অনলাইন বাৰ্তা, ১ মেঃ চীনৰ উহানৰ পৰীক্ষাগাৰত ক’ৰ’ণা ভাইৰাছ সৃষ্টি হৈছে বুলি আলোচনা হৈছিল৷ এইবাৰ ইয়াক নস্যাৎ কৰিছে স্বয়ং আমেৰিকাৰ চোৰাংচোৱা বিভাগে৷ এই ভাইৰাছ মানৱ সৃষ্ট নহয় বুলি জনাইছে৷ এক বিবৃতিত আমেৰিকাৰ ডিৰেক্টৰ অব নেচনেল ইণ্টেলিজেঞ্চে জনাইছে, দেশৰ সকলো চোৰাংচোৱা বিভাগে পৰিস্থিতিৰ ওপৰত দৃষ্টি নিক্ষেপ কৰি আছে৷ বিজ্ঞানসন্মতভাৱে ভাইৰাছটোক লৈ তথ্য সংগ্ৰহ কৰাৰ পাছত জানিব পৰা গৈছে ক’ভিড-১৯ মানুহৰ দ্বাৰা সৃষ্ট নহয় বা জিনগতভাৱে কোনো পৰিবৰ্তন ঘটোৱা হোৱা নাই৷ সমগ্ৰ বিশ্ব সংক্ৰমণ হোৱাৰ পাছত চীনৰ বিৰুদ্ধে অভিযোগৰ আঙুলি টোৱাইছিল মাৰ্কিন ৰাষ্ট্ৰপতি ডনাল্ড ট্ৰাম্পে৷ ইয়াৰ কাৰণে চীনক ক্ষতিপূৰণ দিবলৈ হুংকাৰ দিছিল৷ ট্ৰাম্পৰ সেই বক্তব্যৰ কেইঘণ্টামানৰ পাছতে মাৰ্কিন চোৰাংচোৱা বিভাগে এনে তথ্য তুলি ধৰে৷ উল্লেখ্য যে যোৱা সোমবাৰে ট্ৰাম্পে কৈছিল, বেইজিঙে ভাইৰাছটোকলৈ তথ্য গোপন কৰিছে৷ ফলত সমগ্ৰ বিশ্বত ৩২ লাখ মানুহ আক্ৰান্ত হৈছে৷ মৃত্যু হৈছে ২ লাখ ২৭ হাজাৰ মানুহ৷ ইয়াৰ বাবে সম্পূৰ্ণ দায়ী চীন৷ ক’ৰ’ণা সংক্ৰমণ হোৱাৰ লগে লগে আলোচনা হৈছিল ভাইৰাছটো মানৱ সৃষ্ট৷ যোৱা ৮ এপ্ৰিলত প্ৰকাশিত পিউ ৰিচাৰ্চ চেণ্টাৰৰ এক সমীক্ষাত দেখা গৈছিল, ২৯ শতাংশ মাৰ্কিন নাগৰিকে বিশ্বাস কৰে ভাইৰাছটো পৰীক্ষাগাৰত তৈয়াৰ কৰা হৈছিল৷ কিন্তু সেই দাবীৰ কোনো প্ৰমাণ এই পৰ্যন্ত পোৱা নাই৷ তাৰ পাছত বৃহস্পতিবাৰে আমেৰিকাৰ অফিচ অব দ্য ডিৰেক্টৰ অব নেচনেল ইণ্টেলিজেঞ্চে জনায়, মাৰ্কিন চোৰাংচোৱা সংস্থাবোৰে অত দিন ধৰি তদন্ত কৰি এই সিদ্ধান্তলৈ আহিছি যে ক’ৰ’ণা ভাইৰাছ মানুহে তৈয়াৰ কৰা নহয় বা জিনগতভাৱে ইয়াৰ কোনো পৰিবৰ্তন ঘটোৱা হোৱা নাই৷ ভৱিষ্যতে চোৰাংচোৱাই এই ভাইৰাছৰ উৎস লৈ তদন্ত কৰি যাব বুলি জনাইছে৷

