অসমৰ সৰ্বস্তৰ জনগণৰ আশা-আকাংক্ষাৰ লগতে এখন আত্মনিৰ্ভৰশীল তথা সমৃদ্ধিশালী অসম গঢ়ি তোলাৰ প্ৰতি লক্ষ্য আগত ৰাখি বিধানসভাৰ পবিত্ৰ সদনৰ মজিয়াত অসমৰ বিত্তমন্ত্ৰী অজন্তা নেওঁগে দাখিল কৰা পূৰ্ণাংগ বিত্তীয় বাজেট ২০২৪-২৫ ক ৰাজ্যিক বিজেপিৰ সভাপতি ভবেশ কলিতাই আদৰণি জনাইছে।

এক প্ৰেছ বিবৃতিত কলিতাই কয়, এই বাজেট খন এখন সর্বাংগ উন্নয়ন তথা জনমুখী আৰু আন্তঃগাঁথনিমুখী বাজেট। ৰাইজৰ সৰ্বাঙ্গীন বিকাশ তথা দ্ৰুত উন্নয়নৰ স্বাৰ্থত আজিৰ বিত্তীয় বাজেটত মুখ্যমন্ত্ৰী আত্মনিৰ্ভৰ অসম আচঁনি,অসম মালা ২.০ আঁচনিৰ জৰিয়তে পথসমূহ দ্ৰুত গতিত নিৰ্মাণ কৰাৰ বাবে কেইবা হাজাৰ কোটি টকা ধার্য কৰা হৈছে। তদুপৰি গ্ৰাম্য মহিলা উদ্যোগী সৱলীকৰণৰ পদক্ষেপৰে মুখ্যমন্ত্ৰী মহিলা উদ্যোমিতা অভিযান আঁচনি,অসম মাইক্ৰ ফাইনেন্স উদগনি আৰু সকাহ আঁচনিৰ জৰিয়তে অসমৰ নাৰী শক্তিক ধাৰ মুক্ত কৰণ কৰি তুলিবলৈ তৃতীয় পৰ্যায়ত কেইবা হাজাৰ কোটি টকা ধার্য কৰা হৈছে।

আনহাতে মুখ্যমন্ত্ৰী মাইনা আঁচনিৰ জৰিয়তে উচ্চ শিক্ষাৰ নামভৰ্ত্তিৰ বাবে ১০ লাখ ছাত্ৰী সকলক উদগনি মূলক আৰ্থিক বিত্তীয় অনুদান আগবঢ়োৱা হব, পৌৰসভাত নিয়োজিত চাফাই কৰ্মচাৰী সকলৰ বাবে গৃহ নিৰ্মাণ, গ্ৰাম্য অঞ্চলৰ আত্মসহায়ক গোটৰ মহিলা সদস্যক ১০ হাজাৰ টকা প্ৰদান, কেইবাশ কোটি টকা ব্যয়েৰে ষ্টেডিয়াম নিৰ্মাণ, চৰকাৰী তথা ব্যক্তিগত গৃহত সৌৰ শক্তিৰ ব্যৱস্থাপনাৰ বাবে বাজেটত ধন ধাৰ্য কৰা হৈছে।

ৰাজ্যিক সভাপতি গৰাকীয়ে কয়, এই জনমুখী বাজেটখনে অনাগত দিনবোৰত ৰাজ্যখনক আৰু অধিক আগবঢ়াই নিয়াৰ লগতে অসমৰ অৰ্থ ব্যৱস্থাৰ ভেটি অধিক শক্তিশালী তথা সুদৃঢ় কৰাৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰিব বুলি আশাবাদী। কলিতাই লগতে অসমবাসীক এখন সৰ্বগতিশীল বাজেট প্ৰদান কৰাৰ বাবে মুখ্যমন্ত্ৰী ড॰ হিমন্ত বিশ্ব শৰ্মা, বিত্তমন্ত্ৰী অজন্তা নেওগক আন্তৰিক ধন্যবাদ জনাই।

১১ ফেব্ৰুৱাৰীৰ পৰা ‘দৈনন্দিন বাৰ্তা গোষ্ঠী’ চিৰঞ্জীৱী হোৱাৰ লক্ষ্যৰে ঘৰে ঘৰে ‘দৈনন্দিন বাৰ্তা’, ‘দ্য আছাম ৰাইজিং’, ‘আলোকপ্ৰভঞ্জন’ আৰু মোবাইলে মোবাইলে ‘ডিবি নিউজ’ অভিযানৰ অংশ হিচাপে বিভিন্ন ক্ষেত্ৰৰ বিশিষ্ট ব্যক্তিসকলক সম্বৰ্ধনা জনোৱা কাৰ্যসূচী হাতত লোৱা হৈছে।

