২০২৪ বৰ্ষৰ তিৱা বীৰ ৰজা জোঙাল বলহু বঁটা প্ৰদান চলচ্চিত্ৰ নিৰ্মাতা তথা বিশিষ্ট শিক্ষাবিদ পার্থজিৎ বৰুৱাক।”নেলীৰ কথা” ছবিৰ পৰিচালক পাৰ্থজিৎ বৰুৱাক নগাঁও জিলা তিৱা বীৰ ৰজা জোঙাল বলহু দিৱস উদযাপন সমিতিৰ তৰফৰ পৰা এই বঁটা প্ৰদান কৰা হয়।
উল্লেখযোগ্য যে বিশিষ্ট পৰিচালক পাৰ্থজিৎ বৰুৱাৰ শেহতীয়াকৈ মুক্তি লাভ কৰা “নেলীৰ কথা” শীৰ্ষক পূৰ্ণদৈৰ্ঘৰ ছবিখনে দৰ্শকৰ পৰা সমাদৰ লাভ কৰা লগতে কলিকতা আন্তঃৰাষ্ট্ৰীয় চলচ্চিত্ৰ মহোৎসৱকে ধৰি বিভিন্ন মহোৎসৱত প্ৰদৰ্শনৰ বাবে আমন্ত্ৰণ লাভ কৰিছিল।
৩ জানুৱাৰীৰ সন্ধিয়া আয়ৰা খান দীৰ্ঘদিনীয়া প্ৰেমিক নুপুৰ শিখাৰৰ সৈতে বিবাহপাশত আবদ্ধ হয়। আয়ৰা খানৰ পঞ্জীয়নভুক্ত বিবাহ অতি আড়ম্বৰেৰে হয়, য’ত মুকেশ আম্বানী-নীতা আম্বানীৰ লগতে বহু ডাঙৰ ব্যক্তিয়েও অংশগ্ৰহণ কৰে। কিন্তু দৰাৰ সাজ-পোছাকৰ পিছত কইনাৰ বিয়াৰ সাজ-পোছাকে সৰ্বাধিক শিৰোনাম দখল কৰিছে।আনহতে কন্যা আয়ৰা খানৰ বিবাহৰ পিছত ছ’চিয়েল মিডিয়াত ভাইৰেল হৈ পৰিছে আমিৰ খানৰ এটা ভিডিঅ’। ভিডিঅ’টোত আমিৰ খানে নিজৰ প্ৰাক্তন পত্নী কিৰণ ৰাওৰ গালত চুমা খোৱা দেখা গৈছে। বলীউডৰ বিয়াত সকলোৱে চকু ৰাখে। এই তাৰকাসকলে নিজৰ বা নিজৰ সন্তানৰ বাবে গ্ৰেণ্ড ৱেডিং বা ডেষ্টিনেচন ৱেডিঙৰ বিকল্প বাছি লয়। তেওঁলোকৰ বিয়াত পানীৰ দৰে টকা খৰচ হয় আৰু বহুত নতুন বস্তু চাবলৈ পায়। কিন্তু বলীউডৰ ছুপাৰষ্টাৰ আমিৰ খানৰ কন্যাই কালি অতি সাধাৰণভাৱে বিয়া পাতি সকলোকে আচৰিত কৰি তুলিলে। ।
আয়ৰাই কোনো দামী লেহেংগা বা ডিজাইনাৰ সাজ-পোছাক পিন্ধা নাছিল আৰু নুপুৰেও বিয়াত কোনো দামী শ্বেৰৱানী পিন্ধা নাছিল। লেহেংগা আৰু শাড়ীৰ সলনি আয়ৰাক ব্রাইডাল ষ্টাইলত দেখা গ’ল৷ তাই পিন্ধিছিল অতি সাধাৰণ সাজ-পোছাক। গ্লেমাৰৰ পৰা আঁতৰি আহি আমিৰ খানৰ কন্যা আয়ৰা আৰু নুপুৰ শিখাৰেৰ বিয়াৰ ভিডিঅ’ এতিয়া ছ’চিয়েল মিডিয়াত ভাইৰেল হৈ পৰিছে আৰু বলীউডৰ এই অনন্য বিয়াখন দেখি অনুৰাগীসকল আচৰিত হৈছে। এই সকলোবোৰৰ মাজতে কওঁ যে পঞ্জীয়নভুক্ত বিবাহৰ পিছত আয়ৰা খান আৰু নুপুৰ শিখাৰে উদয়পুৰত সম্পূৰ্ণ ৰীতি-নীতিৰে বিবাহপাশত আবদ্ধ হ’ব। ইয়াৰ পিছত আমিৰ খানে বলীউড উদ্যোগৰ বাবেও এক অভ্যৰ্থনা পাৰ্টিৰ আয়োজন কৰিব য’ত বহু ডাঙৰ তাৰকা উপস্থিত থকাৰ সম্ভাৱনা আছে।
