আজি পবিত্ৰ মহালয়া। কহুঁৱাৰ আঁচল উৰুৱাই শৰতে দিছে শাৰদীয় দুৰ্গোৎসৱ বতৰা। শক্তিৰ আৰাধ্যা দেৱী দুৰ্গাই আজি পৃথিৱীলৈ যাত্ৰা কৰিব কৈলাস পৰ্বতৰ পৰা। মহালয়াৰ পিছ দিনাৰ পৰাই আৰম্ভ হব নৱৰাত্ৰি। মহালয়াৰ এসপ্তাহৰ পিছত দেৱীক বেদীত স্হাপন কৰা হব। আৰম্ভ হব দুৰ্গা পুজাৰ ষষ্ঠী। এইবাৰ দেৱীয়ে ঘোৰাত আগমন কৰিছে পৃথিৱীলৈ। একেদৰে দশমীৰ দিনটোত দেৱীয়ে মৰ্ত্ত্য এৰি উভতিব কৈলাসলৈ । এই উভতনি যাত্ৰাটো দেৱীয়ে ঘোৰাৰেই প্ৰত্যাবৰ্তন কৰিব। শাস্ত্ৰ মতে এইয়া অতি অশুভ যোগ। দেৱীৰ ঘোৰাত আগমন আৰু প্ৰত্যাবৰ্তনে বানপানী,মহামাৰীৰ লগতে হিংসাত্মক কাৰ্যকলাপ, যুদ্ধ-বিগ্ৰহৰ সংকেত দিয়ে বুলি জ্যোতিষী সকলে উল্লেখ কৰে। ইতিমধ্যে সমগ্ৰ দেশৰ লগতে ৰাজ্যৰ আকাশে বতাহে শাৰদীয় বতৰৰ সুবাস। মৃৎশিল্পী সকলে শেষ পৰশ দিয়াত ব্যস্ত মৃন্ময় মূৰ্তিত।

উদ্যোক্তা সকলেওঁ দিন ৰাতি একাকাৰ কৰি ভক্তগনক আকৰ্ষিত কৰিবে নামি পৰিছে অঘোষিত প্ৰতিযোগিতাত। লাখ লাখ টকাৰ বাজেটেৰ পেণ্ডেল, আলোকসজ্জাৰ বাবে আমদানি কৰিছে বহিঃৰাজ্যৰ শিপ্লীক। দুৰ্গা পুজাৰ নামত ৰাজ্যবাসীয়ে ন্যুনতম কৃপনালী নকৰাকৈ উৰুৱাব কোটি কোটি টকা। ইতিমধ্যে ব্যৱসায়ীক প্ৰতিষ্ঠান সমূহে গ্ৰাহকক আকৰ্ষণ কৰিবলৈ বিভিন্ন ৰেহাই, উপহাৰ ঘোষনাৰে নামি পৰিছে এক অনামী প্ৰতিযোগিতাত। আনহাতে শক্তি পুজাত হিয়া উবুৰিখাই পৰা ৰাজ্যখনত নাৰীৰ নিৰাপত্তাহীনতাৰ ঘটনাই আন এক ছবি দাঙি ধৰিছে। যিখন দেশ তথা ৰাজ্যত নাৰীক পুজা কৰা হয় তেনে ৰাজ্যত নাৰী নিৰ্যাতনৰ বলি হোৱা ঘটনাই সকলোকে চিন্তিত আৰু উদ্বিগ্ন কৰি ৰখা পৰিলক্ষিত হৈছে।