অসমীয়া জাতীয় জীৱনৰ এই জটিল আৰু ভয়ংকৰ সন্ধিক্ষণত শ্ৰীমন্তশঙ্কৰদেৱ নিঃসন্দেহে এক আলোকস্তম্ভ, যিয়ে বিনাশ কৰিব অসমীয়াত্বৰ অন্ধকাৰ ৷ ৰাজনীতিৰ সৰ্বগ্ৰাহী মনোভাৱ আৰু সামাজিক জীৱনৰ অস্থিৰতাই সন্মিলিত অসমীয়া জাতি সত্তালৈ কঢ়িয়াই আনিছে এক ভয়ংকৰ অনিশ্চয়তা । এই অনিশ্চয়তাক প্ৰতিহত কৰি সাংস্কৃতিক আৰু আৰ্থিকভাৱে সবল সমাজ এখন প্ৰতিষ্ঠাৰ বাবে আজিৰ তাৰিখত প্ৰতিজন অসমীয়াই সচেষ্ট হোবা উচিত ।
এই মন্তব্য কৰে বিশিষ্ট নিবন্ধকাৰ তথা মৰিগাঁও মহাবিদ্যালয়ৰ অধ্যাপক ড° বোধেন শইকীয়াই । নগাঁও জিলাৰ ইতিহাস প্ৰসিদ্ধ বেবেজীয়া ৰাস মহোৎসৱত তৃতীয় দিনা অনুষ্ঠিত মুকলি সভাত মুখ্য অতিথিৰ ভাষণত এই মন্তব্য কৰে ৷ ড° শইকীয়া আৰু কয় যে গুৰুজনাই সম্প্ৰতি আৰু সমন্বয়ৰ উপাদানেৰে যিখন বৃহত্তৰ অসমীয়া সমাজ স্থাপন কৰি জাতীয়তাবাদৰ ধৰ্বজা বহন কৰিছিল,আধ্যাত্মিক দৃষ্টিৰ আলোকেৰে সংস্কৃতিৰ বৰ্নাঢ্য আৰু আপুৰুগীয়া উপাদান সমূহৰ অসমীয়া জাতি তথা সমাজৰ বৰভেটি বান্ধিছিল,সেই সমাজখনত আজি কিন্তু ঘূনে ধৰাৰ উপক্ৰম হৈছে ।

তেওঁ লগতে কয় যে অসমীয়াৰ শৌৰ্য্যবীৰ্য্য আৰু ভৱিষ্যৎ দৰ্শনক কিন্ত কেতবোৰ আপদীয়া উপাদানে ক্ৰমাত দূৰ্বল কৰি তুলিব ধৰিছে । সচেতনতা আৰু সুস্থিৰ চিন্তাৰ দৈন্যই কৰ্ম সংস্কৃতি আৰু মূল্যবোধক সাংঘাতিক ধৰনে ক্ষতি কৰিছে ৷ গৰীমামণ্ডিত অতিতৰ শুভাই নিশকতীয়া ভৱিষ্যতলৈ আগবাঢ়ি যাব ধৰাটো ক্ষিয়ংকৰী কথা ৷

শংকৰী কলাকৃষ্টিৰ সাধক,বেবেজীয়া সোনালী জয়ন্তী ৰাসৰ প্ৰতিষ্ঠাক অনন্ত হাজৰিকাৰ সভাপতিত্ব আজি বিয়লি ২:৩০ বজাত অনুষ্ঠিত হোবা মুকলি সভাত আন এগৰাকী বিশিষ্ট অতিথি তথা লেখক,প্ৰবন্ধক ড° প্ৰদুম্ন্য গোস্বামীয়ে কয় যে- ৰাসৰ মহত্ত্ব আৰু গুৰুত্ব ঐক্য সমন্বয়ৰে একগোট কৰি ৰখা । অসমত ৰাসৰ সৃষ্টিৰ আৰত জগত গুৰুজনাৰ ভুমিকা অপৰিসীম ।
ৰাস হওঁক সম্প্ৰতিৰ উৎসৱ ৷

