কামৰূপ জিলাৰ বকো সমষ্টিৰ টুপামাৰী আৰক্ষী চকীৰ অন্তৰ্গত বদলা পথাৰ গাৱৰ এটা পৰিয়াললৈ বিদেশী ন্যায়াধীকৰণৰ এটা ৰায়দানে নমাই আনিছে ঘোৰ অমানিশা। জানিব পৰা মতে বদলা পথাৰ গাওঁৰ ৪৭ বছৰীয়া সমেজ আলী নামৰ লোক জনক যোৱা  ৫ জানুৱাৰীত বিদেশী ন্যায়াধীকৰণে বিদেশী ঘোষণা কৰি প্ৰেৰণ কৰে গোৱালপাৰা জিটেনশ্বন কেম্পলৈ। উক্ত ঘটনাই বৃহত্তৰ অঞ্চলটোত সৃষ্টি হৈছে তীব্ৰ চাঞ্চল্য। পৰিয়ালৰ মতে সমেজ আলী এজন বৈধ ভাৰতীয় নাগৰিক, সকলো বৈধ নথি পত্ৰ থকা স্বত্বেও অন্যায় ভাৱে সমেজ আলীক বিদেশী সজোৱাৰ অভিযোগ উত্থাপন কৰিছে ৰাইজ তথা ভোক্তভোগী পৰিয়ালৰ লোকে। সমেজ আলীৰ পত্নীয়ে প্ৰকাশ কৰা মতে বদলা পথাৰ গাৱৰ হাচেন আলীৰ পুত্ৰ  সমেজ আলী (৪৭) বিগত ২০০৪ চনত গুৱাহাটীত দিন হাজিৰা কাম কৰিবলৈ গৈছিল তাতে সীমান্ত আৰক্ষীয়ে তেওঁক সোধপোচৰ বাবে  নাম ঠিকনা লিখি লৈছিল।

ইমানতে সকলো ঠিকেই আছিল, পিছত ২০১৫ চনত তেওঁৰ নামত বিদেশী বুলি গোচৰ পঞ্জীয়ন হৈছিল আৰু সেই গোচৰৰ ভিত্তিত ৫ জানুৱাৰী তাৰিখে উপস্থিত হৈছিল বিদেশী ন্যায়াধীকৰণ আদালতত। তাতেই তেওঁক বিদেশী ঘোষণা কৰি বিদেশী ন্যায়াধীকৰণে প্ৰেৰণ কৰে ডিটেনশ্বন কেম্পলৈ। এতিয়া সচেতন ৰাইজৰ মাজত প্ৰশ্ন উদ্ৰেক হৈছে  পিতৃৰ ১৯৫১ চনৰ এন আৰ চি ১৯৬৬ চনৰে পৰা ভোটাৰ তালিকাত  নাম সন্নিবিষ্ট হৈ থকাৰ বিপৰীতে সমেজ আলীয়েও  ১৯৯৭ চনৰে পৰা সাব্যস্ত কৰি আছে ভোটদান। ইয়াৰ ওপৰিও তেওঁৰ আছে ভোটাৰ কাৰ্ড, পেন কাৰ্ড আধাৰ কাৰ্ড আদি বিভিন্ন বৈধ প্ৰমাণ পত্ৰ। তেনে অৱস্থাত কিহৰ ভিত্তিত বিদেশী ন্যায়াধীকৰণে বিদেশী সজাই তেওঁক ডিটেনশ্বন কেম্পলৈ প্ৰেৰণ কৰিলে তাকলৈ ৰাইজে শুকুৰবাৰে  সাৱস্ত্য কৰে উত্তাল প্ৰতিবাদ। বিনাচৰ্তে সমেজ আলীক মুক্তিৰ দাবী জনায় ৰাইজ তথা পৰিয়ালৰ লোকে।

