নাজিৰা প্ৰতিবেদক :- ভাৰত চৰকাৰৰ পৰিৱেশ অৰণ্য আৰু জলবায়ু পৰিৱৰ্তন বিভাগৰ নিৰ্দেশনা No GSR, 571(E) dated-12 August,  2021 ৰ অনুসৰি Plastic waste management Rule, 2016 অধীনত নাজিৰা আৰু শিমলুগুৰি পৌৰ এলেকাত এবাৰ ব্যৱহাৰ হোৱা যিকোনো ধৰণৰ প্লাষ্টিক বা পলিথিন বেগ সম্পূৰ্ণ ভাৱে নিষিদ্ধ কৰিছে । এই নিৰ্দেশ অনুসৰি যিসকল ব্যৱসায়ী তথা জনসাধাৰণে পলিথিন মজুত কৰণ বা ব্যৱহাৰ কৰিব, তেওঁ লোকৰ ওপৰত আইনগত ব্যৱস্থা লোৱা হ’ব বুলি নিৰ্দেশনা জাৰি কৰে । ঐতিহ্যমণ্ডিত নাজিৰা আৰু শিমলুগুৰি নগৰখন প্লাষ্টিক মুক্ত আৰু প্ৰদূষণ মুক্ত নগৰ হিচাপে গঢ়িতোলাৰ বাবে সকলোকে সহযোগিতা আগবঢ়াবলৈ  নাজিৰা আৰু শিমলুগুৰি পৌৰসভাৰ কাৰ্যবাহী বিষয়াদ্বয়ে আহ্বান জনাইছে ।

তিনিচুকীয়া জিলা সাংবাদিক সন্থাৰ উপ-সভাপতি তথা কাকপথাৰ প্ৰেছ ক্লাৱৰ সভাপতি পৰাগ ভূঞাৰ ৰহস্যজনক দুৰ্ঘটনাত মৃত্যু হোৱাৰ আজি এটা বছৰ সম্পূৰ্ণ হ’ল ৷ অসমৰ তদানীন্তন মূখ্যমন্ত্ৰী সৰ্বানন্দ সোনোৱালে সাংবাদিক পৰাগ ভূঞাৰ ৰহস্যজনক মৃত্যৰ তদন্ত কৰিবলৈ চি আই ডি ক দায়িত্ব অৰ্পণ কৰিছিল যদিও আজি এটা বছৰে উক্ত তদন্তৰ প্ৰতিবেদন ৰাজহুৱা ন’হল ৷ অবৈধ কয়লা, কাঠ, গৰু ইত্যাদি চোৰাং ব্যৱসায়ৰ উপৰত বলিষ্ঠভাৱে বা-বাতৰি পৰিৱেশন কৰা সাংবাদিক গৰাকীৰ মবাইল ফোনটোও তাৎপৰ্যপূৰ্ণভাৱে তদন্তকাৰী সংস্থাটোৱে জব্দ নকৰিলে ৷ ইয়াক লৈ সাংবাদিক গৰাকীৰ পৰিয়ালৰ লগতে কাকপথাৰবাসী সচেতন ৰাইজৰ মনত সাংবাদিক গৰাকীৰ ৰহস্যজনক দুৰ্ঘটনাটো সন্দেহজনক হৈ পৰিছে ৷ উল্লেখযোগ্য যে বিগত বৰ্ষৰ ১১ নৱেম্বৰৰ গধুলি প্ৰায় ৮-১৫ বজাত কাকপথাৰ আৰক্ষী থানাৰ পৰা প্ৰায় ৫০ মিটাৰ নিলগত অৱস্থিত সাংবাদিক গৰাকীৰ ঘৰৰ সন্মুখতে এখন টাটা ডি আই গাড়ীয়ে খুন্দিয়াই থানাৰ সন্মুখেৰে পলায়ন কৰিছিল ৷ গুৰুতৰভাৱে আহত সাংবাদিক গৰাকীক ততাতৈয়াকৈ ৰূপাই চাইডিঙস্থিত ডিচি বৰা নাৰ্চিং হোমত প্ৰাথমিক