভূপেন ডেকা নামৰ কয়দীজনক ওদালগুৰি জিলা কাৰাগাৰৰ পৰা ঘৰলৈ পঠিয়াইছিল প্ৰশাসনে। সেই অনুসৰি ভূপেন ডেকা নিজগৃহত থকা অৱস্থাত শনিবাৰে ৰহস্যজনকভাৱে মৃত্যু হয় লোকজনৰ৷ মদ্যপান কৰি পত্নীক  নিৰ্যাতন চলোৱা অভিযোগত কাৰবাস খাতিবলগীয়া হৈছিল ভূপেন ডেকা নামৰ লোকজনে৷  জানিব পৰা মতে ভূপেনৰ মৃত্যুৰ সময়ত ঘৰত নাছিল আশা হিচাপে কৰ্মৰত পত্নী উষা ৰাণী ডেকা। এটি পুত্ৰ সন্তানৰ পিতৃ ভূপেনৰ মৃত্যু হোৱাৰ পিছত স্থানীয় একাংশ লোক আৰু পৰিয়ালৰ সদস্যসকলে ভূপেন ডেকাক বিহপান কৰোৱাই পৰিকল্পিতভাৱে হত্যা কৰাৰ অভিযোগ তুলি পৰিস্থিতি উত্তপ্ত কৰি তোলে। মৰণোত্তৰ পৰীক্ষা কৰি আৰক্ষীয়ে মৃতদেহ ঘৰলৈ অনাত ৰাইজে বাতৰি লিখা পৰলৈ সৎকাৰ কৰিবলৈ অস্বীকাৰ কৰিছে মৃতদেহ। ঘটনাস্থলীত ভেৰগাঁওৰ দণ্ডাধীশ নিৰ্মল কুমাৰ শৰ্মা উপস্থিত হৈ উত্তপ্ত পৰিস্থিতি নিয়ন্ত্ৰণ কৰে।

নাজিৰা : কৰ’ণাৰ ভয়াৱহতাৰ মাজতেই আজি পুৱাৰে পৰি হঠাৎ বাঢ়ি অহা দিখৌৰ বাঢ়নী পানীয়ে নাজিৰা মহকুমাৰ বিভিন্ন অঞ্চলত ভয়ংকৰ পৰিস্থিতি সৃষ্টি কৰি তুলিছে । বিশেষকৈ সোন্দৰ পুখুৰী, বাউলী মৈদাম,বামুণ পুখুৰী , চণ্টক বিহুবৰ , লক্ষ্মীজান , চানবছা , ওপৰ নাজিৰা , নাজিৰা নগৰৰ ৬ আৰু ৭ নং ৱাৰ্ড , মঠিয়াছিগা , আচলপথাৰ আদি বিভিন্ন অঞ্চলৰ ঘৰ – ভেটি বুৰি  এই বাঢ়নি পানীয়ে বিস্তৰ ক্ষতি সাধন কৰিছে । এই অঞ্চলৰ লোকসকল বিশেষকৈ শাক পাচলিৰ খেতি অৰ্থাৎ বাম খেতিৰ ওপৰতেই নিৰ্ভৰ কৰি জীৱিকা উপাৰ্জন কৰি আছে কিন্তু বৰ্তমান বাঢ়ি অহা পানীক লৈ তেওঁ লোক চিন্তিত হৈ পৰিছে ।  অঞ্চলৰ চাপৰিসমূহৰ পৰাই নাজিৰা আৰু শিৱসাগৰ বিভিন্ন অঞ্চলত শাক পাচলি যোগান ধৰি অহা হয় , সে‌য়ে এই বাঢ়নি পানীয়ে বৃহৎ প্ৰত্যাহবানৰ সৃষ্টি কৰিছে । তীব্ৰ গতিত অহা বাঢ়নি পানীৰ সোঁতৰ ফলত সুন্দৰ পুখুৰীৰ দিখৌৰ পাৰৰ মাটি চপৰা চপৰে