ৰাজ্যজুৰি গৰুৰ অবৈধ সৰবৰাহ নিষিদ্ধ হৈ থকাৰ সমান্তৰাল ভাবে শোণিতপুৰত চোৰাংভাবে সৰবৰাহ হোৱা গৰু মাজে সময়ে আৰক্ষীয়ে জব্দ কৰিলেও জিলাখনৰ মাজেৰে বৰ্তমানেও গৰুৰ এনে চোৰাং সৰবৰাহ অব্যাহত আছে৷আনকি প্ৰয়োজনীয় চৰকাৰী নথিপত্ৰ অবিহনেই গৰু সৰবৰাহ কৰা বাহনে সাধাৰণ লোকৰ জীৱনলৈ সংশয় কঢ়িয়াই আনিছে৷যোৱা নিশা তেজপুৰৰ নিকটৱৰ্তী টুমুকীত ১৫নম্বৰ ৰাষ্ট্ৰীয় পথত তেজপুৰৰ দিশৰ পৰা মংগলদৈ অভিমুখে তীব্ৰ গতিত যোৱা এখন গৰু সৰবৰাহ কৰা বাহনে বিপৰীত দিশৰ পৰা অহা এখন বাহনক তীব্ৰ গতিত খুন্দামাৰে৷দুৰ্ঘটনাটোত আনখন বাহনৰ দুজন আৰোহী আহত হোৱাৰ বিপৰীতে গৰু সৰবৰাহ কৰা বাহনখনৰ চালক আৰু সহযোগীয়ে পলায়ন কৰে৷উল্লেখযোগ্য যে,আঠটা গৰু কঢ়িয়াই অনা এএছ১৩এচি২০৩২ নম্বৰ বাহনখনে এএছ১২জেদ০৪৯৪ নম্বৰ বাহনখনক মুখামুখি ভাবে খুন্দা মাৰে৷টুমুকীৰ এটা পেট্ৰল ডিপ’ৰ সন্মুখত হোৱা এই দুৰ্ঘটনাত তেজপুৰ অভিমুখী বাহনখনৰ আৰোহীদ্বয় প্ৰাক্তন সেনা বিষয়া ৰত্নেশ্বৰ মেধি আৰু তেওঁৰ সহায়ক সঞ্জু ওৰাং আহত হয়৷ইপিনে দুৰ্ঘটনাস্হলীৰ পৰা স্হানীয় বিহুগুৰি আৰক্ষী চকীলৈ দূৰত্ব যথেষ্ট হোৱাত গৰু কঢ়িয়াই অনা বাহনৰ চালক আৰু সহায়কে পলায়ন কৰে৷
পাছত বিহগুৰি আৰক্ষীয়ে গৰু সহ বাহনখন জব্দ কৰাৰ বিপৰীতে আহতদ্বয়ক তেজপুৰ চিকিৎসা মহাবিদ্যালয় হাস্পতালত চিকিৎসাধীন কৰা হয়৷প্ৰনিধানযোগ্য যে ৰাষ্ট্ৰীয় পথৰ পৰা বহু ভিতৰত অৱস্হিত বিহগুৰী আৰক্ষী চকীত বিষয়াসহ প্ৰায় ১৬জন আৰক্ষীৰ লোক আছে আৰু বান্দৰমাৰীলৈকে এটা বৃহৎ অঞ্চল তেওঁলোকৰ দাযিত্বত আছে৷এনে অৱস্থাত ৰাষ্ট্ৰীয় পথত যিকোনো ঘটনা সংঘটিত হ’লে আৰক্ষী শীঘ্ৰেই উপস্থিত হোৱাত সমস্যা হয়৷জব্দকৃত গৰু জাক বৰ্তমানেও আৰক্ষীৰ জিন্মাতে আছে৷
ব্ৰেকফাষ্ট দিনটোৰ আটাইতকৈ গুৰুত্বপূৰ্ণ আহাৰ। যদি আপুনি স্বাস্থ্যসন্মত আৰু ভাল ব্ৰেকফাষ্ট কৰে, তেন্তে পেটৰ পাচনতন্ত্ৰ সুস্থ কৰি ৰখাৰ লগতে ই আপোনাৰ শৰীৰক দিনটোৰ ভিতৰত সক্ৰিয় কৰি ৰাখে। একে সময়তে যদি আপুনি একো চিন্তা নকৰাকৈ খালী পেটত যিকোনো বস্তু খায় তেন্তে লগে লগে ভোক অনুভৱ কৰিব পাৰে আৰু ইয়াৰ প্ৰভাৱো আপোনাৰ দাঁতত পৰিব। সেয়ে প্ৰায়ে কোৱা হয় যে দিনটোৰ আৰম্ভণি সঠিক ব্ৰেকফাষ্ট আৰু খাদ্য সামগ্ৰীৰে কৰিব লাগে যাতে গোটেই দিনটো শক্তিশালী হৈ থাকিব পাৰে-
