দেশৰ ৭৬ সংখ্যক স্বাধীনতা দিৱসৰ সৈতে সংগতি ৰাখি গোলাঘাট জিলা প্ৰশাসনৰ উদ্যোগত আজি নিজৰ ক্ষেত্ৰখনত পাৰদৰ্শিতা প্ৰদৰ্শন কৰা ৰাষ্ট্ৰীয় শিক্ষাৰ্থী বাহিনী চমুকৈ এনচিচিৰ কেডেটসকলক সম্বৰ্ধনা জনোৱাৰ লগতে চিত্ৰাংকন আৰু ৰচনা প্ৰতিযোগিতাত স্থান লাভ কৰা ছাত্ৰ-ছাত্ৰীসকলক পুৰস্কাৰ প্ৰদান কৰা হয় । এই উপলক্ষে জিলা উপায়ুক্তৰ কাৰ্যালয়ৰ সভাকক্ষত জিলা উন্নয়ন আয়ুক্ত অৰ্পা বাগলাৰীৰ সভাপতিত্বত এখন সভা অনুষ্ঠিত হয় । অনুষ্ঠানত জিলা উন্নয়ন আয়ুক্তগৰাকীয়ে নিজৰ নিজৰ ক্ষেত্ৰত পাৰদৰ্শিতা প্ৰদৰ্শন কৰা ছাত্ৰ-ছাত্ৰীসকলক অভিনন্দন জ্ঞাপন কৰে । তেওঁ আত্মবিশ্বাস আৰু প্ৰবল মানসিক উদ্যমেৰে নিজৰ লক্ষ্যপ্ৰাপ্তি তথা এগৰাকী সু-নাগৰিক হোৱাৰ দিশে অগ্ৰসৰ হ’বলৈ শিক্ষাৰ্থীসকলৰ প্ৰতি আহ্বান জনায় । অনুষ্ঠানত ৭৪ আছাম গাৰ্লছ এন চি চিৰ ৯ গৰাকী কেডেট, অধ্যক্ষ, এ এন অ’ আৰু চি টি অ’ক সম্বৰ্ধনা জ্ঞাপন কৰা হয় । ২০২২ চনত দিল্লীৰ গণৰাজ্য দিৱসৰ পেৰেডত অংশগ্ৰহন কৰা তথা ২০২১-২২ বৰ্ষত এন চি চিৰ চি চাৰ্টিফিকেট পৰীক্ষাত শীৰ্ষস্থান লাভ কৰা গোলাঘাট কমাৰ্চ কলেজৰ ছাত্ৰী ৰূপশিখা ডেকাৰ লগতে ডি আৰ কলেজৰ ৰজলীন তকবিপি আৰু তুলিকা গগৈ, দিল্লী পাব্লিক স্কুল, নুমলিগড়ৰ স্পৰ্শা হালৈ আৰু ফৰকাটিং কলেজৰ ছাত্ৰী ছানিয়া দাসক সম্বৰ্ধনা জ্ঞাপন কৰা হয়। আনহাতে এন চি চিৰ প্ৰসাৰৰ ক্ষেত্ৰত আগবঢ়োৱা অৱদানৰ বাবে গোলাঘাট অভিযান্ত্ৰিক মহাবিদ্যালয়ৰ অধ্যক্ষ ডঃ সত্যজিৎ পাল, ডি পি এছ, নুমলিগড়ৰ অধ্যক্ষ ইউ চি হাৰগোলা, কমাৰবন্ধা কলেজৰ এ এন অ’ লেফটেনেন্ট মীনাক্ষী বৰা আৰু গোলাঘাট ইঞ্জিনিয়াৰিং কলেজৰ চি টি অ’ প্ৰনামী ভূঞাক সম্বৰ্ধনা জনোৱা হয় ।

অনুষ্ঠানত হৰ ঘৰ তিৰংগা কাৰ্যসূচীৰ অংশৰূপে জিলা প্ৰশাসনৰ সহযোগত শিক্ষা বিভাগে আয়োজন কৰা চিত্ৰাংকন প্ৰতিযোগিতাত প্ৰথম, দ্বিতীয় আৰু তৃতীয় স্থান লাভ কৰা ক্ৰমে বৰবালি মধ্য ইংৰাজী বিদ্যালয়ৰ গৰিমা গগৈ, ঘিলাধাৰী উচ্চ বুনিয়াদী বিদ্যালয়ৰ স্বপ্না ফুকন আৰু গেলেকি