অসম চৰকাৰে পশুধনক সুৰক্ষা প্ৰদানৰ উদ্দেশ্যৰে ২০২১ চনত গো-সুৰক্ষা আইন বলবৎ কৰিছিল৷ গো-সুৰক্ষা আইনৰ জৰিয়তে গৰুৰ চোৰাং বেহা আৰু অবৈধভাৱে গৰুৰ মাংস বিক্ৰী কৰা লোকৰ ওপৰত কঠোৰ শাস্তি প্ৰদানৰ দিহা কৰা হৈছে৷

কিন্তু ৰাজ্য চৰকাৰে গো সুৰক্ষা আইনৰ জৰিয়তে গৰুৰ সৰবৰাহত নিষেধাজ্ঞা জাৰি কৰিছে যদিও এতিয়াও ৰাজ্যৰ ভিন্ন প্ৰান্তত অব্যাহত আছে গৰুৰ চোৰাং সৰবৰাহ। ইফালে গৰুৰ অবৈধ সৰবৰাহ ৰোধ কৰাৰ ক্ষেত্ৰত পূৰ্বতকৈ অধিক সষ্টম হৈছে আৰক্ষীও। ৰাজ্য ভিন্ন স্থানত অভিযান চলাই আৰক্ষীয়ে ইতিমধ্যে চোৰাংভাৱে সৰবৰাহ কৰা বহু গৰু উদ্ধাৰৰ লগতে সৰবৰাহকাৰীকো গ্ৰেপ্তাৰ কৰিছে।

কিন্তু যিমানেই আৰক্ষীয়ে সৰবৰাহকাৰীক আটক কৰিছে সিমানেই ন-ন কৌশল অৱলম্বন কৰি সৰবৰাহকাৰীয়ে অব্যাহত ৰাখিছে গৰু কিম্বা ম’হৰ সৰবৰাহৰ। কেতিয়াবা যদি নৈশ বাছৰ ভিতৰত, কেতিয়াবা আকৌ কণ্টেইনাৰ বাহনৰ ভিতৰত লুকাই গৰু সৰবৰাহ কৰিছে সৰবৰাহকাৰীয়ে শেহতীয়াকৈ, পুনৰ কলিয়াবৰত দুটাকৈ পৃথক পৃথক স্থানত আৰক্ষীয়ে চলোৱা অভিযানত উদ্ধাৰ হয় বৃহৎ সংখ‍্যক গৰু৷

জখলাবন্ধা আৰক্ষীয়ে জানিবলৈ দিয়া অনুসৰি, দেওবাৰে সন্ধিয়া এখন ডি. আই. বাহনত শাক-পাচলি কঢ়িওৱাৰ নামত অবৈধভাৱে গৰুৰ সৰবৰাহৰ খবৰ লাভ কৰিছিল আৰক্ষীয়ে। গোপন সূত্ৰই দিয়া খবৰ অনুসৰিয়েই আৰক্ষীয়ে অভিযান চলাই ডি আই বাহনখনৰ পৰা উদ্ধাৰ কৰে ১০ টাকৈ চোৰাংভাৱে সৰবৰাহ কৰা গৰু৷

লগতে আৰক্ষীয়ে আটক কৰে দুই সৰবৰাহকাৰীক ৷ আটকাধীন সৰবৰাহকাৰী দুটা নাজিবুৰ ৰহমান আৰু দিলদাৰ হুছেইন ৷ দুয়োৰে ঘৰ ২ নং বৰঘূলীত বুলি জানিব পৰা গৈছে। একেদৰে সোমাবাৰে অৰ্থাৎ আজিও আৰক্ষীয়ে গোপন খবৰৰ ভিত্তিত অভিযান চলাই লাভ কৰে সাফল্য৷ পুৱা বাগৰি আৰক্ষীৰ অভিযানত কলিয়াবৰ মহকুমাৰ হাৰমতিত জব্দ হয় এখন গৰুভৰ্তি ট্ৰাক। জানিব পৰা মতে বিহৰাৰ পৰা শিৱস্থানলৈ কঢ়িয়াই আনিছিল প্ৰায় ৩০ টাকৈ গৰু।

কিন্তু আৰক্ষীয়ে অভিযান চলাই এ. এছ. ০১ জি. চি ১২৩২ নম্বৰ ট্ৰাকখন জব্দ কৰাৰ লগতে উদ্ধাৰ কৰে গৰুখিনি। লগতে আৰক্ষীয়ে আটক কৰে ট্ৰাকখনৰ চালকক৷ অধিক তথ্যৰ বাবে আৰক্ষীয়ে জেৰা অব্যাহত ৰাখিছে আটকাধীন আটাইকেইটা সৰবৰাকাৰীক।

