গেলেকী

 সামাজিক মাধ্যমত অপপ্ৰচাৰ চলাই আতংকিত কৰিব বিচৰা লোকৰ ওপৰত শেন চকু অসম আৰক্ষী চাইবাৰ চেইলৰ । ছ’চিয়েল মিডিয়া ফেচবুকত আপত্তিজনক মন্তব্যৰে ভুৱা প্ৰচাৰ চলাই আটক হ’ব লগা হ’ল নাজিৰাৰ এজন যুৱক । ৪জুনৰ দিনা নাজিৰা মহকুমা ৰজাপুলৰ মিণ্টু দিহিঙ্গীয়া (২৮) নামৰ এজন যুৱকে নিজা ফেচবুক একাউণ্টৰ পৰা কৰ’না ৰোগী সন্দৰ্ভত এক আপত্তিজনক উৰা বাতৰি প্ৰচাৰ কৰি ৰাইজক বিভ্ৰান্তি কৰাৰ চেষ্টা চলাই । শিৱসাগৰ জিলা আৰক্ষী অভিযোগ অনুসৰি গড়গাঁও কোৱাৰেণ্টাইন চেণ্টাৰটোৰ পৰা এজন কৰ’না ৰোগী পলায়ন কৰিছে । খবৰ অনুসৰি ৰোগীজন নাজিৰা মলাগাওঁৰ নিৱাসী । সামাজিক মাধ্যমত কৰ’না আতংক মাজত উক্ত ভুৱা প্ৰচাৰ কৰাৰ অভিযোগ ৰজাপুলৰ মিণ্টু দিহিঙ্গীয়াৰ বিৰুদ্ধে । ঘটনা সন্দৰ্ভত আৰক্ষী চাইবাৰ চেইলে সমূহ ঘটনা তদন্ত কৰি যুৱকজনে দিয়া ফেচবুকৰ পুষ্টটি ভুৱা অভিহিত কৰে । অপৰাধীক ফেচবুক একাউণ্টৰ জড়িয়তে আৰক্ষীয়ে চিনাক্ত কৰি ৪জুনৰ আবেলি অভিযান চলাই গ্ৰেপ্তাৰ কৰিছে । সামাজিক মাধ্যমত ভুৱা প্ৰচাৰ চলোৱা ধৃত যুৱকজনৰ বিৰুদ্ধে নাজিৰা আদৰ্শ আৰক্ষী থানাই এক গোচৰ ৰুজু কৰি আৰু অধিক তথ্য লাভৰ বাবে জেৰা অব্যাহত ৰাখিছে ।

ৰহা

লোক সংস্কৃতিৰ বিশিষ্ট গবেষক , ৰহাৰ এগৰাকী জেষ্ঠ নাগৰিক , অৱসৰপ্ৰাপ্ত শিক্ষাবিদ , ৰহা নগৰৰ ১নং ৱাৰ্ডৰ গড়মাৰি নিবাসী চাও লোকেশ্বৰ গগৈ চিকিৎসাধীন । যোৱা কালি লোক সংস্কৃতিৰ গবেষক গৰাকীৰ শাৰীৰিক অসুস্হতাৰ বাবে গুৱাহাটীৰ ছয়মাইলৰ জি. এন. আৰ . চি.ত ভৰ্তি কৰা হৈছে । ৰহাৰ বিভিন্ন দল,সংগঠনে বিশিষ্ট গবেষক গৰাকীৰ আশু আৰোগ্য কামনা কৰিছে ।