ব্ৰেকফাষ্টত এনে খাদ্য সামগ্ৰী খোৱাৰ পৰা বিৰত থাকক য’ত চেনিৰ পৰিমাণ বেছি থাকে। কাৰণ চেনিযুক্ত খাদ্য খোৱাৰ পিছত আপুনি ভাগৰুৱা অনুভৱ কৰিব আৰু ভোকৰো অনুভৱ হ’ব পাৰে। মোটা শস্য বা আঁহযুক্ত খাদ্যৰে দিনটোৰ আৰম্ভণি কৰক। দিনটো ফলমূল, শুকান ফল আৰু দাইলেৰে আৰম্ভ কৰিলে আৰু ভাল।
পেষ্ট্ৰি আৰু ডোনাট ব্ৰেকফাষ্টত সুস্বাদু যদিও পুষ্টিকৰ নহয়। ৰিফাইন চেনি আৰু অস্বাস্থ্যকৰ চৰ্বিযুক্ত খাদ্য খোৱাটো আপোনাৰ শৰীৰৰ বাবে একেবাৰেই ভাল নহয়। ইয়াৰ পৰিৱৰ্তে গোটা শস্যৰ বিকল্প যেনে বাদামৰ মাখনৰ সৈতে গোটা ঘেঁহুৰ টোষ্ট বা শাক-পাচলি আৰু প্ৰটিনৰ সৈতে ঘৰতে বনোৱা ব্ৰেকফাষ্ট বাছি লওক।
ভজা কণী, বেকন, বা হেচ ব্ৰাউনৰ দৰে বস্তুবোৰ নাখাব। ভজা খাদ্য আপোনাৰ পাচনতন্ত্ৰৰ বাবে ভাল নহয়। আৰু ইহঁতৰ উচ্চ কেলৰিৰ পৰিমাণে আপোনাক দিনটো আৰম্ভ কৰিবলৈ প্ৰয়োজনীয় গোটেই দিনটোৰ শক্তি প্ৰদান কৰে। গ্ৰীল বা বেকড খাদ্য যেনে শাক-পাচলিৰ সৈতে কণী খাব পাৰে।
ফলৰ ৰস, এনাৰ্জি ড্ৰিংকছ আৰু মিঠাযুক্ত কফি পানীয় আদি পানীয়ত প্ৰায়ে অধিক পৰিমাণে চেনি থাকে। যদি আপুনি এই চেনিযুক্ত পানীয়বোৰ খাবলৈ আৰম্ভ কৰে তেন্তে আপুনি নিশ্চিতভাৱে গোটেই দিনটো শক্তিশালী অনুভৱ কৰিব। কিন্তু ইয়াৰ ফলত কেলৰি গ্ৰহণ বহু পৰিমাণে বৃদ্ধি পাব পাৰে। পানী, বনৌষধি চাহ বা চেনিবিহীন পানীয়ৰে দিনটোৰ আৰম্ভণি কৰক। যদি আপুনি কফি প্ৰেমী তেন্তে কম গাখীৰ বা মৌ বা দালচেনিৰ দৰে প্ৰাকৃতিক মিঠাই খাই খাব লাগে।
পুষ্টিকৰ ব্ৰেকফাষ্ট খালে আপুনি সঠিক, সুস্থ শক্তি লাভ কৰিব।
বুধবাৰে পুৱা গোলাঘাট জিলাৰ দেৰগাঁৱৰ বালিজানত সংঘটিত শোকাবহ পথ দুর্ঘটনাই চকু সেমেকাই তুলিছে ৰাজ্যবাসীৰ। দুৰ্ঘটনাত নিহত লোকসকলৰ আত্মাৰ সদগতি কামনা কৰাৰ লগতে আহতসকল যাতে পুনৰ সুস্থ হৈ উঠে তাৰে নেদেখাজনৰ ওচৰত প্ৰাৰ্থনা কৰিছে ৰাজ্যবাসীয়ে।
ইফালে বালিজানত সংঘটিত শোকাবহ পথ দুৰ্ঘটনাক লৈ শোক প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে। দুৰ্ঘটনাত নিহতসকলৰ পৰিয়াললৈ 2 লাখ টকা আৰু আহতসকল লৈ ৫০ হাজাৰ টকাৰ আর্থিক সাহায্য ঘোষণা কৰিছে প্ৰধানমন্ত্ৰীয়ে।