ড° গোস্বামীয়ে লগতে কয় যে- মহাপুৰুষ শ্ৰীমন্তশঙ্কৰদেৱ গুৰুজনাৰ ১৪ শতিকাৰ চিন্তাধাৰা সমূহ আজি ২১ শতিকাটো আধুনিক হৈ আছে ৷ কিন্ত একাংশ লোকে মহাপুৰুষ গুৰুজনাক ভকতীয়া পৰম্পৰাত বান্ধি ৰাখিছে । তেওঁ লগতে কয় ৰাস উৎসৱক সমাজ গঢ়াৰ সম্বল হিছাপে গঢ়ি তুলিবলৈ ৰাইজলৈ আহ্বান জনাই । সাংস্কৃতিক সংগঠক তথা আলিবাট প্ৰকাশনৰ স্বতাধিকাৰ প্ৰাঞ্জল মহন্তই আতঁধৰা গাম্ভীৰ্যপূৰ্ণ সভাখনি উদ্বোধন কৰি বিশিষ্ট শিক্ষাবিদ তথা বেবেজীয়া পণ্ডিত কনক শৰ্মা উঃমাঃ বিদ্যালয়ৰ অধ্যক্ষ যাদৱ বৰাই কয় যে – ৰাস হ’ল জীৱাত্মা আৰু পৰমাত্মাৰ মিলন ৷ পৰমানন্দৰ প্ৰেমত আত্মহাৰা হৈ গোপি সকলে যথা সৰ্বস্ব ত্যাগ কৰি প্ৰভু ভগৱন্তৰ ওচৰত কৰা লীলাই ৰাস লীলা । সভাত ৰাস উৎসৱৰ সোনালী জয়ন্তী উপলক্ষে ৰাজ্যিক বটাঁ প্ৰাপক শিক্ষক লক্ষ্মীনাৰায়ণ শৰ্মাৰ দ্বাৰা প্ৰকাশিত চন্দ্ৰাৱলী নামৰ স্মৃতিগ্ৰন্থ খনি উন্মোচন কৰে নগাঁও মহাবিদ্যালয়ৰ অৱসৰপ্ৰাপ্ত অধ্যাপক নৱ মহন্তই ৷

সোনলী জয়ন্ত ৰাস মহোৎসৱৰ মুখ্য সম্পাদক বিনোদ বৰুৱাই সম্পাদকীয় প্ৰতিবেদন পাঠ কৰা অনুষ্ঠানটিত বেবেজীয়া গাঁৱৰ বিগত পঞ্চাশ বছৰে ৰাস উৎসৱৰ লগত জৰিত প্ৰায় ষাঠি গৰাকী লোকক সম্বদ্ধৰ্না জনোবা হয় ৷ সন্ধিয়া বন্তি প্ৰজ্বলনৰ পাছত ধৰ্মীয় সাংস্কৃতিক অনুষ্ঠান আৰু নিশালৈ অভিনেতা প্ৰদুম্ন্য গোস্বামীৰ পৰিচলানত কইনা সজাব কোনে নাট মঞ্চস্থ হয় । আনহাতে কাইলৈ পৰিবেশ নিকাকৰণ,দুপৰীয়া নাম প্ৰসংগ,নিশালৈ হৰিচন্দ্ৰ পাল্লা ভাওনা অনুষ্ঠিত হব ৷

ৰাজ্যখনৰ আগশাৰীৰ বেচৰকাৰী সংস্থা কেয়াৰ ইউ ৩৬৫ ৰ উদ্যোগত মঙলবাৰে অসম দৃষ্টিহীন ক্ৰিকেটৰ ল’ৰা আৰু ছোৱালীৰ দল দুটাই গুৱাহাটীৰ হোটেল ৰাজমহলত কলকাতাত থকা অষ্ট্ৰেলিয়ান দূতাবাসৰ কনচুল জেনেৰেল ৰোৱান আইনছোৱৰ্থৰ সৈতে এটা মত বিনিময় অনুষ্ঠানত অংশগ্ৰহণ কৰে।

