বিধানসভা নিৰ্বাচন ২০২৬লৈ মাজত মাত্ৰ কেইটামান দিন৷ এনে সময়তো পিছে আসনৰ বুজাবুজিত সহমতত উপনীত হ’ব পৰা নাই অগপ-বিজেপি৷ আসন বুজাবুজি সন্দৰ্ভত অগপ সভাপতি অতুল বৰাই সংবাদ মাধ্যমৰ আগত কয়, ‘আমাৰ ছাৰ্ভে চলি আছে আৰু ছাৰ্ভে বেলেগ বেলেগ সময়ত বেলেগ বেলেগ ওলায়৷ জিকাৰ সম্ভাৱনা থকা সমষ্টিবোৰৰ কথা আমি ভাবিম৷ বিজেপিৰে আমাৰ অনানুষ্ঠানিক আলোচনা হৈছে যদিও আনুষ্ঠানিক আলোচনা হোৱা নাই৷ যাৰ বাবে আমি কেইখন আসনত প্ৰতিদ্বন্দ্বিতা কৰিম সেই কথা এতিয়াও খাটাংকৈ ক’ব পৰা নাই৷’ উল্লেখ্য যে নিৰ্বাচনলৈ আৰু বেছি দিন নাই, কিন্তু তেনেস্থলতো অগপৰ সভাপতিগৰাকীয়ে কেইখন আসনত নিৰ্বাচন খেলিব সেই কথা এতিয়াও ক’ব পৰা নাই৷ সভাপতিগৰাকীয়ে পূৰ্বৰ নিৰ্বাচনৰ হিচাবহে দিছে৷

অতুল বৰাই কয় যে অগপই ২০১৬ চনত ৩১খন আৰু ২০২১ চনত ২৯খন আসনত প্ৰতিদ্বন্দ্বিতা কৰিছিল৷ সেইফালৰ পৰা চাবলৈ গ’লে এইবাৰ আসনৰ সংখ্যা দুই-তিনিখন কমিবহে পাৰে৷ ইফালে, অগপৰ ভিতৰ চ’ৰাত এইবাৰ ৪০খন আসনৰ দাবী উত্থাপন হৈছে৷ আনহাতে, নিৰ্বাচন আহিলে মিত্ৰদলৰ মাজত আঁকোৰগোজ স্থিতি থকাটো স্বাভাৱিক বুলি ভাবে অতুল বৰাই৷ আলোচনাৰ মাজেৰে সকলো সমাধান হ’ব বুলি তেওঁ আশাবাদী যদিও নিৰ্বাচনলৈ কিন্তু বেছি দিন নাই৷ অগপৰ সভাপতিৰ এনে মন্তব্যৰ বিপৰীতে বিজেপিৰ সভাপতি দিলীপ শইকীয়াই সদৰী কৰা অনুসৰি ইতিমধ্যে তেওঁ অগপৰ সৈতে দুবাৰ আলোচনাত বহিছে৷ ইয়াৰ বিপৰীতে আঞ্চলিক দলটোৰ সভাপতি অতুল বৰাই কয়, ‘আমাৰ লগত বিজেপিৰ এতিয়ালৈকে আনুষ্ঠানিক কোনো আলোচনা হোৱা নাই ৷’

ইয়াৰ মাজতে মুখ্যমন্ত্ৰীয়ে শেহতীয়াকৈ সদৰী কৰে যে বিজেপিৰ ৮০টা সমষ্টিৰ প্ৰাৰ্থী চূড়ান্ত হৈ আছে৷ আনহাতে, বৃহস্পতিবাৰে নিশা কেবিনেটৰ পিছত দিয়া সংবাদ মেলত মিত্ৰতাৰ প্ৰসংগত সাংবাদিকৰ প্ৰশ্নৰ উত্তৰত মুখ্যþমন্ত্ৰী শৰ্মাই নিজৰ প্ৰতিক্ৰিয়া ব্যক্ত কৰি কয়, ‘মিত্ৰতাৰ ক্ষেত্ৰত ৰাভা যৌথ মঞ্চৰ লগত আমাৰ হৈ গৈছে ৷ বি পি এফৰ লগত আমাৰ হৈ যাব৷ আমি ভাবো অগপৰ লগত জ্ঝ-১০ মাৰ্চৰ ভিতৰত কৰি দিম৷ প্ৰায় আমাৰ হৈ গৈছে৷ জ্ঝ-১০ মাৰ্চৰ ভিতৰত ঘোষণা কৰিব পাৰিম আৰু আমাৰ প্ৰাৰ্থীৰ নামো ওলাই যাব৷ ৰাজ্যসভাৰ নিৰ্বাচনটোৰ বাবে আমি অলপ লাহেকৈ গৈ আছো৷’