১১ ফেব্ৰুৱাৰীত ধেমাজিত সাংবাদিক উমেশ চেতিয়াক সম্বৰ্ধনা জনোৱা হয়৷

-জয়ন্ত বৰা, ধেমাজি

মিচিং জনগোষ্ঠীৰ আঃবাং সন্মত ৰীতি- নীতি আৰু আধুনিক জীৱন-পদ্ধতি সংমিশ্ৰণৰ আধাৰত মিচিং জাতীয় সংগঠনৰ সমূহে সৰ্বসন্মতিক্ৰমে প্ৰস্তুত কৰা নিয়মাৱলী সম্পৰ্কে মিচিং অধ্যুষিত ৩৫ টাতকৈয়ো অধিক স্থানত আলোচনা সভা অনুষ্ঠিত কৰা হয়। উক্ত আলোচনা সভাবোৰত কেন্দ্ৰীয় নেতৃবৃন্দৰ একোটাকৈ সদস্যৰ দলে অংশগ্ৰহণ কৰে।

কাকতলৈ প্ৰেৰণ কৰা এক বিবৃটিত মিচিং বাঃনৗ কৗবাঙৰ সভাপতি পৰমানন্দ চায়েঙ্গীয়াই এইদৰে জানিবলৈ দিয়ে ৷ তেওঁ বিবৃটিত জনোৱা মতে লৃগাং সম্পৰ্কীয়  আলোচনা সভাবোৰত  ‌সকলো মিচিং অধ্যুষিত অঞ্চলত  আলি আঃয়ৗ লৃগাং একে ৰীতি-নীতিৰে বা দস্তুৰ অনুসৰি উদ্‌যাপন কৰা সম্পৰ্কে আলোচনা কৰা হয়। মিচিং জাতীয় সংগঠন মিচিং বাঃনৗ কৗবাং,  টি এম পি কে, টি এম এম কে, এম এম কে,  মিচিং আগম কৗবাং, মিচিং দৃৰবৃ কৗবাঙৰ কেন্দ্ৰীয় নেতৃত্ববৃন্দৰ দ্বাৰা অনুষ্ঠিত কৰা উক্ত সভাবোৰত আলি আঃয়ৗ লৃগাং উদ্‌যাপনত মিচিঙৰ পুৰণি আখ্যান আঃবাঙৰ ওপৰত পূৰ্ণাংগভাৱে নিৰ্ভৰ কৰি পালন কৰিব লাগিব যদিও কিছু সংশোধন কৰাৰ নিয়ম কৰা হৈছে৷

সভাবোৰত মিচিং বাঃনৗ কৗবাঙে কৰা  অনুমোদিত নিয়মাৱলী কাৰ্যকৰী কৰাৰ বাবে আলি আঃয়ৗ লৃগাং  উদ্‌যাপন সমিতি সমূহৰ লগত জৰুৰী ভাৱে আলোচনা অনুষ্ঠিত কৰা সম্পৰ্কে আলোচনা কৰা হয়। মিচিং জনগোষ্ঠীৰ পৰম্পৰাগত এক নিৰ্দিষ্ট বিষয়ৰ ওপৰত একেটা দিনত কেন্দ্ৰীয় নেতৃবৃন্দৰ অংশগ্ৰহণেৰে’ এনে বৃহৎ কাৰ্যসূচী প্ৰথম বাৰৰ বাবে অনুষ্ঠিত কৰা হৈছে ৷

বিবৃটিত তেওঁ লগতে জনায় যে, আগন্তুক  ১৪ ফেব্ৰুৱাৰীত উদ্‌যাপিত কৰিব লগা মিচিং জাতীয় উৎসৱ আলি আঃয়ৗ লৃগাঙৰ পৰাই মিচিং জাতীয় সংগঠনৰ সিদ্ধান্তসমূহ কাৰ্যকৰী হ’ব বুলি মিচিং বাঃনৗ কৗবাঙৰ কেন্দ্ৰীয় সভাপতি পৰমানন্দ চায়েঙ্গীয়াই জানিবলৈ দিয়ে ৷

তেওঁ কয়- লৃগাং স্থলীত  আলি আঃয়ৗ লৃগাঙৰ উৎপত্তিৰ ঐতিহাসিক পটভূমি সম্পৰ্কে মিচিং জাতীয় সংগঠনসমূহে লোৱা সিদ্বান্ত আৰু মিচিং বাঃনৗ কৗবাঙৰ দ্বাৰা অনুমোদিত  আখ্যান  কাৰ্যসূচীত অন্তৰ্ভুক্ত কৰি ইয়াক পাঠ  কৰিব লাগিব লগতে মিচিং বাঃনৗ কৗবাঙৰ চৰ্তাৱলী কাৰ্যকৰী কৰিব লাগিব ৷