অসমৰ আদিম অধিবাসী ভূমিপুত্ৰ মটক জনগোষ্ঠীৰ অন্যতম যুৱ-ছাত্ৰ সংগঠন সদৌ অসম মটক যুৱ-ছাত্ৰ পৰিষদ আৰু সদৌ অসম মটক ছাত্ৰ সন্থাই জন্মলগ্নৰে পৰা জনগোষ্ঠীটোৰ শৈক্ষিক, সামাজিক,অৰ্থনৈতিক,সংস্কৃতি,ক্ৰীড়াৰ উন্ময়নৰ লগতে জনজাতিকৰণ প্ৰদানৰ সম্পৰ্কটো নিৰবিচ্ছিন্নভাৱে সংগ্ৰাম অব্যাহত ৰাখিছে।উল্লেখিত সমস্যাসমূহ সমাধানৰ ক্ষেত্ৰত অসম চৰকাৰৰ লগত বিগত বছৰত সৌহাৰ্দ্যপূৰ্ণ পৰিৱেশত কেইবালানিও আলোচনা অনুষ্ঠিত কৰা হৈছে।

পৰিতাপৰ বিষয় দাবীসমূহ সমাধানৰ ক্ষেত্ৰত আলোচনাত পোৱা আশ্বাস সমূহ কেৱল মাত্ৰ আলোচনাৰ মাজতে আৱদ্ধ হৈ থকাত জনগোষ্ঠীটোৰ ৰাইজ অতিষ্ঠ হৈ পৰিছে বুলি মটক যুৱ-ছাত্ৰ পৰিষদৰ কেন্দ্ৰীয় সমিতিৰ সম্পাদক উজ্জ্বল বৰুৱাই উল্লেখ কৰে। সেয়েহে আজি সদৌ অসম মটক যুৱ-ছাত্ৰ পৰিষদ আৰু সদৌ অসম মটক ছাত্ৰ সন্থাৰ যৌথ উদ্যোগত শতাধিক ৰাইজৰ উপস্থিতিত গুৱাহাটীৰ চচলত মটক জনগোষ্ঠীক অতিশীঘ্ৰে জনজাতিৰ তালিকাত অন্তৰ্ভুক্ত কৰা, ৰজাদিনীয়া ঐতিহাসিক কীৰ্তি চিহ্নসমূহ বেদখল মুক্ত কৰি সংৰক্ষণ আৰু সৌন্দৰ্যবদ্ধনৰ ব্যৱস্থা কৰা,
মটক জনগোষ্ঠীক অতিশীঘ্ৰে পূৰ্ণ স্বায়ত্তশাসিত পৰিষদ প্ৰদান কৰা,
মটক স্বায়ত্ত শাসিত পৰিষদক পৰ্যাপ্ত পুজি আৱণ্টন দিয়ক আৰু বিভিন্ন নিকায়-নিগমত মটক জনগোষ্ঠীৰ যোগ্য প্ৰাৰ্থীক নিযুক্তি দিয়াৰ ব্যৱস্থা গ্ৰহণ কৰাৰ দাবীত দুঘণ্টীয়া অৱস্থান ধৰ্মঘট কাৰ্যসচী ৰূপায়ণ কৰি প্ৰতিবাদ সাব্যস্ত কৰে।

প্ৰতিবাদ কাৰীয়ে কেন্দ্ৰীয় চৰকাৰ হায় হায়,অসম চৰকাৰ হায় হায়, কেন্দ্ৰীয় চৰকাৰ হুচিয়াৰ, ন’ এছটি ন’ৰেষ্ট, ইত্যাদি শ্ল’গানেৰে গুৱাহাটীৰ আকাশ-বঁতাহ কপাই তোলে।
প্ৰতিবাদ স্থলিত মটক যুৱ-ছাত্ৰ পৰিষদৰ কেন্দ্ৰীয় সমিতিৰ মুখ্য উপদেষ্টা উদয় শংকৰ মহন, সভাপতি সত্য গোঁহাই,সাধাৰণ সম্পাদক উজ্জ্বল বৰুৱা,সহ সম্পাদক অনন্ত বৰুৱা আৰু দিগন্ত দত্ত,মুখ্য সাংগঠনিক সম্পাদক উপেন সেনাপতি,তিনিচুকীয়া জিলাৰ সভাপতি কৃষ্ণকান্ত কাকতি,মটক ছাত্ৰ সন্থাৰ সভাপতি সঞ্জয় হাজৰিকা,সম্পাদক সুলভ জ্যোতি শইকীয়া উপস্থিত থাকে।কাৰ্যসূচীৰ অন্তত মাননীয় অসমৰ মুখ্য মন্ত্ৰীলৈ দাবীসম্বলিত স্মাৰক পত্ৰ প্ৰেৰণ কৰে।

