যোৱা ৩ ডিচেম্বৰত ধুবুৰী জিলাৰ ঐতিহাসিক পানবাৰী মছজিদৰ বাকৰিত থিয় হৈ অপ্ৰাসংগিক ভাৱে সামাজিক মাধ্যমৰ চৰ্চিত ব্যক্তি, শিখা শৰ্মাই দেশী জনগোষ্ঠী সম্পৰ্কে কৰা মন্তব্যৰ বিৰুদ্ধে যোৱা কালিৰে পৰা পশ্চিম অসমৰ বিভিন্ন জিলাত দেশী জনগোষ্ঠীয় মঞ্চৰ লগতে গৰীয়া মৰীয়া দেশী জাতীয় পৰিষদৰ লোকসকলে জাঙুৰ খাই উঠে।
সমান্তৰাল ভাৱে আজি গোৱালপাৰা জিলাৰ দেশী জনগোষ্ঠীয় মঞ্চ, আৰু গৰীয়া মৰীয়া দেশী জাতীয় পৰিষদে যৌথ ভাৱে গোৱালপাৰা চহৰৰ মাজমজিয়াত বিক্ষোভ প্ৰদৰ্শন কৰাৰ লগতে শিখা শৰ্মাৰ পুত্তলিকা দাহ কৰি প্ৰতিবাদ উত্তাল কৰি তোলে। সংগঠন দুটাই গোৱালপাৰা আৰক্ষী থানাত লেখিকা শিখা শৰ্মাৰ বিৰুদ্ধে গোচৰ ৰুজু কৰি মুখ্যমন্ত্ৰী ড° হিমন্ত বিশ্ব শৰ্মাৰ ওচৰত শিখা শৰ্মাক অতি শীঘ্ৰে গ্ৰেপ্তাৰ কৰি অসমত শান্তি শৃংখলা অটুট ৰখাৰ বাবে দাবী জনায়।
গৰীয়া মৰীয়া দেশী জাতীয় পৰিষদৰ গোৱালপাৰা জিলা সমিতিৰ কাৰ্যকৰী সভাপতি ছাইদুল ইছলামে কয় যে, ইতিহাস সম্পৰ্কে জ্ঞান নথকা শিখা শৰ্মাই দেশী জনগোষ্ঠীৰ ইতিহাস নজনাৰ কাৰণে অইন জনগোষ্ঠীক সন্তষ্ট কৰিবলৈ আৰু প্ৰিয় হবলৈ গৈ গৰীয়া মৰীয়া আৰু দেশী সকলৰ অস্তিত্বক নস্যাৎ কৰিবলৈ কৰা মন্তব্য নিশ্চয় কাৰোবাৰ পৰিকল্পিত ষড়যন্ত্ৰৰ বাহিৰে আন একো নহয় । সকলো মুছলমানক একাকাৰ কৰি দেশী, গৰিয়া, মৰিয়া, জোলহাৰ অস্তিত্বক নস্যাৎ কৰি যি মন্তব্য কৰিছে, সেইটো তেওঁৰ অজ্ঞতাৰ বাহিৰে আন একো নহয় বুলি কটূ সমালোচনা কৰে লেখিকা শিখা শৰ্মাক।
ইপিনে দেশী জনগোষ্ঠীয় মঞ্চ অসমৰ কেন্দ্ৰীয় সাধাৰণ সম্পাদক সহিদুল ইছলামে কয় শিখা শৰ্মাই ৰাজহুৱা ভাৱে ক্ষমা খুজিব লাগিব অন্যথা আন্দোলন তীব্ৰ কৰি তোলা হব। প্ৰতিবাদী কাৰ্যসূচীত দেশী জনগোষ্ঠীয় মঞ্চ গোৱালপাৰা জিলা সমিতিৰ সভাপতি নুৰবকত সেখ, যুৱ ছাত্ৰ মঞ্চৰ সভাপতি মফিয়াল ৰহমান, কেন্দ্ৰীয় সমিতিৰ সাংস্কৃতিক আহ্বায়ক মেহবুবা আলম, উপদেষ্টা আবু আল কাসেম আদিৰ উপৰিও মঞ্চৰ শীৰ্ষ পৰ্যায়ৰ নেতৃবৰ্গ উপস্থিত থাকি কাৰ্যসূচীত ভাগ লয়।