চিকিৎসা প্ৰদান কৰি ডিব্ৰুগড়ৰ এখন ব্যক্তিগত নাৰ্ছিংহোমত ভৰ্ত্তি কৰিছিল যদিও ১২ নৱেম্বৰত সাংবাদিকগৰাকীৰ মূত্যু হয় ৷ সাংবাদিকগৰাকীৰ ৰহস্যজনক পথ দুৰ্ঘটনাৰ উচিত তদন্ত বিচাৰি সমগ্ৰ অসম জুৰি প্ৰতিবাদৰ জোৱাৰ উঠাৰ সমান্তৰালভাৱে ৰাষ্ট্ৰীয় পৰ্যায়তো বিষয়টোৱে গুৰুত্ব লাভ কৰাৰ উপৰিও ৰাষ্ট্ৰসংঘৰ এগৰাকী প্ৰতিনিধিয়েও প্ৰতিক্ৰিয়া প্ৰকাশ কৰিছিল ৷ ইমানৰ পিচতো অসম চৰকাৰৰ অপৰাধী অনুসন্ধান সংস্থাটোৱে তদন্তৰ প্ৰতিবেদন ৰাজহুৱা নকৰাত ৰাইজৰ মাজত বিভিন্ন প্ৰশ্নৰ অৱতাৰণা হৈছে । প্ৰয়াত সাংবাদিক পৰাগ ভূঞাৰ মৃত্যুৰ প্ৰথম বাৰ্ষিকী হিচাপে কালি কাকপথাৰ আঞ্চলিক ছাত্ৰ সন্থাৰ শ্বহীদ বেদী প্ৰাঙ্গণত কাকপথাৰ প্ৰেছ ক্লাৱৰ উদ্যোগত অঞ্চলটোৰ সমূহ সাংবাদিকৰ উপস্থিতিত এক শ্ৰদ্ধাঞ্জলী তথা প্ৰতিবাদী কাৰ্যসূচী অনুস্থিত হয় । উক্ত কাৰ্যসূচীত কাকপথাৰ প্ৰেছ ক্লাৱৰ সভাপতি বিজয় দত্তই এগছী বন্তি জ্বলাই শ্ৰদ্ধাঞ্জলী অনুস্থানটিৰ শুভাৰম্ভ কৰি সকলোৰে বাবে মুকলি কৰি দিয়ে । সহযোগ কৰে আপকু তিনিচুকীয়া জিলা সমিতিৰ ভাৰপ্ৰাপ্ত সম্পাদক দ্বীপেন লহকৰ, আছুৰ নেতা কনচেং গগৈ, সাংবাদিক কুলজিৎ মৰাণ, ৰাজকুমাৰ শৰ্মা আদিয়ে । ইয়াৰ পাছত আপকু তিনিচুকীয়া জিলা সমিতিৰ সভাপতি মনোৰঞ্জন নেওগ, আছু তিনিচুকীয়া জিলাৰ সহকাৰী সম্পাদক বিতু ডেকা, অসম জাতীয়তাবাদী যুৱ পৰিষদ, কাকপথাৰ আঞ্চলিক সমিতিৰ সম্পাদক বিকাশ তালুকদাৰ, সদৌ মৰাণ ছাত্ৰ সন্থা কাকপথাৰ আঞ্চলিক সমিতিৰ ভাৰপ্ৰাপ্ত সভাপতি দ্বীপন মৰাণে পৰাগ ভূঞাক সুঁৱৰি প্ৰতিবাদি বক্তব্য ৰাখে । অনুস্থানটি পৰিচালনা কৰে কাকপথাৰ প্ৰেছ ক্লাৱৰ সহকাৰী সম্পাদক মিন্টু তালুকদাৰে ।