ৰাজ্যত বাজিছে ২০২৬ৰ অসম বিধানসভাৰ নিৰ্বাচনৰ ৰণভেৰী৷ এনে সময়তে শাসক-বিৰোধী উভয়ে নিৰ্বাচনী বৈতৰণী পাৰ হ’বলৈ নিজা নিজা কৌশল ৰচনা কৰিছে৷ ৰাজ্যৰ প্ৰধান বিৰোধী দল কংগ্ৰেছো এইক্ষেত্ৰত পিছপৰি থকা নাই৷ অসম প্ৰদেশ কংগ্ৰেছে শেহতীয়াকৈ গৌৰৱ গগৈক দলৰ সভাপতি হিচাপে লাভ কৰিছে৷ গৌৰৱ গগৈয়ে অসম কংগ্ৰেছৰ সভাপতি পদত অধিষ্ঠিত হোৱাৰ পিছতে দলটোলৈ নতুন উৎসাহৰ প্ৰৱাহ ঘটা পৰিলক্ষিত হৈছিল৷ বিশেষকৈ নৱ-প্ৰজন্মৰ বহুতে গৌৰৱ গগৈৰ বাবেই কংগ্ৰেছৰ প্ৰতি নতুনকৈ আকৃষ্ট হোৱা পৰিলক্ষিত হৈছে৷ ইয়াৰ প্ৰমাণ গৌৰৱ গগৈৰ বিভিন্ন সভা-সমিতি আদিত দেখিবলৈ পোৱা গৈছে৷

যি কি নহওক পঞ্চদশ অসম বিধানসভাৰ নিৰ্বাচনত কংগ্ৰেছে একক ভাৱে লাভ কৰিছিল ২৯ খন আসন৷ একেদৰে শাসকীয় এনডিএ মিত্ৰজোঁটৰ প্ৰধান দল বিজেপিয়ে লাভ কৰিছিল ৬০খন আসন৷ কিন্তু কংগ্ৰেছে সংখ্যাগৰিষ্ঠতা লাভ নকৰাৰ বাবেই যোৱা বাৰৰ বিধানসভা নিৰ্বাচনৰ পিছত চৰকাৰ গঠন কৰিবলৈ সক্ষম হোৱা নাছিল৷ এইবাৰ নতুন বৰ অসমৰ শ্ল’গানেৰে কংগ্ৰেছে অসমৰ ভোটাৰৰ মাজত গৌৰৱ গগৈক সেনাপতি হিচাপে লৈ পুনৰ সোমাই পৰিবলৈ আপ্ৰাণ চেষ্টা অব্যাহত ৰাখিছে৷ কিন্তু এনে সময়তে ৰাজনৈতিক বিশেষজ্ঞমহলৰ মাজত চৰ্চিত এটা উল্লেখযোগ্য বিষয় এয়া হৈ পৰিছে যে কংগ্ৰেছ দলত গৌৰৱ গগৈক সোঁৱে-বাঁওৱে বহু প্ৰবীণ তথা প্ৰভাৱশালী নেতাই বেৰি আছে যদিও প্ৰকৃতাৰ্থত গৌৰৱ দলৰ ভিতৰত সম্পূৰ্ণ অকলশৰীয়া৷