মিকিৰ গাঁও প্ৰাথমিক বিদ্যালয়ৰ শ্ৰেয়া ভৰদ্বাজক পুৰস্কাৰ প্ৰদান কৰা হয় । লগতে ৰচনা প্ৰতিযোগিতাৰ ষষ্ঠৰ পৰা অষ্টম শ্ৰেণী শাখাত জৱাহৰলাল উচ্চ বুনিয়াদী বিদ্যালয়ৰ দীপালী ভূমিজ, পূব দেৰগাঁও কৃষ্ণ ৰমা আদৰ্শ উচ্চ মাধ্যমিক বিদ্যালয়ৰ ভাগ্যস্মিন দত্ত আৰু নাহৰজান উচ্চ বুনিয়াদী বিদ্যালয়ৰ অংকিতা নাইকক ক্ৰমে প্ৰথম, দ্বিতীয় আৰু তৃতীয় পুৰস্কাৰ প্ৰদান কৰা হয়। এই শাখাৰ বিষয় আছিল ‘দেশৰ স্বাভিমান জাতীয় পতাকা’। আনহাতে নৱমৰ পৰা দ্বাদশ শ্ৰেণীৰ শাখাত কুৰালগুৰি এইচ এছ স্কুলৰ ভাৰ্গৱী হাজৰিকা, দেৰগাঁও গাৰ্লছ এইচ এছ স্কুলৰ অনামিকা বৰা আৰু ফৰকাটিং জি জে বালিকা বিদ্যালয়ৰ ৰিচা শইকীয়াই ক্ৰমে প্ৰথম, দ্বিতীয় আৰু তৃতীয় স্থান লাভ কৰে । এই শাখাৰ বিষয় আছিল ‘স্বাধীনতা সংগ্ৰামত গোলাঘাটৰ অৱদান’ । আজিৰ অনুষ্ঠানত অতিৰিক্ত উপায়ুক্তদ্বয় চুলতানা আখটাৰা আহমেদ আৰু কুলদীপ হাজৰিকা, নিৰ্বাচন বিষয়া সুলক্ষণা বৰপাত্ৰগোহাঁই, শিক্ষা বিভাগৰ বিষয়ববীয়া, শিক্ষক-শিক্ষয়িত্ৰী, অভিভাৱক আৰু ছাত্ৰ-ছাত্ৰীসকল উপস্থিত আছিল । অনুষ্ঠানটোৰ আঁত ধৰে জিলা তথ্য আৰু জনসংযোগ বিষয়া পম্পী দেৱীয়ে ।

জামুগুৰিহাটৰ বৌদ্ধিক ক্ষেত্ৰৰ এক অন্যতম শিক্ষানুষ্ঠান জামুগুৰি ছিনিয়ৰ চেকেণ্ডেৰী বিদ্যালয়ৰ নবাগত আদৰণি সভাখন যোৱা ১৭ তাৰিখে অনুষ্ঠিত হয়। ছাত্ৰ-ছাত্ৰী সকলৰ দ্বাৰা পৰিবেশিত এটি ঘোষাৰে শুভাৰম্ভ হোৱা নবাগত আদৰণি সভাখনত সভাপতিত্ব কৰে জামুগুৰি ছিনিয়ৰ চেকেণ্ডেৰী স্কুলৰ অধ্যক্ষ গোলাপ কলিতাই। বিদ্যালয়ৰ সভা গৃহত অনুষ্ঠিত উক্ত নবাগত আদৰণি সভাখনত বিশিষ্ট অতিথি হিচাপে উপস্থিত থাকে বিশ্বনাথ মহাবিদ্যালয়ৰ অৱসৰী অধ্যাপক তথা বিশ্বনাথ চাৰিআলি পৌৰসভাৰ পৌৰপতি অমৰজ্যোতি বৰঠাকুৰ আৰু সন্মানীয় অতিথি হিচাপে আসন গ্ৰহণ কৰে ত্যাগবীৰ হেমবৰুৱা মহাবিদ্যালয়ৰ অধ্যক্ষ ড.অজিত হাজৰিকাই । ইয়াৰোপৰি মুখ্য অতিথি হিচাপে আমন্ত্ৰণ জনোৱা চতিয়া বিধান সভা সমষ্টিৰ বিধায়ক পদ্ম হাজৰিকাৰ অনুপস্থিতিত তেখেতৰ দ্বাৰা প্ৰেৰিত শুভেচ্ছা বাণী সভাত পাঠ কৰা হয়।