খহিব ধৰিছে । ইয়াৰোপৰি  নাজিৰা ১ নং ৱাৰ্ডত আজিও দুটাকৈ ঘৰ দিখৌৰ পানীয়ে উটুৱাই নিয়ে আৰু অঞ্চল সমূহৰ বহু কেইটা ঘৰ এই বানত ডুব গৈছে । এনেদৰেই যদি পানী পৰিমাণ বাঢ়ি গৈ থাকে তেন্তে নাজিৰা অঞ্চলটো এক বৃহৎ প্ৰত‌্যাহবানৰ সন্মুখীন হ’ব লাগিব । ইফালে নাজিৰা সমষ্টিৰ বিধায়ক তথা অসম বিধান সভাৰ বিৰোধী দলপতি দেৱব্ৰত শইকীয়াই বানপীড়িত অঞ্চল সমূহ পৰিভ্ৰমণ কৰি ক্ষয় – ক্ষতি আৰু পৰিস্থিতি বুজ লোৱাৰ লগতে প্ৰশাসন কৰ্তৃপক্ষক তাৎক্ষণিক ভাৱে কাৰ্য ব্যৱস্থা গ্ৰহণৰ বাবে নিবেদন জনাই আৰু মহকুমা প্ৰশাসনৰ বিষয়া – বৰ্গই অঞ্চল সমূহৰ বান পৰিস্থিতিৰ বিষয়ে বুজ লৈছে ।

দৈনন্দিন বাৰ্তা :

দৰঙত সংঘটিত হৈছে নাভূত – নাশ্ৰুত কাণ্ড ৷ জিলাখনৰ ছিপাঝাৰ সমষ্টিৰ ঘোঁৰাবান্ধা পঞ্চায়তত অঘটন ৷ পঞ্চায়ত সচিব আৰু সভাপতিৰ সন্মুখতে সভাপতিৰ আসনত বহিল উপ-সভানেত্ৰী ৷ ইয়াকে লৈ ব্যাপক প্ৰতিক্ৰিয়া ৷ দৰং জিলাৰ ছিপাঝাৰ উন্নয়ন খণ্ডৰ অধীনস্থ ঘোঁৰাবান্ধা গাঁও পঞ্চায়তত সভাপতি আৰু সচিবৰ সন্মূখতে সংঘটিত হয় নোহোৱা নোপোজা এক ঘটনা । যি ঘটনাই লজ্জিত কৰি পেলাইছে সচেতন মহলৰ লগতে পঞ্চায়ত আৰু গ্ৰাম্যোন্নয়ন বিভাগকো । উপ-সভানেত্ৰী গৰাকীৰ বিৰুদ্ধে পঞ্চায়ত সভাপতিৰ ছিপাঝাৰ থানাত এজাহাৰ দাখিল ৷ ঘটনা অনুসৰি পঞ্চায়ত খনত  সভাপতি আৰু সচিবৰ আহ্বানত সভাপতিৰ কোঠাত  অনুষ্ঠিত হৈছিল এখন বিশেষ সভা । কিন্তু অনাস্থা সম্পৰ্কীয় এই সভাখনত ৭ গৰাকী বিক্ষুব্ধ সদস্য আৰু সদস্যাৰ গোপন নিৰ্দ্দেশত পঞ্চায়তখনৰ বিজেপি দলৰ উপ- সভানেত্ৰী গৰাকীয়ে  পঞ্চায়ত সভাপতি হীৰকজ্যোতি নাথ আৰু সচিব দীপু কুমাৰ নাথৰ সন্মূখতে  সন্মানীয় সভাপতিৰ আসনত বহি সভা চলাবলৈ লোৱাত  হতভম্ব হৈ পৰে সভাপতি আৰু সচিব । কোনো ধৰনৰ গুৰু গোসাই নমনা সভাপতিৰূপী উপ-সভানেত্ৰীৰ   এনে গৰ্হিত কায্যক