কাজিৰঙা ৰাষ্ট্ৰীয় উদ্যানত সোনকালেই আৰম্ভ হ’ব গঁড় গণনা। জানিবলৈ পোৱা মতে, চলিত মাহৰ ২৫, ২৬ আৰু ২৭ তাৰিখে কাজিৰঙা ৰাষ্ট্ৰীয় উদ্যানত গঁড় গণনাৰ সম্ভাৱনা আছে। এই সম্পর্কে কাজিৰঙাৰ কঁহৰাত অৱস্থিত বন বিভাগৰ মহিমিৰী আলোচনা গৃহত কাজিৰঙা ৰাষ্ট্ৰীয় উদ্যানৰ বন সংমণ্ডল বিষয়াই শেহতীয়াকৈ বনাঞ্চলিক বিষয়া, গৱেষণা বিষয়া আদিৰ সৈতে এক আলোচনাত মিলিত হয়। আলোচনাত গঁড় গণনাৰ বাবে উক্ত সম্ভাব্য দিন স্থিৰ কৰিছে যদিও কাজিৰঙা ৰাষ্ট্ৰীয় উদ্যান তথা টাইগাৰ ৰিজাৰ্ভৰ সঞ্চালক আৰু ৰাজ্যখনৰ বন বিভাগৰ উচ্চপদস্থ বিষয়াৰ অনুমতি পোৱাৰ পিছতহে তাৰিখ চূড়ান্ত কৰা হ’ব বুলি উদ্যান কর্তৃপক্ষই মত প্রকাশ কৰিছে।

উল্লেখযোগ্য যে কাজিৰঙা ৰাষ্ট্ৰীয় উদ্যানত শেহতীয়াকৈ ২০১৮ চনত কৰা গঁড় গণনা মতে ২,৪১৩টা গঁড় পোৱা গৈছিল। এইবাৰো গঁড়ৰ সংখ্যা বৃদ্ধি পোৱাৰ সম্ভাৱনা আছে বুলি বন বিষয়াই আশা কৰিছে। উল্লেখযোগ্য যে গঁড় গণনাৰ পূৰ্বে উদ্যানখনৰ অৰণ্য বিশেষকৈ খেৰনি, ইকৰানি, নদী, বিলৰ পাৰ আদি এলেকা অর্থাৎ যিবোৰ সম্ভাব্য স্থানত গঁড়ে বিচৰণ কৰি থাকে তেনে এলেকাবোৰত জুই দি পৰিষ্কাৰ কৰাটো অতি প্রয়োজন। তেতিয়াহে গণনাকাৰীসকলে গঁড়ক প্রত্যক্ষ কৰি গণনা কৰাত সুবিধা হয়। ইতিমধ্যে ৰাষ্ট্ৰীয় উদ্যানখনৰ কঁহৰা, বাগৰি, অগৰাতলি, বুঢ়াপাহাৰ আদি বনাঞ্চলৰ নির্বাচিত অৰণ্যত বনকৰ্মীয়ে জুই দিয়া আৰম্ভ কৰিছে। কাজিৰঙা ৰাষ্ট্ৰীয় উদ্যানৰ গৱেষণা বিষয়া ৰবীন্দ্ৰ শৰ্মাই জানিবলৈ দিয়া মতে, এইবাৰ কাজিৰঙাৰ অৰণ্যত জুই দিয়া হৈছে যদিও ঘাঁহনি, ইকৰানি আদি এতিয়ালৈকে ভালকৈ জ্বলা নাই। ইকৰানি আৰু ঘাঁহনি বর্তমান কেঁচা হৈ থকাৰ লগতে বতাহ পর্যাপ্ত বলা নাই। যাৰ ফলত জুইৰ প্ৰকোপ কম হৈ আছে।

