দৈনন্দিন বাৰ্তা সেৱা চিলাপথাৰ,৩ এপ্ৰিলঃ ১২ নং লখিমপুৰ লোকসভা সমষ্টিৰ বিজেপি মনোনীত আৰু মিত্ৰজোঁটৰ সমৰ্থিত প্ৰাৰ্থী প্ৰদান বৰুৱাই আজি জোনাই বিধানসভা সমষ্টিৰ ডিমৌ কৃষ্টি ভৱনৰ লগতে নৱগঠিত চিচিবৰগাওঁ বিধানসভা সমষ্টিৰ চিলাপথাৰৰ জনজাতি আৰু শ্ৰীপানিত নিৰ্বাচনী ৰণডংকা বজায়। তিনিওখন বিশাল নিৰ্বাচনী সভাত ৰাইজক উদ্দেশ্যি ভাষন আগবঢ়াই বিজেপি প্ৰাৰ্থী প্ৰদান বৰুৱাই কয় দেশৰ জনপ্ৰিয় আৰু কৰ্মযোগী প্ৰধানমন্ত্ৰী নৰেন্দ্ৰ মোদীৰ দহ বছৰীয়া শাসন কালত উন্নয়নৰ যি ধাৰা বোৱাই লৈ গৈছে,সেই উন্নয়নৰ বাবে দেশৰ জনগণে পুনৰ তৃতীয় বাৰৰ বাবে প্ৰধানমন্ত্ৰী হিচাপে মনেপ্ৰাণে বিচাৰিছে।

প্ৰধানমন্ত্ৰী নৰেন্দ্ৰ মোদীয়ে দেশৰ সকলো শ্ৰেণীৰ জনগণৰ কল্যাণৰ বাবে যি বিলাক জনমুখী আঁচনি গ্ৰহণ কৰিছে সেয়া কোনো মধ্যভোগী অবিহনে দৰিদ্ৰ জনসাধাৰণে লাভ কৰিবলৈ সক্ষম হৈছে।

সাংবাদিকৰ প্ৰশ্নৰ উত্তৰত প্ৰদান বৰুৱাই কয় সময়ৰ অভাৱৰ বাবে বিজেপিৰ নিৰ্বাচনী কাৰ্য্যালয়তে কংগ্ৰেছী সকলক যোগদান কৰিবলৈ আহ্বান জনায়।নিৰ্বাচনী সভাত জোনাইৰ বিধায়ক ভূৱন পেগুয়ে কয় প্ৰধানমন্ত্ৰী নৰেন্দ্ৰ মোদী আৰু অসমৰ মুখ্যমন্ত্ৰীয়ে যেনে ধৰণে জনসাধাৰণৰ উন্নয়নৰ বাবে কাম কৰিছে,তাৰ জৰিয়তে ৰাইজ যথেষ্ট উপকৃত হৈছে আৰু এইবাৰ পুনৰ তৃতীয় বাৰৰ বাবে নৰেন্দ্ৰ মোদী দেশৰ প্ৰধানমন্ত্ৰী হোৱাটো নিশ্চিত হৈছে বুলি উল্লেখ কৰি লখিমপুৰ লোকসভা সমষ্টিত যিবোৰ মূল মূল কংগ্ৰেছী আছিল গোটেইবোৰে বিজেপিত যোগদান কৰিছে আৰু গাঁৱত থকা বাকীখিনিও লাহে লাহে যোগদান কৰিব বুলি উনুকিয়াই পুৰণা জোনাই সমষ্টিৰ পৰা এক লাখ ভোটত প্ৰদান বৰুৱা আগবাঢ়িব বুলি ভাষন দাঙি ধৰি কংগ্ৰেছ শূন্য লখিমপুৰত অসমৰ ভিতৰতে সৰ্বাধিক ভোটৰ ব্যৱধানত বিজেপি প্ৰাৰ্থী বিজয়ী হ’ব বুলি ঘোষনা কৰি সকলোতে মোদীময় পৰিৱেশ সৃষ্টি হোৱা সময়ত কংগ্ৰেছৰ টিকট লৈ নিৰ্বাচনত নমাটো উদয় শংকৰ হাজৰিকাৰ নিশ্বয় স্বাস্থ্যজনিত কিবা অভাৱ ঘটিছে বুলি কটাক্ষ কৰে।

নিৰ্বাচনী সভাত ধেমাজি জিলা বিজেপিৰ সভানেত্ৰী ৰূপা কামান,অগপ,সন্মিলীত গণ শক্তিৰ কেবাগৰাকী শীৰ্ষ নেতা কৰ্মী উপস্থিত থাকে। তিনিওখন সভাতেই ৰাইজৰ ব্যাপক উপস্থিতি দেখা যায়।