পঞ্চায়তখনৰ সচেতন লোকসকলে ধিক্কাৰ দিছে ৷ নীৰ্ভিক আৰু স্পষ্টবাদী পঞ্চায়ত সভাপতি হীৰকজ্যোতি নাথৰ বিৰুদ্ধে দুৰ্নীতিৰ কোনোধৰনৰ অভিযোগ নথকা দুৰ্নীতিৰ সৈতে আপোচ নকৰা উদীয়মান সাংস্কৃতিক কৰ্মী হীৰকজ্যোতি নাথক কৌশলেৰে পদবীৰ পৰা ক্ষমতাচ্যুত কৰিবলৈ কৰা অভিসন্ধিৰ বাবে সভাপতি হীৰকজ্যোতি নাথে ছিপাঝাৰ থানাত উপ-সভানেত্ৰীৰ বিৰুদ্ধে এজাহাৰ দাখিল কৰাৰ লগতে সচেতন ৰাইজে উপ-সভানেত্ৰীৰ কাৰ্যত গৰিহণা দিছে ৷

নগাঁও : অতি উদ্বেগজনক ভাৱে নগাঁঁও জিলাত বৃদ্ধি পাইছে কৰ’নাত আক্ৰান্ত লোকৰ সংখ্যা।  কালি সন্ধিয়াৰ পৰা আজি বিয়লি পৰ্যন্ত জিলাখনত মুঠ ৪৪ গৰাকী লোক ক’ভিড-১৯ ত আক্ৰান্ত হোৱাটো নিশ্চিত কৰা হৈছে বুলি নগাঁও জিলাৰ স্বাস্থ্য বিভাগৰ সূত্ৰই জনাইছে। নগাঁও জিলাৰ স্বাস্থ্য বিভাগৰ যুটীয়া সঞ্চালক ডাঃ অতুল চন্দ্ৰ পাটৰে জনোৱা মতে, যোৱা বাৰ ঘন্টাৰ ভিতৰত জিলা খনত ক’ভিড-১৯ পজিটিভত আক্ৰান্ত বুলি নিশ্চিত কৰা ৪৪গৰাকী লোকৰ ভিতৰত ১৮ গৰাকী সেনা জোৱানো আছে। এওঁলোক জিলা খনৰ মিছা সেনা ছাউনীত কৰ্মৰত। স্বাস্থ্য বিষয়া গৰাকীয়ে প্ৰকাশ কৰা মতে, এই আটাই কেইগৰাকী সেনা জোৱানেই ছুটী লৈ নিজ নিজ ঘৰলৈ বুলি বহিঃৰাজ্যলৈ গৈছিল। ছুটী অন্ত পৰাত শেহতীয়াকৈ তেওঁ লোক সেনা ছাউনীলৈ ওভটি আহিছিল। কিন্তু বহিঃ ৰাজ্য ফেৰৎ এই সেনা জোৱান কেইজনৰ শ্বাৱ মিছা চাউনীতে সংগ্ৰহ কৰি ক’ভিড-১৯পৰীক্ষাৰ বাবে বিজ্ঞানগাৰলৈ পঠিওৱা হৈছিল।আজি তেওঁ লোকৰ ক’ভিড পৰীক্ষাৰ প্ৰতিবেদন প্ৰকাশ পোৱাত তেওঁ লোক ক’ভিড-১৯ পজিটিভত আক্ৰান্ত হোৱাটো নিশ্চিত হৈছে। ইপিনে,জিলা খনৰ বহিঃ ৰাজ্য ফেৰৎ আন ২৬গৰাকী লোকো ক’ভিড-১৯ পজিটিভত আক্ৰান্ত হোৱাটো নিশ্চিত হৈছে বুলি ডাঃ পাটৰে জনাইছে। কৰ’ণাত আক্ৰান্ত সেনা জোৱান কেইজনক ইতিমধ্যে তেজপুৰৰ সেনা চিকিৎসালয়ত ভৰ্তি কৰোৱা হৈছে। আনহাতে