আজি দেৰগাঁৱৰ অন্যতম ইংৰাজী মাধ্যমৰ অগ্ৰণী শিক্ষা প্ৰতিষ্ঠান শিশু ভাৰতী হায়াৰ চেকেণ্ডাৰী স্কুলৰ ( Shishu Bharati Higher secondary School)ৰ ৪৬তম প্ৰতিষ্ঠা দিৱস। ১৯৭৭ চনতে প্ৰতিষ্ঠা হোৱা এই বিদ্যালয় খনৰ আজি ৪৬ তম প্ৰতিষ্ঠা দিৱস উপলক্ষে উৎসৱ মুখৰ হৈ পৰে বিদ্যালয় খনৰ পৰিৱেশ।

পুৱা পতাকা উত্তোলন কৰে বিদ্যালয়ৰ ভাৰপ্ৰাপ্ত অধ্যক্ষ মিতালী মহন্তই,বিদ্যালয়ৰ প্ৰতিষ্ঠাৰ লগত জড়িত প্ৰয়াত ব্যক্তি সকলৰ প্ৰতি শ্ৰদ্ধাঞ্জলি জ্ঞাপন,মুকলি সভা, তাৰ পাছতেই বিদ্যালয়ৰ ছাত্ৰ-ছাত্ৰী সকলৰ দ্বাৰা বাৰেৰহণীয়া সাংস্কৃতিক অনুষ্ঠান অনুষ্ঠিত হয়। সাংস্কৃতিক অনুষ্ঠান আনুষ্ঠানিক ভাবে শুভ উদ্বোধন কৰে জনপ্ৰিয় কন্ঠশিল্পী ববিতা ভট্টাচাৰ্যই। এনেদৰে বিভিন্ন কাৰ্য্যসূচীৰে অনুষ্ঠিত হ’ল ৪৬তম প্ৰতিষ্ঠা দিৱস।

দিব্য জ্যোতি কাকতিৰ প্ৰতিবেদন

বকতাৰ লাখমণি পঠলিয়াল কৈৱৰ্ত গাঁও নামঘৰত সমূহ পঠলিয়াল কৈৱৰ্ত গাঁৱৰ ৰাইজৰ সহযোগত দুদিনীয়া কাৰ্যসূচীৰে অনুষ্ঠিত কৰা হয় ভাগৱত পাঠ আৰু ব্যাখ্যানুষ্ঠান। বৈকুণ্ঠৰ কল্পতৰু শ্ৰীমদ্ভাগৱত শাস্ত্ৰৰ অমৃতময় বাণীৰে মুখৰিত হয় বকতাৰ পঠলিয়াল অঞ্চল। দুদিনীয়া কৈ অনুষ্ঠিত হোৱা এই ভাগৱত পাঠ অনুষ্ঠানত কেইবা শতাধিক ভকত বৈষ্ণৱে ভিৰ কৰা পৰিলক্ষিত হয়।

ভাগৱত পাঠ আৰু ব্যাখ্যানুষ্ঠানৰ লগত সংগতি ৰাখি শেষৰ কাৰ্যসূচীত স্থানীয় শিল্পীৰ দ্বাৰা ” হনুমানৰ ভক্তি পৰীক্ষা, ৰামৰ প্ৰতিজ্ঞা পূৰণ” শীৰ্ষক এভাগি নাট ভাওনা প্ৰদৰ্শন কৰা হ’য়।

