কিমান মানসিক ভাবে হতাশাত ভূগিলে এজন মানুহে মৃত্যুৰ কথা ভাবিব পাৰে ! তেনে এক ঘটনা পোহৰলৈ আহিছে নগাঁৱত ৷ এজন চৰকাৰী কৰ্মচাৰীয়ে লিখিছে “ ৩৫ বছৰ চৰকাৰী চাকৰি কৰাৰ পিছটো যদি পেঞ্চন পোৱাৰ নিয়ম নাই চাকৰি জীৱনৰ অবসৰৰ দিনাই  মোৰ জীৱনৰো অবসৰ লোৱাৰ অনুমতি বিচাৰি আবেদন জনালোঁ ৷“ চাকৰি জীৱনৰ অবসৰৰ দিনাই মৃত্যুৰ অনুমতি বিচাৰি এজন চৰকাৰী কৰ্মচাৰীয়ে ভাৰতৰ ৰাষ্ট্ৰপতি , অসমৰ মুখ্যমন্ত্ৰী , নগাঁৱৰ জিলা উপায়ুক্ত আদিলৈ লিখিত পত্ৰ দিয়াৰ পিছত নগাঁও জিলা উপায়ুক্ত কাৰ্যালয়ত লাগিছে হাহাকাৰ ৷ এই আবেদনৰ ভিত্তিত তৰিত গতিত চলিছে চৰকাৰী ফাইল ৷ জানিব পৰা মতে ৰাষ্ট্ৰপতি ,মুখ্যমন্ত্ৰী , উপায়ুক্ত আদিক আৰ্জি পেছ কৰা কৰ্মচাৰীজন হৈছে অসম চৰকাৰৰ লোকনিৰ্মান পথ বিভাগৰ নগাঁও যান্ত্ৰিক উপ-সংমণ্ডলৰ কৰ্মচাৰী দুলাল বৰা ৷ বিভাগটোত ১৯৮৭ চনৰ ২০ জুনত মাষ্টাৰৰোল পদত যোগদান কৰিছিল কৰ্মচাৰী জনে  ৷ বিগত ২০১১ চনত চৰকাৰী ভাবে ৰাজ্যৰ মাষ্টাৰৰোল আৰু ওৰ্কাচাৰ্জ কৰ্মচাৰীৰ চাকৰি নিয়মীয়া কৰিছিল ৷ বিভিন্ন বিভাগত কৰ্মৰত ৩০হাজাৰ কৰ্মচাৰীৰ চাকৰি চৰকাৰে নিয়মীয়াকৰন কৰিছিল ৷ ৩০ হাজাৰ কৰ্মচাৰী চাকৰি নিয়মীয়া কৰাৰ পিছত বিভাগে বিভাগে কিছু সংখ্যক মাষ্টাৰৰোল আৰু ওৰ্কচাৰ্জ কৰ্মচাৰীৰ চাকৰি নিয়মীয়া কৰন কৰা হোৱা নাছিল ৷ ইয়াৰ মূলতে আছিল সেই সময়ত বিভাগে বিভাগে থকা কাৰ্যবাহী বিষয়া , গাননীক বিষয়া আৰু দায়িত্বত থকা সহায়কে আক্ৰোশমূলক ভাবে মাষ্টাৰৰোল আৰু ওৰ্কচাৰ্জ কমচাৰীৰ চাকৰিৰ নিয়মীয়াকৰনৰ ফাইলৰ তালিকাৰ পৰা আতৰাই ৰাখিছিল ৷ ফলত ৩০ হাজাৰকৈ কৰ্মচাৰীৰ চাকৰি নিয়মীয়াকৰন হোৱাৰ বিপৰিতে একাংশ তালিকাৰ পৰা বাদ পৰিছিল ৷ অৱশ্যে ইয়াৰে সামান্য সংখ্যৰ উপস্হিতি অনিয়মীয়া হোৱাৰ বাবে তালিকাৰ পৰা বাদ পৰিছিল ৷১৯৮৭ চনৰ ২০ জুনত মাষ্টাৰৰোলত যোগদান কৰা এই কৰ্মচাৰীজনৰ চাকৰি ৰহস্যজনক ভাবে নিয়মীয়াকৰন নহল ৷ ১৯৯৩ চনৰ ৩১ মাৰ্চৰ আগতে নিয়ুক্ত ৫২ টা বিভাগৰ কৰ্মচাৰীক নিয়মীয়া কৰি সেই সময়ৰ বিত্তমন্ত্ৰী হিমন্ত বিশ্ব শৰ্মাই এক নিদৰ্শন দেখুৱাইছিল ৷ ৰাষ্ট্ৰপতি , মুখ্যমন্ত্ৰী ,জিলা উপায়ুক্ত আদিলৈ জীৱনৰ পৰা অবসৰ বিচাৰি অৰ্থাৎ মৃত্যুৰ অনুমতি বিচাৰি লিখা পত্ৰ খনত কৰ্মচাৰীজনে আৰু লিখিছে “ ২০২৩ চনৰ মে’ মাহত মই এই বিভাগৰ পৰা চৰকাৰী নিয়ম অনুসৰি অবসৰ গ্ৰহণ কৰিম ৷ অবসৰৰ পিছত কৰ্মচাৰীসকলে পাব লগা প্ৰাপ্য পেঞ্চন মই নাপাও ৷ প্ৰাপ্য চৰকাৰী পেঞ্চন নাপালে মই কি কৰি চলিম ? কি খাম ? কি পিন্ধিম ? মই মোৰ পৰিয়াল কেনেদৰে পোহপাল দিম ? মোৰ অবিহনে মোৰ পৰিয়াল কেনেকৈ চলিব ? বেমাৰ আজাৰ হলে কেনেকৈ কিহৰে চিকিৎসা কৰিম বা কৰিব ? আদি বিভিন্ন চিন্তাই মোক বিপাঙত পেলাইছে ৷ আপুনি ইচ্ছা কৰিলে সকলো কাম কৰিব পাৰে ৷ মোৰো চাকৰিটো  নিয়মীয়া কৰি পেঞ্চন পোৱাৰ ব্যবস্হা কৰিবলৈ কাতৰ প্ৰাৰ্থনা জনাইছো ৷ চাকৰি নিয়মীয়াকৰণ কৰি পেঞ্চনৰ দিহা কৰি দিবৰ বাবে আবেদন দাখিল কৰা দুলাল বৰাৰ এই আবেদনৰ পিছতে নগাঁৱৰ উপায়ুক্তই এজন অতিৰিক্ত উপায়ুক্তৰ জৰিয়তে সমগ্ৰ বিষয়টো তদন্ত কৰিবলৈ নিৰ্দেশ দিছে ৷ সেই মৰ্ম্মে উপায়ুক্ত কাৰ্যালয়ে নগাঁৱৰ লোকনিৰ্মান বিভাগৰ যান্ত্ৰিক উপ সংমণ্ডলৰ পৰা সকলো তথ্য বিছাৰি জৰুৰী পত্ৰ প্ৰেৰন কৰিছে ৷ জানিব পৰা মতে ইতিমধ্য একাংশ মাষ্টাৰৰোল আৰু ওৰ্কচাৰ্জ কৰ্মচাৰীৰ চাকৰি নিয়মীয়াকৰন নোহোৱাকৈ অবসৰ গ্ৰহণ কৰাই নহয় ইহজগতৰ পৰা আতৰি গৈছে ৷