উপস্থিত দুয়ো গৰাকী শিক্ষাবিদে শিক্ষাৰ ওপৰত গুৰুত্বপূৰ্ণ,আৰু মননশীল বক্তব্যৰে ছাত্ৰ ছাত্ৰীৰে মত বিনিময় কৰে। বিদ্যালয়ৰ শিক্ষক তথা যুৱ সমাজকৰ্মী মিংকু কলিতাই আঁতধৰা উক্ত নবাগত আদৰণি সভাতে মিংকু কলিতা আৰু জয়শ্ৰী ডেকাৰ তত্বাৱধানত বিদ্যালয়ৰ ছাত্ৰ-ছাত্ৰীসকলৰ দ্বাৰা সম্পাদিত ৰেঙনী´ আৰুজাগৰণ´ শীৰ্ষক দুখন কৈ প্ৰাচীৰ পত্ৰিকা উন্মোচন কৰা হয়। উন্মোচন কৰে ক্ৰমে পাছিঘাট চৰকাৰী মহাবিদ্যালয়ৰ অৱসৰী অধ্যক্ষ ধৰ্মেশ্বৰ হাজৰিকা আৰু ডিকৰাই উচ্চতৰ মাধ্যমিক বিদ্যালয়ৰ অৱসৰী বিষয় শিক্ষক বিপুল বৰাই। উল্লেখ্য যে ২০১৪ চনতে স্থাপিত বিদ্যালয়খনে প্ৰতি বৰ্ষতে আদৰণি সভাৰ লগত সংগতি ৰাখি ১৬ আগষ্ট তাৰিখে অনুষ্ঠিত কৰি অহা `অঞ্জলি – মিনতি – পুষ্পকান্তি সোঁৱৰণী আন্ত: বিদ্যালয় কুইজ প্ৰতিযোগিতাখন এইবেলিও অনুষ্ঠিত হয়॥ বিষয় শিক্ষক দুলমণি নাথৰ তত্বাৱধানত নদুৱাৰ অঞ্চলৰ বিদ্যালয়সমূহৰ পৰা অহা মুঠ ২২ টা দলৰ মাজত অনুষ্ঠিত প্ৰতিয়োগিতাখনত স্থান লাভ কৰে ক্ৰমে প্ৰথম জামুগুৰি ছিনিয়ৰ ছেকেণ্ডাৰী স্কুল, দ্বিতীয় জ্ঞানজ্যোতি জুনিয়ৰ কলেজ আৰু তৃতীয় চতিয়া উচ্চতৰ মাধ্যমিক বিদ্যালয়ে ॥ প্ৰথম স্থান প্ৰাপ্ত দলটিলৈ অঞ্জলী কলিতা সোঁৱৰণীত ৩৩০০ টকা, দ্বিতীয় দলটিলৈ মিনতী কলিতা সোঁৱৰণীত ২৭০০ টকা আৰু তৃতীয় স্থান প্ৰাপ্ত দলটিলৈ পুষ্পকান্তি দেৱীৰ সোঁৱৰণীত ২১০০ টকা আগবঢোৱা হয়॥

আনহাতে এইবৰ্ষত বিদ্যালয়খনৰ পৰা সৰ্বোচ্চ নম্বৰ লাভ কৰা নিয়ৰমণি নাথ, দ্বিতীয় স্থান পোৱা বিতু ধৰলৈ পৰিচালনা সমিতিৰ সভাপতি সুৰেন কলিতাই ৩০০০ আৰু ২০০০ টকাৰে পুৰস্কৃত কৰাৰ লগতে বিদ্যালয়খনৰ অধ্যক্ষ গোলাপ কলিতাই ইংৰাজী বিষয়ত সৰ্বোচ্চ নম্বৰ পোৱা ৰিতুবিকাশ ডেকালৈ ৩০০০ টকা আৰু দ্বিতীয় স্থান পোৱা ৰোহন শৰ্মাক ২০০০ টকাৰে অভিনন্দন জনায়॥ স্কুলখনৰ বিষয় শিক্ষয়িত্ৰী পংখী ভূঞাৰ তত্বাৱধানত বিশিষ্ট শিল্পী পূৰ্ণ নাথৰ পৰিচালনাত ছাত্ৰ-ছাত্ৰীসকলৰ গীত নৃত্যকে ধৰি বিভিন্ন সাংস্কৃতিক কাৰ্যসূচীৰে অনুষ্ঠিত হোৱা উক্ত নবাগত আদৰণি সভাখনত জামুগুৰিহাটৰ বহু কেইবাগৰাকী বিশিষ্ট ব্যক্তি উপস্থিত থকাৰ উপৰিও ছাত্ৰ-ছাত্ৰী, অভিভাৱককে ধৰি বহু সংখ্যক ৰাইজ উপস্থিত থাকে। অনুষ্ঠানটিৰ সফল ৰূপায়নত সহযোগিতা আগবঢোৱা সকলোৰে পৰিচালনা সমিতিৰ সম্পাদক চন্দমোহন নাথে শলাগ লয়।

মোডী চৰকাৰে দেশৰ এশখন মহানগৰক স্মাৰ্ট চিটী হিচাপে গঢ়ি তোলাৰ বাবে অভিলাসী আঁচনি গ্ৰহণ কৰিছিল। এই স্মাৰ্ট চিটী আঁচনিত অন্তৰ্ভুক্ত হৈছিল অসমৰ গুৱাহাটী মহানগৰ। ২০১৬ চনৰ ১৩ মে’ত আনুষ্ঠানিকভাৱে ‘গুৱাহাটী স্মাৰ্ট চিটী ডেভেলপমেণ্ট এজেঞ্চি লিমিটেড’ক কোম্পানী এক্ট ২০১৩ অন্তৰ্গত Ministry Of Corporate Affairs-এ স্বীকৃতি দিয়ে। অৰ্থাৎ তেতিয়াৰ পৰাই গুৱাহাটী স্মাৰ্ট চিটী প্ৰকল্প আৰম্ভ হয়। কেন্দ্ৰীয় চৰকাৰৰ নগৰ উন্নয়ন মন্ত্ৰালয় স্মাৰ্ট চিটী মিছনৰ নীতি নিৰ্দেশনা, পুঁজি যোগান ধৰাৰ দায়িত্বত আছে। পিছে গুৱাহাটীৰ স্মাৰ্ট চিটী প্ৰকল্পৰ নামত কেৱল কোটি কোটি টকা অপব্যৱহাৰৰ বাহিৰে ইয়াৰ পৰা ৰাইজে কোনো সুফল পোৱা নাই বুলি মন্তব্য কৰিছে ‘আপ’ অসমে। আজি গণেশগুৰিস্থিত মুখ্য কাৰ্যালয়ত আয়োজন কৰা এখন সংবাদ মেলত ‘আপ’ অসমৰ ৰাজ্যিক যুটীয়া সমন্বয়ক জিতুল ডেকাই এই সন্দৰ্ভত অধিক তথ্য সদৰী কৰি কয় যে ২০১৬ চনৰ পৰা ২০২২ চনৰ জুলাই মাহলৈ গুৱাহাটী স্মাৰ্ট চিটী প্ৰকল্পৰ নামত মুঠ ৩৬৪.২১ কোটি টকা ব্যয় কৰা হৈছে। ইয়াৰে কেন্দ্ৰৰ অংশ ১৯৬ কোটি আৰু ৰাজ্য চৰকাৰৰ অংশ হ’ল ১৬৮.২১ কোটি টকা।

কিন্তু আশ্চৰ্যৰ বিষয় এই যে স্মাৰ্ট চিটীৰ নামত যি পুঁজি ব্যয় কৰা হৈছে তাৰ সুফল ৰাইজে পোৱা নাই আৰু যিবোৰ শিতানত এই পুঁজি ব্যৱহাৰ কৰা হৈছে সেয়াও সন্দেহৰ আৱৰ্তত। তথ্য জনাৰ অধিকাৰ আইনৰ সহায়ত লাভ কৰা তথ্য অনুসৰি গুৱাহাটী স্মাৰ্ট চিটী প্ৰকল্পত পুঁজি ব্যয় শিতান দেখিলে গুৱাহাটীবাসী হতচকিত হ’ব। স্মাৰ্ট চিটী প্ৰকল্পৰ ব্ৰহ্মপুত্ৰ ৰিভাৰ ফ্ৰণ্ট প্ৰজেক্টৰ শিতানত এতিয়ালৈকে ৩৩ কোটি টকা ব্যয় কৰা দেখুওৱা হৈছে। কিন্তু কাৰ্যক্ষেত্ৰত এই টকা ক’ত কি দৰে ব্যয় হৈছে তাৰ কোনো চিন-মোকাম নাই।