আমিৰ খান-নামেই যাৰ পৰিচয়। চলচিত্ৰপ্ৰেমীৰ মাজত এইগৰাকী তাৰকা অভিনেতাৰ বিষয়ে নুশুনা মানুহ নাই বুলিয়েই ক’ব পাৰি। শত-সহস্ৰ গুণমুগ্ধ ৰৈ থাকে তেওঁৰ ছবিৰ বাবে। দীৰ্ঘ বিৰতিৰ অন্তত প্ৰিয় অভিনেতাজনৰ পৰা অনুৰাগীয়ে বিচাৰিছে নতুন ছবি। পাছে নতুন ছবি উপহাৰ নিদিলেও অভিনেতাজনে ৰহস্যভেদ কৰিছে আন এক সত্যৰ। আজিৰ পৰা ৭বছৰ পূৰ্বে মুক্তি পোৱা এখন ছবিৰ নেপথ্যৰ কাহিনী প্ৰকাশ কৰিছে মুকলিকৈ। উল্লেখ্য যে, ৰাজকুমাৰ হিৰাণীৰ দ্বাৰা পৰিচালিত ‘পিকে’ চলচ্চিত্ৰখনে ২০১৪ চনত মুক্তিলাভ কৰিছিল। বলীউডত ‘মিষ্টাৰ পাৰফেক্টছ’নিষ্ট’ খ্যাত আমিৰ খান অভিনীত যিকোনো চলচ্চিত্ৰৰ চৰিত্ৰতে গভীৰভাৱে লীন যায় তেওঁ।

ছবিৰ চৰিত্ৰৰ সৈতে খাপ খুৱাবলৈ যাওঁতে কেতিয়াবা নিৰ্দিষ্ট চৰিত্ৰটোৰ বাবে ওজন হ্ৰাস কৰিছে আৰু কেতিয়াবা ওজন বৃদ্ধি কৰিছে অভিনেতাজনে। অগণিত ছবিৰ লেখীয়া আমিৰ খান অভিনীত জনপ্ৰিয় ছবি ‘পিকে’ত তেওঁক দেখিবলৈ পোৱা গৈছিল এলিয়েনৰ চৰিত্ৰত। জানিবলৈ পোৱা মতে, এই ছবিখনৰ বাবে তেওঁ দৈনিক ১০০ খনতকৈ অধিক পাণ খাইছিল। এই বিষয়ে সোধাত ‘মিষ্টাৰ পাৰফেক্টছ’নিষ্ট’ আমিৰে কয়, ‘মই পাণ খোৱাত ইমান অভ্যস্ত নহয়। মাজে সময়ে পান খাওঁ। তথাপি এইখন ছবিৰ বাবে মই অধিক পাণ খাবলগীয়া হৈছিল।’ তেওঁ লগতে কয়, ‘ মই ভাবিছিলো যে, প্ৰতিটো দৃশ্যৰ বাবে ৫০-৬০খন পাণ খাবলগীয়া হ’ব পাৰে।

কিন্তু ছবিৰ পৰিচালকে আৰু অধিক খাবলৈ কৈছিল।’ সেইবাবে আমিৰ খানে ১০০খনতকৈও অধিক পাণ খাবলগীয়া হৈছিল। উল্লেখ্য যে, ‘পিকে’ৰ ছেটত এজন পানৱালাও আছিল। প্ৰতিটো দৃশ্যৰ বাবে এখন সতেজ পাণ খাবলগীয়া হৈছিল অভিনেতাজনে। ইয়াৰোপৰি, শ্বুটিং আৰম্ভ কৰাৰ পূৰ্বে, মুখৰ ভিতৰত কিম্বা ওঁঠত সুন্দৰ ৰং পাবলৈ অতিকমেও ১০-১২খন পাণ খাইছিল আমিৰে। ৰাজকুমাৰ হিৰাণীৰ দ্বাৰা পৰিচালিত এই ছবিখন যুটীয়াভাৱে হিৰাণী আৰু বিধুবিনোদ চোপ্ৰাই প্ৰযোজনা কৰি উলিয়াইছিল। স্মৰ্তব্য যে, ছবিখনত অনুষ্কা শৰ্মা, সুশান্ত সিং ৰাজপুত, সঞ্জয় দত্ত, বোমান ইৰাণী আৰু সৌৰভ শুক্লাৰ দৰে বলীউডৰ জনপ্ৰিয় অভিনেতা-অভিনেত্ৰীয়ে অভিনয় কৰিছিল। শেহতীয়াকৈ অভিনেতাজনে ব্যক্ত কৰা নেপথ্যৰ গল্পকথাই আমোদ দিছে অনুৰাগীক।