“উই টক” শীৰ্ষক এই অনুষ্ঠানত দৃষ্টিহীন খেলুৱৈসকলৰ লগতে কেয়াৰ ইউ ৩৬৫ ৰ বোন্দাত থকা অনাথ শিশুৰ আশ্ৰম “জীৱনালয়”ৰ কন কন শিশুসকলেও অংশ লয়। ভাৰত-অষ্ট্ৰেলিয়া পাঁচখনীয়া টি-২০ ক্ৰিকেট শৃংখলাৰ গুৱাহাটীৰ বৰ্ষাপাৰা ষ্টেডিয়ামত অনুষ্ঠিত প্ৰতিযোগিতাৰ তৃতীয়খন খেলৰ বাবে অসমলৈ অহা অষ্ট্ৰেলিয়ান দূতাবাসৰ কনচুল জেনেৰেলগৰাকীয়ে দৃষ্টিহীন খেলুৱৈসকলে নিজক আগবঢ়াই লৈ যোৱাৰ ক্ষেত্ৰত সন্মুখীন হোৱা সমস্যাসমূ্হৰ বুজ লয়।

বিশেষভাৱে ছোৱালী খেলুৱৈসকলে দৃষ্টিহীন হোৱাৰ বাবেই প্ৰতি মূহূৰ্ততে সন্মুখীন হোৱা প্ৰত্যাহ্বানসমূহৰ বিষয়ে তেখেতৰ আগত বৰ্ণনা কৰে। এই মত বিনিময় অনুষ্ঠানত আৱেগিক হৈ পৰা দৃষ্টিহীন খেলুৱৈসকলে উপযুক্ত প্ৰশিক্ষণ আৰু আন্তঃগাঁথনিৰ অভাৱ স্বত্বেও কেনেকৈ অকণো বিচলিত নহৈ প্ৰবল মনোবলেৰে প্ৰতিযোগিতাত অৱতীৰ্ণ হৈ ভাল ফল প্ৰদৰ্শন কৰিছে তাৰো অভিজ্ঞতা বৰ্ণনা কৰে। খেলুৱৈসকলে অষ্ট্ৰেলিয়ান কনচুল জেনেৰেলগৰাকীৰ মাধ্যমেৰে তেওঁলোকক ক্ৰিকেটৰ ক্ষেত্ৰত আগবাঢ়ি যোৱাত সহায় কৰাৰ বাবে উপযুক্ত প্ৰশিক্ষণৰ ব্যৱস্থা কৰিবলৈ চৰকাৰৰ প্ৰতি আহ্বান জনায়। খেলুৱৈসকলৰ বিভিন্ন প্ৰশ্নৰ উত্তৰ দি শ্ৰীমতী আইনছোৱৰ্থে কয় যে জীৱনত আগবাঢ়ি যাবলৈ প্ৰথমে নিজক চিনি পাব লাগিব। নিজৰ প্ৰতিভা চিনাক্ত কৰি সেই দিশত প্ৰবল আত্মবিশ্বাস আৰু অধ্যৱসায়ৰ দ্বাৰাহে সফলতা অৰ্জন কৰিব পাৰি বুলি তেওঁ কয়।

তেওঁ লগতে খেলুৱৈসকলক যিকোনো প্ৰত্যাহ্বানতো মনোবল নেহেৰুৱাই সাহস আৰু উদ্যমৰে আগবাঢ়ি যাবলৈ আহ্বান জনায়। খেলুৱৈসকলৰ লগতে অনাথ শিশুৰ আশ্ৰম “জীৱনালয়”ৰ কন কন শিশুসকলক পাই বিষয়াগৰাকী আপ্লুত হৈ পৰে। শিশুসকলৰ গীতে-মাতে অনুষ্ঠানটো মুখৰ হৈ পৰে। ইয়াৰ পিছতেই অষ্ট্ৰেলিয়ান কনচুল জেনেৰেলগৰাকীয়ে নেহৰু ষ্টেডিয়ামত দৃষ্টিহীন খেলুৱৈসকলৰ খেল উপভোগ কৰে আৰু তাৰ পৰাই বৰ্ষাপাৰালৈ যায়। কেয়াৰ ইউ ৩৬৫ আৰু অসম ক্ৰিকেট সন্থাৰ দ্বাৰা দৃষ্টিহীন ক্ৰিকেটাৰসকলক উৎসাহিত কৰাৰ এটা ব্যতিক্ৰমী প্ৰয়াসৰূপে আজি এইসকল খেলুৱৈ আৰু “জীৱনালয়”ৰ অনাথ শিশুক ভাৰত-অষ্ট্ৰেলিয়াৰ টি-২০ খেল দেখুওৱা হয়। আজিৰ অনুষ্ঠানত কেয়াৰ ইউ ৩৬৫ৰ বিষয়া-কৰ্মীসকল উপস্থিত আছিল।

