খাৰুপেটীয়া

দলগাঁৱৰ সমবায় সমিতিসমূহৰ বিৰুদ্ধে বিভিন্ন সময়ত বিভিন্ন অভিযোগ উত্থাপন হৈ থকাৰ মাজতে এইবাৰ বৰুৱাঝাৰ সমবায় সমিতিৰ এজন সুলভ মূল্যৰ দোকানীক ক’লা বজাৰত কেৰাচিন বিক্ৰীৰ অপৰাধত মঙলবাৰে দৈপাম আৰক্ষীয়ে গ্ৰেপ্তাৰ কৰি কাৰাগাৰলৈ প্ৰেৰণ কৰে। আনহাতে চোৰাং কেৰাচিন ক্ৰয়ৰ অপৰাধত আন দুজনকো গ্ৰেপ্তাৰ কৰে আৰক্ষীয়ে। স্মৰ্তব্য যে মোল্লাপাৰা আৰু কুঁৱৰী পুখুৰী গাঁৱৰ  দুজন যুৱকে ৪০ লিটাৰ কেৰাচিন লৈ গৈ থকা অৱস্থাত গাঁওৰক্ষী বাহিনীৰ সম্পাদকৰ হাতত ধৰা পৰে পিছত গাঁওৰক্ষী বাহিনীৰ সম্পাদকগৰাকীয়ে দৈপাম আৰক্ষীক খবৰ দিয়াত আৰক্ষীয়ে কেৰাচিনৰ লগতে এখন হেৰোহোণ্ডা কোম্পানীৰ মটৰ চাইকেল জব্দ কৰি এক গোচৰ ৰুজু কৰি দুলীয়াপাৰা গাঁৱৰ সমবায় সমিতিৰ সুলভ মুল্যৰ দোকানী হানিফ আলীসহ তিনিওকে কাৰাগাৰলৈ প্ৰেৰণ কৰে। ইফালে, সাংবাদিকৰ আগত যুৱক দুজনে প্ৰতি লিটাৰ কেৰাচিন ৪৫ টকাত মুঠ ৪০ লিটাৰ কেৰাচিন হানিফ নামৰ সুলভ মূল্যৰ দোকানীৰ পৰা ক্ৰয় কৰে বুলি কয়৷

হামৰেণ

পশ্চিম কাৰ্বি আংলং জিলাৰ বৈঠালাংছ’ থানাৰ অন্তৰ্গত আমট্ৰেঙৰ ছিং ক্ৰ পুলক গাঁৱৰ নিবাসী লংছিং টেৰণৰ পুত্ৰ ৰূপন টেৰণ যোৱা ২৫ মাৰ্চ তাৰিখৰ পৰাই নিৰুদ্দেশ হৈ আছে৷ সপ্তম শ্ৰেণীত ছাত্ৰ ৰূপন বয়স ১২-১৩ বছৰ হ’ব বুলি প্ৰাপ্ত তথ্যত প্ৰকাশ৷ জানিব পৰা মতে নগাঁৱৰ হয়বৰ গাঁৱৰ জি ডি নাৰ্চিং হোমৰ ওচৰৰ আৰক্ষী বিষয়া এজনৰ ঘৰত শিশুটি বিগত পাঁচ বছৰ ধৰি আছিল৷ শিশুটি প্ৰথম লকডাউন ঘোষণা কৰা দিনাৰে পৰাই নিশাৰ ভাগতেই আৰক্ষী বিষয়াজনৰ ঘৰৰ পৰা নিৰুদ্দেশ হৈ আছে। ৰূপনৰ পৰিয়ালে ৪ মে’ৰ দিনাহে ঘটনাৰ বিষয়ে আমটেৰেং উপ আৰক্ষী চকীৰ জৰিয়তে জ্ঞাত হয়। বিগত ৪২ দিন ধৰি নিৰুদ্দেশ হৈ থকা ৰূপনৰ বাবে পৰিয়ালটো বৰ্তমানে যথেষ্ট উদ্বিগ্ন হৈ পৰিছে। কোনো ব্যক্তিয়ে শিশুটিৰ সন্ধান পালে ৯৮৬৪৯৩০৮৬৯, ৯৪০১১৭২২৫৮ নম্বৰত যোগাযোগ কৰি পৰিয়ালক জনাবলৈ অনুৰোধ জনাইছে৷