উল্লেখযোগ্য যে কাজিৰঙা ৰাষ্ট্ৰীয় উদ্যানত ১৯৫০ চনৰ পৰাই অৰণ্যত জুই দিয়া যাক ইংৰাজীত “কণ্ট্ৰল বার্নিং” আৰম্ভ কৰা হৈছিল। প্ৰথম অৱস্থাত ৰাষ্ট্ৰীয় উদ্যানখনৰ বাগৰি বনাঞ্চলৰ অধীনত কুঠৰীৰ এলেকাত অৰণ্যত পৰীক্ষামূলকভাৱে জুই দিয়া আৰম্ভ কৰা হৈছিল আৰু পৰৱৰ্তী কালত ৰাষ্ট্ৰীয় উদ্যানৰ আটাইকেইটা বনাঞ্চলতেই এই ব্যবস্থা প্রয়োগ কৰা হয় বিশেষকৈ উদ্যানখনৰ তৃণভোজী বন্যপ্ৰাণীৰ কাৰণে। তৃণভোজী বন্যপ্ৰাণীৰ সংখ্যা দিনক দিনে উদ্যানখনত বৃদ্ধি পাই থকাত ঘাঁহনি এলেকা বহু প্ৰয়োজন হৈ পৰিছে। উল্লেখযোগ্য যে কাজিৰঙাত বহু ঘাঁহনি এলেকা বর্তমান কাঠনিলৈ পৰিণত হৈ পৰিছে। এইটো তৃণভোজী প্ৰাণীৰ কাৰণে শুভ লক্ষণ নহয়। উদ্যান কর্তৃপক্ষই গৱেষণাৰ জৰিয়তে কেনেকৈ কাঠনি এলেকা হ্ৰাস কৰি ঘাঁহনি এলেকা বৃদ্ধি কৰিব পাৰি তাৰ ব্যৱস্থা সময় থাকোঁতেই নল’লে ভৱিষ্যতে ভীষণ সমস্যাৰ সৃষ্টি হোৱাৰ সম্ভাৱনা আছে বুলিও প্রাণীবিদে মতপ্রকাশ কৰিছে।

গুৱাহাটী – উত্তৰ গুৱাহাটী ৰ’পৱে সেৱা বিগত ২৮ ফেব্ৰুৱাৰীৰ পৰা অহা ১০ মাৰ্চলৈ বন্ধ হৈ থাকিব । জানিব পৰা মতে বাৰ্ষিক মেৰামতিৰ বাবে বন্ধ বন্ধ ৰখা হৈছে এই সেৱা । প্ৰতি বছৰে পৰিচালনাৰ দায়িত্বত থকা কম্পেনীয়ে বছৰেকীয়া মেৰামতি কৰি অহাৰ উপৰিও সপ্তাহত এদিন কাৰিকৰী দিশ চোৱা চিতা কৰে বুলি জানিব পৰা গৈছে । পুৰ্বৰ সমীৰ দামোদৰ ৰূপৱেৰ পৰিবৰ্তে ঊষা ব্ৰেকো কম্পেনীক এইবাৰ দিয়া হৈছে ৰ’পৱে পৰিচালনাৰ দায়িত্ব । আৰম্ভণিৰ পৰা নিৰ্মাণ সংস্থা সমীৰ দামোদৰ ৰ’পৱে বাৰ্ষিক চুক্তিত এই ৰ’পৱে সেৱা চলাই আহিছিল । উল্লেখ্য যে বিগত বৰ্ষত ৰ”পৱেৰ নিয়মীয়া পযীক্ষণৰ পিছতো চলমান চকা ক্ষয় হোৱা ধৰিব পৰা নাছিল ।  কথমপি দুৰ্ঘটনাৰ পৰা ৰক্ষা পৰা ৰ’পৱেৰ এই কথাক কতৃপক্ষই কণ্ট্ৰ’ল পেনেলৰ বিজুতি বুলিহে প্ৰচাৰ চলাইছিল । ৰ’পৱে সেৱা বন্ধৰ আৰত আছে নেকি আন কোনো গোপন ৰহস্য, সম্প্ৰতি চৰ্চাৰ বিষয় হৈ পৰিছে ।  যাৰ বাবে  ৰ”পৱে সেৱা বাৰ্ষিক মেৰামতিৰ বাবে ২৮ ফ্ৰেবুৱাৰীৰ পৰা  ১০ মাৰ্চলৈ ৰ’পৱে সেৱা বন্ধৰ চাইন ব’ৰ্ড আৰি টাৰ্মিনেলত সংবাদ মাধ্যমৰো প্ৰবেশ নিষেধ কৰিছে ।