উল্লেখযোগ্য যে বিশেষভাৱে সক্ষম শিশুসকলৰ বাবে কাম কৰি থকা কেয়াৰ ইউ ৩৬৫ নামৰ বেচৰকাৰী সংস্থাৰ উদ্যোগত আৰম্ভ হৈছিল দৃষ্টিহীন ক্ৰিকেটৰ এই যাত্ৰা। সংস্থাৰ উদ্যোগত পলমকৈ হ’লেও অসমে দৃষ্টিহীন ক্ৰিকেটৰ ক্ষেত্ৰখনত বিশেষ পাৰদৰ্শিতা প্ৰদৰ্শন কৰিবলৈ সক্ষম হয়। সংস্থাৰ প্ৰচেষ্টাত ২০২১ চনৰ অক্টোবৰ মাহত অসম দৃষ্টিহীন ল’ৰাৰ ক্ৰিকেট দল আৰু ২০২২ চনত বহু চেষ্টাৰ মূৰত ছোৱালীৰ ক্ৰিকেট দলটো গঠন কৰা হয়। প্ৰতিষ্ঠা কালৰে পৰা সন্থাৰ সদস্যসকলৰ অদম্য প্ৰয়াস আৰু কঠোৰ পৰিশ্ৰমৰেই ফচল যে ৰাষ্ট্ৰীয় পৰ্যায়ত অসমৰ খেলুৱৈয়ে সুনাম অৰ্জন কৰিবলৈ সক্ষম হৈছে। নানা প্ৰত্যাহ্বান, আৰ্থিক সমস্যা আৰু প্ৰতিবন্ধকতা স্বত্বেও অসমৰ বিভিন্ন প্ৰান্তৰ খেলুৱৈৰে গঠিত ল’ৰা আৰু ছোৱালীৰ ক্ৰিকেট দল দুটাই বহু ৰাষ্ট্ৰীয় পৰ্যায়ৰ খেলত পাৰদৰ্শিতা প্ৰদৰ্শন কৰিছে। ভাৰতীয় দৃষ্টিহীন ক্ৰিকেট দলত স্থান লাভ কৰি নগাঁৱৰ খেলুৱৈ চিমু দাসে ইতিমধ্যে বাৰ্মিংহামত অনুষ্ঠিত বিশ্ব দৃষ্টিহীন ক্ৰীড়াত জয়লাভ কৰি অসম তথা ভাৰতলৈ সুনাম কঢ়িয়াই আনিছে।

গুৱাহাটীত এনচিচি দিৱস উদযাপন
এনচিচি কাৰ ৰেলীৰ সফল সামৰণি

গুৱাহাটীৰ নাৰেংগী সেনা চাউনীস্থিত ব্ৰহ্মপুত্ৰ প্ৰেক্ষাগৃহত আজি ৭৬ সংখ্যক ৰাষ্ট্ৰীয় কেডেট কৰ্পছ (এনচিচি) দিৱস উদযাপন কৰা হয়। এনচিচিৰ উত্তৰ-পূৰ্বাঞ্চল সঞ্চালাকলয়ৰ উদ্যোগত আয়োজিত এই দিৱসৰ লগতে এনচিচি প্ৰতিষ্ঠাৰ পয়সত্তৰ বছৰ পূৰ্ণ হোৱা উপলক্ষে যোৱা ৬ নৱেম্বৰত আৰম্ভ কৰা এনচিচি নৰ্থ-ইষ্টাৰ্ণ মাৰুতি জিমনি কাৰ ৰেলীৰ সামৰণি অনুষ্ঠনৰো আয়োজন কৰা হয়। উত্তৰ-পূৰ্বাঞ্চলত ঐক্য, অনুশাসন আৰু ৰাষ্ট্ৰীয় গৌৰৱ তথা দেশপ্ৰেম আৰু উৎসাহ-উদ্দীপনাৰ সুন্দৰ নিদৰ্শন দাঙি ধৰা এনচিচি কাৰ ৰেলী আজি পতাকা জোকাৰি সামৰণি মাৰে অসমৰ জনস্বাস্থ্য কাৰিকৰী, দক্ষতা বিকাশ, নিয়োগ আৰু উদ্যমিতা, আৰু পৰ্যটন মন্ত্ৰী জয়ন্ত মল্লবৰুৱাই। অনুষ্ঠানত জি অ চি-ইন চি, ইষ্টাৰ্ণ কমাণ্ড লেফটেনেণ্ট জেনেৰেল ৰাণা প্ৰতাপ কলিতা, মাৰুতি চুজুকি ইণ্ডয়া লিমিটেডৰ মুখ্য কাৰ্যবাহী বিষয়া (মাৰ্কেটিং)ৰামসুৰেশ অকেল্লাৰ লগতে বহুতো সামৰিক আৰু অসামৰিক বিশিষ্ট ব্যক্তি উপস্থিত থাকে। এনচিচি দিৱস উপলক্ষে আয়োজিত সভাত অনুষ্ঠানৰ মুখ্য অতিথি মন্ত্ৰী জয়ন্ত মল্লবৰুৱাই সকলোকে এনচিচি দিৱসৰ শুভেচ্ছা জ্ঞাপন কৰি এনচিচিৰ প্ৰাক্তন কেডেট হিচাপে আজি গৌৰৱ অনুভৱ কৰা বুলি ব্যক্ত কৰে।