ৰূপালী পৰ্দাত প্ৰথম দেখা পাওতেই বনীৰ প্ৰেমত পৰিছিল তেওঁ। সেই আকৰ্ষণৰে চাপ যেন ৰৈ গ’ল চিৰকালৰ বাবে! যি প্ৰেমৰ সুৰে আজিও ৰোমাঞ্চিত কৰি তোলে এহাল প্ৰেমিক-প্ৰেমিকাক। চলচ্চিত্ৰ প্ৰযোজক বনী কাপুৰৰ হৃদয়ত এতিয়াও সেইগৰাকী নায়িকাৰে ৰাজত্ব। পাছে আপুনি-মই ভবাৰ দৰে সেইগৰাকী নায়িকা কিন্তু বনীৰ স্বৰ্গগামী পত্নী শ্ৰীদেৱী নহয়। তেওঁ হৈছে শৰ্মিলা ঠাকুৰ। সাৱলীল তথা দৃষ্টিনন্দন অভিনয়েৰে অনুৰাগীৰ হৃদয়ৰ মণিকূটত বিশেষ স্থান দখল কৰিছিল শৰ্মিলাই। ৰৈ বৈ গৈছিল খ্যাতিৰ জখলা।

শেহতীয়াকৈ, অভিনেত্ৰীগৰাকীৰ সৈতে সামাজিক মাধ্যমত এখন ফটো শ্বেয়াৰ কৰিছে বনীয়ে। মাত্ৰ তিনিটা শব্দৰেই বনিয়ে বৰ্ণনা কৰিছে শৰ্মিলাৰ প্ৰতি থকা প্ৰেম-ভালপোৱা আৰু আন্তৰিক সান্নিধ্যৰ নিটোল অনুভৱ। ফটোৰ কেপচনত বনীয়ে লিখিছে, ‘মোৰ প্ৰথম প্ৰেম’। ছবিখনত শৰ্মিলাক বনীৰ কাষত থিয় হৈ থকা দেখিবলৈ পোৱা গৈছে। শৰ্মিলাৰ কান্ধত বনীৰ হাত,মুখত উজ্জ্বল হাঁহি। বলীউডৰ দুই তাৰকাক এনেদৰে একেখন ফ্ৰেমত দেখা পাই আপ্লুত অনুৰাগী। নানা মন্তব্যৰে উপচাই দিছে দুয়োকে। উল্লেখ্য যে, বনীৰ পত্নী শ্ৰীদেৱীয়ে তিনি দশকৰো অধিক কাল বলীউডৰ প্ৰথম শাৰীৰ অভিনেত্ৰীৰ সুখ্যাতি অৰ্জন কৰিছিল।

তথাপি বনীয়ে নিজ পত্নী শ্ৰীদেৱীক নহয়, শৰ্মিলাকহে জীৱনৰ প্ৰথম প্ৰেম বুলি স্বীকৃতি দি গৈছে। আজিও পুৰণি স্মৃতিয়ে আমনি কৰে বনীক। মন উৰা মাৰে শৰ্মিলাৰ কাষলৈ। মাজে সময়ে তেওঁৰ স্বৰ্গীয় পত্নীৰ স্মৃতিকথা সুঁৱৰি আটোম-টোকাৰিকৈ সজাই থোৱা পুৰণি ফটোবোৰ সামাজিক মাধ্যমত পোষ্ট কৰে বনীয়ে। অনুৰাগীৰ সৈতে পুৰণি দিনৰ স্মৃতিৰ ভাগ-বতৰা কৰি ভাল পায় বনীয়ে। দিনদিয়েক আগেয়ে বনীয়ে একেধৰণৰ ছবিকেই পোষ্ট কৰিছিল। কিন্তু শেহতীয়াকৈ শৰ্মিলাৰ প্ৰতি থকা গোপন প্ৰেমৰ ইস্তাহাৰখন ৰাজহুৱা কৰাৰ পাছতে আশ্চৰ্য প্ৰকাশ কৰিছে অনুৰাগীয়ে। বহুজনে দিছে শুভেচ্ছা বাৰ্তা কিম্বা অভিনন্দন।