শোকাবহ ঘটনাক লৈ মুখ্যমন্ত্ৰী হিমন্ত বিশ্ব শৰ্মাও শোক প্ৰকাশ কৰে।সামাজিক মাধ্যমত শোক প্ৰকাশ কৰি তেওঁ কয়, “পুৱা দেৰগাঁৱত সংঘটিত কৰুণ পথ দুৰ্ঘটনাৰ খবৰটিয়ে ব্যথিত কৰিছে দুৰ্ঘটনাটোত অকালতে বিয়োগ হোৱা মৃতকৰ বিদেহী আত্মাৰ চিৰশান্তি কামনা কৰি আহতসকলৰ আশু আৰোগ্য কামনা কৰিছো। এই দুখৰ মুহূৰ্তত ভুক্তভোগী পৰিয়ালসমূহক গভীৰ সমবেদনা জ্ঞাপন কৰিছো।
এই কঠিন সময়ত স্থানীয় প্রশাসনে সকলো প্রয়োজনীয় সহায় আগবঢ়াইছে। ‘আনহাতে মন্ত্ৰী পৰিমল শুক্লবৈদ্যই এই দুৰ্ঘটনাত শোক প্ৰকাশ কৰি কয়, “বছৰৰ আৰম্ভণিতে এনে দুৰ্ঘটনা হ’ব বুলি কোনেও ভবা নাছিলোঁ । কাৰ ভুলৰ বাবে এনে দুর্ঘটনা সংঘটিত হৈছে তাক চালি জাৰি চোৱা হ’ব । দোষীৰ বিৰুদ্ধে বিহিত ব্যৱস্থা গ্ৰহণ কৰা হ’ব। ঘটনাৰ তদন্তৰ বাবে ইতিমধ্যে গুৱাহাটীৰ পৰা ঘটনাস্থলীলৈ ৰাওনা হৈছে পৰিবহন আয়ুক্ত অংকুৰ জৈন আৰু পৰিবহন সুৰক্ষাৰ মুৰব্বী গৌৰৱ উপাধ্যায়।”
কেন্দ্রীয় মন্ত্রী সর্বানন্দ সোণোৱালে শোক প্রকাশ কৰি কয়, “দেৰগাঁৱৰ বালিজানত সংঘটিত মর্মান্তিক পথ দুৰ্ঘটনাত কেইবাগৰাকী লোকৰ মৃত্যুৰ কৰুণ খবৰে আমাক ব্যথিত কৰিছে। নিহতসকলৰ বিদেহী আত্মাৰ সদগতি কামনা কৰি শোকস্তব্ধ পৰিয়ালবৰ্গলৈ মোৰ গভীৰ সমবেদনা জ্ঞাপন কৰিলো আৰু দুৰ্ঘটনাত আঘাতপ্রাপ্ত লোকসকলৰ আশু আৰোগ্য কামনা কৰিছো।”
সাংবাদিক দৰ্শনা বৰুৱাৰ ‘ভাবনাৰ কচৰৎ’ শীৰ্ষক গ্ৰন্থখন বুধবাৰে গুৱাহাটীৰ দিছপুৰস্থিত এটি সভাগৃহত
বিশিষ্ট সাহিত্যিক,শিক্ষাবিদ, জ্যেষ্ঠ সাংবাদিক কনকসেন ডেকাই উন্মোচন কৰি সাৰগৰ্ভ ভাষণ প্ৰদান কৰে৷
এই অনুষ্ঠানত বিশিষ্ট অতিথি হিচাপে শিক্ষাবিদ, জ্যেষ্ঠ সাংবাদিক ড° দয়ানন্দ পাঠক,জ্যেষ্ঠ সাংবাদিক ড° নৰেন হাজৰিকা উপস্থিত থাকি বক্তব্য আগবঢ়ায়৷
লেখিকা তথা সাংবাদিক দৰ্শনা বৰুৱাৰ নিবন্ধ সংকলন ‘ভাবনাৰ কচৰৎ’ গ্ৰন্থখনত সন্নিৱিষ্ট হৈছে ২১টিকৈ নিবন্ধ৷
ইয়াৰে কিছুসংখ্যক লেখা পূৰ্বে দৈনিক অসম, নিয়মীয়া বাৰ্তা, দৈনন্দিন বাৰ্তা, দৈনিক গণঅধিকাৰ আদি বাতৰি কাকত আৰু সাতসৰী, আইনা জীৱনৰ আলোচনীত প্ৰকাশ পাইছে৷
সংকলনখনত নতুনকৈ লিখা কেইবাটাও চিন্তাগধুৰ লেখাও সন্নিৱিষ্ট কৰা হৈছে৷সাম্প্ৰতিক সময়ৰ ভিন্ন ঘটনাৰাজি,পৰিবেশ -পৰিস্থিতিৰ সহজ- সৰল ভাষাত বিশ্লেষণ কৰি ৰচনা কৰা নিবন্ধসমূহে প্ৰতিগৰাকী ৰুচিবান পাঠকৰ সমাদৰ লাভ কৰিব বুলি আশা কৰা হৈছে৷
২০০৬চনৰে পৰা অসমৰ আগশাৰীৰ বাতৰি কাকত-আলোচনীৰ নিয়মীয়া লেখিকা দৰ্শনা বৰুৱাৰ ‘ভাবনাৰ কচৰৎ’ ত ইতিবাচক চিন্তাৰ প্ৰতিফলন ঘটিছে৷
আত্মবিশ্লেষণৰ অস্ত্ৰোপচাৰ কৰি লেখিকাগৰাকীয়ে নিজৰ ৰচনাৰাজিৰ জৰিয়তে কিছুমান প্ৰয়োজনীয় চিন্তা সদাশয় পাঠকৰ বিচাৰৰ বাবে এৰিছে৷সাংবাদিক গৰাকীৰ গ্ৰন্থখন প্ৰকাশ কৰিছে ‘প্ৰথম খবৰ পাব্লিকেশ্যন’ৰ হৈ কমল কুমাৰে৷
সাংবাদিক ডিম্পী ভৰালীয়ে আঁত ধৰা গ্ৰন্থ উন্মোচনী অনুষ্ঠানটিত অৱসৰপ্ৰাপ্ত উচ্চপদস্থ বেংক বিষয়া প্ৰফুল্ল চন্দ্ৰ কলিতা, জ্যেষ্ঠ সাংবাদিক শিৱাণু বৰা, প্ৰতিদিন টাইম চেনেলৰ ইনপুট এডিটৰ মৃনাল কুমাৰ বৰা, সাংবাদিক হীৰেন চন্দ্ৰ কলিতা, জ্যেষ্ঠ সাংবাদিক কুঞ্জ মোহন ৰায়, বাবু ৰাভা হাকাচাম, সমাজকৰ্মী ডম্বৰু নেওগ, সাংবাদিক বৰ্ণালী সিং ডেকা, কবি- সাংবাদিক দিগন্ত কুমাৰ নাথ, সাংবাদিক দীপজ্যোতি ডেকা উপস্থিত থাকে৷
গোলাঘাট জিলাৰ দেৰগাঁৱৰ বালিজানত বুধবাৰৰ পুৱা ভয়ংকৰ পথ দুৰ্ঘটনা সংঘটিত হয়৷ পুৱতি নিশা গোলাঘাট বচাগাঁৱৰ পৰা ৪৫ জনীয়া এটা দলে বনভোজ খাবলৈ তিনিচুকীয়া টিলিঙা মন্দিৰ অভিমুখে AS 02 AC 5083 নম্বৰৰ বাছেৰে গৈ আছিল৷ তাৰ পিচতে বিপৰীত দিশৰ পৰা অহা এখন ট্ৰাকৰ সৈতে মুখামুখি সংঘৰ্ষ হোৱাৰ ফলত ভয়ংকৰ দুৰ্ঘটনাত পতিত হয় বাহনখন৷
ফলত ঘটনাস্থলীতে শিশুসহ ১২ জন লোক নিহত হয়। ইফালে চিকিৎসালত আন দুজন লোকৰ মৃত্যু হয়৷ আনহাতে গুৰুতৰভাৱে আঘাতপ্ৰাপ্ত অৱস্থাত 27 জনক যোৰহাট চিকিৎসা মহাবিদ্যালয়লৈ প্ৰেৰণ কৰা হৈছে বুলি গোলাঘাটৰ আৰক্ষী অধীক্ষক ৰাজেন সিঙে জানিবলৈ দিয়ে। গোলাঘাট আঠখেলীয়া ভৰলুৱাৰ পৰা তিনিচুকীয়া টিলিঙা মন্দিৰলৈ বনভোজ খাবলৈ আহিছিল ৪৫ জনীয়া দলটো। মাৰ্ঘেৰিটাৰ পৰা আহি থকা AS01PC 0648 নম্বৰৰ এখন ট্ৰাকখনৰ সৈতে মুখামুখি সংঘৰ্ষ হয় AS 02 AC 5383 নম্বৰ যাত্ৰীবাহী বাছখনৰ।
ঘটনাস্থলীত মৃত্যু হোৱা কেইজনৰ মৃতদেহ সম্প্ৰতি দেৰগাঁৱৰ ৩০খন বিছনাযুক্ত সামূহিক চিকিৎসালয়ত ৰখা হৈছে ৷আনহাতে একেটা পৰিয়ালৰ পাঁচগৰাকীকৈ সদস্যৰ মৃত্যু হয়। তেওঁলোক হৈছে অনিমা শইকীয়া (৬০) শুভাকুৰ শইকীয়া (১৩), নিহাৰিকা (১০), দীপালী শইকীয়া (৩৭), পিংকী শইকীয়া (৪৮)।আন কেইজন ক্ৰমে নৱজিৎ শইকীয়া (৪০), ৰিংকী বৰা (১৮), বাছৰ চালক মৃদুল বৰা (৩০), নিত্যানন্দ বৰা (নিতুল) (৪৮), প্রিঞ্চিপ্ৰিয়া বৰা (৭), সোমেশ্বৰ বৰা (৪৩) আৰু ট্ৰাক চালক নুৰ আলম হক।