ছাত্ৰ জীৱনৰ সেই দিনবোৰৰ কথা স্মৰণ কৰি তেওঁ কয় যে শিক্ষাগত অৰ্হতাতকৈও এনচিচিৰ কেডেট হিচাপে অৰ্জন কৰা শৃংখলাবদ্ধতা, নিয়মানুৱৰ্তিতা, অনুশাসন আৰু দেশপ্ৰেমৰ ভাৱে আজিৰ কৰ্মক্ষেত্ৰত তেওঁক অধিক সহায় কৰিছে। দেশৰ অমৃতকালৰ সময়ছোৱাত ভাৰতক যাতে সঁচা অৰ্থতে বিশ্বগুৰু ৰূপে প্ৰতিষ্ঠা কৰিব পাৰি তাৰ বাবে তেওঁ সকলোকে দায়বদ্ধতাৰে নিজ নিজ ক্ষেত্ৰত আগবাঢ়ি আহিবলৈ আহ্বান জনায়। এইক্ষেত্ৰত এনচিচি কেডেটসকলৰো গুৰুত্বপূৰ্ণ ভূমিকা আছে বুলি উল্লেখ কৰি তেওঁ আৰু কয় যে এনচিচি এটা সংস্থা নহয়, ই হৈছে এক জীৱন শৈলী। তেওঁ একতা, নিয়মানুৱৰ্তিতা আদি সকলো শিক্ষাৰে পৰিপক্ক হৈ সমৰ্পিত ভাৱেৰে সকলো এনচিচি কেডেটক সেৱা আগবঢ়াবলৈ আহ্বান জনায় । সভাত লেফটেনেণ্ট জেনেৰেল ৰাণা প্ৰতাপ কলিতাই এনচিচি দিৱসৰ শুভেচ্ছা জ্ঞাপন কৰি সাধনা অবিহনে একো সম্ভৱ নহয় বুলি উল্লেখ কৰে আৰু সকলোকে একাগ্ৰতাৰে আগবাঢ়িবলৈ আহ্বান জনায়। সভাত সমূহীয়াভাৱে এনচিচি সংগীত পৰিবেশন কৰা হয়। সভাত মাৰুতি চুজুকি ইণ্ডয়া লিমিটেডৰ মুখ্য কাৰ্যবাহী বিষয়া (মাৰ্কেটিং)ৰামসুৰেশ অকেল্লাই ভাষণ প্ৰদান কৰি তেওঁলোকক এনচিচি দিৱসৰ কাৰ ৰেলীৰ অংশীদাৰ হোৱাৰ সুযোগ দিয়াৰ বাবে সংশ্লিষ্ট সকলোকে ধন্যবাদ জ্ঞাপন কৰে। অনুষ্ঠানত কৃতজ্ঞতা জ্ঞাপন কৰি এনচিচিৰ উত্তৰ-পূৰ্বাঞ্চল সঞ্চালাকলয়ৰ অতিৰিক্ত মহাপৰিদৰ্শক (এডিজি) গগন দীপে এনচিচিৰ সকলো কাৰ্য ইয়াৰ মূলমন্ত্ৰ ‘একতা আৰু অনুশাসন’ৰ ওপৰত আধাৰিত হ’ব লাগিব বুলি উল্লেখ কৰে।