কংগ্ৰেছত বৰ্তমান থকা বহু নেতাৰ ওপৰত মুঠেও বিশ্বাস নাই বুলি ৰাজনৈতিক বিশেষজ্ঞ মহলে চৰ্চা কৰিছে৷ ইয়াৰ শেহতীয়া উদাহৰণ হিচাপে প্ৰদেশ কংগ্ৰেছৰ প্ৰাক্তন সভাপতি ভূপেন বৰাই নিশাটোৰ ভিতৰতে মূৰ পোলোকা মাৰি গেৰুৱা দলত যোগদান কৰাৰ কথাই কংগ্ৰেছৰ প্ৰভুত ক্ষতি সাধন কৰিছে৷ ভূপেন বৰাই বিজেপিত যোগদান কৰাৰ পিছত এতিয়া কংগ্ৰেছে দিনে-নিশাই ৰাজ্যৰ বিভিন্ন প্ৰান্তত লগোৱা বেনাৰ-পোষ্টাৰ আদি আঁতৰাবলৈ বাধ্য হৈছে৷ কাৰণ সেই বেনাৰ-পোষ্টাৰত জিলিকি আছিল হাঁহি ভৰা মুখেৰে ভূপেন বৰাৰ ছবি৷ ভূপেন বৰাৰ দৰেই কংগ্ৰেছৰ বহু নেতা-নেত্ৰীয়ে ছল পালেই গেৰুৱা দললৈ গমন কৰিব পাৰে বুলি ৰাজনৈতিক বিশেষজ্ঞমহলে মন্তব্য কৰিছে৷ তেওঁলোকে এইবুলি কৈছে যে কংগ্ৰেছত সম্পূৰ্ণ বিশুদ্ধ কংগ্ৰেছী বুলি নিজকে পৰিচয় দি থকা বহুতেই সুযোগ পালেই বিজেপিমুখী হ’ব৷

তেওঁলোকৰ ভিতৰত মীৰা বৰঠাকুৰ, দেৱব্ৰত শইকীয়া, ৰিপুণ বৰা আদিৰ দৰে নেতা-নেত্ৰী সকলো আছে বুলি ৰাজনৈতিক বিশেষজ্ঞ মহলে সন্দেহ প্ৰকাশ কৰিছে৷ ৰাজনৈতিক বিশেষজ্ঞ মহলৰ মতে যদি আণ্ডাৰ কাৰেণ্টৰ প্ৰভাৱত অসমত পুনৰ কংগ্ৰেছ আৰু ইয়াৰ মিত্ৰ দলসমূহে চৰকাৰ গঠন কৰিব পৰাকৈ সংখ্যাগৰিষ্ঠতা লাভ কৰে তথাপি গৌৰৱ গগৈ নিঃসংগ হৈয়ে থাকিব৷ কাৰণ কংগ্ৰেছৰ বহু নেতাই হয়তো মনে-প্ৰাণে নিবিচাৰে গৌৰৱ অসমৰ মুখ্যমন্ত্ৰী হওক৷ প্ৰয়াত প্ৰাক্তন মুখ্যমন্ত্ৰী তৰুণ গগৈৰ পুত্ৰ হোৱাৰ সূত্ৰেই গৌৰৱ গগৈয়ে যদি মুখ্যমন্ত্ৰীৰ পদ দাবী কৰে তেন্তে সেই একে দাবীয়েই উচ্ছাৰিত হ’ব দেৱব্ৰত শইকীয়াৰ পৰাও৷ কাৰণ তেৱোঁ প্ৰয়াত প্ৰাক্তন মুখ্যমন্ত্ৰী হিতেশ্বৰ শইকীয়াৰ পুত্ৰ৷ একেদৰে গৌৰৱ গগৈ মুখ্যমন্ত্ৰীৰ হোৱাৰ পথত হেঙাৰ হিচাপে থিয় দিব পাৰে বৰ্তমানৰ সাংসদ ৰকিবুল হুছেইনেও৷

