৮৫ বছৰত ভৰি দিলে প্ৰথিতযথা সাহিত্যিক তথা বিশিষ্ট শিক্ষাবিদ, চিন্তাবিদ, অসম সাহিত্য সভাৰ প্ৰাক্তন সভাপতি ড০ নগেন শইকীয়াই। ওপজা দিনটোত গুণমুগ্ধৰে ভৰি পৰিল বৰেণ্য সাহিত্যিক ড৹ নগেন শইকীয়াৰ আৱাস বৰ্ণমালা। নিজ কালজয়ী সৃষ্টিৰে হেজাৰ হেজাৰ জনৰ বুকুত সাজ বহুৱাই প্ৰিয় হৈ পৰা সাহিত্যক গৰাকীক জাপি, গামোচা, উপহাৰৰ টোপোলাৰে একাজলি শ্ৰদ্ধা, মৰম আৰু শুভকামনা জনাই পুৱাৰ পৰাই ডিব্ৰুগড়স্থিত “বৰ্ণমালা”ত গুণমুগ্ধৰ ভিৰ দেখা গ’ল।

গুণমুগ্ধ আৰু পৰিয়ালৰ সৈতে কেক কাটি ৮৫ জন্মদিন পালন কৰিলে ড০ শইকীয়াই। উল্লেখ্য যে বৰ্তমানত ধৰ্ম, ভাষা, সম্প্ৰদায়ৰ মাজত সৃষ্টি হোৱা বিভেদে আমাক পথভ্রষ্ট কৰা বুলি পুনৰ এবাৰ আক্ষেপ প্ৰকাশ কৰি,ব্যক্তিগত স্বাৰ্থই সামাজিক স্বাৰ্থ আৰু সাৰ্বজনীন স্বাৰ্থৰ ওপৰত যাতে আঘাত কৰিব নোৱাৰে তাৰ প্ৰতি সজাগ হ’বলৈ ওপজা দিনটোত সমাজলৈ আহ্বান সাহিত্যিক গৰাকীৰ।মূল্যবোধৰ অৱক্ষয়ৰ ওপৰতো প্ৰতিক্ৰিয়া সাহিত্যিক গৰাকীৰ।

লগতে কয় “প্ৰথমে মোৰ ৰাজ্যখন,দ্বিতীয়তে মোৰ ৰাষ্ট্ৰখন তৃতীয়তে সাৰ্বজনীন মানুহৰ মঙ্গলৰ কাৰণে কৰিব পৰা কাম মই জীয়াই থকা লৈকে এই তিনিটা বস্তুৰ ওপৰত কথা ক’বলৈ, লিখিবলৈ যত্ন কৰি যাম।“ -নিজৰ ওপজা দিনটোত এই পণৰ কথা প্ৰকাশ কৰিলে,লগতে তেখেতৰ আহিবলগীয়া দুখন গ্ৰন্থৰ কথাও উল্লেখ কৰে স্বনামধন্য সাহিত্যিক ড০ নগেন শইকীয়াই।

আনহাতে ড৹ নগেন শইকীয়াৰ ওপজা দিনটোত অধ্যাপক সাৰস্বত ন্যাস পৰিষদৰ উদ্যোগত আজি শ্ৰীভাৰতী মহাবিদ্যালয়ৰ প্ৰেক্ষাগৃহত ড৹ নগেন শইকীয়াৰ ৮৫ সংখ্যক জন্মদিন ৰাজহুৱাকৈ পালন কৰি মিতভাষ দিৱস উদযাপন কৰে।

নতুন জ্ঞান আৰু ধাৰণাৰ জৰিয়তে কৃষিৰ দিশত প্ৰকৃতিৰ ৰত্ন উদ্ঘাটন কৰি বহনশীল গ্ৰাম্য অৰ্থনীতিৰ জৰিয়তে ভৱিষ্যৎ প্ৰজন্মক সুৰক্ষিত কৰিব লাগিব। আমাৰ অসমখনক দেশৰ উন্নত ৰপ্তানিকাৰী ৰাজ্য হিচাপে গঢ়ি তুলিবলৈ কৃষিৰ দিশত আন্তঃগাথঁনি উন্নয়নৰ জৰিয়তে আগুৱাই যোৱাৰ বাবে পদক্ষেপ হাতত লোৱা হৈছে।