হাউলীস্থিত কৃষি বিজ্ঞান কেন্দ্ৰত ১১ নৱেম্বৰত ইফকোৰ উদ্যোগত নামনি অসমৰ “ইফকো” ক্ষেত্ৰ প্ৰবন্ধক বিনোদ শইকীয়াৰ পৰিচালনাত এখনি প্ৰশিক্ষণ ওঁ বিনামূলীয়া কৃষি সামগ্ৰী বিতৰণ সভা অনুষ্ঠিত হয়। উক্ত প্ৰশিক্ষণ কাৰ্য্যসূচীত উপস্থিত থাকে “ইফকো”ৰ উত্তৰ পূৰ্বাঞ্চলৰ প্ৰবন্ধক অজিত ভট্টাচাৰ্য্য, বৰপেটা জিলাৰ মহকুমা কৃষি বিষয়া পৰীক্ষিত বায়নে, কৃষি বিজ্ঞান কেন্দ্ৰৰ ভাৰপ্রাপ্ত মুৰব্বী পিংকুধাৰ বৰ্মনকে ধৰি কেইবাজনো কৃষি বিজ্ঞানী। প্ৰশিক্ষণ কাৰ্য্যসূচীত বৰপেটা আৰু বজালী জিলাৰ ৫০ গৰাকী আমন্ত্ৰিত অগ্ৰণী কৃষকে ভাগ লয় আৰু প্ৰত্যেক গৰাকী কৃষকক “ইফকো”ৰ তৰফৰ পৰা সৰিয়নৰ বীজ, নেনো ইউৰীয়াৰ বটল, বৰণ সাৰৰ পেকেট আৰু কিছু জৈৱিক সাৰৰ বটল প্ৰদান কৰে।উক্ত প্ৰশিক্ষণত “ইফকো”ৰ বিনোদ শইকীয়া আৰু অজিত ভট্টাচাৰ্য্যই কৃষক সকলক “নেনো” ইউৰীয়া আৰু জৈৱিক সাৰ “সাগৰিকা” ৰ উপকাৰিতা, ব্যৱহাৰৰ বিষয়ে বিতংভাবে তথ্য দাঙি ধৰে। মহকুমা কৃষি বিষয়া পৰীক্ষিত বায়নে কৃষি বিভাগৰ বিভিন্ন আঁচনিৰ বিষয়ে অৱগত কৰে আৰু “ইফকো” কৃষকৰ উন্নতিৰ কাৰণে কৰা কামৰ শলাগ লয়। কৃষি বিজ্ঞান কেন্দ্ৰৰ পিংকুধৰ বৰ্মনে সৰিয়হ খেতি বিভিন্ন দিশ সামৰি প্ৰশিক্ষণ দিয়ে। প্ৰশিক্ষণ কাৰ্য্যসূচীত শলাগৰ শৰাই আগবঢ়ায় “ইফকো” ৰ ক্ষেত্ৰ বিষয়া মেৰাজুল হুছেইনে।

তামুলপুৰ মহকুমা সদৰৰ নিকটৱৰ্তী কুমাৰীকাটাত অৱস্থিত তামুলপুৰ আঞ্চলিক গ্ৰামদান সংঘৰ প্ৰধান কাৰ্যালয়ৰ সভা গৃহত আজি সংঘৰ ৫৯ সংখ্যক প্ৰতিষ্ঠা দিৱস অনুষ্ঠুপীয়া কৈ উদযাপন কৰা হয়। ৰাতিপুৱা ১০ বজাত সংঘৰ সভাপতি যতীন সৰকাৰৰ সভাপতিত্ব অনুষ্ঠিত সভাখনত তামুলপুৰ বিধান সভা সমষ্টিৰ নৱনিৰ্বাচিত বিধায়ক জলেন দৈমাৰীয়ে স্বৰ্গীয় অমল প্ৰভা দাসৰ প্ৰতিচ্ছবিৰ সম্মূখত বন্তি প্ৰজ্বলন কৰে। বন্তি প্ৰজ্বলন কৰি দৈমাৰীয়ে কয়- তামুলপুৰ আঞ্চলিক গ্ৰামদান সংঘৰ প্ৰতিষ্ঠাপক ৰবীন্দ্ৰনাথ উপাধ্যায় অৰ্থাৎ ৰবীন্দ্ৰ ভায়ে চীনা আক্ৰমণৰ পিছৰে পৰা উত্তৰ পূৰ্বাঞ্চলত মৃত্যুৰ সময়লৈ সদায় শান্তিৰ বাবে কাম কৰিছিল। ১৯৬২ চনত কুমাৰীকাটাত তামুলপুৰ আঞ্চলিক গ্ৰামদান সংঘ প্ৰতিষ্ঠা  কৰি খাদী আৰু গ্ৰমোদ্যোগৰ বিকাশ কৰাৰ লগতে গ্ৰামাঞ্চলত ক্ষুদ্ৰ উদ্যোগ স্থাপন কৰি সৰ্বসাধাৰণ ৰাইজৰ উন্নয়নৰ বাবে কাম কৰিছিল।