ৰাহুল গান্ধীয়ে আমেথিৰ সলনি ৰায়বেৰেলীৰ পৰা লোকসভা নিৰ্বাচনত প্ৰতিদ্বন্দ্বিতা কৰাৰ বিষয়টোক বিজেপিয়ে কংগ্ৰেছক উপলুঙা কৰাৰ অস্ত্ৰ হিচাবে বাছি লৈছে। প্ৰধানমন্ত্ৰী নৰেন্দ্ৰ মোদীৰ পৰা আৰম্ভ কৰি আন বহু বিজেপি নেতা-নেত্ৰীয়ে ৰাহুলে ৰায়বেৰেলীৰ পৰা নিৰ্বাচন খেলাৰ কথাটোকলৈ ৰাহুলক কটাক্ষ কৰিছে। কংগ্ৰেছেও বিজেপিৰ সমালোচনাৰ প্ৰত্যুত্তৰ সামাজিক মাধ্যমত দিয়া পৰিলক্ষিত হৈছে। প্ৰধানমন্ত্ৰী নৰেন্দ্ৰ মোদীয়ে ৰাহুল গান্ধীক ‘ডৰো মত, ভাগো মত’ বুলি উপহাস কৰাৰ পিছতে এই সন্দৰ্ভত প্ৰতিক্ৰিয়া ব্যক্ত কৰি কংগ্ৰেছ নেতাসকলে কয় যে দবা আৰু ৰাজনীতিৰ এজন অভিজ্ঞ খেলুৱৈ হিচাপে ৰাহুল গান্ধীয়ে ৰায়বেৰেলীৰ পৰা প্ৰতিদ্বন্দ্বিতা কৰাৰ সিদ্ধান্ত লৈছে। তেওঁৰ সমষ্টি নিৰ্বাচনৰ বিষয়ে ভালদৰে চিন্তা কৰা হৈছে। কংগ্ৰেছৰ যোগাযোগ বিভাগৰ ভাৰপ্ৰাপ্ত সাধাৰণ সম্পাদক জয়ৰাম ৰমেশে কয় “মনত ৰাখিব, ৰাহুল গান্ধী ৰাজনীতি আৰু দবা খেলৰ এজন অভিজ্ঞ খেলুৱৈ। দলৰ নেতৃত্বই বহু আলোচনাৰ পিছত আৰু বৃহত্তৰ ৰণনীতিৰ অংশ হিচাপে এই সিদ্ধান্ত লৈছে। এই সিদ্ধান্তই বিজেপি আৰু ইয়াৰ সমৰ্থকসকলক বিচলিত কৰিছে’’।
তেওঁ লগতে কয় যে ৰায়বেৰেলীক ইন্দিৰা গান্ধী আৰু ছোনিয়া গান্ধীয়ে প্ৰতিনিধিত্ব কৰিছে আৰু এয়া কোনো ‘উত্তৰাধিকাৰৰ বিষয় নহয়; এয়া দায়িত্ব আৰু কৰ্তব্য’। গান্ধী পৰিয়ালৰ বাবে কেৱল আমেথি-ৰায়বেৰেলীয়েই নহয়, উত্তৰৰ পৰা দক্ষিণলৈ সমগ্ৰ দেশ গান্ধী পৰিয়ালৰ দুৰ্গ। ৰাহুল গান্ধী উত্তৰ প্ৰদেশৰ পৰা তিনিবাৰ আৰু কেৰালাৰ পৰা এবাৰ সাংসদ হৈছে। প্ৰধানমন্ত্ৰীয়ে বিন্ধ্য পাৰ হৈ কোনো এখন আসনৰ পৰা নিৰ্বাচনত প্ৰতিদ্বন্দ্বিতা কৰিবলৈ সাহস কিয় গোটাব নোৱাৰে?”।

