দান বৰঙণিৰে ১৯৮২ চনত চপাই শালৈপাৰাত স্থাপিত আৰু পৰৱৰ্তীকালত প্ৰাদেশিকীকৰণ হোৱা উত্তৰ মঙলদৈ উচ্চ মাধ্যমিক বিদ্যালয়ৰ কৰ্তৃপক্ষ শেহতীয়াকৈ ব্যাপক দুৰ্নীতিত লিপ্ত হোৱাৰ অভিযোগ উত্থাপিত হৈছে। এনে দুৰ্নীতিত অতিষ্ঠ হৈ অৱশেষত বিদ্যালয় পৰিচালনা আৰু উন্নয়ন সমিতিৰ সভাপতি শ্ৰীকান্ত নাথ, আন কেইজনমান সদস্য আৰু একাংশ অভিভাৱকে দৰং জিলা সংমণ্ডলৰ বিদ্যালয় সমূহৰ পৰিদৰ্শকৰ কাৰ্যালয়ত লিখিত অভিযোগ দাখিল কৰাত ১২ জুনত তিনিজনীয়া এটা বিষয়াৰ দলে তদন্ত কৰিবলৈ আহি স্তম্ভিত হৈ পৰে।

কিয়নো তদন্ত কৰিব অহাৰ দিনাই মধ্যাহ্ন ভোজনৰ নামত হৈ থকা কেলেংকাৰী স্বচক্ষে প্ৰত্যক্ষ কৰে তদন্তকাৰী দলটোৱে। জানিব পৰা মতে, প্ৰতি বুধবাৰে ছাত্ৰ ছাত্ৰীক মধ্যাহ্ন ভোজনত এটাকৈ কণী দিব লাগে যদিও ২৫০ জন ছাত্ৰ ছাত্ৰীৰ বিপৰীতে ১২ জুনত কণী কিনা হৈছিল মাত্ৰ ২০ টা। তদন্তকাৰী বিষয়াৰ দলে এই সম্পৰ্কত সোধাত প্ৰধান শিক্ষয়িত্ৰী দিপালী শৰ্মাই কয়, ‘আমাৰ বিদ্যালয়ৰ বহু ছাত্ৰ-ছাত্ৰীয়ে কণী খাই ভাল নাপায়’। আনহাতে প্ৰতি শনিবাৰেও ছাত্ৰ ছাত্ৰীক মধ্যাহ্ন ভোজন দিব লাগে যদিও এই বিদ্যালয় কৰ্তৃপক্ষই শনিবাৰে মধ্যাহ্ন ভোজন নিদিয়াৰ অভিযোগ উঠিছে। তদুপৰি বিদ্যালয় উন্নয়নৰ নামত আৱণ্টিত ধনৰ ব্যাপক খেলিমেলিৰ তথ্য লাভ কৰিছে তদন্তকাৰী দলে। যাৰফলত তদন্তকাৰী দলে বহু নথিপত্ৰ জব্দ কৰি লৈ গৈছে। এই তদন্ত সঠিকভাৱে হোৱাটো কামনা কৰিছে বিদ্যালয় পৰিচালনা আৰু উন্নয়ন সমিতিৰ সভাপতি আৰু চপাইৰ সচেতন ৰাইজে।

চাপৰ’ৰ বহলপুৰত অঘটন।

নিউ মইনাগুৰী-যোগীঘোপাৰ ৰে’ল পথত বাগৰিল গছ।

দুৰ্ঘটনাৰ পৰা ৰক্ষা এখন নামনি অভিমুখী মালবাহী ট্ৰেইনৰ।

প্ৰায় এঘন্টা ধৰি আৱদ্ধ হৈ পৰিল মালবাহী ট্ৰেইনখন।

পিছত বহলপুৰ বন বিভাগৰ তৎপৰতাত মুকলি হয় ৰে’ল পথচোৱা।

দেৰগাঁৱত গোলকীয় উষ্ণতাৰ হ্ৰাসৰ বাবে গছপুলি ৰোপণ। দেৰগাঁও পৌৰসভাৰ ২নং ৱাৰ্ডৰ সুধাকন্ঠ চাৰিআলিত ৰোপন কৰা হ’ল গছপুলি সমূহ। চাৰিলেনযুক্ত পথ নিৰ্মাণৰ বাবে ডাঙৰ ডাঙৰ গছ সমূহ কাটি পেলোৱা হ’ল বাবে উৎকট গৰমতো ছাঁ বুলিবলৈ নাইকিয়া হ’ল। সেই উৎকট গৰমৰ পৰা ৰক্ষা পাবৰ বাবে আৰু ছাঁৰ বাবে সমাজসেৱী নুৰুল চুলতানৰ একক প্ৰচেষ্টাত দেৰগাঁও পৌৰসভাৰ ২নং ৱাৰ্ডৰ সুধাকন্ঠ চাৰিআলিত আজি বিভিন্ন প্ৰজাতিৰ গছপুলি ৰোপণ কৰা হয়।

এই গছপুলি সমূহ ৰোপণ কৰে বিশিষ্ট সমাজকৰ্মী নৰেন দাস,দেৰগাঁও পৌৰসভাৰ ২নং ৱাৰ্ডৰ ৱাৰ্ড কমিচনাৰ উজ্জ্বল কাশ্যপ, দেৰগাঁও সাহিত্য সভাৰ সম্পাদক অজিত চন্দ্ৰ দত্ত, যুৱ ব্যৱসায়ী সমৰ বৰুৱা, সংবাদসেৱী কাজু ৰবিদাস আৰু বিদ্বান বৰদলৈয়ে। নুৰুল চুলতানে গছপুলি সমূহৰ সম্পূৰ্ণ লালন পালনৰ দায়িত্বও গছপুলি ৰোপণ কৰা বিশিষ্ট ব্যক্তিসকলক অৰ্পণ কৰাৰ লগতে নামফলক লগাই দায়িত্ববোধৰ পৰিচয় দিবলৈ অনুৰোধ জনাই। উল্লেখ্য যে নুৰুল চুলতানে বিগত বহু বছৰ ধৰি বিভিন্ন অঞ্চলত গছপুলি ৰোপণ কৰি লালল-পালন কৰি আহিছে।