আনহাতে, এই ভয়ংকৰ দুৰ্ঘটনাটোত আহত হৈ চিকিৎসাধীন লোকসকলৰ ভিতৰত আছে নৱনীতা শইকীয়া (৩৪), ধ্ৰুৱজ্যোতি বৰা (১৮), প্ৰাচুৰ্য শইকীয়া (৭), জোনালী বৰা শইকীয়া (৪৩), কৌশিক শইকীয়া (১৭), চিন্ময় বৰা (১২),বিতোপন বৰা (২৪), অৰ্চনা শইকীয়া (৪১), প্ৰীতি শইকীয়া (৭), অভিজিৎ বৰা(৬), বুলু শইকীয়া (৪৭), ৰুলী শইকীয়া বৰা (৩৫), দীপ্তি শইকীয়া (১৭), মৃদুল শইকীয়া (৪০), মাধুৰ্য শইকীয়া (২৫), ধ্ৰুৱজ্যোতি বৰা (২৭), কুলুমণি শইকীয়া (৩৪), চিত্ৰলেখা বৰা (২৬), বিজিত শইকীয়া (২৮)আৰু অৰূপ শইকীয়া (৩৭)।ঘাইপথ নিৰ্মাণ কৰ্তৃপক্ষই ৪ লেনযুক্ত পথটোত ডাইভাৰচনৰ সৃষ্টি কৰিছিল, যাৰ ফলত ট্ৰাকখনে “ভুল লেন”ত প্ৰৱেশ কৰিছিল। স্থানীয় এজন বাসিন্দাই জনায় যে কুঁৱলীয়ে পৰিস্থিতি আৰু বেয়া কৰি তুলিছিল।
ঘটনা সন্দৰ্ভত গোলাঘাটৰ উপাযুক্ত পি উদয় প্ৰবীনে কয়, ‘আমি দুৰ্ঘটনাৰ কাৰণৰ তদন্ত কৰি আছো। শেহতীয়াকৈ আমি দিল্লীৰ পথ সুৰক্ষা বিশেষজ্ঞ আৰু এন এইচ ডি চি এলৰ সৈতে বৈঠকত মিলিত হৈছিলো আৰু আমাক আশ্বাস দিছিল যে ঘাইপথত উপযুক্ত চিন আৰু অন্যান্য শুধৰণিৰ কাম এমাহৰ ভিতৰত সম্পূৰ্ণ হ’ব। আজি এনেকুৱা ঘটনা ঘটাটো দুৰ্ভাগ্যজনক। কিন্তু আৰক্ষী আৰু কৰ্তৃপক্ষই তদন্ত সম্পূৰ্ণ কৰাৰ পিছতহে দুৰ্ঘটনাটো কেনেকৈ সংঘটিত হ’ল সেই বিষয়ে আমি অধিক ক’ব পাৰিম।’
যি সময়ত ৰাজ্যৰ কৰ্মচাৰী সকলে নতুন পেঞ্চন নীতি চমুকৈ এন পি এচৰ বিৰুদ্ধে প্ৰতিবাদ সাব্যস্ত কৰি আহিছে।সেই সময়তে অৱসৰপ্ৰাপ্ত এজন শিক্ষকৰ কৰুণ কাহিনী পোহৰলৈ আহিছে। নগাঁও জিলাৰ জাজৰিৰ এগৰাকী শিক্ষকৰ কৰুণ কাহিনী এইয়া। অৱসৰ গ্ৰহণৰ পিচত এন পি এচৰ ধনেৰে পৰিয়াল পোহপাল দিব নোৱাৰি টেম্প’ চলাবলৈ বাধ্য হৈছে শিক্ষকজন।
ছৈয়দ আলী নামৰ এই অৱসৰপ্ৰাপ্ত শিক্ষকজনে ২০২১চনৰ ৩০ জুনত জাজৰিৰ গুলেস্তান মধ্য ইংৰাজী বিদ্যালয়ৰ পৰা অৱসৰ গ্ৰহণ কৰিছিল। সেই অনুযায়ী তেওঁ নতুন পেঞ্চন আঁচনি অৰ্থাৎ এন পি এচৰ অধীনত অৱসৰ গ্ৰহণ কৰিছিল।
শিক্ষকজনে এন পি এচৰ অধীনত পেঞ্চন লাভ কৰে মাত্ৰ ১৩৫৯টকা। এই নামমাত্ৰ পেঞ্চনৰ ধনৰে পৰিয়াল পোহপাল দিবলৈ অসমৰ্থ শিক্ষকজন। আনকি মাহেকীয়া তেল-চাউল কিনিবলৈকো নুজোৰে এই ধন। স্বাভাৱিকতে সেয়ে ছৈয়দ আলীয়ে চাকৰিৰ পৰা অৱসৰ গ্ৰহণৰ পিচত টেম্প’ চলাবলৈ বাধ্য হৈছে এইগৰাকী শিক্ষকে।