বোকাজান

দেশত তৃতীয় লক ডাউন পূৰ্ণ গতিত অব্যাহত থকাৰ সময়ত ৰাজ্যৰ আন্তঃৰাজ্যিক সীমান্ত খুলি দিয়াত অসম নাগালেণ্ড সীমান্তৰ লাহৰিজানত যোৱা দেওবাৰৰ পৰা মঙলবাবকে তিনিটা দিনত অসমৰ বিভিন্ন প্ৰান্তৰ প্রায় ১১০০ লোকে প্ৰৱেশ কৰে। বিভিন্ন কাৰণত নাগালেণ্ড, মণিপুৰত আশ্ৰয় লোৱা এইসকল লোক লকডাউনৰ বাবে আবদ্ধ হৈ আছিল। বোকাজান মহকুমা আৰক্ষী বিষয়া জ’ন দাসৰ  নেতৃত্বত খটখতি আৰক্ষী থানাৰ আৰক্ষীয়ে দিনে নিশাই সীমান্তত নিষ্ঠাৰে নিজৰ কৰ্তব্য অব্যাহত ৰাখি এই সকল লোকক স্বাস্থ্য পৰীক্ষা কৰাই হাতত ষ্টাম্প মাৰি স্বগৃহলৈ যোৱাৰ ব্যৱস্থা কৰি দিয়ে। উল্লেখযোগ্য যে অসমৰ পৰা বৰ্হিৰাজলৈ যাবলগীয়া যিকোনো লোকৰ অনুমতি পত্ৰ উলিয়াৰ ক্ষেত্ৰত অসুবিধাৰ সৃষ্টি হ’লে তেওঁলোকক প্ৰয়োজনীয় অনুমতি পত্ৰ যোগান ধৰাৰ বাবে বোকাজান মহকুমা আৰক্ষীয়ে সকলো প্ৰকাৰৰ সহায় আগবঢ়াব বুলি মহকুমা আৰক্ষী বিষয়া গৰাকীয়ে জানিবলৈ দিয়ে।

