বোকাখাত প্ৰয়াস অধ্যয়ন চক্ৰ অন্যতম নিবেদন মহুৰামুখ জাতীয় বিদ্যালয় তথা শিল্পী মোহিনী ৰাজকুমাৰী ক্ষেত্ৰত গীত-মাতৰ এদিন আৰু বিজ্ঞান প্ৰদৰ্শনি আয়োজন কৰা হয়।বিদ্যালয়ৰ জেষ্ঠ শিক্ষক জীতেন দত্তই আঁত ধৰা প্ৰথম কাৰ্যসূচী শিল্পী মোহিনী ৰাজকুমাৰী প্ৰতিমূৰ্ত্তিত বন্তি প্ৰজ্বলন কৰে সাংস্কৃতিক কৰ্মী তথা বিদ্যালয়ৰ অভিভাৱক স্বৰূপ প্ৰাক্তন ভাৰতীয় সেনা বাহিনীৰ জোৱান লৱন ফুকনে আৰু বিজ্ঞান প্ৰদৰ্শনীৰ দ্বাৰ উন্মোচন কৰে বুধবাৰী বালিকা উচ্চ বুনিয়াদী বিদ্যালয়ৰ প্ৰধান শিক্ষক দুলৰ্ভ ডেকাই।দ্বাৰ উদ্মোচন কৰি ডেকাই ছাত্ৰ-ছাত্ৰীসকলৰ উদ্দেশ্যে কয় যে ছাত্ৰ অৱস্থাপৰাই বিজ্ঞান শিক্ষা প্ৰয়োজনীয়তা সম্পৰ্কে সজাগ আৰু সচেতনতাৰ হোৱাটো অত্যন্ত জৰুৰী আৰু বাস্তৱ জীৱনৰ লগত ইয়াৰ সফল প্ৰয়োগ কৰিলে সমাজ তথা দেশ  উন্নতিপথত আগুৱাব পাৰি।

মহুৰামুখ জাতীয় বিদ্যালয়ে এই ধাৰা ২০১৫ চনৰ পৰাই অব্যাহত ৰখা বাবে তেখেতে বিদ্যালয়ৰ শিক্ষকসকলক প্ৰশংসা কৰে।বিজ্ঞান প্ৰদৰ্শনিত ১১ টা প্ৰকল্পত মুঠ ৩৫ গৰাকী ছাত্ৰ-ছাত্ৰীয়ে অংশগ্ৰহণ কৰে।বিজ্ঞান প্ৰদৰ্শনীৰ তত্ত্বৱধায়কদ্বয় অনুৰাজ লয়িং আৰু দীপশিখা দৈমাৰী বড়িৰ প্ৰচেষ্টাক অভিভাৱক তথা উপস্থিত ৰাইজে শলাগ লয়।বিজ্ঞান প্ৰদৰ্শনী পিছতেই গীত-মাতৰ এদিন অনুষ্ঠানৰ মঞ্চ মুকলি কৰে বিদ্যালয়ৰ প্ৰধান তথা সমগ্ৰ মহুৰামুখ অঞ্চলৰ তিনিটা প্ৰজন্মক শিক্ষা প্ৰদান কৰা ইন্দ্ৰেশ্বৰ বৰুৱাই।বৰুৱাই ভাষণত কয় “অসমত মাতৃভাষা সংকটৰ সময়ত চৰকাৰী বিদ্যালয়ৰ সমান্তৰালকৈ অসম জাতীয় বিদ্যালয়ৰ পৰিয়ালবৰ্গই ভাষাৰ চৰ্চা লগতে কৃষ্টি-সংস্কৃতি ধৰি ৰখা প্ৰয়াস কৰিছে তাৰ ফলশ্ৰুতিতেই আজি ২০১৫ চনৰ পৰাই মহুৰামুখ জাতীয় বিদ্যালয়ে কণ-কণ ছাত্ৰ-ছাত্ৰীসকলক বৈজ্ঞানিক ভাৱে সাৰ -পানী যোগান ধৰি আছে।”গীত-মাতৰ এদিন অনুষ্ঠানটোৰ পৰিচালনা কৰে বিদ্যালয়ৰ অসমীয়া বিভাগৰ শিক্ষয়িত্ৰী প্ৰতিমা ভৰালী আৰু প্ৰাক্তন সংগীত শিক্ষয়িত্ৰী সন্ধানী ৰাজখোৱা গগৈয়ে।অনুষ্ঠানত অংকুৰ প্ৰাক-প্ৰাথমিকৰ সকলো ছাত্ৰ-ছাত্ৰীয়ে ভংগিমা গীত ,কবিতা আবৃত্তিত অংশগ্ৰহণ কৰে আৰু প্ৰাক-প্ৰাথমিকৰ ছাত্ৰ-ছাত্ৰীসকলক পৰিচালনা কৰে শিক্ষয়িত্ৰী ৰেখা দত্ত দুৱৰা আৰু ঊষা বৰুৱাই।অনুষ্ঠানত বিশিষ্ট অতিথি হিচাপে সাংস্কৃতিক কৰ্মী পৱন গগৈ উপস্থিত থাকে। বিজ্ঞান প্ৰদৰ্শনি আৰু গীত-মাতৰ এদিন অনুষ্ঠানৰ পিছতেই বিদ্যালয়ৰ বছেৰেকীয়া পৰীক্ষা ফলাফল ঘোষণা কৰা হয় আৰু বিদ্যালয়ত এশ শতাংশ  উপস্থিত থকা দ্বিতীয় শ্ৰেণী ছাত্ৰ শশাঙ্কৰ পাঠৰীক এখন গ্ৰন্থৰে সম্বৰ্ধনা জ্ঞাপন কৰে। অনুষ্ঠানৰ শেষত বিদ্যালয়ৰ সম্পাদকে শলাগৰ শৰাই আগবঢ়াই আৰু  সকলো ছাত্ৰ-ছাত্ৰী আৰু অভভিভাৱকসকলে ৰাষ্ট্ৰীয় সংগীতেৰে সামৰণি মাৰে।