১৬ নবেম্বৰ:সমগ্ৰ দেশৰ লগতে হোজাই জিলাৰ যমুনামুখতো আজি বিভিন্ন কাৰ্যসূচীৰে ৰাষ্ট্ৰীয় প্ৰেছ দিৱস উদযাপন কৰা হয় ৷ ডবকা আৰু যমুনামুখৰ সাংবাদিকৰ যৌথ উদ্যোগত যমুনামুখৰ গাওঁ সুৰক্ষা বাহিনীৰ কাৰ্যালয় ভৱন প্ৰাংগনত উদযাপন কৰা হয় ৰাষ্ট্ৰীয় প্ৰেছ দিৱস ৷ প্ৰেছ দিৱসৰ কাৰ্যসূচীত পুৱাৰ ভাগত পতাকা উত্তোলন কৰে জ্যেষ্ঠ সাংবাদিক মহানন্দ বৰদলৈয়ে ৷

বন্তি প্ৰজলন আৰু শ্বহিদ তৰ্পন কৰে জ্যেষ্ঠ সাংবাদিক সুব্ৰত চৰকাৰ, সাংবাদিক এবাদুৰ ৰহমান শ্বহিদুল আলম, জেনিব জেৰি আৰু জিয়াবুৰ ৰহমানে ৷ জ্যেষ্ঠ সাংবাদিক  মহানন্দ বৰদলৈয়ে সভাপতিত্ব কৰা মুকলি সভাত উদ্দেশ্য বাখ্যা কৰে সাংবাদিক বাবুল তালুকদাৰে ৷ মুকলি সভাত মুখ্য অথিতি আৰু বিশিষ্ট অথিতি হিচাপে উপস্থিত থকা ডাক্তৰ আব্দুৰ ৰেজাক মাজাৰভূঞা আৰু ডাক্তৰ আনোৱাৰ হুছেইন চৌধুৰীয়ে সাংবাদিকৰ সমস্যাৰ ওপৰত বক্তব্য আগবঢ়োৱাৰ লগতে ইয়াৰ সমাধানৰ বাবে সাংবাদিক সকলে কি কি কৰিব লাগে তাৰ দিহা পৰামৰ্শ আগবঢ়ায় মুল্যবান বক্তব্যৰাখে৷  উল্লেখ্য যে এইবাৰ প্ৰেছ দিৱসত বহু কেইজন বিশিষ্ট ব্যক্তিক তেওঁলোকে আগবঢ়োৱা অৱদানৰ বাবে সম্বৰ্ধনা জনায় প্ৰেছ দিৱস উদযাপন সমিতিয়ে ৷ যমুনামুখৰ জ্যেষ্ঠ সাংবাদিক মহানন্দ বৰদলৈ, আৰু সুব্ৰত সৰকাৰ, হোজাইৰ জ্যেষ্ঠ সাংবাদিক ৰুহুল আমিন আৰু  মোস্তাক আহমেদ চৌধুৰী, ডবকাৰ সাংবাদিক ইছমাইল আলী, বাবুল তালুকদাৰ, দিলুৱাৰ হুছেইন আৰু আব্দুল হাকিমক সম্বৰ্ধনা জনায় প্ৰেছ দিৱস উদযাপন সমিতিয়ে ৷ ইপিনে ডবকাৰ বিশিষ্ট চিকিৎসক ডাঃ আনোৱাৰ হুছেইন চৌধুৰী, যমুনামুখৰ সমাজসেৱক তথা চিকিৎসক আব্দুৰ ৰেজাক মাজাৰভূঞা আৰু আমছুৰ হোজাই জিলা সমিতিৰ সভাপতি কবিৰ আহমেদ লস্কৰক বিশেষভাৱে সম্বৰ্ধনা জনোৱা হয় ৷ আনহাতে কভিড যোদ্ধা হিচাপে নীলবাগান মডেল হস্পিতালৰ চাফাই কৰ্মী গোলাব বাস্ফৰ, যমুনামুখ প্ৰাথমিক চিকিৎসালয়ৰ চাফাই কৰ্মী সুনীল বাস্ফৰ আৰু লেব টেকনিচিয়ান গীতাৰ্থ দাসকো সম্বৰ্ধনা জনোৱা হয় ৷