যোৰহাটৰ অসম কৃষি বিশ্ববিদ্যালয়ৰ মুল চৌহদত আজিৰে পৰা অনুষ্ঠিত সতীৰ্থ সন্মিলনৰ উদ্ধোধনী অনুষ্ঠানত মুখ্য অতিথিৰ ভাষণত এই মত ব্যক্ত কৰে কৃষি মন্ত্ৰী অতুল বৰাই।

বিশ্ববিদ্যালয়ৰ মাধৱ চন্দ্ৰ দাস সোঁৱৰণী প্ৰেক্ষাগৃহত আয়োজিত এই কাৰ্যসূচীত মন্ত্ৰী বৰাই জ্ঞান সকলোৰে উৰ্দ্ধত বুলি উল্লেখ কৰি কয় যে অসম কৃষি বিশ্ববিদ্যালয় মানৱ সম্পদ গঢ়া জনমুখী প্ৰতিষ্ঠান। আন বিশ্ববিদ্যালয়ৰ দৰে কেৱল ছাত্ৰ- ছাত্ৰীৰ মাজত আবদ্ধ হৈ থকা অনুষ্ঠান নহয়।

যুৱপ্ৰজন্ম ,কৃষক, উদ্যোগী সকলোকে লগত লৈ আগবাঢ়ি যোৱা অনুষ্ঠান। এই দিশত আৰু অলপ আগুৱাই বিশ্ববিদ্যালয়ে কৃষি উদ্যোগী গঢ়াৰ দিশত যি পদক্ষেপ লৈছে সেয়া প্ৰসংসনীয়। কৃষিক্ষেত্ৰৰ উন্নয়নৰ বাবে কেন্দ্ৰ আৰু ৰাজ্য চৰকাৰে লোৱা পদক্ষেপৰ বিষয়ে সদৰি কৰি জলবায়ু পৰিৱৰ্তনৰ প্ৰেক্ষাপটত কি নতুন চিন্তাধাৰাৰে আগবঢ়াই নিলে কৃষিত পৰিবৰ্তন আহিব সেয়া চিন্তা কৰিব লাগিব বুলি প্ৰকাশ কৰে।

একেসময়তে কৃষিৰ আন্তঃগাথঁনিৰ উন্নয়নৰ বাবে বেংক ঋণ আদিৰ দিশত বেংক সমুহৰো বহু কৰণীয় আছে বুলি কয়। পঢ়ি যোৱা শিক্ষানুষ্ঠানৰ স্মৃতি সদায় মনত কঢ়িয়াই লৈ ফুৰাৰ আবেগিক সম্পৰ্কৰে সকলো নষ্টালজিক হৈ পৰে বুলিও ভাষণত উল্লেখ কৰে। যোৰহাট কৃষি মহাবিদ্যালয়ৰ মহাৰজত জয়ন্তী উপলক্ষে আয়োজিত এই সন্মিলনখন উদ্ধোধন কৰি উপাচাৰ্য ড: বিদ্যুৎ চন্দন ডেকাই কয় যে যিসকল শিক্ষগুৰুৰ কষ্ট আৰু ত্যাগৰ ফলত বিশ্ববিদ্যালয় আজিৰ অৱস্থাত উপনীত হৈছে সেই সকলক আজি স্মৰণ কৰিছো।

সেইসকলে গঢ়ি থৈ যোৱা ভেটিত ৰৈয়ে আজি সম্ভৱত অসম কৃষি বিশ্ববিদ্যালয়ত এনে কিছুমান পদক্ষেপ হাতত লোৱা হৈছে যি দেশৰ কৃষি মহাবিদ্যালয় সমুহৰ ভিতৰতে প্ৰথম। এই সোঁৱৰণী আৰু শিক্ষাৰ্থী জীৱনৰ মধুৰক্ষণ পুনৰ ৰোমন্থন কৰিবলৈ দেশ বিদেশৰ পৰা আহি উপস্থিত হোৱা সতীৰ্থ সকল কৃতজ্ঞতা জ্ঞাপন কৰে। প্ৰসংগক্ৰমে সতীৰ্থ সকলৰ জৰিয়তে এটা ” সতীৰ্থ পুজি” গঠনৰ বাবে পদক্ষেপ হাতত ল’বলৈ আহ্বান জনায়।