যি সময়ত একাংশ শিক্ষিত নিবনুৱাই চাকৰি  বিচাৰি হাবাথুৰী খাই ফুৰিছে, কিম্বা পেটৰ তাৰনাত বহিৰাজ্যলৈ গৈ কঠোৰ পৰিশ্ৰম কৰি আছে। থিক তেনে সময়তে ওদালগুৰি জিলা খৈৰাবাৰী কুহিয়াৰকুছি মালদাংপাৰা গাঁ‌ৱৰ কেইজনমান  যুৱকে সান নামৰ এটা NGO গঠন কৰি কোনোধৰণৰ চৰকাৰী সাহায্য নোহোৱাকৈ বিগত কেইবা বছৰ ধৰি খেতি কৰি উপাৰ্জনৰ বাট মুকলি কৰি আহিছে লগতে আন কেইজনমান যুৱককো নিয়োজিত কৰি অঞ্চলটোত স্বাৱলম্বীতাৰ এক নিদৰ্শন দাঙি ধৰিছে।

সেয়েহে সান NGO য়ে অন্য বছৰৰ দৰে এইবছৰো প্ৰায় ৮০ বিঘাৰো অধিক সৰিয়হৰ খেতি কৰি স্বাৱলম্বী হোৱাৰ দিশে গতি কৰিছে। তেওঁলোকে কয় যে বিচাৰিব জানিলে নিজৰ ঠাইতে সোণ পোৱা যায় যাৰ পৰিপেক্ষিতত তেখেত সকলে এইবছৰৰ ৫০০-কুইন্টেলৰো অধিক সৰিয়হ উৎপাদন কৰাৰ আশা প্ৰকাশ কৰিছে, সেয়েহে বৰ্তমান সময়ত চাকৰী বিচাৰি বহিৰাজ্যলৈ যোৱাত কৈ নিজৰ ঠাইতে ভালদৰে খেতি কৰি স্বাৱলম্বী হ’ব পাৰে সেয়েহে সকলোৱে  কৰ্মমুখি হওক বুলি আহ্বান জনাইছে।

নগাঁও চহৰৰ পাৰ্শ্বৱৰ্তী শেনচোৱা নিৱাসী শিক্ষাবিদ, জ্যেষ্ঠ অধিবক্তা, সমাজকৰ্মী শুকুৰাম দাস (৮১)ৰ শুকুৰবাৰে পুৱা নিজ বাসগৃহত পৰলোকপ্ৰাপ্তি ঘটে । শুকুৰবাৰে পুৱা হঠাৎ অসুস্থ হৈ পৰা শুকুৰাম দাসে আকস্মিকভাৱে মৃত্যুক সাবটি লয়। শেনচোৱা অঞ্চলৰ প্ৰতিটো সামাজিক কামত নেতৃত্ব প্ৰদান কৰা শুকুৰাম দাসে শেনচোৱা বালক বিদ্যালয়ৰ পৰা প্ৰাথমিক শিক্ষা গ্ৰহণ কৰি বেবেজীয়া পণ্ডিত কনক শৰ্মা উচ্চতৰ মাধ্যমিক বিদ্যালয়ৰ পৰা ১৯৫৯ চনত প্ৰৱেশিকা পৰীক্ষাত সুখ্যাতিৰে উত্তীৰ্ণ হৈ নগাঁও মহাবিদ্যালয়ৰ পৰা ১৯৬১ চনত পি. ইউ. পাছ কৰে। আনহাতে প্ৰৱেশিকা পৰীক্ষাত উত্তীৰ্ণ হোৱাৰ সমান্তৰালভাৱে বৃহত্তৰ শেনচোৱা অঞ্চলক শিক্ষাৰ ক্ষেত্ৰত আগবঢ়াই নিয়াৰ ক্ষেত্রত তেওঁ মনোনিৱেশ কৰে আৰু শেনচোৱা আনন্দৰাম বৰকাকতী উচ্চ ইংৰাজী বিদ্যালয়ৰ প্ৰতিষ্ঠাপক প্ৰধান শিক্ষক হিচাপে দুবছৰ কাৰ্যনিৰ্বাহ কৰে। ইয়াৰ পিছতে তেওঁ ধুবুৰীৰ ষ্টেটিক্স এণ্ড ইকনমিক্স বিভাগৰ চাকৰিত যোগদান কৰে আৰু ধুবুৰী কলেজৰ পৰা ১৯৬৫ চনত স্নাতক ডিগ্ৰী লাভ কৰে।