সঞ্জয় সিঙ জামিনত মুক্তিঃ EDক উচ্চতম ন্যায়লয়ৰ ভৰ্ৎসনা

দিল্লীৰ তথাকথিত সুৰা কেলেংকাৰি বিজেপিৰ এটা ৰাজনৈতিক ষড়যন্ত্ৰৰ বাহিৰে একো নহয়— ডাঃ ভবেন চৌধুৰী

বিজেপিয়ে যিমানেই ষড়যন্ত্ৰ নকৰক, তেওঁলোকে আপক কেতিয়াও নিঃশেষ কৰিব নোৱাৰে— হেমন্ত ফুকন, মুখপাত্ৰ, আপ

গুৱাহাটী, ৩ এপ্ৰিল : দিল্লীৰ নতুন আবকাৰী নীতিৰ অনিয়মৰ ভুৱা গোচৰত আপৰ ৰাজ্যসভাৰ সাংসদ সঞ্জয় সিঙক ই ডিয়ে অন্যায় ভাৱে গ্ৰেপ্তাৰ কৰি কাৰাগাৰলৈ নিক্ষেপ কৰিছিল। সাংসদ গৰাকীৰ বিৰুদ্ধে ইডিয়ে দুৰ্নীতিৰ কোনো ধৰণৰ তথ্য প্ৰমাণ আদালতত দাখিল কৰিব নোৱাৰাৰ বাবে ন্যায়ালয়ে সাংসদ সঞ্জয় সিঙক জামিনত মুক্তি দিয়ে। আম আদমি পাৰ্টীৰ গুৱাহাটীৰ গণেশগুৰিস্থিত ৰাজ্যিক কাৰ্যালয়ত এই সন্দৰ্ভত এক সংবাদমেলত আপৰ ৰাজ্যিক সভাপতি ডাঃ ভবেন চৌধুৰীয়ে অভিযোগ কৰে – আপৰ সাংসদ সঞ্জয় সিঙে জামিন পোৱাৰ কথাটোৱে ইয়াকেই প্ৰমাণ কৰে যে দিল্লীৰ তথাকথিত সুৰা কেলেংকাৰী বিজেপিৰ এটা ৰাজনৈতিক ষড়যন্ত্ৰৰ বাহিৰে একো নহয়। EDৰ ওচৰত দিল্লীৰ তথাকথিত সুৰা কেলেংকাৰীৰ সৈতে জড়িত ধনৰ লেনদেনৰ কোনো তথ্য নাই আৰু সেইবাবে তেওঁলোকে উচ্চতম ন্যায়ালয়ৰ মজিয়াত জামিনৰ বিৰোধিতা কৰাৰ কোনো সুবিধা লাভ নকৰিলে।

এই কথাই ইয়াকে প্ৰমাণ কৰে যে বিজেপি আৰু EDয়ে ষড়যন্ত্ৰমূলকভাৱে আম আদমি পাৰ্টীৰ নেতাসকলক গ্ৰেপ্তাৰ কৰি ৰাখিছে। দিল্লীৰ সুৰা কেলেংকাৰীৰ ৰাজসাক্ষী দিনেশ আৰোৰাৰ সম্পৰ্কে উল্লেখ কৰি ডাঃ চৌধুৰীয়ে কয় যে যিজন দিনেশ আৰোৰাৰ বক্তব্যৰ ওপৰত ভিত্তি কৰি সঞ্জয় সিঙক গ্ৰেপ্তাৰ কৰিছিল সেইজন দিনেশ আৰোৰাই EDক এঘাৰবাৰ বক্তব্য প্ৰদান কৰিছিল, কিন্তু এই এঘাৰটা বক্তব্যৰ ভিতৰৰ দহটাতেই তেওঁ সঞ্জয় সিঙৰ বিপক্ষে কোনোধৰণৰ অভিযোগ উত্থাপন কৰা নাছিল। একেবাৰে শেষৰটো ভাষ্যতহে তেওঁ সঞ্জয় সিঙৰ নাম লৈছিল। যি দহটা ভাষ্যত তেওঁ সঞ্জয় সিঙৰ নাম লোৱা নাছিল সেইকেইটা ভাষ্যক EDয়ে নোহোৱা কৰি পেলোৱা কাৰ্যত উচ্চতম ন্যায়ালয় ক্ষুব্ধ হৈছে। উল্লেখ্য যে সঞ্জয় সিঙৰ জিম্মাৰ পৰা এটকাও উদ্ধাৰ কৰিব নোৱাৰাৰ পাছতো সঞ্জয় সিঙৰ বিৰুদ্ধে কেনেকৈ PMLA প্ৰয়োগ কৰিলে আৰু বিগত ছমাহে গ্ৰেপ্তাৰ কৰি ৰাখিলে সেই প্ৰশ্ন কৰে দেশৰ সৰ্বোচ্চ ন্যায়ালয়ে। সংবাদমেলত এই সন্দৰ্ভত আপৰ জ্যেষ্ঠ মুখপাত্ৰ হেমন্ত ফুকনে উল্লেখ কৰে যে অৰবিন্দ কেজৰিৱাল, মনিশ ছিছোদিয়া, সঞ্জয় সিং বা সত্যেন্দ্ৰ জৈনৰ গ্ৰেপ্তাৰৰ Modus Operandi একেই। কোনো এজন লোকক EDয়ে প্ৰথমতে গ্ৰেপ্তাৰ কৰি তেওঁক ব্যাপক মানসিক চাপ প্ৰদান কৰি তেওঁৰ মুখেৰে আপৰ এজন নেতাৰ নাম লোৱাব আৰু সেই ব্যক্তিজনক ৰাজসাক্ষী হিচাপে মুকলি কৰাই আপৰ নেতাজনক EDয়ে গ্ৰেপ্তাৰ কৰে।