বৰ্তমান ৰাজ্যখনত ৯৯,৯৪৭ গৰাকী ডি ভোটাৰ আছে। বিধায়ক ৰেকিবুদ্দিন আহমেদৰ এক প্ৰশ্নৰ উত্তৰত বিধানসভাত এই তথ্য দাঙি ধৰে মুখ্যমন্ত্ৰী ডঃ হিমন্ত বিশ্ব শৰ্মাই। ডঃ শৰ্মাই দাঙি ধৰা তথ্যমতে তেওঁৰ কাৰ্যকালত ১৬,১১২ টা ডি ভোটাৰৰ গোচৰ নিস্পত্তি কৰাৰ বিপৰীতে ৯৬,৪৫৭ টা গোচৰ নিস্পত্তি হবলৈ বাকী আছে। আনহাতে বিদেশী ন্যায়াধীকৰণে মুঠ ১৬,৭৫১ গৰাকীক বিদেশী নাগৰিক হিচাপে চিনাক্ত কৰে। আনহাতে ন্যায়াধীকৰণে ১৯২ গৰাকীক অভিযুক্ত বিদেশী হিচাপে চিনাক্ত কৰে।

চলিত বৰ্ষৰ ৩০ আগষ্টলৈ ডিটেনচন কেম্পত ১৫৪ গৰাকী পুৰুষ আৰু ৭০ গৰাকী মহিলাসহ মুঠ ২২৪ গৰাকী বিদেশী নাগৰিকক ৰখা হৈছে বুলি ডঃ শৰ্মাই সদনত অবগত কৰে। একেদৰে গোৱালপাৰাৰ ট্ৰেনজিত কেম্পটো চলিত বৰ্ষৰ ২৭ জানুৱাৰীত মুকলি কৰা বুলি ডঃ শৰ্মাই উল্লেখ কৰি কেম্পটোৰ নিৰ্মান ব্যয় ৩৫ লাখ ৪৩ হাজাৰ ৭৫০ টকা বুলি জানিবলৈ দিয়ে। আনহাতে চলিত বৰ্ষত ৩,৫২২ গৰাকীক বিদেশী নাগৰিক বুলি চিনাক্ত কৰে বিদেশী ন্যায়াধীকৰণে। চিনাক্ত কৰা বিদেশী নাগৰিকৰ ৩৫ গৰাকীক বহিস্কাৰ কৰা হয়। উল্লেখ্য যে বিদেশী ন্যায়াধীকৰণে ২০০১ বৰ্ষৰ পৰা ২০২৩ বৰ্ষৰ সময়চোৱাত মুঠ ১ লাখ ৩১ হাজাৰ ৬৪৯ গৰাকীক বিদেশী নাগৰিক হিচাপে চিনাক্ত কৰাৰ বিপৰীতে চৰকাৰে ৩,১০০ গৰাকী বিদেশী নাগৰিকক বহিস্কাৰ কৰিবলৈ সক্ষম হয়। একেদৰে এই সময়ছোৱাত ৮,৯০৬ গৰাকীৰ নাম ভোটাৰ তালিকাৰ পৰা কৰ্তন কৰা বুলিও মুখ্যমন্ত্ৰী ডঃ শৰ্মাই সদনত অবগত কৰে।

সাতগাঁও শাখা সাহিত্য সভাৰ চলিত মাহৰ মাহেকীয়া বৈঠক “সাহিত্য চৰা”ৰ সৈতে সংগতি ৰাখি বৃহত্তৰ সাতগাঁও অঞ্চলক বিশেষ ভাৱে প্ৰতিনিধিত্ব কৰা সামাজিক অনুষ্ঠান সাতগাঁও লাচিত পুথিভঁৰালৰ সহযোগত সাতগাঁও শাখা সাহিত্য সভাৰ সভাপতি ফুলেশ্বৰ ডেকাৰ সভাপতিত্বত আজি প্ৰয়াত সাহিত্যিক, শিক্ষাবিদ দেবেন দত্তৰ এক স্মৃতিচাৰণ অনুষ্ঠান অনুষ্ঠিত হৈ যায়। অনুষ্ঠানৰ আৰম্ভণিতে সাতগাঁও শাখা সাহিত্য সভাৰ সম্পাদক উৎপল শইকীয়াই স্বৰ্ণ শাখাৰ মৰ্য্যদা লাভ কৰিবলৈ উপনীত হোৱা সাতগাঁও শাখা সাহিত্য সভাৰ নতুনকৈ আজীৱন সদস্য লাভ কৰা সদস্য সকলক স্বাগতম জনোৱাৰ লগতে ন পুৰণি সদস্য সকলৰ সৈতে চিনাকী কৰাই দিয়ে। অনুষ্ঠানত সাতগাঁও শাখা সাহিত্য সভাৰ উপদেষ্টা অনিল চৌধুৰীয়ে প্ৰয়াত দেবেন দত্তৰ জীৱন আৰু কৰ্মৰাজিৰ মূল্যায়ন দাঙি ধৰাৰ লগতে দৈনন্দিন বাৰ্তা কাকতৰ কাৰ্যবাহী সম্পাদক তথা জ্যেষ্ঠ সাংবাদিক ডিম্পুল চুতীয়াই সংবাদ ক্ষেত্ৰ খনত প্ৰয়াত দেবেন দত্ত ছাৰৰ সান্নিধ্য আৰু অভিজ্ঞতা বৰ্ণনা কৰাৰ লগতে অসমীয়া ভাষাৰ শুদ্ধতাৰ বাবে সাংবাদিক সকলৰ মাজতো প্ৰয়াত নমস্য ব্যক্তিগৰাকীযে একক ভাবে গ্ৰহণ কৰি অহা প্ৰদক্ষেপ আৰু সংগ্ৰাম খনৰ কথা সোঁৱৰণ কৰে।