ইপিনে কংগ্ৰেছ নেত্ৰী সুপ্ৰিয়া শ্ৰীনেটে ইংগিত দিছে যে প্ৰিয়ংকা গান্ধীয়ে উপ-নিৰ্বাচনত প্ৰতিদ্বন্দ্বিতা কৰিব পাৰে । তেওঁ কয় “প্ৰিয়ংকাই জোৰদাৰ প্ৰচাৰ চলাই আছে আৰু নৰেন্দ্ৰ মোদীৰ বাবে কঠিন প্ৰত্যাব্বান হিচাবে প্ৰমাণিত হৈছে।’’ কংগ্ৰেছে লগতে কয়, ‘খেলিবলৈ এতিয়াও কেইটামান দবাৰ চাল বাকী আছে’। উল্লেখ শুকুৰবাৰে বংগৰ বৰ্ধমানত এক ৰেলী সম্বোধন কৰি প্ৰধানমন্ত্ৰী মোদীয়ে ৰায়বেৰেলীৰ পৰা দ্বিতীয়খন আসনত ৰাহুলে প্ৰতিদ্বন্দ্বিতা কৰাকলৈ ৰাহুলক কটাক্ষ কৰিছিল। প্ৰধানমন্ত্ৰীয়ে কয়, “তেওঁলোকে ঘূৰি ফুৰে আৰু সকলোকে কয়, ‘ডৰো মত’। আজি মই কৈছো, মই মোৰ হৃদয়ৰ পৰা কৈছো, ডৰো মত, ভাগো মত!” প্ৰধানমন্ত্ৰীয়ে কৈছিল, “মই কৈছো যে ৰাহুল ৱায়নাডৰ পৰাজিত হ’বলৈ গৈ আছে। পৰাজয়ৰ আশংকাত তেওঁ দ্বিতীয় খন আসন বিচাৰিবলৈ আৰম্ভ কৰিছিল। কংগ্ৰেছৰ পালি নেতাসকলে কৈ আহিছিল যে ৰাহুল আমেথিলৈ আহিব। তেওঁ পৰাজয়ৰ ভয়ত তালৈ যাব নোৱাৰিলে। অৱশেষত, তেওঁ ৰায়বৰেলীলৈ গ’ল। ডৰো মত, ভাগো মত!”

চলিছিল বহু জল্পনা-কল্পনা। আমেথি আৰু ৰায়বেৰেলীৰ পৰা কংগ্ৰেছে কাক প্ৰাৰ্থিত্ব প্ৰদান কৰিব। এটা সময়ত দুয়োটা সমষ্টিয়েই কংগ্ৰেছৰ দুৰ্গ আছিল। অৱশেষত সকলো জল্পনা-কল্পনাৰ অন্ত পেলাই ৰাহুলে আমেথি এৰিলে। আমেথিৰ সলনি ৰাহুল গান্ধীয়ে মাতৃৰ সমষ্টি ৰায়বেৰেলীৰ পৰা নিৰ্বাচনত প্ৰিদ্বন্দ্বিতা কৰিব। বহুে ধাৰণা কৰিছিল যে আমেথি অথবা ৰায়বেৰেলীৰ পৰা প্ৰিয়ংকাই নিৰ্বাচনী যুঁজত লিপ্ত হ’ব। কিন্তু সেয়া নহ’ল। ৰায়বেৰেলীত ৰাহুল গান্ধীক প্ৰাৰ্থিত্ব দিয়াৰ বিপৰীতে, আমেথিৰ পৰা প্ৰাৰ্থিত্ব দিয়া হ’ল গান্ধী পৰিয়ালৰ ঘনিষ্ঠ নেতা কিশোৰী লাল শৰ্মাক। ফলত গান্ধী পৰিয়ালৰ পৰা মুক্ত হ’ল আমেথি। শুক্ৰবাৰে ছোনিয়া গান্ধী আৰু ভগ্নী প্ৰিয়ংকাৰ সৈতে গৈ ৰায়বেৰেলী সমষ্টিত ৰাহুল গান্ধীয়ে দাখিল