বৰ্ধিত নিবনুৱা সমস্যাই ৰাজ্যবাসীক চিন্তিত কৰি তোলা সময়তে ওদালগুৰি জিলাৰ ওৰাঙৰ উদ্যমী যুৱক দিপক বৰ্মন নামৰ লোকজনে আৰম্ভ কৰিছে “মা ফুড ডিপুট “নামৰ এক প্ৰশংসনীয় সেৱা মুলক ব্যৱসায় প্ৰতিষ্ঠান । ৭০ন মাজবাট  বিধান সভা সমষ্টিৰ তথা বিটিআৰৰ পাঁচনৈ চেৰফাং সমষ্টিৰ  অন্তৰ্গত ওৰাং  মাজবাট ৰোডত শুভাৰম্ভণি  কৰা উক্ত সেৱা মুলক ব্যৱসায় প্ৰতিষ্ঠান টোত মানুহৰ  দৈনন্দিন জীৱনত  অৰ্হনিশে  ব্যৱহাৰ হোৱা সকলো ধৰণৰ খাদ্য সামগ্ৰী যেনে ডাইল ,চেনী,চাউল আদি সকলো সামগ্ৰী পেকেটিং কৰি গ্ৰাহক সকলক  সুলভ মুল্যত যোগান ধৰিছে  । ওৰাঙৰ  উদ্যমী যুৱক দিপক বৰ্মনৰ “মা ফুড ডিপুট নামৰ ব্যৱসায় প্রতিষ্ঠান খনে খাদ্য সামগ্ৰীৰ লগতে দৈনন্দিন জীৱনত নিত্য নৈমিত্তিক প্ৰয়োজনীয় সকলো ধৰণৰ সা – সামগ্ৰী যোগান ধৰি ৰাইজক নিষ্ঠা ,দায়িত্ব সহকাৰে সেৱা কৰাৰ লগতে নিজা নিজা  সেৱামূলক প্ৰতিষ্ঠান আগুৱাই লৈ যোৱাৰ প্ৰয়াস কৰিছে । ৰাজ্যত বহিৰাজ্যৰ পৰা আহি বহু লোকে ব্যৱসায় কৰি থকা সময়তে অসম সন্তান খিলঞ্জীয়া যুৱক সকলে অকল চৰকাৰী চাকৰিৰ ওপৰত নিৰ্ভৰ নাথাকি এইধৰণৰ ব্যৱসায় আৰম্ভ কৰাত অঞ্চল বাসীয়ে উদ্যমী যুৱক তথা  নিবনুৱা যুৱক যুৱতী সকলৰ বাবে এক উদাহৰণ স্বৰূপ হৈ উঠা উক্ত ব্যৱসায়ৰ স্থলীৰ স্বত্বাধিকাৰী বৰ্মনক স্থানীয় ৰাইজে শলাগিছে । স্বত্বাধিকাৰী বৰ্মনে জানিব দিয়া মতে তেওঁৰ দোকানত মাহেলি অতি কমেও এবাৰত ১০০০ টকাৰ সামগ্ৰী ক্ৰয় কৰা গ্ৰাহক সকলৰ মাজত লটাৰী খেল পাতি প্ৰতিমাহে গ্ৰাহক সকলক উপহাৰ দিয়াৰো চিন্তা চর্চা আগবঢ়াইছে ।

এডভেঞ্চাৰ ছোচিয়েল অ’ৰগেনাইজেশ্যন পাটাছাৰকুছি চমুকৈ এ এছ অ পিৰ  উদ্যোগত  পাটাছাৰকুছিৰ প্ৰাচ্য সংঘৰ প্ৰেক্ষাগৃহত  দুদিনীয়াকৈ “কেক প্ৰস্তুতকৰণ”  বিষয়ক এটি প্ৰশিক্ষণ শিবিৰ  অনুষ্ঠিত হৈ যায়। কালিৰে পৰা আৰম্ভ হোৱা  এই  প্ৰশিক্ষণ শিবিৰটো আজি সামৰণি পৰে।  