তদুপৰি স্মাৰ্ট চিটীৰ ২০০ কোটি টকা ইলেকট্ৰিক বাছ ক্ৰয় কৰাৰ নামত দেখুওৱা হৈছে। গুৱাহাটী পৌৰ নিগমে ২৫.৭৪ কোটি টকাৰ যি ছুপাৰ ছাকাৰ মেচিন ক্ৰয় কৰিছে সেই টকা আকৌ স্মাৰ্ট চিটী প্ৰকল্পৰহে ধন। এই খিনিতে উল্লেখ কৰাটো বাঞ্ছনীয় যে গুৱাহাটী পৌৰ নিগমে ২৫.৭৪ কোটি টকাৰে গুৱাহাটীৰ নলা চাফা কৰিবলৈ ছুপাৰ ছাকাৰ ক্ৰয় কৰাৰ পিছতো এই মেচিন চলাবলৈ যোৱা ছমাহত ইয়াত নিয়োজিত শ্ৰমিকৰ দৈনিক মজুৰিৰ বাবদ গুৱাহাটী পৌৰ নিগমে ৪২ লাখ ২২ হাজাৰ টকা ব্যয় কৰিছে। অৰ্থাৎ ২৫.৭৪ কোটি টকাৰে ক্ৰয় কৰা মেচিনেৰে নলা চাফা কৰাৰ বাবদ শ্ৰমিকক দিব লগা হৈছে এই ধন। চৰকাৰী পুঁজিৰ অপচয়ৰ আৰু ইয়াতকৈ ডাঙৰ উদাহৰণ ক’তো পোৱা নাযাব। এইখন গুৱাহাটীৰ আকৌ বিভিন্ন উপ-পথত স্মার্ট চিটী প্ৰকল্পৰ অধীনত প্ৰজেক্ট জ্যোতি আঁচনিত দহ হাজাৰ ষ্ট্ৰীটলাইট লগোৱাৰ নামত ইতিমধ্যে খৰচ কৰিছে ১৩.৯২ কোটি টকা।

ইপিনে গুৱাহাটী পৌৰ নিগমেও উপ-পথত ষ্ট্ৰীটলাইট লগোৱাৰ নামত খৰচ কৰিছে কেবা কোটি টকা। গতিকে গুৱাহাটীত ষ্ট্ৰীটলাইট জ্বলোৱা কেবাটাও বিভাগ আছে। আনহাতে স্মার্ট চিটী প্ৰকল্পৰ স্পাইন ৰোড প্ৰজেক্ট নামৰ (Spine Roads Project) আন এটা শিতানত ষ্ট্ৰীটলাইট লগোৱাৰ নামত এতিয়ালৈ মোকোলাই দিছে ২.৩৪ কোটি টকা। ঠিক এনেদৰে জজ খেলপথাৰ উন্নয়নৰ নামত ২.৬০ কোটি টকা ব্যয় কৰা হৈছে। এখন মুকলি খেলপথাৰৰ উন্নয়নৰ নামত ২.৬০ কোটি কেনেদৰে ব্যয় হ’ব পাৰে সেয়া আশ্চৰ্যৰ বিষয়। গুৱাহাটী পৌৰ নিগমক আকৌ ৩৭ লাখ স্মাৰ্ট চিটী পুঁজিৰ পৰা আদায় দিয়া দেখুওৱা ইছে কিন্তু এই পুঁজি খৰচৰ কোনো শিতান নাই। শ্ৰীমন্ত শংকৰদেৱ কলাক্ষেত্ৰৰ বাবে স্মাৰ্ট চিটী প্ৰকল্পই ২০ লাখ আৰু কলাক্ষেত্ৰত ওখ লাইট লগোৱাৰ বাবে ৭৩ লাখ টকা ব্যয় কৰা হৈছে। যি সময়ত কলাক্ষেত্ৰৰ বাবে ৰাজ্য চৰকাৰৰ সুকীয়া পুঁজি আছে সেই সময়ত কলাক্ষেত্ৰৰ নামত আকৌ স্মাৰ্ট চিটীৰ পুজি ব্যয় কৰাৰ কাৰণ বোধগম্য হোৱা নাই।