 দেশৰ বিভিন্ন প্ৰান্তৰ অৰ্থ-সামাজিক, স্বাস্থ্য- সেৱা আদি জনকল্যাণ মূলক কামৰ সৈতে জড়িত দেশৰ এক আগ-শৰীৰ বেচৰকাৰী সংস্থা “Srijan Ek Soch”ৰ  বৰপেটা জিলাৰ সৰ্থেবাৰী ৰাজহ চক্ৰৰ অন্তৰ্গত অমৃখোৱা গাঁওত আজি আৰ্থ-সামাজিক উন্নয়ন কেন্দ্ৰ এটা স্থাপন কৰা হয় । সেই উদ্দেশ্যেৰে সৰ্থেবাৰীৰ আমৃখোৱা গাঁওত আজি উপস্থিত হয় সংস্থাটোৰ মুখ্য কাৰ্যবাহী বিষয়া প্ৰভাত চেকসেনা আৰু আমেৰিকা নিবাসী বিশিষ্ট অভিযন্তা তথা আমৃখোৱা গাঁওৰ সন্তান ভাবেশ ডেকা । সৰ্থেবাৰীৰ আমৃখোৱাত উপস্থিত হৈ সংস্থাটোৰ বিষয়াদ্বয়ে গাঁওখন পৰিদৰ্শন কৰি বিশিষ্ট ব্যক্তিসকলৰ লগতে এই সন্থাটোৰ লগত জড়িত স্বেচ্ছাসেৱক সকলৰৰ লগত এক আলোচনাত মিলিত হয় । আলোচনা সভাৰ শেষত প্ৰভাত চেকসেনাই সংবাদ মাধ্যমৰ আগত শিক্ষাৰ উপৰিও স্বাস্থ্যৰ ক্ষেত্ৰটো বিভিন্ন কাম কৰাৰ পৰিকল্পনাৰ কথা ব্যক্ত কৰে । একেদৰে দক্ষতা বিকাশৰ ক্ষেত্ৰতো স্থানীয় যুৱক-যুৱতীসকলক বিভিন্ন বৃত্তিগত শিক্ষা দিয়াৰ বাবেও সংস্থাটোৱে কাম কৰি যোৱাৰ পৰিকল্পনাৰ কথা উল্লেখ কৰে । আমৃখোৱা গাঁওত উপস্থিত হোৱাৰ পূৰ্বে প্ৰভাত চেকসেনাৰ নেতৃত্বত সংস্থাটোৰ এটা প্ৰতিনিধি দলে বৰপেটা জিলাৰ মাননীয় উপায়ুক্ত তেজ প্ৰসাদ ভূষালক সাক্ষাৎ কৰি এই বিষয় সমূহৰ ওপৰত আলোচনা কৰে ।

নিমাতি ফেৰী দুৰ্ঘটনাৰ পিছত চিংগল ইঞ্জিনৰ ব্যক্তিগত ফেৰী বন্ধ ৰখাৰ পিছত শেহতীয়াকৈ এম. ভি. ৰাজলক্ষ্মী,ডিগাৰু আৰু লোহিত নামৰ তিনি খন জাহাজ দিয়াৰ পিছত আজিৰে পৰা পুনৰ যোৰহাট মাজুলীৰ জলপথত এম ভি পদ্ম আৰু এম ভি ইন্দ্ৰ নামৰ দুখন নতুন জাহাজ চলাচল কৰিছে। যোৱাকালি আহি পোৱা নতুন জাহাজ পদ্ম আৰু ইন্দ্ৰ নামৰ জাহাজ দুখন আনুষ্ঠানিক ভাৱে মাজুলীৰ উপায়ুক্ত পুলক মহন্তই আজি ফিটা কাটি কমলাবাৰী ঘাটতে শুভাৰম্ভ কৰে। ইয়াৰে এম ভি পদ্ম চলাচল কৰিব অফলামূখ আৰু নিমাতিৰ মাজত আৰু আনহাতে এম ভি ইন্দ্ৰ চলাচল কৰিব কমলাবাৰী আৰু নিমাতি ঘাটৰ মাজত। ফেৰী দুৰ্ঘটনা পাছতে নতুনকৈ সংযোজন ঘটা নতুন জাহাজ কেইখনে ৰাস উৎসৱৰ সময়ত দুই পাৰৰ ৰাইজক উপকৃত কৰিব বুলি আশা প্ৰকাশ কৰিছে মাজুলী প্ৰশাসনে। এতিয়াৰে পৰা প্ৰতি ঘন্টাৰ মূৰে মূৰে ফেৰী চলাচল কৰাৰ লগতে আৰু ৫ খন মেৰাইন ইঞ্জিনৰ চিংগল কাঠৰ নাও চলিব বুলি মাজুলীৰ উপায়ুক্তই জানিবলৈ দিয়ে।শুভাৰম্ভ অনুষ্ঠানত মাজুলীৰ ৰাজহ চক্ৰ বিষয়া কমলাবাৰী জয়দ্বীপ ৰজক সহ আভ্যন্তৰীণ জল পৰিবহণ বিভাগৰ বিষয়া কৰ্মচাৰী উপস্থিত থাকে।

 নিউৰ ডেস্ক: ৰাষ্ট্ৰীয় প্ৰেছ দিৱস উপলক্ষে বিশ্বনাথ জিলা প্ৰশাসনৰ উদ্যোগত আৰু মহকুমা তথ্য আৰু জনসংযোগ বিভাগৰ সহযোগত আজি বিশ্বনাথ চাৰিআলি পৌৰসভাৰ প্ৰেক্ষাগৃহত উদযাপন কৰা হয় ৰাষ্ট্ৰীয় প্ৰেছ দিৱস। জ্যেষ্ঠ সাংবাদিক নিৰঞ্জন হাজৰিকাই আঁত ধৰা অনুষ্ঠানত নবনিযুক্ত উপায়ুক্ত দেৱ কুমাৰ মিশ্র,  বিশ্বনাথ মহাবিদ্যালয়ৰ অধ্যক্ষ ডঃ চিন্তামণি শৰ্মা, বিশ্বনাথ সদৰ মহকুমাৰ মহকুমাধিপতি দীপম বৰ্মন, জ্যেষ্ঠ সাংবাদিক নৰেন বৰা, চক্ৰ বিষয়া প্ৰাঞ্জল কুমাৰ দাস অনুষ্ঠানত অংশগ্রহণ কৰি সাংবাদিক সকলৰ দায়িত্ব, কৰ্তব্যৰ উপৰিও সাংবাদিক সকল সন্মূখীন হোৱা সমস্যা সমাধানৰ লগতে সুৰক্ষা প্ৰদান কৰা আদি বিভিন্ন বিষয় সাঙুৰি “সংবাদ মাধ্যমক কোনে সমীহ নকৰে” শীৰ্ষক বিষয়ৰ উপৰত বক্তব্য আগবঢ়ায়। জাতীয় সংগীতেৰে আৰম্ভ হোৱা এই অনুষ্ঠানত বিশ্বনাথৰ তথ্য আৰু জনসংযোগ বিষয়া সুপ্ৰতিষ্ঠিত দেই আদৰণি ভাষন আগবঢ়াই ৰাষ্ট্ৰীয় প্ৰেছ দিৱস উপলক্ষে সমূহ সাংবাদিকলৈ শুভেচ্ছা জনায়। ইয়াৰ পিচত বিশ্বনাথ জিলা প্ৰশাসনৰ উদ্যোগত আৰু বিশ্বনাথ মহকুমা তথ্য-জনসংযোগ বিভাগৰ সহযোগত আজি বিশ্বনাথ চাৰিআলি পৌৰসভাৰ প্ৰেক্ষাগৃহত অনুষ্ঠিত ৰাষ্ট্ৰীয় প্ৰেছ দিৱস-২০২১ত বিশ্বনাথ জিলাৰ তিনিগৰাকী সাংবাদিকক সম্বৰ্ধনা জনোৱা হয়।সম্বৰ্ধিত সাংবাদিক তিনিগৰাকী ক্ৰমে-“অসমীয়া প্ৰতিদিন”ৰ ছয়দুৱাৰৰ সাংবাদিক তথা বিশ্বনাথ জিলা সাংবাদিক সন্থাৰ সহকাৰী সম্পাদক আৰু গহপুৰ জিলা সাংবাদিক সন্থাৰ সাধাৰণ সম্পাদক ভাস্কৰ জ্যোতি ভূঞা,”নিউজ লাইভ”ৰ বিশ্বনাথ চাৰিআলিৰ সাংবাদিক তথা “আপকু”ৰ কেন্দ্রীয় উপ-সভাপতি হেমন্ত শইকীয়া আৰু “নিয়মীয়া বাৰ্ত”ৰ বেদেতীৰ সাংবাদিক তথা বিহালী প্ৰেছ ক্লাৱৰ উপ-সভাপতি ভুৱন লুইটেল।তিনিওকে ফুলাম গামোচা, সম্বৰ্ধনা পত্ৰ আৰু শৰাইৰে সন্মান জনোৱা হয়। সম্বৰ্দ্ধিত সাংবাদিক সকলে নিজৰ নিজৰ বক্তব্য ৰাখে। অনুষ্ঠানত শিশু শিল্পী শুভানন্দিনী দাসেৰ বৰগীত আৰু কণমানি শিল্পী জিন্নত আফ্ৰিন খাঁন নৃত্য আৰু সাংবাদিক কাজী জেইদুল ইচলামৰ গীত পৰিবেশনে অনুষ্ঠানৰ সৌষ্ঠব বৃদ্ধি কৰে।ইফালে সভাত বিহালী জ্যেষ্ঠ সাংবাদিক নৰেন বৰাই বৰ্তমান সাংবাদিকতা আৰু অতিতৰ সাংবাদিকতা ওপৰত বক্তব্য প্ৰদান কৰা লগতে সভাত বক্তব্য প্ৰদান কৰে জ্যেষ্ঠ সাংবাদিক ভূৱন লুইটেল, বসন্ত বৰা লগতে হেমন্ত শইকীয়াই ।