নিলীম কুমাৰ গোস্বামীয়ে পৰিকল্পনা কৰা  আৰু  ধনস্মিতা দত্তই সমল ব্যক্তি হিচাপে  অংশ গ্ৰহণ কৰা  এই প্ৰশিক্ষণ  শিবিৰটোত  ৪৮ গৰাকী মহিলা শিক্ষাৰ্থীয়ে অংশ গ্ৰহণ কৰে । প্ৰশিক্ষণৰ শেষত  উৎপল গোস্বাামীয়ে আতধৰা  প্ৰশিক্ষণ শিবিৰৰ সামৰণি অনুষ্ঠানত বিশিষ্ট অতিথি হিচাপে উপস্থিত থাকে ক্ৰমে পাটাছাৰকুছি বিদ্যাপীঠৰ অধ্যক্ষ তপন কুমাৰ শৰ্মা, দুৰ্যোগ ব্যৱস্থাপনাৰ ক্ষেত্ৰ বিষয়া শাকৰ নাথ দাস , সাংবাদিক নৱকান্ত কলিতা আৰু সাংবাদিক আমিনুল হকে। উক্ত অনুষ্ঠানত  বিভিন্ন দিশৰ ওপৰত বিশিষ্ট অতিথি সকলে অালোকপাত কৰে। সামৰণি অনুষ্ঠানত শিক্ষাৰ্থীসকলক  মানপত্ৰ বিতৰণ কৰা হয়।  অনুষ্ঠানৰ শেষত অনুষ্ঠানটোৰ সদস্যৰ দ্বাৰা এটি সংগীতানুষ্টান অনুষ্ঠিত হয়।

সদৌ অসম কবি সন্মিলনৰ অন্তৰ্গত বিশ্বনাথ জিলা সমিতিৰ দ্বি-বাৰ্ষিক অধিৱেশনখনি বিহালী ৰাংচালিত অনুষ্ঠিত হ’ব। বিশ্বনাথ জিলা কবি সন্মিলনৰ হাৱাজানত অনুষ্ঠিত বৰ্দ্ধিত কাৰ্যানিৰ্বাহ সভাত এই সিদ্ধান্ত গ্ৰহণ কৰা হয়। হাৱাজান কবি চক্ৰৰ আতিথ্যত হাৱাজান উচ্চতৰ মাধ্যমিক বিদ্যালয়ৰ প্ৰেক্ষাগৃহত অনুষ্ঠিত বিশ্বনাথ জিলা কবি সন্মিলনৰ বৰ্ধিত আৰু কাৰ্যনিৰ্বাহকত কেতবোৰ গুৰুত্বপূৰ্ণ সিদ্ধান্তও গ্ৰহণ কৰা হয়। জিলা কবি সন্মিলনৰ সভানেত্ৰী সবিতা কোঁৱৰৰ সভাপতিত্ব অনুষ্ঠিত সভাখন আঁত ধৰে জিলা সম্পাদক অনিত শইকীয়াই। হাৱাজান কবি চক্ৰৰ সভাপতি নকুল মহন্তই আদৰণি ভাষণ প্ৰদান কৰা সভাখনত সদৌ অসম কবি সন্মিলনৰ প্ৰাক্তন উপ-সভাপতি তথা জিলা উপদেষ্টা নগেন কোঁৱৰ, বিশ্বনাথ জিলা  কবি সন্মিলনৰ প্ৰাক্তন সম্পাদক বিপিন বৰাই সাংগঠনিক দিশৰ ওপৰত আলোকপাত কৰে। সভাত বিশ্বনাথ জিলা কবি সন্মিলনৰ পত্ৰিকা সম্পাদক ৰূপজ্যোতি শইকীয়াই বাৰ্ষিক মুখপত্ৰ ‘শব্দালয়’ প্ৰকাশৰ অগ্ৰগতি বিষয়ে সভাত বক্তব্য আগবঢ়ায়। উক্ত অনুষ্ঠানত সৰ্বসন্মতি ক্ৰমে কমলেশ্বৰী বৰুৱা বাঢ়ৈক পত্ৰিকা সভাপতি হিচাপে দায়িত্ব অৰ্পন কৰাৰ লগতে পত্ৰিকাখনি কাৰ্যকৰী সভাপতি হিচাপে চাও চন্দন বৰুৱাক কাৰ্যনিৰ্বাহক সভাই দায়িত্ব অৰ্পণ কৰি ক্ষীপ্ৰতাৰে পত্ৰিকাখনি প্ৰকাশৰ দায়িত্ব অৰ্পণ কৰে। সভাতে জিলা কবি সন্মিলনৰ তৰফৰ পৰা প্ৰতি দ্বি-বাৰ্ষিক অধিৱেশনত কেইবাটাও বঁটা প্ৰদান কৰাৰ কথাও আলোচনা কৰা হয়। সেই সম্পৰ্কে বঁটাৰ দাতা বিচাৰিবলৈ সম্পাদকক দায়িত্ব অৰ্পণ কৰে। উল্লেখ্য যে বিহালীৰ ৰাংছালিত জিলা কবি সন্মিলনৰ দ্বি-বাৰ্ষিক অধিৱেশনখনি অনুষ্ঠিত কৰাৰ সিদ্ধান্ত গ্ৰহণ কৰা হয়। সভাত প্ৰফুল্ল হাজৰিকাই ভূপেন হাজৰিকাৰ গীতত কাব্য ৰূপ সম্পৰ্কে আলোকপাত কৰাৰ লগতে নিৰঞ্জন দাস, মৃণালী চেতিয়া, ৰুণু দেৱী বৰুৱা, মালবিকা ভাগৱতী, শিৱ শংকৰ হাজৰিকা, ৰাজশ্ৰী পৰাশৰ, পদূমি শইকীয়াই স্ব-ৰচিত কবিতা পাঠ কৰি অনুষ্ঠানটো জীপাল কৰি তোলে।

প্ৰেম বিচ্ছেদৰ বাবে নহয়, সংঘাত আঁতৰাই সম্বন্ধ প্ৰতিষ্ঠাৰ বাবে। পিতৃৰ অতীতৰ কু-কৰ্ম, বৰ্তমানৰ সমাজ বিৰোধী ব্যৱসায়ৰ বিৰোধ, শিক্ষাৰ মান আগুৱাই নিয়া, শৈক্ষিক প্ৰতিষ্ঠানত ৰেগিঙক সবল প্ৰত্যাহ্বান জনোৱা, মনে মিলা সকলো জুতিৰ মিলনত সফলতা, দুষ্টৰ পতন ঘটা কাহিনীৰে সমৃদ্ধ অসমীয়া ছবি ‘চন্দ্ৰাৱলী’ নিৰ্মাণ হয়। মনোমোহা স্থানত চিত্ৰগ্ৰহণ কৰা ছবিখনৰ গীত, হতাহতি, ৰোমান্স আৰু মিলনে নৱ প্ৰজন্মক আকৰ্ষণ কৰিব। কাহিনীয়ে জ্যেষ্ঠসকলকো সন্তুষ্ট কৰাৰ থল আছে। কৰ’না কালৰ বিধি মানি নিৰ্মিত আৰু এই বিধি কিছু শিথিল হোৱা সময়ত মুক্তি পোৱা চন্দ্ৰাৱলীৰ পৰিচালনা বলিন শৰ্মাৰ। মুখ্য সহকাৰী পৰিচালক পবিত্ৰ খাউণ্ড আৰু মৃণাল ডেকা। সহকাৰী পৰিচালক প্ৰাঞ্জুপ্ৰিন্স কলিতা আৰু কল্লোল বনিয়া। এ বি ফিল্ম প্ৰডাকশ্যনৰ বেনাৰত নিৰ্মিত ছবিখনৰ প্ৰযোজনা সহযোগী শেৱালী শৰ্মা, মালামণি গোস্বামী আৰু লীনা শৰ্মা। প্ৰযোজনা নিয়ন্ত্ৰক নৱ প্ৰজন্মৰ চঞ্চলজ্যোতি বৰদলৈ আৰু শশাংক শেখৰ শৰ্মা। অভিনয়ত আছে দেৱজিৎ মজুমদাৰ, দিগন্ত বৰুৱা (ৰণ্টু), নায়িকা অমৃতা গগৈ, ৰাজীৱ গোস্বামী, পল ফুকন, মনীষা ৰাগিণী, জুৰি শৰ্মা, ৰাতুল শৰ্মা, অতনু কাশ্যপ, পবিত্ৰ বৰুৱা, জেতবন বৰুৱা, ৰাজ ভৈৰৱ, আলোক বৰুৱা, গোলেশ্বৰ বৰাকে ধৰি বহু ন-পুৰণি শিল্পী। জ্যোতি চিত্ৰবনত প্ৰাথমিক প্ৰদৰ্শনৰ পাছত যোৰহাট থিয়েটাৰত বিশেষ প্ৰদৰ্শন কৰে। অসমীয়া চিনেমালৈ সুদিন ঘূৰি অহাৰ উমান দিয়ে।

একমুখী নীতি-নিয়মেৰে এখন সমাজে আন এখন সমাজক বিপদে-আপদে উদ্ধাৰ কৰিব পৰাকৈ নটা মৌজাৰ এশ বাইশখনৰো অধিক গাঁৱৰ প্ৰতিনিধি মিলি প্ৰতি বছৰে পৃঠক নামঘৰত যোৰহাট জিলাৰ সাৰ্বজনীন আঞ্চলিক ভিত্তিত অখণ্ড ভাগৱত পাঠ অনুষ্ঠান অনুষ্ঠিত কৰি আহিছে। এইবাৰ ৰূপালী জয়ন্তী বৰ্ষ দক্ষিণ যোৰহাটৰ নামনি তিমতিমীয়া নামঘৰত আয়োজন চলিছে। শিশু-মহিলা সকলোকে সমানে অগ্ৰাধিকাৰ প্ৰদানেৰে ৩০ জানুৱাৰীৰ পৰা ১৪ ফেব্ৰুৱাৰীলৈ ষোল্ল দিনীয়া বিভিন্ন কাৰ্যসূচী হাতত লোৱা হৈছে। বিস্তৃত কাৰ্যসূচীৰ প্ৰচাৰ সমল গায়ন-বায়ন, দবা-শংখ বাদন তথা আধ্যাত্মিকতাৰে শুভাৰম্ভ হৈ যায়। কেন্দ্ৰীয় সমিতিৰ সভাপতি ভোলাৰাম গগৈ, সাধাৰণ সম্পাদক ডম্বৰুধৰ গগৈ, উপ-সভাপতি ঠগীৰাম বৰা, গাণনিক আনন্দৰাম গগৈ, চক্ৰ সভাপতি হিৰেণ বৰুৱা, পুলিন গগৈ, খগেশ্বৰ গগৈকে ধৰি ভক্ত প্ৰতিনিধি, আই-মাতৃসকলে তথ্য-সমল উন্মোচন কৰে। উদযাপন সমিতিৰ কাৰ্যকৰী সভাপতি প্ৰফুল্ল প্ৰাণ গগৈ আৰু সাহিত্য সমিতিৰ সম্পাদক বিনোদ গগৈ পৰিচালনাত অনুষ্ঠিত উন্মোচনী অনুষ্ঠানত নামঘৰৰ সম্পাদক টেপুৰাম গগৈ, স্মৃতিগ্ৰন্থৰ সহযোগী সম্পাদক ৰাণাজিৎ গগৈ, উত্তম কুমাৰ শইকীয়া, নৱজ্যোতি গগৈ, দিহানাম প্ৰতিযোগিতাৰ কাৰ্যকৰী সভাপতি বিনয় কুমাৰ শইকীয়া প্ৰমুখ্যে বিভিন্ন বিষয়ববীয়াসকল উপস্থিত থাকে।