নাজিৰাৰ পৰা দিলীপ হাজৰিকাৰ প্ৰতিবেদন

ৰাজ্যৰ ভিন্ন প্ৰান্তৰ লগতে নলবাৰী জিলাৰ বৰ্নিবাৰীটো আজি ৰাষ্ট্ৰীয় ডেংগু দিৱস পালন কৰা হয় । নলবাৰী জিলা স্বাস্থ্য বিভাগৰ উদ্যোগত মুকালমুৱা মহকুমা চিকিৎসালয় আৰু বৰ্নিবাৰী স্বাস্থ্য কেন্দ্ৰৰ সহযোগত বৰ্নিবাৰী মিলন হাইস্কুলত ৰাষ্ট্ৰীয় ডেংগু দিৱস উপলক্ষে এখন সজাগতা সভা অনুস্থিত হয় । বৰ্ণিবাৰী মিলন হাইস্কুলৰ প্ৰধান শিক্ষক বসন্ত দাসৰ সভাপতিত্বত অনুষ্ঠিত উক্ত সজাগতা সভাত বৰ্নিবাৰী স্বাস্থ্য কেন্দ্ৰৰ চিকিৎসক ডা: সিদ্ধাৰ্থ নাথ, নলবাৰী জিলা স্বাস্থ্য প্ৰকল্প বিষয়া হিৰন্ময়ী দেৱী, স্বাস্থ্য কৰ্মী দেবেন বৰ্মন, হেমেন ভৰলী , নিলাধৰ নাথ, প্ৰাঞ্জিত দাস, জয়ন্ত নাথ , আমিনা বেগম আদি কেইবাজনেও অংশলৈ ডেংগুৰ পৰা পৰিত্ৰাণ পাবলৈ বিভিন্ন পৰামৰ্শ আগবঢ়ায়।

বিদ্যালয় খনৰ শিক্ষক কৰ্মচাৰী অভিভাৱক তথা প্ৰায় ২০০ ছাত্ৰ ছাত্ৰী উপস্থিত থকা সভাখনত চিকিৎসক তথা স্বাস্থ্য কৰ্মী সকলে ডেংগুৰ লক্ষ্যন সম্পৰ্কে অৱগত কৰাৰ উপৰিও এনে লক্ষণ দেখা দিলেই চিকিৎসকৰ পৰামৰ্শ লোৱাৰ আহ্বান জনায় । উল্লেখ্য যে নলবাৰী জিলাৰ ভিন্ন প্ৰান্তত সজাগতাৰ অভাবত বিগত সময় চোৱাত ডেংগু, মেলেৰীয়াত আক্ৰান্ত হৈ কেইবাজনো লোকে প্ৰাণ হেৰুৱাবলগীয়া হৈছিল । সম্প্ৰতি স্বাস্থ্য বিভাগে এই ৰোগৰ ওপৰত সজাগতা সৃষ্টিৰ বাবে লোৱা পদক্ষেপক ৰাইজে শলাগ লয়।

নলবাৰীৰ পৰা পিংকু ৰায় চৌধুৰীৰ প্ৰতিবেদন

তামুলপুৰত অপহৰণৰ ঘটনা! তামুলপুৰৰ বাৰেইগাঁৱৰ এগৰাকী ব্যক্তিক প্ৰাতঃভ্ৰমণলৈ যাওঁতে অচিনাক্ত দুৰ্বৃত্তই গাড়ীত উঠাই লৈ যোৱা ঘটনাই তীব্ৰ চাঞ্চল্যৰ সৃষ্টি কৰিছে সমগ্ৰ অঞ্চলটোত। ঘটনাৰ বিৱৰণ অনুসৰি আজি পুৱা প্ৰায় ৫ মান বজাত তামুলপুৰ সদৰৰ বাৰেইগাঁৱৰ ধনপতি লাহৰী নামৰ ব্যক্তি জনে প্ৰাতঃভ্ৰমণৰ বাবে ওলাই যাওঁতে ঘৰৰ পৰা এশ মিটাৰ দূৰত্বত থকা তামুলপুৰ পাৰ্কৰ সন্মূখৰ পৰা এখন বাহনত অচিনাক্ত দুৰ্বৃত্তৰ দল এটাই জোৰ জবৰদস্তি উঠাই লৈ যায়। ঘটনা সম্পৰ্কত ইতিমধ্যে তামুলপুৰ আৰক্ষীয়ে তদন্ত আৰম্ভ কৰিছে যদিও বৰ্তমানেও ব্যক্তিজনৰ কোনো শুংসূত্ৰ উলিয়াব পৰা নাই।

তামুলপুৰৰ পৰা প্ৰসাদ দাসৰ প্ৰতিবেদন