বহিঃ ৰাজ্য ফেৰৎ আন ২৬গৰাকী লোকক নগাঁও ভোগেশ্বৰী ফুকননী অসামৰিক চিকিৎসালয়ৰ ক’ভিড-১৯হাস্পতালত ভৰ্তি কৰোৱা হৈছে বুলি ডাঃ পাটৰে জনাইছে। ইপিনে,যোৱা বাৰ ঘন্টাত জিলা খনত কৰ’ণাত আক্ৰান্ত ৪৪গৰাকী লোককে লৈ এই পৰ্যন্ত  জিলাখনত ক’ভিড -১৯ পজিটিভত আক্ৰান্ত লোকৰ সংখ্যা ৪৫৪ জনলৈ বৃদ্ধি পালে।  এনেদৰে জিলা খনত প্ৰতিদিনে কৰ’নাত আক্ৰান্তৰ সংখ্যা বৃদ্ধি পোৱাত নগাঁৱৰ ৰাইজৰ মাজত শংকা বৃদ্ধি হৈছে। অৱশ্যে জিলা খনত কৰ’ণা আক্ৰান্ত লোক সকলৰ ভিতৰৰ দুজনমানক বাদ দি আটাইবোৰেই  বহিঃৰাজ্যৰ পৰা ওভটি অহা লোক। ইতিমধ্যে বহিঃ ৰাজ্যৰ পৰা নগাঁৱলৈ প্ৰায় ১১০০০ লোক ওভটি আহিছে। জিলা খনত কৰ’ণাতংকৰ মাজতে ভালেসংখ্যক কৰ’ণা ৰোগী সুস্থ হৈ ঘৰলৈ ওভটি যোৱা পৰিলক্ষিত হৈছে।আজিও নগাঁও ভোগেশ্বৰী ফুকননী অসামৰিক চিকিৎসালয়ৰ ক’ভিড-১৯ হাস্পতালৰ পৰা ১৬জনক আৰু উজৰাগাঁও আদৰ্শ চিকিৎসালয়ৰ ক’ভিড-১৯হাস্পতালৰ পৰা ৬জন লোক সহ মুঠ ২২জন লোকক ঘৰলৈ যাবলৈ অনুমতি দিয়া হৈছে।

দৈনন্দিন বাৰ্তাৰ সেৱা, ডিৰাক সীমান্ত :

যোৱা ২৭ মে’ৰ পূৱা বাঘজান বি জি আৰ ৫ নং গেছ কূপত বিস্ফোৰণ সংঘটিত হৈ অপৰিবৰ্তিত অৱস্থাত নিৰ্গমন হৈ আছিল তেল সংমিশ্ৰিত গেছ । চিংগাপুৰৰ পৰা অহা বিশেষজ্ঞ দলটোৱে ১৪ দিনৰ দিনা তেল সংমিশ্ৰিত গেছ নিৰ্গমণ নিয়ন্ত্ৰণ কৰিবলৈ চেষ্টা কৰাৰ সময়তে অগ্নিকাণ্ডৰ সূত্ৰপাত ঘটি বিভিন্নজনৰ ঘৰবাৰী নিঃশেষ হ’ল । উক্ত অগ্নিকাণ্ডৰ পৰা নিজকে ৰক্ষা কৰিবলৈ জলাশয়ত জাপ দিয়াৰ ফলত প্ৰাণ গৈছিল অইল ইণ্ডিয়া লিমিটেডৰ অগ্নি নিৰ্বাপক বাহিনীৰ দুজনকৈ কৰ্মচাৰী । লএতিয়াও অঞ্চলটোৰ ৰাইজে ভয়ত মৰমৰ নিজ ঘৰখন এৰি এতিয়া থাকিব লগা হৈছে আশ্ৰয় শিবিৰত । বাঘজান কাণ্ডই সমগ্ৰ বাঘজানৰ লগতে মাগুৰি মতাপুং বিল আৰু ডিব্ৰু ছৈখোৱা ৰাষ্ট্ৰীয় উদ্যানৰ জৈৱ বৈচিত্ৰৰ প্ৰতি কঢ়িয়াই অনা