কৰিমগঞ্জ

কৰিমগঞ্জৰ বাৰইগ্ৰাম এলেকাৰ ইলাশপুৰ গাঁওত আজি এক চাঞ্চল্যকৰ ঘটনা সংঘটিত হৈছে । সন্তানক বিষ খোৱাই নিজেও  আত্মহত্যা কৰিলে এগৰাকী পিতৃয়ে  । পিতৃ মঞ্জুৰ আহমেদে পুত্ৰক বিষপান কৰাই নিজেও বিষ পান কৰিছিল । এই ঘটনাৰ পিছত  পৰিয়ালৰ লোকে পিতা পুত্ৰক লৈ যোৱা হৈছিল নিলামবজাৰ প্ৰথমিক স্বাস্থ্য কেন্দ্ৰত । স্বাস্থ্য কেন্দ্ৰত যোৱাৰ পিছত তাত থকা  কৰ্তব্যৰত চিকিৎসকে  পিতা পুত্ৰক মৃত বুলি ঘোষনা কৰে । অত্যন্ত নম্ৰ স্বভাবৰ যুৱক মঞ্জুৰ আহমেদ এটা সময়ত মুম্বাইত আজমল পাৰফিউম কোম্পানীত কৰ্মৰত আছিল । বিগত কিছু মাহৰ পৰাই ঘৰত কৰ্মহীন আছিল যুৱকজন । আনহাতে  ক’ৰোনাৰ ভয়াবহ সংক্ৰমনৰ ফলত কিছুদিনৰ পৰাই হতাশ হৈ পৰিছিল মঞ্জুৰ আহমেদ ।হতাশাত ভুগি থকা বাবে আত্মহত্যাৰ পথ বাচি লোৱা বুলি এলেকাৰ লোকে সন্দেহ প্ৰকাশ কৰিছে। । আচলতে কি কাৰনত এগৰাকী নম্ৰ স্বভাবৰ যুৱকে নিজৰ ছমহীয়া সন্তানক লৈ আত্মহত্যাৰ হত্যাৰ দৰে পথ বাছি লৈছে এয়া এতিয়াও ৰহস্যৰ আবৰ্তত । আৰক্ষীৰ উচিত তদন্তৰ অন্তত হয়তো পোহৰলৈ আহিব আত্মহত্যাৰ মুল ৰহস্য।

সোণতলী

দক্ষিণ কামৰূপৰ ছয়গাঁও সমষ্টিৰ অন্তৰ্গত তথা গৰৈমাৰী উন্নয়ন খণ্ডৰ অধীনস্থ দুখনকৈ গাওঁ পঞ্চায়তৰ পঞ্চায়ত সভানেত্ৰীক দলৰ পৰা বহিস্কাৰ কৰা হয়। উল্লেখ্য যে ভাৰতীয় জাতীয় কংগ্ৰেছ দলৰ কামৰূপ জিলা কংগ্ৰেছ কমিটীৰ নিৰ্দেশমৰ্মে গৰৈমাৰী ব্লক কংগ্ৰেছ কমিটিয়ে গৰৈমাৰী উন্নয়ন খণ্ডৰ অধীনস্থ ১২ নম্বৰ মাজোৰটোপ গাঁও পঞ্চায়তৰ সভানেত্ৰী উম্মেল খায়েৰ আৰু ৪ নং টুক্ৰাপাৰা গাওঁ পঞ্চায়তৰ সভানেত্ৰী হালিমা আহমেদক কংগ্ৰেছ দলৰ পৰা বহিস্কাৰ কৰে। স্মৰ্তব্য যে সভানেত্ৰী দুগৰাকীয়ে দল বিৰোধী কাৰ্যকলাপৰ লগতে উন্নয়ন মূলক কামৰ ক্ষেত্ৰত দুৰ্নীতি কৰাৰ অভিযোগত প্ৰাথমিক সদস্য পদৰ পৰাও বহিস্কাৰ কৰা হৈছে।ইয়াৰোপৰি সভানেত্ৰী দুগৰাকীয়ে বিৰোধী দলৰ লগত গোপন মিতিৰালি কৰাৰ অভিযোগত বহিস্কাৰ কৰা হয়।উল্লেখ্য যে যোৱা ৩ জুনত সভানেত্ৰী দুগৰাকীক বহিস্কাৰ কৰি ছয়গাঁও সমষ্টিৰ বিধায়ক তথা অসম প্ৰদেশ কংগ্ৰেছ কমিটীৰ সাধাৰণ সম্পাদকৰ লগতে কামৰূপ জিলা কংগ্ৰেছ কমিটীৰ সভাপতিলৈ প্ৰতিলিপি প্ৰেৰণ কৰে।