কৰে মনোনয়ন পত্ৰ। একে সময়তে আমেথি সমষ্টিৰ পৰা কংগ্ৰেছ প্ৰাৰ্থী হিচাপে মনোনয়ন দাখিল কৰে কংগ্ৰেছ প্ৰাৰ্থী কিশোৰী লাল শৰ্মাই। একে দিনাই মনোনয়ন দাখিল কৰে ৰায়বেৰেলীৰ বিজেপি প্ৰাৰ্থী দীনেশ প্ৰতাপ সিঙেও। বিজেপিয়ে বৃহস্পতিবাৰে ঘোষণা কৰিছিল ৰায়বেৰেলী সমষ্টিৰ প্ৰাৰ্থীগৰাকীৰ নাম।

২০ মে’ত নিৰ্বাচন হ’বলগীয়া সমষ্টি দুটাৰ শুক্ৰবাৰে মনোনয়ন দাখিলৰ অন্তিম দিনা তথা ৩ মে’ৰ পুৱা কংগ্ৰেছে সমষ্টি দুটাৰ প্ৰাৰ্থীৰ নাম ঘোষণা কৰিছিল।উল্লেখ্য ২০১৯ চন পৰ্যন্ত আমেথিক প্ৰতিনিধিত্ব কৰা ৰাহুল গান্ধীৰ ঘনিষ্ঠ কংগ্ৰেছ নেতা কিশোৰী লাল শৰ্মা। গান্ধী পৰিয়ালৰ দুৰ্গ স্বৰূপ উত্তৰ প্ৰদেশৰ আমেথি আৰু ৰায়বেৰেলীক সমগ্ৰ দেশবাসীৰে দৃষ্টি নিবদ্ধ হৈ আছে। আমেথি সমষ্টিৰ পৰা যোৱাবাৰৰ প্ৰতিনিধি তথা কেন্দ্ৰীয় মন্ত্ৰী স্মৃতি ইৰাণীয়ে ইতিমধ্যে মনোনয়ন দাখিল কৰিছে। আমেথিৰ পৰা এইবাৰো ৰাহুল গান্ধীৰ নাম উচ্চাৰিত হৈ আছিল যদিও শেষপৰ্যন্ত আমেথিৰ বিপৰীতে ২০০৪ৰ পৰা ২০১৯লৈ মাতৃ ছোনিয়া গান্ধীয়ে প্ৰতিনিধিত্ব কৰা ৰায়বৰেলীত ৰাহুল গান্ধীক কংগ্ৰেছে প্ৰাৰ্থিত্ব দিয়ে। ৰাহুলে আমেথি এৰিলে, মাতৃৰ ৰায়বেৰেলীৰ উত্তৰাধিকাৰী হোৱাৰ মন ৰাহুল গান্ধীৰ, প্ৰিয়ংকাই এইবাৰো নানামিলে নিৰ্বাচনী যুঁজত।

গান্ধী পৰিয়ালৰ দুৰ্গ স্বৰূপ উত্তৰ প্ৰদেশৰ আমেথি আৰু ৰায়বেৰেলীক সমগ্ৰ দেশবাসীৰে দৃষ্টি নিবদ্ধ হৈ আছে। আমেথি সমষ্টিৰ পৰা যোৱাবাৰৰ প্ৰতিনিধি তথা কেন্দ্ৰীয় মন্ত্ৰী স্মৃতি ইৰাণীয়ে ইতিমধ্যে মনোনয়ন দাখিল কৰিছে। আমেথিৰ পৰা এইবাৰো ৰাহুল গান্ধীৰ নাম উচ্চাৰিত হৈ আছিল যদিও শেষপৰ্যন্ত আমেথিৰ বিপৰীতে ২০০৪ৰ পৰা ২০১৯লৈ মাতৃ ছোনিয়া গান্ধীয়ে প্ৰতিনিধিত্ব কৰা ৰায়বৰেলীত ৰাহুল গান্ধীক কংগ্ৰেছে প্ৰাৰ্থিত্ব দিয়ে।