ভাবুকিৰ প্ৰতি লক্ষ্য ৰাখি  যোৱা ১৯ জুন তাৰিখৰ অসম প্ৰদূষণ নিয়ন্ত্ৰণ পৰিষদৰ WB/DIB/T-396/08-09/243-A/131 নং পত্ৰ যোগে বাঘজান তৈলক্ষেত্ৰৰ সকলো ড্ৰিলিং আৰু খনন কায্য বন্ধ কৰিবলৈ জাননী জাৰি কৰিছিল যদিও অইল ইণ্ডিয়া কৰ্তৃপক্ষই অসম প্ৰদূষণ নিয়ন্ত্ৰণ পৰিষদৰ জাননীক বৃদ্ধাঙুষ্ঠ প্ৰদৰ্শন কৰি আজিও সকলো কাম-কাজ অব্যাহত ৰাখিছে । অইল ইণ্ডিয়াৰ এনে কাৰ্যক অসম জাতীয়তাবাদী যুৱ ছাত্ৰ পৰিষদৰ তিনিচুকীয়া জিলা সমিতিৰ সভাপতি সুৰজিত মৰাণে তীব্ৰ গৰিহণা দিয়াৰ লগতে অতি শ্ৰীঘে সকলো খনন, ড্ৰিলিং কাৰ্য বন্ধ কৰি জুই নিৰ্বাপনত উঠি পৰি লাগিবলৈ দাবী জনাইছে আৰু ক্ষতিগ্ৰস্তসকলক উচিত ক্ষতিপূৰণ দিবলৈ দাবী জনাইছে । আনফালে সচেতন মহলৰ মাজতো বিষয়টোৱে ব্যাপক চৰ্চা লাভ কৰিছে । অইল ইণ্ডিয়াৰ এনেধৰণৰ সঠকাৰী সিদ্ধান্তৰ বাবে অনাগত দিনত মাগুৰি মতাপুং বিল, ডিব্ৰু ছৈখোৱা ৰাষ্ট্ৰীয় উদ্যানৰ লগতে সমগ্ৰ অঞ্চটোৰ জৈৱ বৈচিত্ৰ যে একেবাৰে নিঃশেষ যে নহব সেয়া ন-দি কব নোৱাৰি । 

ডবকা: যমুনামুখত ভয়াৱহ খহনীয়াই নিদ্ৰা হৰণ কৰিছে নৈ পৰীয়া ৰাইজৰ । হোজাইৰ যমুনামুখৰ ১০ টা কৈ পৰিয়াল খহনীয়াৰ কবলত পৰিছে । যমুনামুখ পাতিদয়া গাঁৱৰ দহটা পৰিয়ালৰ বাসগৃহ নিখাৰী নৈৰ গৰাখহনীয়াত অধিকাংশ ম্যাদি মাটিসহ বাৰী জাহ যায়। পৰিয়ালকেইটাৰ নিজৰ ম্যাদি পট্টাত থকা কেবাটাও বাসগৃহ ইতিমধ্যেই খহনীয়াৰ কবলত পৰি নৈৰ বুকুত জাহ গৈছে। ভুক্তভোগীৰ মন্তব্য হয় চৰকাৰে আমাক গুলীয়াই মাৰক, নহলে আমাক খহনীয়াৰ কবলৰ পৰা ৰক্ষা কৰক। খহনীয়াৰ কবলত পৰা দহটা পৰিয়ালৰ মাজত আতংক বিৰাজ কৰিছে । যিকোনো মূহুৰ্ততে বাকীবোৰ ঘৰ কেইটা নৈৰ বুকুত খহি পৰাটো সম্ভাৱনা প্ৰকট হৈ পৰিছে। ভুক্তভোগীৰ দাবী চৰকাৰ তথা স্থানীয় বিধায়কে শীঘ্ৰে এই অঞ্চলটোত খহনীয়া প্ৰতিৰোধৰ ব্যৱস্থা গ্ৰহণ কৰক।