নগাঁও

আজি অসম মানৱ অধিকাৰ আয়োগৰ অধ্যক্ষ ন্যায়াধীশ টি, ভায়োহাই, সদস্য এন, কে, বৰা আৰু ডি, কে, শইকীয়া আহি নগাঁওত উপস্থিত হয়। তেওঁলোকে প্ৰথমে নগাঁওৰ অৱৰ্ত ভৱনত উপস্থিত হৈ জিলা প্ৰশাসনৰ লগত এক বৈঠকত মিলিত হয়। এই বৈঠকত জিলা উপায়ুক্ত যাদৱ শইকীয়া, অতিৰিক্ত উপায়ুক্ত  জয়ন্ত বৰা, হেমন্ত ভূঞাৰ লগতে বহুকেইগৰাকী বিষয়া উপস্থিত থাকে।ইয়াৰ পাছতে তেওঁলোকে নগাঁও জিলা কাৰাগাৰ আৰু জিলা প্ৰশাসনে স্থাপন কৰা দুটাকৈ কভিড কেয়াৰ চেণ্টাৰ পৰিদৰ্শন কৰে।  নগাঁওৰ ডচন স্কুলত স্থাপন কৰা কভিড কেয়াৰ চেণ্টাৰ আৰু ৰহা কলেজত স্থাপন কৰা কভিড কেয়াৰ চেণ্টাৰটো পৰিদৰ্শন কৰে আৰু এই চেণ্টাৰ সমূহত থকা লোক সকলৰ বুজ লয়।অসম মানৱ অধিকাৰ আয়োগৰ অধ্যক্ষ টি. ভিফেই ৰ নেতৃত্বত অহা এটা দলটোৱে আজি নগাঁও জিলাৰ কেইবাটাও কোৱাৰেণ্টাইন কেম্পলৈ গৈ পৰ্যাপ্ত সা-সুবিধা আছে নে নাই তাৰ বুজ লোৱাৰ লগতে  কাৰাগাৰত কৰোনা মহামাৰীৰ ভয়াৱতাৰ সময়ত কয়দী আৰু হাজোতী সকলে প্ৰয়োজনীয় সা-সুবিধা ঠিকমতে লাভ কৰিছে নে নাই সেই কথা জানিবলৈ নগাঁও কেন্দ্ৰীয় কাৰাগাৰ পৰিদৰ্শন কৰে ৷ মানৱ অধিকাৰ আয়োগৰ অধ্যক্ষ গৰাকীয়ে জেলৰ ভিতৰত চি চি টিভিৰ কেমেৰাৰ ব্যৱস্থা কৰা,সুৰক্ষাৰ ব্যৱস্থা কৰা আৰু প্ৰতিখন জেলতে এখনকৈ এম্বুলেন্সৰ ব্যৱস্থা কৰিব লাগে বুলিও কয়।ইপিনে মানৱ অধিকাৰ আয়োগৰ সদস্য দেৱ কুমাৰ বৰাই সাংবাদিকৰ আগত কয় যে-অসমৰ কাৰাগাৰত পুৰণি কয়দীয়ে নিৰ্যাতন চলাই কাৰাগাৰলৈ যোৱা নতুন হাজোতী – কয়দীক ৷আনকি যৌন নিৰ্যাতনৰ দৰে ঘটনাও সংঘটিত হয়। মানৱ অধিকাৰ আয়োগৰ সদস্যজনৰ এই অভিযোগ নগাঁও কেন্দ্ৰীয় কাৰাগাৰৰ অধীক্ষক জনে অস্বীকাৰ কৰে।