অনুষ্ঠানত কাৰ ৰেলীত অংশগ্ৰহণ কৰা কেডেটসকলক পুৰস্কাৰ প্ৰদান কৰা হয়। সভাৰ অন্তত সাংস্কৃতিক কাৰ্যসূচীৰো আয়োজন কৰা হয়। উল্লেখযোগ্য যে এনচিচি বিষয়া আৰু ৭৬ জন কেডেটৰ এটা দলে এনচিচি দিৱসৰ লগত সংগতি ৰাখি আয়োজন কৰা কাৰ ৰেলী পৰিচালনা কৰিছিল। এই ৰেলীত প্ৰায় ৪ হাজাৰ কিলোমিটাৰ যাত্ৰা অতিক্ৰম কৰা হৈছিল। ৰেলীত ৭খন মাৰুতি চুজুকি জিমনি আৰু ৫খন গ্ৰেণ্ড ভিটাৰা এছইউভি ব্যৱহাৰ কৰা হৈছিল। এই ৰেলী শ্বিলঙৰ পৰা যোৱা ৬ নৱেম্বৰত আৰম্ভ হৈছিল আৰু অসম, ত্ৰিপুৰা, মিজোৰাম, নাগালেণ্ড, অৰুণাচল প্ৰদেশ, মেঘালয়কে ধৰি উত্তৰ-পূৰ্বাঞ্চলৰ কেইবাখনো ৰাজ্য পৰিভ্ৰমণ কৰি আজি গুৱাহাটীত অন্ত পৰে। এই যাত্ৰাকালত ২০০তকৈও অধিক বিদ্যালয়, ৪৪খন জিলাত অৱস্থিত ১৪০ খন মহাবিদ্যালয়ৰ ২০ হাজাৰতকৈ অধিক শিক্ষাৰ্থীৰ সৈতে বিভিন্ন সাংস্কৃতিক অনুষ্ঠানত অংশগ্ৰহণ কৰে। এই ৰেলীৰ মাধ্যমেৰে উত্তৰ-পূৰ্বাঞ্লৰ বিভিন্ন স্থানৰ লোকৰ সৈতে তেওঁলোকে ভাৱ বিনিময় কৰে আৰু সাংস্কৃতিক-সামাজিক ঐতিহ্যৰ বাৰ্তা বহন কৰে। এই ৰেলীৰ যাত্ৰাপথৰ বিভিন্ন স্থানত অনুষ্ঠিত অনুষ্ঠানত জ্যেষ্ঠ বিষয়া আৰু এনচিচিৰ প্ৰতিনিধিকে ধৰি বিশিষ্ট ব্যক্তিসকল উপস্থিত থাকে আৰু এই উল্লেখযোগ্য যাত্ৰাত ভাগ লোৱা উৎসাহী কেডেটসকলক আশীৰ্বাদ প্ৰদানেৰে উৎসাহ যোগায়। তেওঁলোকৰ উপস্থিতিয়ে অংশগ্ৰহণকাৰীসকলক সমগ্ৰ সমদলটোৰ নেতৃত্ব আৰু সৌহাৰ্দমূলক মূল্যবোধ বজাই ৰাখিবলৈ অনুপ্ৰেৰণা যোগায়। এনচিচি কাৰ ৰেলীয়ে ইয়াৰ দুঃসাহসিক মনোভাৱৰ বাহিৰেও এনচিচিৰ লোকাচাৰক মূৰ্ত কৰি তোলে। ই যুৱপ্ৰজন্মৰ মাজত একতা, অনুশাসন, নেতৃত্ব আৰু সেৱাৰ মনোভাৱ বৃদ্ধি কৰে আৰু অংশগ্ৰহণকাৰীসকলক ৰাষ্ট্ৰীয় ঐক্য আৰু গৌৰৱৰ অনুভূতি কঢ়িয়াই অনা মূল্যবোধৰ শিক্ষা হৃদয়ংগম কৰিবলৈ এক অনন্য মঞ্চ প্ৰদান কৰে। এনচিচি দিৱস উযযাপনে সকলোৰে মাজত একতা আৰু অনুশাসনৰ বাৰ্তা বহন কৰিব বুলি সকলোৱে সহমত প্ৰকাশ কৰে।