পৰবৰ্তী সময়ত উক্ত চাকৰি ইস্তফা দি তেওঁ পুনৰ নগাঁৱৰ নিজা ঘৰলৈ ঘূৰি আহে। আনহাতে বিগত ৫০ বছৰে এক বিশেষ চিকিৎসা পদ্ধতিৰে দুৰাৰোগ্য কৰ্কট ৰোগত আক্ৰান্ত ৰোগীক চিকিৎসা প্ৰদান কৰি অহা শুকুৰাম দাসৰ চিকিৎসাত ভালে সংখ্যক কৰ্কট ৰোগীয়ে আৰোগ্য লাভ কৰে বুলি জানিব পৰা গৈছে ।অতি সম্প্ৰতি নেচনেল বায়ডাইভাৰচিটি অথ’ৰিটিয়ে দাসৰ এই বিশেষ চিকিৎসা পদ্ধতিক স্বীকৃতি প্ৰদান কৰে বুলি জানিব পৰা গৈছে ।আনহাতে ১৯৮৮ চনত দাসে নগাঁও আইন মহাবিদ্যালয়ৰ পৰা সুখ্যাতিৰে আইনৰ ডিগ্ৰী লাভ কৰে। আনহাতে ১৯৭২ চনৰ পৰা কৰ্কট ৰোগৰ চিকিৎসা প্ৰদান কৰি লাভ কৰা অভিজ্ঞতাখিনিক লৈ শুকুৰাম দাসে “কৰ্কট ৰোগৰ ঔষধ আৱিষ্কাৰ?” শীৰ্ষক এখন গ্ৰন্হ লিখি উলিয়ায়।

৯ জানুৱাৰীত উক্ত গ্ৰন্থখন দিছপুৰ প্ৰেছ ক্লাৱত উন্মোচন কৰাৰ কথা। দুখৰ বিষয় যে শুকুৰবাৰে পুৱা আকস্মিকভাৱে দাসে মৃত্যুক সাবটি লোৱাত তেওঁৰ সেই ইচ্ছা অসম্পূৰ্ণ হৈ ৰ’ল। আনহাতে দাসৰ মৃত্যুৰ বাবে গ্ৰন্হখনৰ উন্মোচন স্হগিত ৰখা বুলি তেওঁৰ পৰিয়ালৰ লোকে জানিবলৈ দিয়ে ।পৰবৰ্তী সময়ত গ্ৰন্থখন পৰিয়ালৰ লোকে উন্মোচন কৰিব বুলিও জনায় । নগাঁৱৰ বিভিন্ন সামাজিক অনুষ্ঠানৰ জড়িত দাসক অসম সাহিত্য সভাই ‘নিজৰ দিন’ উপলক্ষ্যে দাসক ব’হাগৰ ওলগ জনায়। শুকুৰাম দাসৰ মৃত্যুত নগাঁও বাৰ এছচিয়েচন, নগাঁও জিলা সাহিত্য সভা, নগাঁও প্ৰেছ ক্লাৱ, অৰুণোদয় সাহিত্য চ’ৰা, শেনচোৱা আঞ্চলিক উৎসৱ উদযাপন সমিতি, ৰণাংগন প্ৰকাশন, ক্ৰান্তিকাল প্ৰকাশনৰ উপৰি নগাঁও সদৰ সমষ্টিৰ বিধায়ক ৰূপক শৰ্মাই শোক প্ৰকাশ কৰে । মৃত্যুৰ সময়ত জ্যেষ্ঠ অধিবক্তা দাসে পত্নী, জ্যেষ্ঠ পুত্ৰ তথা ৰণাংগন বাৰ্তালোচনী আৰু সপ্তাহিক কাকতৰ সম্পাদক মিণ্টু দাসৰ লগতে এগৰাকী কন্যা আৰু এজন পুত্ৰ,বোৱাৰী, নাতি অসংখ্য আত্মীয়ক ইহ সংসাৰত এৰি থৈ যায়।