অনলাইন বাৰ্তা, ১ মে’ঃ বৰ্তমানে অব্যাহত থকা লকডাউন অহা ৩ মে’ত অন্ত পৰাৰ আগমুহূৰ্তত আজি প্ৰধানমন্ত্ৰী নৰেন্দ্ৰ মোডীয়ে কেবিনেট মন্ত্ৰীসকলৰ সৈতে এক আলোচনা সভাত মিলিত হয়৷ এই সভাত প্ৰব্ৰজন কৰা শ্ৰমিকসকলক নিজৰ গৃহ ৰাজ্যলৈ পঠাবৰ বাবে বিশেষ ৰে’ল চলাচল কৰাৰ বিষয়ে আলোচনা কৰে৷ ইয়াৰ লগতে পুনৰ বিমান চলাচল কেতিয়া আৰু কিদৰে কৰা হ’ব সেই বিষয়েও আলোচনা কৰে৷ এই সভাৰ পাছতে লকডাউনৰ বাবে দেশৰ বিভিন্ন ঠাইত আবদ্ধ প্ৰব্ৰজন কৰা শ্ৰমিক, তীৰ্থ যাত্ৰী, পৰ্যটক, ছাত্ৰ-ছাত্ৰী আৰু আন লোকক আনিবৰ বাবে গৃহ মন্ত্ৰালয়ে বিশেষ ৰে’ল চলাচলৰ অনুমোদন কৰে৷ ৰে’ল মন্ত্ৰালয়ৰ অন্তৰ্গত ভাৰতীয় ৰে’লৰ দ্বাৰা এই কাম কৰা হ’ব আৰু ৰাজ্য আৰু কেন্দ্ৰীয় শাসিত অঞ্চলৰ লগত সমন্বয় ৰাখিবৰ বাবে ন’ডেল বিষয় থাকিব৷ উল্লেখ্য যে ইয়াৰ পূৰ্বে যোৱা ২৭ এপ্ৰিলত মুখ্যমন্ত্ৰীসকলৰ সৈতে অৰ্থনৈতিক অৱস্থা, ক’ভিড-১৯ৰ সৈতে হোৱা যুঁজৰ লগতে পৰবৰ্তী পদক্ষেপৰে বিষয়ে আলোচনা কৰিছিল৷ এই সভাত গৃহ মন্ত্ৰী অমিত স্বাহ, ৰে’ল মন্ত্ৰী পিযুষ গোৱেল আৰু বিমান পৰিবহণ মন্ত্ৰী হৰদীপ পুৰি উপস্থিত আছিল৷ আনহাতে ঘৰুৱাভাৱে চলাচল কৰা ব্যক্তিগত কোম্পানীবোৰে চৰকাৰৰ সংকেতলৈ বাট চাই আছে৷ অতি সোনকালে এই কোম্পানীবোৰে চৰকাৰৰ সেউজ সংকেত পাব বুলি প্ৰাপ্ত সূত্ৰই লগতে কয়৷ অৱশ্যে এই বিমান চলাচলত ব্যক্তিগত কোম্পানীবোৰে সামাজিক দূৰত্ব ৰক্ষা কৰা আৰু ক’ভিড-১৯ ৰোধ কৰাৰ ক্ষেত্ৰত কঠোৰ নিয়ম মানিব লাগিব৷ উল্লেখ্য যে ৩০ এপ্ৰিলত প্ৰধানমন্ত্ৰীয়ে কেইবাখনো মাৰাথন মিটিং কৰি অৰ্থনৈতিক অৱস্থা উন্নতিৰ বাবে আলোচনা কৰিছিল৷ এই সভাত বিত্ত মন্ত্ৰী নিৰ্মলা সীতাৰমন, গৃহ মন্ত্ৰী অমিত শ্বাহ আদি উপস্থিত আছিল৷

অনলাইন বাৰ্তা, ১ মে’ঃ পুনৰ বৃদ্ধি কৰিলে লকডাউনৰ ম্যাদ৷ তৃতীয় পৰ্যায়ৰ লকডাউন ১৪ দিনৰ বাবে অৰ্থাৎ ১৭ মে’লৈকে বৃদ্ধি কৰাৰ কথা ঘোষণা কৰিলে কেন্দ্ৰীয় গৃহ মন্ত্ৰালয়ে৷ দেশত যিদৰে ক’ভিড-১৯ সংক্ৰমণ হৈ আছে তাৰ প্ৰতি লক্ষ্য ৰাখি বিপর্যয় মোকাবিলা আইন, ২০০৫ অনুযায়ী এই সিদ্ধান্ত লোৱা হয় বুলি গৃহ মন্ত্ৰালয়ে জনাইছে৷ উল্লেখ্য যে ৪ মে’ৰ পৰা তৃতীয় পৰ্যায়ৰ লকডাউন আৰম্ভ হ’ব৷ এই ১৪ দিনত কোন ক্ষেত্ৰত কি দৰে কাৰ্যকলাপ চলাব অথবা চলাব নোৱাৰে তাকে লৈও