এইসম্পৰ্কে অধিক উল্লেখ কৰি হেমন্ত ফুকনে কয় যে অৰবিন্দ কেজৰিৱালক সাৰথ ৰেড্ডীৰ ভাষ্যৰ আধাৰত গ্ৰেপ্তাৰ কৰে। সেইজন সাৰথ ৰেড্ডীয়ে বিজেপিক ইলেক্ট’ৰেল বণ্ডৰ যোগেদি ৫৫ কোটি টকা প্ৰদান কৰিছে। সেইদৰে আন দুজন ৰাজসাক্ষী হৈছে পিতা-পুত্ৰ বাগুন্তা শ্ৰীনিবাসন ৰেড্ডী আৰু ৰাঘৱ ৰেড্ডী। এই বাগুন্তা ৰেড্ডীক কেজৰিৱালৰ বিৰুদ্ধে সাক্ষ্য দিয়াৰ উপহাৰস্বৰূপে বিজেপিৰ সহযোগী NDAৰ তেলেগু দেশম (TDP) দলে তেওঁক লোকসভা নিৰ্বাচনৰ বাবে দলীয় টিকট প্ৰদান কৰিছে। ৰাজ্যিক জ্যেষ্ঠ মুখপাত্ৰ হেমন্ত ফুকনে লগতে কয় যে বিজেপিয়ে দিল্লীৰ তথাকথিত সুৰা কেলেংকাৰী সৃষ্টি কৰি আম আদমি পাৰ্টীক নিঃশেষ কৰাৰ চেষ্টা কৰিলেও কাৰ্যতঃ তেওঁলোক সফল নহ’ব। তেওঁ কয় যে এজন কেজৰিৱালক গ্ৰেপ্তাৰ কৰিলে আৰু দহজন কেজৰিৱাল ওলাই আহিব।

আপৰ মুৰব্বী অৰবিন্দ কেজৰিৱালক গ্ৰেপ্তাৰ কৰিলে, দ্বিতীয় লাইনৰ মনিষ ছিছোদিয়া আৰু সঞ্জয় সিঙকো গ্ৰেপ্তাৰ কৰিলে, কিন্তু লগে লগে তৃতীয় লাইনৰ আতিশী, সৌৰভ ভাৰদ্বাজ আদিৰ দৰে নেতা ওলাই আহিল। তেওঁলোকক গ্ৰেপ্তাৰ কৰিলে চতুৰ্থ শাৰীৰ নেতাসকল ওলাই আহিব। এই মন্তব্য কৰি হেমন্ত ফুকনে লগতে কয় যে আম আদমি পাৰ্টী দুৰ্নীতিবিৰোধী জন আন্দোলনৰ যোগেৰে জন্ম হোৱা এটা ৰাজনৈতিক দল। বিজেপিৰ দৰে এটা দুৰ্নীতিকাৰী আৰু সাম্প্ৰদায়িক দলে যিমানেই ষড়যন্ত্ৰ নকৰক কিয় তথাপিও এই দলটোক কেতিয়াও ধ্বংস কৰিব নোৱাৰে। আম আদমি পাৰ্টীয়ে সকলো প্ৰত্যাহ্বান নেওচি ভাৰতক বিশ্বৰ ভিতৰত এক নম্বৰ দেশ হিচাপে প্ৰতিষ্ঠা লক্ষ্যত কাম কৰিব। সংবাদমেলত আপৰ ৰাজ্যিক সভাপতি ডাঃ ভবেন চৌধুৰী, মুখপাত্ৰ হেমন্ত ফুকনৰ লগতে দলৰ সংখ্যালঘু কোষৰ নেতা আৰিফ শিকদাৰো উপস্থিত থাকে।