উল্লেখযোগ্য যে ১৯৯৪ চনত শিক্ষকতাৰ চাকৰিত যোগদান কৰাৰ পিচৰ এই সুদীৰ্ঘ সময় ছাত্র-ছাত্রীক মানুহ কৰাৰ চেষ্টাত ব্ৰতী তথা জ্ঞানৰ পোহৰ বিলোৱা ৬২ বছৰীয়া অৱসৰপ্ৰাপ্ত শিক্ষক ছৈয়দ আলীৰ ছৈয়দ আলীয়ে অৱসৰৰ পিচত টেম্প’ চলাবলগীয়া হোৱা কাৰ্য বাস্তৱিকতে দুখদায়ক। শিক্ষকজনে অৱসৰ গ্ৰহণৰ সময়ত পোৱা শেষ সম্বল ১লাখ ২০ হাজাৰ টকা পুত্ৰৰ পঢ়াৰ খৰচ তথা পৰিয়াল চলোৱাত ব্যৱহাৰ কৰে।
পৰৱৰ্তী সময়ত সেয়ে নিজৰ মেধাৱী পুত্ৰক পঢ়ুওৱাৰ লগতে পৰিয়াল চলোৱাৰ বাবে বৃদ্ধ বয়সত ৰ’দে-বৰষুণে,জাৰে-জহে নিজৰ টেম্প’ খন লৈ ঘৰৰ পৰা ওলাই আহে ছৈয়দ আলী। যাত্ৰীৰ অপেক্ষাতৰৈ থাকে।দিনটো যদি যাত্ৰী পাই তেন্তে পৰিয়াল পোহপাল দিয়াৰ ধন লাভ কৰে। অৱসৰপ্ৰাপ্ত শিক্ষক ছৈয়দ আলীয়ে চৰকাৰৰ নতুন পেঞ্চন আঁচনিৰ বিৰুদ্ধে তীব্ৰ ক্ষোভ প্ৰকাশ কৰে। এইয়া যেন এক উদাহৰণহে। ছৈয়দ আলীৰ দৰে বহু শিক্ষকে এন পি এচৰ প্ৰতি তীব্ৰ ক্ষোভ প্ৰকাশ কৰিছে!
ভট্টদেৱ স্মৃতি ৰক্ষা সমিতিৰ উদ্যোগত বুধবাৰে অসমীয়া গদ্য সাহিত্যৰ জনক ভট্টদেৱৰ তিৰোভাৱ তিথি দিনযোৰা বৰ্ণাঢ্য কাৰ্যসূচীৰে ঐতিহাসিক বৰনগৰৰ ভেৰাগ্ৰামত উদযাপন কৰা হয়৷
ৰাতিপুৱা ১১ বজাত অসম চৰকাৰৰ পঞ্চায়ত তথা গ্ৰামোন্নয়ন মন্ত্ৰী ৰণজিৎ কুমাৰ দাস উপস্থিত হৈ মুকলি সভাত অংশগ্ৰহণ কৰে৷ মন্ত্ৰী গৰাকীয়ে ভট্টদেৱৰ প্ৰতি শ্ৰদ্ধা নিবেদন কৰাৰ লগতে তেখেতৰ জীৱনাদৰ্শন আৰু কৰ্মৰাজিৰ বিষয়ে আলোকপাত কৰে ৷
তেওঁ কয় যে ভট্টদেৱে কথা ভাগৱত, কথা গীতা, আৰু ভক্তি ৰত্নাৱলী বৰনগৰৰ ভেৰাগ্ৰামত ৰচনা কৰিছিল ৷ সেই বাবে ভট্টদেৱক গদ্য সাহিত্যৰ জনক বুলি আখ্যা দিয়া হয় ৷ তেওঁ লগতে কয় যে গদ্য সাহিত্যৰ জনক ভট্টদেৱে অসমৰ জাতীয় জীৱনলৈ বহুত অৱদান আগবঢ়াই গৈছে ৷ এই সভাতে অসমৰ এগৰাকী বিশিষ্ট কবি, সাহিত্যিক কাব্যনীল(প্ৰাণজিৎ দাস)ৰ ভট্টদেৱ আৰু প্ৰাচীন বৰনগৰ শীৰ্ষক গ্ৰন্থৰ শুভ উন্মোচন কৰে,বৰপেটা জিলা সাহিত্য সভাৰ সভাপতি গিৰিধৰ চৌধুৰীয়ে ৷
সভাত নিৰ্দ্দিষ্ট বক্তা হিচাবে মানিকপুৰ গোৱিন্দ ভৱন গীতা সত্ৰৰ ডেকা সত্ৰাধিকাৰ কপিল দাস দেৱ উপস্থিত থাকে ৷ আনফালে মন্ত্ৰী গৰাকীয়ে নামঘৰত নামত থকা মাটি সমূহৰ চৌহদত পকী ওৱাল আৰু মুখ্য তোৰণ নিৰ্মাণৰ বাবে অসম চৰকাৰৰ হৈ ১০ লাখ টকা ঘোষণা কৰে ৷