একেদৰে গুৱাহাটীত ৩০টা স্মার্ট বাঅ’ টইলেট (Smart Bio Toilet)ৰ নামত ৮.৩১ কোটি আৰু ২০টা Any Time Water মেচিন স্থাপনৰ নামত ২.৫৫ কোটি টকা খৰচ কৰা হৈছে। ‘আপ’ অসমে এই সন্দৰ্ভত ক্ষেত্ৰ ভিত্তিক পৰিদৰ্শন কৰি দেখিছে যে বেছিভাগ ঠাইতে এই দুটা আঁচনিৰ অস্তিত্ব নাই অথবা বিকল। অতি আশ্চৰ্যৰ বিষয় যে গুৱাহাটীৰ সৌন্দৰ্যবৰ্ধনৰ বাবে দেৱাল অংকনৰ নামতো খৰছ কৰিছে ৯২ লাখ টকা। স্মাৰ্ট চিটিৰ আই চি চি চি (ICCC building) প্ৰজেক্টৰ নামত ১৬ লাখ টকা ব্যয় কৰা দেখুওৱা হৈছে কিন্তু এই বিল্ডিঙ (Building)টো ক’ত আছে বা কেনে ধৰণে ১৬ লাখ টকা ব্যয় কৰা হ’ল তাৰ কোনো সঠিক উত্তৰ নাই। এনেদৰে গান্ধী মণ্ডপৰ উন্নয়নৰ নামত ৩.৪১ কোটি টকা, গান্ধী মণ্ডপত ৰাষ্ট্ৰীয় পতাকা উত্তোলনৰ ব্যৱস্থাৰপনাৰ নামত ২.৫৪ কোটি টকা ব্যয় কৰাৰ লগতে শেহতীয়াকৈ গুৱাহাটীত দেখা Intergrated Traffic Management Systemৰ নামত খৰছ কৰা হৈছে ৪.৫৪ কোটি টকা। লক্ষণীয় বিষয়তো এই যে কেন্দ্ৰীয় চৰকাৰৰ নগৰ উন্নয়ন মন্ত্ৰালয়ে স্মাৰ্ট চিটীৰ বাবে আবন্টন দিয়া পুঁজিৰ ‘Head Of Account’ সলনি কৰিব নোৱাৰে। কিন্তু গুৱাহাটীত দেখা গৈছে স্মাৰ্ট চিটীৰ পুঁজি অন্য বিভাগেও ব্যৱহাৰ কৰি আছে। এতিয়া প্ৰশ্ন হ’ল ২০০ কোটি টকাৰে ইলেকট্ৰিক বাছ ক্ৰয় কৰাৰ ফলত গুৱাহাটী কেনেদৰে স্মাৰ্ট চিটী হ’ব? স্মাৰ্ট চিটীৰ নামত এনেদৰে ব্যয় হোৱা ৩৬৪ কোটি টকাৰ আঁৰত বৃহৎ কেলেংকাৰী সংঘটিত হৈছে বুলি অভিযোগ কৰি আপ অসমে স্মাৰ্ট চিটীৰ পুঁজি ব্যয়ৰ পুংখানুপুংখ হিচাপ আৰু প্ৰতিটো শিতানৰ কামৰ বৰ্তমানৰ অৱস্থাৰ তদন্ত কৰিবলৈ দাবী জনায়। আজিৰ সংবাদ মেলত আপ অসমৰ ৰাজ্যিক নেতৃত্ব ক্ৰমে লক্ষ্মীকান্ত দুবে আৰু হেমন্ত ফুকনো উপস্থিত থাকে।

ধুবুৰীত উৎকোচ লৈ গ্ৰেপ্তাৰ আৰু এজন চৰকাৰী কৰ্মচাৰী।অদম্য অভিযান, শ্ৰী যতীন্দ্ৰ নাথ ৰায়, হাদুৰহাট ধৰ্মশালাৰ ইউ ডি এ এইচ. অভিযোগকাৰীৰ চাৰ্ভিচ শ্বীট আৰু এল পি চি বদলি কৰাৰ বাবে দাবী কৰা ধন গ্ৰহণ কৰাৰ সময়তে ধুবুৰী জিলাৰ বিদ্যালয়খন আজি সঞ্চালকালয় ভিজিলেন্স এণ্ড এণ্টি কৰ্পচন অসমৰ দলে আৱদ্ধ হৈ গ্ৰেপ্তাৰ কৰিছে ৰঙা হাতেৰে।