নাজিৰা

তৃতীয় পৰ্যায়ৰ লকডাউনৰ দ্বিতীয় দিনা অৰ্থাৎ মঙলবাৰে জনাৰণ্যত পৰিণত হ’ল নাজিৰা আৰু শিমলুগুৰি নগৰ। ইয়াৰ লগে লগে জনসাধাৰণ, যানবাহন আৰু মুকলি হোৱা ব্যৱসায়ীক প্ৰতিষ্ঠানে নাজিৰা মহকুমাটোলৈ স্বাভাৱিক জীৱনযাত্ৰা ঘূৰি অহাৰ ইংগিত দিলে। কিন্তু ইয়াৰ মাজতো কেতবোৰ বেমেজালি আৰু দিনটোক কেন্দ্ৰ কৰি গভীৰ শংকা। তৃতীয় পৰ্যায়ৰ লকডাউনত গ্ৰীন জ’ন অঞ্চলসমূহৰ বাবে বিশেষ কেতবোৰ শিথিলতা প্ৰদান কৰা হৈছিল যদিও মঙলবাৰে নাজিৰা আৰু শিমলুগুৰি নগৰত দেখা গ’ল আন এক পৰিস্থিতি। ব্যৱসায়িক মহলৰ মাজত দেখা পোৱা গ’ল চৰম অনিশ্চয়তা৷ কোনে কি খুলিব, কোনে কি নুখুলিব এনে এক বিমোৰত নগৰ দুখনৰ ব্যৱসায়ীক প্ৰতিষ্ঠানবোৰ বিশৃংখল ৰূপত আধা খোলা, আধা বন্ধ অৱস্থাৰ সৃষ্টি হয়৷ সাধাৰণভাৱে চৰকাৰী নিৰ্দেশনা ব্যৱসায়িকভাৱে প্ৰয়োগ কৰাৰ ক্ষেত্ৰত প্ৰশাসনো বিমোৰত পৰে। এক তৃতীয়াংশ ব্যৱসায়িক প্ৰতিষ্ঠান খোলাৰ নিৰ্দেশ দিয়াৰ পাছত সেই এক তৃতীয়াংশ ব্যৱসায়িক প্ৰতিষ্ঠান কোনে নিৰ্ধাৰণ কৰিব, তাকেলৈ এক বেমেজালি সৃষ্টি হয়৷ আনহাতে স্বাভাৱিক দিনৰ দৰে নগৰ দুখনত পুৱাৰ ভাগৰ পৰা দেখা যায় ব্যক্তিগত যানবাহনৰ মুকলি চলাচল। এনে ক্ষেত্ৰত স্বাভাৱিকতে নগৰ দুখন জনাৰণ্যত পৰিণত হয়। তেনে পৰিস্থিতিত নাজিৰা মহকুমাৰ ভাৰপ্ৰাপ্ত মহকুমাধিপতি তথা অতিৰিক্ত উপায়ুক্ত সম্প্ৰীতি গোস্বামী, ৰাজহ চক্ৰ বিষয়া কবিতা কাকতি কোঁৱৰ, দণ্ডাধীশ ক্ৰমে অদিতি বৰ্মণ, সুজাতা গগৈ, ৰাজীৱ সোণোৱাল তথা মহকুমা প্ৰশাসনৰ তৎপৰতাত মঙলবাৰৰ পৰা নাজিৰা আৰু শিমলুগুৰি নগৰ দুখনত সুশৃংখলিতভাৱে দোকান পোহাৰ খোলাৰ সঠিক পদক্ষেপ গ্ৰহণ কৰে।

হাটশিঙিমাৰী

ক’ৰ’ণা ভাইৰাছৰ সংক্ৰমণৰ পৰা ৰক্ষা পাবলৈ হাটশিঙিমাৰী জনস্বাস্থ্য কাৰিকৰী বিভাগে গ্ৰহণ কৰিছে নতুন পদক্ষেপ। বিভাগটোৰ বিষয়া-কৰ্মচাৰীৰ সহযোগত টেকনিকেল অফিচাৰ আকিব সৰকাৰ আৰু ইলিয়াছ আহমেদে নিজৰ প্ৰচেষ্টাত প্ৰস্তত কৰি উলিয়াইছে অটোমেটিক ছেনিটাইজৰ মেচিন। মেচিনটো মঙলবাৰে দিনৰ ১১ বজাত হাটশিঙিমাৰী জিলা উপায়ুক্তৰ কাৰ্যালয়ৰ প্ৰৱেশ পথত স্থাপন কৰে৷ বিভাগটোৰ এই কাৰ্যক বিভিন্ন মহলে প্ৰশংসা কৰিছে। এই মেচিনটো শুভাৰম্ভ কৰে জিলা উপায়ুক্ত আতিকা চুলতানাই৷ অনুষ্ঠানত উপস্থিত থাকে হাটশিঙিমাৰী জনস্বাস্থ্য কাৰিকৰী বিভাগৰ সহকাৰী কাৰ্যবাহী অভিযন্তা ছফিয়ৰ ৰহমান মোগলৰ লগতে জনস্বাস্থ্য কাৰিকৰী বিভাগ আৰু জিলা উপায়ুক্তৰ কাৰ্যালয়ৰ বিষয়া-কৰ্মচাৰীসকল৷ উল্লেখ্য যে এই পথৰে কোনো মানুহ প্ৰৱেশ কৰিলে তেওঁৰ সম্পূৰ্ণ শৰীৰ স্বয়ংক্ৰিয়ভাৱে ছেনিটাইজৰ হৈ যায়। হাাটশিঙিমাৰী জনস্বাস্থ্য কাৰিকৰী বিভাগৰ এনে পদক্ষেপক জিলাবাসীয়ে শলাগ লৈছে।