নগাঁও আৰু গোলাঘাট জিলাত অৱস্থিত ৰাষ্ট্ৰীয় উদ্যান কাজিৰঙা ৰাষ্ট্ৰীয় উদ্যান। পৃথিৱীৰ প্ৰায় দুই তৃতীয়াংশ এক খড়্গযুক্ত গঁড়ৰ বাসস্থান হৈছে কাজিৰঙা। কাজিৰঙাতেই সংৰক্ষিত বনাঞ্চলসমূহৰ ভিতৰত সৰ্বাধিক ঘনত্বৰে ঢেকীয়াপতীয়া বাঘ পোৱা যায়। ২০০৬ চনত কাজিৰঙাক বাঘ সংৰক্ষণ ক্ষেত্ৰ হিচাপেও স্বীকৃতি দিয়া হয়।

এই উদ্যানখন হাতী, ম’হ আৰু দল হৰিণৰ এক বৃহৎ প্ৰজনন ক্ষেত্ৰ। ‘আন্তৰাষ্ট্ৰীয় পক্ষীজীৱন’ সংস্থাই কাজিৰঙাক পক্ষীকূলৰ সংৰক্ষণৰ বাবে ‘গুৰুত্বপূৰ্ণ পক্ষী ক্ষেত্ৰ’ বুলিও স্বীকৃতি দিছে। ভাৰতৰ অইন উদ্যানসমূহৰ তুলনাত কাজিৰঙাত বন্যজীৱ সংৰক্ষণত উল্লেখযোগ্য সফলতা লাভ কৰা গৈছে।

উল্লেখযোগ‍্য যে, কাজিৰঙা ৰাষ্ট্ৰীয় উদ্যানৰ এই মনোমোহা দৃশ্য উপভোগ কৰিবলৈ পৰ্যটকৰ বাবে আছে বিশেষ ব্যৱস্থা৷ হাতী আৰু জীপ গাড়ীৰে অৰণ্য দৰ্শনলৈ লৈ যোৱা হয় পৰ্যটকক৷ বন্যপ্ৰাণী দৰ্শন আৰু পক্ষী দৰ্শনৰ বাবে প্ৰতি বছৰে দেশ-বিদেশৰ পৰা আহে বহু পৰ্যটক ৷ প্ৰকৃতিৰ মনোমোহা দৃশ্য দেখি আল্পুত হৈ পৰে প্ৰতিগৰাকী পৰ্যটক। ইফালে কাজিৰঙা ৰাষ্ট্ৰীয় উদ্যান দৰ্শন কৰিবলৈ অহা প্ৰতিগৰাকী পৰ্যটক সন্মুখীন হয় ভিন্ন অভিজ্ঞতাৰো।

কাজিৰঙা ৰাষ্ট্ৰীয় উদ্যানৰ অভিজ্ঞতা প্ৰতিজন লোকৰ বাবেই হৈ পৰে সুকীয়া, অনন্য অভিজ্ঞতা৷ কেতিয়াবা যদি বাঘৰ গহীন গম্ভীৰ চলন দেখি ৰোমাঞ্চিত হয় কেতিয়াবা আকৌ গঁড়ৰ তয়াময়া যুঁজ দেখি শিহৰিত হৈ পৰে পৰ্যটক। আন কেতিয়াবা আকৌ গঁড় আৰু হাতীয়ে পৰ্যটকৰ জীপলৈ চোঁচা লোৱা দৃশ্যও দেখিবলৈ পোৱা যায়।

অৱশ্যে জীপ চাফাৰিলৈ চোঁচা ল’লেও পৰ্যটকক কোনো ধৰণে হতাহত কৰিব নোৱাৰে যদিও কিছু পৰিমাণে হ’লেও শিহৰিত হৈ পৰে পৰ্যটক। এইবাৰ পুনৰ বিলৰ পাৰত এটা প্ৰকাণ্ড ঢেঁকীয়াপতীয়া বাঘে বিশ্ৰাম কৰা নয়নাভিৰাম দৃশ্যই আল্পুত কৰিছে পৰ্যটকক৷ প্ৰকাণ্ড ঢেঁকীয়াপতীয়া বাঘটোৰ দৃশ্য কেমেৰাত বন্দী কৰিছে টুৰিষ্ট গাইডে৷ টুৰিষ্ট গাইড আনাৰ হুছেইনৰ কেমেৰাত বন্দী হৈছে বাঘৰ এই মনোমোহা দৃশ্য।

কাজিৰঙা ৰাষ্ট্ৰীয় উদ্যানখনৰ এখন বিলৰ পাৰত জিৰণি লৈ আছিল প্ৰকাণ্ড ঢেঁকীয়াপতীয়া বাঘটোৱে। কলিয়াবৰ মহকুমা অন্তৰ্গত বাগৰি বনাঞ্চলত পৰ্যটকৰ এটি দলে নিচেই কাষৰ পৰা বাঘটো প্ৰত্যক্ষ কৰি আনন্দিত হোৱাৰ লগতে ৰোমাঞ্চিত হৈ পৰে। কাজিৰঙা ৰাষ্ট্ৰীয় উদ্যানৰ এনে মনোমোহা দৃশ্যই এতিয়া হাত বাউলি মাতিছে পৰ্যটকক।