কাৰণ গৌৰৱ গগৈয়ে ৰাজনীতিৰ পথাৰত ভৰি দিয়াৰ পূৰ্বৰে পৰাই ৰকিবুল হুছেইন আছিল কেবিনেট মন্ত্ৰী৷ সেই হিচাপত তেওঁ পূৰ্বৰ প্ৰতাপ জাহিৰ কৰি গৌৰৱ গগৈ মুখ্যমন্ত্ৰী হোৱাৰ ক্ষেত্ৰত হেঙাৰ হৈ পৰিব পাৰে৷ ৰাজনৈতিক বিশেষজ্ঞমহলে এইবুলিও কৈছে যে সংখ্যাগৰিষ্ঠতা লাভ কৰাৰ পিছতো কংগ্ৰেছ অথবা ইয়াৰ মিত্ৰ দলসমূহে অসমত হয়তো চৰকাৰ গঠন কৰিবলৈ সক্ষম নহ’ব৷ কাৰণ কংগ্ৰেছত থকা বহু ডলাৰ বগৰীসদৃশ নেতাক যদি নিশাটোৰ ভিতৰতে গেৰুৱা শিবিৰে ক্ৰয় কৰি লয় তেন্তে জয়ী হোৱাৰ পিছতো হেৰুৱাৰ বেদনাত ভুগিব লাগিব গৌৰৱ গগৈয়ে৷ অসমত এনেদৰে নিশাটোৰ ভিতৰতে বিধায়ক ক্ৰয় কৰাৰ নজিৰ নথকা নহয় বুলিও বিশেষজ্ঞসকলে মত প্ৰকাশ কৰিছে৷ বিশেষজ্ঞসকলৰ মতে এনে পৰিস্থিতিত জয়ৰ পিছত পৰাজয়ৰ ভয়ে এতিয়া আক্ৰান্ত কৰিছে গৌৰৱ গগৈক৷ কিন্তু এনে বিষম পৰিস্থিতি, জটিল ৰাজনৈতিক পট পৰিৱৰ্তনৰ মাজতো নিজৰ স্থিতিত অচল অটল হৈ আছে গৌৰৱ গগৈ৷ ৰাজনৈতিক বিশেষজ্ঞ মহলৰ মতে গৌৰৱ গগৈয়ে এতিয়া সুযোগৰ অপেক্ষা কৰিছে৷ বিশ্লেষকসকলে এইবুলি ধাৰণা কৰিছে যে দুটা বিশেষ কথাক লৈ এতিয়া গৌৰৱ গগৈয়ে নৰিয়া গাৰে হ’লেও যুঁজি লাচিত হ’ব বিচাৰিছে৷ দৰাচলতে কংগ্ৰেছৰ ভিতৰচ’ৰাত থকা ডলাৰ বগৰীসদৃশ নেতা, দলৰ ভিতৰতে সৃষ্টি হোৱা টিকটকেন্দ্ৰিক বিবাদ আদি কথাবোৰ গৌৰৱ গগৈৰ বাবে এতিয়া একপ্ৰকাৰৰ ৰাজনৈতিক নৰিয়া স্বৰূপ হৈ পৰিছে৷ এনে নৰিয়া গাৰেই তেওঁ নিৰ্বাচনী যুঁজত অৱতীৰ্ণ হৈ লাচিতৰ দৰে জয়ী হোৱাৰ সপোন দেখিছে বুলি বিশ্লেষকসকলে মন্তব্য কৰিছে৷ বিশ্লেষকসকলৰ মতে গৌৰৱ গগৈয়ে এতিয়া বিজেপিত সৃষ্টি হ’ব পৰা টিকটকেন্দ্ৰিক সংঘাতৰ সময়ছোৱালৈ অপেক্ষা কৰিছে৷

কাৰণ যদি তেনে সংঘাতে বিজেপিত গা কৰি উঠে তেন্তে তাৰ পূৰ্ণ সুযোগ কংগ্ৰেছে নিঃসন্দেহে গ্ৰহণ কৰিব পাৰিব৷ সেয়ে টিকটকেন্দ্ৰিক সংঘাতৰ সময়ছোৱালৈ এতিয়া গৌৰৱ গগৈয়ে অপেক্ষা কৰা বুলি বিশ্লেষকসকলে মন্তব্য কৰিছে৷ গৌৰৱ গগৈয়ে তেওঁৰ আশে-পাশে থকা কোনো নেতাকে বিশ্বাসত ল’ব নোৱাৰা পৰিৱেশ এটাৰ সৃষ্টি হোৱাৰ পিছতো সাহসেৰে তেওঁ দলটোক ৰাইজৰ মাজলৈ নিয়াৰ বাবে চেষ্টা অব্যাহত ৰখা বুলি বিশ্লেষকসকলে কৈছে৷ সময়ত দেখা যাব ৰাজনৈতিক নৰিয়াত আক্ৰান্ত গৌৰৱ গগৈয়ে কিদৰে লাচিতৰ ৰূপত ৰণ জিকিব পাৰে৷