তেওঁ কয় যে প্ৰয়াত দেবেন দত্ত ছাৰ যিদৰে সাংবাদিক সকলৰ মাজত মৰম আৰু শ্ৰদ্ধাৰ আছিল, সেইদৰে বহুতৰ বাবে মুৰৰ কামোৰণি আছিল আৰু বহু সময়ত তেওঁ কৰা আমনিও সহ্য কৰিব লগীয়া হৈছিল। কাৰণ ছাৰে দৈনিক পুৱাই বাতৰি কাকতখন চোৱাৰ পিছত কাকতখনত লক্ষ্য কৰা ভুল বোৰ শুধৰাই দিব পৰাকৈ বাতৰি কাকতৰ কাৰ্যালয়লৈ পুৱাই বা সন্ধিয়া ৭-৮ মান বজাত ফোন কৰিছিল আৰু বহু সময় ধৰি অনিচ্ছা সত্ত্বেও ফোনত কথা পাতিব লগীয়া হৈছিল। যিটো সময় সংবাদ পত্ৰৰ যিকোনো সাংবাদিকৰ বাবে যথেষ্ট ব্যস্ত সময় হিচাপে পৰিগণিত হয়। অনুষ্ঠানত প্ৰয়াত দেবেন দত্তক স্মৃতিচাৰণ কৰি সাতগাঁও শাখা সাহিত্য সভাৰ সদস্যা তথা লেখিকা অঞ্জলি ডেকাই (দাস) এক চমু বক্তব্য দাঙি ধৰাৰ লগতে ” যুগান্তৰৰ এক গভীৰ প্ৰণয় ” শীৰ্ষক কবিতাটি পাঠ কৰে। অনুষ্ঠানত সু সাহিত্যিক তথা নাট্যকৰ্মী প্ৰফুল্ল বৰ্মণেও বৰেণ্য ব্যক্তি জনৰ সান্নিধ্য আৰু তেওঁৰ সৈতে হোৱা অভিজ্ঞতাৰ বিষয়ে বৰ্ননা কৰে। আজিৰ এই অনুষ্ঠানতে সাতগাঁও লাচিত পুথিভঁৰালৰ উদ্যোগত সাতগাঁও বাসিন্দা তথা সাহিত্য আৰু সামাজিক দিশৰ নেতৃস্থানীয় ব্যক্তি তথা শেহতীয়াভাবে ৰাজ্যিক কৃতি শিক্ষক বঁটা লাভ কৰা আমসং চাহ বাগান আদৰ্শ উচ্চ মাধ্যমিক বিদ্যালয়ৰ প্ৰধান শিক্ষক উপেন গোস্বামীক সম্বৰ্ধনা জনোৱা হয়।

গোস্বামীক পিতলৰ শৰাই, ফুলাম গামোচা আৰু সম্বৰ্ধনা প্ৰ পত্ৰ প্ৰদান কৰা হয়। সম্বৰ্ধনা পত্ৰ পাঠ কৰে সাতগাঁও লাচিত পুথিভঁৰালৰ সভাপতি তথা সাতগাঁও শাখা সাহিত্য সভাৰ প্ৰতিস্থাপক সভাপতি ভবেন চন্দ্ৰ দাসে। ভাষণ প্ৰসঙ্গত গোস্বামীয়ে নিজৰ কৰ্মময় জীৱনৰ বিভিন্ন দিশ সমূহৰ লগতে কৃতি শিক্ষক বটা প্ৰাপ্তিৰ ক্ষেত্ৰত গ্ৰহণ কৰিব লগীয়া প্ৰদক্ষেপ সমূহৰ বিষয়ে সবিস্তাৰে বৰ্ণনা কৰে। অনুষ্ঠানত সাতগাঁও শাখা সাহিত্য সভাৰ আজীৱন সদস্য বিপিন কলিতা, তুলতুল কুমাৰ দাস, হৰেশ্বৰ গোস্বামী আৰু সাতগাঁও শাখা সাহিত্য সভাৰ সভাপতি ফুলেশ্বৰ ডেকাই স্বৰচিত কবিতা পাঠ কৰে। জাতীয় সংগীতৰে শাখাৰ কাৰ্যসূচী সম্পূৰ্ণ কৰা অনুষ্ঠানৰ শেষত শলাগৰ শৰাই আগবঢ়াই শাখাৰ সম্পাদক সাংবাদিক উৎপল শইকীয়াই।