কেন্দ্ৰই নতুন নিৰ্দেশনা জাৰি কৰিছে৷ আনহাতে গ্ৰীণ জ’ন আৰু অৰেঞ্জ জ’নৰ বহু বিধিনিষেধ শিথিল কৰিছে কেন্দ্ৰই৷ আজি প্ৰধানমন্ত্ৰী নৰেন্দ্ৰ মোডীয়ে বৈঠক কৰে অমিত শ্বাহসহ কেন্দ্ৰীয় মন্ত্ৰীসভাৰ আন সদস্যৰে৷ সেই বৈঠকত ক’ৰ’ণা পৰিস্থিতি আৰু লকডাউনৰ প্ৰয়োজনীয়তা লৈ পৰ্যালোচনা কৰে৷ তাৰ পাছত সন্ধিয়া গৃহ মন্ত্ৰালয়ে এক প্ৰেছ বিবৃতিত প্ৰকাশ কৰে লকডাউনৰ ম্যাদ বৃদ্ধি কৰাৰ৷ এই তৃতীয় পৰ্যায়ৰ লকডাউন সন্দৰ্ভত নতুন সিদ্ধান্তবোৰৰ মতে যিবহৰ জিলাত কোনো সংক্ৰমিত হোৱা নাই বা গত ২১ দিনত কৰা টেষ্টিং ৰিপৰ্টত পজিটিভ হোৱা নাই সেইবোৰ জিলাক গ্ৰীণ জ’ন ধৰা হ’ব৷ আনহাতে কোনবোৰ জিলা গ্ৰীণ বা ৰেড জ’ন হিচাপে ধৰা হ’ব সেয়া নিৰ্ধাৰণ কৰা হ’ব সেই জিলাত চিকিৎসাধীন ক’ৰ’ণা আক্ৰান্তৰ সংখ্যা, আক্ৰান্তৰ সংখ্যা দুগুণ হোৱাৰ সময়সীমা, টেষ্টিঙৰ পৰিমাণ আৰু নজৰত অহা ৰিপৰ্টৰ ভিত্তিত৷ তদুপৰি যিবোৰ জালা গ্ৰীণ বা ৰেড জ’নৰ মাজত পৰা নাই সেইবোৰ অৰেঞ্জ জ’ন ধৰা হ’ব৷ আনহাতে গ্ৰীণ, ৰেড আৰু অৰেঞ্জ জ’ন কোন কোন জিলাক ৰখা হৈছে সেয়া কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰালয়ক প্ৰতি সপ্তাহত ৰাজ্য আৰু কেন্দ্ৰীয় শাসিত অঞ্চলবোৰক জনোৱা হ’ব৷ ইয়াৰ লগতে ৰাজ্য আৰু কেন্দ্ৰীয় শাসিত অঞ্চলবোৰ চান ৰেড বা অৰেঞ্জ জ’নৰ তালিকাট জিলাৰ সংখ্যা বঢ়াব পাৰিব৷ কিন্তু কেন্দ্ৰই দিয়া ৰেড বা অৰেঞ্জ জ’নৰ তালিকাত কটা নহ’ব৷ উল্লেখ্য যে নিত্যব্যৱহাৰ্য নোহোৱা ই-কমাৰ্চ গ্ৰীণ আৰু অৰেঞ্জ জ’নত অনুমোদন কৰা হৈছে৷ আনহাতে আন্তঃৰাজ্যিক ভ্ৰমণৰ বাবে টেক্সি আৰু কেব চালক আৰু এজন যাত্ৰীক লৈ অৰেঞ্জ জ’নত অনুমতি দিয়া হৈছে৷ বাণিজ্যিক আৰু ব্যক্তিগত প্ৰতিষ্ঠান মুকলিত ৰেড জ’নত অনুমতি দিয়া হৈছে৷ ইয়াত থাকিব ছাপা আৰু বৈদ্যুতিন সংবাদ মাধ্যম, আই টি আৰু আই টি সেৱা, ডাটা আৰু কল চেণ্টাৰ, ক’ল্ড ষ্ট’ৰেজ আৰু ৱেৰহাউচিং সেৱা, প্ৰাইভেট ছিকিউৰিটি আৰু ফেকালিটি মেনেজমেণ্ট সেৱা, আত্মসংস্থাপনৰ ব্যক্তি, নাপিত আৰু আগতে উল্লেখ কৰা দিশবোৰ৷