খাদী আৰু গ্ৰমোদ্যোগ আয়োগৰ সহযোগত গ্ৰামদান সংঘ নামৰ অনুষ্ঠানটোৰ তত্বাৱধানত চলি থকা খাদী গ্ৰামোদ্যোগ বিদ্যালয়ৰ জৰিয়তে উত্তৰ পূৰ্বাঞ্চলৰ যুৱক-যুৱতী সকলে বিভিন্ন শাখাত প্ৰশিক্ষণ লৈ আছে। সেই সকলক স্বনিয়োজনৰ বাবে ক্ষুদ্ৰ উদ্যোগ স্থাপন কৰি স্বাৱলম্বী হোৱাৰ পথত আগবাঢ়ি যাবলৈ তেওঁ আহ্বান জনায়। ভাষণ প্ৰসংগত বিধায়ক গৰাকীয়ে উল্লেখ কৰে যে পৰৱৰ্তী সময়ত সংঘৰ উন্নয়নৰ বাবে চেষ্টা কৰিব। লগতে তেওঁ কেইবাগৰাকী প্ৰশিক্ষাৰ্থীৰ মাজত প্ৰমাণ পত্ৰ বিতৰণৰ শুভাৰম্ভ কৰে। 
    সভাখনত খাদী গ্ৰামোদ্যোগ বিদ্যালয়ৰ অধ্যক্ষ দুলাল সাহাই তামুলপুৰ আঞ্চলিক গ্ৰামদান সংঘৰ প্ৰতিষ্ঠা আৰু অমল প্ৰভা দাসৰ কৰ্মময় জীৱনৰ বিভিন্ন দিশৰ ওপৰত বাখ্যা কৰে। সংঘৰ সম্পাদক জলেন নাৰ্জাৰীয়ে কয়- তামুলপুৰ আঞ্চলিক গ্ৰামদান সংঘ প্ৰতিষ্ঠাৰ সময়ত কেইবাগৰাকী স্থানীয় বিশিষ্ট সমাজকৰ্মী লগত লৈ প্ৰয়াত পদ্মশ্ৰী সন্মানেৰে সন্মানিত ৰবীন্দ্ৰনাথ উপাধ্যায় যথেষ্ঠ কষ্ট স্বীকাৰ কৰিছিল। সেই সময়ত অসমৰ এগৰাকী শিক্ষাবিদ, সৰ্বোদয় নেত্ৰী অমল প্ৰভা দাসৰ অৰিহণা যথেষ্ঠ আছিল। অমল প্ৰভা দাসৰ জন্ম তাৰিখটোকে তামুলপুৰ আঞ্চলিক গ্ৰামদান সংঘৰ প্ৰতিষ্ঠা দিৱস হিচাপে উদযাপন কৰা হয়। ভাষণ প্ৰসংগত নাৰ্জাৰীয়ে অনুষ্ঠান টোৰ সৰ্বাঙ্গীন উন্নয়নৰ বাবে সকলোৰে সামুহিক সহযোগিতা কামনা কৰে। সভাখনত বছৰটোৰ শ্ৰেষ্ঠ শিপিনী সকলৰ মাজত পুৰস্কাৰ বিতৰণ কৰা হয়। আজি অনুষ্ঠিত সভাখনত সংঘৰ সম্পাদক জলেন নাৰ্জাৰী,খাদী গ্ৰমোদ্যোগ বিদ্যালয়ৰ অধ্যক্ষ দুলাল সাহা,কটাহবাৰী, চন্দনপুৰ, নবিনগাঁও তৰণগাঁও, চন্দ্ৰনগৰ  গ্ৰামদানী গাঁও সভাৰ সভাপতি, সম্পাদক, সদস্য, খাদী গ্ৰামোদ্যোগ বিদ্যালয়ৰ প্ৰশিক্ষাৰ্থী সকলৰ ওপৰি কাটনী- শিপিনী সকল উপস্থিত থাকে।।