ইয়াৰ লগতে ১০ টা গৃহহীন পৰিয়াল নামঘৰৰ চৌহদত ঘৰ সজাই দিব বুলি কয় যাতে সকলো পৰিয়ালে নামঘৰটো সুন্দৰকৈ পৰিচালনা কৰিবলৈ পাৰে ৷ ইয়াৰ লগতে তেওঁ ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাক ভেৰাগ্ৰামলৈ এদিন আনিব বুলি ৰাইজক কয় ৷ সভাত প্ৰায় এক সহস্ৰাধিক লোক উপস্থিত থাকে ৷
ৰহাৰ ঐতিহাসিক জোঙালবলহু গড়ত বুধবাৰে দিনজোৰা কাৰ্যসূচীৰে জোঙালবলহু দিৱস উদযাপন কৰা হয়। তিৱা জাতিৰ পিতৃপুৰুষ, শৌৰ্য-বীৰ্যৰ প্ৰতীক তথা ঐতিহাসিক বীৰ ৰজা জোঙালবলহুৰ স্মৃতিত ২০২২ চনৰ পৰা এই জোঙালবলহু দিৱস উদযাপিত হৈ আহিছে।
তিৱা স্বায়ত্ত পৰিষদৰ পৃষ্ঠপোষকতাত আৰু তিৱা জাতীয় সংগঠনৰ উদ্যোগত অনুষ্ঠিত এই জোঙালবলহু দিৱসত উজ্জ্বলি উঠে তিৱা জাতিৰ স্বক্ৰীয় কৃষ্টি-সংস্কৃতি। ঐতিহাসিক ৰজাগৰাকীৰ ৰাজধানী জোঙালবলহু গড়ত অনুষ্ঠিত হোৱা এই জোঙালবলহু দিৱসত পুৱা তিৱাসকলৰ পৰম্পৰাগত ফিদৃ ফূজা (পিতৃ পূজা)ৰে কাৰ্যসূচী আৰম্ভ কৰা হয়। ইয়াৰ পিচতে জোঙালবলহুৰ প্ৰতিমূৰ্তিত বন্তি প্ৰজ্বলন, তিৱা জাতীয় সংগঠনসমূহৰ পতাকা উত্তোলন কৰা হয়। ১১বজাত অনুষ্ঠিত হয় ‘জোঙালবলহু আৰু তিৱা জাতি’ শীৰ্ষক আলোচনা চক্ৰ।
আলোচনা চক্ৰত বিশিষ্ট আলোচকসকলে ঐতিহাসিক তিৱা ৰজাগৰকাৰীৰ সাহস, বাহুবল জাতিৰ প্ৰতি কৰা ত্যাগ আৰু আদৰ্শক শ্ৰদ্ধাৰে সোঁৱৰে। দুপৰীয়া অনুষ্ঠিত হয় মুকলি সভা। মুকলি সভাত মুখ্য অতিথি হিচাপে অংশগ্ৰহণ কৰি অসম চৰকাৰৰ পৰ্যটন মন্ত্ৰী জয়ন্ত মল্ল বৰুৱাই মুখ্যমন্ত্ৰীৰ সদিচ্ছাৰ বাবেই জোঙালবলহু গড়ে প্ৰাণ পাই উঠিছে বুলি মন্তব্য কৰে।
জোঙালবলহু গড় অসমৰ ভিতৰতে এখন উন্নত পৰ্যটন ক্ষেত্ৰ হ’ব বুলি মন্তব্য কৰি পৰ্যটন মন্ত্ৰীগৰাকীয়ে বিজেপি চৰকাৰে প্ৰতিটো জাতি-জনগোষ্ঠীক মৰ্যাদা প্ৰদান কৰাৰ লগতে সুৰক্ষা আৰু বিকাশৰ বাবে গুৰুত্ব দি আহিছে। মুকলি সভাতে স্মৃতিগ্ৰন্থ ‘জোঙালবলহু’ উন্মোচন কৰে ৰহা মহাবিদ্যালয়ৰ অধ্যক্ষ ড° বেদ কুমাৰ চলিহাই।
অনুষ্ঠানত ৰহাৰ বিধায়ক শশীকান্ত দাস, তিৱা স্বায়ত্ত পৰিষদৰ মুখ্য কাৰ্যবাহী সদস্য জীৱন কোঁৱৰ, তিৱা জাতীয় সংগঠনৰ নেতৃবৃন্দ উপস্থিত থাকে। উল্লেখ্য যে ঐতিহাসিক বীৰ ৰজাগৰাকীৰ ৰাজধানী তথা ঐতিহাসিক স্থান জোঙালবলহু গড়ক আধুনিক পৰ্যটন ক্ষেত্ৰলৈ ৰূপান্তৰ কৰিবৰ বাবে অসম চৰকাৰে ইতিমধ্যে ৫০ কোটি টকা আৱণ্টন দিয়াৰ লগতে জোঙালবলহু ক্ষেত্ৰ সুৰক্ষা আৰু সংৰক্ষণৰ বাবে আঁচনি ৰূপায়ণ কৰিছে।