কৃষি মন্ত্ৰী অতুল বৰাই বন্তি প্ৰজ্বলন কৰি শুভাৰম্ভ কৰা সভাখনত আদৰণি ভাষনত কৃষি বিজ্ঞানগুৰু তথা সতীৰ্থ সন্মিলন উদযাপন সমিতিৰ সভাপতি ড: জয়ন্ত ডেকাই কৃষি মহাবিদ্যালয়ৰ সতীৰ্থসকলৰ স্মৰণ কৰি মহাবিদ্যালয়ৰ উত্তৰণৰ দিশৰ ৰোমন্থন কৰে। দেশ, ৰাজ্য তথা বিদেশত কৃতিত্ব কঢ়িয়াই বহুজনে কৃষি মহাবিদ্যালয় পৰিয়ালক গৌৰৱান্বিত কৰা বুলি প্ৰকাশ কৰে।

সহযোগী অধ্যাপিকা ড০ প্ৰিয়দৰ্শিনী ভৰালীয়ে আত ধৰা সভাখনিত বিধায়ক ভবেন্দ্ৰ নাথ ভৰালী আৰু মুৰব্বী অধ্যাপক তথা সতীৰ্থ সন্মিলনৰ উদযাপন সমিতিৰ সম্পাদক ড০ কল্যাণ পাঠকেও বক্তব্য আগবঢ়াই।

আনহাতে আজি পুৱা সতীৰ্থ সন্মিলনৰ পতাকা উত্তোলন কৰে উদযাপন সমিতিৰ সভাপতি ড০ জয়ন্ত ডেকাই আৰু মহাৰজত জয়ন্তী উপলক্ষে ৭৫ খন পতাকা উত্তোলন কৰে প্ৰত্যেক বৰ্ষৰ এজনকৈ শিক্ষাৰ্থীয়ে ।

ইয়াৰ পাছতে সতীৰ্থ শিক্ষাৰ্থী সকলৰ সমাবেশেৰে এক শোভাযাত্ৰা উলিওৱা হয়। বিয়লি অন্তৰংগ আলাপ আৰু মুখিমুখি অনুষ্ঠান অনুষ্ঠিত হয়। নিশা সতীৰ্থ সকলৰ জৰিয়তে সাংস্কৃতিক অনুষ্ঠান অনুষ্ঠিত হয়।

অসম প্ৰকাশন পৰিষদৰ দ্বাৰা ডিফুত অনুষ্ঠিত হৈ থকা গ্ৰন্থমেলাৰ আজি ষষ্ঠ দিনা ভিন্ন কাৰ্য্যসূচীৰ লগতে আজি ডিফুৰ বিশিষ্ট সাহিত্যিক ভৱ প্ৰসাদ দেউৰীৰ ৰচিত ‘ভিন্ন দৃষ্টি ভিন্ন চিন্তা ‘ শীৰ্ষক গ্ৰন্থখনিৰ শুভ উন্মোচন কৰা হয়।

উন্মোচন কৰে অসম চৰকাৰৰ সচিব ভাৰতীয় প্ৰশাসনিক সেৱাৰ বিষয়া মুনিন্দ্ৰ শৰ্মাই।

অনুষ্ঠানত অসম চৰকাৰৰ প্ৰকাশন পৰিষদৰ সচিব প্ৰমোদ কলিতা, ডিমাচা সাহিত্য সভাৰ প্ৰাক্তন সভাপতি নজেন্দ্ৰ নূনিচাকে প্ৰমুখ্য কৰি ডিফুৰ জ্ঞানোজ্যষ্ঠ বয়োজেষ্ঠসকল লেখক লেখিকা সকল উপস্থিত আছিল।