যাতে সংবাদ মাধ্যমে ভিতৰ চ’ৰাৰ খবৰ অথবা গোপন ৰহস্য প্ৰকাশ কৰিব নোৱাৰে বুলি বু বা চলিছে উত্তৰ গুৱাহাটীত । উল্লেখ্য যে ২০০৭ চনত প্ৰয়াত মুখ্যমন্ত্ৰী তৰুণ গগৈ আৰু গুৱাহাটী উন্নয়ন মন্ত্ৰী ড০ হিমন্ত বিশ্ব শৰ্মাৰ কাৰ্যকালত গুৱাহাটী উত্তৰ গুৱাহাটী সংযোগী ৰ’পৱেৰ শিলান্যাস কৰিছিল । শিলান্যাসৰ পিছত কিছুদিন  নিৰব হৈ পুণৰ ২০০৯ চনত গুৱাহাটী উত্তৰ গুৱাহাটীৰ দুইপাৰে দুটা খুঁটা নিৰ্মাণ কৰি ব্যয় কৰিছিল ২৬ কোটি টকা । পিছে ব্লেক লিষ্টেট সমীৰ দামোদৰ ৰ”পৱেৱে গুৱাহাটী দিশত স্থাপন কৰা খুঁটা নিৰ্মাণতে বেঁকা হৈ ওলমি ৰৈছিল । ইয়াৰ পিছত ৰ’পৱেৰ কামৰ নাম গোন্ধ নথকাত তদানিন্তন গুৱাহাটী উন্নয়ন মন্ত্ৰী যথেষ্ট সমালোচনাৰ সন্মুখীন হৈছিল । ৰাজকোষৰ ধনৰ শৰাধ পাতি পকেট গৰম কৰাৰ মুকলি চৰ্চা হৈছিল । ইয়াৰ পিছত ৰ”পৱেৰ বৃহৎ কেলেংকাৰী গাপ দিয়াৰ উদ্দেশ্যে পুৰাতাত্বিক সমলৰ ওপৰত আঘাট হানাৰ এক গোছৰ ৰজুৰে বিষয়টি আদালতৰ মজিয়াত ওলমাই ৰখা হৈছিল বুলি কিছুসংখ্যক লোকে অভিযোগ তুলিছিল । পৰবৰ্তী ২০১৮ চনত পুণৰ ৰ’পৱেৰ কাম আৰম্ভ কৰি ৫৬ কৌটিটকা ব্যয়ৰে সমীৰ দামোৰ নামৰ বহুজাতিক প্ৰতিস্থানে ২০২০ চনৰ ২৪ আগষ্টত মুকলি কৰে গুৱাহাটী ৰ’পৱে সেৱা । ৰ’পৱে সেৱা মুকলিৰ পিছত গুৱাহাটী উত্তৰ গুৱাহাটীৰ যাতায়ত ব্যবস্থাত কিছু সকাহ দিব বুলি আশা কৰা হৈছিল যদিও সাধাৰণ লোকৰ যাতায়ত ব্যবস্থাতে নহয় ব্যবসায়ীক দিশতো বিশেষ সফল নহল এই ৰ’পৱে সেৱা ।

এতিয়া গুৱাহাটী উন্নয়ন প্ৰাধিকৰণৰ তদাৰকত থকা(GMDA) বিভাগীয় বিষয়া অভিযন্তাৰ চৰম দুৰ্নীতি তথা বিত্তীয় কেলেংকাৰীক গাপ দিয়াৰ বাবেই সমীৰ দামোদৰ  প্ৰতিস্থানক বিদায় দি এইবাৰ  অখ্যাত উষা ব্ৰেকো লিমিটেড কোম্পানীক ৰ’পৱে সেৱাৰ কামকাজ গতাই হাত সাৰিব বিছাৰিছে বুলি জনৈক বড়া উপাধিৰ এগৰাকী অভিযন্তাৰ বিৰুদ্ধে উঠিব লৈছে নানা অভিযোগ । কেইবাবাৰো ৰ’পৱে ব্যয়ৰ ওপৰত প্ৰশ্ন উঠাত তদন্তৰ প্ৰক্ৰিয়া আৰম্ভ নহওতেই সমাপ্ত হৈ আছে বুলিও উঠিছে ৰাইজৰ অভিযোগ। যাৰবাবে ৰ’পৱেৰ সকলো দিশ সামৰি নিৰপেক্ষ তদন্ত হলে ৰৌ বৰালি জালত পৰিব বুলি সচেতন ৰাইজে গুনাগঠা কৰি শীঘ্ৰেই ইয়াৰ তদন্ত কৰি ৰ’পৱেক লৈ চলি থকা বৃহৎ দুৰ্নীতিৰ ওপৰত ব্যৱস্থা গ্ৰহণ কৰি ৰ’পৱে সেৱা সুচল কৰি তুলিবলৈ বৰ্তমানৰ গুৱাহাটী উন্নয়ন মন্ত্ৰীৰ লগতে কামৰূপ জিলা আৰু কামৰূপ মহানগৰ জিলাৰ উপায়ুক্ত দুয়োগৰাকীক উত্তৰ গুৱাহাটী বাসী ৰাইজে আহ্বান জনাইছে।