অসম উদ্যান সমিতিৰ ২৮ তম প্ৰতিষ্ঠা দিৱসটি আজি খানাপাৰাস্হিত মূখ্য কাৰ্যালয়ত অনুষ্ঠিত হৈ যায়৷ সমিতিৰ সভাপতি ডাঃ নজৰুল কাজীয়ে পুৱা 9.00 বজাত পতাকা উত্তোলন কৰে ৷ তেওঁৰ লগত সহযোগ কৰে উপ সভাপতি দীপক সৰকাৰে ৷ বন্তি প্ৰজ্বালনকে ধৰি প্ৰসাদ বিতৰণ অনুষ্ঠান সম্পন্ন হোৱাৰ অন্তত ১১.০০ বজাৰ পৰা এখনি মুকলি সভাও অনুষ্ঠিত হৈ যায় ৷ মুকলি সভাখনত মূখ্য আকৰ্ষক হিচাপে উপস্থিত থাকে কৃষি বিভাগৰ অৱসৰ প্ৰাপ্ত সঞ্চালক তথা অসম উদ্যান সমিতিৰ আজীৱন সদস্য মঞ্জুলা মোহন কলিতা ৷ লগতে সন্মানীয় অতিথি হিচাপে উপস্থিত থাকে অসম উদ্যান সমিতিৰ প্ৰাক্তন সভানেত্ৰী ৰুৱী দত্ত বৰা ৷ উপ সভাপতি দীপক সৰকাৰ, যুটীয়া সাধাৰণ সম্পাদক এনামুৰ ৰহমান বিলায়েত হুছেইন খন্দকাৰ৷

ৰিণী শইকীয়া , পুষ্পা ৰাজখোৱা ড০ নিজৰা জান্নাত সাংবাদিক তথা আজীৱন সদস্য বদৰুজ্জামান আখতাৰকে ধৰি অন্যান্য বহু কেইগৰাকী বিশিষ্ট ব্যক্তিসকল ৷ এই মুকলি সভাত বহু কেইগৰাকীমান বিশিষ্ট ব্যক্তিয়ে মূল্যবান দিহাপৰামৰ্শৰে অসম উদ্যান সমিতিৰ জৰিয়তে অসমৰ কৃষিজীৱী তথা উদ্যান প্ৰেমী ৰাইজক উৎসাহিত কৰাৰ বাবে কাম কৰি যাব বুলি আহ্বান জনায়৷ উল্লেখ্য যে ১৯৯৪ চনত প্ৰতিষ্ঠা হোৱা এই সমিতিখনে ৰাষ্ট্ৰীয় আৰু আন্তৰাষ্ট্ৰীয় পৰ্যায়ত কৃষি উদ্যান শস্যৰ ব্যাপক প্ৰচাৰ আৰু প্ৰসাৰৰ কাম কৰি আহিছে৷ খানাপাৰাস্হিত ভেটেৰীনেৰী খেল পথাৰত কৃষি উদ্যান শস্যৰ মেলা অনুষ্ঠিত কৰি বিশ্বদৰবাৰত অসমৰ কৃষি জগতখনক পৰিচিত কৰাবলৈ সক্ষম হৈছে ৷ অনাগত দিনতো এই সমিতিখনে কৃষি বিভাগৰ সৈতে জড়িত হৈ কৃষকৰ আৰ্থ – সামাজিক উন্নয়নৰ বাবে কৃষি উদ্যান শস্য প্ৰদৰ্শনী পাতিব বুলি আজিৰ প্ৰতিষ্ঠা দিৱসৰ মুকলি সভাত সিদ্ধান্ত গ্ৰহন কৰে ৷ সাধাৰণ সম্পাদক উপেন ভৰালীয়ে জনোৱামতে আগন্তুক ১১ চেপ্তেম্বৰ ২০২২ ত সাধাৰণ সভাখন অনুষ্ঠিত কৰা হ’ব।